თბილისის მერის განცხადებით, მოსაზრება, რომ მერიის თანამშრომელი გიგა სოფრომაძე სამსახურიდან პოლიტიკური ნიშნით გაათავისუფლეს, ჩვეულებრივი სპეკულაციაა.

როგორც კახა კალაძემ შესაბამისი კითხვის კომენტირებისას განაცხადა, სოფრომაძეს ხელშეკრულების ვადა ამოეწურა და მისი გაგრძელების საჭიროება დღის წესრიგში აღარ იდგა.

„ის, რომ პოლიტიკური ნიშნით ვიღაც გათავისუფლდა, არის ტყუილი და ჩვეულებრივი სპეკულაცია. ის არ იყო შტატში, როგორც თანამშრომელი, იყო ხელშეკრულებით და ამოეწურა ხელშეკრულების ვადა. ის უშუალოდ მუშაობდა შშმ პირების მიმართულებით პროგრამების დანერგვაზე. დღეს, ყველა ამ პროგრამას, რომელიც დანერგილია, ჰყავს შესაბამისი ხელმძღვანელი და მისი მუშაობის აუცილებლობა არ იყო. შესაბამისად, ხელშეკრულება დასრულებულია და გაგრძელების საჭიროება არ იდგა დღის წესრიგში. ეს არის მარტივად. დანარჩენი, ვისაც რა სპეკულაციები უნდა, მისი უფლებაა“, – განაცხადა კახა კალაძემ.

მისივე თქმით, მერიაში დასაქმებულებისთვის განსხვავებული პოლიტიკური მოსაზრების გამოთქმა არასდროს შეუზღუდავთ.

„ჩვენ არავინ შეგვიზღუდავს. უამრავი ადამიანი იყო, ვისაც ჰქონდა განსხვავებული პოლიტიკური შეხედულება, აქციებზეც დადიოდა, პოლიტიკურ განცხადებებს და შეფასებებს აკეთებდა. ამის ნათელი მაგალითი არის თუნდაც ნიკა გვარამიას პარტიის ერთ-ერთი წარმომადგენელი, რომელიც ჩვენი თანამშრომელი იყო. ჩვენ თუ ისეთი მიდგომები გვქონდა, რომ პოლიტიკურად განსხვავებულ აზრს ვდევნიდით, მაშინ ამ ადამიანებსაც გავუშვებდით სამსახურიდან, მაგრამ არ გვქონია ეგ დამოკიდებულება. თუმცა, ერთი რამ მინდა ვთქვა. ის, რაც გააკეთა საჯარო სამსახურების ზოგიერთმა თანამშრომელმა, იყო ძალიან მძიმე, იმიტომ, რომ შენ შეგიძლია საკუთარი სახელით ნებისმიერი მოსაზრება გამოხატო, მაგრამ კატეგორიულად მიუღებელია, როდესაც ამას აკეთებ კოლექტიურად, საჯარო სამსახურის სახელით, აბულინგებ შენს თანამშრომლებს, აყენებ შეურაცხყოფას, რომ მოაწერონ ხელი. ამის მტკიცებულებები არსებობს. პიროვნულად ნებისმიერ ადამიანს, მიუხედავად იმისა, სად მუშაობს, შეუძლია გამოხატოს თავისი მოსაზრება“, – განაცხადა კახა კალაძემ.

„არ მგონია, ინაუგურაციის შემდგომ პერიოდს რაიმე სახის ესკალაცია მოჰყვეს. ეს არის სისხლის სამართლის დანაშაული და ასეთ სისულელეს არავინ ჩაიდენს“, – ამის შესახებ დედაქალაქის მერმა მედიასთან 29 დეკემბერს დაგეგმილი ახალი პრეზიდენტის ინაუგურაციის ცერემონიის შესახებ საუბრისას აღნიშნა.

კახა კალაძის თქმით, ქვეყანას ჰყავს ღიად და გამჭვირვალედ ჩატარებული არჩევნების წესით არჩეული პრეზიდენტი მიხეილ ყაველაშვილის სახით. 

„საქართველოს ჰყავს არჩეული ხელისუფლება. ჩვენი ქვეყნის მოსახლეობის უმრავლესობამ მხარი დაუჭირა ქვეყანაში მშვიდობას, ეკონომიკურ განვითარებას და ღირსეულ ევროპულ მომავალს. ხელისუფლებამ აირჩია პრეზიდენტი, ჩატარდა არჩევნები ღიად, გამჭვირვალედ. რა თქმა უნდა, 29-ში შედგება ინაუგურაციის ცერემონიალი,  რადგან ქვეყანას ჰყავს ახალი პრეზიდენტი მიხეილ ყაველაშვილის სახით. რაც მთავარია, ის არის პატრიოტი, სამშობლოზე შეყვარებული ადამიანი.

მნიშვნელოვანია ის, რომ ყაველაშვილი გარედან არ იმართება, განსხვავებით სალომე ზურაბიშვილისგან. ის ემსახურება სხვა ქვეყნის ინტერესებს. შემთხვევითი არ არის, რომ აშშ-ის ახლად არჩეული პრეზიდენტი დონალდ ტრამპი ერთ-ერთ გამოწვევად ასახელებს იმას, რომ მან უნდა დაამარცხოს „დიპ სტეიტი“. ეს საუბრები მოგონილი არ არის. არის კონკრეტული ძალები და ჯგუფები, ვისაც თავიანთი ხედვები აქვს, რაც ძალიან მძიმეა. არამხოლოდ ჩვენთვის არის დამაზიანებელი და მხოლოდ ჩვენთან კი არ არის ლიბერალური ფაშიზმი, არამედ ეს გაბატონებულია ევროპაშიც. ზოგადად მსოფლიოს გადალაგება უნდა მოხდეს და ყველაფერი დამშვიდდეს“, – აღნიშნა თბილისის მერმა.

რაც შეეხება კითხვას სალომე ზურაბიშვილის შესახებ, რომელიც აცხადებს, რომ პრეზიდენტის სასახლიდან გამოსვლას არ აპირებს, ხოლო ოპოზიციის წევრების განცხადებებს, რომ მას ფიზიკურად დაიცავენ, კახა კალაძის თქმით, ეს არის სისხლის სამართლის დანაშაული და ასეთი ნაბიჯის გადადგმა არავის უნდა უნდოდეს.

„არ მგონია, რომ რაიმე სახის ესკალაცია ან სიტუაციის გართულება მოჰყვეს ინაუგურაციის შემდგომ პერიოდს. გამოვრიცხავ სასახლიდან არ გამოსვლის საკითხსაც და ასეთი ნაბიჯის გადადგმას. ყველამ კარგად იცის, რომ ეს არის სისხლის სამართლის დანაშაული, რომელიც ითვალისწინებს 3-დან 15 წლამდე პატიმრობას. ვის უნდა ასეთი ნაბიჯის გადადგმა?  დარწმუნებული ვარ, ასეთ სისულელეს არავინ ჩაიდენს. ჩვენ გვესმის პროტესტიც, განსხვავებული შეხედულებებიც, მაგრამ ეს ყველაფერი მშვიდობიან ფორმებში უნდა გამოიხატებოდეს. დღეს, საქართველოს ხელისუფლება არ არის შევარდნაძის ან სააკაშვილის დროინდელი მთავრობა. არამედ ხელისუფლება თავისი ინსტიტუტებით არის ძლიერი. შესაბამისად, ჩვენ ყოველთვის კანონის ფარგლებში ვიმოქმედებთ. განსხვავებული მოსაზრების გამოხატვა ყველას მშვიდობიანი ფორმით შეუძლია. როგორც კი კანონის ჩარჩოებს გასცდება, მოჰყვება შესაბამისი რეაგირება“, – განაცხადა კახა კალაძემ. 

არიან კონკრეტული ბიზნესმენები, რომელთაც აქვთ კავშირები შესაბამის ძალებთან და ისინი საკუთარ გამორჩენას ელიან ხელისუფლებაში კოლექტიური „ნაცმოძრაობის” დაბრუნებიდან, თუმცა ეს არავითარ შემთხვევაში არ მოხდება, – ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

პრემიერის თქმით, გაუგებარია, როცა ბიზნესმენს უნდა იმ პოლიტიკური ძალის დაბრუნება, რომელიც ბიზნესის რეკეტით გამოირჩეოდა.

„ჩვენ გვაკრიტიკებენ რუსეთთან პრაგმატული პოლიტიკის გამო და თვითონ არიან ამ პრაგმატული პოლიტიკით მოსარგებლეები. აქ ჩანს, რომ მათ აქვთ უბრალოდ პოლიტიკური მიკერძოება და ეს პოლიტიკური მიკერძოება არის მთავარი მიზეზი იმისა, რომ აკეთებენ არაადეკვატურ განცხადებებს. თან რუსეთში ვაჭრობენ და თან არ გმობენ მაგალითად ევროპარლამენტის რეზოლუციას, რომლითაც არის მოთხოვნილი რუსეთისთვის სანქციების დაწესება. ერთადერთ რამეზე შეიძლება მიანიშნებდეს ასეთი ორმაგი სტანდარტი, მათ აქვთ პოლიტიკური მიკერძოება, მათაც, ისევე, როგორც დანარჩენ 750 000 ამომრჩეველს, სურდათ, ხელისუფლებაში დაბრუნებულიყო კოლექტიური „ნაცმოძრაობა”, რასაც ვერ მიაღწიეს და ახლა ამ იმედგაცრუების გამო ორმაგი სტანდარტებით საუბრობენ. როცა ბიზნესმენს უნდა იმ პოლიტიკური ძალის დაბრუნება, რომელიც პირველ რიგში, ბიზნესის რეკეტით გამოირჩეოდა, ეს არის, რბილად რომ ვთქვათ, გაუგებარი, თუმცა ამას შეიძლება ჰქონდეს ერთადერთი ახსნა, არიან კონკრეტული ბიზნესმენები, რომელთაც აქვთ კავშირები შესაბამის ძალებთან და ისინი საკუთარ გამორჩენას ელიან ხელისუფლებაში კოლექტიური „ნაცმოძრაობის” დაბრუნებიდან, თუმცა, ეს არავითარ შემთხვევაში არ მოხდება. ბიზნესის თავისუფლება ჩვენი მხრიდან იქნება აბსოლუტურად უზრუნველყოფილი”, – განაცხადა პრემიერმა.

ჩვენი მოვალეობაა, გავაფრთხილოთ სალომე ზურაბიშვილი, რომ არ ჩაიდინოს დანაშაული და შესაბამისად, არ მოუწიოს თავადაც ამ ულამაზო სურათში მონაწილეობა, – ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა. 

როგორც მთავრობის მეთაურმა აღნიშნა, ძალიან ცუდი სურათი იქნება მისი გამოყვანა რეზიდენციიდან ძალით და გადაყვანა სასჯელაღსრულების დაწესებულებაში.

„სალომე ზურაბიშვილის და სხვა შესაბამისი პირების გაფრთხილება არის ჩვენი მოვალეობა. ეს არის არა მარტო ჩვენი უფლება, არამედ მოვალეობა. ნებისმიერი ხელისუფლება უნდა იყოს ორიენტებული არა რეპრესიისკენ, არამედ დანაშაულის პრევენციისკენ. ჩვენი ამოცანა ამ შემთხვევაში არის დანაშაულის პრევენცია. ჩვენ უნდა გავაფრთხილოთ სალომე ზურაბიშვილი. ძალიან ცუდი სურათი იქნება, ჩვენ რომ მოგვიწიოს მისი გამოყვანა რეზიდენციიდან ძალით და გადაყვანა სასჯელაღსრულების დაწესებულებაში. რა თქმა უნდა, ეს არ არის სასურველი სურათი, ეს შეიძლება, აწყობდეთ სალომე ზურაბიშვილის პატრონებს, შეიძლება, მისცენ ასეთი დავალება, მაგრამ ეს არ იქნება ლამაზი. ესეც ქვეყანას არ დააქცევს, არაფერი განსაკუთრებული, უბრალოდ არ იქნება ლამაზი სურათი. აქედან გამომდინარე, ჩვენი მოვალეობაა, გავაფრთხილოთ სალომე ზურაბიშვილი, რომ არ ჩაიდინოს დანაშაული და შესაბამისად, არ მოუწიოს თავადაც ამ ულამაზო სურათში მონაწილეობა”, – განაცხადა ირაკლი კობახიძემ.

საპარლამენტო უმრავლესობის ლიდერის კაბინეტის უფროსი ვახტანგ ჩოჩია ოთხიდან სამი ოპოზიციური პარტიის მიერ სახელმწიფო დაფინანსების მიღებას აფასებს.

„ისინი აგრძელებენ იმ სიცრუის ნარატივს, რომლითაც ცდილობენ, რომ საზოგადოების მანიპულაცია მოეხდინათ. ისინი ამბობენ და აცხადებენ, რომ არ აღიარებენ არჩევნების ლეგიტიმაციას, თუმცა, აღიარებენ იმ სახელმწიფო ინსტიტუტებს და ლეგიტიმურობას, რომლებსაც თავად პარლამენტი ანიჭებდ ამ ლეგიტიმურობას. შესაბამისად, უხერხულ და დისონანსის პროცესში არიან შესულები“, – განაცხადა ვახტანგ ჩოჩიამ.

„ნაციონალურმა მოძრაობამ“, „ლელომ“ და გახარიას პარტიამ არჩევნებზე მიღებული ხმები ფაქტობრივად აღიარეს. ისინი სახელმწიფო ბიუჯეტიდან მილიონობით ლარს მიიღებენ.

კანონმდებლობის თანახმად, 26 ოქტომბრის საპარლამენტო არჩევნების შედეგების საფუძველზე, ახალარჩეული პარლამენტის უფლებამოსილების ცნობის მეორე დღიდან, 26 ნოემბრიდან სახელმწიფო დაფინანსების მიღების უფლება მოიპოვა შემდეგმა შვიდმა პოლიტიკურმა გაერთიანებამ – „ქართული ოცნება – დემოკრატიული საქართველო“, „ერთიანი ნაციონალური მოძრაობა“, „კოალიცია ცვლილებისთვის გვარამია მელია გირჩი დროა“, „გახარია საქართველოსთვის“, „ლელო საქართველოსთვის“, „საქართველოს პატრიოტთა ალიანსი“, „ახალი პოლიტიკური ცენტრი – გირჩი“.

დაფინანსების მიღებაზე უარი განაცხადა პარტიამ „კოალიცია ცვლილებისთვის გვარამია მელია გირჩი დროა“.

საპარლამენტო არჩევნების შედეგების საფუძველზე მიღებულ დაფინანსებაზე უარის თქმის ვადა პოლიტიკურ გაერთიანებებს 26 დეკემბერს 18:00 საათზე ამოეწურათ.

ეკონომიკური თვალსაზრისით 2025 წელი იქნება ძალიან კარგი, არანაკლებ კარგი, ვიდრე იყო წინა წლები ამ ოთხი წლის მანძილზე და ვფიქრობ, ეკონომიკური ტემპების, დამატებით გაზრდაც შეგვიძლია, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა “იმედი LIVE”-ში განაცხადა.

პრემიერის თქმით, ოპონენტების აზრი, რომ 2025-ში ვითარება უფრო გამძაფრდება და ეკონომიკა წავა უკან, მხოლოდ მათი ოცნებებია, რომლებსაც ახდენა არ უწერია.

„მე ვარ აბსოლუტურად დარწმუნებული, რომ ყველაფერი იქნება ძალიან კარგად ყველა კუთხით. ერთი, რომ ჩვენი სურვილია ურთიერთობების გადატვირთვა და ამის რესურსი არსებობს, განსაკუთრებით იმ ფონზე, თუ მალე დასრულდება უკრაინაში ომი. ვფიქრობ, წინ ვერაფერი დაუდგება ურთიერთობების გადატვირთვას და ჩვენ ამისთვის ვართ თავიდან ბოლომდე მზად. რაც შეეხება ეკონომიკას, ამ ბოლო ოთხი წლის განმავლობაში ჩვენ გამოვიარეთ რევოლუციის ოთხი მცდელობა და ამის მიუხედავად ჩვენ 40 მილიარდით გავზარდეთ საქართველოს ეკონომიკა. პირველ ადგილზე გავედით ეკონომიკური ზრდით, არა მარტო ფართო რეგიონში, არამედ ევროპის მასშტაბით. აქ ველოდებით ჩვენ მეტ სიმშვიდესაც 2025 წელს და რა თქმა უნდა, ეს დამატებით ხელს შეუწყობს კიდევ უფრო მეტ სტიმულირებას ეკონომიკისთვის.

შესაბამისად, მე ვფიქრობ, რომ ეკონომიკური თვალსაზრისით 2025 წელი იქნება ძალიან კარგი, არანაკლებ კარგი, ვიდრე იყო წინა წლები ამ ოთხი წლის მანძილზე. ვფიქრობ, რომ დამატებით გაზრდაც შეგვიძლია ეკონომიკური ტემპების. ძალიან ბევრი პროექტი გვაქვს, რომელიც არის უკვე დაწყებული, ან ძალიან მალე დაიწყება. ძალიან მასშტაბურ პროექტებზე ვმუშაობთ, ეს ეხება იგივე აეროპორტის პროექტს, საუნივერსიტეტო რეფორმას და ა.შ. ყველა მიმართულებით გვექნება ძალიან სერიოზული ძვრები. ოთხი წლის თავზე ჩვენი ქვეყანა განვითარების სრულიად სხვა დონეზე გადავა. ჩვენი პროგრამა ითვალისწინებს ამას, ოთხი წლის თავზე ქვეყანა იქნება განვითარების სრულიად სხვა ეტაპზე და დონეზე და მომავალი წელი იქნება ძალიან კარგი რესტარტი ამისთვის. ყველაფერი გაკეთდება იმისთვის, რომ მშვიდობა შევინარჩუნოთ. ბევრად უფრო რთული წლები გამოვიარეთ გასული ოთხი წლის მანძილზე. მშვიდობას აუცილებლად შევინარჩუნებთ, სიმშვიდეს შევინარჩუნებთ ჩვენს ქვეყანაში და ეკონომიკური ზრდა კიდევ უფრო მეტად დაჩქარდება. ეს არის ჩვენი პასუხისმგებლობა. ამისთვის კონკრეტული გეგმა გვაქვს გაწერილი ჩვენს სამთავრობო პროგრამაში და ყველაფერს გავაკეთებთ, რომ ამ პროგრამის თითოეული პუნქტი თავიდან ბოლომდე პირნათლად შესრულდეს”, – განაცხადა ირაკლი კობახიძემ.