რა თქმა უნდა, ჩვენ ქართველი ხალხის გვერდით ვდგავართ , – ამის შესახებ აშშ-ის სახელმწიფო დეპარტამენტის პრესსპიკერმა, მეთიუ მილერმა ბრიფინგზე განაცხადა.

ამასთან, მილერმა კიდევ ერთხელ ისაუბრა საქართველოს მთავრობის ქმედებების საპასუხოდ აშშ-ის მიერ უკვე გატარებულ ზომებზე და აღნიშნა, რომ საჭიროების შემთხვევაში მათ დამატებითი ზომების გამოყენება “არ მოერიდებათ“.

„რა თქმა უნდა, ჩვენ ქართველი ხალხის გვერდით ვდგავართ. ჩვენ ნათლად განვაცხადეთ, რომ ქართველი ხალხის გვერდით ვდგავართ. ჩვენ ნათლად განვაცხადეთ, რომ მხარს ვუჭერთ მათ ევროკავშირში გაწევრიანების ამბიციებს, ევროპულ და ატლანტიკურ პარტნიორებთან ინტეგრაციის გაგრძელებას.

მოგეხსენებათ, რომ მნიშვნელოვანი ოდენობის დახმარება, რომელსაც საქართველოს მთავრობას ვუწევთ, გადახედვის ქვეშ არის და ჩვენ აღნიშნული დახმარების 95 მილიონი დოლარი შევაჩერეთ, იმ ნაბიჯების გამო, რომელიც ვნახეთ, რომ მათ გადადგეს. ჩვენ გავაგრძელებთ, განვიხილოთ არის თუ არა დამატებითი ზომები, რომლებიც სათანადო იქნება და თუ ასე იქნება, ჩვენ მათი გამოყენება არ მოგვერიდება“, – განაცხადა მეთიუ მილერმა.

აშშ-ის სახელმწიფო დეპარტამენტის პრესსპიკერმა აღნიშნა, რომ შესაძლო დამატებითი სანქციების მიღების შესახებ განცხადებას არ გააკეთებდა.

არ დავიღლებით მანამ, სანამ არ დავიბრუნებთ სამშობლოს და სანამ შულავერის კომიტეტს, რომელსაც ხელმძღვანელობს ბიძინა ივანიშვილი, არ ჩამოვაშორებთ ხელისუფლებიდან და ისევ დამოუკიდებელ საქართველოს არ დავაბრუნებთ, – ამის შესახებ საქართველოს მეოთხე პრეზიდენტმა, გიორგი მარგველაშვილმა აქციაზე განაცხადა.

გიორგი მარგველაშვილის განცხადებით, იქნება მტკიცე ბრძოლა, რადგან უკვე აღარ არის კომპრომისის შესაძლებლობა.

„ვითხოვთ ახალ არჩევნებს, ვითხოვთ თითოეული ჩვენგანი, ითხოვს პოლიტიკური სპექტრი. გვერდში გვიდგანან ჩვენი საერთაშორისო პარტნიორები. დღეს თითოეული თქვენგანი აქ დგას საკუთარი თავის გულისთვის, საკუთარი ოჯახისთვის, სამშობლოსთვის, რომლის დათმობაც, იმ ჯგუფისთვის, რომელსაც ჰქვია „ქართული ოცნება“, მაგრამ რეალურად არის შულავერის კომიტეტი, იქნება უარის თქმა ყველაფერზე, იმაზე, რაც ჩვენ ვართ, ჩვენს იდენტობაზე, ჩვენს წარსულზე, ჩვენს მომავალზე, ეს რომ დავთმოთ, ვეღარასდროს ვეღარ ვიქნებით წელში გასწორებულები. ჩვენ ვიქნებით მომაკვდავი და სისხლში ჩახშობილი, პუტინის იმპერიის მსახურები. შეგვიძლია ჩვენ ასე ცხოვრება? არა, ნამდვილად არ შეგვიძლია. ეს ბრძოლა არის უალტერნატივო. ეს ბრძოლა არის მხოლოდ ისეთი ბრძოლა, რომელიც დამთავრდება ჩვენი გამარჯვებით. ეს ბრძოლა იქნება გრძელი და დამქანცავი, ამ ბრძოლას ექნება „პიკები“ და იქნება ჩავარდნები, მაგრამ ჩვენ მხოლოდ გამარჯვება შეგვიძლია, ჩვენს უკან აღარ არის შესაძლებლობა კომპრომისის, ამიტომ ჩვენ ვიდგებით აქ ძალიან მტკიცედ.

მე მინდა ვთქვა, რომ ამ ბრძოლაში ჩვენ ყველანი, ნელ-ნელა, თითოეული ჩვენგანი ვიპოვით ჩვენს თავს, ვიპოვით ფორმას, რომლითაც გამოვხატავთ ჩვენი სამშობლოსთვის სიყვარულს და ერთგულებას. ვიპოვით ჩვენს გზას ამ ბრძოლაში, რომელსაც საქართველოს დამოუკიდებლობის დაბრუნება ჰქვია. ჩვენ ამ ბრძოლაში, ბუნებრივია, წინ წაგვიძღვებიან ჩვენი პოლიტიკოსები და მოდით, პირველ რიგში, გავიაზროთ, რამხელა გზა გაიარეს მათ ამ ერთ კვირის განმავლობაში. ჩამოყალიბდნენ ძლიერ, ორგანიზებულ სტრუქტურად, რომელიც იწყებს საქართველოში წინააღმდეგობას და იწყებს საქართველოში ახალ ეროვნულ მოძრაობას, საქართველოს სსრკ-ს ჩამოშლას და დამოუკიდებელი საქართველოს დაბრუნებას.

გავამხნეოთ ჩვენი ლიდერები, რომლებმაც მოიგეს არჩევნები თქვენთან ერთად. მოიგეს არჩევნები და არ დათმობენ ამ მოგებას იმიტომ, რომ ეს თითოეული თქვენგანის მოგებაა. ვთქვათ, რომ ჩვენ ვიქნებით მათ გვერდით მტკიცედ და არ დავიღლებით მანამ, სანამ არ დავიბრუნებთ სამშობლოს და სანამ შულავერის კომიტეტს, რომელსაც ხელმძღვანელობს ბიძინა ივანიშვილი, არ ჩამოვაშორებთ ხელისუფლებიდან და ისევ დამოუკიდებელ საქართველოს არ დავაბრუნებთ. მიყვარხართ და თქვენთან ერთად ვიქნები ამ ბრძოლის თითოეულ დღეს და თითოეულ საათს, გამარჯვების დაბრუნებამდე“, – განაცხადა გიორგი მარგველაშვილმა.

გეგმა არის გამარჯვების დაბრუნება და ხელახალი არჩევნები. გეგმა არის მხოლოდ და მხოლოდ შეუპოვარი ბრძოლა გამარჯვების დაბრუნებისთვის , – ამის შესახებ „ერთიანობა – ნაციონალური მოძრაობის“ თავმჯდომარემ თინა ბოკუჩავამ რუსთაველის გამზირზე სიტყვით გამოსვლის დროს განაცხადა.

ბოკუჩავას თქმით, ბიძინა ივანიშვილის გეგმა კარგად გამოჩნდა დღეს. როგორც მან აღნიშნა, ივანიშვილი იმისთვის იხდიდა წინასაარჩევნოდ ბოდიშს, რომ საქართველოს რუკიდან ოკუპირებული ტერიტორიები გაექრო.

„26 ოქტომბერს ბიძინა ივანიშვილმა არა მხოლოდ მოგვპარა არჩევნების უფლება, ევროპული მომავალი, არა მხოლოდ ჩაატარა რუსული სპეცოპერაცია, არამედ დაიჯერა, რომ ქართველი ხალხი ამ ქურდობას შეეგუება. ჩვენი შვილები აუცილებლად გაიზრდებიან ევროპულ საქართველოში, ყველაფერს გავაკეთებთ, რომ ამას მივაღწიოთ! ეს გვაერთიანებს დღეს და ამ სიმართლით, ამ შეუპოვრობით, ამ ბრძოლით აუცილებლად გავიმარჯვებთ.

ძალიან მეამაყება და ძალიან მიხარია, რომ მიუხედავად ივანიშვილის მცდელობისა, საზოგადოება დაეყო და ადამიანები ერთმანეთთან დაეპირისპირებინა, ჩვენ დღეს ვდგავართ ერთად, მათ შორის, ერთად დგას ქართული ოპოზიცია, რომლებსაც თქვენ ნდობა გამოუცხადეთ და რომლებიც აირჩიეთ იმისთვის, რომ მართონ ეს ქვეყანა და გაიყვანონ ევროპულ სამშვიდობოს. ჩვენ ვალდებული ვართ, რომ ის გამარჯვება დავიბრუნოთ, რომელსაც ივანიშვილი გვპარავს.

გეგმა არის გამარჯვების დაბრუნება და ხელახალი არჩევნები. გეგმა არის მხოლოდ და მხოლოდ შეუპოვარი ბრძოლა გამარჯვების დაბრუნებისთვის. დღეს ვნახეთ, რა გეგმა აქვს ივანიშვილს, ეს კიდევ ერთხელ ძალიან ცხადად გამოჩნდა – მოღალატე პაპუაშვილის მიერ ნაჩვენებ საქართველოს რუკაზე, სადაც ოკუპირებული რეგიონები უკვე გამქრალია. ამისთვის იხდიდნენ წინასაარჩევნოდ ბოდიშს, ამასთან შეგუებას ცდილობდნენ ქართველი ხალხის, მაგრამ არ დავთმობთ არც ჩვენს ტერიტორიებს, არც ჩვენს გამარჯვებას, არც ჩვენს ევროპულ მომავალს და ამ ბრძოლაში ჩვენ არ დავიღლებით“, – განაცხადა თინა ბოკუჩავამ.

ცენტრალური საარჩევნო კომისიის (ცესკო) თავმჯდომარე გიორგი კალანდარიშვილი და მისი მოადგილე გიორგი შარაბიძე „არჩევნებზე დამკვირვებელ ორგანიზაციათა ევროპული ქსელის“ (ENEMO) სადამკვირვებლო მისიის წარმომადგენლებს შეხვდნენ. მხარეებმა 26 ოქტომბრის პარლამენტის არჩევნები და მასთან დაკავშირებული საკითხები განიხილეს.

გიორგი კალანდარიშვილმა შეხვედრის მიმდინარეობისას დეტალურად ისაუბრა 26 ოქტომბრის არჩევნების შემდეგ ადმინისტრაციის მიმართ გამოთქმული ბრალდებების და დეზინფორმაციული კამპანიის შესახებ. მან მისიის წარმომადგენლებს ამ მიმართულებით საარჩევნო ადმინისტრაციის პოზიციაც გააცნო.

“26 ოქტომბრის არჩევნების შემდეგ საარჩევნო ადმინისტრაცია აგრძელებს საერთაშორისო სადამკვირვებლო ორგანიზაციებთან შეხვედრებს, რომლის ფარგლებშიც აქტიურად ეცნობა იმ მიგნებებსა და რეკომენდაციებს, რომლებიც ორგანიზაციებს დაკვირვების შედეგად აქვთ. რა თქმა უნდა, აღნიშნული მხოლოდ საარჩევნო გარემოს გაუმჯობესებისკენ არის მიმართული. დღევანდელ შეხვედრაზე მისიის წარმომადგენლებს მივაწოდეთ დეტალური ინფორმაცია ყველა მნიშვნელოვანი საკითხის შესახებ, ასევე ვრცლად ვისაუბრეთ ბრალდებებისა და დეზინფორმაციული კამპანიის შესახებ. ჩვენ მოვისმინეთ მათი მოსაზრებები მიმდინარე მოვლენებთან დაკავშირებით, მნიშვნელოვანია აღინიშნოს, რომ ორგანიზაცია ადმინისტრაციის აქტივობებს და საქმიანობას დადებითად აფასებს“,- განაცხადა გიორგი კალანდარიშვილმა შეხვედრის დასრულებისას.

თავის მხრივ, „არჩევნებზე დამკვირვებელ ორგანიზაციათა ევროპული ქსელის“ (ENEMO) სადამკვირვებლო მისიის წარმომადგენლებმა ცესკოს ხელმძღვანელ პირებს არჩევნების ანგარიშის წინასწარი მიგნებები და რეკომენდაციები გააცნეს. აღნიშნულ ანგარიშში ადმინისტრაციის საქმიანობა და აქტივობები დადებითად არის შეფასებული. საერთაშორისო სადამკვირვებლო ორგანიზაციის წარმომადგენლებმა მადლობა გადაუხადეს ადმინისტრაციას თანამშრომლობისთვის და ინფორმაციის კოორდინირებულად გაცვლისთვის.

„არჩევნებზე დამკვირვებელ ორგანიზაციათა ევროპული ქსელი“ 26 ოქტომბრის პარლამენტის არჩევნებს როგორც მოკლევადიანი, ასევე გრძელვადიანი მისიებით აკვირდებოდა.

შეხვედრა დღეს ცენტრალურ საარჩევნო კომისიაში გაიმართა და მას „არჩევნებზე დამკვირვებელ ორგანიზაციათა ევროპული ქსელის“ (ENEMO) მისიის ხელმძღვანელი ზლატკო ვუოვიჩი, მისიის ხელმძღვანელის მოადგილე კრისტინა კოსტალაჩი, საარჩევნო ადმინისტრაციის ანალიტიკოსი ბეატრიქს ბუნექამპი და იურიდიული ექსპერტი მარიამ ლორთქიფანიძე ესწრებოდნენ. შეხვედრას ასევე ესწრებოდა ცესკოს სტრატეგიული კომუნიკაციების დეპარტამენტის საერთაშორისო და პროტოკოლის განყოფილების უფროსი თამარ კაპანაძე.

საქართველოს რუკასთან დაკავშირებით შალვა პაპუაშვილის ბრიფინგიდან შეცდომაში შემყვანი ფოტოები ვრცელდება, – ამ სათაურით ორგანიზაცია „მითების დეტექტორი“ აქვეყნებს მასალას.

ორგანიზაციის მიერ გავრცელებული ინფორმაციის თანახმად, 4 ნოემბერს სოციალურ ქსელში, მათ შორის, მედიების ფეისბუქგვერდებზე ფართოდ გავრცელდა ინფორმაცია, რომ ბრიფინგზე, პარტია „ქართული ოცნების“ ლიდერის, შალვა პაპუაშვილის პრეზენტაციაზე საქართველოს რუკა ოკუპირებული ტერიტორიების, აფხაზეთისა და ცხინვალის რეგიონის გარეშე იყო წარმოდგენილი. ინფორმაციას თან ახლდა ფოტოები, რომლებზეც ოკუპირებული ტერიტორიები არ შეიმჩნევა.

„მითების დეტექტორის“ გვერდზე გავრცელებული ინფორმაციის მიხედვით: „შეცდომაში შემყვანია ინფორმაცია, თითქოს შალვა პაპუაშვილმა ბრიფინგზე წარმოადგინა პრეზენტაცია, რომელზეც საქართველოს რუკა დროებით ოკუპირებული ტერიტორიების გარეშეა გამოსახული. პარტიის პრესსამსახურის მიერ მოწოდებულ იმავე პრეზენტაციაში ჩანს, რომ მასში აფხაზეთი და ცხინვალის რეგიონიცაა გამოსახული, თუმცა ისინი ნაცრისფრადაა აღნიშნული, რადგან ოკუპირებულ ტერიტორიებზე არჩევნები არ ჩატარებულა. ასევე, მედიაში გავრცელებული მასალებიდანაც ჩანს, რომ გარკვეული რაკურსით გადაღების შემთხვევაში რუკაზე აღნიშნული ტერიტორიების კონტურებიც ჩანს“.

„4 ნოემბერს შალვა პაპუაშვილმა ბრიფინგი გამართა. მან არაერთ საკითხზე ისაუბრა, მათ შორის, საქართველოში ჩატარებული საპარლამენტო არჩევნების შედეგებისა და წინასაარჩევნო პერიოდის შესახებ.

ერთ-ერთ ეპიზოდში, როდესაც პაპუაშვილი საარჩევნო დეზინფორმაციის შესახებ საუბრობს, ეკრანზე აჩვენებს სლაიდს, რომელზეც საქართველოს რუკა ჩანს. რუკასთან ერთად, დატანილია ინფორმაცია „ქართული ოცნების“ დელეგატებისა და მათი აქტივობის შესახებ. მისი თქმით, არჩევნებსა და გარკვეულ რეგიონში „ქართული ოცნების“ მაღალ მხარდაჭერასთან დაკავშირებით ქსენოფობიური კამპანია მიმდინარეობს. სინამდვილეში კი, მან არჩევნებში პარტიის დიდი რაოდენობით ხმების მოპოვება დელეგატების აქტიურობას დაუკავშირა.

შალვა პაპუაშვილის ოფიციალურ ფეისბუქგვერდზე ჩართული პირდაპირი ეთერის ყურებისას რუკაზე საქართველოს ოკუპირებული ტერიტორიები შეუმჩნეველია და მათ მაგივრად თეთრი ფონია. „ქართული ოცნების“ აღმასრულებელმა მდივანმა, მამუკა მდინარაძემ ფეისბუქზე დაწერა, რომ პრეზენტაციაზე საქართველოს ოკუპირებული ტერიტორიები ღია ფერით იყო აღნიშნული, რაც „კამერებში კარგად არ გამოჩნდა“.

ონლაინგამოცემა „პუბლიკამ“ პაპუაშვილის ბრიფინგიდან ფოტოები გაავრცელა, რომელზეც შეიმჩნევა, რომ ოკუპირებული ტერიტორიები ნაცრისფრადაა აღნიშნული და ისინი თეთრ ფონზე რთულად გაირჩევა. მედიის ცნობით, ზოგიერთი რაკურსიდან პრეზენტაციაზე საქართველოს ოკუპირებული ტერიტორიები მართლაც არ შეიმჩნევა.

„ქართული ოცნების“ პრესსამსახურმა „მითების დეტექტორს“ მიაწოდა პრეზენტაცია, რომელიც შალვა პაპუაშვილმა 4 ნოემბრის ბრიფინგზე წარადგინა. პრეზენტაციაზე ჩანს, რომ რუკაზე ოკუპირებული ტერიტორიები აღნიშნულია, თუმცა დანარჩენი ტერიტორისგან განსხვავებულად, ნაცრისფრადაა მონიშნული.

პრეზენტაციის მომდევნო გვერდზე პაპუაშვილმა აჩვენა, რომ ოპოზიციას საქართველოს მასშტაბით დელეგატები არ ჰყოლია, თუმცა არაერთი ვიზიტი ჰქონდათ ევროპასა და აშშ-ში. აღსანიშნავია, რომ მომდევნო გვერდზე საქართველოს რუკა სრულად ნაცრისფერი იყო. მისი წარდგენისას, ოკუპირებული ტერიტორიების მსგავსად, ის კადრებში არ ჩანდა და მის მაგივრად მხოლოდ თეთრი ფონი იყო. 

აღნიშნულ ინფორმაციას თავად შალვა პაპუაშვილიც გამოეხმაურა. მისი განმარტებით, პრეზენტაციაზე ოკუპირებული ტერიტორიები განსხვავებული ფერით გამოსახეს, რადგან იქ არჩევნები ვერ ტარდება, შესაბამისად, აფხაზეთი და ცხინვალის რეგიონი რუხი ფერითაა გამოსახული. ლურჯად კი ის ტერიტორიაა აღნიშნული, სადაც საქართველოს საპარლამენტო არჩევნები ჩატარდა და „ქართულ ოცნებას“ დელეგატები ჰყავდა“, – ნათქვამია ორგანიზაცია „მითების დეტექტორის“ მიერ გავრცელებულ ინფორმაციაში.

საქართველოს თუ უნდა, შეინარჩუნოს სტრატეგიული ორიენტაცია ევროკავშირის მიმართულებით, ჩვენ გვჭირდება კონკრეტული ქმედებები ხელისუფლების მხრიდან,- ამის შესახებ ევროკომისიის პრეზიდენტი ურსულა ფონ დერ ლაიენი სოციალურ ქსელში წერს.

მისი ინფორმაციით, ის საქართველოს პრეზიდენტს, სალომე ზურაბიშვილს ესაუბრა.

„ახლახან ვესაუბრე პრეზიდენტ სალომე ზურაბიშვილის. არჩევნების შემდგომი ვითარება ისევ შემაშფოთებელია. თუ საქართველოს უნდა, შეინარჩუნოს სტრატეგიული ორიენტაცია ევროკავშირის მიმართულებით, ჩვენ გვჭირდება კონკრეტული ქმედებები ხელისუფლების მხრიდან. ჩვენი გაფართოების ანგარიში ამ გზას აჩვენებს“, – წერს ურსულა ფონ დერ ლაიენი სოციალურ ქსელში.