არის ისეთი პრობლემები, რაც ჩვენც გვაღელვებს – ბევრი ადამიანი დაშავდა, დაშავდნენ პოლიციელებიც, მაგრამ ამ ჯახის ერთ-ერთი ორგანიზატორი პირადად სალომე ზურაბიშვილია, – ამის შესახებ პარლამენტის პირველმა ვიცე-სპიკერმა გია ვოლსკიმ განაცხადა.

მისი თქმით, ასეთი შეჯახება როცა ხდება, სადაც არიან დაშავებულები, პასუხი ამის ორგანიზატორებს უნდა მოეთხოვოს, სალომე ზურაბიშვილი კი პასუხს სთხოვს მათ, ვინც ქვეყანას იცავს იმისაგან, რომ უკანონობა, ძალადობრივი რევოლუცია, სახელმწიფოს მექანიზმების ჩამოშლა და მოსპობა არ მოხდეს.

„სალომე ზურაბიშვილი იმას ვერ გაიმეორებს, რაც „როიტერთან“ თქვა, როცა მას ჰკითხეს – რით მტკიცდება, რომ რუსეთის რესურსი არეულია არჩევნებში და რის შედეგადაც „ქართულმა ოცნებამ“ გაიმარჯვა. ამაზე ვერ ისაუბრებს, რადგან მას ეს მასალა არ აქვს და ეს განცხადება აბსოლუტური სიცრუე იყო ისევე, როგორც განცხადება იმასთან დაკავშირებით, რომ თურმე, ამერიკის შეერთებულ შტატებშიც რუსეთის ჩარევით მოხდა არჩევნების გაყალბება და ტრამპის ჯგუფი მოვიდა, რომელსაც სულ ახლახან, პარიზში ჩასული ასე ელაქუცებოდა. მას შეუძლია იმაზე ილაპარაკოს, რომ მომიტინგეების გარკვეული ნაწილი დაშავდა და ზოგიერთი პასუხისგებაშია მიცემული იმიტომ, რომ რეალურად საქმე რევოლუციასთან და სახელმწიფო გადატრიალების მცდელობასთან ჰქონდა. საუბარი ამ თემაზე იქნება. რა საკვირველია, არის ისეთი პრობლემები, რაც ჩვენც გვაღელვებს – ბევრი ადამიანი დაშავდა. დაშავდნენ პოლიციელებიც, მაგრამ ამ ჯახის ერთ-ერთი ორგანიზატორი, სადაც აუცილებლად მოხდება ადამიანის დაშავება, რომელ ქვეყანაშიც არ უნდა ხდებოდეს ეს, პირადად სალომე ზურაბიშვილია. ის პირადად დამნაშავე იმაში, რაც მოხდა. ვინმე თუ არის დაშავებული, მით უმეტეს, თუ ვინმე ისეთი, რომელსაც ბრალი არაფერში მიუძღვის, ყველაფერ ამაში იმ ადამიანების დიდი წვლილი დევს, რომლებმაც ეს შეჯახება დაგეგმეს და განახორციელეს. საფრანგეთში ასეთი შეჯახების დროს 11 ადამიანი დაიღუპა, ორასმა უმძიმესი დაზიანება მიიღო, ბევრმა თვალი დაკარგა, შვიდი ათასი პასუხისგებაშია მიცემული. როდესაც ასეთი შეჯახება ხდება, პასუხი ამის ორგანიზატორებს უნდა მოვთხოვოთ და დღეს სალომე ზურაბიშვილი პასუხს სთხოვს მათ, ვინც ქვეყანას იცავს იმისაგან, რომ უკანონობა, ძალადობრივი რევოლუცია, სახელმწიფოს მექანიზმების ჩამოშლა და მოსპობა არ მოხდეს“, – განაცხადა გია ვოლსკიმ.

კინორეჟისორი გოგა ხაინდრავა ლიეტუვის პრეზიდენტს, გიტანას ნაუსედას, ლიეტუვის პრემიერ-მინისტრს, ინგრიდა შიმონიტეს, ლიეტუვის საგარეო საქმეთა მინისტრს, კიასტუსის ბუდრისსა და საქართველოში ლიეტუის ელჩს, დარიუს ვიტკაუსკას წერილით მიმართავს.

„მინდა, საგანგებოდ აღვნიშნო ევროპული პორნოლიბერალიზმის ისტორიაში უპრეცედენტო გადაწყვეტილება. ლიეტუვის ხელისუფლებამ სანქციები დაუწესა ადამიანს იმ მიზეზით, რომ ის არის მშობელი. თქვენ დაასანქცირეთ საქართველოს მოქალაქე გიორგი კობახიძე მხოლოდ იმის გამო, რომ ის არის საქართველოს პრემიერ-მინისტრის, ირაკლი კობახიძის მამა. მინდა, გაგახსენოთ, რომ მსგავსი სამარცხვინო გადაწყვეტილება არც საბჭოთა ტოტალიტარულ და არც ნაცისტურ რეჟიმებს არ განუხორციელებიათ! თუმცა თუ გავითვალისწინებთ თანამედროვე ლიეტუვის იდეოლოგების, ევროსკავშირის დეპუტატების, საბჭოთა კავშირის კომუნისტური პარტიის ცენტრალური კომიტეტის პირველი მდივნის, მიხეილ გორბაჩოვის თანამებრძოლების, ამხანაგების – იუნკევიჩიანეს და კუბილიუსის ღვაწლსა და როლს საბჭოთა კავშირში ЗА ПЕРЕСТРОЙКУ-სთვის ბრძოლაში, უნდა ვივარაუდოთ, რომ თქვენ მიერ სანქცირებულთა სიაში მოხვედრილი ადამიანების ხვედრი გასაკვირად ლმობიერია.

თქვენი მხრიდან შემდეგი მოსალოდნელი ნაბიჯი შეიძლება ვივარაუდოთ ჰააგის საერთაშორისო სასამართლოში სარჩელის შეტანა, რათა საქართველოს მოქალაქე მამაკაცებს აეკრძალოთ შვილების ყოლა, ვინძლო არ მოხდეს მათ მიერ პოტენციური პრემიერ-მინისტრის ჩასახვა. რაც შეეხება თქვენი მონა-მორჩილის სანქცირების პროცესს, თუ თქვენ გადაწყვეტთ ჩემი მშობელი მამის დასანქცირებას ჩემი გაჩენისათვის, აუცილებლად შესაბამის ბრძანებაში მიუთითეთ: სანქცირებულია – ПОСМЕРТНО! ვინაიდან ჩემი მამა გარდაცვლილია.

P.S. თუ აღმოჩნდა, რომ პუტინის რუსეთთან ღვინით ვაჭრობის პროცესში თქვენი მარაგები იწურება და მოსალოდნელია შეფერხება, მზად ვართ, მადლიერების ნიშნად, ჩვენი ოჯახური საწარმოს, „ხაინდრავას მარნის“ მარაგებიდან შეღავათიან ფასებში მოგაწოდოთ ქართული ღვინის საუკეთესო ნიმუშები. ლიეტუველი ხალხისადმი ტრადიციული პატივისცემით, კინორეჟისორი გიორგი ხაინდრავა“, – აღნიშნულია წერილში.

ქართველი ხალხი ავლენს თავის უდავო ერთგულებას დემოკრატიული ფასეულობებისა და ევროპული მომავლის მიმართ. ევროკავშირი არ მიატოვებს მათ, – ამის შესახებ დემოკრატიისა და დემოგრაფიის საკითხებში ევროკომისიის ვიცე-პრეზიდენტმა, დუბრავკა შუიცამ ევროპარლამენტში განაცხადა, სადაც მან საქართველოსთან დაკავშირებული დებატების დროს განცხადება საგარეო საქმეთა და უსაფრთხოების საკითხებში ევროკავშირის უმაღლესი წარმომადგენლის, კაია კალასის სახელით გააკეთა.

„გავაძლიერებთ მხარდაჭერას სამოქალაქო საზოგადოებისა და დამოუკიდებელი მედიის მიმართ, რათა მათ გააგრძელონ მუშაობა ამ გადამწყვეტ პერიოდში. კიდევ უფრო გავაუმჯობესებთ კომუნიკაციას. ის, რასაც ჩვენ დღეს ამ პანელიდან ვაკეთებთ, არის ის, რომ ვაგზავნით მესიჯს. ქართველ ხალხს უნდა გავუგზავნოთ მხარდაჭერისა და ევროკავშირის უწყვეტი ერთგულების ძლიერი მესიჯი, „ქართულ ოცნებასთან“ კი ხაზი უნდა გავუსვათ მისი ქმედებების ფასს“, – აღნიშნა დუბრავკა შუიცამ.

ჩვენ არ გვინდა იმის აღიარება, რომ საქართველოს მოქალაქეებმა ხმა მისცეს საკუთარ ინტერესებს და არა იმას, რა სურს ან რას ამბობს ურსულა ფონ დერ ლაიენი, – ამის შესახებ ევროპარლამენტარმა, დანილო დელა ვალემ ევროპარლამენტში საქართველოს საკითხზე მიმდინარე დებატებზე, სიტყვით გამოსვლისას განაცხადა.

დელა ვალეს თქმით, ევროკავშირს სჭირდება ორმხრივი ურთიერთობები, ვიდრე სხვების მიმართ მუქარა და ზეწოლა.

„ჩვენ როდესაც ნელ-ნელა მივექანებით მესამე მსოფლიო ომისკენ, მოვისმინეთ რვა განცხადება საქართველოში არჩევნებთან და პროტესტთან დაკავშირებით, მაგრამ არ ვუყრით კენჭს ნეთანიაჰუს დაგმობის რეზოლუციას, რომელიც ხოცავს პალესტინელებს. ჩვენ დროს ვფლანგავთ. რისი აღიარებაც ჩვენ არ გვინდა, არის ის, რომ საქართველოს მოქალაქეებმა ხმა მისცეს საკუთარ ინტერესებს და არა იმას, რა სურს ურსულა ფონ დერ ლაიენს ან ამბობს. ევროპის მასშტაბით სტუდენტები გამოდიან ქუჩებში და ითხოვენ მეტ უფლებებს, ახალგაზრდობა გამოდის ქუჩებში და ითხოვს პალესტინელების უფლებებს. ევროკავშირი ფოკუსირებულია საქართველოზე, სადაც ახლახან აირჩიეს მთავრობა და იქ ახალისებენ სხვა ინტერესებს, მათ, ვინც უფრო მეტად ნატო-ზე ზრუნავს. ჩვენ გვჭირდება ორმხრივი ურთიერთობები, ვიდრე სხვების მიმართ მუქარა და ზეწოლა“, – განაცხადა დელა ვალემ.

კოალიცია ,,ძლიერი საქართველოს” ერთ-ერთი ლიდერი, ანა დოლიძე საქართველოში ადამიანურობის წინააღმდეგ დანაშაულებთან დაკავშირებით ჰააგაში შეხვედრებს მართავს. ამის შესახებ ინფორმაციას კოალიცია ,,ძლიერი საქართველო“ ავრცელებს.

ანა დოლიძის განცხადებით, ჰააგაში მთელი დანაშაულების შესახებ ინფორმაცია ჩაიტანა, მათ შორის, როგორიც არის დევნა თბილისის ქუჩებში, წამება და არაადამიანური მოპყრობა.

“მოგესალმებით ჰააგიდან, სადაც ჩამოვედი იმისთვის, რომ ინფორმაცია ჩამომეტანა საქართველოში მშვიდობიანი დემონსტრანტების წინააღმდეგ ჩადენილ დანაშაულებთან დაკავშირებით. მე თქვენ დაგპირდით, რომ ჩემს კონტაქტებს, ჩემს გამოცდილებას, ჩემს ცოდნას გამოვიყენებ, რათა სამუდამოდ დასრულდეს ძალადობის კულტურა პოლიციაში, რომლის ნაწილი გადააქციეს მილიციად და რომელმაც ნოემბრის დასასრულს, დეკემბრის დასაწყისში გამოიყენა სრულიად დაუშვებელი მეთოდები მშვიდობიანი დემონსტრანტების საწინააღმდეგოდ. ამას მოჰყვა სანქციები, სანქციები არის პოლიტიკური ზომა, მაგრამ ამას აუცილებლად მოყვება სამართლებრივი შედეგები. საერთაშორისო სამართალში ის ზომები, რაც იყო გამოყენებული აქციებზე არის ადამიანურობის წინააღმდეგ დანაშაული. ჩამოვედი და ჩამოვიტანე მთელი დანაშაულების შესახებ ინფორმაცია, რაც არის დევნა თბილისის ქუჩებში, ალყა, მშვიდობიანი მოსახლეობის მიმართ გაზის კაფსულების გამოყენება გაფრთხილების გარეშე, წამება და არაადამიანური მოპყრობა. სწორედ ასეთ დანაშაულებს იძიებს ჰააგის ტრიბუნალი. შეხვედრა მქონდა იმ განყოფილებასთან, რომელიც წინასწარ აგროვებს ინფორმაციას და წყვეტს, დაიწყოს თუ არა გამოძიება. მათ მე ეს ინფორმაცია გადავეცი. ჰააგის ტრიბუნალში ამბავი მიტანილია, ის ჩაგვრა არავის შერჩებათ”, – განაცხადა ანა დოლიძემ

საქართველოს საგარეო საქმეთა მინისტრი მაკა ბოჭორიშვილი საქართველოში ჩინეთის სახალხო რესპუბლიკის ელჩს, ჭოუ ციენს შეხვდა.

საგარეო საქმეთა სამინისტროს პრესსამსახურის ინფორმაციით, ჩინეთის ელჩმა მაკა ბოჭორიშვილს თანამდებობაზე დანიშვნა მიულოცა და ამ პოზიციაზე წარმატებები უსურვა.

შეხვედრაზე მხარეებმა განიხილეს ორმხრივი და მრავალმხრივი თანამშრომლობის ფართო სპექტრი. ხაზი გაესვა საქართველო-ჩინეთს შორის სტრატეგიული პარტნიორობის შედეგად ჩამოყალიბებულ ურთიერთობებს.

საუბარი შეეხო პოლიტიკურ, სავაჭრო-ეკონომიკურ, ტურიზმის, კულტურულ-ჰუმანიტარულ და ხალხთა შორის ურთიერთობების სფეროში თანამშრომლობის გაღრმავების პოტენციალს.

მხარეებმა ასევე განიხილეს ფართო რეგიონში მიმდინარე პროცესები და გამოწვევები.

ელჩმა კიდევ ერთხელ დაადასტურა ჩინეთის ურყევი მხარდაჭერა საქართველოს მიმართ.

შეხვედრის ბოლოს მხარეებმა იმედი გამოთქვეს, რომ საქართველოსა და ჩინეთს შორის შედეგზე ორიენტირებული თანამშრომლობა მომავალშიც ეფექტიანად გაგრძელდება.

ვინც პატივს სცემს საქართველოს, მის არჩევანს, ქართველი ხალხის არჩევანს, იმას ლანძღავენ პირველ რიგში. ერთი ქვეყანა იყო, რომელიც მხარს გვიჭერდა, შემდეგ გახდა ორი, ორივეს ლანძღვდნენ, ახლა გახდა ხუთი, ეს ნიშნავს, რომ სადაც შეუძლიათ, მიიღონ ყოველგვარი კონტროლის გარეშე აბსოლუტურად დამოუკიდებელი გადაწყვეტილებები, ის ქვეყნები თამამად უჭერენ მხარს სიმართლეს, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ განაცხადა.

მდინარაძის თქმით, სამომავლოდ საქართველოს მეტი მხარდამჭერი ეყოლება.

„არ ვამბობ, რომ დანარჩენ 22 ქვეყანაში აბსოლუტურად ბოლომდეა დაქვემდებარებული ყველაფერი რაღაც კონტროლს, მაგრამ ვიღაც თავს იკავებს საპირისპირო პოზიციის დაკავებისგან, მაგალითად ბალტიის ქვეყნები აგრესიულები არიან. სადაც ყველაზე ნაკლებია დამოუკიდებლობის ხარისხი, იმ მმართველობის პირობებში, რომლებიც დღეს მართავენ ამ ქვეყნებს, ისინი არიან უფრო მძაფრად და რადიკალურად განწყობილები საქართველოს ხალხის მიმართ. არაფერი დაგვიშავებია ჩვენ მათთვის. ბალტიის ქვეყნები იმიტომ არიან უფრო აგრესიულები ჩვენს მიმართ და უფრო წინსწრებით გამოხატავენ აგრესიას, სანქციებსაც კი აწესებენ, რომ იქ ყველაზე ნაკლებად არის დამოუკიდებლობა უზრუნველყოფილი მათი დღევანდელი მმართველების წყალობით. ხალხს არაფერს ვერჩით. ჩვენი პოზიციაც ამაში აისახა. ბალტიის ქვეყნების დღევანდელი ხელისუფლებები ვერ უზრუნველყოფენ დამოუკიდებლობის იმ ელემენტარულ ხარისხსაც კი, რომ სანქციები არ დააწესონ არაფორმალური ჯგუფების გავლენით. აქედან გამომდინარე, ვისაც აქვს მაქსიმალური სუვერენიტეტი და დამოუკიდებლობა, ისინი მხარს გვიჭერენ, ვიღაცას აბსოლუტურად განულებული აქვს ეს სუვერენიტეტი, დამოუკიდებლობის ხარისხი და აგრესიულები არიან. დღეს ხუთია, ვინც მხარს გვიჭერს, კიდევ უფრო მეტი იქნებიან მომავალში. განსაკუთრებით მას შემდეგ, რაც აშშ-ში სიტუაცია შეიცვლება“, – განაცხადა მდინარაძემ.