„ერთიანობა – ნაციონალური მოძრაობის“ ლიდერი გიორგი ვაშაძე აცხადებს, რომ მას აქციაზე თავს დაესხნენ.

ვაშაძემ მედიას აჩვენა სახრახნისი რომლითაც, მისივე განმარტებით, კონკრეტული პიროვნება თავს დაესხა და ყელის არეში სურდა დარტყმა.

გიორგი ვაშაძე ამბობს, რომ თავს კარგად გრძნობს და მცირედი დაზიანება აქვს.

„კარგად ვარ. ვსაუბრობდი უბრალოდ და თავს დამესხა კონკრეტული პიროვნება, არსებობს ვიდეოკადრები, დააფიქსირა ხალხმა, ვინ არის სახეზე ეს ადამიანი. ყელში მირტყამდა ამას, ყველაფერი კარგად არის, ბრძოლას ვაგრძელებთ. კობახიძეს და ივანიშვილს ვეუბნები, რომ ამ ყველა ტიტუშკას ბოლოს თქვენს წინააღმდეგ ექნება ჩვენება მიცემული ამ დანაშაულისთვის, რომელსაც თქვენ ჩადიხართ. უცებ მოვარდა ვიღაც და წამებში მოხდა ეს ყველაფერი, შემდეგ მომეხმარნენ და გაიქცა ეს ადამიანი. მას ფაქტობრივად ყელში უნდოდა დარტყმა“, – აღნიშნა გიორგი ვაშაძემ.

ამასთან, გიორგი ვაშაძემ პირდაპირ ეთერში დაზიანებული ქურთუკი აჩვენა.

„ეტყობა, უკნიდან დამარტყა, ზურგიდან მომეპარა ეს ადამიანი, შემდეგ უკვე სხვებიც მომეხმარნენ და გაიქცა. რისი გამომძიებლები არიან ესენი, რას უნდა ველოდოთ, უბრალოდ სამწუხაროა ის რეალობა, რა რეალობაშიც ვართ. წარმოუდგენელია, რომ აქ, ყველას თვალწინ, აქციაზე ცივი იარაღით მესხმის ადამიანი, რომელიც ივანიშვილის დავალებას ასრულებს. ივანიშვილს ვეუბნები, რომ შენი არავის ეშინია, აუცილებლად მიიღებ პასუხს“, – განაცხადა გიორგი ვაშაძემ.

იმედგაცრუებული ვართ ევროკავშირის დონეზე გამართული შიდა დისკუსიების არაზუსტად წარმოჩენის არჩევანით, – ამის შესახებ რუმინეთის საგარეო საქმეთა სამინისტრო სოციალურ ქსელ X-ზე წერს.

რუმინეთის საგარეო უწყება აღნიშნავს, რომ „შეშფოთებული არიან საქართველოს მთავრობის გადაწყვეტილებით ევროკავშირთან დიალოგის შესახებ და ქართველების ლეგიტიმური საპროტესტო გამოსვლების ძალადობრივი ჩახშობის გამო“.

„ღრმად იმედგაცრუებული ვართ ევროკავშირის დონეზე გამართული შიდა დისკუსიების არაზუსტად წარმოჩენის არჩევანით. ჩვენ ამ შესაძლებლობას ვიყენებთ იმის ხაზგასასმელად, რომ ღრმად შეშფოთებულები ვართ საქართველოს მთავრობის გადაწყვეტილებით ევროკავშირთან დიალოგის შესახებ და ქართველების ლეგიტიმური საპროტესტო გამოსვლების ძალადობრივი ჩახშობის გამო“, – ნათქვამია რუმინეთის საგარეო საქმეთა სამინისტროს განცხადებაში.

საქართველოს პრეზიდენტი სალომე ზურაბიშვილი ევროპარლამენტში სიტყვით 18 დეკემბერს, თბილისის დროით 11:30 საათზე გამოვა, – ამის შესახებ ევროპარლამენტის მიერ გავრცელებულ პრესრელიზშია აღნიშნული.

როგორც პრესრელიზშია ნათქვამი, სალომე ზურაბიშვილი ბოლო წლებში „ქართული ოცნების“ მკაცრი კრიტიკოსი იყო.

„საქართველოში ბოლო პერიოდში, მას მერე, რაც მთავრობამ 2024 წლის ოქტომბრის სადავო საპარლამენტო არჩევნების შემდეგ გადაწყვიტა, შეაჩეროს ქვეყნის ევროკავშირში გაწევრიანების პროცესი, მასშტაბური საპროტესტო გამოსვლები დაიწყო. ქალბატონმა ზურაბიშვილმა, რომელიც საქართველოს პრეზიდენტის თანამდებობას 2018 წლიდან იკავებდა, განაცხადა, რომ არჩევნები, რომელშიც მმართველმა პარტიამ, „ქართულმა ოცნებამ“ გამარჯვების შესახებ განაცხადა, იყო თაღლითური და ეფექტურად იქნა მოპარული. 2024 წლის 28 ნოემბერს მიღებულ რეზოლუციაში ევროპარლამენტარებმა უარყვეს საქართველოში საპარლამენტო არჩევნების შედეგი და მოითხოვეს მათი ხელახალი ჩატარება წლის განმავლობაში.

ქალბატონ ზურაბიშვილს საპრეზიდენტო ვადა 29 დეკემბერს ეწურება და საქართველოს ახალმა პარლამენტმა ცოტა ხნის წინ მის მემკვიდრედ მიხეილ ყაველაშვილი დანიშნა. საფრანგეთში დაბადებული საქართველოს საგარეო საქმეთა ყოფილი მინისტრი, ქალბატონი ზურაბიშვილი ასევე იყო საფრანგეთის ელჩი სამხრეთ კავკასიაში და ბოლო წლებში იყო „ქართული ოცნების“ მკაცრი კრიტიკოსი“, – ვკითხულობთ პრესრელიზში.

ქართველებს და საქართველოს ევროპასთან ემოციური ბმა აქვთ, ამიტომაც ქვეყნის მოსახლეობის უმეტესობას ევროკავშირში გაწევრიანება სურს, – განაცხადა საქართველოს საგარეო საქმეთა მინისტრმა მაკა ბოჭორიშვილმა Euronews-თან ექსკლუზიურ ინტერვიუში.

„არსებობს ემოციური ბმა ევროპის კავშირთან. ზუსტად ამიტომ ქართველების დიდი უმრავლესობა ევროპულ ინტეგრაციას მხარს უჭერს“, – აღნიშნა ბოჭორიშვილმა.

მისი თქმით, არსებობს კიდევ ერთი პრაქტიკული მიზეზი იმისა, თუ რატომ სურთ ქართველებს ევროკავშირში. ბოჭორიშვილის თქმით, ევროკავშირი დღეს საუკეთესო ორგანიზაციაა მსოფლიოში ადამიანის უფლებების, ეკონომიკის განვითარების და სხვა მრავალი ფაქტორის გათვალისწინებით.

ევროკავშირის საბჭო საქართველოს ოფიციალურ პირებს მოუწოდებს, „სასწრაფოდ დაუბრუნდნენ ევროკავშირის გზას და მიიღონ დემოკრატიული, ყოვლისმომცველი და მდგრადი რეფორმები, რომლებიც ევროპული ინტეგრაციის ძირითად პრინციპებს” შეესაბამება. ამის შესახებ საუბარია ევროკავშირის საბჭოს გაფართოების შესახებ ანგარიშში.

ანგარიშში საბჭო ხაზს უსვამს ცხრა ნაბიჯის „განხორციელებისადმი მიბრუნების მნიშვნელობას, რაც ევროკომისიის 2023 წლის გაფართოების ანგარიშში იყო მოყვანილი“.

„[ევროკავშირის] საბჭო ღრმად შეშფოთებულია დემოკრატიის, კანონის უზენაესობისა და ფუნდამენტური უფლებების სფეროებში უკუსვლაზე.

საქართველომ უნდა უზრუნველყოს ფუნდამენტური უფლებების სრული პატივისცემა, მათ შორის გამოხატვისა და შეკრების თავისუფლების, და მედიის თავისუფლება, დამოუკიდებლობა და პლურალიზმი, ისევე როგორც LGBTI პირების უფლებების.

საქართველოს სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტებისა და ჟურნალისტების წინააღმდეგ დაშინებები, ძალადობა და დისკრიმინაცია უნდა შეწყდეს. ვიმეორებთ, რომ ფუნქციონალური სამოქალაქო საზოგადოება ნებისმიერი დემოკრატიული სისტემის კრიტიკულად მნიშვნელოვანი კომპონენტია, [ევროკავშირის] საბჭო მოუწოდებს საქართველოს უზრუნველყოს, რომ მის ცოცხალ სამოქალაქო საზოგადოებას შეუძლია შეზღუდვების გარეშე ფუნქციონირება, და გადაწყვეტილებების მიღების პროცესში აქტიურად, ინკლუზიურად და აზრიანად ჩართვა”, – აღნიშნულია დოკუმენტში.

ამასთან, ანგარიშში არის მოწოდება საქართველოს მიმართ, გამოიძიოს და პასუხი გასცეს ყველა საარჩევნო დარღვევასა და ბრალდებას.

„[ევროკავშირის] საბჭო სერიოზული შეშფოთებით აღნიშნავს OSCE/ODIHR-ის წინასწარ დასკვნებს, რომლებიც აჩვენებენ, რომ 26 ოქტომბრის საპარლამენტო არჩევნები გამოირჩეოდა რიგი ნაკლოვანებებითა და დაძაბული და ძალიან პოლარიზებული გარემოთი.

დემოკრატიული ინსტიტუტების სათანადო ფუნქციონირებისთვის პირობების გასაუმჯობესებლად, საბჭო მოუწოდებს საქართველოს გამოიძიოს და პასუხი გასცეს ყველა საარჩევნო დარღვევასა და ბრალდებას. ასევე, ყურადღება მიაქციოს ამ და OSCE/ODIHR-ისა და ევროპის საბჭოს ორგანოების სხვა რეკომენდაციებს, იმის გათვალისწინებით, რომ ყოვლისმომცველი საარჩევნო რეფორმა [ევროკომისიის] ცხრა ნაბიჯია ნაწილია”, – ნათქვამია ანგარიშში.