ფაქტობრივად, „რუსულ არჩევნებამდე“ მივედით. ეს არ იყო ჩვეულებრივი თაღლითობა, რასაც ვხედავთ ხოლმე არჩევნებზე-პოლიციას ვერ იპოვიდით არჩევნების დროს, – ამის შესახებ საქართველოს პრეზიდენტმა, სალომე ზურაბიშვილმა ევროპარლამენტში სიტყვით გამოსვლისას განაცხადა.

როგორც პრეზიდენტმა განმარტა, არჩევნების დროს მომხდარ ძალადობის შემთხვევებთან დაკავშირებით შინაგან საქმეთა მინისტრთან საუბარი სურდა, თუმცა ვერ დაუკავშირდა.

„ფაქტობრივად, „რუსულ არჩევნებამდე“ მივედით. ეს გახლავთ არჩევნები, რომელიც სისტემატურად და მასობრივად გაყალბებული იყო, ძალიან მაღალ, დახვეწილ დონეზე იყო გაკეთებული. ეს არ იყო ჩვეულებრივი თაღლითობა, რასაც ვხედავთ ხოლმე არჩევნებზე.

დაგეგმილი იყო ცვლილებები საარჩევნო კოდექსში, რაც გაცილებით ადრე დაიწყო. სრული კონტროლი გადაეცა ცესკოს. იმ ადამიანებს, ვისაც ცესკო ნიშნავდა, დანიშნულები იყვნენ არა იმ წესების შესაბამისად, რომელსაც ევროკავშირი გვთავაზობდა, არამედ, იყვნენ ხელისუფლების მიერ დანიშნულები. ხმის ელექტრონული კენჭისყრა სპეციფიკურად იყო შემუშავებული, კონტროლის გარეშე. საუბარი იყო, რომ მოპარული იყო ევროპელი მოხუცების პენსიები, ასევე “ქოლცენტრების” საკითხები იდგა – 3500 “ქოლცენტრის” საკითხი. დაშინება, ადმინისტრაციული რესურსის გამოყენება, რუსული სტილის პროპაგანდა, პლაკატები იყო, სადაც ერთ მხარეს იყო უკრაინაში განადგურებული ეკლესიები და თეატრები, მეორე მხარეს კი, აყვავებული საქართველოს გამოსახულება. ამან იმდენად შოკში ჩააგდო საქართველოში საზოგადოება, რომ მოხდა მათი დემონტაჟი. ეს არ იყო ქართული ხასიათის შემადგენელი ნაწილი, რუსული კვალი ეტყობოდა. ასევე ფაქტები იყო: „ოპოზიციას სურს მთავრობა დაამხოს“, „ისინი უნდა გაუქმდნენ არჩევნების შემდეგ“, „ოპოზიციური პარტიები უნდა აიკრძალოს არჩევნების შემდეგ”, „ლიდერები უნდა იყვნენ დაპატიმრებულები“. დიდი რაოდენობით „შავი ფული“ იყო გამოყენებული. 600 მილიონი ლარი დაიხარჯა ოქტომბრის არჩევნების დროს. პოლიციას ვერ იპოვიდით არჩევნების დროს. მე მაგალითად, ვიხილე ძალადობა, რომელიც სხვადასხვა უბანზე ხორციელდებოდა. დავურეკე შს მინისტრს და ვერ ვერც მობილურით და სამთავრობო ქსელით. ვერც მიs მოადგილეებს დავუკავშირდი, მანაც არ გადმომირეკა.

2 პრინციპი დაირღვა არჩევნების დროს. ეს არის საკმარისი, რათა ვანახოთ, რომ ნებისმიერი შედეგი იქნებოდა განსხვავებული. მილიონი წევრი დიასპორის მხრიდან სტრასბურგშია. სტრასბურგი ძალიან კარგი შემთხვევაა, აქ არ გაიხსნა უბანი, სტრასბურგში ბევრი ქართველია. მთლი დიასპორა მობილიზებული იყო, იცოდნენ არჩევნები წყვეტდა რუსეთისკენ გზას ან ევროპისკენ.

ასევე ფარულობის დაცულობის თვალსაზრისით ნდობის საკითხი – ელექტრონული სისტემები იყო გამოყენებული, პარტიული კამერები უყურებდა საარჩევნო მანქანებს. ამ ყველაფერზე სარჩელი იყო საკონსტიტუციო სასამართლოში. იმედი გვქონდა, რომ ზოგიერთი მოსამართლე გაიგებდა და გაათვითცნობიერებდა, რომ კრიზისიდან გამოსვლის გზა ეს იყო. შედეგები გაყალბებული იყო, კონსტიტუციურად უნდა დანიშნულიყო არჩევნები. იმედი არ გამართლდა. კიდევ ერთი მოთხოვნა იყო მოქალაქეების ჯგუფის მხრიდან სტრასბურგის სასამართლოში, სადაც გაცხადებულია, რომ ჩვენ გვსურს გამოვიყენოთ ყველა სამართლებრივი გზა, რომ მივიღოთ პოლიტიკური გადაწყვეტილება ამ ღრმა კრიზისზე“,- აღნიშნა მან.

სალომე ზურაბიშვილის განცხადებით, საქართველოს მოსახლეობა მასობრივად გამოდის ქუჩაში არა სოციალური პრობლემების გამო, არამედ როდესაც აღიქვამს თავისუფლებასთან, ევროპულობასა და დამოუკიდებლობასთან დაკავშირებით საფრთხეს.

ამის შესახებ მან ევროპარლამენტში სიტყვით გამოსვლისას განაცხადა.

„საქართველოს პროტესტი ახასიათებდა მაშინ, როდესაც საქართველოს მოსახლეობა გრძნობდა, აღიქვამდა საფრთხეს ევროპულობასა და დამოუკიდებლობასთან დაკავშირებით. საქართველოში არასდროს ყოფილა მასობრივი პროტესტი სოციალურ საკითხებთან დაკავშირებით, ამის ბევრი მიზეზია, არადა, ამასთან დაკავშირებითაც სიტუაცია მაინცდამაინც დამაკმაყოფილებელი არაა, პირიქითაა. ერთადერთი შემთხვევა, როცა ადამიანები მასობრივად გავიდნენ ქუჩაში, ეს იყო მაშინ, როცა გრძნობდნენ, რომ ეს იყო ეგზისტენციალური საკითხი და ის სასწორზე იდო. დღეს ეს ხდება. ეს გახლავთ ძალიან მშვიდობიანი მოძრაობა, მასობრივი სამოქალაქო დაუმორჩილებლობის მოძრაობა და ორ რამეს მოითხოვს – დამიბრუნე ჩემი ხმა იმიტომ, რომ მოპარული არჩევნები ჩატარდა, დამიბრუნე მომავალი და რაც მთავარია, ჩემი ევროპული მომავალი, და ასევე, მოთხოვნა დგას ახალი არჩევნების ჩატარებასთან დაკავშირებით. ეს არ გახლავთ რევოლუციური მოძრაობა, თავისი არსით, იმიტომ, რომ არ არსებობს მოთხოვნა ამისა. მოთხოვნაა დავუბრუნდეთ ხელახალ არჩევნებს, მშვიდობიან გარემოში და დავინახოთ სად არის იმ ადამიანების ნება, რომლებიც ქუჩაში გამოვიდნენ და უნდათ, რომ ეს დემოკრატიულად, კენჭისყრის სახით მოხდეს“,- განაცხადა სალომე ზურაბიშვილმა, რომლის გამოსვლის თარგმანსაც „ტვ პირველი“ ავრცელებს.

არ მინდა საზოგადოების დაყოფა, ყველა ჩვენი ქვეყნის მოქალაქეა – საზოგადოებას არ ვყოფთ პოლიტიკური ნიშნით, შეხედულებების გამო. ყველასთვის კეთდება – მოგიწოდებთ, მობრძანდეთ 21 დეკემბერს, საახალწლო სოფელი გახსნილი იქნება, – ამის შესახებ დედაქალაქის მერმა, კახა კალაძემ მთავრობის სხდომაზე განაცხადა.

მისივე თქმით, შეიძლება ვიღაც განაწყენებულია მთავრობაზე, თუმცა „პრაგმატული პოლიტიკა, რომელსაც საქართველოს მთავრობა ახორციელებს ქვეყნის ინტერესებიდან გამომდინარეობს“.

„დედაქალაქი ემზადება საახალწლოდ, ჩვენი ქალაქის მოსახლეობას, ჩამოსულ სტუმრებს ვაჩუქოთ ლამაზი დღეები. იცით, რომ 2 დღის წინ ქალაქი საახალწლოდ განათდა. ყველა ილუმინაცია ჩართულია, აინთო საახალწლო ნაძვის ხე, რომელიც ულამაზესია და ჯადოსნურად არის მორთული ჩვენი დედაქალაქი.

მინდა მოგაწოდოთ ინფორმაცია, რომ 21 დეკემბრიდან შესაძლებლობა ექნება მოსახლეობას საახალწლო სოფელს ეწვიოს, ყველაფერს ვაკეთებთ, რომ შევქმნათ საახალწლო განწყობა. ტრადიცია, რომელიც 2017 წლიდან შემოვიტანეთ საახალწლო სოფლის სახით, პოპულარობით სარგებლობს. რა თქმა უნდა, მუნიციპალიტეტი ყველაფერს გააკეთებს რომ ფუნქციონირებდეს.

ბოლო დღეების განმავლობაში მოვისმინეთ ძალიან ბევრი არასწორი განცხადება იმ ადამიანებისგან, ვინც აპროტესტებს. არ მინდა საზოგადოების დაყოფა, ყველა ჩვენი ქვეყნის მოქალაქეა, ვიღაცას, შესაძლოა ჰქონდეს განსხვავებული მოსაზრება სხვადასხვა თემაზე. მთავარია, ეს ყველაფერი გააპროტესტოთ მშვიდობიანი ფორმით, კანონის ფარგლებში და არა ძალადობრივი გზით, რასაც ვხედავდით რამდენიმე დღის წინ.

საზოგადოებას არ ვყოფთ პოლიტიკური ნიშნით, შეხედულებების გამო, ეს ყველასთვის კეთდება. ყველას მოგიწოდებთ მობრძანდეთ 21 დეკემბერს, საახალწლო სოფელი გახსნილი იქნება. შეიძლება ვიღაც განაწყენებულია, ნაწყენია მთავრობაზე, ჩვენზე. ყველა დარწმუნდებით, რომ ის პრაგმატული პოლიტიკა, რომელსაც საქართველოს მთავრობა ახორციელებს გამომდინარეობს ქვეყნის ინტერესებიდან. უპირველესი და მნიშვნელოვანია ჩვენი ქვეყნის და ხალხის ინტერესების დაცვა.

ხედავთ, რა პროცესები მიმდინარეობს მსოფლიოში. ბევრი რამ შეიცვლება, ბევრი რამ გადალაგდება. ყველაზე მნიშვნელოვანია, რომ ქვეყანაში მშვიდობა გვექნება“,-აღნიშნა კალაძემ.

სასიამოვნო არაა ის ურთიერთობები, რაც ახლა დასავლეთთან და აშშ-სთან არის – არაერთხელ განგვიმარტავს, რომ მზად ვართ, ურთიერთობები გავაჯანსაღოთ, მთავარია ეს ორმხრივი იყოს,- ამის შესახებ დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე განაცხადა.

როგორც კალაძემ აღნიშნა, საქართველოს ხელისუფლება არ გადადგამს ისეთ ნაბიჯს, რაც „თავიდანვე ვიცით, რომ დამღუპველი იქნება ჩვენი ქვეყნისთვის“.

„საქართველოს მთავრობა ევროინტეგრაციის გზაზე, როგორც ბევრჯერ გაგვიცხადებია, ახლაც ვიტყვი, რომ ყველაფერს ვაკეთებთ, ვაკეთებდით და მომავალშიც გავაკეთებთ, რათა პროცესები დაჩქარდეს. თუ კი ამ გზაზე რაიმე წარმატებას გვაქვს მიღწეული, ეს არის „ქართული ოცნება – დემოკრატიული საქართველოს“ დამსახურება. ჩვენი ხელისუფლების პირობებში მოხდა ყველა წინსვლა და გადაიდგა ის ნაბიჯები, რაც ბოლო წლების განმავლობაში გვქონდა. მაგრამ შანტაჟი, მუდმივი მუქარა, შეურაცხყოფების მიყენება, მეორე ფრონტის მოთხოვნა, სანქციებზე მიერთება – ეს ის თემებია, რაც პირდაპირ დამაზიანებელია ჩვენი ქვეყნისთვის, მოსახლეობისთვის. არავითარ შემთხვევაში არ დავუშვებთ, არ გავაკეთებთ ისეთ რამეს, რომელიც თავიდანვე ვიცით, რომ დამღუპველი იქნება ჩვენი ქვეყნისთვის, მაგრამ შეიძლება ამით სხვა ქვეყნებმა ისარგებლონ და სათავისოდ გამოიყენონ. არ გვინდა, ვინმეს მივცეთ საშუალება, რომ საქართველო გამოყენებული იყოს სხვა რომელიმე დიდი ქვეყნის ინტერესების გასატარებლად. ჩვენ მხოლოდ მეგობრობა, პარტნიორობა და ურთიერთობების გაღრმავება გვინდა. რა თქმა უნდა, არ არის სასიამოვნო ის ურთიერთობები, რაც ახლა დასავლეთთან და აშშ-სთან არის. საქართველოს ხელისუფლებაა არაერთხელ განუმარტავს, რომ ჩვენ მზად ვართ, ეს ურთიერთობები გავაჯანსაღოთ, გადაიტვირთოს არსებული ურთიერთობები. ეს არავისთვის არაა მისასალმებელი. მზად ვართ ჯანსაღი ურთიერთობებისთვის, მთავარია ეს ორმხრივი იყოს“,- განაცხადა კახა კალაძემ.

თქვენ იცით, ვინ არის სათანადოდ არჩეული პრეზიდენტი, – ასე უპასუხა აშშ-ის სახელმწიფო დეპარტამენტის პრესსპიკერმა, მეთიუ მილერმა საქართველოს პრეზიდენტის შესახებ დასმულ კითხვას.

უფრო კონკრეტულად, ჟურნალისტმა, ალექს რაუფოღლუმ მილერს ჰკითხა: „ვინ არის საქართველოს მოქმედი პრეზიდენტი?“.

„თქვენ იცით, ვინ არის სათანადოდ არჩეული პრეზიდენტი“, – უპასუხა აშშ-ის სახელმწიფო დეპარტამენტის პრესსპიკერმა.

საქართველოში, ისევე როგორც რუმინეთში, ევროკავშირი უარყოფს ხალხის არჩევანს. საქართველო იქცა დესტაბილიზაციის სურნელით გაჟღენთილი, ლეგიტიმური ხელისუფლების წინააღმდეგ უცხოეთიდან ორკესტრირებული მცოცავი აჯანყების თეატრად, – განაცხადა ევროპარლამენტარმა ტიერი მარიანიმ, ევროპარლამენტში სიტყვით გამოსვლისას.

მან ევროპარლამენტის წევრებს მიმართა და განაცხადა, რომ ოპოზიცია მაიდანის სტილში ესკალაციას და პროვოკაციებს აწყობს სწორედ ევროპარლამენტარების წახალისებით, თუმცა, ამის მიუხედავად, საქართველო და მისი ინსტიტუციები მტკიცედ დგანან.

„ამას მოწმობს ღამის დემონსტრაციები თბილისის ქუჩებში, სადაც თქვენ მიერ [ევროპარლამენტის] წახალისებული ოპოზიცია მობილიზებას უწევს თავის მხარდამჭერებს ქართული სახელმწიფოს წინააღმდეგ, ესკალაციისა და მაიდანის სტილში პროვოკაციებისკენ სწრაფვის მიზნით.
მიუხედავად ამისა, საქართველო და მისი ინსტიტუციები მტკიცედ დგანან. ისინი წინააღმდეგობას უწევენ იმათ ძალადობას, ვინც არჩევნები წააგო და ახლა ცდილობს თქვენი [ევროპარლამენტის] მხარდაჭერით, ძალაუფლება ხელში ძალით ჩაიგდოს.“ – აღნიშნა ევროპარლამენტარმა.

მისივე თქმით, იმის მიუხედავად, რომ ევროკავშირი კეთილდღეობის და დემოკრატიის გარანტად აცხადებს თავს, იგი საქართველოში სახელმწიფო გადატრიალებას ახალისებს, რაც ქვეყანას ქაოსში ჩაძირვის საფრთხის წინაშე აყენებს.

„ქართული ოცნების“ გამარჯვება ცენტრალურმა საარჩევნო კომისიამ ცნო და პრეზიდენტი ყაველაშვილი კანონის შესაბამისად აირჩიეს. ხალხს, როგორც საქართველოში, ისე რუმინეთში, აღარ სურს, რომ სუვერენიტეტი წაართვან.
ევროკავშირი აცხადებს, რომ არის კეთილდღეობისა და დემოკრატიის გარანტი, მაგრამ საქართველოში ის ახალისებს „სახელმწიფო გადატრიალებას“, რომელიც ამ ქვეყანას ქაოსში ჩაძირვის საფრთხეს უქმნის.“ – განაცხადა ტიერი მარიანიმ.

მისია შეშფოთებულია მშვიდობიანი მოქალაქეების წინააღმდეგ ოფიციალური ძალადობის მასშტაბით და სიმძიმით, – ამის შესახებ აღნიშნულია მაკკეინის ინსტიტუტის მისიის განცხადებაში.

როგორც მისიის შეფასებაშია ნათქვამი, „სასწაულია, რომ ჯერ კიდევ არავინ მოუკლავთ, მაგრამ ეს რისკი გაიზრდება, თუ წამება გაგრძელდება, მთავრობის „ბანდიტების“ ხელით სიკვდილი თუ მოხდება, პოლიტიკური გარემო კიდევ უფრო არასტაბილური გახდება“.

„ჩვენ ბევრი მოსაუბრისგან მოვისმინეთ, რომ 26 ოქტომბრის არჩევნების წინ „ქართულმა ოცნებამ“ ჩაატარა მასშტაბური კამპანია, რომელიც მოიცავდა მუქარას, დაშინებას, ამომრჩეველთა მოსყიდვას, სამოქალაქო ორგანიზაციებზე რეიდებს, სახელმწიფო რესურსების ბოროტად გამოყენებას და პირადობის მოწმობების ჩამორთმევას. დეზინფორმაციის ექსპერტებმა აღწერეს, როგორ ავრცელებდა „ქართული ოცნება“, კრემლის კვალდაკვალ ნარატივებს, რომლებიც ცდილობდნენ ამომრჩევლების დაშინებას ომის საფრთხით, თუ ისინი ოპოზიციას მისცემდნენ ხმას. საარჩევნო დამკვირვებლებმა დელეგაციას წარუდგინეს თავიანთი მიგნებები და არჩევნების დღის დოკუმენტაცია, სადაც აღწერილია სერიოზული დარღვევები, მათ შორის ხმის მრავაჯერადად მიცემა, ბიულეტენების ჩაყრა, ხმის მიცემის ფარულობის დარღვევა, დაშინება და სტატისტიკური შეცდომები. არჩევნების დღეს მსგავს ანგარიშებს წარმოადგენდნენ სხვა ექსპერტებიც, დიპლომატები და მედიის წარმომადგენლები. დელეგაციამ ეს ანგარიში გააცნო საარჩევნო კომისიის ხელმძღვანელებს, თუმცა დამაჯერებელი პასუხები ვერ მოისმინა.

არჩევნების შემდეგ „ქართულმა ოცნებამ“ გამოაცხადა, რომ ოთხი წლით უარს ამბობს ევროკავშირში გაწევრიანების გეგმაზე, მიუხედავად ქართველი ხალხის უმრავლესობის მხარდაჭერისა ევროპული მომავლის მიმართ. ამან ათიათასობით ქართველის პროტესტი გამოიწვია, მათ შორის ისეთ სოფლებში, სადაც მსგავსი რამ არასდროს ყოფილა. ჩვენს მიერ გამოკითხულებმა აღწერეს, თუ როგორ უტევდნენ და სცემდნენ მომიტინგეებს შავი ფორმიანი უსაფრთხოების ძალების ჯგუფები, რომელთაც არ გააჩნდათ საიდენტიფიკაციო ნიშნები, მაშინ, როდესაც  ფორმიანი პოლიცია უმოქმედოთ დგას და არაფერს აკეთებს. მისიამ რამდენიმე ახალგაზრდასაც მოუსმინა, რომლებმაც აღწერეს, როგორ დააკავეს ისინი აქციების დატოვების შემდეგ და უსაფრთხოების ძალებმა გონების დაკარგვამდე სცემეს. მათ საავადმყოფოში გაატარეს ღამეები მოტეხილობებით, სახის დაზიანებებითა და ტვინის შერყევით. შემდგომ კი ცრუ ბრალდებები წაუყენეს ხულიგნობასა და ვანდალიზმისთვის. ჟურნალისტები და სამოქალაქო საზოგადოების წარმომადგენლები, რომლებიც აქციებთან ახლოს არ იმყოფებოდნენ, ასევე გაიტაცეს ქუჩიდან, შემდეგ სცემეს და ბრალი წაუყენეს. ჩვენი მისიის დროს რონდელის ფონდის თანამშრომელი, რომელიც ძაღლს ასეირნებდა, ქუჩიდან აიყვანეს, ის რამდენიმე საათი გაუჩინარებული იყო, შემდეგ ნაცემი დააკავეს და ბრალი წაუყენეს.

მისია შეშფოთებულია მშვიდობიანი მოქალაქეების წინააღმდეგ ოფიციალური ძალადობის მასშტაბით და სიმძიმით. სასწაულია, რომ ჯერ კიდევ არავინ მოუკლავთ, მაგრამ ეს რისკი გაიზრდება, თუ წამება გაგრძელდება. იმ საშინელი შემთხვევისას, თუ მთავრობის „ბანდიტების“ ხელით სიკვდილი მოხდება, პოლიტიკური გარემო კიდევ უფრო არასტაბილური გახდება“, – აღნიშნულია შეფასებაში.