მამუკა ხაზარაძის განცხადებები ბადრი ჯაფარიძისთვისაც აღარ არის საინტერესო, არათუ ამ ქვეყნის რომელიმე მოქალაქისთვის, ამ ადამიანებს არანაირი კაპიტალი არ აქვთ, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა საქართველოს პირველ არხს განუცხადა.

როგორც იონათამიშვილმა აღნიშნა, რადიკალური ოპოზიცია განადგურებულია და მათზე დიდი ყურადღების დათმობა არ უნდა მოხდეს.

„მამუკა ხაზარაძის განცხადებები ბადრი ჯაფარიძისთვისაც აღარ არის საინტერესო, არათუ ამ ქვეყნის რომელიმე მოქალაქისთვის. შესაბამისად, ეს ადამიანები თავიანთ ფანტაზიებში როგორ დაიკარგებიან, რას იტყვიან და რას გამოთქვამენ, მნიშვნელოვანი აღარ არის, რადგან წარსულის პერსონაჟები არიან. მათზე დიდი ყურადღების დათმობა არ უნდა მოხდეს, რადიკალური ოპოზიცია განადგურებული და დეგრადირებულია. ცხადია, ამ ადამიანებს არანაირი კაპიტალი არ აქვთ. ისინი აქამდე უცხო ძალების მხრიდან იმართებოდნენ. როგორც ჩანს, მათი პატრონები შავ დღეში არიან და ეს მათზეც აისახება. ესენი ამ ქვეყნის წარსულს და ისეთ ოპოზიციად წარმოადგენენ, რომელიც არსად არ უნდა იყოს. ამ ადამიანებზე საუბარი უხერხულიცაა“, – განაცხადა იონათამიშვილმა.

ამ მოცემულობაში არანაირ არჩევნებზე საუბარი არ იქნება და ვერ იქნება, კრიტიკულ აზრს ახშობენ, მიიღეს კანონები, რომლებიც უნდა გამოიყენონ არასამთავრობო ორგანიზაციების, ოპოზიციური პარტიების და მათ შორის, ოპოზიციური ტელემედიების გასაუქმებლად, – ამის შესახებ „ნაციონალური მოძრაობის“ წევრმა, ირაკლი ფავლენიშვილმა განაცხადა.

მისი თქმით, რომელიმე პოლიტიკურმა ძალამ ადგილობრივ არჩევნებზე რომ დაიწყოს ახლა საუბარი, არაადეკვატური იქნება.

„ამ მოცემულობით, რა თქმა უნდა, გამორიცხულია. როცა ცესკო-ს დაკომპლექტების წესი და სხვა მიმართულებები იქნება შესაბამისობაში დემოკრატიულ სტანდარტებთან, ამ შემთხვევაში, რა თქმა უნდა, ექნება აზრი საარჩევნო პროცესში მონაწილეობის მიღებას“, – განაცხადა ფავლენიშვილმა.

ოპოზიციას თვითლიკვიდაციის რეჟიმი ჰქონდა და ახლა გამქრალი მდგომარეობიდან აღდგენა უნდათ. ერთმანეთისგან იდეოლოგიურად არც განსხვავდებიან, ამიტომ ვამბობდით, რომ, რეალურად, „ნაციონალური მოძრაობა“ არიან, უბრალოდ, საარჩევნოდ მათი სეგმენტებად დაყოფა მოხდა, – ამის შესახებ პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა საქართველოს პირველ არხს განუცხადა.

მისი თქმით, ოპოზიცია ნულოვან მდგომარეობაშია, თვითრეანიმაციას ცდილობენ, ეს მცდელობა კი დიდი არაფერი შედეგის მომტანი იქნება.

„ოპოზიციას თვითლიკვიდაციის რეჟიმი ჰქონდა და ახლა გამქრალი მდგომარეობიდან აღდგენა უნდათ. ერთმანეთისგან იდეოლოგიურად არც განსხვავდებიან და სწორედ ამიტომ ვამბობდით, რომ, რეალურად, „ნაციონალური მოძრაობა“ არიან. უბრალოდ, საარჩევნოდ მათი სეგმენტებად დაყოფა მოხდა. მათი შედეგი რა იყო, ისიც ვნახეთ, ისევე როგორც შემდეგ როგორ იმოქმედეს. ოპოზიცია დღეს ნულოვან მდგომარეობაშია, თვითრეანიმაციას ცდილობენ. მგონი, ეს მცდელობა დიდი არაფერი შედეგის მომტანი იქნება. ოპოზიცია, ლიდერების თამადობით, იმდენად გაკოტრებულია, რომ საპროტესტო აქციაზეც ვერ გამოდიან და მიტინგებს ვერ მართავენ. ცდილობენ, ისეთი მულაჟი შემოიტანონ, რაც თითქოსდა უფრო დიდი ავტორიტეტით სარგებლობს. სალომე ზურაბიშვილს პოლიტიკური შედეგი დამოუკიდებლად არასოდეს არ დაუდია. თავიდან საგარეო საქმეთა მინისტრად სააკაშვილმა წაიყვანა, შემდეგ „ქართული ოცნების“ მხარდაჭერით მაჟორიტარი დეპუტატი და პრეზიდენტი გახდა. ამიტომ ახლა ნულოვანი ოპოზიცია ნულოვან ლიდერს დაიყენებს თუ არა, ამით ჯამი მაინც ნულოვანი იქნება“, – განაცხადა ირაკლი ქადაგიშვილმა.

„ლელოს“ ლიდერმა, მამუკა ხაზარაძემ განაცხადა, რომ ოთხმა ბარიერგადალახულმა კოალიციამ უნდა ჩამოაყალიბოს ალტერნატიული პოლიტიკური ცენტრი.

საქართველოსა და უზბეკეთს შორის მთავრობათაშორისი ეკონომიკური თანამშრომობა ძალიან მნიშვნელოვანია და მახარებს ის ფაქტი, რომ ჩვენი მთავრობების წარმომადგენლებს ძალიან ნაყოფიერი შეხვედრები ჰქონდათ გუშინ და დღეს ეკონომიკური თანამშრომლობის სხვადასხვა ასპექტზე, – ამის შესახებ საქართველოს პრემიერ-მინისტრმა ირაკლი კობახიძემ უზბეკეთის პრემიერ-მინისტრ აბდულა არიპოვთან შეხვედრისას განაცხადა.

მთავრობის მეთაურმა ორ ქვეყანას შორის არსებულ ურთიერთობებსა და სამომავლოდ, სხვადასხვა სფეროში თანამშრომლობის კიდევ უფრო გააქტიურებაზე გაამახვილა ყურადღება.

„მსურს კიდევ ერთხელ გადაგიხადოთ მადლობა განსაკუთრებული მიღებისთვის და ჩვენი ხალხისა და დელეგაციისადმი მეგობრული დამოკიდებულებისთვის.

ნამდვილად შთამბეჭდავია, თუ როგორ ვითარდება ურთიერთობები ჩვენს ქვეყნებს შორის. სწრაფად ვითარდება თქვენი ქვეყანა. ჩვენზე დიდი შთაბეჭდილება მოახდინა რეფორმებმა და იმ გარდაქმნამ, რაც უზბეკეთში ხორციელდება თქვენი ლიდერობით.

გუშინ გვქონდა შესაძლებლობა ტექნოპარკში გვენახა ტრანსფორმაციის საუკეთესო მაგალითი, რაც თქვენს ქვეყანაში ხორციელდება.

მინდა, გამოვიყენო ეს შესაძლებლობა და მოგიწვიოთ საქართველოში.

სხვადასხვა მიმართულებით ჩვენს თანამშრომლობას დიდ მნიშვნელობას ვანიჭებთ. რა თქმა უნდა, ჩვენს ქვეყნებს შორის მთავრობათაშორისი ეკონომიკური თანამშრომობა ძალიან მნიშვნელოვანია და მახარებს ის ფაქტი, რომ ჩვენი მთავრობების წარმომადგენლებს ძალიან ნაყოფიერი შეხვედრები ჰქონდათ გუშინ და დღეს ეკონომიკური თანამშრომლობის სხვადასხვა ასპექტზე.

ჩვენს ქვეყნებს შორის პოლიტიკური თანამშრომლობა ძალიან მნიშვნელოვანია. დაინტერესებულნი ვართ, სავაჭრო პარტნიორობა კიდევ უფრო გავზარდოთ ჩვენს ქვეყნებს შორის.

ინვესტიციების ნაწილშიც შესაძლებელია გააქტიურება. თქვენი საინვესტიციო გარემო შეიძლება ძალიან მიმზიდველი იქნეს ქართველი ინვესტორებისთვის და საქართველოც ძალიან საინტერესეო საინვესტიციო გარემოს სთავაზობს პოტენციურ ინვესტორებს.

განსაკუთრებულ მნიშვნელობას ვანიჭებთ შუა დერეფნის განვითარებას. საქართველოს სტრატეგიული ადგილმდებარეობა აქვს და ისტორიულად აკავშირებდა ევროპასა და აზიას, დასავლეთსა და აღმოსავლეთს.

გვსურს, ამ სტრატეგიული ადგილმდებარეობით მაქსიმალურად ვისარგებლოთ და ამ მიმართულებითაც ძალიან ნაყოფიერი და სასარგებლო შეიძლება იყოს თანამშრომლობა საქართველოსა და უზბეკეთს შორის”, – განაცხადა პრემიერ-მინისტრმა.

ყველა განცხადება, რასაც ჩვენ ვისმენთ ამ გაქსუებული ზოგიერთი ბიუროკრატის მხრიდან, ევროპიდან, ყველაფერი დაფუძნებულია ტყუილზე, არანაირი კავშირი არ აქვს ევროპულობასთან, დემოკრატიულობასთან, – ამის შესახებ თბილისის მერმა, კახა კალაძემ ჟურნალისტებს განუცხადა.

მისივე თქმით, ამ ტიპის განცხადებები ვერაფერ ზიანს ვერ მოუტანს ხელისუფლებას, პირიქით, ისინი დაზიანდებიან.

„ყველა განცხადება, რასაც ჩვენ ვისმენთ ამ გაქსუებული ზოგიერთი ბიუროკრატის მხრიდან, ევროპიდან, ყველაფერი ეს დაფუძნებულია ტყუილზე, არანაირი კავშირი არ აქვს ევროპულობასთან, დემოკრატიულობასთან. ეს არის გარკვეული დაჯგუფება, რომელსაც საქართველოსთან მიმართებით ჰქონდა აბსოლუტურად სხვა ინტერესი და უბრალოდ ევროკავშირში გაწევრიანების თემას იყენებენ მუქარებისთვის, დაშანტაჟებისთვის. არაერთხელ განვმარტეთ, რომ არც მათი მუქარების გვეშინია და არც მათი შანტაჟის არავის ეშინია. როცა საქმე ეხება ქვეყნის ინტერესსა და მომავალს, ყოველთვის დავდგებით იქ, სადაც ჩვენს სამშობლოს სჭირდება. შესაბამისად, ამ ტიპის განცხადებები ვერაფერ ზიანს ვერ მოგვიტანს, პირიქით, ისინი დაზიანდებიან. ჩვენ მართლაც ბევრი წინგადადგმული ნაბიჯი გვაქვს განვითარების თვალსაზრისით, დემოკრატიული პროცესების ხელშეწყობისთვის. ბალტიისპირეთის ქვეყნები, რომლებიც ნატო-ს წევრები არიან, მათი ჩართულობა გაცილებით ნაკლები იყო, ვიდრე საქართველოს. შესაბამისად, საქართველო არის ძალიან სანდო პარტნიორი, ეს არა მხოლოდ სიტყვებით, კონკრეტული ქმედებებითა და ნაბიჯებით გამოიხატება.

ჩვენ ქვეყნის შიგნით გვყავს უსამშობლო რადიკალები, ისინი არიან ქვეყნის გარეთ არსებული გაქსუებული ბიუროკრატები, რომლებსაც საქართველოსთან მიმართებით რადიკალურად სხვა ინტერესი აქვთ, სხვა ინტერესი ჰქონდათ, ეს დღესაც გრძელდება. მათ არ მიეცათ შესაძლებლობა, რომ ჩვენი ქვეყანა გამოეყენებინათ საკუთარი ინტერესების განსახორციელებლად. ქვეყანაში არ გაჩაღდა მეორე ფრონტი, არ მიუერთდა სანქციებს. თუ სურთ ომი, კეთილი ინებონ, ჩაერთონ, თავად იომონ და დაუპირისპირდნენ როგორც უნდათ ისე, ვისაც უნდათ ისე. შესაბამისად, ჩვენ ყოველთვის ვატარებდით ჩვენი ქვეყნის ინტერესს და გავატარებთ. სიცრუე და ტყუილია ის განცხადებები, რასაც მათ მიერ გაკეთებულ განცხადებებში ვუსმენთ“, – განაცხადა კახა კალაძემ.

ცნობისთვის, ესტონეთის საგარეო საქმეთა მინისტრის, მარგუს ცაჰკნას განცხადებაში აღნიშნულია, რომ ესტონეთი საქართველოს 55 მოქალაქეს, მათ შორის პროკურორებს, მოსამართლეებს, პოლიციელებს, დეპუტატებსა და სხვა პირებს ქვეყანაში შესვლას უკრძალავს. ესტონეთის საგარეო საქმეთა სამინისტროს ინფორმაციით, ესტონეთში შესვლა, საერთო ჯამში, საქართველოს 83 მოქალაქეს აქვს აკრძალული. ამასთან, ლიეტუვის საგარეო საქმეთა მინისტრი, კიასტუსის ბუდრისის ცნობით, „ლიეტუვამ 74 ქართველი ჩინოვნიკი, საქართველოში ადამიანის უფლებების მძიმე დარღვევისა და რეპრესიების გამო, იმ ადამიანების სიაში დაამატა, რომლებსაც ქვეყანაში შესვლა ეკრძალებათ“. გარდა ამისა, ლატვიის საგარეო საქმეთა მინისტრი, ბაიბა ბრაჟე X-ზე წერს, რომ ლატვიამ საქართველოს 16 მოქალაქეს ქვეყანაში შესვლა შეუზღუდავი ვადით აუკრძალა.