აშშ-ის ელჩმა საქართველოში, რობინ დანიგანმა, რადიო თავისუფლებასთან ინტერვიუში ისაუბრა საქართველოს მთავრობასთან ღია და კონსტრუქციული კომუნიკაციის მნიშვნელობაზე და აღნიშნა, რომ შეერთებულ შტატებს სურს, ნებისმიერ დემოკრატიულად არჩეულ მთავრობასთან მუშაობა.

ელჩის განცხადებით, ამ შემთხვევაში, „ქართული ოცნება“ დემოკრატიულად არჩეული მთავრობაა და შესაძლოა ეს განმეორდეს 26 ოქტომბრის არჩევნებშიც, ვინაიდან, ვინ გაიმარჯვებს, წყვეტს ქართველი ხალხი.

„ღია კომუნიკაციების შენარჩუნება უკიდურესად მნიშვნელოვანია. ჩვენ გვინდა მუშაობა ნებისმიერ მთავრობასთან, რომელიც დემოკრატიულად არის არჩეული ამ ქვეყანაში, ამ შემთხვევაში, „ქართული ოცნება“ დემოკრატიულად არჩეული მთავრობაა და შეიძლება მომდევნო არჩევნებზეც ასე იყოს. ჩვენ არ ვირჩევთ, ვინ მოიგებს ან ვინ წააგებს, ამას ქართველი ხალხი წყვეტს. იმისათვის, რომ კონსტრუქციული ურთიერთობა გვქონდეს საქართველოსთან, გვინდა კონსტრუქციული ურთიერთობა საქართველოს მთავრობასთან. სამწუხაროდ, მთავრობამ ისეთი ნაბიჯები გადადგა, რომელიც გაჯერებული იყო აშშ-ის და დასავლეთის წინააღმდეგ დეზინფორმაციით.“ – აღნიშნა რობინ დანიგანმა.

საქართველო ძალიან ევროპული ქვეყანაა. ეს იქნება არჩევნები ევროპულ სახელმწიფოში, – განუცხადა სტრასბურგში „ქრონიკას“ ევროპარლამენტარმა რიჩარდ ჩარნეცკიმ.

მისივე თქმით, ძალიან მნიშვნელოვანი არჩევნებია, რადგან საქართველოს მოქალაქეებმა უნდა გადაწყვიტონ გზა ევროკავშირსა და ნატოში.

„მე შევთავაზე ჩემს კოლეგებს ევროპარლამენტში, რომ არაა დრო საქართველოს დადანაშაულების. საქართველოს დიდი ისტორია აქვს, უძველესი ქრისტიანული სახელმწიფოა და ევროპული მომავალი აქვს. ვიცი რთული დროა. ემოციებით დატვირთულია და ძალიან გთხოვთ გახსოვდეთ, თუ რა იქნება მეორე დღეს.

ჩემთვის, როგორც პოლონელისთვის და ევროპელისთვის მნიშვნელოვანია საქართველომ გააგრძელოს გზა ევროპული ოჯახისკენ. ყველა საერთაშორისო დამკვირვებელი მნიშვნელოვანია ევროკავშირიდანაც, ეუთოდანაც და სხვა საერთაშორისო ორგანიზაციებიდანაც. მე ვფიქრობ ამ დამკვირვებლებმა უნდა დაკვირვება განახორციელონ არჩევნებზე და არ გამოვიდნენ პროკურორებად, მოსამართლეებად, მაგრამ ყველაზე მნიშვნელოვანი გადაწყვეტილება უნდა მიიღოს ქართველმა ხალხმა, არჩევანი მათ ხელშია. გადაწყვეტილებების მიმღებია ქართველი ხალხი“, – აღნიშნა რიჩარდ ჩარნეცკიმ.

საქართველოს მხრიდან ეკონომიკური სანქცია რუსეთისთვის არაფერს წარმოადგენს, მაგრამ საქართველოსთვის ეს იქნება ეკონომიკურად დამანგრეველი ეფექტის. უფრო მეტიც, აუცილებლად გამოიწვევს გარკვეულ დაპირისპირებას, რომელიც ადვილად შეიძლება გადაიზარდოს სამხედრო დაპირისპირებაში, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

როგორც ვოლსკიმ აღნიშნა, ევროპარლამენტის რეზოლუციას განიხილავს როგორც ანტიქართულ რეზოლუციას.

„მთელი რიგი ევროპული ქვეყნები გაცილებით ინტენსიურად და დიდი მასშტაბით ვაჭრობენ რუსეთის ფედერაციასთან, ენერგორესურსები იქნება თუ სხვა. მაგალითად, ლიეტუვა საქართველოზე მეტ ღვინოს აწვდის რუსეთს, რაც საკვირველია ნამდვილად, მაგრამ რატომღაც საქართველოს მიმართ არის ეს მოთხოვნა. კარგად გვესმის, რომ მსოფლიო დაპირისპირებების პირობებში, საქართველოსადმი რუსეთის აგრესია გარკვეულ რესურსს შეუქმნის ამ საომარი მოქმედებების, დაპირისპირებული მხარეების ერთ ფრთას, მაგრამ საქართველოსთვის დამღუპველი აღმოჩნდება. საქართველოს მხრიდან ეკონომიკური სანქცია რუსეთისთვის არაფერს წარმოადგენს, მიზერია მთლიან მის ეკონომიკაში, მაგრამ საქართველოსთვის იქნება ეკონომიკურად დამანგრეველი ეფექტის მქონე. უფრო მეტიც, ეს აუცილებლად გამოიწვევს გარკვეულ დაპირისპირებას, რომელიც ადვილად შეიძლება გადაიზარდოს სამხედრო დაპირისპირებაში. ასე რომ, ჩვენ ამ რეზოლუციას განვიხილავთ, როგორც ანტიქართულ რეზოლუციას, არა მთავრობის საწინააღმდეგოს, არამედ ანტიქართულ რეზოლუციას, რომელსაც ზოგიერთი პოლიტიკური სუბიექტები მხარს უჭერენ“, – განაცხადა ვოლსკიმ.

გია ვოლსკის განმარტებით, ევროპარლამენტის რეზოლუციაში არის კიდევ სხვა პუნქტებიც, რომლებიც არ შეესაბამება იმ რეალობას, რაც აღწერილია ევროსაბჭოს კვლევებში, სადაც საქართველო მოწინავე პოზიციებზეა ყველა მიმართულებით, ადამიანის უფლებებიდან დაწყებული, ეკონომიკური, თუ მართვის სხვა მაჩვენებლებით.

„ვფიქრობ, რეზოლუცია პოლიტიკურად არის ანგაჟირებული, მაგრამ არსებობს საკმაოდ მომძლავრებული ხმა, რომელიც იცავს საქართველოს, იცავს მის პოზიციას ყველა მიმართულებით და რასაკვირველია მისასალმებელია. არჩევნების წინ ასეთი რეზოლუციის მიღება წარმოადგენს არა მარტო შიდა საკითხებში ჩარევას, არამედ დაუოკებელ სურვილს, როგორმე საქართველოში შეიქმნას ისეთი ვითარება, რომ განვითარება მიეცეს იდეას საომარ თუ ეკონომიკური ბრძოლის პროცესებში ჩართვის შესახებ. უკვე მეოთხე რეზოლუციაა მიღებული უკრაინაში რუსეთის აგრესიის შემდეგ.

ამ იდეის მატარებელი ევროკავშირში, სამწუხაროდ, ბევრია და ისინი წარმოადგენენ „ნაცმოძრაობის“ ფილიალს. ეს ახალი არ არის, ჩვენ არ გვიკვირს, საკმაოდ სიღრმისეულად, პრაგმატულად ვაანალიზებთ სიტუაციას. როცა ვამბობთ, რომ ეს არის შიდა საქმეებში ჩარევა, არ არის მხოლოდ შეფასებითი ნაწილი, ეს ნიშნავს კიდევ ერთხელ მოწოდებას ჩვენი საზოგადოებისადმი, ამომრჩევლისადმი, რომ მხარი დაუჭირონ საქართველოს სუვერენიტეტს, მის სტაბილურობას და იმ პოლიტიკას, რასაც ჰქვია სამშვიდობო პროცესის განვითარების პოლიტიკა. არავისთვის ახალი არ არის, რომ სააკაშვილი არის ის ადამიანი, ვინც დანერგა სადისტური მართვის სისტემა, გესტაპოს მეთოდები არის სააკაშვილის შემოქმედების ნაწილი, გარდა ამისა ტერიტორიების 20 პროცენტის დაკარგვა სწორედ მისი უჭკუო და მოღალატეობრივი პოლიტიკით არის განპირობებული. ასე რომ, სააკაშვილის მიმართ ასეთი პოლიტიკა უკვე არაობიექტურობაზე, მიკერძოებაზე მეტყველებს. გარდა ამისა, ჩვენ გვახსოვს, იყო მხარდაჭერა მედიამენეჯერად მოხსენიებული კეზერაშვილის, რომელიც სახელმწიფო ბიუჯეტიდან დატაცებული ფულით გახდა მილიონერი. რასაკვირველია, ბიძინა ივანიშვილის დასანქცირების მოთხოვნაც სწორედ იმ კატეგორიას განეკუთვნება, რასაც ჰქვია შეთქმულება საქართველოს წინააღდეგ. ბიძინა ივანიშვილს პოლიტიკაში მოსვლის დღიდან არცერთხელ არ გადაუდგამს საქართველოს ინტერესების საწინააღმდეგოდ რაიმე ნაბიჯი და არც საგარეო კურსის შეცვლა გვქონია ჩვენ. არ გადაუდგამს ისეთი ნაბიჯი, რომელიც რუსულ ინტერესებს ეხმარება საქართველოში, სამხრეთ კავკასიაში, განსხვავებით იმ ხელისუფლებისგან, რომელიც 2012 წლამდე საქართველოში საქართველოს ინტერესების წინააღმდეგ მოქმედებდა“, – განაცხადა ვოლსკიმ.

როდესაც არჩევნები დამთავრდება საქართველოში, არჩევნები დამთავრდება მათ შორის შეერთებულ შტატებში და ჩვენი ქვეყნის გარშემო საომარი მოქმედებებიც დასრულდება, შეიცვლება ინტერესები ჩვენი ქვეყნის წინააღმდეგ და ურთიერთობები ჩვენს პარტნიორებთან დაუბრუნდება იმ სტაბილურ და თანასწორ ურთიერთობას, რაც არსებობდა, – განაცხადა საპარლამენტო ფრაქცია „ქართული ოცნების“ თავმჯდომარის პირველმა მოადგილემ არჩილ გორდულაძემ „დღის ქრონიკაში“.

წამყვანმა მას ჰკითხა, როგორ აფასებს ოპოზიციის განცხადებებს, რომ საქართველოს ხელისუფლება იზოლაციაშია და ასე იქნება არჩევნების შემდეგ, როცა ამერიკის შეერთებული შტატების ელჩი ამბობს, რომ დეზინფორმაციაა, თითქოს ის არ ხვდება ხელისუფლების წარმომადგენლებს და პირიქით, მუდმივი კომუნიკაცია აქვს საქართველოს მთავრობის წარმომადგენლებთან სხვადასხვა საკითხზე.

„ეს ასეა, ყოველთვის გვაქვს [ელჩთან] კომუნიკაცია. როგორც ელჩმა დანიგანმა განაცხადა, რომ გვაქვს კომუნიკაცია, ელჩმა ჰერჩინსკიმაც თქვა, რომ ევროკავშირის 27-მა წევრმა ქვეყანამ მიიღო გადაწყვეტილება, რომ ჩვენს [„ქართული ოცნების“] ხელისუფლებასთან არ ჰქონდეს კომუნიკაცია. ეს ორი [განცხადება] ხომ ერთმანეთთან შეუსაბამოა?! ქალბატონი დანიგანი ნამდვილად პოზიტიურად არის განწყობილი, რომ ორი ქვეყნის ურთიერთობის სტაბილიზაცია მოხდეს, მაგრამ არსებობს ძალიან სამწუხარო მონაცემებიც, როგორიც მაგალითად საელჩოს ქარდები იყო, რაც არასწორ ინფორმაციას შეიცავდა და ერთი სიმართლე არ ეწერა. როდესაც არჩევნები დამთავრდება საქართველოში, არჩევნები დამთავრდება მათ შორის შეერთებულ შტატებში და ჩვენი ქვეყნის გარშემო საომარი მოქმედებებიც დასრულდება, შეიცვლება ინტერესები ჩვენი ქვეყნის წინააღმდეგ და ურთიერთობები ჩვენს პარტნიორებთან დაუბრუნდება იმ სტაბილურ და თანასწორ ურთიერთობას, რაც არსებობდა. შესაბამისად, გვაქვს მცირე დრო, რომ გავძლოთ, ვიდგეთ მყარად, მიუხედავად იმისა, რა შანტაჟი, თუ ჩარევა იქნება მათ შორის საერთაშორისო აქტორებისგან და როგორ აუწყობენ მხარს მათ ჩვენი შიდა მტრები „ნაციონალური მოძრაობის“ სახით“, – აღნიშნა გორდულაძემ.

საკონსტიტუციო სასამართლოს გადაწყვეტილება, არ შეაჩეროს რუსული კანონის მოქმედება, მოკლებულია სამართლებრივ დასაბუთებას, არ ითვალისწინებს ადგილობრივი და საერთაშორისო ექსპერტების სამართლებრივ დასკვნებს და მოსამართლეთა მხრიდან კონსტიტუციის ღალატს წარმოადგენს , – ამის შესახებ ნათქვამია ქართული არასამთავრობო ორგანიზაციების ერთობლივ განცხადებაში, რომელიც ეხმიანება საქართველოს საკონსტიტუციო სასამართლოს გადაწყვეტილებას, რომელმაც „უცხოური გავლენის გამჭვირვალობის შესახებ“ კანონის შეჩერების მოთხოვნა არ დააკმაყოფილა, თუმცა სარჩელები არსებითად განსახილველად დასაშვებად ცნო.

არასამთავრობო სექტორის განცხადების თანახმად, სასამართლოს ჰქონდა ისტორიული შანსი, შესწინააღმდეგებოდა ევროინტეგრაციის პროცესის შეჩერებას, არ დაეშვა მოქალაქეთა კონფიდენციალურ ინფორმაციაზე მთავრობის უკონტროლო წვდომა და დამდგარიყო საკუთარი ხალხის გვერდით, ვინც თვეების განმავლობაში, სამთავრობო ძალადობის მიუხედავად, ურყევად ეწინააღმდეგებოდა რუსულ კანონს.

„სამწუხაროდ, საკონსტიტუციო სასამართლომ ვერ შეძლო დამოუკიდებელი გადაწყვეტილების მიღება, ის კვლავ მოექცა მმართველი პარტიის გავლენის ქვეშ და ვერ შეასრულა მასზე დაკისრებული ფუნქცია – კონსტიტუციის დაცვა.

ქართული მედია და არასამთავრობო ორგანიზაციები მადლობას ვუხდით ორ მოსამართლეს განსხვავებული აზრისთვის და ვაგრძელებთ ბრძოლას საქართველოში ავტორიტარიზმისა და ცენზურის დამყარების წინააღმდეგ.

ჩვენ გავაგრძელებთ სამართლებრივ დავას რუსული კანონის წინააღმდეგ როგორც ქვეყნის შიგნით, ისე საერთაშორისო ინსტიტუტებში და ქართველი ხალხის მხარდაჭერით, აუცილებლად მივაღწევთ მის საბოლოო და უპირობო გაუქმებას”, – წერია განცხადებაში.

ცნობისთვის, საკონსტიტუციო სასამართლომ „უცხოური გავლენის გამჭვირვალობის შესახებ“ კანონის შეჩერების მოთხოვნა არ დააკმაყოფილა, თუმცა სარჩელები არსებითად განსახილველად დასაშვებად ცნო.