დღემდე დამაჯერებელი პასუხი არ არის გაცემული 2020 წლის საპარლამენტო არჩევნების პარალელური დათვლის ცრუ შედეგების გავრცელებაში აშშ-ის დაფინანსებით მოქმედი არასამთავრობო ორგანიზაციების და აშშ-ის ხელისუფლების წარმომადგენლების როლზე, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელ წერს.

პარლამენტის თავმჯდომარის განცხადებით, არასამთავრობო ორგანიზაცია “სამართლიანი არჩევნების” მიერ 2020 წელს გავრცელებული პარალელური დათვლის მცდარი შედეგების გამოქვეყნებამ ქართული დემოკრატიის დაზიანებასთან ერთად, ქვეყანას, რეპუტაციული ზიანიც მიაყენა.

მისი თქმით, სწორედ მაშინ გაძლიერდა ცრუ ნარატივები ქართული დემოკრატიის უკუსვლის შესახებ.

„ამერიკის კონგრესის ჰელსინკის კომისიის წევრების მხრიდან საქართველოსადმი ინტერესის ბოლოდროინდელი გამწვავება შეგვახსენებს, რომ არსებობს ერთი გარემოება, რაც ქართულ-ამერიკულ ურთიერთობას ტვირთად აწევს და იმედგაცრუების საფუძველია: დღემდე დამაჯერებელი პასუხი არ არის გაცემული 2020 წლის საპარლამენტო არჩევნების პარალელური დათვლის ცრუ შედეგების გავრცელებაში აშშ-ის დაფინანსებით მოქმედი არასამთავრობო ორგანიზაციების და აშშ-ის ხელისუფლების წარმომადგენლების როლზე.

არასამთავრობო ორგანიზაცია “სამართლიანი არჩევნების” მიერ 2020 წელს გავრცელებული პარალელური დათვლის მცდარი შედეგები ოპოზიციისთვის არეულობის მოწყობის, რიგგარეშე არჩევნების მოთხოვნის და პარლამენტის ბოიკოტის საბაბად იქცა, რამაც ქართული დემოკრატიის დაზიანებასთან ერთად, ჩვენს ქვეყანას, რეპუტაციული ზიანიც მიაყენა. სწორედ მაშინ გაძლიერდა ცრუ ნარატივები ქართული დემოკრატიის უკუსვლის შესახებ.

დღეს, ჩვენ დანამდვილებით ვიცით, რომ, არა მხოლოდ „სამართლიანი არჩევნები” ავრცელებდა, განზრახ, პარალელური დათვლის ცრუ შედეგებს, არამედ ეს იცოდნენ აშშ-ის საერთაშორისო განვითარების სააგენტოში (USAID) და უმალავდნენ საქართველოს ხელისუფლებას და ქართველ ხალხს.

„სამართლიანი არჩევნების” იმჟამინდელი ხელმძღვანელი, ელენე ნიჟარაძე (რომელზეც გვარწმუნებდნენ, რომ გადაყენებით დაისაჯა), გადაყენებიდან მალევე, საარჩევნო მონიტორინგის ორგანიზაციების ევროპული ქსელის (ENEMO) მონტენეგროს ოფისში დასაქმდა, რომელსაც, როგორც აღმოჩნდა, იგივე დონორი აფინანსებს, რომელიც “სამართლიან არჩევნებს”; USAID-ის მაშინდელი ერთ-ერთი პასუხისმგებელი პირი კი, რომელმაც იცოდა და მალავდა, რომ ყალბი შედეგები ვრცელდებოდა, ერთ-ერთ ქვეყანაში USAID-ის მისიის ხელმძღვანელი გახდა,’’ წერს პარლამენტის თავმჯდომარე.

შალვა პაპუაშვილი ასევე საუბრობს, იმჟამინდელი ელჩის შესახებ და აცხადებს, რომ საინტერესოა იცოდა თუ არა მან, „რომ პარალელური დათვლის შედეგები ცრუ იყო“. მისი თქმით, ქართულ-ამერიკულ ურთიერთობებში არსებული რეალური პრობლემებზე თვალის დახუჭვა ნამდვილად არ ეხმარება სტრატეგიულ ურთიერთობებს.

„ცალკე საკითხია, თუ რა იცოდა აშშ-ის იმჟამინდელმა ელჩმა, რომელსაც იმ პერიოდში შუამავლის როლი ჰქონდა ხელისუფლებასა და ოპოზიციას შორის. იმ პირობებში, როდესაც USAID სამთავრობო დაწესებულებაა და ფიზიკურადაც აშშ-ის საელჩოშია განთავსებული, რთულია იმის დაჯერება, რომ ელჩს ამ საკითხზე ინფორმაცია არ ჰქონდა. თუ დადასტურდა, რომ ელჩმა იცოდა და არ ამჟღავნებდა, რომ პარალელური დათვლის შედეგები ცრუ იყო, ეს თავდაყირა აყენებს ფასილიტაცია-მედიაციის პროცესის და 19 აპრილის შეთანხმების კეთილსინდისიერებას.

ქართულ-ამერიკულ ურთიერთობებში არსებული რეალური პრობლემებზე თვალის დახუჭვა ნამდვილად არ ეხმარება ჩვენს სტრატეგიულ ურთიერთობებს. აშშ-ის წარმომადგენელთა პალატას, ისევე როგორც სენატს, აქვს ყველა ბერკეტი ამ საკითხის გამოსაძიებლად. თუმცა, სამწუხაროდ, ნაცვლად ამ კითხვებზე დამაჯერებელი პასუხის გაცემისა, გვესმის ბრალდებები ცრუ ნარატივების გავრცელებაზე, რაც, სულ უფრო მეტად, ემსგავსება კრიტიკოსების გაჩუმების ტაქტიკას, ვიდრე სიმართლეზე ზრუნვას.

საქართველო გვერდში დაუდგა ამერიკელ ხალხს ყოველთვის, როდესაც ეს მას დასჭირდა. ჰელსინკის კომისია ამერიკელი ხალხის სახელით გველაპარაკება. ჩვენც, როგორც საქართველოს დემოკრატიულად არჩეული ხელისუფლება, მოვუწოდებთ მას, ქართველი ხალხის სახელით, რომ გამოიძიოს ეს მწვავე საკითხი და დაადგინოს ჭეშმარიტება.

ამერიკელი ხალხის არჩეული წარმომადგენლების მხრიდან პარალელური დათვლის შედეგების მანიპულაციის საკითხის ღია და დამაჯერებელი გამოძიება ქართველი ხალხის მხრიდან ამერიკის გვერდში დგომის სათანადო დაფასება იქნებოდა,’’ – წერს პარლამენტის თავმჯდომარე.

საქართველოს წინსვლასა და ქვეყნის ეკონომიკის განვითარებაში ენერგეტიკული სექტორის სიძლიერეს განსაკუთრებული მნიშვნელობა ენიჭება, – ამის შესახებ საქართველოს პრემიერ-მინისტრმა ირაკლი კობახიძემ ენერგეტიკოსის დღისადმი მიძღვნილ ღონისძიებაზე სიტყვით გამოსვლისას განაცხადა.

როგორც კობახიძემ განაცხადა, 2012 წლის შემდეგ მნიშვნელოვნად გაიზარდა გენერაციის ობიექტების რაოდენობა, გაუმჯობესდა ელექტროენერგიისა და ბუნებრივი გაზის გადამცემი ინფრასტრუქტურა.

„ყველას გილოცავთ პროფესიულ დღეს, ჩვენი ქვეყნის ენერგეტიკოსებს, დარგის ყველა სპეციალისტს. თქვენი შრომა ასრულებს განსაკუთრებულ როლს ქართული ეკონომიკის ყველა დარგის, ასევე უსაფრთხოების სისტემის, საზოგადოებრივი ცხოვრების ყველა სფეროს სრულფასოვანი ფუნქციონირებისთვის. როდესაც საქართველოს წინსვლაზე, ქვეყნის ეკონომიკის განვითარებაზე, ამბიციურ სამომავლო გეგმებსა და ამოცანებზე ვსაუბრობთ, ამ ყველაფერში ენერგეტიკული სექტორის სიძლიერეს განსაკუთრებული მნიშვნელობა ენიჭება.

ამდენად, თქვენს შრომასა და გამოცდილებას აქვს უდიდესი მნიშვნელობა საქართველოს უკეთესი მომავლის შექმნისთვის, რისკენაც ყველანი ერთად ვისწრაფვით.

ენერგეტიკის სექტორის ბოლო დროის მიღწევები იმსახურებს განსაკუთრებულ აღნიშვნას -2012 წლიდან დღემდე მნიშვნელოვნად გაიზარდა გენერაციის ობიექტების რაოდენობა, გაუმჯობესდა ელექტროენერგიისა და ბუნებრივი გაზის გადამცემი ინფრასტრუქტურა, გაფართოვდა ელექტროენერგიასა და ბუნებრივ გაზზე მოსახლეობის ხელმისაწვდომობა, გაძლიერდა ტრანსსასაზღვრო კავშირები და გაიზარდა ელექტროენერგიის, ბუნებრივი გაზისა თუ ნავთობის ექსპორტის, იმპორტისა და ტრანზიტის შესაძლებლობები.

წლების მიხედვით რომ შევადაროთ, ელექტროენერგიის ადგილობრივი გამომუშავება 2012 წელს იყო 9698 მლნ.კვტ.სთ, ხოლო 2024 წლის ბოლოსთვის, 14911 მლნ.კვტ სთ.-ს მიაღწევს, რაც უდიდესი პროგრესია აღნიშნულ დარგში.

2012-2024 წლებში აშენდა 66 ელექტროსადგური, ჯამური დადგმული სიმძლავრით დაახლოებით 1255 მგვტ.

ჩვენ გვაქვს ამბიციური მიზანი, 2030 წლისთვის ელექტროენერგიის თვალსაზრისით, საქართველო გახდეს სრულად თვითკმარი ქვეყანა, რისთვისაც ელექტროენერგიის გამომუშავებამ უნდა გადააჭარბოს მოხმარებას. დარწმუნებული ვარ, რომ თქვენთან ერთად ამ ამბიციურ მიზანსაც წარმატებით მივაღწევთ,“- განაცხადა პრემიერმა.

2013 წლის რეგიონების გაზიფიცირების პროგრამის შედეგად, რომელიც ბიუჯეტიდან ფინანსდება, ბუნებრივი გაზის მიწოდების ქსელში დამატებით 377 ათასზე მეტი აბონენტი ჩაერთო, რაც არის ძალიან მნიშვნელოვანი მიღწევა და ამით ძალიან ბევრი ჩვენი თანამოქალაქე სარგებლობს, – ამის შესახებ საქართველოს პრემიერ-მინისტრმა, ირაკლი კობახიძემ ენერგეტიკოსის დღისადმი მიძღვნილ ღონისძიებაზე სიტყვით გამოსვლისას განაცხადა.

როგორც მთავრობის მეთაურმა აღნიშნა, 2025 წლის ბოლომდე ბუნებრივი გაზი დამატებით 400-მდე დასახლებულ პუნქტში შევა, რის შედეგადაც ქსელში დამატებით 57 ათასი აბონენტი ჩაერთვება.

„ცალკე უნდა აღინიშნოს ენერგეტიკული სექტორის წვლილი საქართველოს ევროკავშირში გაწევრიანების პროცესში. 2016 წელს საქართველო გახდა ენერგეტიკული გაერთიანების წევრი და მას შემდეგ განხორციელდა მრავალი რეფორმა, რის შედეგადაც საქართველოს კანონმდებლობა დაუახლოვდა ამ დარგში ევროკავშირის კანონმდებლობას.

განსაკუთრებული მადლობა მინდა გადავუხადო ეკონომიკის სამინისტროს მთელ გუნდს, პირადად ეკონომიკისა და მდგრადი განვითარების მინისტრს, პირველ ვიცე-პრემიერ ბატონ ლევან დავითაშვილს დარგის წარმატებული ხელმძღვანელობისთვის და ენერგეტიკის განვითარებაში შეტანილი განსაკუთრებული წვლილისთვის. ის წინსვლა, რომელიც ენერგეტიკის სექტორმა ამ წლებში განიცადა, არის დარგის თითოეული სპეციალისტის, თითოეული ენერგეტიკოსის დამსახურება და კიდევ ერთხელ მადლობა მინდა გადაგიხადოთ თითოეულ თქვენგანს, თითოეულ პროფესიონალს, რომელსაც შეგაქვთ განსაკუთრებული წვლილი ჩვენი ქვეყნის ენერგეტიკული უსაფრთხოების, მდგრადობის უზრუნველყოფაში. კიდევ ერთხელ დიდი მადლობა ამისათვის და კიდევ ერთხელ გილოცავთ პროფესიულ დღეს“, – განაცხადა ირაკლი კობახიძემ.

ყველამ უნდა სცეს პატივი არჩევნების შედეგებს, საკუთარი მარცხის გადაბრალება მოქალაქეებისთვის, საარჩევნო ადმინისტრაციისთვის, საკუთარი სახელმწიფოსთვის მიუღებელია და ძირს უთხრის ქვეყნის ინტერესებს, – ამის შესახებ „ქართული ოცნების“ დეპუტატმა, არჩილ თალაკვაძემ განაცხადა.

თალაკვაძე არასამთავრობო ორგანიზაციის მიერ სადამკვირვებლო მისიის წარდგენას გამოეხმაურა.

მისივე თქმით, ხელისუფლებამ ყველაფერი გააკეთა, რომ ოპოზიციას საარჩევნოდ ჰქონოდა ჯანსაღი და კონკურენტული გარემო.

„ამისთვის ოპოზიციას ეძლევა სოლიდური დაფინანსება ბიუჯეტიდან, აქვთ სრული წვდომა მედიაზე და ქვეყნის მასშტაბით ყველგან შეუძლიათ, პროგრამა თუ ლიდერები წარადგინონ. შესაბამისად, ამ ფონზე სპეკულაციებისთვის სივრცე  მინიმუმამდე არის შემცირებული. განსაკუთრებით არჩევნების დღეს, როცა ჩვენ დავნერგეთ ელექტრონული დათვლის სისტემა. პრაქტიკულად გამორიცხულია რაიმე მანიპულაცია ან რაიმე სახის ჩარევა ხმის მიცემის პროცესში. ეს კარგად იციან თვითონ ოპოზიციურმა პარტიებმაც. დამატებით მოვიწვიეთ საერთაშორისო ორგანიზაციები, საერთაშორისო მისიები, რომ დააკვირდნენ არჩევნებს. რაც უფრო ფართოდ იქნებიან ისინი წარმოდგენილი, მით უკეთესია და ობიექტური შეფასება იქნება ამ არჩევნების. მით უმეტეს, რომ ეს არის ძალიან მნიშვნელოვანი არჩევნები. ხედავთ, რომ ოპოზიცია ცდილობს, როგორმე გადაიყვანოს ეს საარჩევნო პროცესი არადემოკრატიულ რელსებზე და ისევ სცადოს არჩევნების გვერდის ავლით ხელისუფლებაში როგორმე, რომელიმე კარიდან დაბრუნება. ამის საშუალება არავის არ ექნება. ყველამ უნდა სცეს პატივი არჩევნების შედეგებს, ჩვენი მოქალაქეების არჩევანს. ისე, როგორც 2020 წელს მოიქცნენ, იყო უპასუხისმგებლო და ასეთი ქცევა ოპოზიციის მხრიდან ყოველთვის ძირს უთხრის დემოკრატიას.

ჩვენ გვჭირდება წესების პატივისცემა, შეთანხმება იმაზე, რომ ყველამ უნდა სცეს პატივი არჩევნების შედეგებს და საკუთარი მარცხის გადაბრალება მოქალაქეებისთვის, საარჩევნო ადმინისტრაციისთვის, საკუთარი სახელმწიფოსთვის, ზოგჯერ დაფინანსებული კამპანიებით, არის მიუღებელი და ძირს უთხრის ქვეყნის ინტერესებს“, – განაცხადა თალაკვაძემ.

მისივე თქმით, ყველა ობიექტური დამკვირვებელი, საერთაშორისო მისიების ფარგლებში ვინც ჩამოვა, იქნება დამატებითი ფაქტორი, რომ არავინ სცადოს მანიპულირება საზოგადოებრივი აზრით.

„პროცესი იქნება გამჭვირვალე, თავისუფალი. არჩევნები ჩატარდება დემოკრატიულად. უფრო მაღალი ხარისხით, დაცულობით და ამას დამკვირვებლებიც ნახავენ.

რაც შეეხება ადგილობრივ ორგანიზაციებს, სამწუხაროდ, წარსულში მათი ქმედებებიდან გამომდინარე, ბევრ ასეთ ორგანიზაციას რეპუტაცია აქვს შელახული, მათ მიმართ ნდომა პრაქტიკულად არ არსებობს და ძირითადი ორგანიზაცია, ვინც არჩევნებს წლების განმავლობაში აკვირდებოდა, საერთოდ პარალელური ხმის დათვლის პროცესში გაყალბებაში იყო მხილებული. ამიტომ ეს მართლაც ის ორგანიზაციებია, რომლებიც არათუ არჩევნებს დააკვირდებიან, არამედ პირიქით. საზოგადოება უნდა იყოს ძალიან ფხიზლად და ყურადღებით მათი დასკვნების და განცხადებების მიმართ, მით უმეტეს, უკვე წინასწარ ასეთი რამდენიმე ბრალდება მოვისმინეთ, რაც რეალობას მთლიანად არის აცილებული.

ოპოზიცია ახლა ცდილობს ერთადერთს: თავიანთი დაბალი მხარდაჭერა, ეს სისუსტეები, რაც მათ აქვთ ამ წლების განმავლობაში, შეავსონ დამატებითი ფაქტორებით. ამიტომ ზოგჯერ ამოფარებულები არიან მედიას, ზოგჯერ – არასამთავრობო ორგანიზაციებს, ახლა ცდილობენ, ამოეფარონ სადამკვირვებლო ორგანიზაციებს, რომლებსაც თვითონ ქმნიან, თვითონვე არიან იქ წარმოდგენილნი და ეცდებიან, რომ შექმნან სურათი, თითქოს, აი, ასეთი ორგანიზაციები რაღაც მასობრივ დარღვევებს ეძებენ საარჩევნო პროცესში. ასეთი არ იქნება. სჯობს, ყველამ უთხრას საზოგადოებას, რას წარმოადგენენ და რა ინტერესები აქვთ. მით უმეტეს, რომ დღეს დაკვეთა ჩვენი მოქალაქეების მხრიდან არის უფრო ძლიერი, ვიდრე ოდესმე ყოფილა. ჩვენმა მოქალაქეებმა უნდა იცოდნენ სიმართლე, ვინ მართლა აკვირდება არჩევნებს და ვინ არის წინასწარ ინსტრუქტაჟით მისული, რომ არჩევნებს ძირი გამოუთხაროს“, – განაცხადა არჩილ თალაკვაძემ.

არასამთავრობო ორგანიზაციების წარმომადგენლებმა სადამკვირვებლო მისია „ჩემი ხმა“ დააფუძნეს. სადამკვირვებლო მისიის პრეზენტაციაზე ყოფილმა სახალხო დამცველმა, პლატფორმა „საქართველოს ევროპული ორბიტის“ დამფუძნებელმა, ნინო ლომჯარიამ განაცხადა, რომ მოქალაქეებს სთავაზობენ, ჩაერთონ დაკვირვების პროცესში.