აშშ-ის ვიცე-პრეზიდენტმა, ჯეი დი ვენსმა მიუნხენის უსაფრთხოების კონფერენციაზე სიტყვით გამოსვლისას ევროპელი ლიდერები იმ ავტოკრატებს შეადარა, რომლებიც ცივი ომის პერიოდში რეპრესიულ რეჟიმებს მართავდნენ, – წერს ტელეკომპანია CNN-ი.

„როდესაც ვხედავთ, რომ ევროპული სასამართლოები არჩევნებს აუქმებენ, ხოლო მაღალი თანამდებობის პირები სხვა არჩევნების გაუქმებით იმუქრებიან, უნდა დავსვათ კითხვა – ვაკმაყოფილებთ თუ არა მაღალი დემოკრატიული სტანდარტების მოთხოვნებს?“ – აღნიშნა აშშ-ის ვიცე-პრეზიდენტმა.

ჯეი დი ვენსმა პარალელები გაავლო დღევანდელ მოვლენებსა და მე-20 საუკუნის ავტოკრატიულ რეჟიმებს შორის, რომლებიც თავისუფალი სიტყვის წინააღმდეგ რეპრესიულ ზომებს მიმართავდნენ.

„ცივი ომი დემოკრატიის დამცველებს ბევრად უფრო ტირანულ ძალებს უპირისპირებდა ამ კონტინენტზე. დავფიქრდეთ, რომელი მხარე ახშობდა დისიდენტების ხმას, ხურავდა ეკლესიებს, აუქმებდა არჩევნებს? ისინი ხომ კარგები არ იყვნენ? რა თქმა უნდა, არა. და მადლობა ღმერთს, რომ მათ ცივი ომი წააგეს. მათ წააგეს, რადგან თავისუფლების ფასეულობებს არ აფასებდნენ და არ სცემდნენ პატივს“, – განაცხადა აშშ-ის ვიცე-პრეზიდენტმა.

„ვერავის აიძულებ, რა იფიქროს, რა იგრძნოს ან რა იწამოს… სამწუხაროდ, როდესაც დღეს ევროპას ვუყურებ, ზოგჯერ არ არის ნათელი, რა დაემართა ცივი ომის ზოგიერთ გამარჯვებულს“, – დასძინა მან.

ადამიანის უფლებათა დაცვისა და სამოქალაქო ინტეგრაციის კომიტეტმა „საქართველოს სარკინიგზო კოდექსში“ შესატან ცვლილებაზე იმსჯელა. კანონპროექტი დეპუტატებს ეკონომიკისა და მდგრადი განვითარების მინისტრის მოადგილემ, გურამ გურამიშვილმა გააცნო.

მისი თქმით, კანონპროექტით იცვლება რკინიგზის სადგურის განმარტება და განისაზღვრება ახალი ტერმინები.

კანონპროექტით ასევე განისაზღვრება სახიფათო ტვირთის რკინიგზით გადაზიდვაზე ზედამხედველობისა და მონიტორინგის საკითხი. საქართველოს მთავრობის ნორმატიული აქტით დამტკიცებული სახიფათო ტვირთის რკინიგზით გადაზიდვის წესის შესრულებაზე ზედამხედველობასა და მონიტორინგზე უფლებამოსილებას განახორციელებს ეკონომიკისა და მდგრადი განვითარების სამინისტროს სისტემაში შემავალი სსიპ – სარკინიგზო ტრანსპორტის სააგენტო. ამასთან, განისაზღვრება სააგენტოს ფუნქციები სახიფათო ტვირთის გადაზიდვის სპეციალისტთან მიმართებით.

კანონპროექტი უზრუნველყოფს რკინიგზის მგზავრთა მომსახურების დონისა და სარკინიგზო საწარმოების ანგარიშვალდებულების გაზრდას და მნიშვნელოვან სიახლეებს ითვალისწინებს რკინიგზის მგზავრთა უფლებების დაცვის მიზნით. კერძოდ, კანონი პირდაპირ ადგენს, რომ სარკინიგზო ტრანსპორტით სარგებლობისას დაუშვებელია მგზავრთა დისკრიმინაცია.

სიმართლე არის ერთადერთი, რომ მათ შორის, სამწუხაროდ, გერმანიის ელჩი პირდაპირ არის ჩართული ჩვენი ქვეყნის წინააღმდეგ ბრძოლაში, – განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველმა მოადგილემ, საპარლამენტო უმრავლესობის წევრმა ვლადიმერ ბოჟაძემ.

„ოპოზიცია საუბრობდა, რომ როდესაც ჩვენ არ მივიღეთ კანდიდატის სტატუსი ამის გამო რაღაც 14 მილიარდი დახმარება დავკარგეთ. მერე აღმოჩნდა, რომ კანდიდატის სტატუსი აგერ უკვე მეორე წელია მიღებული გვაქვს და თურმე არანაირ 14 მილიარდზე საუბარი არ არის ისევე, როგორც არანაირი 14 მილიარდი ან მილიარდები არ მიუღია ევროკავშირის კანდიდატ უკრაინას ან მოლდოვას ევროკავშირის კანდიდატის სტატუსის მიღების გამო. ახლაც საუბარია იმაზე, რომ საზოგადოებას ჩვენს ქვეყანაში შეექმნას წარმოდგენა, რომ ჩვენ რაღაც ვირტუალური 2 მილიარდი დავკარგეთ და ეს 2 მილიარდი ქართველ ხალხამდე არ მივიდა მარტო იმის გამო, რომ ეს თურმე „ქართული ოცნების“ ბრალია ან რაღაც გაუგებრობაა ევროკავშირთან ურთიერთობის გამო. სიმართლე არის ერთადერთი, რომ მათ შორის, სამწუხაროდ, გერმანიის ელჩი პირდაპირ არის ჩართული ჩვენი ქვეყნის წინააღმდეგ ბრძოლაში“, – განაცხადა ბოჟაძემ.

ცნობისთვის, გერმანიის ელჩი სოციალურ ქსელში წერს, რომ ევროკავშირი მოლდოვას მილიარდ რვაას მილიონ ევროს გადასცემს. არადა ირკვევა, რომ ეს თანხა არა დახმარება, არამედ სესხია, მოლდოვას თანხის დაბრუნება მოუწევს. ამის შესახებ პიტერ ფიშერი მისსავე პოსტში არაფერს ამბობს.

დემოკრატიაზე ზრუნვა სიმართლის თქმით უნდა დაიწყოს და მისი მამოძრავებელი ძალა ჭეშმარიტად თავისუფალი მედიაა, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

როგორც პაპუაშვილი აღნიშნავს, პროპაგანდა, თუნდაც სხვადასხვა არხით წარმოდგენილი, ვერ გაამდიდრებს დემოკრატიას.

მისივე თქმით, აქტივისტური ჟურნალისტიკა ოქსიმორონია და ამით ზარალდება მოქალაქე, რომელსაც წართმეული აქვს ამბის ობიექტური მიღების უფლება.

„უკანასკნელი პერიოდის სკანდალები, რომლებიც USAID-ის მიერ მთელ მსოფლიოში ლიბერალური მედიის დაფინანსებას უკავშირდება, წარმოაჩენს, რომ სინამდვილეში ეს საერთაშორისო ქსელი პროპაგანდას ავრცელებს და, არსებითად, უცხოური მთავრობის მიერ დაფინანსებულ მედიას წარმოადგენს.

გავიგეთ, რომ ასობით მედიაკომპანია, არასამთავრობო ორგანიზაცია და ათასობით ჟურნალისტი პირდაპირ ფინანსდებოდნენ აღნიშნული მთავრობების მიერ შექმნილი საერთაშორისო პროპაგანდისტული ქსელის მიერ, რომელიც შეიქმნა და გამოიყენებოდა სასურველი ნარატივის გასაძლიერებლად და ალტერნატიული მოსაზრებების ჩასახშობად.

ათობით ქართული მედია, ფაქტობრივად, აქტივისტ არასამთავრობო ორგანიზაციას წარმოადგენს, რომლებიც სოციალურ მედიას გარკვეული პოლიტიკური ხაზის ადვოკატირებისთვის იყენებენ და არა ფაქტების გაშუქებისთვის. აგიტაციის გზით, მაგრამ, ასევე, დეზინფორმაციისა და ყალბი ამბების გავრცელებით, ეს მედიაკომპანიები აძლიერებენ უცხოური პროპაგანდისტული ქსელის ნარატივს. ისინი იქმნება და ფინანსდება მხოლოდ ამ მიზნით, თუმცა შენიღბული არიან, როგორც „დამოუკიდებელი“ და „კერძო“ მედია. აღსანიშნავია, რომ USAID-ისა და მის მიერ პროპაგანდის დაფინანსებასთან დაკავშირებული ბოლო დღეების სკანდალი დონორების მიერ მართულ მედიაში მინიმალურად ან საერთოდ არ გაშუქებულა.

აშშ-ის ახალმა ადმინისტრაციამ მკაფიოდ აღნიშნა, რომ უცხოური მედიაგრანტები წარმოადგენდა ინვესტიციას პროპაგანდისტულ ქსელში, რომელიც აშუქებს ისტორიის მხოლოდ ერთ მხარეს არა მხოლოდ საქართველოში, არამედ ამერიკის შიგნითაც.

ამ მავნე მედიაპრაქტიკამ უკანასკნელ დღეებში იჩინა თავი მას შემდეგ, რაც ევროპარლამენტმა საქართველოს შესახებ კიდევ ერთი რეზოლუცია მიიღო. რეზოლუცია მოითხოვს ქართული მედიის მფლობელებისთვის სანქციების დაწესებას. თუმცა, ამავდროულად, ევროპარლამენტარები, რომლებმაც ეს რეზოლუცია დააინიცირეს (მაკალისტერი, გალერი, გეტა, ზოვკო), ამავე დროს „ევროპის დემოკრატიული ფონდის“ (EED) მმართველთა საბჭოს წევრები არიან. სხვა სიტყვებით რომ ვთქვათ, ეს ევროპარლამენტარები იმ მედიაკომპანიების გაუქმებას ცდილობენ, რომელიც მათ შეხედულებებსა და პოლიტიკას არ იზიარებს, ხოლო ამავე დროს, EED-ის მეშვეობით (რომელსაც NED-ის ევროპულ ფილიალსაც უწოდებენ ხოლმე), საკუთარ პროპაგანდისტულ მედიას აფინანსებენ. აღნიშნული კი, კიდევ ერთხელ, ზუსტად ემთხვევა აშშ-ის ახალი ადმინისტრაციის მიერ მსოფლიო პროპაგანდისტული ქსელის აღწერილ მაგალითს, რომელიც ახლა, ევროპარლამენტისა და EED-ის მეშვეობით, აქტიურად არის გავრცელებული ევროპაშიც.

საქართველოში გერმანიის ელჩის გუშინდელი პოსტი პლატფორმა X-ზე პროპაგანდის ამ საინტერესო პრაქტიკის კარგი მაგალითია. მისი თქმით, ევროკავშირი მოლდოვისთვის 1,8 მილიარდ ევროს „ამზადებს“, რითიც იმაზე მიუთითებდა, რომ საქართველო აღნიშნული შესაძლებლობის მიღმა რჩება. უცხოური მთავრობის (ე.ი. EED) მიერ დაფინანსებულმა მედიამ, „დეტალების“ გადამოწმების გარეშე, ფართოდ გაავრცელა ეს სიახლე. ერთ-ერთი „დეტალის“ მიხედვით, „მომზადებული“ 1,8 მილიარდი ევროდან დაახლოებით 1,5 მილიარდი ევრო არცთუ ისე ხელსაყრელი კრედიტია, რომელიც მოლდოვამ ევროკავშირს პროცენტებით უნდა დაუბრუნოს. ამის შემდეგ აღნიშნული ახალი ამბავი საქართველოს რადიკალურმა ოპოზიციამ გამოიყენა, რათა ის გაბუქებულ სკანდალად ექცია, რომლის თანახმადაც, საქართველოს მთავრობამ თითქოს ევროკავშირის ნაჩუქარი ფული „დაკარგა“.

დემოკრატიაზე ზრუნვა სიმართლის თქმით უნდა დაიწყოს და მისი მამოძრავებელი ძალა ჭეშმარიტად თავისუფალი მედიაა.

პროპაგანდა, თუნდაც ის, რომელიც სხვადასხვა არხითაა წარმოდგენილი, ვერ გაამდიდრებს დემოკრატიას. გასაოცარია იმის დანახვა, თუ რად იქცა ჟურნალისტიკა ამ ბოლო პერიოდში. უცხოური დაფინანსების მქონე მედიის აქტივისტები მთავრობის საწინააღმდეგო საპროტესტო აქციებში მონაწილეობენ, მოითხოვენ მთავრობის გადაყენებას ან შეცვლას, ან, სულაც, მთავრობის გადაწყვეტილებებზე ვეტოს უფლებას. ამავდროულად, პროტესტის დროს ისინი აგრძელებენ გაშუქებას.

აქტივისტური ჟურნალისტიკა უბრალოდ ოქსიმორონია. ამით საბოლოოდ ზარალდება მოქალაქე, რომელსაც წართმეული აქვს ამბის ობიექტური მიღების უფლება და, სანაცვლოდ, დივერსიფიცირებულ პროპაგანდას ისმენს. საბოლოო ჯამში, ეს ძირს უთხრის დემოკრატიულ პლურალიზმს და იქცევა სენად, რომელიც უკვე იგრძნობა არა მხოლოდ საქართველოში, არამედ მთელ მსოფლიოში“, – წერს პაპუაშვილი.

დროა, ჩვენი, ხალხის ძალა ვაჩვენოთ რეჟიმს, უნდა ვაჩვენოთ ერთიანობა, ერთსულოვნება, სამშობლოს სიყვარული და პატრიოტიზმი, – ამის შესახებ „სტრატეგია აღმაშენებელის“ ლიდერმა, გიორგი ვაშაძემ ბრიფინგზე განაცხადა.

მისი თქმით, ახლა ახალ ეტაპზე გადასვლა განსაკუთრებით მნიშვნელოვანია.

„ძალიან მნიშვნელოვანი დღეა ხვალ. 18:00 საათზე ევროპის მოედნიდან გაიმართება საპროტესტო მარში. რა თქმა უნდა, ჩვენ ვუერთდებით ამ მარშს სახელწოდებით – არა რუსულ დიქტატურას. ახლა განსაკუთრებულად მნიშვნელოვანია, კიდევ ერთხელ გადავიდეთ ახალ ეტაპზე, როდესაც ფართომასშტაბიანი აქციები და პროტესტი იქნება. რაც შეიძლება მეტი ადამიანი შევიკრიბებით და გამოვხატავთ ჩვენს სურვილს, რომ საქართველო იყოს დემოკრატიული ქვეყანა, წავიდეთ ევროპისკენ, ახალი არჩევნები დაინიშნოს, გათავისუფლდნენ პოლიტიკური პატიმრები. ყველას მოგიწოდებთ, ხვალ, 18:00 საათზე მობრძანდეთ ევროპის მოედანზე, შევუერთდეთ ამ მნიშვნელოვან აქციას, რომელიც გადამწყვეტია შემდგომი პერიოდისთვის. ფართომასშტაბიანი აქციები შემდგომშიც არის დაგეგმილი. ახლა იმის დროა, როდესაც ჩვენი ძალა უნდა ვაჩვენოთ რეჟიმს, უნდა ვაჩვენოთ ხალხის ძალა, ერთიანობა, ერთსულოვნება, სამშობლოს სიყვარული, პატრიოტიზმი. ვაჩვენოთ ის, რომ მათი დეზინფორმაცია, ცრუ პროპაგანდა ჩვენზე არ მუშაობს, ჩვენ ვართ ერთიანები და ვიბრძვით საქართველოს გამარჯვებისთვის“, – განაცხადა ვაშაძემ.