როგორც განცხადებაშია აღნიშნული, Transparencia Electoral-ის მიერ არჩევნებზე დასაკვირვებლად გამოგზავნილმა დელეგაციის წევრებმა გამართეს შეხვედრები, ასევე დააკვირდნენ საარჩევნო პროცესში დანერგილი ტექნოლოგიის მუშაობას.

„გასულ შაბათს, 26 ოქტომბერს საქართველოში საპარლამენტო არჩევნები ჩატარდა, სადაც პარლამენტის 150 წევრი აირჩიეს, დაახლოებით 60%-იანი აქტივობით. Transparencia Electoral-მა არჩევნებზე დასაკვირვებლად მიავლინა მოკლევადიანი დელეგაცია, რომლის შემადგენლობაში შედიოდნენ გენერალური დირქტორი ედუარდო რეპილიოზა-ფერნანდესი და საერთაშორისო ურთიერთობების კოორდინატორი მარსელო პერეგრინო ფერეირა. ვიზიტის ფარგლებში დელეგაცია შეხვდა ჯეკ კობს, რომელიც წარმოადგენს Pro V&V-ის ორგანიზაციას, რომელიც პასუხისმგებელია არჩევნების დღეს გამოყენებული სისტემების აუდიტზე. კობმა განმარტა ამომრჩეველთა საიდენტიფიკაციო დანადგარისა (VIU) და ხმების დათვლის ოპტიკური სკანერის (PCOS) მუშაობის დეტალები, ტექნოლოგიის, რომელიც საარჩევნო პროცესის გამჭვირვალობის უზრუნველყოფისთვის საკვანძოა.

არჩევნების დღემდე ელექტრონული ხმის მიცემის აღჭურვილობა, რომელსაც ამომრჩეველთა 90% იყენებდა, გაიგზავნა რაიონულ საწყობებში საარჩევნო ცენტრებში დასარიგებლად, რა დროსაც მათ დაცვას უსაფრთხოების ძალები უზრუნველყოფდნენ. დელეგაცია ასევე შეხვდა საქართველოს ცენტრალური საარჩევნო კომისიის თავმჯდომარე გიორგი კალანდარიშვილს. საუბარი შეეხო ცესკო-ს მიერ გამჭვირვალობის სტანდარტების შენარჩუნების მნიშვნელობას ამ ახალი სისტემების დანერგვისას. ჩვენი დელეგაცია ასევე შეხვდა „სამართლიანი არჩევნებისა და დემოკრატიის საერთაშორისო საზოგადოების“ (ISFED) აღმასრულებელი დირექტორის მოადგილეს ლევან ნატროშვილს, რომლის ორგანიზაცია საქართველოში არჩევნებზე მნიშვნელოვანი დამკვირვებელია, რომელსაც არჩევნების დღეს 1 500-ზე მეტი დამკვირვებელი ჰყავდა, ასევე არასამთავრობო ორგანიზაციის „საქართველოს საზოგადოებრივი მოძრაობა მრავალეროვნული საქართველოს“ (PMMG) წარმომადგენლებს, რომელიც ქვეყანაში ეთნიკური უმცირესობების უფლებების, მათ შორის სამოქალაქო და პოლიტიკური უფლებების ხელშეწყობასა და დაცვაზე მუშაობს.

არჩევნების დღეს ჩვენმა დელეგაციამ დაათვალიერა თბილისის საარჩევნო უბნები, რათა დაჰკვირვებოდა საარჩევნო პროცესში დანერგილი ტექნოლოგიის მუშაობას. ამ ტექნოლოგიურ გადაწყვეტილებებთან დაკავშირებით როგორც საერთაშორისო, ასევე შიდა საარჩევნო მისიებმა განაცხადეს, რომ პოლიტიკური აქტორები შეთანხმდნენ იმაზე, რა უპირატესობებს მოიტანდა ეს და რომ ის გამართულად მუშაობდა არჩევნების დღეს“, – აღნიშნულია განცხადებაში.

განცხადების თანახმად, ცესკო-მ დიდი ძალისხმევა მიმართა საარჩევნო ტექნოლოგიების დასანერგად, რათა გაეუმჯობესებინა არჩევნების გამჭვირვალობა და ეფექტურობა.

„ხელისუფლებამ დააყენა ამომრჩეველთა იდენტიფიკაციის 7 508 აპარატი, ხმების მთვლელი 4876 ოპტიკური სკანერი და 2263 პლანშეტი. არსებული ცნობებით, 14 647 ტექნოლოგიური მოწყობილობიდან 99,86% გამართულად მუშაობდა. დელეგაციის მიერ შეგროვებული ანგარიშებისა და დაკვირვების თანახმად, ტექნიკური დახმარება ხელმისაწვდომი იყო არჩევნების დღეს წარმოქმნილი პრობლემების მოსაგვარებლად. ასევე თვალს ადევნებდა არჩევნების დღის შემდგომ მოვლენებს და გააანალიზა ანგარიშები სხვა ეროვნული და საერთაშორისო დელეგაციების, რომლებიც ახორციელებდნენ გრძელვადიან სადამკვირვებლო მისიას, სადაც ისინი აფრთხილებდნენ, რომ წინასაარჩევნო პერიოდში პარლამენტმა მიიღო კანონმდებლობა, რომელიც მიზნად ისახავდა სამოქალაქო საზოგადოების ორგანიზაციების მუშაობის შეზღუდვას და სახელმწიფო რესურსები გამოიყენებოდა მმართველი პარტიის სასარგებლოდ.

მიუხედავად იმისა, რომ Transparencia Electoral-ს არ ჰქონდა დრო და რესურსი წინასაარჩევნო კვლევის ჩასატარებლად, ორგანიზაცია მიიჩნევს, რომ ეს საჩივრები და ბრალდებები პასუხისმგებლობით და ფორმალურად უნდა იყოს წარმოდგენილი ქართული ინსტიტუციური არხებით. ცესკო-ს გადაწყვეტილება, გადაეთვალა ხმის მიცემის უბნების 12%, რაც ამომრჩეველთა 14%-ის ეკვივალენტურია, იყო საუკეთესო პრაქტიკის შესაბამისად მიღებული ზომა, რომელმაც დაადგინა, რომ წინასწარ და საბოლოო დათვლას შორის, პრაქტიკულად, არანაირი განსხვავება არ იყო“, – ნათქვამია Transparencia Electoral-ის განცხადებაში.

ორგანიზაცია Transparencia Electoral მოუწოდებს კომპეტენტურ ინსტიტუტებს, პოლიტიკური და სამოქალაქო საზოგადოების ორგანიზაციების მიერ საარჩევნო პროცესთან დაკავშირებით შეტანილ საჩივრებზე განხილვისა და დროული რეაგირების მექანიზმები დააჩქარონ.

„დემოკრატიის სიჯანსაღე დიდწილად ეყრდნობა აქტორების ნდობას კანონის უზენაესობის მიმართ, ამიტომ მათ, ვინც მიიჩნევს, რომ ზიანი მიადგა მათ პოლიტიკურ უფლებებს, უნდა ჰქონდეთ ქმედითი ინსტიტუციური პასუხის იმედი. ანალოგიურად, საჩივრების განხილვის შემდეგ, მნიშვნელოვანია კონკურენტუნარიანობისა და არჩევნების სამართლიანობის პირობების შესაძლო გაუმჯობესების შესახებ დისკუსიისთვის ახალი სივრცეების ხელშეწყობა. ამ თვალსაზრისით, Transparencia Electoral-ს შეუძლია გამართოს შეხვედრები სხვადასხვა პოლიტიკურ, ინსტიტუციონალურ და სამოქალაქო საზოგადოების აქტორებთან, რათა გაიგოს მათი შთაბეჭდილებები და ამით შეიმუშაოს ადმინისტრაციული, საკანონმდებლო წინადადებები არჩევნებისა და ინსტიტუტების მიმართ ნდობის გასაუმჯობესებლად. ამჟამინდელ კონტექსტში აუცილებელია, რომ ყველა აქტორმა შეინარჩუნოს ღია პოზიცია და დაადასტუროს თავისი ერთგულება დემოკრატიისა და არჩევნებისადმი, როგორც ხალხის სახელით მთავრობების შექმნის ერთადერთი ლეგიტიმური გზისადმი“, – აღნიშნულია Transparencia Electoral-ის განცხადებაში.

Transparencia Electoral-ი არჩევნების დროს გამოყენებული ტექნოლოგიის შესახებ სრულ ანგარიშს მომდევნო დღეებში გამოაქვეყნებს.

ევროპის ქვეყნების პარლამენტების საგარეო ურთიერთობათა კომიტეტების თავმჯდომარეები, დეპუტატები და ევროპარლამენტარები საქართველოსთან დაკავშირებით ერთობლივ განცხადებას ავრცელებენ.

განცხადებაში ხელმომწერები მწუხარებას გამოთქვამენ „საქართველოს ბოლოდროინდელ დემოკრატიულ უკუსვლის” გამო.

დოკუმენტში საუბარია 26 ოქტომბრის არჩევნებზე და შეშფოთება, რომ საპარლამენტო არჩევნები საქართველოში ჩატარდა „ინციდენტებისა და სისტემური დარღვევების უპრეცედენტო რაოდენობით”.

განცხადებაში ხაზგასმულია დამოუკიდებელ საერთაშორისო გამოძიების აუცილებლობაზე.

“მყარად ვართ სოლიდარული ერებთან, რომლებიც დემოკრატიის, ფუნდამენტური უფლებებისა და კანონის უზენაესობის ღირებულებების ერთგული არიან.

მყარად ვდგავართ ქართველ ხალხთან და მათ ევროპულ არჩევანთან.

დიდი მწუხარებით აღვნიშნავთ საქართველოს ბოლოდროინდელ დემოკრატიულ უკუსვლას, მათ შორის ანტიევროპული კანონმდებლობის ამოქმედებას, რომელიც დამოუკიდებელი სამოქალაქო საზოგადოებისთვისა და ადამიანის უფლებებისთვის სივრცეს ზღუდავს.

ვიმეორებთ ჩვენს უღრმეს შეშფოთებას იმ ფაქტის თაობაზე, რომ 26 ოქტომბრის საპარლამენტო არჩევნები საქართველოში ჩატარდა ინციდენტებისა და სისტემური დარღვევების უპრეცედენტო რაოდენობით, რომლებიც საერთაშორისო დამკვირვებლებმა აღნიშნეს.

აღვნიშნავთ, რომ არჩევნების სამართლიანობა და კანონის უზენაესობის დაცვა განუყოფელი ნაწილი და საფუძველია ევროპული ღირებულებების, რომლისადმი საქართველომ, როგორც ევროკავშირის კანდიდატმა ქვეყანამ, ერთგულება უნდა აჩვენოს.

მოვითხოვთ, რომ საქართველოს ოფიციალურმა პირებმა უზრუნველყონ:

საარჩევნო მანიპულაციების შესახებ ყველა ბრალდება (მათ შორის წინასაარჩევნო პერიოდში) გამჭვირვალედ იქნება გამოძიებული, განსაკუთრებით ამომრჩევლების დაშინებისა და ხმების ყიდვაზე.

ვინაიდან, ხელთ არსებული ბრალდებები იმდენად სერიოზულია, რომ მხოლოდ დამოუკიდებელ საერთაშორისო გამოძიებას შეუძლია ამ არჩევნებისა და წინასაარჩევნო პერიოდში და არჩევნების დროს ყველა დაფიქსირებული დარღვევის შესწავლა და გამოძიება.

ხმის მიცემის პროტოკოლები ხელმისაწვდომი და საჯაროდ გამჭვირვალე გახადონ, რათა ყოველმა ამომრჩეველმა შეძლოს დადასტურება მათი ხმის მიცემის ფაქტზე, დროსა და ადგილზე ინფორმაცია შეესაბამება თუ არა სიმართლეს.

გაწვეულ იქნას კანონმდებლობა, რომელიც საქართველოს მოქალაქეებისა და ორგანიზაციების ფუნდამენტურ უფლებებსა და თავისუფლებებს უთხრის ძირს, და ეწინააღმდეგება ღირებულებებსა და პრინციპებზე, რომლებზეც ევროკავშირი არის დაფუძნებული”, – აღნიშნულია განცხადებაში.

ამასთან, ისინი მოუწოდებენ ევროკავშირს და მოკავშირეებს დაასანქცირონ ოფიციალური პირები, მათ შორის ბიძინა ივანიშვილი – ისინი, „ვინც პასუხისმგებელი არიან საარჩევნო პროცესის დარღვევებზე”.

„მოვუწოდებთ ევროკავშირსა და ტრანსატლანტიკურ მოკავშირეებს, დაასანქცირონ საქართველოს ოფიციალური პირები და პოლიტიკური ლიდერები, მათ შორის ბიძინა ივანიშვილი, ვინც პასუხისმგებელი არიან საარჩევნო პროცესის დარღვევებზე, მათ შორის სახელმწიფო ინსტიტუტებისა და ადმინისტრაციული რესურსების გამოყენებაზე საარჩევნო პროცესის განმავლობაში.

მოვითხოვთ ევროკავშირის ყველა დაფინანსების გაყინვას, რომელიც გამოიყენება საქართველოს სახელმწიფო და საჯარო ინსტიტუტების დახმარებისთვისა და თანამშრომლობის პროექტებისთვის, მათი გამონაკლისით, ვინც ჩართულია სამოქალაქო საზოგადოებისა და კანონის უზენაესობის სტრუქტურების ჩამოყალიბებაში.

ვიცით რამდენად მნიშვნელოვანია სავიზო თავისუფლება, განსაკუთრებით ახალგაზრდა ხალხისთვის. მოვუწოდებთ ევროკომისიას და ევროპულ საბჭოს, გადახედონ საქართველოსთან ვიზალიბერალიზაციის რეჟიმს მისი სრული შეჩერების შესაძლებლობის გამორიცხვის გარეშე, თუ ზემოხსენებული [პირობები] არ იქნება დაკმაყოფილებული.

გავაგრძელებთ ქართველ ხალხთან და მათ ევროპულ არჩევანთან დგომას. ასევე ურყევად გავაგრძელებთ საქართველოს დამოუკიდებლობის, სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის მხარდაჭერას,” – ნათქვამია ერთობლივ განცხადებაში.

ხელმომწერები არიან ევროპის ქვეყნების 30 საპარლამენტო ლიდერი, დეპუტატი და ევროპარლამენტარი:

კრისტინე შვარც-ფუკსი (ავსტრია, ფედერალური საბჭოს საგარეო ურთიერთობათა კომიტეტის თავმჯდომარე), ელს ვან ჰოოფი (ბელგია, წარმომადგენელთა პალატის საგარეო ურთიერთობათა კომიტეტის თავმჯდომარე), პაველ ფიშერი (ჩეხეთი, სენატის საგარეო ურთიერთობათა კომიტეტის თავმჯდომარე), მარკო მიჰკელსონი (ესტონეთი, პარლამენტის საგარეო ურთიერთობათა კომიტეტის თავმჯდომარე), პეეტერ ტალი (ესტონეთი, პარლამენტის ევროპულ საქმეთა კომიტეტის თავმჯდომარე), იუკა კოპრა (ფინეთი, პარლამენტის თავდაცვის კომიტეტის თავმჯდომარე), ჰეიკი აუტტო (ფინეთი, პარლამენტის დიდი კომიტეტის თავმჯდომარე), სებასტიან ტინკინენი (ფინეთი, პარლამენტის საგარეო ურთიერთობათა საბჭოს წევრი), ფრედერიკ პეტიტი (საფრანგეთი, პარლამენტი ევროპულ საქმეთა კომიტეტის თავმჯდომარის მოადგილე), მაიკლ როთი (გერმანია, ბუნდესტაგის საგარეო ურთიერთობათა კომიტეტის თავმჯდომარე), ანტონ ჰოფრეიტერი (გერმანია, ბუნდესტაგის ევროპულ საქმეთა კომიტეტის თავმჯდომარე), რასა იუკნევიჩიენე (ლიეტუვა, ევროპარლამენტარი), რაფაელ გლუკსმანი (საფრანგეთი, ევროპარლამენტარი), რიჰარდს კოლსი (ლატვია, ევროპარლამენტარი), ჩარლი ფლანაგანი (ირლანდია, პარლამენტის საგარეო ურთიერთობათა კომიტეტის თავმჯდომარე), ლია ქუარტაპელე (იტალია, პარლამენტის საგარეო ურთიერთობათა კომიტეტის თავმჯდომარის მოადგილე), ინარა მურნიეცე (ლატვია, პარლამენტის საგარეო ურთიერთობათა კომიტეტის თავმჯდოამარე), ედმუნდს ცეპურიტისი (ლატვია, პარლამენტის ევროპულ საქმეთა კომიტეტის თავმჯდომარე), ემანუელის ზინგერისი (ლიეტუვა, პარლამენტის საგარეო ურთიერთობათა კომიტეტის თავმჯდომარე), ჟიგიმანტას პავილიონისი (ლიეტუვა, პარლამენტის ევროპულ საქმეთა კომიტეტის თავმჯდომარე), გუსტი გრაასი (ლუქსემბურგი, პარლამენტის საგარეო საქმეთა კომიტეტის თავმჯდომარე), იესე კლავერი (ნიდერლანდები, წარმომადგენელთა პალატის საგარეო ურთიერთობათა კომიტეტის თავმჯდომარე), დერკ ბოსვიიკი (ნიდერლანდები, წარმომადგენელთა პალატის საგარეო ურთიერთობათა კომიტეტის წევრი), ინა ცოსერუ (მოლდოვა, პარლამენტის საგარეო პოლიტიკის კომიტეტის თავმჯდომარე), აგნიეშკა პომასკა (პოლონეთი, სეიმის ევროკავშირის საქმეთა კომიტეტის თავმჯდოამარე), ბოგდან კლიჩი (პოლონეთი, სენეტის ევროკავშირის საქმეთა კომიტეტის თავმჯდომარე), კარლოს როჰასი (ესპანეთი, პარლამენტის საგარეო ურთიერთობათა კომიტეტის თავმჯდომარის მოადგილე), პაბლო ჰისპანი (ესპანეთი, პარლამენტის საგარეო ურთიერთობათა კომიტეტის წევრი), ერიკ ოტოსონი (შვედეთი, პარლამენტის წევრი), ოლექსანდრ მერეჟკო (უკრაინა, პარლამენტის საგარეო ურთიერთობათა კომიტეტის თავმჯდომარე).

საქართველოს პრემიერ-მინისტრი იწყებს ვიზიტს უნგრეთში, სადაც მონაწილეობას მიიღებს ევროპის პოლიტიკური გაერთიანების სხდომაში, რომელსაც ევროკავშირის წევრი ქვეყნების ლიდერები და კანდიდატის სტატუსის მქონე ქვეყნები ესწრებიან, – ამის შესახებ საქართველოს საგარეო საქმეთა მინისტრმა ილია დარჩიაშვილმა ბუდაპეშტში განაცხადა.

დარჩიაშვილის შეფასებით, ეს არის ძალიან მნიშვნელოვანი ფორმატი, რომელიც შეიქმნა პრეზიდენტ მაკრონის ინიციატივით და საინტერესო მექანიზმია იმისთვის, რომ ევროკავშირთან პოლიტიკურად ასოცირებული ქვეყნები კიდევ უფრო მეტად დაახლოვდნენ.

„პრემიერ-მინისტრი მონაწილეობას მიიღებს სხვადასხვა ტიპის დისკუსიაში და პირველი იქნება ეკონომიკური უსაფრთხოების თემატიკაზე. საქართველოს ეკონომიკური განვითარება ჩვენი ქვეყნისთვის ერთ-ერთ მთავარი პრიორიტეტია და ამ დისკუსიაზე, რომელსაც თავმჯდომარეობს გერმანიის კანცლერი, საქართველოს პრემიერ-მინისტრი სიტყვით გამოვა. ძალიან მნიშვნელოვანია, რომ პრემიერ-მინისტრი მონაწილეობას მიიღებს შემაჯამებელ პლენარულ სესიაში, სადაც ევროკავშირის წევრი ქვეყნების და კანდიდატი ქვეყნების ლიდერებთან ერთად შეჯამდება გამართული დისკუსია. ვფიქრობთ, ჩვენთვის მსგავსი ტიპის პლატფორმაში მონაწილეობა ძალიან მნიშვნელოვანია, ვინაიდან ჩვენი ქვეყნის საგარეო პოლიტიკური პრიორიტეტის ერთ-ერთი მთავარი ხაზი არის ევროპული ინტეგრაცია და გარდა საქართველო-ევროკავშირის ორმხრივი თანამშრომლობისა, ჩვენ ვიყენებთ ყველა შესაძლებლობას, რომ საქართველომ წარმატებით განაგრძოს ევროპული ინტეგრაცია“, – განაცხადა ილია დარჩიაშვილმა.

ჩვენ ვიბრძვით არჩევნების შედეგების ბათილობისთვის, ამისთვის გამოვიყენებთ ყველა გზას, – ამის შესახებ “კოალიცია ცვლილებისთვის” ლიდერმა ნიკა გვარამიამ პრეზიდენტთან შეხვედრის შემდეგ ჟურნალისტებთან განაცხადა.

გვარამიას თქმით, “სამწუხაროა ევროპელი ლიდერების განცხადებები, მაგრამ კანონზომიერი, რადგან ჩვენ გვყავს რუსული მთავრობა”.

“ჩვენ პრეზიდენტის ინიციატივებს არ ვიხილავდით, საუბარი გვქონდა იმასთან დაკავშირებით, თუ რა ხდება ამ ქვეყანაში, როგორ ვხედავთ ოპოზიციური პარტიები და რა გეგმები გვაქვს ან ხომ არ შეცვლილა ეს გეგმები. ცხადია, ეს გეგმები არ შეცვლილა, ჩვენ ვიბრძვით არჩევნების შედეგების ბათილობისთვის, ამისთვის გამოვიყენებთ ყველა გზას, როგორც ლეგალურს, ანუ სასამართლოებს და, მათ შორის, საკონსტიტუციო სასამართლოსაც, ასევე გამოვიყენებთ კონსტიტუციითა და კონვენციებით ნებადართულ გზას სახალხო დემოკრატიისა, რომელსაც მარტივად ჰქვია ქუჩა. ნებისმიერ შემთხვევაში, ეს არჩევნები არ გამოხატავს ქართველი ხალხის ნებას, ეს იცის მსოფლიოში ყველამ. ბუნებრივია, რომ საერთაშორისო შესწავლა ამ არჩევნების აუცილებლად მოხდება იმიტომ, რომ, ყველას შევახსენებ, მეოთხე პუნქტი ბოლო რეკომენდაციებისა ეხება თავისუფალ და სამართლიან არჩევნებს, რამდენად იყო ეს არჩევნები შესაბამისობაში ამ დათქმასთან, ეს ისედაც ცხადი და გასაგებია, თუმცა ჩვენ მტკიცებულებებითაც ამას გავამყარებთ. ახალი არჩევნები იქნება.

პრეზიდენტთან არ გვისაუბრია, საპროტესტო მოძრაობა მოსწონს თუ არა. პრეზიდენტი არის ჩვენი კონსტიტუციური უფლებების დაცვის გარანტი, მას ეს ვალდებულებაც და უფლებაც აქვს და, შესაბამისად, როცა ადამიანები კონსტიტუციით მინიჭებულ უფლებას იყენებენ, არ მგონია, ეს პრეზიდენტს არ მოსწონდეს.

სამწუხაროა ევროპელი ლიდერების განცხადებები იმიტომ, რომ ჩვენ ევროპელი ხალხი ვართ, მაგრამ კანონზომიერია, რადგან ჩვენ გვყავს რუსული მთავრობა, ამიტომ, თუ გვინდა, რომ თანხვედრაში იყოს ჩვენი ხალხის ევროპული მისწრაფებები ჩვენი სახელმწიფოს ქმედებებთან, უნდა გვყავდეს ახალი მთავრობა ევროპული მისწრაფებებით. ბუნებრივია, რომ სახელმწიფოს პოზიციას საერთაშორისო ასპარეზზე გამოხატავს ხელისუფლება, ვიდრე ასეთია ხელისუფლება, ევროპა თავის ოჯახში არ მიგვიღებს, ეს ძალიან გასაგებია, ეს არავის უნდა ეწყინოს და ვისაც ეს არ მოსწონს, ხელისუფლება უნდა შეცვალოს. მოგვპარეს არჩევნები? წავართვათ უკან!”, – აღნიშნა გვარამიამ.

საქართველოს პრეზიდენტთან პოლიტიკური პარტიების წარმომადგენლების კონსულტაციები გრძელდება.

როგორც შეხვედრის დაწყებამდე „ერთიანობა-ნაციონალური მოძრაობის“ ლიდერმა, თინა ბოკუჩავამ განაცხადა, პრეზიდენტი არის ერთადერთი დამოუკიდებელი სახელმწიფო ინსტიტუტი ქვეყანაში.

„პარტიები ვართ ძალიან ინტენსიურ კონსულტაციებში პრეზიდენტთან, რომელიც არის ერთადერთი დამოუკიდებელი სახელმწიფო ინსტიტუტი, მაშინ, როცა ყველა სხვა ინსტიტუტი მიტაცებულია. ამის მაგალითი ვნახე, მათ შორის სააპელაციო სასამართლოში ახლა, საიდანაც მოვდივარ, სადაც დიმიტრი გვრიტიშვილს არ ეყო პროფესიონალიზმი, დამოუკიდებლობის, კეთილსინდისიერების შინაგანი განცდაც კი, რომ აცილების შუამდგომლობა დაეკმაყოფილებინა. ეს კიდევ ერთხელ ადასტურებს იმას, რომ სასამართლო, ყველა სხვა სახელმწიფო უწყება არის მიტაცებული, პრეზიდენტი არის ერთადერთი დამოუკიდებელი ინსტიტუტი და შესაბამისად, როგორც დემოკრატიის ერთადერთი შუქურა ამ ქვეყანაში, ჩვენთვის მნიშვნელოვანია მასთან ინტენსიური კონსულტაციები იმისთვის, რომ ერთობლივი ძალისხმევით დაიგეგმოს, მათ შორის, მომავალი რამდენიმე კვირა, როცა უნდა დავიბრუნოთ ჩვენი ქვეყნის ევროპული მომავალი“, – განაცხადა ბოკუჩავამ.