გახარია როდესაც აცხადებს ჩვენ პარლამენტში არ ვართო, ეს არის ტყუილი, ფიზიკურად აქ არ შემოსულან, მაგრამ რეალურად გიორგი გახარიას პარტიამ ის არ გააკეთა, რაც სხვა რადიკალებმა გააკეთეს, ანუ სია ცენტრალურ საარჩევნო კომისიაში არ ჩაუხსნიათ, – განაცხადა საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილმა.

მისივე თქმით, კი, დაწერეს მათ განცხადებები, რომ ისინი პარლამენტში არ აპირებენ შემოსვლას, მაგრამ ეს სია, რომელიც მათ წინასაარჩევნოდ წარადგინეს ცენტრალურ საარჩევნო კომისიაში, არის აქტუალური და აქტიური.

„შესაბამისად, წესს რაც შეეხება, რეგლამენტით დადგენილ პროცედურას, თუკი ერთი სესიის ნახევარზე მეტს გააცდენს კონკრეტული პარტია, მას, რა თქმა უნდა, შეუწყდება მანდატები, მაგრამ ამ ყველაფრის განხილვა და მსჯელობა ხდება სესიის ამოწურვის შემდეგ ათ დღეში. სესიის ნახევრის შემდეგაც თეორიული შანსი არის, ზოგადად, დარჩენილი, რომ შესაძლოა ჩაინიშნოს სესიები და ა.შ. რაღაცნაირად შეივსოს ეს სივრცე. ამიტომ, წესი იქნება ასეთი, ჩვენ დაველოდებით სესიის ბოლოს, იქნება მოკვლევა რა საფუძვლით არ მონაწილეობდნენ ეს დეპუტატები საპარლამენტო სხდომებში, კომიტეტებსა და სესიებში და შემდგომ მოხდება მათი უფლებამოსილების შეწყვეტა, მაგრამ წესის მიხედვით, რადგანაც ჩახსნილი არ აქვს სია გახარიას პარტიას, შემდგომ წევრებზე მოხდება ცესკოს მხრიდან შეთავაზება და მათი, ანუ გახარიას თანხმობის შემთხვევაში უკვე შემდეგი 12 ადამიანი ჩაითვლება გახარიას პარტიიდან იმ წინა 12-ის უფლებამონაცვლედ. ეს შეგნებულად გააკეთა გახარიამ, რა თქმა უნდა, რომ საბიუჯეტო დაფინანსება მას არ შეეწყვიტოს იმიტომ, რომ საბიუჯეტო დაფინანსება ყველა იმ პარტიას შეუწყდა, რომლებმაც მთლიანად ჩახსნეს სია ცესკოში და ამით უარი განაცხადეს საბოლოოდ პარლამენტში შემოსვლაზე. ესეც რაღაც გარკვეული ფანდი იყო იმისთვის, რომ ბიუჯეტიდან ფინანსები გახარიას მიეღო“, – აღნიშნა დავით მათიკაშვილმა.

ოპოზიციამ და „ენჯეოებმა“ 26 მაისს ძალადობა დააანონსეს. ცალსახად ითქვას, ან დონორები, საელჩოები ემიჯნებიან ძალადობას, ტერორს, ან ეს ყველაფერი იქნება მათ ანგარიშზე, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისივე თქმით, ოპოზიცია პირდაპირ საუბრობს მსხვერპლსა და რადიკალიზაციაზე.

„არ ვიცი, ვინ ვის ხვდება, თუმცა მართლაც ვაკვირდები, რამდენად ექნებათ დიპლომატებს სამუშაო შეხვედრები, განსაკუთრებით მას შემდეგ, რაც ოპოზიციამ და „ენჯეოებმა“ 26 მაისს ძალადობა დააანონსეს. ჩვენ ვნახეთ, რომ პირდაპირ მსხვერპლზე საუბრობს ოპოზიცია და საუბრობს რადიკალიზაციაზე. ის გამოცდილება, რომელიც ჩვენ გვაქვს, სამწუხაროდ, კარგს არაფერს გვაფიქრებინებს მათზე და ამიტომ, რა თქმა უნდა, აქ საინტერესო არის ცალსახა პოზიცია ზოგიერთი ელჩისა. ჩვენ ვნახეთ, რომ 9 აპრილს მოძალადე ჯგუფებმა, „ენჯეოების“ და პარტიების მოძალადე ჯგუფებმა როგორ სცადეს რადიკალიზაცია. იძალადეს, მათ შორის 9 აპრილის მონაწილეებზე. არ უშვებდნენ მათ მემორიალთან. ამას ყველაფერს უყურებდნენ ამ „ენჯეოების“ დამფინანსებელი ელჩები და ხმა არ ამოუღიათ. 9 აპრილიდან გავიდა თვეზე მეტი და ერთი დაგმობაც არ გვინახავს დონორებისა, როდესაც მათმა დაფინანსებულმა „ენჯეოებმა“ 9 აპრილს მემორიალთან ძალადობის აქტი ჩაიდინეს. ასე რომ, ახლაც ჩვენ ვხედავთ, რომ ზოგიერთი „ენჯეო“ და პოლიტიკური ჯგუფები პირდაპირ აანონსებენ პროვოკაციებს, აანონსებენ ძალადობას. შესაბამისად, მინდა, ერთი რამე ვთქვა: თუკი რომელიმე „ენჯეო“ გაერევა კიდევ ერთხელ ძალადობაში, პირდაპირ ეს იქნება იმ დონორის ბრალი, რომელიც აქამდე ხმას არ იღებს. ასე რომ, ცალსახად ითქვას, ან დონორები, საელჩოები ემიჯნებიან ძალადობას, ტერორს, სიძულვილს, ან ეს ყველაფერი იქნება მათ ანგარიშზე“, – განაცხადა პაპუაშვილმა.

დიდი ბრიტანეთი ღრმად შეშფოთებულია ოპოზიციის ლიდერის, ზურაბ ჯაფარიძისთვის წინასწარი პატიმრობის შეფარდებით, მისი დაკავება სრულიად არაპროპორციული ზომაა, რომელიც მიზნად ისახავს პოლიტიკური ოპოზიციის დაშინებას და გაჩუმებას, – ამის შესახებ საქართველოში დიდი ბრიტანეთის საელჩოს მიერ სოციალურ ქსელში გავრცელებულ განცხადებაშია ნათქვამი.

როგორც დიპლომატიური მისიის განცხადებაშია ნათქვამი, ეს არის საქართველოს სერიოზული დემოკრატიული დაღმასვლის კიდევ ერთი დასტური.

„დიდი ბრიტანეთი ღრმად შეშფოთებულია ოპოზიციის ლიდერის, ზურაბ ჯაფარიძისთვის წინასწარი პატიმრობის შეფარდებით. მისი დაკავება სრულიად არაპროპორციული ზომაა, რომელიც მიზნად ისახავს პოლიტიკური ოპოზიციის დაშინებას და გაჩუმებას. ოპოზიციური პარტიების აკრძალვის შესახებ კანონის მიღებასთან და „ქართული ოცნების“ მხრიდან ოპოზიციური პარტიების არაკონსტიტუციურად გამოცხადების შესახებ გაკეთებული განცხადებების ფონზე, ეს საქართველოს სერიოზული დემოკრატიული დაღმასვლის კიდევ ერთი დასტურია. პლურალისტური, მრავალპარტიული დემოკრატია ევრო-ატლანტიკური ღირებულებების აუცილებელი ნაწილია. „ქართულმა ოცნებამ“ ახლავე უნდა შეაჩეროს ანტიდემოკრატიული ზომების მიღება“, – ნათქვამია განცხადებაში.

ევროკავშირის საელჩო, როგორც ჩანს, აღიარებს და კითხულობს ვენის კონვენციას, ახლა ერთადერთი რამე დარჩენიათ, ვენის კონვენციის 41-ე მუხლის პირველი პუნქტიც წაიკითხონ, სადაც წერია, რომ დიპლომატი ვალდებულია, არ ჩაერიოს საშინაო საქმეებში, – ამის შესახებ პარლამენტის თავმჯდომარემ, შალვა პაპაუშვილმა განაცხადა.

მისი თქმით, ევროკავშირის დელეგაციის წევრთან დაკავშირებით განმარტება გაკეთდა, როგორც საგარეო საქმეთა სამინისტროს, ისე შსს-ს მხრიდან, რომ იყო ტექნიკური ხარვეზი.

„ევროკავშირის დელეგაციის წევრთან დაკავშირებით განმარტება გაკეთდა, როგორც საგარეო საქმეთა სამინისტროს, ისე შსს-ს მხრიდან, რომ იყო ტექნიკური ხარვეზი. საგარეო საქმეთა სამინისტრომ თავისი წუხილიც გამოთქვა ევროკავშირის წარმომადგენლობის მიმართ. განემარტათ, რომ ამ თანამშრომელს შეუძლია, ნებისმიერ დროს შემოვიდეს. თუმცა, ერთი ნიშანდობლივი საკითხი იყო ევროკავშირის საელჩოს განცხადებაში და მივესალმები, რომ საელჩომ მიუთითა ვენის კონვენციის დარღვევაზე. მართალია, აკრედიტებული დიპლომატის თავისუფალი გადაადგილების უზრუნველყოფა, ვენის კონვენციიდან გამომდინარე არის მასპინძელი სახელმწიფოს ვალდებულება. მიხარია, რომ ევროკავშირის საელჩო, როგორც ჩანს, აღიარებს და კითხულობს ვენის კონვენციას. ახლა ერთადერთი რამე დარჩენიათ, ვენის კონვენციის 41-ე მუხლის პირველი პუნქტიც წაიკითხონ, სადაც წერია, რომ დიპლომატი ვალდებულია, არ ჩაერიოს საშინაო საქმეებში. ამ პუნქტსაც თუ წაიკითხავენ და შეასრულებენ, ვენიის კონვენციის გარშემო ჰარმონიული თანაარსებობა იქნება. იმ მომენტშივე განიმარტა, რომ ეს იყო ტექნიკური შეცდომა, გარკვეული ხარვეზი, მათ შორის, არც ის მოგვერიდა, რომ ბოდიში მოგვეხადა, ვინაიდან იყო ეს ხარვეზი და გამოსწორდა კიდეც“, – განაცხადა შალვა პაპუაშვილმა.

ცნობისთვის, საქართველოში ევროკავშირის წარმომადგენლობამ დაადასტურა, რომ 21 მაისს ევროკავშირის დელეგაციის წევრს, საიმონ ვანდერბრუკს თბილისის აეროპორტში შემოსვლის უფლება არ მისცეს. მათი განცხადებით, საკითხთან დაკავშირებით საგარეო საქმეთა სამინისტროს ნოტა გადაეგზავნა და საქართველოს ხელისუფლებამ სიტყვიერად მოიბოდიშა.

ამასთან, აღნიშნულ საკითხზე კომენტარი გაკეთდა საქართველოს საგარეო საქმეთა სამინისტროშიც. როგორც უწყებაში განმარტეს, ადგილი ჰქონდა ტექნიკურ გაუგებრობას და საკითხი ამოწურულია.

ბრიუსელსა თუ ზოგიერთ დედაქალაქში აქვთ წარმოდგენა, რომ არსებობს სტანდარტი საკუთარ ოჯახში და საექსპორტო სტანდარტი მესამე სამყაროსთვის, ასე გვიყურებს ზოგიერთი, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისივე თქმით, ოცდამეერთე საუკუნეში ევროპის პოლიტიკური ელიტაში არსებობენ პირები, რომლებიც ერებსა და ქვეყნებს სხვადასხვა კატეგორიად ყოფენ.

„ეს არის ბანალური ჭეშმარიტება, მაგრამ საქმე იმაშია, რომ ზოგიერთი ბრიუსელში ამ ჭეშმარიტებას არ აღიარებს. აბსოლუტურად მიმყარდება აზრი, რომ ბრიუსელსა თუ ზოგ დედაქალაქში ზოგიერთს ღირებულებებთან, სტანდარტებთან დაკავშირებით აქვთ ასეთი წარმოდგენა: არსებობს სტანდარტი, რომელიც უნდათ საკუთარ ოჯახში და არსებობს საექსპორტო სტანდარტი, რომელიც უფრო დაბალი, ბანანის რესპუბლიკებისთვის და მესამე სამყაროსთვისაა გათვალისწინებული. ასე გვიყურებს ზოგიერთი ჩვენ, ახლა ამ დამოკიდებულებებს ყოველდღიურად ვხედავთ. გახსოვთ, ვიდეოც კი დავდე, ბერლინში ადამიანი მაშხალას ისვრის, ვარდება ოთახში, ფეთქდება, ის ადამიანი დაიჭირეს და მიუსაჯეს რაღაცა. თბილისში ისვრიან მაშხალებს, ვარდება პარლამენტის შენობის ოთახში, ფეთქდება, გამოდიან ელჩები, მათ შორის იმ ქვეყნების, სადაც ეს ხდება, გერმანია, საფრანგეთი თუ სხვა, და ამბობენ, რომ ეს იყო მშვიდობა. საქართველოში ოთახის აფეთქება არის მშვიდობა და გერმანიაში არის ომი – ეს არა ორმაგი სტანდარტია, არამედ ესაა, რომ არ მიგვიჩნევს ზოგიერთი იმ დონედ, ჩვენზე რომ გავრცელდეს რაღაც ნორმალური შეხედულებები. ზოგიერთს ვგონივართ ბანანის რესპუბლიკა, მესამე სამყარო, რაც სამწუხაროა. კიდევ ერთხელ, ოცდამეერთე საუკუნეში ევროპის პოლიტიკური ელიტაში არსებობენ პირები, რომლებიც უბრალოდ ადამიანებს ყოფენ სხვადასხვა დონედ, კატეგორიად, ერებს ყოფენ კატეგორიებად და ქვეყნებს ყოფენ კატეგორიებად, – განაცხადა პაპუაშვილმა.

ცნობისთვის, ვროპის საბჭოს გენერალურმა მდივანმა, ალენ ბერსემ „ევრონიუსზე“ გამოქვეყნებულ სტატიაში აღნიშნა: „უცხოური გავლენის შესახებ კანონები ორმაგი სტანდარტის გარეშე უნდა შემოწმდეს, რაც მიუღებელია საქართველოში ან უნგრეთში, ასეთნაირად უნდა შეფასდეს გერმანიასა და რუმინეთშიც“.

საქართველოს საგარეო საქმეთა სამინისტროში აცხადებენ, რომ ევროკავშირის დელეგაციის წევრის, საიმონ ვანდერბრუკის საქართველში შემოსვლასთან დაკავშირებით ადგილი ჰქონდა გაუგებრობას.

როგორც საგარეო უწყებაში განმარტავენ, ევროკავშირის მხარესთან ჰქონდათ კომუნიკაცია და საკითხი ამოწურულია.

„ადგილი ჰქონდა ტექნიკურ გაუგებრობას. აღნიშნულზე ევროკავშირის მხარესთან გვქონდა კომუნიკაცია, რის შესახებაც მათ განემარტათ და საკითხი ამოწურულია“, – აცხადებენ სამინისტროში.

მანამდე საქართველოში ევროკავშირის წარმომადგენლობამ დაადასტურა, რომ 21 მაისს ევროკავშირის დელეგაციის წევრს, საიმონ ვანდერბრუკს თბილისის აეროპორტში შემოსვლის უფლება არ მისცეს. მათი განცხადებით, საკითხთან დაკავშირებით საგარეო საქმეთა სამინისტროს ნოტა გადაეგზავნა და საქართველოს ხელისუფლებამ სიტყვიერად მოიბოდიშა.