პარტია „ახალი“ ყველაფერს გავაკეთებთ სხვებთან ერთად, რომ ეს ხელისუფლება დამთავრდეს, რუსული ხელისუფლება საქართველოდან წავიდეს ერთხელ და სამუდამოდ, – ამის შესახებ „ახლის“ ერთ-ერთმა ლიდერმა, ნიკა გვარამიამ განაცხადა.

მისი თქმით, საქართველოს გადარჩენის ვალდებულება მედასავლეთე ქართველებს აქვთ.

„ჩვენ ვართ ერთი სამშობლოს შვილები და ჩვენი სამშობლო საფრთხეშია. მისი გადარჩენის ვალდებულება გვაქვს ჩვენ, მედასავლეთე ქართველებს. მკაფიოდ კოორდინირებული ქმედებებით – არა მხოლოდ ოპოზიციური პარტიების, არა მხოლოდ არასამთავრობო ორგანიზაციების, ქართველი საზოგადოების, ქართველი პატრიოტების, საქართველოს მომავალზე მზრუნველი ადამიანების, მხოლოდ ამგვარად არის შესაძლებელი რუსული ხელისუფლების დამარცხება. სისტემა უნდა დაინგრეს, ბიძინა ივანიშვილი უნდა წავიდეს. სამშობლო საფრთხეშია და ჩვენ უნდა გადავარჩინოთ. პარტია „ახალი“ ყველაფერს გავაკეთებთ სხვებთან ერთად, რომ ეს ხელისუფლება დამთავრდეს, რომ რუსული ხელისუფლება საქართველოდან წავიდეს ერთხელ და სამუდამოდ“, – განაცხადა გვარამიამ.

რაც შეეხება გუშინდელი სახალხო შეკრების მონაწილეების მიმართ ბულინგის შესახებ დასმულ კითხვას, ნიკა გვარამიამ აღნიშნა, რომ „განსხვავებული აზრი, რომლის შინაარსიც სამშობლოს ღალატი და რუსეთის მხარდაჭერაა, ყველაფერს იმსახურებს“.

„განსხვავებული აზრი აქვთ მანიაკებსაც ადამიანის სიცოცხლესთან დაკავშირებით. ჩვენ ვაფასებთ, როგორ იქცეოდნენ, როგორ და რას ლაპარაკობდნენ ეს ადამიანები იქ. პირდაპირ ვამბობ, შეფასების უფლება აქვს ყველას, ამ დროს თავისთავად ცხადია, ადამიანის ხელშეუხებლობის უფლებები არ უნდა დაირღვეს. თუმცა, ქმედება, რაც გუშინ ჩაიდინეს რუსთაველის გამზირზე, იმსახურებს ყველაზე მწვავე და მძიმე შეფასებებს“, – აღნიშნა ნიკა გვარამიამ.

თუ ხელისუფლება აყენებს საკითხს, მიშა თუ პუტინი, ჩვენ [ოპოზიციამ] რატომ უნდა დავაყენოთ ზუსტად ასევე საკითხი? მოდი, ჩვენ გავანეიტრალოთ მიშას საფრთხე, ვაჩვენოთ ადამიანებს, რომ არ ვემზადებით ერთპიროვნული მმართველობისთვის, – ასე მიმართა „გირჩის“ ერთ-ერთმა ლიდერმა იაგო ხვიჩიამ პარლამენტის პლენარულ სხდომაზე ოპოზიციას.

მან კოლეგა ოპოზიციონერებს დისკუსიის გახსნისკენ მოუწოდა.

ამასთან, ხვიჩიამ „ქართულ ოცნებასაც“ მიმართა და თქვა, რომ გუშინ მმართველი პარტიის ლიდერების განცხადებები „ერთი დიდი შეშინების მცდელობა“ იყო.

„რა მოვისმინეთ გუშინ, რა ვერსიაც შემოგვთავაზა „ქართულმა ოცნებამ“ იმ საფრთხეების შესახებ, რომელიც ამ ქვეყანას ემუქრება და რომლისგან დამცველადაც, ვითომ თვითონ უნდა მოგვევლინოს „ქართული ოცნება“ – ქართველი ხალხისთვის ეს ეგზისტენციალური საფრთხეებია. თურმე – გეები შტურმზე გადმოვიდნენ, თურმე მასონები გვებრძვიან, თურმე „გლობალური ომის პარტია“ ბრძოლაში მიგვათრევს და თან რევოლუციას გვიწყობენ. ითქვა, რომ მიშა მოჰყავთ – ამათ ეს უნდათ. სინამდვილეში მე მგონია, რომ მიშა თქვენ მოგყავთ. მიშას მოსვლის ერთადერთი გზა საბოლოო ჯამში არის ის, თუ ასე დააყენებ საკითხს – პუტინი თუ მიშა; რუსეთი თუ მიშა. ეს ის ერთადერთი შემთხვევაა, როდესაც ქართველი ხალხი დაფიქრდება იმაზე, რომ ამას მიშა ჯობია. თქვენ ამას აკეთებთ შეგნებულად, თქვენი ამომრჩევლის ნების საწინააღმდეგოდ. ყველაზე მეტად თქვენ რისკავთ მიშას დაბრუნებით და სწორედ ამით აშანტაჟებთ თქვენს ამომრჩეველს. თქვენი გუშინდელი გამოსვლა – ბიძინა ივანიშვილის და მანამდე აქ, „ქართული ოცნების“ ლიდერების, იყო ერთი დიდი შეშინების მცდელობა, საქართველოს მოსახლეობის, ამომრჩევლის. ადამიანებს, თქვენ რომ გუშინ მოიყვანეთ, თქვენ თვითონ აშინებდით. ერთადერთი, შიშის დანერგვაა ის, რაც შეგიძლიათ უთხრათ საკუთარ ამომრჩეველს. მეტი სათქმელი არაფერი დაგრჩათ.

მაგრამ, მთავარი პრობლემა და ჩემი მიმართვის ძირითადი ნაწილი არის ოპოზიცია და რატომ – თუ თქვენ, ოპოზიციას, გესმით რისკები, რომელიც გუშინდელი დღის მერე საქართველოს ემუქრება, როგორ შეიძლება აგრძელებდეთ ცხოვრებას ისე, თითქოს არაფერი მომხდარა? როგორ შეიძლება ოპოზიცია ახლა არ ხსნიდეს პოლიტიკურ დისკუსიას თავის შიგნით?! ხომ ძალიან გასაგებია, რას გიპირისპირებს ხელისუფლება – გიპირისპირებს ლგბტ პროპაგანდას, მასონებს, „გლობალური ომის პარტიას“ და მიშას – მთავარ დამხმარეს, როდესაც გაუჭირდება. ისევ მიშას იმედი აქვს ხელისუფლებას. რატომ არ ვსაუბრობთ ოპოზიციაში იმაზე, როგორ დავაზღვიოთ შემდეგში ერთპიროვნული ხელისუფლების და მმართველობის საფრთხე?! შეიძლება, ქართველმა ხალხმა თქვას: მიშას ერთპიროვნული ხელისუფლება მირჩევნია, პუტინის ერთპიროვნულ ხელისუფლებას. მაგრამ თუ ხელისუფლება აყენებს საკითხს, მიშა თუ პუტინი – ჩვენ რატომ უნდა დავაყენოთ ზუსტად ასევე საკითხი? მოდი, ჩვენ გავანეიტრალოთ მიშას საფრთხე, ვაჩვენოთ ადამიანებს, რომ არ ვემზადებით ერთპიროვნული მმართველობისთვის. გავანეიტრალებ იმისთვის, რომ მინდა, ჯერ თქვენ გათავისუფლდეთ მიშას ბატონობისგან. „ქართული ოცნება“ ხომ ვერ გათავისუფლდება ბიძინას ბატონობისგან, რადგან მთავრობაში არიან. როდესაც მთავრობაში იყავით, თქვენ ხომ მიშას ბატონობისგან ვერ გათავისუფლდით. მოდი, ახლა მართლა გათავისუფლდით მიშას ბატონობისგან და მართლა გახსენით პოლიტიკური დისკუსია.

კატეგორიულად ვითხოვ ტელეკომპანია „მთავარის“ და „ფორმულას“ გახსნას დისკუსიებისთვის. თუ ეს არ მოხდება და თუ ოპოზიცია ისევ მიშას რისკს დატოვებს ძალაში ამ ყველაფრის საწინააღმდეგოდ, თქვენ იქნებით მთავარი პუტინისტები, არაქართველები, თქვენ იქნებით ყველაფერი, ვინც ხელისუფლების შეცდომას არ იყენებს და ასევე, ცდილობს ერთპიროვნული ხელისუფლებით მოსვლას ოპოზიციას მხრიდან. ხელისუფლების ეს შეცდომა, ეს ანტიამერიკული, ანტიდასავლური, ანტიქართული ნაბიჯი, უნდა იყოს გამოყენებული ერთხელ და სამუდამოდ ერთპიროვნული მმართველობის დასამთავრებლად არა მხოლოდ ხელისუფლებაში, არამედ ოპოზიციაში“,- განაცხადა იაგო ხვიჩიამ.

საქართველოს თავდაცვის ძალების დღისადმი მიძღვნილ ღონისძიებაზე, თავდაცვის მინისტრმა სიტყვით მიმართვისას, ყურადღება ქართული ჯარის ჩამოყალიბებისა და განვითარების პროცესში საერთაშორისო პარტნიორების როლზე გაამახვილა და მათ ურყევი მხარდაჭერისთვის მადლობა გადაუხადა.

მინისტრის განცხადებით, მომავალში საერთაშორისო პარტნიორებთან მჭიდრო თანამშრომლობა უფრო გაძლიერდება.

„მსურს, მადლობა გადავუხადო მათ საქართველოს და თავდაცვის ძალების ურყევი მხარდაჭერისთვის და ათწლეულების განმავლობაში მის გაძლიერებაში შეტანილი წვლილისთვის. დღეს, როდესაც საფრთხეშია ევროპული უსაფრთხოების არქიტექტურა, მიმდინარეობს რუსეთის აგრესიული ომი უკრაინაში, მნიშვნელოვანია პარტნიორული ურთიერთობების კიდევ უფრო გაძლიერება. დარწმუნებული ვარ, რომ მჭიდრო თანამშრომლობა ჩვენს პარტნიორებთან მომავალში კიდევ უფრო გაღრმავდება“, – განაცხადა ირაკლი ჩიქოვანმა, რომელმაც საქართველოს თავდაცვის ძალების ყველა წარმომადგენელსა და საზოგადოებას თავდაცვის ძალების დაარსების დღე ვაზიანის მე-4 ქვეითი ბრიგადის სამწყობრო მოედანზე გამართულ ღონისძიებაზე მიულოცა.

30 აპრილი საქართველოს თავდაცვის ძალების დღეა. დღეს ქართული არმია დაარსებიდან 33-ე წლისთავს აღნიშნავს.

“დღეს, საქართველოს თავდაცვის ძალების დღეა! მინდა, თითოეულ ვეტერანს, მოქმედ სამხედროს, ოფიცერს, ყველა ფორმიან ადამიანს და სრულიად საქართველოს მივულოცო ეს დღე! პირველ ყოვლისა, ჩვენს თანამებრძოლებს ვულოცავ, რამეთუ ბოლო ათწლეულების განმავლობაში, ჩვენ ერთად ვქმნიდით ჩვენი ქვეყნის შეიარაღებული ძალების ისტორიას, ერთად ვიბრძოდით, ერთად ვმარცხდებოდით და ერთად ვიმარჯვებდით! ერთად უნდა ვიდგეთ მომავალშიც, რადგან ჩვენ, ყველას, განურჩევლად ჩვენი ეთნიკური კუთვნილებისა, პოლიტიკური, თუ რელიგიური მრწამსისა, ერთი სამშობლო გვაქვს, ერთი მიწა, რომელსაც ათასობით ჩვენმა თანამებრძოლმა შესწირა თავისი ლამაზი სიცოცხლე! მათ გმირობის უამრავი ფურცელი შემატეს ჩვენი სანუკვარი სამშობლოს ისტორიას! ბევრი კი, ომის შემდგომი ტკივილით შეუერთდა მარადისობას! ქედს ვიხრი თითოეული მათგანის ხსოვნის წინაშე! დღეს, შეიარაღებული ძალები 33 წლის გახდა! კიდევ ერთხელ გილოცავთ მეგობრებო, დებო, ძმებო, თანამებრძოლებო, შვილებო, თანამოქალაქენო! ჩვენ, ყველამ ერთად, ერთიანი ძალისხმევით უნდა ვიბრძოლოთ ჩვენი სამშობლოს უკეთესი მომავლისთვის, ერთიანობისთვის, მშვიდობისთვის; სწორედ ამას გვავალდებულებს ჩვენი გენი და ჩვენი სამშობლოს წარსული, წინაპართა მიერ გადახდილი ბრძოლები; ვალდებულნი ვართ, ვუერთგულოთ ფიცს, რომელიც ჩვენი სამშობლოს წინაშე დავდეთ! დღეს, ყველანი ერთად უნდა ვიდგეთ, რამეთუ სხვა გზა და სხვა ხსნა, ”არავითარი სხვა სამშობლო ამაზე მეტი, არ გაგვაჩნია!” ერთიანი ძალებით უნდა ვაშენოთ ძლიერი სახელმწიფო ისევ და ისევ საქართველოს სადიდებლად! ღმერთი გვფარავდეს ჩვენ და ჩვენს სამშობლოს! გენერალ-მაიორი კობა კობალაძე ვეტერანების საქმეთა სახელმწიფო სამსახურის დირექტორი”

ბიძინა ივანიშვილი არის შეუმდგარი დიქტატორი, რომელმაც მთელი თავისი გამოსვლა ისევ და ისევ მუქარას დაუთმო, ემუქრება ქართველ ხალხს, ემუქრება ყველას, ვინც მის აზრს არ ითვალისწინებს, – ამის შესახებ „სტრატეგია აღმაშენებლის“ ლიდერმა გიორგი ვაშაძემ განაცხადა.

როგორც ის განმარტავს, „ქართული ოცნების“ მიერ გამართული „საყოველთაო სახალხო შეკრება“ „გამდიდრებული ელიტის ბოლო გაბრძოლება იყო“.

„დახარჯული მილიონები იმისთვის, რომ ეს ხალხი იძულებით თბილისში ჩამოეყვანათ, ნათელი დადასტურება იყო იმისა, რომ „ქართულ ოცნებას“ მხარდაჭერის სახით არაფერი შერჩენია. უფრო მეტიც, ეს არის ხელისუფლება, რომლის მოშორება ჩვენი, ყველას საერთო ამოცანაა. რაც შეეხება ბიძინა ივანიშვილს, ეს არის შეუმდგარი დიქტატორი, რომელმაც მთელი თავისი გამოსვლა ისევ და ისევ მუქარას დაუთმო, ემუქრება ქართველ ხალხს, ემუქრება ყველას, ვინც მის აზრს არ ითვალისწინებს. ამით კიდევ უფრო მკაფიოდ გამოხატა ამოცანა, რაც ჩვენ გაქვს – ის ჩვენ სწრაფად უნდა მოვაშოროთ ქვეყანას იმისთვის, რომ ევროკავშირისკენ წავიდეთ, განვვითარდეთ, წინ წავიდეთ. აქეთ ელიტა, ზემდიდარი ადამიანები სცენიდან მიმართავდნენ ღარიბ, გაჭირვებულ ადამიანებს, რომლებიც იძულებით ჩამოიყვანეს. აბსოლუტურად მესმის იმ ადამიანების… გუშინდელი დღე მართლა საბოლოო სიტყვა იყო „ქართული ოცნების“ მხრიდან, რომ მათ მხარდაჭერა არ აქვთ და არც მათ რუსულ კანონებს აქვთ მხარდაჭერა. თუ შევადარებთ 28-29 რიცხვს, ქართული, ეროვნული ღირსების ზეიმი იყო, გუშინ კი, გამდიდრებული ელიტის ბოლო გაბრძოლება იყო, რომელსაც ჩვენ დავასრულებთ.

ივანიშვილი გუშინ აბსოლუტურად ყველას ემუქრებოდა, მან თქვა, არა ევროკავშირს, კი – ბიძინას. მისი საგარეო და საშინაო კურსი ბიძინა ივანიშვილია და ამბობს, რომ ამ ქვეყანამ მხოლოდ ეს ადამიანი უნდა აქოს და ადიდოს, რომელიც რეალობას სრულიად მოწყვეტილია და ძალიან სუსტია. 20230 წელზე რომ მისვამთ კითხვას, რანაირად უნდა შევიდეს საქართველო ბიძინა ივანიშვილის პირობებში ევროკავშირში, კაცი პირდაპირ ამბობს, ევროპა ჩემი მტერიაო, რანაირად შეიძლება მტერს გაუერთიანდე? გუშინ ივანიშვილმა გამოაცხადა, რომ ამერიკის შეერთებული შტატები, ევროკავშირი, ყველა ჩვენი მტერია, მე ვარ ერთადერთი ადამიანი, ვინც ვიცი, რა უნდა გაკეთდეს ამ ქვეყანაშიო. მის პირობებში ქვეყანა არათუ შევა ევროკავშირში, არამედ, ჩვენი დასავლელი პარტნიორები მკაფიოდ ამბობენ, რომ რაც მოპოვებული გვაქვს, იმასაც დავკარგავთ. შეიძლება საფრთხე დაემუქროს უვიზო მიმოსვლას, შეიძლება საფრთხე დაემუქროს ევროკავშირში გაწევრიანების მოლაპარაკების პროცესს და იმ დიდ ფინანსურ მხარდაჭერას, რასაც ევროკავშირისგან ვიღებთ“, – განაცხადა ვაშაძემ.

ქართული ჯარი ყველა პატრიოტისთვის არის დიდი პატივისცემისა და ნდობის სიმბოლო, – ამის შესახებ თავდაცვის მინისტრმა, ირაკლი ჩიქოვანმა საქართველოს თავდაცვის ძალების დღესთან დაკავშირებით სიტყვით გამოსვლისას განაცხადა.

მან საქართველოს თავდაცვის ძალებს დღევანდელი დღე მიულოცა.

„გილოცავთ საქართველოს თავდაცვის ძალების დღეს. დღევანდელი დღე მინდა მივულოცო საქართველოს ყველა მოქალაქეს, რადგან ქართული ჯარი ყველა პატრიოტისთვის არის დიდი პატივისცემისა და ნდობის სიმბოლო. ინსტიტუტი, რომელიც საზოგადოების ურყევი მხარდაჭერით სარგებლობს. ქართული ჯარი ისტორიულად მთელ საზოგადოებასთან, ჩვენს ეკლესიასთან ერთად იცავდა ჩვენი სახელმწიფოს უმთავრეს ღირებულებებს, სამშობლოს, ჩვენს მიწა-წყალს, ის ნიჭიერ და ტოლერანტ ხალხს, მრავალსაუკუნოვან ქართულ კულტურასა და იდენტობას. სწორედ ეს ქართული იდენტობა გვეამაყება თითოეულ ჩვენგანს, ჩვენს მხედრობას და ის მუდამ იქნება ჩვენი თვითმყოფადობის და განვითარების სიმბოლო. განსაკუთრებით გილოცავთ დღევანდელ დღეს თქვენ, სამხედროებს, თითოეულ ჯარისკაცს, ყველას, ვინც ჩვენს სამშობლოს ემსახურებით. თქვენს პროფესიონალიზმსა და პატრიოტიზმზე დგას ჩვენი სამშობლოს სიძლიერე. თქვენი შრომა და ყოველდღიური ძალისხმევა არის მნიშვნელოვანი ჩვენი ქვეყნისთვის და მისი მომავლისთვის. მრავალმა თქვენგანმა არაერთხელ გამოავლინეთ სიმამაცე და მებრძოლი სული ქვეყნის თავისუფლებისთვის ბრძოლებსა და საერთაშორისო მისიებში. სწორედ ამ ბრძოლებში კარგად გამოჩნდა, რომ დღევანდელი ქართული ჯარი ამაყად აგრძელებს ჩვენი წინაპრების მხედრულ ტრადიციებს. კიდევ ერთხელ, დღევანდელ დღეს მადლობას გიხდით თითოეულ თქვენგანს სამსახურისთვის, თავდადებისთვის და სამშობლოს ერთგულებისთვის. მინდა თქვენთან ერთად დიდი მადლობა გადავუხადო თქვენს ოჯახებს, რომლებიც გაძლიერებენ, ზურგს გიმაგრებენ და თქვენს წარმატებებს იზიარებენ. მადლობა თქვენს მშობლებს პატრიოტების აღზრდისთვის“,-განაცხადა ჩიქოვანმა.

იმის ქადაგება დღეს, რომ მტერი მტერი არაა და მოყვარე და მოკავშირე, მოკავშირე არაა, იგივეა, რაც იმის უარყოფა, რომ დედა დედაა და მამა მამაა, – ამის შესახებ საქართველოს პრეზიდენტმა სალომე ზურაბიშვილმა თავდაცვის ძალების დღისადმი მიძღვნილ ღონისძიებაზე სიტყვით გამოსვლისას განაცხადა.

მისი თქმით, ყველას გვევალება მოვძებნოთ ერთიანობის გზა, ვაჩვენოთ გამძლეობა, მხნეობა, შემართებისა და სამშობლოს სიყვარულის მაგალითი.

მასთან, პრეზიდენტმა აღნიშნა, რომ ვინც თესავს დაპირისპირებას და პროვოკაციას, ის საკუთარი ჯარისა და სამშობლოს წინააღმდეგაა.

„ვინ თუ არა ქართულმა ჯარმა იცის, ვინ ჩაგვიტარა წვრთნები, ვინ მიიღო ჩვენი სტუდენტები სხვადასხვა სამხედრო აკადემიაში, ვინ გაგვამხნევა, როცა გვიჭირდა და როცა გვჭირდებოდა აღჭურვა და სხვა მრავალი რამ. დღესაც ვინ დგას ჩვენს გვერდში სწორედ იმ დროს, როცა ქვეყანა გზაგასაყარზეა და ყველაზე ეგზისტენციალური არჩევანი უნდა გააკეთოს იყოს ან არ იყოს, რამეთუ თავისუფლების გარეშე ყოფნა, არსებობა არაა. ჩვენ ყველას გვევალება მოვძებნოთ გზა ერთიანობის, ვაჩვენოთ გამძლეობა, მხნეობა, შემართებისა და სამშობლოს სიყვარულის მაგალითი, ხოლო ვინც თესავს დაპირისპირებას და პროვოკაციას, ის საკუთარი ჯარისა და სამშობლოს წინააღმდეგაც არის. ვინც ქადაგებს ერთობას, ის ქვეყნის მომავალზე, ახალგაზრდობაზე დებს ფსონს“,- განაცხადა სალომე ზურაბიშვილმა.

საქართველოს პრეზიდენტმა ჯარისკაცებს მადლობა გადაუხადა წარსულისთვის და ხვალინდელი გამარჯვებისთვის.

„თქვენი და ჩვენი გამარჯვება არა ომზე, არამედ მშვიდობაზე გადის. მშვიდობიანი საქართველო მხოლოდ ევროპის წიაღში და თანასწორუფლებიან თანამეგობრობაში მოიაზრება, თქვენ ამ მომავლის სადარაჯოზე დგახართ. გაუმარჯოს საქართველოს ჯარს, თავდაცვის ძალებს, თითოეულ ჯარისკაცს, გაუმარჯოს იმ გმირ ჯარისკაცებს, რომლებიც ქვეყნის დამოუკიდებლობას, სუვერენობას და თავისუფლებას შეეწირა, მათი ხსოვნა უკვდავია. გაუმარჯოს ყველას, ვინც საუკუნეების განმავლობაში იქ იდგა, სადაც თქვენ დღეს დგახართ, ვისაც სწამდა ის, რაც თქვენ გწამთ დღეს და ვინც დაიცავს ხვალინდელ ძლიერ, ერთიან, ევროპულ საქართველოს. გაუმარჯოს საქართველოს, გილოცავთ დღევანდელ დღეს!“-განაცხადა პრეზიდენტმა.