იგრძნობა, რომ ჩვენ აშშ-ს ვესაუბრებით თანასწორად, ვინაიდან, ქვეყნის ფართობი და მოცულობა არ განსაზღვრავს სუვერენიტეტს. სუვერენიტეტს განსაზღვრავს ის პოლიტიკა, რა პოლიტიკასაც ატარებს არჩეული ხელისუფლება, საქართველოს შემთხვევაში – “ქართული ოცნება”, – ამის შესახებ საპარლამენტო უმრავლესობის წევრმა, ლევან მაჭავარიანმა, პრემიერ-მინისტრ ირაკლი კობახიძის მიერ აშშ-ის პრეზიდენტ დონალდ ტრამპისთვის გაგზავნილ ღია წერილზე საუბრისას, „პოს ტვ“-ის ეთერში განაცხადა.

მაჭავარიანის თქმით, დამოუკიდებელი საქართველოს ისტორიაში სუვერენიტეტისა და დამოუკიდებლობის ხარისხი ისეთი არასდროს ყოფილა, როგორიც დღეს არის და მმართველი გუნდი უამრავი წნეხის და ზეწოლის მიუხედავად, არ აპირებს ეს პოლიტიკა შეცვალოს, ვინაიდან, ეს არის საქართველოს ეროვნული ინტერესი.

„რა პოლიტიკას ატარებს “ქართული ოცნება” მით უმეტეს ბოლო სამი-ოთხი წლის განმავლობაში – ის ღირებულებები, რაც ჩვენი ქვეყნისთვის ყველაზე მნიშვნელოვანია, ანუ, ქართველებმა მოვახდინეთ იდენტიფიცირება ჩვენს სულიერ თავგადასავალთან ჯერ კიდევ საუკუნეების წინ და ჩამოყალიბდა ჩვენი იდენტობა – ეს არის ჩვენი მამული, ენა და სარწმუნოება, რომელსაც კბილებით ვიცავთ. სუვერენიტეტის და დამოუკიდებლობის ხარისხი, მსუბუქად რომ ვთქვათ, დამოუკიდებელი საქართველოს ისტორიაში ასეთი არასდროს ყოფილა და ჩვენ ეს ძალიან ძვირი გვიჯდება, ეს კომფორტი ნამდვილად არ არის, ვინაიდან, ამის გამო, ჩვენ ვუძლებთ უამრავ წნეხს, ზეწოლას, უამრავ უსამართლობას, მაგრამ მაინც, უკან ერთ ნაბიჯსაც არ ვდგამთ და მივიწევთ წინ, ვინაიდან, ეს არის ჩვენი ქვეყნის ეროვნული ინტერესი, ჩვენი პატრიოტი მოსახლეობის ინტერესი. აქედან გამომდინარე, ზუსტად ამ პოლიტიკას ვატარებთ და არავითარ შემთხვევაში არ გადავუხვევთ, კიდევ რომ გაიზარდოს შანტაჟი, სანქციები და ა.შ. – ჩვენ ყოველთვის ამ პოლიტიკის გარანტორები ვიქნებით საქართველოში, ანუ, “ქართული ოცნება” არის მშვიდობის, სტაბილურობის და ჩვენი ღირებულებების შენარჩუნების მთავარი გარანტი ჩვენს ქვეყანაში, ჩვენი ეროვნული თვითმყოფადობის გაძლიერების მთავარი გარანტია “ქართული ოცნება” საქართველოში,“ – აღნიშნა მაჭავარიანმა.

მისივე განცხადებით, პრემიერ-მინისტრის ღია წერილი დროული იყო, ვინაიდან, ტრამპის ადმინისტრაცია უკვე ოთხი თვეა, რაც ხელისუფლებაში მოვიდა და ამ დროის მანძილზე, აშშ-ის მხრიდან საქართველოსთან დაკავშირებით არანაირი განცხადება არ გაკეთებულა.

მაჭავარიანის თქმით, დონალდ ტრამპის და მისი ადმინისტრაციის დუმილი კიდევ უფრო მეტ კითხვის ნიშანს ბადებს იმ ფონზე, რომ საქართველოს ხელისუფლების შეხედულებებს, განცხადებებს და პოლიტიკურ ნაბიჯებს მათი გზავნილები ემთხვევა.

„წერილი, რა თქმა უნდა, დროული იყო. ოთხი თვეა გასული, რაც ახალი ადმინისტრაცია მოვიდა ხელისუფლებაში და სამწუხაროდ, მათი მხრიდან საქართველოსთან მიმართებით განცხადება არ მოგვისმენია. მიუხედავად იმისა , რომ ის გზავნილები, პოლიტიკური ნაბიჯები, შეხედულებები, ის სიფრთხილით გაჟღერებული ფრაზები, რაც ჩვენი მხრიდან კეთდებოდა, აბსოლუტურად თანხვედრაშია აშშ-ის ადმინისტრაციასთან. ღირებულებითი ნაწილიც, ლგბტ პროპაგანდასთან მიმართებით როგორი ღია ბრძოლა გამოვაცხადეთ, ანტი-ლგბტ პროპაგანდის კანონი მივიღეთ, პირველები ჩვენ ვიყავით, ვინც ხმამაღლა დავიწყეთ USAID-ის და NED-ის კრიმინალურ საქმიანობაზე საუბარი; უკრაინის ომთან მიმართებით სრული თანხვედრაა ჩვენსა და აშშ-ის ადმინისტრაციას შორის, თუ რა იყო ერთ-ერთი გამომწვევი ამ პროქსი ომის და რომ გამოიყენეს უკრაინა. მინდა მოვიშველიო მარკო რუბიოს სიტყვები, როდესაც ეს ადმინისტრაცია მოვიდა ხელისუფლებაში – ჩვენთვის, ამერიკელებისთვის მნიშვნელოვანია პარტნიორობა ისეთ ქვეყნებთან, რომლებსაც წინა პლანზე აქვთ წამოწეული თავიანთი ქვეყნის ინტერესები და სუვერენიტეტიო – ანუ, რაც ჩამოვთვალე, სრულ თანხვედრაში ვართ ყველა პუნქტში.

ჩვენ, ჩვენმა ლიდერებმა, პრემიერ-მინისტრმა, საჯაროდ, სხვადასხვა პლატფორმაზე ძალიან ბევრჯერ გამოვხატეთ დიდი სურვილი იმასთან დაკავშირებით, რომ გვსურს აშშ-თან ნამდვილი მეგობრობა, რეალური სტრატეგიული პარტნიორობა და არა ის, რომელიც უბრალოდ ფარატინა ფურცელზე იყო. [გვსურს] ისეთი ტიპის პარტნიორობა, როგორიც მაგალითად, ჩინეთთან გავაფორმეთ – გაფორმდა პარტნიორობა და ჩაინიშნა პირდაპირი ფრენები, უვიზო მიმოსვლა, თავისუფალი ვაჭრობა და ა.შ. ჩვენ აშშ-ს ძალიან ღიად ვთავაზობთ, რომ შეგვიძლია კონკრეტული გზამკვლევიც კი დავაწესოთ ამასთან დაკავშირებით, რომ ეტაპობრივად, ნაბიჯ-ნაბიჯ, აეწყოს რეალური პარტნიორობა. საქართველო ნებისმიერი ქვეყნისთვის სასურველი პარტნიორია – არ აქვს მნიშვნელობა ეს დიდი ქვეყანაა თუ პატარა ქვეყანა. ჩვენ არასდროს არავისთვის გვიღალატია, არასდროს ვღალატობთ ჩვენს პრინციპებს და ყოველთვის განსაკუთრებულად ვუდგავართ გვერდში ჩვენს მეგობრებს და ვართ სერიოზული დასაყრდენი ნებისმიერი გაერთიანების თუ კონკრეტული ქვეყნისთვის. იმავე აშშ-ის მაგალითზე რომ ვთქვათ, ავღანეთის და ერაყის მისიებში, ერთ სულ მოსახლეზე ყველაზე დიდი კონტინგენტით ვიყავით წარმოდგენილები და ათასობით მებრძოლს როცა ვაგზავნიდით, ლატვია-ლიეტუვა-ესტონეთს, დღეს რომ ძალიან ხმაურიანად საუბრობენ, 50-კაციანი შემადგენლობები ჰყავდათ გაგზავნილი. ნატო-ს ქვეყნებს შორისაც მე-4 ადგილს ვიკავებდით და ამით კიდევ ერთხელ დამტკიცებული გვაქვს, რამდენად სერიოზული და სანდო პარტნიორები ვართ. ამ ყველაფრის ფონზე, როდესაც არის დუმილი, ეს გასაკვირია და ბევრ კითხვის ნიშანს ბადებს, რომელზეც პასუხი უნდა გასცეს აშშ-ის მოქმედმა ადმინისტრაციამ.“ –  განაცხადა ლევან მაჭავარიანმა.

ევროსაბჭოს მინისტერიალის პლატფორმას გამოვიყენებთ, რათა გავაჟღეროთ ყველა ის საკითხი, რაც საქართველოს დღის წესრიგში დგას. კიდევ ერთხელ ვიტყვით, რომ დემოკრატიის სახელით არ უნდა ხდებოდეს ქვეყანაში დემოკრატიული პროცესების ხელის შეშლა, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა განაცხადა.

ბოჭორიშვილის თქმით, ევროსაბჭოს მინისტერიალი არის მნიშვნელოვანი ღონისძიება, რომელიც ყოველწლიურად ტარდება და საქართველო, როგორც ევროსაბჭოს წევრი ქვეყანა, მონაწილეობს მასში.

„ჩვენ ამ პლატფორმას გამოვიყენებთ, რათა გავაჟღეროთ ყველა ის საკითხი, რაც საქართველოს დღის წესრიგში დგას. ის გამოწვევები, რომლებიც აქვს ქვეყანას ერთი – უსაფრთხოების თვალსაზრისით, მეორე, რაც სტაბილურობის თვალსაზრისით უქმნის ქვეყანას საფრთხეს. ჩვენ კიდევ ერთხელ ვიტყვით და გამოვიყენებთ ამ პლატფორმას იმისთვის, რომ დემოკრატიის სახელით არ უნდა ხდებოდეს დემოკრატიული პროცესების ხელის შეშლა ქვეყანაში და არ უნდა ხდებოდეს დემოკრატიული პროცესების უგულებელყოფა, ეს მნიშვნელოვანია“, – განაცხადა მაკა ბოჭორიშვილმა.

ამასთან, მაკა ბოჭორიშვილის განცხადებით, ოკუპაციასთან დაკავშირებული საკითხი ევროსაბჭოს ფარგლებშიც მუდმივად დგას დღის წესრიგში და ამ შემთხვევაშიც, მინისტერიალის დოკუმენტებშიც ასახული იქნება.

„ზოგადად, როდესაც ვსაუბრობთ ოკუპაციაზე, ოკუპაციის შედეგებზე, ადამიანის უფლებებზე ოკუპირებულ ტერიტორიებზე და კონფლიქტის მშვიდობიანი გადაჭრის გზების ძიებაზე, რა თქმა უნდა, ჩვენ პირველ რიგში, ვგულისხმობთ საერთაშორისო ინსტიტუტების მაქსიმალურად გამოყენებას, საერთაშირისო შესაძლებლობების მაქსიმალურად გამოყენებას, რათა ყურადღება გავამახვილოთ სწორედ ამ პრობლემაზე. რა თქმა უნდა, ევროსაბჭოს ფარგლებშიც მუდმივად დგას საქართველოს ოკუპაციასთან დაკავშირებული საკითხი დღის წესრიგში და ჩვენ ამას განსაკუთრებით ვიყენებთ ადამიანის უფლებების დარღვევის კუთხით არსებულ გამოწვევევებზე ყურადღების გასამახვილებლად. ამ შემთხვევაშიც, მინისტერიალის დოკუმენტებშიც ასახული იქნება ეს საკითხი“, – აღნიშნა მაკა ბოჭორიშვილმა.

13-14 მაისს ლუქსემბურგში, ევროპის საბჭოს მინისტრთა კომიტეტის 134-ე სესია გაიმართება, რომელშიც საქართველოს საგარეო საქმეთა მინისტრი, მაკა ბოჭორიშვილი მიიღებს მონაწილეობას. მაკა ბოჭორიშვილი სესიის მონაწილეებს სიტყვით მიმართავს, ასევე მონაწილეობას მიიღებს თემატურ დისკუსიაში, ევროპის საბჭოს მინისტრთა კომიტეტის თავმჯდომარის, ლუქსემბურგის დიდი საჰერცოგოს ვიცე-პრემიერისა და საგარეო საქმეთა და საგარეო ვაჭრობის მინისტრის, ქსავიე ბეტელის მიწვევით, რომელიც მიეძღვნება ევროპის საბჭოს გენერალური მდივნის ინიციატივას „დემოკრატიის ახალი პაქტი ევროპისთვის”.

ჩვენთვის მნიშვნელოვანია იმ სტრატეგიული შეთანხმების ფუნქციონირება, რომელიც ორ ქვეყანას შორის არსებობს და ამისთვის საჭიროა ვიცოდეთ, თუ როგორია აშშ-ის ახალი ადმინისტრაციის პოზიციები საქართველოსთან დაკავშირებით, – განაცხადა საგარეო საქმეთა მინისტრმა მაკა ბოჭორიშვილმა.

„საქართველოსთვის აშშ-თან ურთიერთობები ძალიან მნიშვნელოვანია. სწორედ ამ მნიშვნელობიდან გამომდინარე, ჩვენ მოველით გარკვეულ გზავნილებს აშშ-ის მხრიდან, როდესაც ჩვენ ვსაუბრობთ ურთიერთობების თვისობრივად გადატვირთვაზე და სამართლიან დამოკიდებულებაზე საქართველოსთან მიმართებაში. საქართველომ წლების განმავლობაში არაერთხელ აჩვენა, რომ ამერიკისთვის სტრატეგიულად მნიშვნელოვანი პარტნიორია. რა თქმა უნდა, ჩვენთვის მნიშვნელოვანია იმ სტრატეგიული შეთანხმების ფუნქციონირება, რომელიც ორ ქვეყანას შორის არსებობს და ამისთვის საჭიროა ვიცოდეთ თუ როგორია აშშ-ის ახალი ადმინისტრაციის პოზიციები საქართველოსთან დაკავშირებით”, – განაცხადა ბოჭორიშვილმა.

გერმანიაში გერმანიის ხელისუფლება კრძალავს ე.წ. რაიხსბიურგერების ჯგუფს იმ საფუძვლით, რომ ისინი „არ აღიარებენ გერმანიის არჩეული ხელისუფლების ლეგიტიმურობას“, „ბოიკოტს უცხადებენ ხელისუფლების გადაწყვეტილებებს“. საქართველოში გერმანიის ხელისუფლება აფინანსებს იმ ჯგუფებს, რომლებიც არ აღიარებენ საქართველოს არჩეული ხელისუფლების ლეგიტიმურობას, ბოიკოტს უცხადებენ ხელისუფლების გადაწყვეტილებებს, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

როგორც პაპუაშვილი წერს, ეს ხდება ერთ დროს და ერთ პლანეტაზე.

„გერმანიაში გერმანიის ხელისუფლება კრძალავს ე.წ. რაიხსბიურგერების ჯგუფს იმ საფუძვლით, რომ ისინი „არ აღიარებენ გერმანიის არჩეული ხელისუფლების ლეგიტიმურობას“, „ქმნიან პარალელურ სახელისუფლებო სტრუქტურებს“, „ბოიკოტს უცხადებენ ხელისუფლების გადაწყვეტილებებს“, „ხელს უშლიან პოლიციას მუშაობაში“, „ამტკიცებენ, რომ გერმანია ოკუპანტი ძალის მიერ იმართება“. საქართველოში გერმანიის ხელისუფლება აფინანსებს იმ ჯგუფებს, რომლებიც არ აღიარებენ საქართველოს არჩეული ხელისუფლების ლეგიტიმურობას, ქმნიან პარალელურ სახელისუფლებო სტრუქტურებს, ბოიკოტს უცხადებენ ხელისუფლების გადაწყვეტილებებს, ხელს უშლიან პოლიციას მუშაობაში, ამტკიცებენ, რომ საქართველო ოკუპანტი ძალის მიერ იმართება. ეს ხდება ერთ დროს და ერთ პლანეტაზე“, – წერს შალვა პაპუაშვილი.

ცნობისთვის, გერმანიაში მემარჯვენე-ექსტრემისტული დაჯგუფება „გერმანიის სამეფო“ აკრძალეს, დაკავებულია ოთხი ადამიანი, მათ შორის დაჯგუფების ლიდერი პეტერ ფიტცეკი.