შვიდი არასამთავრობო ორგანიზაციისთვის საბანკო ანგარიშების გაყინვა გვაშფოთებს. ეს, შესაძლოა, პოლიტიკურად მოტივირებული იყოს, რომლის მიზანი ამ ორგანიზაციების გაჩუმებაა, – ამის შესახებ საქართველოში ბრიტანეთის საელჩო სოციალურ ქსელში წერს.

როგორც საელჩო აღნიშნავს, მოუწოდებს საქართველოს ხელისუფლებას, გააუქმოს რეპრესიული კანონმდებლობა, შეწყვიტოს თავდასხმა სამოქალაქო საზოგადოებაზე და დაიწყოს დიალოგი ყველა დაინტერესებულ მხარესთან კრიზისიდან გამოსავლის მოსაძებნად.

„დიდი ბრიტანეთი ღრმად შეშფოთებულია, რომ, საქართველოს გენერალური პროკურატურის მოთხოვნით, სავარაუდო საბოტაჟის შესახებ გამოძიების ფარგლებში საბანკო ანგარიშები გაეყინა შვიდ არასამთავრობო ორგანიზაციას. გვაშფოთებს ის ფაქტი, რომ ეს, შესაძლოა, იყოს მათი მხრიდან არა რაიმე უკანონო ქმედებაზე რეაგირება, არამედ პოლიტიკურად მოტივირებული გადაწყვეტილება, რომლის მიზანია აღნიშნული არასამთავრობო ორგანიზაციების გაჩუმება.

აღნიშნული არასამთავრობო ორგანიზაციების საქმიანობა მოიცავს თავისუფალი და სამართლიანი არჩევნების ხელშეწყობასა და ინფორმაციის თავისუფლებას, სამართლებრივი დახმარების გაწევას საქართველოს მოქალაქეებისთვის, ქალებისა და ბავშვების, შეზღუდული შესაძლებლობების მქონე პირებისა და ოჯახში ძალადობის მსხვერპლთა მხარდაჭერას. მათი დახურვა ზიანს მიაყენებს საქართველოს მოსახლეობას და კიდევ უფრო შეასუსტებს დემოკრატიული დაცვის მექანიზმების არსებობას და ანგარიშვალდებულებას ქვეყანაში.

ასევე, გვინდა, აღვნიშნოთ ევროპის საბჭოს არასამთავრობო ორგანიზაციების სამართლის ექსპერტთა საბჭოს ბოლო მოსაზრება, სადაც ნათქვამია, რომ ბოლო პერიოდში არასამთავრობო სექტორის შესახებ მიღებული კანონის განხორციელება „მძიმე და გაუმართლებელ ზიანს მიაყენებს საქართველოს სამოქალაქო საზოგადოებას“ და წინააღმდეგობაშია იმ მრავალ ვალდებულებასთან, რომელიც საქართველომ, როგორც ევროპის საბჭოს წევრმა სახელმწიფომ, იკისრა.

ჩვენ მოვუწოდებთ საქართველოს ხელისუფლებას, გააუქმოს რეპრესიული კანონმდებლობა, შეწყვიტოს თავდასხმა სამოქალაქო საზოგადოებაზე და დაიწყოს დიალოგი ყველა დაინტერესებულ მხარესთან ამ კრიზისიდან გამოსავლის მოსაძებნად“, – წერს ბრიტანეთის საელჩო.

ადგილობრივი არჩევნების დამკვირვებლების გლობალური ქსელი (GNDEM) კიდევ ერთხელ გმობს საქართველოს მთავრობის მიერ სამოქალაქო სივრცის დახურვის, ძირითადი თავისუფლებების შეზღუდვისა და მოქალაქე დამკვირვებლების საქმიანობისთვის ძირის გამოთხრის მუდმივ მცდელობებს, – ამის შესახებ აღნიშნულია განცხადებაში, რომელიც GNDEM-ის ვებგვერდზეა გამოქვეყნებული.

„პროკურატურის მოთხოვნით, თბილისის საქალაქო სასამართლოს მოსამართლემ მინიმუმ შვიდი არასამთავრობო ორგანიზაციის საბანკო ანგარიშები გაყინა, მათ შორის GNDEM-ის წევრისა და მოქალაქეთა სადამკვირვებლო ორგანიზაციის, სამართლიანი არჩევნებისა და დემოკრატიის საერთაშორისო საზოგადოების (ISFED). პროკურატურის ქმედებები წარმოადგენს სამოქალაქო საზოგადოების წინააღმდეგ მიმართულ ანგარიშსწორებას საზოგადოებრივი პროტესტის გამო, რომელიც დაიწყო 2024 წლის საპარლამენტო არჩევნების შემდეგ საქართველოს მთავრობის მიერ ევროკავშირში გაწევრიანების მოლაპარაკებების შეჩერების გადაწყვეტილების შემდეგ“, – აღნიშნულია განცხადებაში.

ორგანიზაციაში აცხადებენ, რომ საქართველოს პროკურატურის ქმედებები, ისევე როგორც საქართველოს მთავრობის სხვა ქმედებები, ზღუდავს ლეგიტიმურ საზოგადოებრივ დისკურსს და ძირს უთხრის დამოუკიდებელ სამოქალაქო ორგანიზაციებს, რითაც არღვევს საქართველოს კონსტიტუციის 17-ე და 22-ე მუხლებს, რომლებიც იცავდა მოქალაქეთა უფლებას, გამოთქვან საკუთარი აზრი და ასევე გაერთიანების თავისუფლებას.

GNDEM-ის მტკიცებით, ეს ქმედებები ასევე ეწინააღმდეგება ადამიანის უფლებათა საყოველთაო დეკლარაციის 19-ე და 20-ე მუხლებს და სამოქალაქო და პოლიტიკური უფლებების შესახებ საერთაშორისო კონვენციის (ICCPR) 19-ე და 22-ე მუხლებს, რომლის ხელმომწერი საქართველოცაა.

GNDEM-ი ასევე აღნიშნავს, რომ პროკურატურის ქმედებები ხორციელდება 2025 წლის 4 ოქტომბერს ადგილობრივი თვითმმართველობის არჩევნების წინ და ასევე მას შემდეგ, რაც ISFED-მა გააკეთა საჯარო განცხადებები, რომლებშიც ხაზი გაესვა, საარჩევნო კანონმდებლობაში შეტანილ ცვლილებებს, „რომელიც სარგებლის მომტანია მმართველი პარტიისთვის და რომ საქართველომ ვერ დააკმაყოფილა ვენეციის კომისიის სტანდარტები საარჩევნო საკითხებში კარგი პრაქტიკის შესახებ“.

ორგანიზაციის განცხადებით, ეს მოხდა მას შემდეგ, რაც საქართველოს მთავრობამ გადაწყვიტა, არ მოეწვია ევროპის უსაფრთხოებისა და თანამშრომლობის ორგანიზაციის (ეუთო) და დემოკრატიული ინსტიტუტებისა და ადამიანის უფლებების ოფისი (ოდირი) ადგილობრივი თვითმმართველობის არჩევნებზე დასაკვირვებლად.

„პროკურატურის ქმედება აშკარად ძირს უთხრის ადგილობრივი თვითმმართველობის მომავალი არჩევნების გამჭვირვალობასა და ანგარიშვალდებულებას. მოქალაქე დამკვირვებლები, მათ შორის ISFED-ი, ადამიანის უფლებათა დამცველების მდგომარეობის შესახებ გაეროს სპეციალური მომხსენებლისა და ვენეციის კომისიის მიერ აღიარებულები არიან ადამიანის უფლებათა დამცველებად, რომლებიც მოქალაქეთა სამოქალაქო და პოლიტიკური უფლებების დაცვას ემსახურებიან“, – აღნიშნულია განცხადებაში.

ორგანიზაციაში აცხადებენ, რომ სოლიდარობას უცხადებენ GNDEM-ის წევრებს საქართველოში და ყველა არაპარტიულ სამოქალაქო აქტორს, რომელთა აზრისა და გაერთიანების კონსტიტუციით გათვალისწინებული თავისუფლება საფრთხის ქვეშაა.

„ვაფასებთ ISFED-ის და სხვა დაზარალებული სამოქალაქო ორგანიზაციების გადაწყვეტილებებს, გააგრძელონ თავიანთი მისიის შესრულება ქართველი ხალხის სამსახურში, საქართველოს მთავრობის რეპრესიული ქმედებებისა და იმ პოტენციური რისკის მიუხედავად, რაც პირადად ემუქრებათ. მოვუწოდებთ საქართველოს პროკურატურას და სხვა ორგანოებს, შეწყვიტონ სამოქალაქო საზოგადოებაზე მუდმივი თავდასხმები, პატივი სცენ საქართველოს კონსტიტუციას და ადამიანის უფლებების საერთაშორისო ვალდებულებებს და შეასრულონ თავიანთი პასუხისმგებლობა, დაიცვან არჩევნების მოქალაქე დამკვირვებლები, როგორც ადამიანის უფლებების დამცველები, საერთაშორისო სამართლის შესაბამისად“, – აღნიშნულია განცხადებაში.

გაიმარჯვა საქართველომ, დამარცხდნენ თაღლითები, რომლებმაც ვითომ ანაკლიის პორტის აშენების თვალსაზრისით, პირიქით აქეთ მოატყუეს ჩვენი საზოგადოება. მოატყუეს სახელმწიფო, მას დაახარჯვინეს ათეულობით მილიონი, – განაცხადა პარლამენტის საპროცედურო საკითხთა კომიტეტის თავმჯდომარე დავით მათიკაშვილმა.

მისი თქმით, ჯაფარიძე-ხაზარაძემ თითის გამოშვერა სცადეს ხელისუფლების მისამართით თუმცა ყველა საარბიტრაჟო დავა წააგეს.

„ჯაფარიძე-ხაზარაძე ემტერებოდნენ საკუთარ ქვეყანას. მათ ბევრგან წამოიწყეს დავა საქართველოს წინააღმდეგ და აბსოლუტურად ყველგან დამარცხდნენ. გაიმარჯვა საქართველომ, დამარცხდა თაღლითების პარტია, დამარცხდნენ თაღლითები, რომლებმაც ვითომ ანაკლიის პორტის აშენების თვალსაზრისით, პირიქით აქეთ მოატყუეს ჩვენი საზოგადოება. მოატყუეს სახელმწიფო. მას დაახარჯვინეს ათეულობით მილიონი. 60 მილიონზეა საუბარი, რომელიც ჩვენმა ქვეყანამ დახარჯა ამ ყველაფერში. მიუხედავად იმისა, რომ ჩვენი ხელისუფლება იყო მუდმივად თანამშრომლობის რეჟიმში ამ ადამიანებთან, ძალიან ბევრჯერ გადაუწიეს მათ შესრულების ვადები, ყველანაირად სასათბურე პირობებში ამყოფებდნენ და ერთადერთი, რაც მათ უნდა გაეკეთებინათ საკუთარი ვალდებულების შესრულება იყო. მათ ეს ვალდებულებები რა თქმა უნდა არ შეასრულეს, მერე თითი გამოიშვირეს ჩვენი ქვეყნისკენ, ჩვენი ხელისუფლებისკენ და დაწყებული დავა საქართველოს წინააღმდეგ, ჩვენი მოქალაქეებისთვის ჯიბიდან, რომ სურდათ ამოეცალათ თანხები და მიეთვისებინათ აი, ასეთი დავები მათი სრული ფიასკოთი დასრულდა“, – განაცხადა დავით მათიკაშვილმა.

შეიძლება ადამიანს ხელი გაუმართოს რაღაც ფონდმა, თუნდაც გადაიხადოს ჯარიმა მაგრამ დანაშაული სხვა რამეშია. ანუ შენ ფინანსური რესურსის მობილიზებას აკეთებ არა იმიტომ, რომ ვინმეს ამოუდგე გვერდში, არამედ შენ თვითონ გეგმავ დანაშაულებს, – განაცხადა პარლამენტის თავმჯდომარის პირველი მოადგილე გიორგი ვოლსკიმ მიმდინარე გამოძიებასთან დაკავშირებით, რომლის შედეგადაც რამდენიმე მდიდარი „ენჯეროს“ სავარაუდო არაკანონიერი საქმიანობის შესახებ გახდა ცნობილი.

მისი თქმით, როგორც აღმოჩნდა ეს ფონდები თანხას აგროვებდნენ იმისთვის, რომ ამავე ფინანსებით წაეხალისებინათ ძალადობა და დესტაბილიზაცია.

„შეიძლება ადამიანს ხელი გაუმართოს რაღაც ფონდმა, თუნდაც გადაიხადოს ჯარიმა. მაგრამ ამოცანა და დანაშაული სხვა რამეში მდგომარეობს. ანუ შენ ფინანსური რესურსის მობილიზებას აკეთებ არა იმიტომ, რომ თუ კი ვინმე ოდესმე იქნება დაჯარიმებული მას ამოუდგე პოლიტიკურად მხარში, არამედ შენ თვითონ გეგმავ დანაშაულებს, შენ თვითონ გეგმავ დესტაბილიზაციას, შენ გეგმავ ექსტრემიზმს, შენ გეგმავ სისხლისღვრას და ამისთვის ფინანსურ რესურსს უყრი თავს. დღეს ღიად აცხადებენ, რომ პიროტექნიკის შესყიდვა კვლავაც იქნება დღის წესრიგში, კვლავაც ესვრიან პოლიციელებს“, – განაცხადა გიორგი ვოლსკიმ.

ალექსი ახვლედიანი, რომლის სახლშიც და რომლის იარაღიდანაც მოხდა გასროლა, თავისუფლად რატომ დადის? – 50 დღის განმავლობაში გამოიკითხა თუ არა თავად თორნიკე რიჟვაძე? ახლა არ დაიწყოთ, საავადმყოფო და ა.შ. უკაცრავად, მაგრამ ერთ თვეზე მეტია, ეს კაცი აბსოლუტურად თავისუფლად გადაადგილდება. თუ გაინტერესებთ მისამართი, მე გეტყვით, სად შეიძლება ნახვა, მეტიც ჩაიზე! – ამის შესახებ „ნაციონალური მოძრაობის“ პოლიტსაბჭოს თავმჯდომარე ლევან ხაბეიშვილმა დღევანდელ ბრიფინგზე განაცხადა, რითაც აჭარის მთავრობის ყოფილი ხელმძღვანელის, თორნიკე რიჟვაძის თვითმკვლელობის მცდელობის საქმეზე კიდევ ერთხელ ისაუბრა.

როგორც ხაბეიშვილმა განაცხადა, არსებულ კითხვებზე პასუხებია გასაცემი, მათ შორის, ერთ-ერთი კითხვაა ის, თუ რატომ არ არის ამ დრომდე წარმოდგენილი ექსპერტიზის დასკვნა – თორნიკე რიჟვაძემ თავად ისროლა თუ ესროლეს.

„50 დღეში, ცხადია, სრულყოფილად უნდა არსებობდეს პასუხები – თავად ისროლა, ზურგში ესროლეს, თუ როგორ მოხდა, რა ტრაექტორიით მოხდა გასროლა. ამ დრომდე ექსპერტიზის დასკვნა არ არსებობს, არავის გვინახავს, გარდა კონკრეტული სპიკერების ბოდვებისა, რომ „ასე იყო, თუ ისე იყო“. არ არსებობს ექსპერტიზის დასკვნა!

მეორე – ვინ იყო ადგილზე, მკვლელობის მცდელობის დღეს, ვინ იყო თორნიკე რიჟვაძესთან ერთად სახლში, საგარეჯოში. ოფიციალური ვერსია პროკურატურას ამ დრომდე არ უთქვამს. ათას სისულელეზე მოისმენთ ბრიფინგს, მაგრამ 50 დღეზე მეტი გავიდა და ამ დრომდე, არავინ ვიცით, იმ დღეს, იმ სახლში ვინ იმყოფებოდა?! არსებობს ეჭვი, იყვნენ თუ არა მამუკა მდინარაძე და გეკა გელაძე, შს მინისტრად წოდებული იმ დღეს, იმ სახლში.

ვიღაცები კომენტარს რომ აკეთებენ, მამუკა მდინარაძე არ იყოო – არა. პროკურატურას ოფიციალური ვერსიით არ უთქვამს, იყო იმ დღეს იმ სახლში თუ არ იყო. არც ე.წ. შს მინისტრზე არავის უთქვამს, რომ გეკა იყო იმ დღეს იქ, თუ არ იყო. კომენტარები არ გვაინტერესებს. ზარქუა და ვოლსკი, რას იტყვიან და მერე „ტროლ-ბოტობას“ რას დაავალებენ, ეს არა. ჩემს სახლში რომ მომხდარიყო მსგავსი რამ, მეზობლებიდან დაწყებული, პროკურატურა ყველას გაგაცნობდათ.

მესამე – 50 დღეზე მეტი გავიდა და პროკურატურას არანაირი კამერის ჩანაწერები არ გაუსაჯაროებია. არ უჩვენებია, რა ავტომობილებით მივიდნენ, ვინ იყო სახლში, ეს კამერები არსებობს ამ მდიდარი ადამიანის სახლში, სადაც ეს მოხდა. თავად ამბობს, რომ მდიდარი ვარ და 50 000 ლარს ნახევარ საათში გადავიხდიო, ასე უთხრა სასამართლოს. გამოძიებასთან ეს სამი ძირითადი შეკითხვაა. ყველას უნდა ესმოდეს, რომ ახლა, ვინც ამ საქმის შეკერვით არის დაკავებული, სისხლის სამართლის დანაშაულს სჩადის. ასევე, ალექსი ახვლედიანი,რომლის სახლშიც და რომლის იარაღიდან მოხდა შემთხვევა, ეს კაცი, თავისუფალი რატომ დადის? მინდა, რომ „ქოცმა“ კარგად გაიგოს, ჩემს სახლში რომ მომხდარიყო, ჩემი იარაღით მკვლელობის მცდელობა რომ ყოფილიყო, თქვენი აზრით, გარეთ ვიქნებოდი? ეს კაცი რომ დაბოდიალებს და ამ დრომდე ეარ ვიცით, თვითმკვლელობა იყო, ესროლეს, ექსპერტიზის დასკვნა არ წარმოუდგენიათ და ეს კაცი, თავისუფლად, როგორ გადაადგილდება? რა კომენტარებსაც იძლევა, ხომ გვაქვს საფუძვლიანი ეჭვი ვთქვათ, რომ თავისუფლების სანაცვლოდ ლაპარაკობს. 50 დღის განმავლობაში, გამოიკითხა თუ არა თავად თორნიკე რიჟვაძე? ახლა არ დაიწყოთ, საავადმყოფო და ა.შ. უკაცრავად, მაგრამ ერთ თვეზე მეტია, ეს კაცი აბსოლუტურად თავისუფლად გადაადგილდება. თუ გაინტერესებთ მისამართი, მითხარით, გეტყვით, სად შეიძლება ნახვა, მეტიც, ჩაიზე! ეს არის ლეგიტიმური შეკითხვები, რომელიც 50 დღის თავზე აქვს საზოგადოებას, ამიტომ ნება იბოძეთ და პასუხები გაეცით“, -განაცხადა ხაბეიშვილმა.