Home Blog Page 3

პირველი აპრილიდან „აუტიზმის სპექტრის დარღვევის მქონე ბავშვთა აბილიტაციის“ პროგრამით მომსახურებას დამატებით 300 ბავშვი და მოზარდი მიიღებს

თბილისის მერიის პროგრამით „აუტიზმის სპექტრის დარღვევის მქონე ბავშვთა აბილიტაციის“ განსაზღვრულ მომსახურებას დამატებით 300 ბავშვი და მოზარდი მიიღებს.

როგორც დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე აღნიშნა, შესაბამისი ცვლილებები პირველი აპრილიდან შევა ძალაში.

„თბილისის მერია აუტიზმის სპექტრის დარღვევის მქონე ბავშვებისა და მოზარდების მხარდაჭერას განაგრძობს და „აუტიზმის სპექტრის დარღვევის მქონე ბავშვთა აბილიტაციის“ პროგრამაში ცვლილებებს მუდმივად ახორციელებს. მორიგი ასეთი ცვლილებით, პირველი აპრილიდან, პროგრამით განსაზღვრულ მომსახურებას დამატებით 300 ბავშვი და მოზარდი მიიღებს. ეს სიახლე აუტიზმის შესახებ ცნობიერების ამაღლების მსოფლიო დღეს უკავშირდება და მიზნად, აღნიშნული საჭიროების მქონე ოჯახების გვერდით დგომას ისახავს, რადგან ამ სერვისის უწყვეტ რეჟიმში მიღება დიდ თანხასთან არის დაკავშირებული“, – აღნიშნა თბილისის მერმა.

მისივე თქმით, თბილისის მერიის პროგრამის მიმდინარე წლის ბიუჯეტი 11 245 000 ლარამდე გაიზარდა და აპრილიდან 2 400 ბავშვს და მოზარდს დაუფინანსდება მულტიდისციპლინური გუნდის მიერ შედგენილი კომპლექსური თერაპიის 20 სეანსი.

„რაც შეეხება სერვისის განმახორციელებელ დაწესებულებებს, მათი რიცხვიც გაზრდილია. იანვრიდან მერიის პროგრამით გათვალისწინებული მომსახურების მიმწოდებლად მე-11 ორგანიზაცია ჩაერთო. აღსანიშნავია, რომ „აუტიზმის სპექტრის დარღვევის მქონე ბავშვთა აბილიტაციის პროგრამის“ დაწყების დროისთვის, 2015 წლის ივლისში, პროგრამაში სერვისის მიმწოდებელი ორი დაწესებულება და 325 ბავშვი იყო ჩართული, ხოლო ბიუჯეტი 500 000 ლარს შეადგენდა. მას შემდეგ, პროგრამის ბიუჯეტი ყოველწლიურად იზრდებოდა და შესაბამისად, მეტი ბავშვის დაფინანსება ხდებოდა შესაძლებელი. ასევე, მოიმატა ერთი ბენეფიციარის დაფინანსების ოდენობამ“, – განაცხადა კახა კალაძემ.

“რამხელა სიურპრიზია ოლიგარქის განაჩენი არა? დამპყრობლის ნება პირდაპირ აღსრულდა” -მიხეილ სააკაშვილი

ნება დამპყრობლის პირდაპირ აღსრულდა და ეს არის მათი პასუხი იმაზე, რომ არ ჩავაბარე საქართველო, რომ პირველად საუკუნეების განმავლობაში გავბედეთ და ჩამოვაყალიბეთ წარმატებული ქართული სახელმწიფო, – ამის შესახებ საქართველოს ყოფილი პრეზიდენტის, მიხეილ სააკაშვილის წერილშია ნათქვამი, რომელიც მედიას „ნაციონალური მოძრაობის“ თავმჯდომარემ, თინა ბოკუჩავამ გააცნო.

როგორც მიხეილ სააკაშვილი წერილში წერს, „ასე ისჯება ივანიშვილის მაფიოზური კლანის მიერ ქვეყნისთვის თავდადება და სამშობლოს სიყვარული“.

„რამხელა სიურპრიზია ოლიგარქის განაჩენი. ნება დამპყრობლის პირდაპირ აღსრულდა და ეს არის მათი პასუხი იმაზე, რომ არ ჩავაბარე საქართველო, იმისთვის, რომ პირველად საუკუნეების განმავლობაში გავბედეთ და ჩამოვაყალიბეთ წარმატებული ქართული სახელმწიფო. მას შემდეგ, რაც ვერაფერი ვერ მიპოვეს, პრაქტიკულად სამუდამო პატიმრობა მომისაჯეს, საპრეზიდენტო ოფისის ოფიციალური ხარჯებისთვის. ასე ისჯება ივანიშვილის მაფიოზური კლანის მიერ ქვეყნისთვის თავდადება და სამშობლოს სიყვარული. ვერ დაგვაშინებენ, ძალა ერთობაშია“, – ნათქვამია მიხეილ სააკაშვილის წერილში.

თბილისის საქალაქო სასამართლომ საქართველოს ყოფილი პრეზიდენტი მიხეილ სააკაშვილი დამნაშავედ ცნო დიდი ოდენობით სახელმწიფო ბიუჯეტის კუთვნილი თანხების გაფლანგვის საქმეზე, საქართველოს სისხლის სამართლის კოდექსის 182-ე მუხლის მეორე ნაწილის ,,დ“ და მესამე ნაწილის „ბ“ ქვეპუნქტით და სასჯელის სახედ და ზომად 9 წლით თავისუფლების აღკვეთა განუსაზღვრა.

დიდი ოდენობით საბიუჯეტო სახსრების გაფლანგვის საქმეზე მიხეილ სააკაშვილს 9 წლით თავისუფლების აღკვეთა მიესაჯა, თემურ ჯანაშიას კი 300 ათასი ლარით ჯარიმა განესაზღვრა

სასამართლომ დიდი ოდენობით საბიუჯეტო სახსრების გაფლანგვის საქმეზე საქართველოს ყოფილი პრეზიდენტი მიხეილ სააკაშვილი დამნაშავედ ცნო. მას აღნიშნული დანაშაულისთვის სასჯელის ზომად 9 წლით თავისუფლების აღკვეთა განესაზღვრა.

სასამართლომ ასევე დამნაშავედ ცნო ამავე საქმეზე ბრალდებული სახელმწიფო დაცვის სპეციალური სამსახურის ყოფილი უფროსი თემურ ჯანაშია, თუმცა, როგორც მოსამართლემ განმარტა, ჯანაშიას ბრალი გადაუკვალიფიცირდა და დამნაშავედ იქნა ცნობილი სამსახურებრივი უფლებამოსილების ბოროტად გამოყენების მუხლით და 300 ათასი ლარით ჯარიმა განესაზღვრა.

ორივე ბრალდებულის მიმართ გამამტყუნებელი განაჩენი თბილისის საქალაქო სასამართლოს მოსამართლე ბადრი კოჭლამაზაშვილმა გამოაცხადა. მანამდე, ბადრი კოჭლამაზაშვილმა განმარტა, რომ სხდომას ვერ გადადებდა ბრალდებულების გამოუცხადებლობის გამო, რადგან ამას საქართველოს კანონმდებლობა არ ითვალისწინებს.

„მიხეილ სააკაშვილი ცნობილი იქნეს დამნაშავედ სსსკ-ის 182-ე მუხლის მეორე ნაწილის „ბ“ ქვეპუნქტითა და მესამე ნაწილის „ბ“ ქვეპუნქტით ჩადენილი დანაშაულის ჩადენისთვის და სასჯელის სახედ და ზომად განესაზღვროს ცხრა წლით თავისუფლების აღკვეთა. მასვე სამი წლის ვადით ჩამოერთვას სახელმწიფო სამსახურში დანიშვნითი თანამდებობის დაკავების უფლება. სსსკ-ის 59-ე მუხლის მეოთხე ნაწილის საფუძველზე, ამ განაჩენით დანიშნულმა სასჯელმა შთანთქოს საქალაქო სასამართლოს 2021 წლის 17 ნოემბრის განჩინებით განსაზღვრული სასჯელი და საბოლოოდ მოსახდენად განესაზღვროს ცხრა წლის თავისუფლების აღკვეთა და სამი წლის ვადით ჩამოერთვას სახელმწიფო სამსახურში დანიშვნითი თანამდებობის დაკავების უფლება. მიხეილ სააკაშვილს სასჯელის მოხდის ვადის ათვლა დაეწყოს ამ განაჩენის მიღების მომენტიდან, 2025 წლის 12 მარტიდან, მასვე სასჯელის მოხდის ვადაში ჩაეთვალოს 2021 წლის პირველი ოქტომბრიდან 2025 წლის 12 მარტამდე პატიმრობაში ყოფნის პერიოდი“, – განაცხადა მოსამართლემ.

მოსამართლემ აქვე განმარტა საკუთარი გადაწყვეტილება, რომლის თანახმადაც, თეიმურაზ ჯანაშიას ბრალი გადაუკვალიფიცირდა. როგორც ბადრი კოჭლამაზაშვილმა აღნიშნა, საქმიდან „ჯგუფურობის მაკვალიფიცირებელი გარემოება უნდა ამოირიცხოს“, რადგან მისივე განმარტებით, საქმის მასალებით არ დგინდება, რომ თეიმურაზ ჯანაშიამ უშუალოდ გახარჯა საბიუჯეტო თანხები.

„მას არც პირადად და არც მიხეილ სააკაშვილთან ერთად არ მოუხდენია აღნიშნული საბიუჯეტო თანხების ხარჯვა. შესაბამისად, იგი გაფლანგვის თანაშემსრულებლად ვერ იქნება მიჩნეული. შესაბამისად, მიხეილ სააკაშვილსაც საქმიდან ჯგუფურობის მაკვალიფიცირებელი გარემოება უნდა ამოერიცხოს. მაგრამ ეს იმას არ ნიშნავს, რომ თეიმურაზ ჯანაშიას დანაშაული საერთოდ არ ჩაუდენია. იგი გახლდათ სახელმწიფო დაცვის სპეციალური სამსახურის უფროსი და მატერიალურად პასუხისმგებელი იყო მისდამი დაქვემდებარებული უწყების ბიუჯეტიდან თანხების მიზნობრივ ხარჯვაზე, მან კი თავისი სამსახურებრივი მდგომარეობა გამოიყენა საჯარო ინტერესების საწინააღმდეგოდ, უპირატესობა მიანიჭა იმჟამინდელ პრეზიდენტს და იმოქმედა მისთვის გამორჩენის მიღების მიზნით. თეიმურაზ ჯანაშიას ქმედებამ გამოიწვია სახელმწიფოსა და საზოგადოების კანონიერი ინტერესების არსებითი დარღვევა; სახელმწიფო ბიუჯეტმა იზარალა 9 მილიონზე მეტი ლარით, მხოლოდ მატერიალურ ზიანშიც არ არის საქმე, არამედ – მთელ რიგ სახელმწიფო ინსტიტუტებს მიადგათ რეპუტაციული ზიანი. სახელმწიფო დაცვის სპეციალური სამსახური იქცა კორუფციულ სალაროდ, ასევე პრეზიდენტის ინსტიტუტს მიადგა რეპუტაციული ზიანი, რადგან დადასტურდა, რომ თანამდებობა გამოყენებული იქნა პირადი მიზნებისთვის. რაც შეეხება საზოგადოებისთვის მიყენებულ ზიანს, ის გამოხატა იმაში, რომ სახელმწიფო ბიუჯეტის ფული, რომელიც არის ხალხის ფული, უნდა იხარჯებოდეს ხალხის ინტერესების შესაბამისად და არა პირადი ინტერესებისთვის. ასე რომ, თეიმურაზ ჯანაშიას ქმედებაში სახეზეა არა გაფლანგვის, არამედ სამოხელეო დანაშაულის ნიშნები ისეთი დანაშაულის, როგორიცაა სამსახურებრივი უფლებამოსილების ბოროტად გამოყენება და მან სწორედ ამ დანაშაულისათვის უნდა აგოს პასუხი.

თეიმურაზ ჯანაშიას ქმედება დაკვალიფიცირებული სსსკ-ის 332-ე მუხლის მეორე ნაწილის „ა“ და „ბ“ ქვეპუნქტით და მესამე ნაწილის „ბ“ ქვეპუნქტით გადაკვალიფიცირდეს სსსკ-ის 332-ე მუხლის პირველ ნაწილზე. თეიმურაზ ჯანაშია ცნობილ იქნეს დამნაშავედ სსსკ-ის 332-ე მუხლის პირველი ნაწილით გათვალისწინებული დანაშაულის ჩადენისთვის და სასჯელის სახედ და ზომად განესაზღვროს ჯარიმა 300 ათასი ლარის ოდენობით. მასვე სამი წლის ვადით ჩამოერთვას სახელმწიფო სამსახურში დანიშვნითი თანამდებობის დაკავების უფლება.

განაჩენი ძალაში შედის გამოცხადებისთანავე. მსჯავრდებულებს უფლება აქვთ, შეწყალების მოთხოვნით მიმართონ საქართველოს პრეზიდენტს“, – განაცხადა მოსამართლე ბადრი კოჭლამაზაშვილმა.

განაჩენის გამოცხადებას სასამართლო დარბაზში ხმაური მოჰყვა.

მიხეილ სააკაშვილსა და თემურ ჯანაშიას გამოძიება სახელმწიფოს კუთვნილი დაახლოებით 9 მილიონი ლარის ოდენობის თანხის პირადი მიზნებისთვის გაფლანგვას ედავებოდა.

პროკურატურის ინფორმაციით, გამოძიებით დადგენილია, რომ საქართველოს პრეზიდენტმა მიხეილ სააკაშვილმა, სდსს-ის უფროსის თეიმურაზ ჯანაშიას და ოთარ ქველიძის მონაწილეობით, მის მიერ საბიუჯეტო თანხების არამიზნობრივად გამოყენების ფაქტების გამჟღავნების თავიდან აცილების მიზნით, საიდუმლო ფორმით, პრეზიდენტის სარეზერვო ფონდიდან მის უშუალო დაქვემდებარებაში მყოფი სდსს-თვის გამოყო თანხები. საგამოძიებო უწყების ცნობითვე, 2009 წლის პირველი მაისიდან 2013 წლის 25 თებერვლამდე, მიხეილ სააკაშვილის დავალებით და ორგანიზებით, მისი პირადი მიზნებისთვის, აღნიშნული თანხიდან არამიზნობრივად დაიხარჯა სახელმწიფო ბიუჯეტის კუთვნილი 9 024 367.34 ლარი. აღნიშნული ხარჯების ჩამოწერა სდსს-ის უფროსის თეიმურაზ ჯანაშიას ხელმძღვანელობით განხორციელდა საიდუმლო დოკუმენტებით, რომლებსაც გრიფი „საიდუმლო“ უკანონოდ მიენიჭა.

საქართველოს ყოფილი პრეზიდენტი მიხეილ სააკაშვილი საქართველოს შინაგან საქმეთა სამინისტრომ 2021 წლის პირველ ოქტომბერს დააკავა და ამავე დღეს პროკურატურამ წარუდგინა ბრალდება საზღვრის უკანონო კვეთის ფაქტთან დაკავშირებით.

სპეციალურმა საგამოძიებო სამსახურმა, ძალადობის და სიცოცხლის მოსპობის მუქარის ფაქტზე, საპატრულო პოლიციის დეპარტამენტის  პატრულ-ინსპექტორი დააკავა

სპეციალურმა საგამოძიებო სამსახურმა, ძალადობის და სიცოცხლის მოსპობის მუქარის ფაქტზე, საპატრულო პოლიციის დეპარტამენტის პატრულ-ინსპექტორი დააკავა.

სპეციალური საგამოძიებო სამსახურის ინფორმაციით, ძალადობისა და სიცოცხლის მოსპობის მუქარის ფაქტზე, საპატრულო პოლიციის დეპარტამენტის პატრულ-ინსპექტორი დააკავაჩატარებული გამოძიებით დადგინდა, რომ ბრალდებულმა, თანაცხოვრების პერიოდში, მეუღლის მიმართ ფიზიკური ძალადობა და მუქარა არაერთხელ განახორციელა.

„2024 წლის 14 იანვარს, თბილისში, საცხოვრებელ ბინაში, ბრალდებულმა, შელაპარაკების ნიადაგზე, არასრულწლოვანი შვილის თანდასწრებით, მეუღლის მიმართ ფიზიკურად იძალადა, ძლიერად მოუჭირა ხელი ნიკაპზე, ხოლო შემდეგ ძლიერად მოქაჩა თმაზე და დაემუქრა სიცოცხლის მოსპობით. სამართალდამცავი მეუღლეზე ძალადობას და მუქარას შემდგომშიც აგრძელებდა.

სპეციალურმა საგამოძიებო სამსახურმა, დაზარალებული ქალის მომართვისთანავე, გამოძიება მყისიერად წარმართა. ჩატარდა გადაუდებელი საგამოძიებო მოქმედებები: გამოიკითხა დაზარალებული და მოწმეები, მოპოვებული იქნა დანაშაულში მამხილებელი სიცოცხლის მოსპობის მუქარის ამსახველი აუდიოჩანაწერი.

მტკიცებულებების მოპოვების შემდეგ, სასამართლოს განჩინების საფუძველზე, სპეციალური საგამოძიებო სამსახურის თანამშრომლების მიერ დაკავებული იქნა პატრულ-ინსპექტორი.

სპეციალური საგამოძიებო სამსახური საქმეზე გამოძიებას საქართველოს სისხლის სამართლის კოდექსის 126-ე (პრიმა) მუხლის მეორე ნაწილის „ბ“ ქვეპუნქტით და 11 (პრიმა) 151-ე მუხლის მეორე ნაწილის „დ“ ქვეპუნქტით აგრძელებს.

სამართალდამცავს ბრალდება კანონით დადგენილ ვადაში წარედგინება.

დანაშაული 3 წლამდე თავისუფლების აღკვეთას ითვალისწინებს“, – აცხადებენ სპეციალურ საგამოძიებო სამსახურში.

თიბისი ბიზნესის ინიციატივით, ბათუმში პანელური დისკუსიების სერია „ხუთშაბათის შეხვედრები“ გაიმართება

თიბისი ბიზნესის პანელური დისკუსიების სერია – “ხუთშაბათის შეხვედრები” ბრუნდება. 2025 წლის პირველი ღონისძიება ბათუმში, 13 მარტს ჩატარდება და ის ორგანიზაციული ზრდის გამოწვევების თემატიკას დაეთმობა.

“ხუთშაბათის შეხვედრების” ახალ სეზონს ამჯერად, მრგვალი მაგიდის გარშემო მოწვეული სტუმრები  –  შალვა ახრახაძე,“ფინანსური ლაბორატორიის” მმართველი პარტნიორი; თიკო გობეჯიშვილი , “ლუკა პოლარეს” გენერალური დირექტორი და ჯემალ ცეცხლაძე, კოოპერატივ “მოცვნარის” დირექტორი გაუძღვებიან.

შეხვედრის ფარგლებში, სპიკერები იმ გამოწვევებზე  ისაუბრებენ, რომელსაც ბიზნესის დამფუძნებლები თუ მენეჯერები  კომპანიის ზრდის პროცესში აწყდებიან- რა არის ხშირად დაშვებული შეცდომები, როგორ უმკლავდებიან ამ პროცესს თავად და რა არის ამ გამოწვევებთან გამკლავების მიღებული პრაქტიკები. სტუმრები აღნიშნულ საკითხთან დაკავშირებით, დამსწრე აუდიტორიის კითხვებსაც უპასუხებენ.

„ხუთშაბათის შეხვედრების“ მიზანია, წარმოაჩინოს სხვადასხვა ინდუსტრიის შიგნით მიმდინარე პროცესები, სპეციფიკაციები და ბაზარზე არსებული მოთამაშეების განსხვავებული სტრატეგიები ბიზნესის სხვადასხვა საჭიროებებზე.

13 მარტის შეხვედრაზე დამსწრეთა რაოდენობა შეზღუდულია და აუცილებელია რეგისტრაციის გავლა შემდეგ ბმულზე: https://forms.gle/ETsJE8cqoSUDNU5H9

(R)

როგორი ამინდია მოსალოდნელი დღეს საქართველოში

ქუთაისში დღისით +24 და ღამით +11 გრადუსია მოსალოდნელი, სინოპტიკოსები მზიან ამინდს ვარაუდობენ.

მზიან ამინდს ელოდებიან ოზურგეთშიც, დღისით +20 გრადუსი დაფიქსირდება, ღამით კი +10. ბათუმშიც მზიანი ამინდი იქნება, დღისით ჰაერი +25 გრადუსამდე გათბება, ხოლო ღამით +10 გრადუსი დაფიქსირდება.

მზიანი ამინდია ფოთშიც. დღისით +20 გრადუსი დაფიქსირდება, ღამით კი +1 გრადუსია მოსალოდნელი. მზეა ზუგდიდშიც, დღისით ტემპერატურა +25, ღამით კი +10 გრადუსია ნავარაუდევი.

მზიანი დღეა სოხუმშიც. +21 გრადუსია მოსალოდნელი დღისით, ღამით +10 გრადუსი დაფიქსირდება.

მესტიაში მზიანია ამინდია, დღისით +17 გრადუსი იქნება, ღამით კი -3 გრადუსი დაფიქსირდება. ამბროლაურში ჰაერი +20 გრადუსამდე გათბება, ღამით კი +4 გრადუსი დაფიქსირდება.

მზიანი ამინდია ჭიათურაშიც, დღისით +22 გრადუსი, ღამით კი +6 გრადუსი დაფიქსირდება. ახალციხეში დღისით ჰაერი +19 გრადუსამდე გათბება, ღამით კი ტემპერატურა -2 გრადუსი იქნება.

მზიანი დღეა ბორჯომში, +20 იქნება დღისით, ღამით კი +1 გრადუსი დაფიქსირდება. მზიანი ამინდია მოსალოდნელი ბაკურიანშიც, დღისით +14 გრადუსია მოსალოდნელი, ღამით -4 გრადუსი დაფიქსირდება.

გორში დღისით +22 გრადუსი, ღამის განმავლობაში კი +2 გრადუსი დაფიქსირდება. მზიანი დღე იქნება ცხინვალშიც, ჰაერის ტემპერატურა +21 გრადუსი იქნება, ღამით კი +1 გრადუსი დაფიქსირდება.

გუდაურში დღის განმავლობაში +10 გრადუსი დაფიქსირდება, ღამით კი ჰაერის ტემპერატურა -3 გრადუსი იქნება. ომალოში მზიანი ამინდი იქნება, დღისით +11, ღამით კი -3 გრადუსი დაფიქსირდება.

ლაგოდეხშიც მზიანი ამინდია. ჰაერის ტემპერატურა დღის განმავლობაში +21 გრადუსი იქნება, ღამით კი +8 გრადუსი დაფიქსირდება. მზიანი დღე იქნება თელავშიც, +20 გრადუსი დაფიქსირდება, ღამით კი +7 გრადუსია ნავარაუდევი.

გურჯაანში მზეა. დღისით +22 გრადუსი, ღამით კი +8 გრადუსი დაფიქსირდება. სიღნაღში დღისით +19 გრადუსია მოსალოდნელი, ღამით +8 გრადუსი დაფიქსირდება.

რუსთავშიც მზიანი დღეა, დღისით +23 გრადუსია მოსალოდნელი, ღამით კი +7 გრადუსი დაფიქსირდება.
თბილისშიც მზიან ამინდის ვარაუდობენ. ჰაერის ტემპერატურა დღისით +23 გრადუსს მიაღწევს, ღამით კი +7 გრადუსი იქნება.

ყველა საერთაშორისო ინსტიტუტი, სარეიტინგო სააგენტო მთავრობის სწორ ეკონომიკურ პოლიტიკას უსვამს ხაზს. ბიზნესს სურს არა მოწოდებები გაფიცვის, დესტაბილიზაციის შესახებ, არამედ მშვიდობა, ბიზნესისადმი მეგობრული გარემო -გიორგი აბაშიშვილი

„ექსპერტთა”, პოლიტიკოსთა და ზოგიერთი ევროპელი ელჩის პროგნოზითაც კი 2024 წლის ბოლოს საქართველოს ეკონომიკა უნდა ჩამოშლილიყო, ლარი გაუფასურებულიყო და სერიოზულ კრიზისი დამდგარიყო, მათივე მოწოდებით, ბიზნესს პოლიტიკური მოთხოვნები უნდა დაეყენებინა (ზოგიერთი აიყოლიეს მოტყუებით, ზეწოლით/დაშინებით, ბულინგით), – წერს “ბიზნეს ინსაიდერ საქართველოს” დამფუძნებელი, გიორგი აბაშიშვილი, სოციალურ ქსელში.

მისი განცხადებით, სინამდვილეში, ამ პერიოდში, EBRD-მა 2024 წლის სექტემბერთან შედარებით საქართველოს ეკონომიკური ზრდის პროგნოზი 2024 წლის ბოლოს გაზარდა 6 პროცენტამდე, Heritage Foundation-მა კი ეკონომიკური თავისუფლების 2025 წლის ინდექსში საქართველო დააწინაურა.

როგორც აბაშიშვილი აღნიშნავს, ყველა საერთაშორისო საფინანსო ინსტიტუტი თუ სარეიტინგო სააგენტო მთავრობის სწორ ეკონომიკურ პოლიტიკას უსვამს ხაზს და საქართველოს ეკონომიკის მთავარ რისკად შიდა და გარე პოტენციურ პოლიტიკურ დესტაბილიზაციას ასახელებს, რაც საზოგადოებამ არ უნდა დაუშვას.

„მხოლოდ ფაქტები:

„ექსპერტთა”, პოლიტიკოსთა და ზოგიერთი ევროპელი ელჩის პროგნოზითაც კი 2024 წლის ბოლოს საქართველოს ეკონომიკა უნდა ჩამოშლილიყო, ლარი გაუფასურებულიყო და სერიოზულ კრიზისი დამდგარიყო, მათივე მოწოდებით, ბიზნესს პოლიტიკური მოთხოვნები უნდა დაეყენებინა (ზოგიერთი აიყოლიეს მოტყუებით, ზეწოლით/დაშინებით, ბულინგით), ბიზნესები უნდა გაჩერებულიყო, ბიზნეს კომპანიების თანამშრომლები გაფიცულიყვნენ.

სინამდვილეში კი ამავე პერიოდში მოხდა შემდეგი:

– ევროპის რეკონსტრუქციისა და განვითარების ბანკმა (EBRD) 2024 წლის სექტემბერთან შედარებით საქართველოს ეკონომიკური ზრდის პროგნოზი 2024 წლის ბოლოს გაზარდა 6 პროცენტამდე (საპირისპიროდ, მნიშვნელოვნად შეამცირა მოლდოვისა და უკრაინის ეკონომიკური ზრდის პროგნოზი)

– ამერიკულმა ორგანიზაციამ Heritage Foundation-მა ეკონომიკური თავისუფლების 2025 წლის ინდექსში საქართველოს დააწინაურა მათ შორის განსაკუთრებულად, ბიზნესის თავისუფლების, მთავრობის ხარჯების ეფექტიანობისა და ფისკალური პოლიტიკის მდგრადობის მიმართულებით

– London Stock Exchange-ის მონაცემებით ლონდონის საფონდო ბირჟაზე წარმოდგენილი სამივე ქართული კომპანიის (მათ შორის ორი კომერციული ბანკის აქციების ფასი საშუალოდ 27-46 პროცენტის ფარგლებში გაიზარდა

– თითქმის 170 მილიონი დოლარით მეტი პირდაპირი უცხოური ინვესტიცია მივიღეთ ქვეყანაში 2024 წლის ბოლო კვარტალში, გასული წლის მესამე კვარტალთან შედარებით, რაც ასევე 2023 წლის ანალოგიურ პერიოდთან შედარებითაც კი 24.4 პროცენტით მეტია

– 2024 წლის მეოთხე კვარტალში მესამე კვარტალთან შედარებით უმუშევრობა კვლავ შემცირდა და უმუშევრობის დონემ ისტორიულ მინიმუმს მიაღწია

– თითქმის მილიარდ დოლარს გაუტოლდა 2024 წლის მეოთხე კვარტალში ტურიზმიდან მიღებული შემოსავლები რაც კვარტლის ჭრილში 10.3 პროცენტიანი ზრდაა (წლიური შემოსავალი კი სარეკორდო იყო)

– 62 მილიარდ ლარს გაუტოლდა 2024 წლის მეოთხე კვარტალში, ბიზნესის ბრუნვა (10 პროცენტიანი ზრდა), ხოლო პროდუქციის გამოშვება თითქმის 11 პროცენტით გაიზარდა გასული წლის ანალოგიურ პერიოდთან შედარებით

– 2024 წლის მეოთხე კვარტალში მესამე კვარტალთან შედარებით სოლიდურადაა გაზრდილი ადგილობრივი ექსპორტი

– ლარი მყარდება და ინფლაცია კვლავ მიზნობრივ მაჩვენებელზე ქვემოთაა

რეალურად სია კიდევ გრძელია…. თუმცა აი ამ მცირე ჩამონათვალიდანაც ნათლად ჩანს თუ ვის უჯერებს და რა სურს ბიზნესს:

ბიზნესს სურს არა მოწოდებები დახურვის, გაფიცვის, მუქარის, შანტაჟის, დესტაბილიზაციის შესახებ, არამედ ბიზნესს სურს მშვიდობა, თავისუფალი, ბიზნესისადმი მეგობრული გარემო, სწორი, ბიზნესზე ორიენტირებული ეკონომიკური რეფორმები და ეკონომიკის პროგნოზირებადობა, მუდმივი ღია დიალოგი მთავრობასთან და განვითარებაზე ორიენტირება.

ყველა საერთაშორისო საფინანსო ინსტიტუტი თუ სარეიტინგო სააგენტო მთავრობის სწორ ეკონომიკურ პოლიტიკას უსვამს ხაზს და საქართველოს ეკონომიკის მთავარ რისკად შიდა და გარე პოტენციურ პოლიტიკურ დესტაბილიზაციას/არასტაბილურობას ასახელებს. აი ეს არის ის რაც არ უნდა დავუშვათ.” – წერს გიორგი აბაშიშვილი.

12 მარტის ასტროლოგიური პროგნოზი

რას გვირჩევენ ვარსკვლავები 12 მარტისთვის ჯანმრთელობის, ბიზნესის და სიყვარულის მიმართულებით?

ვერძი

ეს დღე შესაძლებლობას მოგცემთ საკუთარი თავი გამოავლინოთ, მაგრამ მნიშვნელოვანია, ზომიერება შეინარჩუნოთ. ენერგიით სავსე ხართ, თუმცა, თუ მას ქაოსურ მიმართულებას მისცემთ, შესაძლოა, სიტუაციაზე კონტროლი დაკარგოთ. მთავარია, არ იჩქაროთ და გადაწყვეტილებები ემოციების საფუძველზე არ მიიღოთ.

რჩევა: მნიშვნელოვანი გადაწყვეტილებების მიღებისას ნუ აჩქარდებით – ამ დღეს სიმშვიდე თქვენი საუკეთესო მოკავშირეა.

კურო

ეს დღე სამომავლო გეგმების დასახვისა და ადრე დაწყებული საქმეების დასასრულებლად ხელსაყრელია. იმ სიტუაციებში, სადაც მოთმინება და ყურადღებაა საჭირო, გაგიმართლებთ, მაგრამ უმჯობესია, მკვეთრი ცვლილებებისგან თავი შეიკავოთ. როგორც არ უნდა გაჩქარებდნენ, საკუთარ თავს ფიქრისა და ანალიზის დრო უნდა მისცეთ და გადაწყვეტილება აუჩქარებლად უნდა მიიღოთ.

რჩევა: გახსოვდეთ, რომ კარგად გააზრებული ნაბიჯები გაცილებით მეტ სარგებელს მოგიტანთ, ვიდრე ნაჩქარევი და დაუფიქრებელი გადაწყვეტილება.

ტყუპები

მოულოდნელობებით სავსე დღეა. შესაძლოა, მოვლენების ეპიცენტრში აღმოჩნდეთ, მაგრამ მნიშვნელოვანია, თქვენი ენერგია უსარგებლოდ არ გაფლანგოთ და ყველა საქმე ერთდროულად არ აკეთოთ. კარგი დროა ურთიერთობისა და ახალი ნაცნობობისთვის. ხელსაყრელი დღეა ჯანსაღი ცხოვრების წესის, სპორტული ვარჯიშებისა და ახალი დიეტის დაწყებისთვის.

რჩევა: ყურადღებით იყავით და დაპირებებს დაუფიქრებლად ნუ გასცემთ – ეს დიდ უსიამოვნებებს აგარიდებთ თავიდან.

კირჩხიბი

ამ დღეს თქვენი განწყობა მარტის ამინდივით ცვალებადია. ეცადეთ, ეს დღე მაქსიმალურად აქტიურად გაატაროთ და ის აკეთოთ, რაც დადებით ემოციებს მოგიტანთ. სასურველია, ნაკლები ილაპარაკოთ და უსარგებლო საქმეებზე დროს ნუ დაკარგავთ.

რჩევა: პირად ურთიერთობებში კომპრომისები ეძებეთ და საყვარელ ადამიანებზე ზეწოლას მოერიდეთ.

ლომი

ეს დღე აქტიური მოქმედებისთვის ხელსაყრელია. იღბალი თქვენს მხარესაა, მაგრამ მნიშვნელოვანია, თქვენი რესურსები სწორად მართოთ. თქვენი ნებისმიერი იდეა მხარდაჭერას და მოწონებას დაიმსახურებს. ამაში გარკვეულ როლს თქვენი პიროვნული ხიბლიც შეასრულებს, რომელსაც ოსტატურად იყენებთ. როგორი ამინდიც არ უნდა იყოს, ეცადეთ ეს დღე მაქსიმალურად აქტიურად გაატაროთ და ის აკეთოთ, რაც დადებით ემოციებს მოგიტანთ.

რჩევა: თავისუფალი დრო თითქმის არ გაქვთ, მაგრამ შესვენების და ძალების მოკრეფის დრო მაინც უნდა გამონახოთ.

ქალწული

წარმატებული და ნაყოფიერი დღეა. შესრულებული სამუშაო შინაგან კმაყოფილებას მოგანიჭებთ. თუ წინასწარ შედგენილ გეგმას მიჰყვებით, შეიძლება შესანიშნავ შედეგებს მიაღწიოთ. ნებისმიერი პრობლემა გულთან ახლოს მიგაქვთ, რაც შეიძლება თქვენს ჯანმრთელობაზე აისახოს. თუ ყველა ძველი წყენისთვის სამაგიეროს გადახდას არ მოინდომებთ, ეს დღე მშვიდად ჩაივლის და სასიამოვნო მოგონებებს დაგიტოვებთ.

რჩევა: შინაგანი დისციპლინა დაგეხმარებათ, რომ ეს დღე მაქსიმალურად პროდუქტიული გახადოთ.

სასწორი

ეს დღე წარმატებული იქნება, თუ ენერგიას სწორად გადაანაწილებთ. საინტერესო წინადადება და ახალი ნაცნობობა მნიშვნელოვან პერსპექტივას გაგიხსნით, თუმცა, პირველ შთაბეჭდილებას ზედმეტად არ უნდა ენდოთ.

რჩევა: ენდეთ ინტუიციას, მაგრამ სანამ მნიშვნელოვან გადაწყვეტილებას მიიღებთ, ფაქტები გადაამოწმეთ.

მორიელი

ეს დღე შესაძლოა რთული აღმოჩნდეს, მაგრამ თუ სიფრთხილით იმოქმედებთ, პრობლემების თავიდან აცილებას შეძლებთ. ხვდებით, რომ ბოლოდროინდელი ხარჯების დასაფარად თქვენი ამჟამინდელი შემოსავალი საკმარისი არ არის და დამატებითი შემოსავალი გჭირდებათ. ეცადეთ, ფინანსურად მოგებიან გარიგებებს, რომლებიც მალე შემოსავალს მოიტანს, მეტი ყურადღება მიაქციოთ. მოსალოდნელია სიტუაცია, რომელიც თქვენს გამჭრიახობას მოითხოვს.

რჩევა: ემოციები აკონტროლეთ და დასკვნების გამოტანას ნუ იჩქარებთ – ეს კონფლიქტების თავიდან არიდებაში დაგეხმარებათ.

მშვილდოსანი

აქტიური და მოულოდნელი მოვლენებით სავსე დღეა. შესანიშნავი დროა ისეთი საკითხების გადაჭრისთვის, რომლებიც სიმამაცეს და გადამწყვეტ ნაბიჯებს საჭიროებს. მთავარია, საკუთარი შესაძლებლობები გადაჭარბებულად არ შეაფასოთ. ამ დღეს საშუალება გექნებათ, დაისვენოთ – ეს ნამდვილად დაიმსახურეთ, ამიტომ თვითგვემა უნდა შეწყვიტოთ.

რჩევა: იყავით გახსნილი ახალი შესაძლებლობებისთვის, მაგრამ სიფრთხილეც არ დაგავიწყდეთ – თქვენი მიმნდობი ბუნება შეიძლება თქვენ წინააღმდეგ შემოტრიალდეს.

თხის რქა

თუ თავად არ გაართულებთ, ეს დღე მშვიდად და ჰარმონიულად ჩაივლის. ხელსაყრელი დროა საქმიანი გადაწყვეტილებების მიღებისა და მომავალი ნაბიჯების დაგეგმვისთვის. საღამოს დიდი ხნის უნახავ მეგობრებთან შეხვედრა და დაუვიწყარი ემოციები გელით. პირად ცხოვრებაში ურთიერთობების გაღრმავებისთვის ცოტა მეტი უნდა იაქტიუროთ.

რჩევა: ეცადეთ შრომა და დასვენება ერთმანეთს შეუთავსოთ – ეს დაგეხმარებათ, რომ ძალები აღიდგინოთ და შრომის ნაყოფიერება შეინარჩუნოთ.

მერწყული

იდეალური დღეა კრეატიული იდეებისა და არასტანდარტული გადაწყვეტილებების ცხოვრებაში განხორციელებისთვის. შესაძლოა, თავში საინტერესო აზრები გეწვიოთ, მაგრამ ყველა იდეის განხორციელება მარტივი არ იქნება. საღამოს გირჩევთ, მთელი ყურადღება საოჯახო საქმეებზე და ყველაზე მნიშვნელოვანი საკითხების მოგვარებაზე გადაიტანოთ.

რჩევა: გირჩევთ, საღამოს სახლი საფუძვლიანად დაასუფთაოთ და უსარგებლო ნივთებისგან გაათავისუფლოთ.

თევზები

ეს დღე მოულოდნელობებით იქნება სავსე, რაც საშუალებას მოგცემთ, ჩვეულ მოვლენებს ახალი თვალით შეხედოთ. შესაძლოა, ახალი იდეებიც გაჩნდეს, მაგრამ მათ განხორციელებას ნუ იჩქარებთ. თუ გსურთ, რომ დაგროვილი საქმეები დროულად დაასრულოთ, ეცადეთ, სამუშაო დრო რაციონალურად გაანაწილოთ.

რჩევა: შეინარჩუნეთ შინაგანი ბალანსი და მნიშვნელოვანი გადაწყვეტილებების მიღებისას ნუ აჩქარდებით.

უკრაინა მზად არის მშვიდობისთვის – სრული სიმართლის დროა – ვოლოდიმირ ზელენსკი

აშშ-მა 30 დღით ცეცხლის სრული შეწყვეტა შემოგვთავაზა, ჩვენ მზად ვართ. ამის შესახებ უკრაინის პრეზიდენტმა, ვოლოდიმირ ზელენსკიმ ვიდეომიმართვაში განაცხადა.

მისი თქმით, აშშ-მა უნდა დაარწმუნოს რუსეთი, რომ იგივე გააკეთოს და თუ რუსეთი დათანხმდება, სიჩუმე ამოქმედდება.

“დღეს საუბარში სწორედ ამერიკული მხარის წინადადება იყო შემდგომ პირველი ნაბიჯის გადადგმა და 30 დღით ცეცხლის სრული შეწყვეტის ცდა, არა მხოლოდ რაკეტებთან, დრონებთან და ბომბებთან მიმართებით, არა მხოლოდ შავ ზღვაში, არამედ ასევე, ფრონტის მთელ ხაზზე. უკრაინა იღებს ამ წინადადებას, დადებითად მიგვაჩნია ის, მზად ვართ ასეთი ნაბიჯი გადავდგათ და აშშ-მა უნდა დაარწმუნოს რუსეთი, რომ ეს გააკეთოს. ანუ ჩვენ ვთანხმდებით და თუ რუსები დათანხმდებიან – მაშინვე სიჩუმე ამოქმედდება”, – განაცხადა ზელენსკიმ.

უკრაინის პრეზიდენტმა აღნიშნა, რომ საუბრის მნიშვნელოვანია ელემენტია აშშ-ის მზაობა განაახლოს უკრაინის სამხედრო დახმარებისა და სადაზვერვო ინფორმაციის მიწოდება.

“უკრაინა მზად არის მშვიდობისთვის. თავისი მზადყოფნა, შეწყვიტონ ან გააგრძელონ ომი, რუსეთში უნდა აჩვენონ. სრული სიმართლის დროა”, – განაცხადა ზელენსკიმ.

ბრალდება წარედგინა პირს, რომელმაც გორში, შურისძიების მოტივით, განსაკუთრებული სისასტიკით, განზრახ მოკლა უმწეო მდგომარეობაში მყოფი პაპა – პროკურატურა

პროკურატურამ ქალაქ გორში მომხდარ განზრახ მკვლელობის ფაქტზე ერთ პირს ბრალდება წარუდგინა. ამის შესახებ ინფორმაციას საქართველოს პროკურატურა ავრცელებს.

უწყების ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ 10 მარტს, ქალაქ გორში, ბრალდებულმა შურისძიების მოტივით, განსაკუთრებული სისასტიკით, განზრახ მოკლა უმწეო მდგომარეობაში მყოფი პაპა.

„სამართალდამცველებმა ბრალდებული 10 მარტს დააკავეს. დაკავებულს ბრალდება საქართველოს სისხლის სამართლის კოდექსის 11 პრიმა – 109-ე მუხლის „ე“, „კ“ და „მ“ ქვეპუნქტებით (განზრახი მკვლელობა ოჯახის წევრის მიმართ, განსაკუთრებული სისასტიკით, დამნაშავისთვის წინასწარი შეცნობით უმწეო მდგომარეობაში მყოფისა) წარედგინა, რაც სასჯელის სახედ და ზომად თექვსმეტიდან ოც წლამდე ან უვადო თავისუფლების აღკვეთას ითვალისწინებს”, – აღნიშნულია უწყების მიერ გავრცელებულ ინფორმაციაში.

პროკურატურამ ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, სასამართლოს უკვე მიმართა.

მათი მოთხოვნაა საარჩევნო კომისია დავაკომპლექტოთ ისე, როგორც ეგენი იტყვიან. რასაკვირველია, ეს რევოლუციური გეგმის ნაწილია – გიორგი ვოლსკი ოპოზიციაზე

საქართველოს პარლამენტის პირველი ვიცესპიკერი გიორგი ვოლსკი სალომე ზურაბიშვილისა და ოპოზიციის წარმომადგენლების შეხვედრას ეხმიანება და აღნიშნავს, რომ მათ სურთ, რომ საარჩევნო კომისია დაკომპლექტდეს ისე, როგორც ისინი იტყვიან, რაც რევოლუციური გეგმის ნაწილია.

„ამბობენ, რომ ჩვენ საერთოდ სახელმწიფოებრიობაზე უარი უნდა ვთქვათ. საარჩევნო კომისია დავაკომპლექტოთ ისე, როგორც ეგენი იტყვიან, „ქართული ოცნება“ საერთოდ გვერდზე უნდა გაწიონ თავისი მთელი რესურსით, მათ და უცხოელებმა უნდა ჩაატარონ არჩევნები მას მერე, რაც მოასუფთავებენ პოლიტიკურ და სამართლებრივ მოედანს. ეს არის მათი მოთხოვნა. რასაკვირველია, ეს რევოლუციური გეგმის ნაწილია“, – განაცხადა ვოლსკიმ.

თვითმმართველობის არჩევნების მიმართ წინასწარ გამოცხადებული ბოიკოტის ფონზე, ამ თემაზე სალაპარაკოდ მოკავშირეები სალომე ზურაბიშვილთან მივიდნენ. საერთო აზრი არც ამ შემთხვევაში აქვთ. სცენარი კარგად ნაცნობია, რომლის ფინალსაც თავად ვერც ამჯერად განსაზღვრავენ.

რუსეთის საოკუპაციო ძალებმა სოფელ ფლავისმანის მიმდებარედ უკანონოდ დააკავეს საქართველოს სამი მოქალაქე, მათგან ერთი გათავისუფლდა – სუს-ი

რუსეთის საოკუპაციო ძალების წარმომადგენლებმა გორის მუნიციპალიტეტის სოფელ ფლავისმანის მიმდებარედ უკანონოდ დააკავეს საქართველოს სამი მოქალაქე. ამის შესახებ ინფორმაციას სუს-ი ავრცელებს.

ამასთან, უწყების განცხადებით, მათგან ერთი 11 მარტს უკვე გათავისუფლდა და ცენტრალური ხელისუფლების მიერ კონტროლირებად ტერიტორიაზე იმყოფება, ხოლო ორი კვლავ უკანონო პატიმრობაში რჩება.

„ინციდენტთან დაკავშირებით ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის ჩართულობით მოქმედი „ცხელი ხაზი“.

ინფორმაცია დაუყოვნებლივ ეცნობა ჟენევის საერთაშორისო დისკუსიების თანათავმჯდომარეებსა და საერთაშორისო პარტნიორებს.

ამოქმედებულია ყველა არსებული მექანიზმი უკანონოდ დაკავებული საქართველოს მოქალაქეების უმოკლეს ვადებში გასათავისუფლებლად.

საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას”, – ნათქვამია ინფორმაციაში.

1234...2,609Page 3 of 2,609
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი