ადრე მოსკოვში დარბოდნენ და ცენტრისგან ითხოვდნენ თავისი კონკურენტების დასჯას, დღეს იმავე ხალხის შთამომავლები ბრიუსელსა და ვაშინგტონში დარბიან, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

პაპუაშვილი გამჭვირვალობის კანონის მიღებასთან დაკავშირებით აშშ-ის, ევროკავშირისა და ევროპის 14 ქვეყნის პარლამენტების საგარეო ურთიერთობების კომიტეტების თავმჯდომარეების ერთობლივ განცხადებას გამოეხმაურა.

„ქართული და ევროპული ღირებულება გვკადრულობს, რომ ყოველთვის ვიყოთ სიმართლის მხარეს და არა განცხადებების, აღქმების, ვეძიოთ ჭეშმარიტება. გადამწყვეტი მნიშვნელობა რომ ჰქონდეს განცხადებებს და არა სიმართლეს, ანტისამთავრობო მიტინგზე ევროპელი მინისტრებისგან ისეთი განცხადებები მოვისმინეთ, რომ მაშინ ამას უნდა ავყვეთ. ჩვენ ხომ ჭეშმარიტება, სიმართლე გვაინტერესებს.

თუკი ვიღაცას აქვს შიში, რომ რეგულირების შემთხვევაში, საზოგადოებისთვის აშკარა გახდება, რომ ფული იხარჯება არაკეთილსინდისიერ საკითხებში, ამ შიშის საფუძველზე არ უნდა მოხდეს ქართველ ხალხზე თავდასხმა, სანქცირების მუქარა, რაც ზოგიერთი პოლიტიკოსისგან გვესმის. რაც შეეხება შანტაჟს, მუქარას, რომელსაც ცდილობს ზოგიერთი პოლიტიკოსი ქვეყნის შიგნით თუ გარეთ, საქართველოს ხელისუფლება მოქმედებს არა სანქციების იმედით თუ შიშით, არამედ ქართველი ხალხის მანდატით. ეს არის ჩვენი განმაპირობებელი, თორემ სანქციებით ხან რუსეთი გვემუქრება და ხან ვინ.

საქართველოს სანქციები დაწესებული ჰქონდა რუსეთისგან და სხვათა შორის, დასავლეთის მხრიდანაც, 2008 წლის ომის შემდეგ საქართველოზე ვრცელდებოდა არაფორმალური სანქცია იარაღის მიყიდვასთან დაკავშირებით. არავინ გვაძლევდა ომგამოვლილ ქვეყანას იარაღს, 2013 წლამდე ვიყავით ფაქტობრივი სანქციის ქვეშ დასავლეთის მხრიდან. წელს რას ვხედავთ, თურმე არსებობენ ქართველები, რომლებიც ისტორიულად ვიცით, რომ ადრე სხვა დედაქალებში დარბოდნენ, სპარსეთში თუ სხვა იმპერიებში, რომელსაც გავლენა ჰქონდა. დარბოდნენ და აბეზღებდნენ კონკურენტებს, ითხოვდნენ, წამოდი, ლაშქარი წამოასხი და დასაჯე ჩემი კონკურენტი, შემდეგ იმავე ხალხის შთამომავლები დარბოდნენ მოსკოვში და იქ ითხოვდნენ ცენტრისგან, რომ დაესაჯათ თავისი კონკურენტი, რათა გზა გათავისუფლდებოდა თანამდებობისკენ. დღეს იმავე ხალხის შთამომავლები დარბიან ბრიუსელსა და ვაშინგტონში, რათა დააბეზღონ კონკურენტები, სთხოვონ, მოდი, დასაჯე, რომ მე გზა გამეხსნას ხელისუფლებისკენ. ასეთ ქართველებთან გვაქვს საქმე.

ჩვენ გვყოლია ასეთი „ენჯეოები“, პოლიტიკოსები, რომლებიც უცხო ქვეყანაში დადიან და საკუთარი ქვეყნის წინააღმდეგ ჩარევას ითხოვენ, იქნება ეს სანქცია თუ შემდეგ, შეიძლება, ჯარიც მოითხოვონ, რათა რამენაირად ჩარიონ სხვები. თუკი რამე არის ღალატი, თითოეული ეს ადამიანი სჩადის ღალატს, ასეთმა ხალხმა მოიყვანა გუშინ უცხო ქვეყნის მინისტრები, დააყენა სცენაზე და დაუორგანიზა. ტაშს უკრავდნენ და აზიარებენ, რა კარგია, უცხო ქვეყნის მინისტრი ჩამოდის და ხალხის არჩეული ხელისუფლების საწინააღმდეგო მიტინგში იღებს მონაწილეობასო. თუ რამე არის ქვეყნის ღალატი, ეს არის ღალატის მთელი ანატომია, რომელსაც ჩვენ ვხედავთ“, – განაცხადა შალვა პაპუაშვილმა.

დღეს არის პანიკა, ლარის კურსი არის უმართავი – ამ აჟიოტაჟის ჩაცხრობის პირველი ნაბიჯი არის ეროვნული ბანკის მხრიდან ადეკვატური ქმედებები, – ამის შესახებ “ევროოპტიმისტების” დეპუტატმა, რომან გოცირიძემ განაცხადა.

ოპოზიციონერი დეპუტატი არსებულ ვითარებას “უცხოური გავლენის გამჭვირვალობის შესახებ” კანონს უკავშირებს და აცხადებს, რომ ამ კანონის ძალაში შესვლა საქართველოს ეკონომიკას დაანგრევს.

მან ეროვნულ ბანკს მოუწოდა, სასწრაფოდ განახორციელოს ინტერვენცია.

“ეროვნული ბანკი აგვიანებს თავისი არაპროფესიონალიზმით და იმ შექმნილი ვითარებიდან გამომდინარე, რაც ჩვენ ძალიან კარგად ვიცით. დღეს ეროვნულმა ბანკმა მნიშვნელოვანი ინტერვენციები უნდა განახორციელოს, ბევრი – 50 მლნ, 60 მლნ, რათა დააწყნაროს სავალუტო ბაზარი. ეროვნული ბანკი ასევე არის დამნაშავე შექმნილ ვითარებაში, ვინაიდან დახარბდა უცხოური ვალუტის შესყიდვას. მას რომ ზომიერად ეფიქრა რეზერვების შევსებაზე და ასევე, ლარის კურსის გამყარებაზე და ბუნებრივი მსვლელობისთვის ხელი არ შეეშალა, დღეს ვითარება აბსოლუტურად განსხვავებული იქნებოდა. ამიტომ ამ აჟიოტაჟის ჩაცხრობის პირველი ნაბიჯი არის ეროვნული ბანკის მხრიდან ადეკვატური ქმედებები. რაც შეეხება გრძელვადიან და საშუალო ვადიან პროგნოზებს – “აგენტების კანონის” ძალაში შესვლა დაანგრევს საქართველოს ეკონომიკას,” – განაცხადა გოცირიძემ.

ოპოზიციას არანაირი ხედვა არ აქვს იმის, რომ საპარლამენტო არჩევნებში რაიმე რეალურ წარმატებას მიაღწიოს, – ამის შესახებ საპარლამენტო უმრავლესობის წევრმა, ირაკლი ქადაგიშვილმა საქართველოს პირველ არხს განუცხადა.

ქადაგიშვილის თქმით, ოპოზიციის გეგმაა, ქვეყანაში მაქსიმალურად დესტაბილიზაცია მოაწყონ და ამის ფონზე, ამღვრეულ წყალში იქნებ თევზი დაიჭირონ.

„რა არის სალომე ზურაბიშვილის როლი? დესტაბილიზაციის მაქსიმალური წახალისება და ხელშეწყობა. ოპოზიციის გეგმა იმას ეფუძნება, როგორც გონჩარენკომ მოუწოდა – ან მაიდანი, ან არჩევნებზე არაფერი გამოგივათო“, – განაცხადა ირაკლი ქადაგიშვილმა.