პრეზიდენტმა „ქართულ ოცნებას“ კარგი შანსი მისცა, ხომ იძახის კობახიძე დიალოგიო, კარგი შანსი მისცა, რომ ამ კვრაში ჩაერთოს ამ პროცესში, თუ ჩაერთვება, ეს მისი გადასაწყვეტია, არ ჩაერთვება – ჩვენი მხრიდან ნაბიჯები უნდა იყოს ხისტი, – ამის შესახებ „ერთიანობა ნაციონალური მოძრაობის“ წევრმა, გიორგი ვაშაძემ ორბელიანების სასახლეში განაცხადა, სადაც პრეზიდენტ სალომე ზურაბიშვილთან შეხვედრა მიმდინარეობს.

მისი თქმით, სახეზეა საკონსტიტუციო გადატრიალება, კანონგარეშე მოქმედი თვითმარქვია ხუნტაა, რომელიც სავარძლებშია მოკალათებული.

„მზად ვარ, ყველა გადაწყვეტილებას, რასაც ხალხი მხარს დაუჭერს, ვიტვირთო პასუხისმგებლობა ამ გადაწყვეტილებების შესრულებაზე. ყველა გადაწყვეტილება, რომელიც იქნება საერთო ფორმატში მიღებული, მზად ვარ, გავინაწილო და ავიღო პასუხისმგებლობა ამ გადაწყვეტილებების შესრულებაზე. ერთადერთი ლეგიტიმური ინსტიტუცია არის სალომე ზურაბიშვილი, როგორც საქართველოს პრეზიდენტი. მზად ვარ, ყველა ფორმატში, ყველა გადაწყვეტილება, რომელიც იქნება აქ მიღებული, მის რეალიზებაზე ვიტვირთო პასუხისმგებლობა ხალხის წინაშე“, – განაცხადა გიორგი ვაშაძემ.

გიორგი ვაშაძე აცხადებს, რომ მხარს უჭერს და უფრო იხრება ისეთი გადაწყვეტილებისკენ, რომელიც უფრო ხისტი იქნება.

„თუნდაც იყოს არჩევნების დანიშვნა, პარლამენტის დათხოვნა, თუნდაც საერთო პოზიციები იქნება, რაც არ უნდა იყოს, რაც შეიძლება მკვეთრი გადაწყვეტილებები უნდა მივიღოთ. მაგრამ საერთო კოორდინაციას აქვს გადამწყვეტი მნიშვნელობა, რასაც მივიღებთ გუნდურად ყველანი ერთად, უპირობოდ შევასრულებ. საზოგადოება თუ რამეს გვთხოვს, არის ერთად დგომა, ერთიანობა, ხალხთან ერთად კონკრეტული ნაბიჯების გადადგმა და გადაწყვეტილებების აღსრულება. პრეზიდენტმა „ქართულ ოცნებას“ კარგი შანსი მისცა, ხომ გაიძახიან დიალოგი, დიალოგი, დიალოგი, ხომ იძახის კობახიძე. კარგი შანსი მისცა, რომ ამ კვრაში ჩაერთოს ამ პროცესში, ჩაერთვება? ეს მისი გადასაწყვეტია, არ ჩაერთვება – ჩვენი მხრიდან ნაბიჯები უნდა იყოს ხისტი“,- განაცხადა გიორგი ვაშაძემ.

პროტესტი, პროტესტი და პროტესტი, ეს არის ერთადერთი ბერკეტი, რომელიც უნდა იყოს გამოყენებული და რომელიც არის ყველაზე ეფექტური [შედეგის მისაღწევად], – ამის შესახებ „ძლიერი საქართველოს“ ერთ-ერთმა ლიდერმა, ბადრი ჯაფარიძემ ოპოზიციისა და პრეზიდენტის შეხვედრის დაწყვებამდე განაცხადა.

ბადრი ჯაფარიძის თქმით, მოქალაქეების პროტესტის გარდა დადებითი შედეგი მოიტანა პოლიტიკური პარტიების ძალისხმევამ, რომ სრულ იზოლაციაში მოქცეულიყო „ქართული ოცნება“.

„ახლა გვექნება შეხვედრა პრეზიდენტთან, შეიქმნა მასთან კოალიციური საბჭო, რომელიც იმსჯელებს ყოველდღიურ გეგმებზე. პოლიტიკური აქტორები უკვე მნიშვნელოვან ნაბიჯებს დგამენ, სრულიად იზოლირებულია ეს ძალა, მარტოა ე.წ. პარლამენტში, მარტოა გარე სამყაროსთვის დარჩენილი. ამ იზოლაციაში ძალიან დიდი როლი შეასრულა სწორედ პოლიტიკური პარტიების ძალისხმევამ. ამას ჩვენ გავაგრძელებთ და მინდა ვთქვა, რომ დადებითი შედეგი მოიტანა ჩვენი თანამოქალაქეების ყოველდღიურმა ბრძოლამ და მშვიდობიანმა პროტესტმა“, – განაცხადა ბადრი ჯაფარიძემ.

ოპოზიციის იდეებზე კომენტარების კეთებაც კი აღარ შეიძლება, იმდენად კომიკური და აბსურდულია, – წერს სოციალურ ქსელში პარტია „ხალხის ძალის“ წევრი თამარ ჩიბურდანიძე.

მისივე თქმით, ოპოზიციას პოლიტიკური ბალადის შექმნა სურდა, თუმცა პოლიტიკური სატირა შექმნეს.

„ოპოზიციის იდეებზე კომენტარების კეთებაც კი აღარ შეიძლება, იმდენად კომიკური და აბსურდულია. რა დააშავა ამ ქვეყანამ ასეთი, რომ ნორმალურ ოპოზიციას ვერ ეღირსა? რადგან ამ რეალობის წინაშე ვართ, მივყვეთ მათ გეგმებს.

შიდადაპირისპირების, კრიტიკის და ურთიერთბრალდებების ფონზე ჯერ კიდევ ახერხებენ ფასადურ ერთობას, რადგან ერთი პატრონი ჰყავთ უცხოეთიდან და ერთი მიზნისთვის იმართებიან – სახელმწიფო გადატრიალებისთვის.

მართალია, ჯერჯერობით არც გადატრიალება ჩანს და არც რევოლუცია, თუმცა, გადაუტრიალებელ სახელმწიფოში უკვე დღე-დღეზე ყოფილმა პრეზიდენტმა ოპოზიციური „საბჭო” შემოგვთავაზა, რომელმაც თურმე უნდა მართოს ქვეყანა, ანუ, საქართველოში ორხელისუფლებიანობისთვის ემზადებიან, თუმცა, არ სცოდნიათ რა არის ორხელისუფლებიანობა.

ეს სცენარი დიდი ოქტომბრის სოციალისტური რევოლუციიდან დაწყებული, ბევრგან გვაქვს ნანახი და ყველგან ლიბერალ-სოციალისტების თაოსნობით, მაგრამ ის თუ იცის ჩვენმა ოპოზიციამ, რომ ჯერ რევოლუცია უნდა მოაწყონ ნაწილობრივ მაინც, წაართვან რამდენიმე ინსტიტუტი, შეიტანონ განხეთქილება ძალოვნებში და ხალხის უდიდესი ნაწილი გადაიბირონ?

საინტერესოა, ზურაბიშვილი საკუთარი „საბჭოს” გადაწყვეტილებებს რომელ ბეჭედს დაუსვამს და შემდეგ ვინ აღასრულებს მის ბრძანებებს, ან რა ფინანსებით? თუკი ბრძანება ვერ გაეცი და მას აღსრულება არ მოჰყვა გადაბირებულ ინსტიტუტებში მაინც, მაშინ ეს ორხელისუფლებიანობა კი არა, მხოლოდ საკუთარი თავის ხელისუფლებიანობაა, რაც ისედაც აქვთ. რაც შეეხება უცხოურ მხარდაჭერას, მათი მცდელობაც ფუჭია, რადგან ლეგიტიმაციას ხალხი აძლევს ხელისუფლებას და არა უცხოეთი.

ოპოზიციას პოლიტიკური ბალადა უნდოდა შეექმნა ამ მოვლენებით და პოლიტიკური სატირა გამოუვიდათ. უმჯობესია დაფიქრდნენ ამაზე, სანამ ეს სატირაც მათსავე ტრაგიზმში გადაზრდიათ,“ – წერს თამარ ჩიბურდანიძე.

მაშინ როდესაც ხდებოდა აგრესიულად განწყობილი 200-300 აქციის მონაწილის მხრიდან პოლიციელებზე თავდასხმა ე.წ. კოლექტიური „ნაცმოძრაობის“ წარმომადგენლების მხრიდან, არ არსებობს ფაქტი, რომ პოლიციას დაეწყო მოქმედება მშვიდობიანი აქციის დროს, – განაცხადა „ხალხის ძალის“ აღმასრულებელმა მდივანმა, გურამ მაჭარაშვილმა Human Rights Watch-ის ანგარიშის შეფასებისას.

„მინიმუმ ოთხი-ხუთი ტელევიზია პირდაპირ ეთერში აშუქებდა, თუ როგორ ხდებოდა აგრესიულად განწყობილი 200-300 აქციის მონაწილის მხრიდან პოლიციელებზე თავდასხმა, პიროტექნიკის სროლა, „მოლოტოვის კოქტეილების“ სროლა, შტურმი პარლამენტზე და ეს ყველა შემთხვევაში დამწყები რადიკალური ოპოზიციის ე.წ. კოლექტიური „ნაცმოძრაობის“ წარმომადგენლები იყვნენ. ფაქტი არ არსებობს, რომ პოლიციას დაეწყო ზოგადად მოქმედება, თუკი არის მშვიდობიანი აქცია და როდესაც ძალადობრივი აქცია იწყებს თავდასხმას პოლიციაზე, ყველა ქვეყანაში, რა თქმა უნდა, რეაგირება უნდა მოხდეს. კიდევ ერთხელ ვიმეორებ, ეს არის იმ პროექტის შემადგენელი ნაწილი, რომელიც დაიწერა სწორედ მაშინ, როდესაც სქართველომ უარი ვუთხარით მეორე ფრონტის გახსნაზე უცხოურ ძალას“, – განაცხადა მაჭარაშვილმა.

დედაქალაქის მერის, კახა კალაძის განცხადებით, მომავალი წლის ბიუჯეტი, რომელიც საკრებულომ უკვე დაამტკიცა, უპრეცედენტოდ გაზრდილია.

როგორც მან თბილისის მუნიციპალიტეტის მთავრობის სხდომაზე აღნიშნა, ბიუჯეტის მოცულობა 2 მილიარდ 455 მლნ ლარს შეადგენს.

„გუშინ საკრებულოში გვქონდა შეკრება, სადაც თბილისის მოსახლეობას ჩავაბარეთ ანგარიში, თუ რა გაკეთდა 2024 წელს, რა პროექტები განვახორციელეთ. ეს წელი შთამბეჭდავი იყო, ბევრი მნიშვნელოვანი პროექტი გავაკეთეთ. ვხედავთ და ვაცნობიერებთ იმ გამოწვევებს, რაც ჯერ კიდევ რჩება ქალაქში და მაქსიმალურად ვცდილობთ, შესაბამისად ვუპასუხოთ მათ. მზად ვართ, ღირსეულად ვემსახუროთ თბილისს და ყველა პრობლემა ეტაპობრივად დავძლიოთ. მინდა, საკრებულოს თითოეულ წევრს თანამშრომლობისთვის მადლობა გადავუხადო. გუშინ დამტკიცდა დედაქალაქის 2025 წლის ბიუჯეტი, რომლის მოცულობა 2 მილიარდ 455 მლნ ლარია. 2017 წელს, როდესაც დედაქალაქის მოსახლეობის უმრავლესობამ მერად ამირჩია, 2018 წლის ბიუჯეტი, დაახლოებით, 800 მილიონ ლარზე მეტი იყო. 2025 წლის ბიუჯეტიც მიმართულია პრიორიტეტული საკითხების გადაჭრაზე, რაც ქალაქს კიდევ უფრო განავითარებს, დაამშვენებს და კომფორტულს გახდის. მომავალ წელსაც განსაკუთრებული ყურადღება ინფრასტრუქტურულ პროექტებს, ჯანდაცვისა და სოციალურ პროგრამებს დაეთმობა“, – აღნიშნა თბილისის მერმა.

კახა კალაძემ მხარდაჭერისთვის მადლობა გადაუხადა პრემიერ-მინისტრ ირაკლი კობახიძეს, ცენტრალურ ხელისუფლებასა და ფინანსთა სამინისტროს.

„მინდა, კიდევ ერთხელ გავუსვა ხაზი ცენტრალური ხელისუფლების მხარდაჭერას, რაც გვაძლევდა და გვაძლევს საშუალებას, ყოველწლიურად მეტი გაკეთდეს ამ ქალაქის თითოეული მცხოვრებისთვის. მადლობას ვუხდი ამ მხარდაჭერისთვის საქართველოს პრემიერ-მინისტრ ირაკლი კობახიძეს, მთავრობას, ფინანსთა სამინისტროს. 2025 წელი იქნება კიდევ უფრო მეტი მწვანე სივრცის შექმნის, მეტი მნიშვნელოვანი ინფრასტრუქტურული პროექტების განხორციელების, მეტად კეთილმოწყობილი სივრცეებისა და ყველა იმ ადამიანის თანადგომის წელი, რომელსაც განსაკუთრებით დასჭირდება მუნიციპალიტეტის მხარდაჭერა.

მინდა, წარმატება ვუსურვო ჩვენს ქალაქს, თბილისის მთავრობას და მუნიციპალიტეტის თითოეულ თანამშრომელს  ამ საქმიანობაში. შეიძლება ყოველდღიურად მე უფრო მეტად ვჩანვარ საზოგადოებაში, მაგრამ ჩემს უკან 32 000-მდე ადამიანი დგას, ვინც დედაქალაქს და მის მცხოვრებლებს ერთგულად ემსახურება“, – განაცხადა კახა კალაძემ.