ხაბეიშვილის სახელი გავიდა, გასცდა საქართველოს ფარგლებს, ეს იყო მისი მიზანი, ის ნიშნა დაეკავებინა, რომელიც მისი აზრით, ქვეყანაში იყო დაუკავებელი, როდესაც რადიკალიზაცია, ექსტრემიზმი არ იყო სათანადოდ განვითარებული, ლიდერი არ ჰყავდა და ჩაუდგა ამ მიმართულებას სათავეში, – ამის შესახებ საქართველოს პარლამენტის თავმჯდომარის პირველმა მოადგილემ, გია ვოლსკიმ უკანონო ქმედების ჩასადენად მოხელისათვის ქრთამის დაპირებისა და სახელმწიფო ხელისუფლების დამხობისაკენ საქვეყნოდ მოწოდების ფაქტზე „ნაციონალური მოძრაობის“ პოლიტსაბჭოს თავმჯდომარეზე, ბრალდებულ ლევან ხაბეიშვილზე საუბრისას განაცხადა.

მისივე თქმით, კონსპირაციული შეთქმულებაა საქართველოს წინააღმდეგ, სადაც „ხაბეიშვილის ნაირი ტიპები მონაწილეობენ“.

„სიტყვა – „მშვიდობიანი“ შემდეგ შემოიტანა თავის ტერმინოლოგიაში. ხაბეიშვილზე ალაპარაკდა საზოგადოება, პოლიტიკური სივრცე, ხაბეიშვილის სახელი გავიდა, გასცდა საქართველოს ფარგლებს. ეს იყო მისი მიზანი, ის ნიშა დაეკავებინა, რომელიც მისი აზრით, ქვეყანაში დაუკავებელი იყო, როდესაც რადიკალიზაცია, ექსტრემიზმი არ იყო სათანადოდ განვითარებული, ლიდერი არ ჰყავდა და ჩაუდგა ამ მიმართულებას სათავეში.

ეს ჩვეულებრივი მოვლენა არ არის, მაშინ, როდესაც ამას გარკვეული ქმედებები ახლავს და მოწოდებები, რომელიც აკრძალულია კანონით და კონსტიტუციის მოთხოვნების.

ეს არ არის მხოლოდ პერფორმანსი ან მოწოდება, კონკრეტულ ქმედებაში აისახება. ადვოკატების პოზიცია, რომ ეს ქრთამის მიცემის თუ ფულადი ანაზღაურების მიცემის დაპირება ეხება არჩევნების ან ხელისუფლების შეცვლის მომავალ პერიოდს, სადაც გაიცემა უწყისის მიხედვით მოღალატეებისთვის რაღაც სასაჩუქრე თანხა, აზრს მოკლებულია.

შეთავაზების გარდა, არსებობს სხვა მუხლი, რომელიც უკავშირდება მოწოდებებს და ქმედებებს, რომელიც მიმართულია იქით, რომ ქვეყანა შეუქცევად პროცესში წავიდეს, ტურბულენტურ ზონაში შევიდეს, როდესაც ნგრევაა გარანტირებული ქვეყნისთვის. ამას თანამოაზრეებიც გამოუჩნდნენ, სისხლისღვრაზე თავი არ უნდა შევიკავოთო, პირდაპირ ამბობენ. სამწუხაროა, რომ გამოდიან მაღალჩინოსნები ზოგიერთი ქვეყნის ამ მიმართულებას უჭერენ მხარს. კონსპირაციული შეთქმულება საქართველოს წინააღმდეგ, სადაც ხაბეიშვილისნაირი ტიპები მონაწილეობენ“,- აღნიშნა ვოლსკიმ

ამასთან ის, თავდაცვის ყოფილი მინისტრის, ჯუანშერ ბურჭულაძის დაკავებასაც გამოეხმაურა.

როგორც ვოლსკი აღნიშნავს, „რასაც მოვუსმინეთ ადვოკატებისგან, სერიოზულ დაფიქრებას განაპირობებს ყველასთვის, ვინც გადაწყვიტა, რომ სახელმწიფოს ბიუჯეტზე შეიქმნას კეთილდღეობა“.

„წინასწარ ნურაფერს დავამტკიცებთ. იმედი გვქონდეს, იქნებ რაღაც შეცდომაა დაშვებული. სამწუხაროდ, ეს შეცდომა არ ჩანს. ბურჭულაძე ჩვენი მეგობარი, გუნდის წევრია, უნდა ვიცოდეთ, რომ დანდობა არ იქნება, თუ კორუფციასთან გვაქვს საქმე. საქართველო მოწინავე პოზიციას იკავებს კორუფციასთან ბრძოლის მიმართულებით, მალე კიდევ დავინახავთ, რომ წინ ვართ, ეს არ უნდა მოხდეს ისეთი ადამიანები ხარჯზე, რომლისგანაც ასეთ ღალატს არ ველოდებით. თუ სადმე არსებობს კორუფცია, ამას ცხელი შანთით უნდა ამოშანთვა“, – აღნიშნა ვოლსკიმ.

გულწრფელად ვამბობ, მესმის ეუთო/ოდირ-ის გადაწყვეტილების, ეშინიათ, რომ კიდევ ბულინგის, ზეწოლის ქვეშ არ მოექცნენ, – ამის შესახებ თბილისის მერმა, კახა კალაძემ კითხვაზე პასუხად განაცხადა.

კალაძეს კითხვა დაუსვეს: „ეუთო/ოდირ-მა საქართველოს ხელისუფლებას არჩევნებში დაკვირვებაზე დროის სიმცირის გამო უთხრა უარი, თუმცა ცნობილი ხდება, რომ მისია მიემგზავრება ჩეხეთში არჩევნებზე დასაკვირვებლად. ოდირ-მა ჩეხებისგან მიწვევა 2 სექტემბერს მიიღო, არჩევნები კი 3 ოქტომბერს იმართება. როგორ შეფასებას გააკეთებთ ამასთან დაკავშირებით?“

კალაძის შეფასებით, ეუთო/ოდირ-ის მხრიდან მისიის გამოგზავნაზე უარის თქმის მიზეზად არასაკმარისი დროის დასახელება აბსურდულია.

„ძალიან დიდი აბსურდი, ჩვეულებრივი სისულელე იყო, რა განმარტებაც მოვისმინეთ. თქვენ კარგი მაგალითი მოიყვანეთ, 2008 წელს, ყველას გვახსოვს, უმოკლეს დროში მოახდინეს რეაგირება, ორგანიზება და ჩამოვიდნენ. გულწრფელად ვამბობ, მათიც მესმის, თავიდანვე ვიყავი დარწმუნებული, რომ არ ჩამოვიდოდნენ. რამდენიმე თვის წინ, საპარლამენტო არჩევნებისას, სადაც ჩვენ გავიმარჯვეთ, გამოაქვეყნეს დასკვნა არჩევნებთან დაკავშირებით, რომ ყველა პოლიტიკურ პარტიას ჰქონდა შესაძლებლობა, თავისუფალ გარემოში ჩაეტარებინა საარჩევნო კამპანია, ქართველ ხალხს ჰქონდა ნება და შესაძლებლობა, გაეკეთებინა არჩევანი. ყველას გვახსოვს, როგორ დაესხნენ თავს, როგორ გადაუარეს და აბულინგებდნენ არა მხოლოდ ქვეყნის შიგნით, ქვეყნის გარეთაც. გახსოვთ, ეუთო/ოდირ-ის დასკვნასთან დაკავშირებით რა განცხადებებიც კეთდებოდა ევროპარლამენტში სხვადასხვა მაღალი თანამდებობის პირის, სხვადასხვა ქვეყნის მაღალი რანგის პირების მხრიდან. ფეხქვეშ გათელეს, გადაუარეს ამ ორგანიზაციას. შესაბამისად, მათ სურვილი არ აქვთ, შიში აქვთ, ეშინიათ, რომ კიდევ იმ ბულინგის, ზეწოლის ქვეშ არ მოექცნენ“, – აღნიშნა კახა კალაძემ.

საქართველოს პრემიერ-მინისტრმა, ირაკლი კობახიძემ  ხელისუფლების მიერ 4 ოქტომბრის არჩევნებზე ეუთო/ოდირ-ის მოწვევის წერილით მიმართვის შესახებ განცხადება 6 სექტემბერს გააკეთა.

ეუთო-ს დემოკრატიული ინსტიტუტებისა და ადამიანის უფლებათა ოფისმა 9 სექტემბერს განცხადება გაავრცელა, რომელშიც ნათქვამია, რომ 4 ოქტომბრის არჩევნებზე მისიის განთავსების შესაძლებლობა არ ექნებათ, თუმცა მანდატის ფარგლებში გააგრძელებენ მოვლენების მონიტორინგს.

პირველი შემთხვევა არ არის, როცა ლევან ხაბეიშვილი აკეთებდა მოწოდებებს სახელმწიფო დამხობასთან დაკავშირებით. ცხადია, ეს მიზანმიმართული ქმედებები იყო, საზოგადოებისთვის რომ მიეჩვიათ აღნიშნულ თემაზე საუბარი, – ასე გამოეხმაურა კახა კალაძე მედიასთან ლევან ხაბეიშვილის დაკავებას.

მისივე განმარტებით, ყველა მსგავს ფაქტს კანონის შესაბამისი რეაგირება მოჰყვება.

„დამხობა, გადატრიალება, ვიღაცის დაწვა – ეს ყველაფერი კანონით ისჯება. ვინმეს თუ ჰგონია, რომ ამ ტიპის ფაქტებს რეაგირება არ მოჰყვება, ძალიან ცდება. ბევრ რამეზე გვაქვს ინფორმაცია, გვაქვს კონკრეტული ფაქტები. დაველოდოთ, არცერთი ამ ტიპის დანაშაული არ დარჩება რეაგირების გარეშე. ეს ყველამ უნდა გაიგოს, როგორც ქვეყნის შიგნით აგენტურამ, ისე ქვეყნის გარეთ, რომლებიც არ ისვენებენ და ცდილობენ, საქართველოს წინააღმდეგ კონკრეტული ნაბიჯები გადადგან”, – განაცხადა კახა კალაძემ.

მისივე თქმით, ლევან ხაბეიშვილის განცხადებებში არსებული კანონდარღვევის დანახვა მარტივია და არ სჭირდება იურიდიული განათლება.

„რაც შეეხება მის სავარაუდო დანაშაულს, აშკარა და ნათელია ყველაფერი – პირდაპირ ეთერში მოუწოდებდა დანაშაულისკენ. დაველოდოთ გამოძიების დასრულებას. პოლიტიკური განცხადება არაფერ შუაშია, პირდაპირ ქრთამი შესთავაზა პოლიციელებს, თუ ისინი უკანონობას ჩაიდენდნენ. არქივში გექნებათ, მოუსმინეთ პირდაპირ ეთერში მის გამოსვლებს. ინგა გრიგოლიამ, ჟურნალისტმა და არა იურისტმა, უთხრა, დაგიჭერენო, ისიც მიხვდა, რომ დანაშაულს ჩადიოდა“, – აღნიშნა კახა კალაძემ.

თბილისის მერი აცხადებს, რომ თავდაცვის ყოფილი მინისტრის, ჯუანშერ ბურჭულაძის დაკავების ფაქტი ცუდია, თუმცა კორუფციასთან ბრძოლა მმართველი გუნდისთვის პრინციპულად მნიშვნელოვანია.

ამის შესახებ კახა კალაძემ შესაბამისი შეკითხვის პასუხად განაცხადა.

„კორუფციასთან ბრძოლა და პრევენციული ღონისძიებების გატარება პრინციპულად მნიშვნელოვანია. რაც შეეხება ბურჭულაძის დაკავებას, რა თქმა უნდა, არ არის სასიამოვნო არც ჩემთვის, არც ჩემი თანაგუნდელებისთვის. მძიმე ფაქტია, როდესაც შენს თანაგუნდელს აკავებენ მაშინ, როდესაც ქვეყანას დანის პირზე სიარული მოუწია. თავად პარტიის საპატიო თავმჯდომარემ ყველაფერი გადადო და იცით, როგორ ებრძვის იმ ბოროტებას, რომელიც ებრძვის საქართველოს, ჩვენს სამშობლოს. ამ პირობებში და ვითარებაში, როდესაც მსგავსი ფაქტები ხდება, ძალიან ცუდია“, – განაცხადა კახა კალაძემ.

პროკურატურამ თავდაცვის ყოფილ მინისტრს, ჯუანშერ ბურჭულაძეს სამსახურებრივი უფლებამოსილების ბოროტად გამოყენებისა და უკანონო შემოსავლის ლეგალიზაციის ფაქტებზე ბრალდება წარუდგინა.