Home Blog Page 3

მიხეილ ყაველაშვილი, დელეგაციასთან ერთად, რომში იმყოფება, სადაც პაპ ფრანცისკეს დაკრძალვის ცერემონიას დაესწრება

საქართველოს პრეზიდენტის ადმინისტრაციის ცნობით, პრეზიდენტი მიხეილ ყაველაშვილი, დელეგაციასთან ერთად, რომში იმყოფება, სადაც პაპ ფრანცისკეს დაკრძალვის ცერემონიას დაესწრება.

საქართველოს პრეზიდენტთან ერთად, დელეგაციაში იმყოფებიან საქართველოს საგარეო საქმეთა მინისტრი მაკა ბოჭორიშვილი, პრეზიდენტის ადმინისტრაციის უფროსი ქეთევან კვინიკაძე, ზუგდიდისა და ცაიშის ეპარქიის მმართველი, საქართველოს საპატრიარქოს საგარეო ურთიერთობების განყოფილების თავმჯდომარე, მიტროპოლიტი გერასიმე და თბილისის სასულიერო აკადემიისა და სემინარიის რექტორი, სიონის საკათედრო ტაძრის წინამძღვრის მოადგილე, პროტოპრესვიტერი გიორგი ზვიადაძე.

„თეთრ სახლში გამართული შეხვედრა განსაკუთრებულად და გამორჩეულად მნიშვნელოვანი, მრავლისმტყველი იყო ”- ლევან დავითაშვილი

ამერიკის შეერთებულ შტატებში ვიზიტის ფარგლებში საქართველოს პირველმა ვიცე-პრემიერმა შეხვედრა თეთრ სახლში, ეროვნული უსაფრთხოების საბჭოში გამართა, სადაც აშშ – ის პრეზიდენტის სპეციალურ ასისტენტსა და უფროს დირექტორს ეროვნული უშიშროების საბჭოში ევროპასთან ურთიერთობის საკითხებში ენდრიუ პიკს შეხვდა. 

შეხვედრაში ასევე მონაწილეობდა მინისტრის მოადგილე გენადი არველაძე.  

„თეთრ სახლში გამართული შეხვედრა განსაკუთრებულად და გამორჩეულად მნიშვნელოვანი, მრავლისმტყველი იყო აშშ – ში ვიზიტის ფარგლებში. ძალიან მნიშვნელოვანი იყო ახალ ადმინისტრაციასთან იმ პრიორიტეტებზე საუბარი, რომელიც „ქართული ოცნების” ხელისუფლებას გააჩნია და რომელიც სრულადაა თანხვედრაში პრეზიდენტ ტრამპის ხედვებთან და ვფიქრობ, გამომდინარე იქიდან, რომ არსებობს ძალიან მჭიდრო თანხვედრა პოზიციებზე, თანამშრომლობის პერსპექტივები არის ძალიან ბევრი. ჩვენ ვისაუბრეთ შესაძლებლობებზე, რომელიც ახალი ადმინისტრაციის პირობებში ჩვენ ორ ქვეყანას შეიძლება ჰქონდეს,” – განაცხადა პირველმა ვიცე-პრემიერმა შეხვედრის დასრულების შემდეგ. 

როგორც ლევან დავითაშვილმა აღნიშნა, სამწუხაროა, რომ წინა ადმინისტრაციის დროს ორ ქვეყანას შორის სტრატეგიული პარტნიორობის შეთანხმება ფორმალურად შეჩერდა. „არსებობს ძალიან მყარი პოზიცია ახალი ადმინისტრაციის ხელმძღვანელობაში, რომ ეს სტრატეგიული თანამშრომლობა არა თუ გაგრძელდეს, არამედ კიდევ უფრო გაღრმავდეს და ხარისხობრივად და თვისობრივად ახალ ეტაპზე გადავიდეს, რაც პრაქტიკულად ორივე ქვეყნისთვის ხელსაყრელი იქნება,” – აღნიშნა პირველმა ვიცე-პრემიერმა.    

ვიზიტის ფარგლებში, პირველმა ვიცე-პრემიერმა შეხვედრები გამართა აშშ – ის სახელმწიფო დეპარტამენტში, კომერციისა და სახაზინო დეპარტამენტებსა და სავაჭრო წარმომადგენლის ოფისში, აგრეთვე საერთაშორისო სავალუტო ფონდისა და მსოფლიო ბანკის ტოპ-მენეჯმენტის წარმომადგენლებთან.

,,მოსკოვი განიხილავს სერიოზულ წინადადებებს უკრაინაში სიტუაციის მოგვარების შესახებ”- სერგეი ლავროვი

მოსკოვი განიხილავს სერიოზულ წინადადებებს უკრაინაში სიტუაციის მოგვარების შესახებ, მაგრამ არ ამჟღავნებს დეტალებს, ვიდრე მოლაპარაკებები არ დასრულდება, – ამის შესახებ რუსეთის საგარეო საქმეთა მინისტრმა, სერგეი ლავროვმა ამერიკულ ტელეკომპანია CBS-თან ინტერვიუში განაცხადა.

„ჩვენ სერიოზული ადამიანები ვართ და განვიხილავთ სერიოზულ წინადადებებს. ჩვენ ვაყენებთ სერიოზულ წინადადებებს. ეს არის პროცესი, რომლის შესახებაც არ უნდა გავრცელდეს ინფორმაცია, ვიდრე იგი არ დასრულდება”, – აღნიშნა ლავროვმა.

კითხვაზე, ნიშნავს თუ არა ეს იმას, რომ შეთანხმებას არ უნდა ველოდოთ უახლოეს პერიოდში, რუსეთის საგარეო საქმეთა მინისტრმა აღნიშნა, რომ „ეს არ უთქვამს“.

„მოლაპარაკებები გრძელდება, და ვიდრე ეს არ დასრულდება, ჩვენ არ გავამჟღავნებთ მათ შინაარსს“, – აღნიშნა მან.

როგორი ამინდი იქნება 26 აპრილს საქართველოში – პროგნოზი ქალაქების მიხედვით

26 მარტს საქართველოს უმეტეს ქალაქში მოღრუბლული ამინდია მსალოდნელი.

ამინდის პროგნოზი ქალაქების მიხედვით:

გაგრა +16 – წვიმა 

სოხუმი +19 – წვიმა  

ზუგდიდი +22 – უმეტესად ღრუბლული

მესტია +11 – წვიმა 

ფოთი +17 – უმეტესად ღრუბლული

ბათუმი +17 – უმეტესად ღრუბლული

ოზურგეთი +21 – უმეტესად ღრუბლული

ქუთაისი +23 – უმეტესად ღრუბლული

ამბროლაური +21 – უმეტესად ღრუბლული 

ახალციხე +17 – უმეტესად მზიანი 

ბორჯომი +17 – უმეტესად მზიანი 

ბაკურიანი +15 – წვიმა 

გორი +23 – უმეტესად ღრუბლული 

ცხინვალი +21 – უმეტესად მზიანი 

სტეფანწმინდა +11 – უმეტესად ღრუბლული 

გუდაური +8  – უმეტესად ღრუბლული 

თელავი +24 – უმეტესად მზიანი 

რუსთავი +27 – მზიანი 

თბილისი +26 – მზიანი 

26 აპრილის ასტროლოგიური პროგნოზი

ვერძი
დღე ხელსაყრელია ახალი შთაბეჭდილებების მისაღებად და თვალსაწიერის გასაფართოებლად. მეგობრებისგან საინტერესო შეთავაზებებს უნდა ელოდოთ. თუ სასწავლო კურსებზე ან სპორტულ კლუბში სიარულის დაწყებას გეგმავთ, ეს შესაფერისი დღეა. ფინანსური კუთხით სტაბილურობა შენარჩუნდება. ​

კურო
მეგობრებთან ურთიერთობისას ყურადღება უნდა მიაქციოთ ნებისმიერ სიტყვას, ვინაიდან შესაძლოა, ვიღაც თქვენით მანიპულირებას ცდილობს. ბევრი მარტოხელა კურო გადაწყვეტს, პირად ცხოვრებას მეტი ყურადღება მიაქციოს. ჯანმრთელობის პრობლემები წარსულში დარჩა – დროა, ცხოვრებით სრულად დატკბეთ. 

ტყუპები
ხელსაყრელი დღეა საქმიან პარტნიორებთან სამომავლო გეგმებისა და პროექტების განხილვისთვის. სასურველია, პროფესიულ საქმიანობას უფრო სერიოზულად მოეკიდოთ და ყველა საკითხი ყურადღებით შეამოწმოთ, რათა შეცდომა არ დაუშვათ. ​

კირჩხიბი
ამ დღეს სახლში თავზე საყრელად გაქვთ. ეცადეთ ცვლილებებს და სიახლეებს მშვიდად შეხვდეთ. არახელსაყრელი დღეა მეგობრებთან შეხვედრის ან სოციალურ ღონისძიებებზე დასწრებისთვის. იზრუნეთ საკუთარ ჯანმრთელობაზე და ექიმის მითითებები ზედმიწევნით შეასრულეთ. ​

ლომი
ვარსკვლავები გირჩევენ, რომ ამ დღეს სამსახურებრივ საკითხებს განსხვავებული კუთხით შეხედოთ და პრობლემის მოგვარების არასტანდარტული ხერხი გამოიყენოთ. დროა, ადამიანს, რომელიც ძალიან გიზიდავთ, რომანტიკული პაემანი დაუნიშნოთ. 

ქალწული
ამ დღეს ქალწულების ყურადღება ოჯახის, საყოფაცხოვრებო საკითხების მოგვარებისა და საყვარელ ადამიანისკენ არის მიმართული. ადამიანი, ვისაც დღეს შეხვდებით, შესაძლოა, რაღაცას გიმალავთ ან ცდილობს მოგატყუოთ. პარტნიორისგან შეიძლება საინტერესო წინადადება მიიღოთ, თუმცა დათანხმდებით თუ არა, თქვენს განწყობაზეა დამოკიდებული. განსხვავებული შეხედულების გამო ოჯახის წევრებთან შესაძლოა იკამათოთ. ​

სასწორი
ამ დღეს საბუთებთან მუშაობა, მნიშვნელოვანი საკითხების განხილვა და სამოქმედო გეგმის შედგენა გელით. რომელიღაც ნათესავი თქვენთან შეხვედრას და ძველი პრობლემის ერთობლივი ძალებით მოგვარებას ცდილობს. ამ დღეს სიტყვაზე არავის ენდოთ და ნებისმიერ საკითხზე მტკიცებულებები მოითხოვეთ. ​

მორიელი
ფინანსურ საკითხებში მოსალოდნელია ცვლილებები. ხელსაყრელი დღეა ფულის ინვესტირების, მაგალითად, ბანკში ანაბრის გახსნის ან სახლისთვის ძვირად ღირებული ნივთის შეძენისთვის. პარტნიორი ან სხვა ვინმე თქვენი გარემოცვიდან თქვენზე ზეწოლას ან მანიპულირებას ეცდება, მაგრამ ამის გამო სკანდალი არ უნდა ატეხოთ. უმჯობესია, მშვიდად დააკვირდეთ, რა იქნება მისი შემდეგი ნაბიჯი. ​

მშვილდოსანი
საკმარისი ენერგია და სურვილი გაქვთ, რომ ყველა დაწყებული საქმე დაასრულოთ. მიზნისკენ თავდაჯერებულად მიიწევთ და თქვენი იდეების ან თვალსაზრისის სისწორეში ოპონენტების დარწმუნება არ გიჭირთ. ოჯახში საკმაოდ მეგობრული და გულწრფელი ატმოსფეროა დასვენებისა და ძალების აღდგენისთვის. ​

თხის რქა
ამ დღეს საყოფაცხოვრებო საკითხებს მეტი ყურადღება უნდა მიაქციოთ. დროა, საყვარელ ადამიანებთან გულწრფელი საუბრის დრო გამონახოთ – ჰკითხეთ, რა აწუხებთ და რთულ სიტუაციაში დახმარებას დაჰპირდით.  მოერიდეთ გულწრფელობას ადამიანთან, რომელსაც თქვენი შურს. 

მერწყული
ამ დღეს მთელ ენერგიას ფინანსური საკითხების მოგვარებაზე დახარჯავთ. 

თევზები
რომანტიკული პაემანი და სასიყვარულო თავგადასავლები გელით. ​

სამეგრელოს პოლიციამ ოჯახში ძალადობის ბრალდებით ნ.ქ. და ა.ქ. დააკავა

შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, წინასწარი შეცნობით, ჯგუფურად არასრულწლოვნის მიმართ ჩადენილი ოჯახში ძალადობის ბრალდებით 2 პირი – 1981 წელს დაბადებული ნ.ქ. და 1955 წელს დაბადებული ა.ქ. დააკავეს.

დანაშაული 3 წლამდე ვადით თავისუფლების აღკვეთას ითვალისწინებს. გამოძიებით დადგინდა, რომ 2017 წელს დაბადებულ არასრულწლოვანზე დედამ და ბებიამ ფიზიკურად იძალადეს. არასრულწლოვანს ძალადობის შედეგად, სხეულის სხვადასხვა არეში მრავლობითი დაზიანება აღენიშნება.

სამართალდამცველებმა ორივე ბრალდებული ცხელ კვალზე ჩატარებული საგამოძიებო მოქმედებების შედეგად დააკავეს. გამოძიება სისხლის სამართლის კოდექსის 126-ე პრიმა მუხლის მე-2 ნაწილის „ა“ და „დ”ქვეპუნქტებით მიმდინარეობს, რაც წინასწარი შეცნობით, ჯგუფურად არასრულწლოვნის მიმართ ჩადენილ ოჯახში ძალადობას გულისხმობს.

ინფორმაციას შსს ავრცელებს.

ტრამპის საგარეო პოლიტიკა ჩიხში აღმოჩნდა – ავთანდილ წულაძე

1987 წელს ბიზნესმენმა დონალდ ტრამპმა დაწერა წიგნი „გარიგების ხელოვნება“. ამ წიგნში ტრამპი საკუთარ თავს გარიგებების ოსტატად წარმოაჩენს. თეთრ სახლში დაბრუნების შემდეგ, დონალდ ტრამპმა თავისი საგარეო პოლიტიკა იმ იდეაზე დააფუძნა, რომ როგორც გარიგებების ოსტატს, მას შეუძლია უკარნახოს სხვა ქვეყნების ლიდერებს აშშ-ს პირობები.

ტრამპის მიერ მსოფლიოსთან სავაჭრო ომმა შოკური რეაქციები გამოიწვია მთელ მსოფლიოში ბიზნესმენებსა და პოლიტიკოსებში. მაგრამ ტრამპი, როგორც „გარიგების ოსტატი“, პირობას დევს, რომ ყველასთან შეთანხმებას მიაღწევს.

ტრამპის დაპირებები უკრაინაში ომის დასრულებისა და ირანთან ამ ქვეყნის ბირთვულ პროგრამაზე მომგებიანი შეთანხმების დადების შესახებ, იმავე პრინციპს ეფუძნება. თუმცა, როდესაც ტრამპი პრეზიდენტობის 100 დღეს უახლოვდება, მისი პოლიტიკის შედეგები ოპტიმიზმს არ იწვევს. ამერიკულმა ტელეარხმა CNN-მა გამოაქვეყნა სტატია სახელწოდებით „გარიგების ხელოვნება“ რეალობას ხვდება“.

https://edition.cnn.com/2025/04/24/politics/trump-art-of-the-deal-china-tariffs-russia-ukraine/index.html

სტატიის ავტორი, CNN-ის მიმომხილველი სტივენ კოლინსონი აღნიშნავს, რომ ტრამპის მცდელობები, საერთაშორისო საკითხები უძრავი ქონების გაყიდვის მსგავსად გადაჭრას, წარმატებული არ არის: „პრეზიდენტი იმ ფაქტის წინაშე აღმოაჩნდა, რომ გეოპოლიტიკას და გლობალურ სავაჭრო მოლაპარაკებებს ბინის გაყიდვასთან დიდი კავშირი არ აქვს“

. https://edition.cnn.com/2025/04/24/politics/trump-art-of-the-deal-china-tariffs-russia-ukraine/index.html

ტრამპი იძულებული გახდა, ათობით ქვეყნის წინააღმდეგ ტარიფები გაეყინა და 90-დღიანი პაუზა გამოეცხადებინა. თუმცა, მის დაპირებებს, რომ 90 დღის განმავლობაში ათობით ქვეყნის მთავრობასთან შეერთებული შტატებისთვის ხელსაყრელი პირობებით შეთანხმებას მიაღწევდა, ჯერ შედეგი არ მოჰყოლია.

ჩინეთთან სავაჭრო ომის გამწვავებამ აშშ-ის საფონდო ბირჟების ვარდნა გამოიწვია და პრობლემები შეუქმნა ამერიკულ კორპორაციებს, რომლებიც ჩინეთის კომპონენტების მიწოდებაზე არიან დამოკიდებულნი. ამერიკელი ბიზნესმენები ზეწოლას ახდენენ ტრამპზე, რათა მან ჩინეთთან სავაჭრო ომი შეაჩეროს. ტრამპმა ჩინეთთან შეთანხმების მიღწევის მზადყოფნის შესახებ შემრიგებლური განცხადებების გაკეთება დაიწყო, მაგრამ სი ძინპინი დონალდ ტრამპთან სავაჭრო ომისთვის მზად აღმოჩნდა და ტრამპის მიერ დაწესებულ ტარიფებზე მკაცრი ზომები მიიღო. ჩინეთმა არა მხოლოდ საპასუხო ტარიფები დააწესა ამერიკულ საქონელზე, არამედ აცხადებს, რომ მოლაპარაკებებს არ დაიწყებს მანამ, სანამ ტრამპი ჩინეთის წინააღმდეგ ყველა ტარიფს არ მოხსნის.

ტრამპის მცდელობები, ზეწოლა მოეხდინა უკრაინაზე, რათა ზელენსკის ხელი მოეწერა სამშვიდობო შეთანხმებებზე რუსეთისთვის ხელსაყრელი პირობებით, ევროკავშირისა და ჩინეთის ინტერესების გათვალისწინების გარეშე, ასევე უშედეგო აღმოჩნდა. მოლაპარაკებები ჩიხში შევიდა და ტრამპი ამ პროცესიდან გასვლისთვის ემზადება.

ტრამპის ქმედებებმა ამერიკელ მოქალაქეებში უკმაყოფილების ზრდა გამოიწვია, რაც პრეზიდენტის რეიტინგის ვარდნას იწვევს. სოციოლოგიური გამოკვლევების სააგენტოს Pew Research-ის ბოლოდროინდელმა გამოკითხვამ აჩვენა, რომ ტრამპის  რეიტინგი 40%-მდე დაეცა.

https://www.pewresearch.org/politics/2025/04/23/trumps-job-rating-drops-key-policies-draw-majority-disapproval-as-he-nears-100-days/

გარდა ამისა, გამოკითხულთა 59% არ უჭერს მხარს ტრამპის ადმინისტრაციის მიერ ტარიფების ზრდას. ასევე, გამოკითხული ამერიკელი ამომრჩევლების 55% არ უჭერს მხარს სახელმწიფო მოხელეების მასობრივ შემცირებას.

ამგვარად, ტრამპი არა მხოლოდ აგებს სავაჭრო ომებსა და უკრაინის ომის მოლაპარაკებებს, არამედ პოპულარობის დაკარგვასაც იწყებს.  პოპულარობა – ეს იყო ტრამპის მთავარი პოლიტიკური რესურსი, რამაც მას არჩევნებში გამარჯვების საშუალება მისცა.

აშშ-ის კონგრესის შუალედური არჩევნები 2026 წლის ნოემბერში გაიმართება. საარჩევნო კამპანია ამ ზაფხულს დაიწყება. რესპუბლიკურ პარტიაში იზრდება შიში, რომ ტრამპის შეცდომების გამო  პარტია ამ არჩევნებს წააგებს და დემოკრატებმა შესაძლოა აშშ-ის კონგრესის ორივე პალატაში უმრავლესობა მოიპოვონ. ამ შემთხვევაში, ტრამპი დაკარგავს პოლიტიკურ ინიციატივას და დემოკრატები გააძლიერებენ ზეწოლას რესპუბლიკელებზე, რათა მათმა კანდიდატმა მოიგოს შემდეგი საპრეზიდენტო არჩევნები.

ამომრჩევლებსა და ამერიკულ ელიტაში ტრამპის, როგორც „გარიგებების ოსტატის“ მიმართ იმედგაცრუებამ, შესაძლოა ტრამპზე ზეწოლის გაზრდა გამოიწვიოს. ასევე მოსალოდნელია ტრამპის ადმინისტრაციის დასავლელ მოკავშირეებთან პარტნიორობის აღდგენა. ჩინეთთან ეკონომიკური ომის დეესკალაცია დაიწყება. დონალდ ტრამპი იძულებული იქნება დაუბრუნდეს ამერიკის ტრადიციულ საგარეო პოლიტიკას.

ავთანდილ წულაძე, პოლიტოლოგიის დოქტორი

პუტინისა და სტივ უიტკოფის შეხვედრის შემდეგ კრემლში აცხადებენ, რომ აშშ-სთან “პოზიციები დააახლოვეს” და უკრაინასთან პირდაპირი მოლაპარაკებების შესაძლებლობებზე ისაუბრეს

კრემლში აცხადებენ, რომ აშშ-სთან “პოზიციები დააახლოვეს” და უკრაინასთან “პირდაპირ მოლაპარაკებებზეც

ამის შესახებ რუსეთის პრეზიდენტის თანაშემწემ, იური უშაკოვმა რუსეთის პრეზიდენტის პუტინისა და ტრამპის წარმომადგენლის, სტივ უიტკოფის შეხვედრის შემდეგ რუსულ მედიასთან საუბარში განაცხადა.

უშაკოვის თქმით, პუტინისა და უიტკოფის სამ-საათიან საუბარს “კონსტრუქციული და ძალიან სასარგებლო ხასიათი ჰქონდა” და რიგ საკითხებზე “რუსეთისა და აშშ-ის პოზიციების დამატებით დაახლოების შესაძლებლობა შექმნა”.

“რაც შეეხება უშუალოდ უკრაინულ კრიზისს, საუბარი მიდიოდა, კერძოდ, რუსეთისა და უკრაინის წარმომადგენლებს შორის პირდაპირი მოლაპარაკებების აღდგენის შესაძლებლობაზე”, – განაცხადა უშაკოვმა.

ცნობისთვის, ეს უიტკოფის უკვე მეოთხე ვიზიტია მოსკოვში, რომელთა მეშვეობითაც აშშ უკრაინაში “სამშვიდობო დარეგულირებას” ცდილობს.

საქართველოს პრეზიდენტი დელეგაციასთან ერთად რომში იმყოფება

საქართველოს პრეზიდენტის თვითმფრინავი „ჩამპინოს“ სამხედრო აეროპორტში უკვე დაეშვა, სადაც პრეზიდენტის დახვედრის ცერემონია გაიმართა.

მიხეილ ყაველაშვილი 26 აპრილს, ვატიკანში რომის პაპ ფრანცისკეს დაკრძალვის ცერემონიას დაესწრება.

საქართველოს პრეზიდენტთან ერთად, დელეგაციაში იმყოფებიან საქართველოს საგარეო საქმეთა მინისტრი მაკა ბოჭორიშვილი, პრეზიდენტის ადმინისტრაციის უფროსი ქეთევან კვინიკაძე, ზუგდიდისა და ცაიშის ეპარქიის მმართველი, საქართველოს საპატრიარქოს საგარეო ურთიერთობების განყოფილების თავმჯდომარე, მიტროპოლიტი გერასიმე და თბილისის სასულიერო აკადემიისა და სემინარიის რექტორი, სიონის საკათედრო ტაძრის წინამძღვრის მოადგილე, პროტოპრესვიტერი გიორგი ზვიადაძე.

ინფორმაციას პრეზიდენტის ადმინისტრაცია ავრცელებს.

ჩრდილოკორეული ბალისტიკური რაკეტა, რომლითაც რუსებმა კიევს დაარტყეს, სულ მცირე, 116 კომპონენტს შეიცავს – ზელენსკი

უკრაინის პრეზიდენტმა, ვოლოდიმირ ზელენსკიმ განაცხადა, რომ ჩრდილოკორეული ბალისტიკური რაკეტა, რომლითაც რუსებმა კიევს დაარტყეს, სულ მცირე, 116 კომპონენტს შეიცავს, რომლებიც სხვა ქვეყნებიდან არის შემოტანილი და უმეტესობა აშშ-შია წარმოებული.

„რაკეტასთან დაკავშირებით ყველა დეტალის დადგენა გრძელდება. თუმცა უკვე გასაგებია, რომ ეს ჩრდილოკორეული ბალისტიკური რაკეტაა. რუსეთზე არასაკმარისი ზეწოლა მათ საშუალებას აძლევს, შემოიტანონ ასეთი რაკეტები და სხვა იარაღი და გამოიყენონ აქ, ევროპაში. ჩრდილოეთ კორეაზე და მის თანამზრახველებზე არასაკმარისი ზეწოლა კი საშუალებას იძლევა აწარმოონ, კერძოდ, ასეთი ბალისტიკური რაკეტები. რაკეტაში, რომელმაც კიეველები მოკლა, სულ მცირე 116 კომპონენტი იყო, რომლებიც სხვა ქვეყნებიდან არის შემოტანილი და მათი უმეტესობა, სამწუხაროდ, ამერიკული კომპანიების მიერ არის წარმოებული“, – აღნიშნა უკრაინის პრეზიდენტმა.

“ლარის გამყარების ​ბოლო დროინდელი ტენდენციები ემყარება საკმაოდ ძლიერ სავალუტო შემოდინებას ბაზარზე” – ნათია თურნავა

მიუხედავად ყველა სპეკულაციისა ჩვენ ყოველთვის ვამბობდით და ვამბობთ, რომ ეროვნული ბანკის პრიორიტეტი არის რეზერვების აკუმულირება და ჩვენი ეკონომიკა ამის საშუალებას იძლევა, – განაცხადა „დღის ქრონიკაში“ აშშ-დან ჩართვისას საქართველოს ეროვნული ბანკის პრეზიდენტმა, ნათია თურნავამ.

„ლარის გამყარების ​ბოლო დროინდელი ტენდენციები ემყარება საკმაოდ ძლიერ სავალუტო შემოდინებას ბაზარზე. ტურისტული სეზონი იწყება და ეს ტენდენციები კიდევ უფრო მეტად გაგრძელდება. და ეს ჩვენთვის ყოველთვის არის საშუალება, რომ მეტი რეზერვი ვიყიდოთ, შევავსოთ და შევინახოთ იმ მომენტამდე, როდესაც მათი ბაზრისთვის მიწოდება გახდება საჭირო.

ჩვენ გამოვაქვეყნეთ მარტის მონაცემები და 102 მილიონ დოლარამდეა შეძენილი. მინდა გავამხილო, რომ აპრილის მონაცემები, რომელიც მაისის ბოლოს გამოქვეყნდება გაცილებით უფრო შთამბეჭდავი იქნება,. ჩვენი მოლოდინი, რომ რეზერვები საკმაოდ შეივსება მართლდება. ეს არის ჩვენი სიძლიერის საფუძველი“, – აღნიშნა ნათია თურნავამ.

ეროვნულმა ბანკმა მარტში საერთაშორისო სავალუტო რეზერვები 101.7 მლნ აშშ დოლარით შეივსო.

სახაზინო დეპარტამენტში შეხვედრაზე, საუბრის ერთ-ერთი საკითხი სანქციების ნაწილი იყო – ლაშა ხუციშვილი

საქართველოს ფინანსთა მინისტრმა, ლაშა ხუციშვილმა აშშ-ში, სახაზინო დეპარტამენტში გამართული შეხვედრა „დღის ქრონიკაში“ შეაფასა. მისივე თქმით, შეხვედრაზე საუბრის ერთ-ერთი საკითხი სანქციების ნაწილი იყო.

„სახაზინო დეპარტამენტს ფინანსთა სამინისტროსთან საკმაოდ დიდი ხნის თანამშრომლობა აკავშირებს. ეს არის ფართო ჩამონათვალი საკითხებისა, რომელზეც ჩვენ ვთანამშრომლობთ. შეხვედრაზე განვიხილეთ ყველა ის პრიორიტეტული საკითხი, რაც ჩვენი ქვეყნისთვის არის მნიშვნელოვანი, მათ შორის საქართველოსა და აშშ-ს შორის პოზიციების კიდევ უფრო მეტად დაახლოება, რომელიც ახალი ადმინისტრაციის ფარგლებში არის განახლების პროცესში.

შეხვედრაზე გამოიკვეთა ის ძირითადი მიმართულებები, რასაც შეეხება განახლება. დადასტურდა ის, რომ საქართველოს პრიორიტეტები სრულად თანხვედრაშია ახალი ადმინისტრაციის პრიორიტეტებთან, მათ შორის საერთაშორისო საფინანსო ინსტიტუტებში და ჩვენ შევთანხმდით, რომ სამომავლოდ კიდევ უფრო მეტად გავაგრძელებთ თანამშრომლობას ამ მიმართულებით.

შეხვედრაზე საუბრის ერთ-ერთი საკითხი იყო სანქციების ნაწილი, ამ მიმართულებითაც ფინანსთა სამინისტრო ძალიან აქტიურად თანამშრომლობს. სანქციებთან მიმართებაში შევეხეთ ყველა იმ საკითხს, რომელიც დღეს დღის წესრიგში დგას. ცალსახად აღინიშნა საქართველოს კრიტიკულად მნიშვნელოვანი როლი რეგიონში საერთაშორიოს სანქციების აღსრულებასთან მიმართებაში, რომელზეც კიდევ ერთხელ დადასტურდა საქართველოს ძალიან დიდი წარმატება ამ მიმართულებით“, – აღნიშნა ლაშა ხუციშვილმა.