Home Blog Page 3

 „ხელისუფლება თავისი უგუნური პოლიტიკით“, ქვეყნის სტრატეგიულ პარტნიორებთან ურთიერთობას საფრთხეს უქმნის”- დავით უსუფაშვილი  

ყველა ქვეყანა თვითონ წყვეტს, ვინ შეუშვას საკუთარ ქვეყანაში და ვინ – არა, აშშ-ის ელჩი პასუხისმგებელია ორმხრივ ურთიერთობაზე და თავისი ქვეყნის ინტერესების დაცვაზე, – ამის შესახებ „ლელოს“ წევრმა, დავით უსუფაშვილმა განაცხადა.

უსუფაშვილის თქმით, „რთული გასაგებია, თავისუფალი სამყარო როგორ არ უნდა იყოს შეშფოთებული მას შემდეგ, რაც ანაკლიის პორტთან დაკავშირებით „ქართულმა ოცნებამ“ ჩაიდინა“.

„ანაკლიის პორტთან დაკავშირებით „ქართულმა ოცნებამ“ რაც ჩაიდინა, რთული გასაგებია, დასავლური, თავისუფალი სამყარო როგორ არ უნდა იყოს შეშფოთებული. ეს ეხება ვიზებსაც, შეეხება ინვესტიციებსაც, სტრატეგიული პარტნიორობის გადახედვასაც. „ქართული ოცნების“ გამხმოვანებელმა ძალამ გვითხრა, მერე რა, გაუქმდეს ყველაფერი, თუ რამე სახის პარტნიორობა გვაქვსო ამერიკასთან, დასავლეთთან, ჩვენ გადავარჩენთ ამ ქვეყანასო. ასე მიაქანებენ ქვეყანას რუსეთისკენ. ყველა ქვეყანა თვითონ წყვეტს, ვინ შეუშვას საკუთარ ქვეყანაში და ვინ – არა. საქართველოში აშშ-ის ელჩი პასუხისმგებელია ორმხრივ ურთიერთობაზე და თავისი ქვეყნის ინტერესების დაცვაზე“, – განაცხადა დავით უსუფაშვილმა.

დღეს პარტია „ხალხის ძალამ“ განცხადება გაავრცელა და საქართველოში აშშ-ის ელჩს მიმართა: „ყველაფერს გავაკეთებთ ქვეყნის სუვერენიტეტის გასაძლიერებლად, თუნდაც ეს მხოლოდ ჰაერზე ნათქვამი „სტრატეგიული პარტნიორობის“ გადახედვად დაგვიჯდეს“. განცხადებაში ასევე აღნიშნულია: „თქვენ რომ ჩვენს ქვეყანასთან ნამდვილი სტრატეგიული კომუნიკაციით იყოთ დაინტერესებულნი, საქართველოს მოქალაქეები აშშ-ის ვიზების გაცემის სტატისტიკით სამარცხვინოდ არ იქნებოდნენ ავღანეთის გვერდით“.

ცნობისთვის, აშშ-ის სახელმწიფო დეპარტამენტის 2023 წლის მონაცემების მიხედვით, საქართველოს მოქალაქეებისთვის ვიზაზე უარის მაჩვენებელი 49.23 პროცენტს შეადგენს. ბელარუსის შემთხვევაში ეს მაჩვენებელია 32.80 პროცენტი, რუსეთის შემთხვევაში კი – 39.49 პროცენტი.

ადამიანებს ეს ნათქვამი არ მოეწონებათ – ვახტანგ მეგრელიშვილი გიორგი ვაშაძეზე

საპარლამენტო უმრავლესობა გიორგი ვაშაძის მხრიდან დისკრიმინაციაზე საუბრობს და თვლის, რომ ვაშაძემ ბოდიში უნდა მოიხადოს, რადგან მათი შეფასებით, ეს არის სიძულვილის ენა.

აუტისტური სპექტრის დამაკნინებელ კონტექსტში გამოყენება კი დაუშვებელია. შეფასება გაკეთდა ოპოზიციურ პოლიტიკურ პარტიებშიც.

საპარლამენტო პოლიტიკური ჯგუფის “ევრო ოპტიმისტები“ თავმჯდომარე რომან გოცირიძე აცხადებს, რომ გიორგი ვაშაძეც წამოსცდა და რომან გოცირიძის აზრით ის ამას გააცნობიერებს.

“მსგავსი რამ, როდესაც “ქართულ ოცნებაში“ ხდება ამას არ ექცევა ყურადღება, ხოლო სამედიცინო ტერმინით მოხსენება, ეს პოლიტიკოსი იქნება თუ ნებისმიერი ადამიანი დაუშვებელია. ეს იყო წამოცდენა უბრალოდ და გიორგი ვაშაძე ამას გააცნობიერებს, რადგან გონიერი ადამიანია,“- აცხადებს რომან გოცირიძე.

საპარლამენტო პოლიტიკური ჯგუფის “გირჩი“ წევრი ვახტანგ მეგრელიშვილი აცხადებს, რომ გიორგი ვაშაძის განცხადება უფრო მეტად ეთიკის საკითხია და სხვა პოლიტიკოსებს უფლება არ აქვთ ეთიკაზე ისაუბრონ.

“იმ პირობებში, სადაც ჩვენ ვცხოვრობთ ამ საკითხებზე აქცენტის გადატანა აბსურდი მგონია ზოგადად, ეს არის ეთიკის საკითხი და განსაკუთრებით პოლიტიკოსებს არავითარი უფლება არ აქვთ ეთიკაზე ისაუბრონ,“- აცხადებს მეგრელიშვილი.

ჟურნალისტის კითხვაზე, როგორ აგებს ამ ყველაფერზე გიორგი ვაშაძე პასუხს? ვახტანგ მეგრელიშვილი პასუხობს, რომ სავარაუდოდ ის პოლიტიკურ რეიტინგს დაკარგავს.

“ვაშაძე აგებს პასუხს იმით, რომ ადამიანებს მისი ეს ნათქვამი არ მოეწონებათ და როგორც პოლიტიკოსი რეიტინგს დაკარგავს, მეტი რა უნდა მოხდეს?- მე ნამდვილად არ მესმის,“- განაცხადა მეგრელიშვილმა.

ცნობისთვის,  “სტრატეგია აღმაშენებლის” ლიდერმა, გიორგი ვაშაძემ, პრემიერ-მინისტრ ირაკლი კობახიძის მისამართით დისკრიმინაციული განცხადება გააკეთა. როგორც ვაშაძემ ტელეკომპანია “ტვ პირველის” ეთერში განაცხადა, ირაკლი კობახიძე აუტისტი ადამიანია, ის ხალხს არ ესაუბრება და იზოლაციაშია.

ZEG ფესტივალის შეხვედრა თიბისი კონცეპტის სივრცეში

22 ივნისს, 15:00 საათზე, ZEG ამბის თხრობის ფესტივალის ფარგლებში, თიბისი კონცეპტის მულტიფუნქციური სივრცე გიწვევთ შეხვედრაზე „Future of Fashion: The Been Story“.

სესიის სპიკერები იქნებიან Genia Mineeva და ნინუცა ნანიტაშვილი.

Genia Mineeva – ეკო-მეგობრული აქსესუარების ბრენდის „Been London”-ის დამფუძნებელია. British Vogue-მა ბრენდი დაასახელა, როგორც „მსოფლიოში ერთ-ერთი ყველაზე ინოვაციური მოდის ბიზნესი“.

ნინუცა ნანიტაშვილი – ტექნოლოგიების სფეროში 12 წლიანი გამოცდილებით, ამჟამად ჩართულია „Google for Startups Accelerator” პროგრამებში ევროპისა და ისრაელის მასშტაბით. ნინუცა, ასევე მენტორია და მხარს უჭერს ქალებს, როგორც ქართულ, ისე გლობალურ ტექნოლოგიურ ეკოსისტემებში.

შეხვედრაზე დასასწრებად, გთხოვთ დარეგისტრირდეთ www.conceptevents.ge – ზე, რის შემდეგაც კონცეპტ ასისტენტი დაგიდასტურებთ შეხვედრაზე დასწრებას.

შეხვედრა გაიმართება ინგლისურ ენაზე.

მისამართი: თიბისი  კონცეპტის მულტიფუნქციური სივრცე, მარჯანიშვილის 7.

„ნაცმოძრაობასთან“ თანამშრომლობა მკაფიო წითელი ხაზი არაა და არც ერთიან საარჩევნო სიაში ყოფნას გამოვრიცხავ – ალეკო ელისაშვილი

პარტია “მოქალაქეების“ ლიდერი ალეკო ელისაშვილი ამბობს, რომ “ნაციონალურ მოძრაობასთან“ თანამშრომლობა მკაფიო წითელი ხაზი არაა და არც საერთო სიაზე იტყვის უარს, თუ ეს ოპოზიციას “ქართული ოცნების“ დამარცხებაში დაეხმარება.

“სამოქმედო გეგმებთან დაკავშირებით ოპოზიციაში მიდის მსჯელობა და გადაჯგუფებები. ჩემთვის “ნაციონალურ მოძრაობასთან“ თანამშრომლობა დიდი ხანია აღარ არის მკაფიო წითელი ხაზი, მე ვამბობდი, რომ არც ერთიან საარჩევნო სიაში ყოფნას გამოვრიცხავდი, უბრალოდ აწონ-დაწონა გვჭირდება, რომელი უფრო ეფექტურია “ქართული ოცნების“ დასამარცხებლად.

რაც უფრო ეფექტურად დაგვამარცხებინებს “ქართულ ოცნებას“, მე იმის მომხრე ვარ. გარკვეული დისკუსიები მიდის და სხვადასხვა ჯგუფის გამსხვილებაზეც მიდის ლაპარაკი. აქ არის ყველაზე მნიშვნელოვანი ერთი რამ – ოპოზიციური პარტია, რომელიც არჩევნებში მიიღებს მონაწილეობას, არ დარჩეს 5%-ანი ბარიერის მიღმა, რადგან პარტიების ხმები, რომლებიც ვერ გადალახავენ მინიმალურ ზღვარს, გადანაწილდება ძირითადად “ქართულ ოცნებაზე“, – განაცხადა ელისაშვილმა “პალიტრანიუსის“ ეთერში.

ლისის ტბის მიმდებარედ 21, 22 და 23 ივნისს მოძრაობა შეიზღუდება

დედაქალაქში, 21, 22 და 23 ივნისს ფესტივალი Tbilisi Open Air 2024 გაიმართება. დაგეგმილი ღონისძიებების გამო, სამივე დღეს ლისის ტბის მიმდებარედ, ლეო კვაჭაძის ქუჩაზე ავტომობილების გადაადგილება დროებით შეიზღუდება. ამის შესახებ ინფორმაციას თბილისის მერია ავრცელებს.

„შეზღუდვა 10:00 საათიდან მომდევნო დღის 01:00 საათამდე იმოქმედებს, დანარჩენ პერიოდში კი ტრანსპორტი შეუფერხებლად გადაადგილდება.

დროის აღნიშნულ მონაკვეთში, ლეო კვაჭაძისა და ბარბარე ყიფიანის ქუჩების კვეთიდან ლისის ტბის მიმართულებით მოძრავი ავტომობილები გადაადგილებას შეძლებენ ცალმხრივად, მხოლოდ იოსებ კეჭაყმაძის ქუჩის მიმართულებით, კეჭაყმაძის ქუჩიდან ბესარიონ ჟღენტისა და პაატა დათუაშვილის ქუჩებისკენ მიმავალი მძღოლები კი, გადაადგილდებიან თხინვალასა და ავთო ვარაზის ქუჩების გავლით, რის შემდეგაც, მოძრაობას დადგემილი სქემით გააგრძელებენ.

შეიცვლება საზოგადოებრივი ტრანსპორტის მოძრაობის სქემაც. კერძოდ, N329 ავტობუსი სოფელი თხინვალადან ონკოლოგიური კვლევითი ცენტრისკენ იმოძრავებს ავთო ვარაზისა და ელგუჯა ამაშუკელის ქუჩების გავლით; N363 ავტობუსი თხინვალადან მეტროსადგურ „დელისის“ მიმართულებით ვარაზისა და ჟღენტის ქუჩების გავლით გადაადგილდება, შემდეგ კი ფერმწერთა ქუჩაზე, ტატა თვალჭრელიძის ქუჩის კვეთასთან მოუხვევს.

რაც შეეხება N107-ს, რომელიც მგზავრებს სოფელი წოდორეთიდან მეტროსადგურ „დელისისამდე“ ემსახურება, ავტობუსი შეზღუდვის პერიოდში, კეჭაყმაძის ქუჩის ნაცვლად, იმოძრავებს ვარაზისა და ჟღენტის ქუჩების გავლით.

თბილისის მერია ბოდიშს გიხდით შექმნილი დისკომფორტის გამო!“, – წერია განცხადებაში. 

,, გვსურს, მარტივი კითხვა დავუსვათ რობინ დანიგანს ”- “ხალხის ძალა“

პარტია „ხალხის ძალა“ განცხადებას ავრცელებს და ამერიკის ელჩის საქართველო-ჩინეთის ეკონომიკური პარტნიორობის გაღრმავების კრიტიკას ეხმაურება.

„გუშინ ჩვენი „სტრატეგიული მეგობრის“, აშშ-ის ელჩმა საქართველოში, ქალბატონმა რობინ დანიგანმა პირველი მწვავე და ქართველი ხალხის მიმართ უკიდურესად შეურაცხმყოფელი განცხადებები გააკეთა, რასაც ცხადია, უპასუხოდ ვერანაირად ვერ დავტოვებთ. თუ აქამდე ახალი ელჩი მეტ-ნაკლებად ცდილობდა, პოლიტიკური ლავირება მოეხდინა და არ შეხებოდა ისეთ თემებს, რაც პირდაპირ ურტყამს ჩვენი ქვეყნის სუვერენიტეტს და დამოუკიდებლობას, ამჯერად ეს წითელი ხაზი მანაც გადაკვეთა. ეს გასაგებიცაა და მოსალოდნელიც იყო, რადგან იმ პირობებში, როცა აშშ-ის მოქმედი ადმინისტრაცია ჩვენს ქვეყანასთან დაკავშირებით არაადეკვატურ, ჩაგვრასა და შეურაცხყოფაზე დაფუძნებული პოლიტიკას აწარმოებს, ელჩ დანიგანს არავინ მისცემდა უფლებას, რომ შედარებით ნეიტრალური პოზიციონირებით თავი აერიდებინა მოქმედ ხელისუფლებასთან ურთიერთობის გამწვავებისთვის.

ქალბატონმა ელჩმა დაგვიწუნა ჩინეთთან ბოლო პერიოდში გაღრმავებული სავაჭრო-ეკონომიკური ურთიერთობები და იქვე მიზეზიც დაასახელა – ჩინეთი რუსეთს აფინანსებს, რუსეთი თქვენი ქვეყნის ტერიტორიების ოკუპანტია და არ მესმის, რატომ უნდა გააღრმაო ეკონომიკური კავშირები იმ ქვეყნის მმართველ პარტიასთან, რომელიც საქართველოს ოკუპანტს აფინანსებსო… „შესაშური“ ლოგიკაა, ვერაფერს იტყვი, მაგრამ შეუძლებელია ელჩის ამ ლოგიკას გაჰყვე თუნდაც სერიოზული მსჯელობის დონეზე, რადგან გზად იმდენი ბუნებრივი ბარიერია, რომ გამორიცხულია დანიგანის ამ განცხადებამ ჩიხში არ შეგვიყვანოს.

პირველ რიგში, გვსურს მარტივი კითხვა დავუსვათ რობინ დანიგანს – თუ ჩინეთი აფინანსებს რუსეთს, ხოლო ამჟამად რუსეთი აწარმოებს ომს უკრაინაში და ახდენს მისი ტერიტორიების ოკუპაციას – რატომ აღრმავებს აშშ ყოველწლიურად ჩინეთთან ეკონომიკურ ურთიერთობებს?

თუ ჩინეთთან ურთიერთობა სახიფათო და საფრთხის შემცველია, რატომ ამყარებს და აღრმავებს ევროკავშირი საკუთარ ეკონომიკურ და პოლიტიკურ კონტაქტებს და რატომ აკეთებენ ანალოგიურს ევროკავშირის ქვეყნები დამოუკიდებლად, გაერთიანების მიღმა?

აი როგორ გამოიყურება რიცხვებში აშშ-ს და ევროპის 2023 წლის სავაჭრო ურთიერთობები ჩინეთთან:

აშშ-ჩინეთის წლიური სავაჭრო ბრუნვა 575 მილიარდი დოლარია, ხოლო 2017 წლიდან დღემდე აშშ-ს ეკონომიკაში ჩინური ინვესტიციების მოცულობა საშუალოდ წელიწადში 35 მილიარდ აშშ დოლარს აჭარბებს.

ევროკავშირის სავაჭრო ბრუნვა ჩინეთთან 860 მილიარდი დოლარია.

რატომ ფიქრობთ, რომ ჩინეთთან ურთიერთობების გაღრმავება აშშ – ს და ევროკავშირს სიკეთეს მოუტანს, ხოლო ჩვენთვის სახიფათოა? საქმე ისაა, რომ დიდი ხანია თქვენ ჩვენს ქვეყანას უყურებთ როგორც არშემდგარ სახელმწიფოს, ხოლო ქართველ ხალხზე გაქვთ მცდარი წარმოდგენა, თითქოს მას კარგის და ავის გარჩევა არ შეუძლია, მაგრამ საბედნიეროდ ასე არ არის.

ქართულმა საზოგადოებამ ბოლო 30 წლის განმავლობაში კარგად ისწავლა კეთილისა და ბოროტის, ქვეყნისთვის სასარგებლოსა და საზიანოს გარჩევა და როდესაც გვეუბნებით, რომ თქვენ ივაჭრებთ ჩინეთთან, მაგრამ ჩვენ არ გვაქვს ამის უფლება, ჩვენ ისე მოვიქცევით, როგორც ჩვენს ქვეყანას და მის განვითარებას წაადგება. ერთადერთი ქვეყანა, რომელიც მძიმედ დაზიანდება, თუ საქართველო ჩინეთთან გაწყვეტს ეკონომიკურ ურთიერთობას, სწორედ საქართველოა. ჩინეთის ეკონომიკაზე საქართველოსთან ვაჭრობა და აქ ინვესტიციების განხორციელება, ან პირიქით – ეკონომიკური ურთიერთობების მთლიანად გაწყვეტა ჩინეთისთვის არაფერს ნიშნავს და მის ეკონომიკაზე ოდნავადაც ვერ აისახება, სამაგიეროდ საქართველოსთვის აქვს გადამწყვეტი მნიშვნელობა. შეგახსენებთ, რომ სწორედ ასეთივე უხეში ფორმით ითხოვდით რუსეთ-უკრაინის ომის დაწყებისთანავე, დაგვეწესებინა სანქციები რუსეთისათვის და ერთი ხელის მოსმით გაგვეწყვიტა ყველანაირი ეკონომიკური და სავაჭრო კონტაქტები, მაგრამ ეს არ გავაკეთეთ. მიზეზი აქაც მარტივი იყო – ამ უგუნური ნაბიჯით რუსეთს ვერაფერს დავაკლებდით, ხოლო ჩვენი ქვეყნის ეკონომიკას და ქართველ ხალხს ნამდვილად გამოვუწერდით ჩვენივე ხელით „უმძიმეს სანქციებს“, რომელთა შედეგები ათეული წლების განმავლობაში მძიმე დაღად დააჩნდებოდა ჩვენი ხალხის ცხოვრებას.

ილუზია და ქართველი ხალხის დაცინვაა თქვენი მხრიდან მუდმივი აპელირება 6 მილიარდიან დახმარებაზე, რომელიც, თურმე, 30 წლის განმავლობაში ქართველ ხალხს მოახმარეთ. ჯერ ერთი, საქართველოში შემოსული ამერიკული დახმარება, რაც ჩვენ დავითვალეთ, არის არა 6, არამედ, დაახლოებით 4 მილიარდი დოლარი 30 წლის განმავლობაში. და მეორე – ამ თანხის დიდი ნაწილი, სამწუხაროდ, დაიხარჯა საქართველოში თქვენს მიერ დაფინანსებული ენჯეოების ხელით თქვენივე საყვარელი პარტიის – „ნაცმოძრაობის“ – ჯერ ხელისუფლებაში მოყვანისათვის, შემდეგ მისივე უწყვეტი მხარდაჭერისათვის. და მესამე – დღეს უკვე ეს თანხები ძირითადად ისევ იმ ენჯეოებს ხმარდება, რომლებიც ჩვენი სამშობლოსთვის ძირგამომთხრელ საქმიანობას ეწევიან და რომელთაც ერთადერთ მიზნად „ქართული“ აგენტურული ქსელის, არაერთგზის სახე და სახელცვლილი, მაგრამ მარად მონებად და სამშობლოს გამყიდველებად დარჩენილი ნაცმოძრაობის ხელისუფლებაში დაბრუნება განუზრახავთ.

იძულებულნი ვართ, კიდევ ერთხელ გავიხსენოთ ის წვლილი, რაც საქართველომ, თქვენთან პარტნიორობის ფარგლებში, საერთაშორისო მისიებში შეიტანა. ჩვენი მონაწილეობის გარეშე მხოლოდ ავღანეთის მისია აშშ-ს მინიმუმ 2 მილიარდი დოლარით მეტი დაუჯდებოდა, თუმცა ეს არც არის სახსენებელი იმ ადამიანურ მსხვერპლთან, რაც ჩვენმა სამშობლომ და ხალხმა ამ მისიაში გაიღო.

ცალკე საუბრის და გამოძიების თემაა 2008 წლის აგვისტოს ომის პერიპეტიები, როცა, ჩვენი სამშობლოს 20 პროცენტის ოკუპაციის შემდეგ, ქვეყანაში მართლაც დაიხარჯა სოლიდური ამერიკული „ფინანსური დახმარება“, მაგრამ სანამ ამ დახმარების საჭიროება დადგებოდა ქვეყანაში, თქვენმა საყვარელმა პარტიამ ყველაფერი გააკეთა, რომ საქართველო სწორედ ამ უმძიმესი მოცემულობის წინაშე დამდგარიყო. დიახ, აგენტურამ 2008 წელს მოაწყო უმძიმესი პროვოკაციები და რომ არა ეს მიზანმიმართული ბოროტება საკუთარი ქვეყნის მიმართ, რომ არა დავალებების უსიტყვო შესრულება და მონური მორჩილება, საქართველო ომის ქარცეცხლში არ გაეხვეოდა. არ იქნებოდა ასეულობით ქართველის მსხვერპლი, არ გვეყოლებოდა 35000 ახალი დევნილი, არ მოხდებოდა საქართველოს ტერიტორიის 20 პროცენტის ოკუპაცია და ეკონომიკის სერიოზული ჩამოშლა.

სერიოზული კითხვის ნიშნები გვაქვს ამ პროცესებში თქვენს როლთან და ფუნქციასთან დაკავშირებით, რადგან დღეს უკვე პატარა ბავშვმაც კი იცის საქართველოში, რომ სააკაშვილი და მისი აგენტურული ბანდა სწორედ რომ ოკუპაციის გამოსაწვევად ასრულებდა უმძიმეს დავალებებს საქართველოს წინააღმდეგ. სწორედ აგვისტოს ამ მოვლენების შემდეგ დაერქვა რუსეთს „ოკუპანტი“, ხოლო აშშ-ს სტრატეგიული პარტნიორი, რაც უკვე შემდგომ წლებში – ვიდრე დღემდე, მეტ-ნაკლები წარმატებით გამოიყენება პროპაგანდის საწარმოებლად და საზოგადოებრივი აზრის ტერორისთვის. აგვისტოს ომის შემდეგ გაწეულ დახმარებაზე კი (რაც აშშ-ს მიერ საქართველოსთვის გაწეული დახმარებაში სერიოზულ წილს შეადგენს) მარტივად გეტყვით – თქვენ უბრალოდ სხვა გამოსავალი არ გქონდათ, რადგან ომისგან ჩამოქცეულ ეკონომიკაში ფული რომ არ ჩაგესხათ, ამ ჩამოქცეულ ეკონომიკას თქვენი საყვარელი ნაცმოძრაობაც თან გადაჰყვებოდა. სინამდვილეში, თქვენ ეს ფული თქვენივე აგენტურის ხელისუფლებაში დასატოვებლად გადაიხადეთ. დიახ, ეს იყო თქვენი მიზნებისათვის გაწეული ხარჯი, თორემ ათიათასობით დევნილისთვის წეროვანის ბარაკებში ჩასახლება როგორი „ღირსეული“ დახმარებაცაა, ამას ქართველი ხალხი კარგად ხედავს.

მიუხედავად ამ ყველაფრისა, თქვენ მაინც ჯიუტად დახმარებად გვითვლით და მუდმივად გვამადლით იმ მითურ 6 მილიარდს, რომელიც სინამდვილეში 4 მილიარდიც არ არის და ძირითადად თქვენივე აგენტურის გამაგრებას და მათ გაძლიერებას ხმარდება. ამიტომ, კიდევ ერთხელ დაჟინებით გთხოვთ, გამოაქვეყნოთ თანხების დეტალური ხარჯთაღრიცხვა და საზოგადოებისთვის ყველაფერი ნათელი გახდება.

თქვენ რომ ჩვენს ქვეყანასთან ნამდვილად მეგობრული ურთიერთობა და სტრატეგიული პარტნიორობა გსურდეთ, ანაკლიის პორტს სწორედ ამერიკული ინვესტიციით ააშენებდით, თანაც დიდი ხნის წინ. მიუხედავად არაერთი შემოთავაზებისა, თქვენ ყველა ჯერზე უარი თქვით პორტის აშენებაზე და ახლა, როცა რეალური ინვესტორი გამოჩნდა, ამ პროექტისა და მისი ინვესტორების მიმართ

თქვენი დამოკიდებულებით ნათლად აჩვენებთ, რომ ერთადერთი მიზანი, რაც თქვენ გამოძრავებთ, არის პროექტის ჩაშლა და პორტის მშენებლობის გაუქმება.

თქვენ რომ ჩვენ ქვეყანასთან ნამდვილი სტრატეგიული კომუნიკაციით იყოთ დაინტერესებულნი, საქართველოს მოქალაქეები აშშ-ს ვიზების გაცემის სტატისტიკით სამარცხვინოდ არ იქნებოდნენ ავღანეთის გვერდით, იმ ავღანეთის, სადაც დემოკრატიის დასამყარებლად წლების განმავლობაში ამერიკელ ჯარისკაცებთან ერთად ვიბრძოდით და სისხლი დავღვარეთ, ბოლოს კი პასუხად ის მივიღეთ, რომ ავღანელები უფრო ხშირად იღებენ აშშ-ს ვიზებს, ვიდრე ქართველები. რა ჰქვია ამას, სტრატეგიული პარტნიორობა თუ ჩვენი ქვეყნის და ხალხის დაცინვა და შეურაცხყოფა?

სამწუხაროდ, „სტრატეგიული პარტნიორისგან“ ჩვენ აღარაფერი გვიკვირს და აღარაფერი გვაოცებს. უფრო მეტიც – ყველა თქვენი შემდეგი სვლა და მოწოდება ჩვენთვის ნაცნობი და მოსალოდნელია. როგორც ახლა გვეუბნებით, რომ თურმე თქვენ ივაჭრებთ ჩინეთთან, გააღრმავებთ ეკონომიკურ ურთიერთობებს, მაგრამ ჩვენ ამის უფლება არა გვაქვს, რადგან, თითქოს, ეს ურთიერთობა ჩვენ დაგვაზიანებს. ზუსტად ასე გვეუბნებოდით, რომ გამჭვირვალობის კანონი, რომელიც თითქმის 80 წელია აშშ-ში მოქმედებს და წარმატებით იცავს ამერიკის სახელმწიფოს და ამერიკულ დემოკრატიას, საქართველოსთვის დამღუპველი იქნებოდა. საბედნიეროდ, ქართველმა ხალხმა ეს ტყუილი არ მიიღო და ამგვარი ორმაგი სტანდარტი მიუღებლად და შეურაცხმყოფლად მიიჩნია.

ნუ გაგიკვირდებათ და ნუ შეშფოთდებით, თუ ჩვენი ქვეყნის საკეთილდღეოდ სწორედ იმას გავაკეთებთ, რასაც თქვენ აკეთებთ თქვენი ქვეყნის უკეთესი ხვალინდელი დღისთვის. და რადგან თქვენ სიტყვით გვაჯერებთ, რომ ჩვენი მეგობრები ხართ, ხოლო საქმით სრულიად საპირისპიროს ვხედავთ, ვიტოვებთ უფლებას, თავად გადავწყვიტოთ, როგორ წარვმართოთ ჩვენი ქვეყნის ხვალინდელი დღე და როგორც ხალხის წინაშე ანგარიშვალდებული პოლიტიკური ძალა, ყველაფერს გავაკეთებთ ჩვენი ქვეყნის სუვერენიტეტის გასაძლიერებლად და ეკონომიკური მდგომარეობის გასაუმჯობესებლად, თუნდაც ეს იმ – მხოლოდ ფურცელზე დაწერილი და ჰაერზე ნათქვამი – „სტრატეგიული პარტნიორობის“ გადახედვად დაგვიჯდეს, რის მუქარასაც ბოლო პერიოდში სულ უფრო ხშირად ვისმენთ და თანაც ყოველ ჯერზე უფრო და უფრო მაღალი პოლიტიკური თანამდებობის პირებისგან…“ – წერია განცხადებაში.

ამინდის პროგნოზი ქალაქების მიხედვით

გარემოს ეროვნული სააგენტოს ცნობით, 23 ივნისამდე საქართველოში მაღალი ტემპერატურის ფონზე მოსალოდნელია ხანმოკლე წვიმა ელჭექით. ზოგან შესაძლებელია სეტყვა და ქარის გაძლიერება.

ქ. თბილისში ღამისა და საღამოს საათებში შესაძლოა ხანმოკლე წვიმა ელჭექით აღინიშნოს. ჰაერის ტემპერატურა დღისით +31, +33 გრადუსი დაფიქსირდება.

სანაპირო რაიონებში (ბათუმი, ქობულეთი, ანაკლია, ფოთი): 20-21 ივნისს მოსალოდნელია ხანმოკლე წვიმა ელჭექით, 22-ში კი გამოიდარებს. ჰაერის ტემპერატურა დღისით +25, +27 გრადუსი იქნება.

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი): მოსალოდნელია ხანმოკლე წვიმა ელჭექით. ჰაერის ტემპერატურა დღისით +28, +30 გრადუსი იქნება.

დასავლეთ საქართველოს მთიან რეგიონებში (ამბროლაური, ონი, ცაგერი, შოვი, ჭიათურა, საჩხერე, ხულო, რიკოთის უღელტეხილი): მოსალოდნელია ხანმოკლე წვიმა ელჭექით. ზოგან შესაძლებელია სეტყვა და ქარის გაძლიერება. ჰაერის ტემპერატურა +27, +29 გრადუსი იქნება.

დასავლეთ საქართველოს მაღალმთიან რეგიონებში (მესტია, ბახმარო): მოსალოდნელია ხანმოკლე წვიმა ელჭექით. ზოგან შესაძლებელია სეტყვა და ქარის გაძლიერება. ჰაერის ტემპერატურა +26, +28 გრადუსი იქნება.

ქართლში (რუსთავი, ბოლნისი, მარნეული, გარდაბანი, გორი, ცხინვალი): ზოგან მოსალოდნელია ხანმოკლე წვიმა ელჭექით. შესაძლებელია სეტყვა და ქარის გაძლიერება. ჰაერის ტემპერატურა დღისით +31, +33 გრადუსი იქნება.

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): ზოგან მოსალოდნელია ხანმოკლე წვიმა ელჭექით. შესაძლებელია სეტყვა და ქარის გაძლიერება. ჰაერის ტემპერატურა დღისით +31, +33 გრადუსი იქნება.

აღმოსავლეთ საქართველოს მთიან რეგიონებში (ახალციხე, ბორჯომი, დუშეთი, თიანეთი, ფასანაური): ზოგან მოსალოდნელია ხანმოკლე წვიმა ელჭექით. შესაძლებელია სეტყვა და ქარის გაძლიერება. ჰაერის ტემპერატურა დღისით +28, +30 გრადუსი იქნება.

აღმოსავლეთ საქართველოს მაღალმთიან რეგიონებში (ახალქალაქი, წალკა, ბაკურიანი, გუდაური, ომალო): მოსალოდნელია ხანმოკლე წვიმა ელჭექით. ზოგან შესაძლებელია სეტყვა და ქარის გაძლიერება. ჰაერის ტემპერატურა დღისით +23, +25 გრადუსი იქნება.

20 ივნისის ასტროლოგიური პროგნოზი

ვერძი

ვარსკვლავები ვერძს ბიზნესსა და ფინანსურ სფეროში დახმარებას ჰპირდებიან. ხელსაყრელი დროა ახალი საქმის დასაწყებად ან სამსახურის შესაცვლელად. დავალებას, რომლის შესრულება ადრე შეუძლებელი გეგონათ, ადვილად გაუმკლავდებით. პირად ცხოვრებაში სიმშვიდეა, ცვლილებებს ჯერჯერობით არ უნდა ელოდოთ. ამ დღეს თქვენი ყველაზე დიდი შეცდომა ყოყმანი იქნება – სწრაფად და პრინციპულად უნდა იმოქმედოთ.

კურო

ეს დღე თქვენს სოციალურ წრეში ცვლილებებს მოიტანს – შესაძლოა ახალი, საინტერესო ადამიანი გაიცნოთ. მანქანის მართვის დროს სიფრთხილე უნდა გამოიჩინოთ. ვარსკვლავები ტრანსპორტთან დაკავშირებული პრობლემებისა და მოსალოდნელი ავარიების შესახებ გაფრთხილებენ.

ტყუპები

ამ დღეს ბევრი რამ იქნება თქვენს განწყობაზე დამოკიდებული. რომელ გზას აირჩევთ, მხოლოდ თქვენი გადასაწყვეტია. იურიდიული საკითხები სწრაფად და წარმატებით მოგვარდება. მზად იყავით იმისთვის, რომ საყოფაცხოვრებო ტექნიკის შეკეთება ან გამოცვლა გაუთვალისწინებელ ხარჯებს გამოიწვევს.

კირჩხიბი

ეს დღე საინტერესო სიახლეებს უკავშირდება. შესაძლოა, ისეთი მოვლენის მონაწილე გახდეთ, რომელიც თქვენს პირად ცხოვრებაზე პირდაპირ ან ირიბად იმოქმედებს. ვარსკვლავები გირჩევენ, დაწყებული საქმე დროულად დაასრულოთ. წინააღმდეგ შემთხვევაში, საკუთარი სიზარმაცის შედეგებს მოიმკით. კოლეგას დახმარების თხოვნაზე უარს ნუ ეტყვით. გაითვალისწინეთ, რომ მალე შეიძლება თქვენც დაგჭირდეთ მისი მხარდაჭერა.

ლომი

ამ დღეს ვარსკვლავები გამუდმებით განიშნებენ, როგორ უნდა მოიქცეთ და რას უნდა ელოდოთ გზაზე. ყურადღება მიაქციეთ მინიშნებებს, სიზმრებსა და წინათგრძნობას. ენდეთ საკუთარ ინტუიციას, რომელიც ამ დღეს უჩვეულოდ გამახვილებულია. ლომებს, რომლებიც დიდი ხანია, დატვირთული რეჟიმით მუშაობენ, იძულებითი გაჩერება მოუწევთ. ეცადეთ, ხანმოკლე შვებულება დაგეგმოთ. მოერიდეთ მენეჯმენტთან დაპირისპირებას, რადგან საკუთარი სიმართლის დამტკიცება გაგიჭირდებათ.

ქალწული

ამ დღეს დავიწყებულმა დაავადებებმა შეიძლება თავი შეგახსენოთ, ამიტომ ჯანმრთელობას განსაკუთრებული ყურადღება უნდა მიაქციოთ. ვარსკვლავები თქვენგან სიმტკიცეს მოითხოვენ. ეცადეთ, თქვენი საუკეთესო თვისებები, რომლებიც კონკურენტებისგან გამოგარჩევთ, დავალების შესრულებისთვის გამოიყენოთ. ამ დღეს გაჩნდება შესაძლებლობა, რომელიც უახლოეს ხანებში წარმატებას მოგიტანთ.

სასწორი

ახალი ნაცნობი ფინანსურ საკითხებში დაგეხმარებათ, მაგრამ მის პირობებს დაუფიქრებლად არ უნდა დათანხმდეთ – გამორიცხული არ არის, რომ თქვენთვის ხაფანგის დაგებას ცდილობს. ადამიანი, ვინც ახლა ყველაზე მეტად გჭირდებათ, ბევრად უფრო ახლოსაა, ვიდრე ფიქრობთ. იფიქრეთ შვებულებაზე – დროა გარემო შეცვალოთ და ძალები აღიდგინოთ.

მორიელი

ვითარება თქვენგან სწრაფ რეაგირებას და უჩვეულო მოქმედებას მოითხოვს. ბევრ სიტუაციაში ვარსკვლავები თქვენს სიმტკიცეს გამოცდიან. რთული სიტუაციიდან ყველაზე ადვილად გამოვლენ ის მორიელები, რომლებსაც არასტანდარტული გადაწყვეტილებების სწრაფად მიღება შეუძლიათ. მხარდაჭერას ნურავისგან ელით, გამოსავალი თავად უნდა იპოვოთ.

მშვილდოსანი

მშვილდოსნის ჩანაფიქრი სავარაუდოდ, რეალობად იქცევა. როგორი რთულიც არ უნდა ჩანდეს, ეცადეთ თქვენი ახალი იდეა განახორციელოთ. გირჩევთ, დიპლომატიური ნიჭი მოლაპარაკების დასაწყებად გამოიყენოთ, საჭირო ადამიანების მხარდაჭერა მოიპოვოთ და საყვარელ ადამიანს გული გადაუშალოთ.

თხის რქა

ჩანაფიქრის განხორციელებისთვის დრო არ გყოფნით, ამიტომ შესაძლოა, გეგმების გადახედვა მოგიწიოთ. სხვისმა შეცდომამ შეიძლება სამუშაო პროცესი მნიშვნელოვნად გაართულოს. ეცადეთ, გარემოებების მიხედვით იმოქმედოთ და რთული დავალებების შესრულებაზე უარი თქვათ. შესაძლებელია საღამოს რთული ამოცანის წინაშე აღმოჩნდეთ. იმაზე, თუ როგორ მოაგვარებთ მას, ბევრი რამ არის დამოკიდებული.

მერწყული

დროა, ყველაფერი ზედმეტისგან გათავისუფლდეთ და საკუთარი ფიქრები, სამუშაო თუ საცხოვრებელი სივრცე მოაწესრიგოთ. სახლის ინტერიერში მცირე ცვლილებებიც კი პოზიტიურ ტენდენციებს მოიზიდავს. ბევრი მიიღებს დახმარებას, რომელსაც დიდი ხანია ელის.

თევზები

ამ დღეს მოლაპარაკების წარმატება მხოლოდ თქვენს ორატორულ უნარზეა დამოკიდებული. გავლენიან ადამიანთან ნაცნობობა ხელსაყრელ შეთავაზებას მოგიტანთ. ამ დღეს შეგიძლიათ ნებისმიერი ჩანაფიქრი განახორციელოთ. ვარსკვლავები გაფრთხილებენ, რომ ექსპერიმენტის ნებისმიერი მცდელობა უარეს შემთხვევაში საზიანო იქნება, უკეთეს შემთხვევაში კი არაეფექტური.

ბათუმი-ახალციხის გზის მონაკვეთზე საავტომობილო მოძრაობა დილამდე იზღუდება

ბათუმი-ახალციხის გზის პაქსაძეები-კორტოხის მონაკვეთზე საავტომობილო მოძრაობა დილამდე იზღუდება – ამის შესახებ ინფორმაციას საავტომობილო გზების დეპარტამენტი ავრცელებს. 

შიდასახელმწიფოებრივი მნიშვნელობის ბათუმი(ანგისა)-ახალციხის საავტომობილო გზის 88-ე კმ-ზე (პაქსაძეები-კორტოხის მონაკვეთი) მიმდინარე სამშენებლო სამუშაოების პროცესში, 2024 წლის 19 ივნისის 23:00 სთ-დან 20 ივნისის 07:00 სთ-მდე, საავტომობილო გზაზე ავტოტრანსპორტის მოძრაობა დროებით შეიზღუდება,” – ნათქვამია განცხადებაში. 

,,ჩინეთთან სავაჭრო-ეკონომიკური ურთიერთობების გაღრმავება თუ უნდა ევროპას, ამერიკას და ყველა ქვეყანას, ჩვენ რატომ არ უნდა გვინდოდეს?”- პაატა კვიჟინაძე

ჩინეთთან სავაჭრო-ეკონომიკური ურთიერთობების გაღრმავება თუ უნდა ევროპას, ამერიკას და ყველა ქვეყანას, ჩვენ რატომ არ უნდა გვინდოდეს? – ამის შესახებ საქართველოს პარლამენტის საფინანსო-საბიუჯეტო კომიტეტის თავმჯდომარემ, პაატა კვიჟინაძემ განაცხადა.

„ჩინეთი გლობალური მოთამაშეა, ჩინეთის ეკონომიკა უფრო დიდია, ვიდრე ევროკავშირის, როგორც არ უნდა დავთვალოთ. ამერიკის შემდეგ ჩინეთი მეორე ადგილზეა, თუ ნომინალში დავთვლით და თუ პარიტეტულ საწყისებზე დავთვლით, პირველ ადგილზეა, ამერიკას უსწრებს გამოშვებული პროდუქციის მიხედვით. ამიტომ ასეთ დიდ ქვეყანასთან სავაჭრო-ეკონომიკური ურთიერთობების გაღრმავება რატომ არ უნდა გვინდოდეს? თუ ეს უნდა ევროპას, ამერიკას და ყველა ქვეყანას, ჩვენ რატომ არ უნდა გვინდოდეს?“ – განაცხადა პაატა კვიჟინაძემ.

სოფელ წიწამურთან „ჯივიპის“ კუთვნილი მაგისტრალური მილსადენის დაზიანების ფაქტზე გამოძიება დაიწყო

სოფელ წიწამურთან „ჯივიპის“ კუთვნილი მაგისტრალური მილსადენის დაზიანების ფაქტზე გამოძიება დაიწყო.

როგორც უწყებაში აცხადებენ, მომხდართან დაკავშირებით გამოძიება სისხლის სამართლის კოდექსის 188-ე და 306-ე მუხლით მიმდინარეობს, რაც გაუფრთხილებლობით ნივთის დაზიანებას ან განადგურებას და უკანონო ქმედებით გარემოსათვის მნიშვნელოვანი ზიანის მიყენებას გულისხმობს.

,,ნებისმიერი ურთიერთობა ორმხრივია”- რატი იონათამიშვილი 

დარწმუნებული ვარ, ის განწყობები, რომლებიც არსებობს ქალბატონი ელჩის მიმართ ჩვენს ქვეყანაში, იქნება ერთ-ერთი საფუძველი იმისა, რომ ისეთი არაობიექტური და უსამართლო შეფასებები, რომლებიც გვქონდა აქამდე, აღარ იქნება დღის წესრიგში, – განაცხადა საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა „დღის ქრონიკაში“ შეერთებულ შტატებთან ურთიერთობებსა და აშშ-ის ელჩზე საუბრისას.

რატი იონათამიშვილმა აღნიშნა, რომ ნებისმიერი ურთიერთობა ორმხრივია, ორმხრივი პასუხისმგებლობის ნაწილია ნებისმიერი განვითარების ეტაპი და ერთ კონკრეტულ მხარეზე აპელირება ვერ გაკეთდება.

„ჩვენ არაერთხელ გვისაუბრია გლობალური ომის პარტიის პირდაპირ ინტერესებზე, რომელიც გააჩნია საქართველო მიმართ და ეს ინტერესები საერთოდ არ არის კავშირში ჩვენი მოქალაქეების ინტერესებთან. ამ ჯგუფისთვის არ არის მისაღები, რომ საქართველოში არ არის მორჩილი და რეზიდენტი ხელისუფლება, მაგრამ დარწმუნებული ვარ, ეს ჯგუფი არ გამოხატავს იმ ოფიციალურ პოზიციებს, რაც პირველ რიგში უნდა იყოს მეგობრობისთვის აუცილებლად. ცალკეული მოხელეების მხრიდან იყო მცდელობები, რომ მაქსიმალურად დაეზიანებინათ ეს მიმართულებები, რაღაც დონეზე მათ მიაღწიეს ამას, მაგრამ ახლა მნიშვნელოვანია, რომ ჩვენ პასუხისმგებლობით მოვეკიდოთ ამ საკითხებს.

დარწმუნებული ვარ, ის განწყობები, რომლებიც არსებობს ქალბატონი ელჩის მიმართ ჩვენს ქვეყანაში, ჩვენს მოქალაქეებში, იქნება ერთ-ერთი საფუძველი იმისა, რომ ისეთი არაობიექტური და უსამართლო შეფასებები, რომლებიც გვქონდა აქამდე, აღარ იქნება დღის წესრიგში და ყველას მოუწევს სიმართლისთვის თვალის გასწორება, როგორც მოხდა კანდიდატის სტატუსთან დაკავშირებით”, – განაცხადა რატიო იონათამიშვილმა.