ოკუპაციის პირობებში შეუძლებელია, ვისაუბროთ დიპლომატიური ურთიერთობების აღდგენაზე ან ურთიერთობის ნორმალიზებაზე, – ასე გამოეხმაურა საქართველოს საგარეო საქმეთა მინისტრი მაკა ბოჭორიშვილი რუსეთის ფედერაციის საგარეო საქმეთა მინისტრის მოადგილის, მიხაილ გალუზინის მიერ გაკეთებულ განცხადებას ორ ქვეყანას შორის დიპლომატიური ურთიერთობების აღდგენასთან დაკავშირებით.

„ყველამ კარგად იცის, რა არის პრობლემა საქართველოსა და რუსეთს შორის და რა უდგას წინ საქართველოსა და რუსეთს შორის დიპლომატიურ ურთიერთობებს. ეს არის ჩვენი ტეროტირების ოკუპაცია და სწორედ ეს არის რუსეთთან ურთიერთობის ნორმალიზების ნომერი ერთი შემაფერხებელი“,- აღნიშნა მინისტრმა.

მისივე თქმით, საინტერესოა, თუ როგორ ხდება მსგავსი განცხადებების გამოყენება ოპოზიციის მხრიდან საქართველოში.

„აქ არის მეორე საკითხი, თუ როგორ ხდება მსგავსი განცხადებების გამოყენება საქართველოში და ესეც ერთგვარად თითქოს სიცოცხლის ძალის მისანიჭებლად ხდება, რომ ოპოზიციურ ძალებს, დაცლილი დღის წესრიგის პირობებში ჰქონდეთ ახალი თემების შექმნის შესაძლებლობა, რაზეც გააკეთებენ კომენტარებს.

კიდევ ერთხელ: საკითხი მარტივია. საქართველოს აქვს ორი რეგიონი, რომელიც ოკუპირებულია რუსეთის მიერ და რა თქმა უნდა, ოკუპაციის პირობებში, ჩვენთვის შეუძლებელია დიპლომატიური ურთიერთობების აღდგენაზე საუბარი“, – აღნიშნა ბოჭორიშვილმა.

ჩემი [პრემიერ-მინისტრის თანამდებობიდან] გადადგომის მიზეზი იყო ის, რომ ადამიანი, რომელიც ქვეყანას და გუნდს დაპირდა, რომ პოლიტიკიდან სრულად და სამუდამოდ მიდიოდა, პროცესში სრულად შემოვიდა და პროცესი ისე მართა, რომ თითოეული თქვენგანის გადაწყვეტილებაზე იმოქმედა – რაღაც მომენტში ყველა გაქრა! როცა ბიძინასგან ზარი მიიღეთ, დაიმალეთ და გაქრით! ამის გამო მივიღე ის გადაწყვეტილება, რომელიც მივიღე! – ასე ახსნა გიორგი გახარიამ 2021 წლის 18 თებერვალს მთავრობის მეთაურის პოსტიდან გადადგომის თაობაზე მიღებული გადაწყვეტილება, რომელიც თავის მხრივ, ნიკა მელიას დაკავების საკითხს უკავშირდებოდა.

როგორც გახარიამ პარლამენტის საგამოძიებო კომისიის სხდომაზე განაცხადა, მის გადაწყვეტილებზე ზემოქმედება არავის მოუხდენია, გუნდი კი ბიძინა ივანიშვილმა შეაშინა.

“თქვენ შეგეშინდათ ბიძინასი, რომელმაც დაგირეკათ და გითხრათ: გაჩუმდით, ერთი ადგილი მიაყენეთ და რაც არის გასაკეთებელი გააკეთეთო! – თქვენ ამის შეგეშინდათ და მეტი არაფრის! მე ამიტომ გადავდექი“, – განაცხადა გახარიამ.

მან უპასუხა კითხვას, რატომ არ დააკავა ნიკა მელია, თუკი შს მაშინდელი მინისტრი ვახტანგ გომელაური დაკავებისთვის მზად იყო.

“თქვენ მელია დააკავეთ ისე და იმ ფორმით, რომ შემდეგ გაშვება მოგიწიათ – ნაცვლად იმისა, რომ მელია დღეს სასჯელს იხდიდეს, არის გარეთ! მელია ისე უნდა დაკავებულიყო, რომ ახლა გარეთ კი არ იყოს, უნდა იყოს ციხეში. თუ მელია დაკავებული იქნებოდა ისე, როგორც ის მაშინ დააკავეს, რა თქმა უნდა, წარმოდგენა მქონდა, რომ ის გარეთ იქნებოდა. მელია ისე უნდა დაკავებულიყო, რომ ამნისტიის საკითხი არ დამდგარიყო. ეს არის მთავარი!“, – განაცხადა გიორგი გახარიამ.

ისეთი შთაბეჭდილება მაქვს, რომ „ნაცების“ კომისიაში ვარ მოსული – არ ჩამოგეყვანათ გავრილოვი, სავარძელში არ ჩაგესვათ და დამთავრდებოდა ყველაფერი! – ამის შესახებ შს ყოფილმა მინისტრმა, პარტია „გახარია საქართველოსთვის“ ლიდერმა, გიორგი გახარიამ, პარლამენტის დროებითი საგამოძიებო კომისიის სხდომაზე განაცხადა.

მისივე თქმით, მაკო გომურს ზუსტად ისე იყენებენ კომისიაზე, როგორც მას „ნაციონალური მოძრაობა“ იყენებს.

„ამ გეგმაში უნდა ჩაგეწერათ, თუ ეს გეგმა სპეცოპერაციამდეა ხელმოწერილი, სადაც იქნებოდა სპეცსაშუალებებში, ასევე შესაბამის ფურცელზე ჩაწერილი, რომ მისატანი იყო ადგილზე რკინის კედლები. რკინის ღობე, ჯებირი ნამდვილად, რომელიც თან ახლავს პარლამენტს, რაც თავი მახსოვს, ბავშვობიდანაც გემახსოვრებათ. ეს ჯებირი ყოველთვის იყო თაღებში. არ იყო საკმარისი? მე ხომ არ მოვიტანდი უცხოეთიდან, იუსტიციის მინისტრი, იღლიით რკინის კედლებს? მოგეტანათ რკინის კედლები! ამხელა უწყება გქონდათ. ბრძანებაში არ წერია რკინის კედელი, ახლა იძახით რკინის კედელი არ იყოო. რაც იყო, იმ ჯებირის უკან მაინც დაგეყენებინათ?!“- განაცხადა წულუკიანმა, რასაც გახარიამ უპასუხა, რომ გავრილოვი რომ არ ჩამოეყვანათ, ამით დამთავრდებოდა ყველაფერი.

„არ ჩამოგეყვანათ გავრილოვი, სავარძელში არ ჩაგესვათ და დამთავრდებოდა ყველაფერი. არაფერს გავურბივარ. აბსურდულ საკითხებს ეხებით, ეს აბსურდია“, – განაცხადა გახარიამ.

ამასთან, წულუკიანმა მიმართა გახარიას და დაინტერესდა, თუ რატომ იტყუება, როცა ამბობს, რომ ოპერაციის შესახებ აზრი ამ საქმის მცოდნე ადამიანებს კითხა.

„რატომ არ დაეკითხეთ უფრო კომპეტენტურს პროფესიით. ვიღაც გეტყოდათ, ვინც იცოდა ეს, რომ გაწიე სპეცრაზმელები ჯებირის უკან, არცერთს შეითრევდა აქციაზე მონაწილე თავის წიაღში და არ გაჩნდებოდა სიცოცხლის საფრთხე. კითხეთ თუ არა ვიღაცას რჩევა? რომ ამბობთ, რომ კითხეთ, ეს არის მტკნარი ტყუილი!“ – განაცხადა წულუკიანმა, რასაც გახარიამ უპასუხა, რომ თავად ის იტყუება.

„დიახ, ვკითხე! თქვენ ახლა იტყუებით. წარმოდგენა არ გაქვთ ორ ადამიანს შორის რა საუბარი იყო და რა კითხვებს ვუსვამდით. ის საკითხიც, რომელიც თქვენ დააყენეთ, იქ ღობე არსებობდაო, ფოტოებს გამოგიგზავნით, როგორი ღობე არსებობდა. იმის მაგივრად, რომ ამ მძიმე ღამისა და ამ მძიმე კრიზისის წყარო რა იყო იმაზე საუბრობდეთ, მესაუბრებით ღობეზე და ზუსტად ისე როგორც „ნაცები“ იყენებენ მაკო გომურს, ზუსტად ისე იყენებთ მაკო გომურს. ისეთი შთაბეჭდილება მაქვს, რომ „ნაცების“ კომისიაში ვარ მოსული“, – განაცხადა გახარიამ, რასაც წულუკიანმა უპასუხა, რომ „ნაცებთან“ დგას თავად ის.

„ნაცებთან“ თქვენ დგახართ. „ნაცების“ კომისიაში როცა იყავით მოსული, ხორავას საქმეზე, ნაკლებად ყინჩად გამოიყურებოდით“, – აღნიშნა წულუკიანმა.

ვეცდები ცოტა სწრაფად ვილაპარაკო, რადგან „ვბუქსაობთ“, – ამ სიტყვებით მიმართა შს ყოფილმა მინისტრმა, პარტია „გახარია საქართველოსთვის“ ლიდერმა გიორგი გახარიამ პარლამენტის დროებითი საგამოძიებო კომისიის წევრს, ალუდა ღუდუშაურს დასმული კითხვის საპასუხოდ.

გახარიას ამ რეპლიკას კომისიის თავმჯდომარემ თეა წულუკიანმა უპასუხა.

„ბატონო გიორგი, თქვენ აღარ ხართ ჩვენი პრემიერ-მინისტრი, ძალიან გთხოვთ, „ვბუქსაობთ“, არ „ვბუქსაობთ“…., – მიმართა მას წულუკიანმა, რასთან დაკავშირებითაც, გახარიამ განაცხადა, რომ, აღნიშნულზე პრეტენზია არც აქვს.

„არ მაქვს პრეტენზია ქალბატონო თავმჯდომარე“, – განაცხადა ყოფილმა შს მინისტრმა, რასაც კვლავ წულუკიანმა უპასუხა და შეახსენა, რომ სხდომა მას მიჰყავს.

„სხდომა აქ მიმყავს მე და თქვენ ხართ ის, ვინც პასუხებს იძლევა კითხვებზე, „ვბუქსაობთ“ თუ არ „ვბუქსაობთ“, ამას მე გადავწყვეტ, დაგვჭირდება საღამომდე დრო? ვისხდებით აქ საღამომდე, ჩვენ არსად არ გვეჩქარება და თქვენ მითუმეტეს სად უნდა გეჩქარებოდეთ“, – განაცხადა წულუკიანმა.

აღნიშნულის შემდეგ კომისიის კიდევ ერთმა წევრმა, სოზარ სუბარმა გახარიას შეახსენა, რომ დასმულ კითხვებზე პასუხი უნდა გასცეს.

„ის, რომ თქვენ გამოძიებაში მიცემული გაქვთ ჩვენება, რაც თქვენი ვალდებულებაა, ეს არანაირად არ ნიშნავს, რომ აქ ჩვენებების მოცემას თავი აარიდოთ, კითხვა როცა დაისმება, პასუხი უნდა გასცეთ, ისიც გამოძიებაა, ესეც პარლამენტის საგამოძიებო კომისიაა და ვალდებული ხართ, ზუსტად ისე გასცეთ პასუხი, როგორც პროკურატურაში გაეცით, სადღაც, ოდესღაც პასუხი მივეცი, ორჯერ, თუ სამჯერ, ეს აქ პასუხი არ არის“, – განაცხადა სუბარმა, რის შემდეგაც, ღუდუშაურმა მის ყოფილ თანაგუნდელს მოუწოდა, „ხაბეიშვილს არ დამსგავსებოდა“.

„ჩვენ საქმიანად და აკადემიურად ვუდგებით, „ნაცები“ ახსენეთ და შოუს მოწყობები ხომ კარგად გახსოვთ, თქვენი დეპუტატები იყვნენ ვაშაძეები და სხვები, ნუ დაემსგავსებით, მთლად ხაბეიშვილის დონეზე ნუ დაეცემით“, – განაცხადა ღუდუშაურმა.

სპეციალური საშუალებების გამოყენების ბრძანება არც მე და არც ჩემს მოადგილეებს არ გაუციათ, – ამის შესახებ შინაგან საქმეთა ყოფილმა მინისტრმა, პარტია „გახარია საქართველოსთვის“ ლიდერმა, გიორგი გახარიამ პარლამენტის დროებით საგამოძიებო კომისიის სხდომაზე განაცხადა, რითაც 20 ივნისის მოვლენებზე კომისიის თავმჯდომარის, თეა წულუკიანის კითხვას უპასუხა.

გახარიას განმარტებით, მან მხოლოდ ცრემლსადენის გაზის და წყლის ჭავლის გამოყენების ბრძანება გასცა.

„ბრძანება სპეციალური საშუალებების გამოყენებასთან დაკავშირებით, შესაბამისი გეგმის და პოლიციის შესახებ კანონის შესაბამისად, იმ შემთხვევებში, როდესაც ეს ეხებოდა ცრემლსადენ გაზს, გავეცი მე, იმ შემთხვევაში, როდესაც ეხებოდა წყლის ჭავლს – გავეცი მე. სხვა შემთხვევებში, სპეციალური საშუალებების გამოყენების ბრძანება არც მე და არც ჩემს მოადგილეებს არ გაუციათ. ზუსტად იგივე პასუხი არის დაკითხვის ოქმში,“ – განაცხადა გახარიამ.

კითხვაზე: ვინ გასცა სპეციალური საშუალებების [რეზინის ტყვიების] გამოყენების ბრძანება, გახარიამ აღნიშნა, რომ მისთვის უცნობია, ვინ გასცა სხვა სპეციალური საშუალებების გამოყენების ბრძანება.

„მე რომ მცოდნოდა, [ჩემთვის] ცნობილი რომ ყოფილიყო, რომ ასეთ ბრძანება არსებობდა, ან ვინმემ გასცა, რა თქმა უნდა, მე ამას დაკითხვის დროს, გამოძიებას შევატყობინებდი,“ – განაცხადა გახარიამ.

კომისიის თავმჯდომარის, თეა წულუკიანის კითხვაზე, თუ რა თანმიმდევრობით გამოიყენა სხვადასხვა საშუალებები, რომელზეც მან გასცა ბრძანება, გახარია პასუხობს, რომ ჯერ ცრემლსადენი გაზი, შემდეგ კი ჭავლი.

„ზუსტად იმ თანმიმდევრობით, რომელიც არის პოლიციის შესახებ კანონში. ჯერ ცრემლსადენი გაზი, შემდეგ წყლის ჭავლი,“ – განაცხადა გახარიამ.

წულუკიანის კითხვაზე, თუ რა მომენტში იქნა გამოყენებული ტყვიები, გახარია პასუხობს, რომ „სადღაც შუაში, ცრემლსადენ გაზსა და წყალს შორის“.

„როგორც მახსოვს, ეს მოხდა სადღაც შუაში. [ცრემლსადენ გაზსა და წყალს შორის?] დიახ,“ – განაცხადა გახარიამ.წულუკიანმა გახარიას ასევე ჰკითხა, თუ სად იმყოფებოდა ოპერაციის მართვის პერიოდში, რაზეც გახარიამ უპასუხა, რომ თავიდან შინაგან საქმეთა სამინისტროში იმყოფებოდა, შემდეგ კი პარლამენტში გადაინაცვლა. ამასთან, გახარია ამბობს, რომ 20 ივნისის მოვლენების დროს, პარლამენტი „ქართული ოცნების“ წევრებისგან დაცლილი იყო.

„ნაწილობრივ სამინისტროდან, შემდეგ პარლამენტში, რომელიც დაცლილი იყო, სხვათა შორის. გატენილი იყო „ნაცებით“ და „ქართული ოცნების“ არც ერთი წარმომადგენელი აქ არ იყო. შემდეგ ძლივს ვეძებეთ და ესე ცალ-ცალკე ვეცადეთ, რომ „ოცნების“ წარმომადგენლები შენობაში დაგვებრუნებინა. ესეც სიმართლეა,“ – განაცხადა გახარიამ.