Home Blog Page 3

საქართველო მზად არის პარტნიორებთან ურთიერთობის გასაღრმავებლად და ევრაზიულ სატრანზიტო მარშრუტებში საკუთარი როლის გასაძლიერებლად – მაკა ბოჭორიშვილი

საქართველოს სტრატეგიული მნიშვნელობა კიდევ უფრო გადამწყვეტი გახდა ბოლო დროს განვითარებული მოვლენების ფონზე, განსაკუთრებით უკრაინის წინააღმდეგ რუსეთის ომის დაწყების შემდეგ, – განაცხადა საგარეო უწყების ხელმძღვანელმა მაკა ბოჭორიშვილმა სიტყვით გამოსვლისას ხორვატიაში, დუბროვნიკის ფორუმის ფარგლებში შემდგარ პანელურ დისკუსიაზე „ევროპისა და აზიის დაკავშირება: გზა პარტნიორობისა და კეთილდღეობისკენ”.

მინისტრმა ყურადღება გაამახვილა საქართველოს როლზე რეგიონულ სატრანსპორტო და ენერგეტიკულ კავშირებში, ისაუბრა ევროკავშირთან, აზიისა და აღმოსავლეთის ქვეყნების დაკავშირების შესაძლებლობებზე და აღნიშნა, რომ საქართველოს მიზანია გახდეს ვაჭრობისა და ეკონომიკური თანამშრომლობის დამაკავშირებელი ჰაბი.

„ჩვენ უზარმაზარი პოტენციალი გვაქვს და აქტიურად ვმუშაობთ შუა დერეფნის განვითარებაზე, ცენტრალური აზიისა და აღმოსავლეთის ქვეყნებთან თანამშრომლობით. ეს საკვანძოდ მნიშვნელოვანია როგორც ევროპისთვის, ასევე ჩვენი რეგიონისთვის“, – განაცხადა მაკა ბოჭორიშვილმა.

მინისტრმა თავის გამოსვლაში ისაუბრა საქართველოს ეკონომიკურ წარმატებაზე და რეგიონული თანამშრომლობის მნიშვნელობაზე. მან აღნიშნა, რომ საქართველო ეკონომიკური თავისუფლების, ღია ბაზრებისა და ბიზნესისთვის საიმედო გარემოს დამსახურებით, წარმატებული რეფორმებისა და სწრაფი განვითარების მაგალითად იქცა, რაც საერთაშორისოდაა აღიარებული.

„ამგვარი ეკონომიკური სტაბილურობა სასიცოცხლოდ მნიშვნელოვანია ჩვენი ევროპული მომავლისთვის, რადგან ევროკავშირში ინტეგრაცია მოითხოვს თანმიმდევრულ განვითარებას, ეკონომიკურ ზრდასა და უწყვეტ რეფორმებს’’, – განაცხადა საგარეო უწყების ხელმძღვანელმა და ხაზი გაუსვა საერთაშორისო რეიტინგებში საქართველოს მოწინავე პოზიციებს.

საქართველო-ევროკავშირის შესახებ საუბრისას, მაკა ბოჭორიშვილმა აღნიშნა, რომ საქართველო ევროპული ქვეყანაა მკაფიოდ ჩამოყალიბებული ევროპული იდენტობითა და საუკუნოვანი ევროპული მისწრაფებებით.

„ჩვენ მტკიცედ გვჯერა, რომ საქართველოს გარეშე, ევროპაში უსაფრთხოებისა და სტაბილურობის მიღწევა რთული იქნება, ხოლო ძლიერი, ეკონომიკურად მდგრადი, მშვიდობიანი და სტაბილური ევროკავშირის შესახებ ხედვა – არასრული’’ – განაცხადა საგარეო საქმეთა მინისტრმა.

მაკა ბოჭორიშვილმა გამოსვლაში აღნიშნა, რომ რუსეთის ოკუპაცია საქართველოს უსაფრთხოების მთავარ საფრთხედ რჩება და საქართველოში არსებული ვითარების შეფასებისას, მნიშვნელოვანია ობიექტურობის შენარჩუნება, ფართო გეოპოლიტიკური კონტექსტის გათვალისწინება და საქართველოს როლის აღიარება.

2025 წლის 11-12 ივლისს საქართველოს საგარეო საქმეთა მინისტრი მაკა ბოჭორიშვილი ვიზიტით იმყოფება ხორვატიაში, სადაც ხორვატიის საგარეო საქმეთა მინისტრ გორდან გრლიჩ რადმანის მიწვევით დუბროვნიკის 2025 წლის ფორუმში მონაწილეობს. აღნიშნული ფორუმი წარმოადგენს საერთაშორისო დიალოგის მნიშვნელოვან პლატფორმას, სადაც მონაწილეები რეგიონულ, ევროპულ და გლობალურ გამოწვევებზე, მათი გადაჭრის გზებზე, გეოპოლიტიკურ ცვლილებებზე და თანამშრომლობის ახალ შესაძლებლობებზე მსჯელობენ.

კონფერენციაში მონაწილეობენ სხვადასხვა სახელმწიფოს პოლიტიკური ლიდერები, საგარეო საქმეთა მინისტრები, ექსპერტები და აკადემიური სფეროს წარმომადგენლები და სხვა მაღალი რანგის ოფიციალური პირები.

ვიზიტის ფარგლებში, მაკა ბოჭორიშვილმა გამართა ორმხრივი შეხვედრები კოლეგა მინისტრებთან.

ტრამპი უკრაინისთვის ახალი დაფინანსების გამოყოფაზე ფიქრობს – CBS

დონალდ ტრამპი უკრაინისთვის ახალი დაფინანსების გამოყოფას გეგმავს. ინფორმაციას CBS News-ი წყაროზე დაყრდნობით ავრცელებს.

დიპლომატიური წყაროების ინფორმაციით, ახალი დაფინანსება შესაძლოა პასუხი იყოს რუსეთის მიერ უკრაინის წინააღმდეგ დრონებითა და რაკეტებით მასშტაბურ თავდასხმებზე. დამტკიცების შემთხვევაში, ეს იქნება პირველი ახალი დახმარება მას შემდეგ, რაც ტრამპი იანვარში უფლებამოსილების შესრულებას შეუდგა.

მანამდე ტრამპმა განაცხადა, რომ აშშ უკრაინას დამატებით თავდაცვით იარაღს მიაწვდის, რათა ქვეყანამ საკუთარი თავის დაცვა შეძლოს.

დასავლეთმა სსრკ-ს დაშლის შემდეგ რუსეთის ინტერესების იგნორირება გადაწყვიტა – ვლადიმერ პუტინი

სსრკ-ს დაშლის შემდეგ, დასავლეთმა გადაწყვიტა, რომ ისინი იცხოვრებდნენ იმ წესებით, რომლებიც თავად შექმნეს, რუსეთის ინტერესების უგულებელყოფით, – ამის შესახებ რუსეთის პრეზიდენტმა, ვლადიმერ პუტინმა განაცხადა.

„იმის გათვალისწინებით, რომ საბჭოთა კავშირმა აუტოდაფე მოახდინა, თვითლიკვიდაცია მოახდინა, ისინი ითვალისწინებდნენ, რომ რუსეთი გახდებოდა ე.წ. ცივილიზებული სამყაროს ნაწილი. დასავლეთში გადაწყვიტეს: კარგი, საბჭოთა კავშირი არ არსებობს, რატომ უნდა დავიცვათ წესები რუსეთთან მიმართებაში, რომელსაც არ აქვს ის პოტენციური ძალა, რაც საბჭოთა კავშირს ჰქონდა; კარგი, ახლა ჩვენ რაღაცას ისე გამოვთვლით, როგორც გვინდა და ვიცხოვრებთ იმ წესებით, რომლებიც ჩვენ თვითონ შევქმენით ჩვენთვის, რუსეთის ინტერესების იგნორირებით“, – განაცხადა პუტინმა.

მისი თქმით, სსრკ-ს დაშლის შემდეგ, დასავლეთს რუსეთზე გეოპოლიტიკური უპირატესობის მიღწევა სურდა.

მისი მტკიცებით, სსრკ-ს დაშლის შემდეგ, დასავლეთმა შეინარჩუნა აგდებული დამოკიდებულება რუსეთის ფედერაციის სახელმწიფო სტრატეგიული ინტერესების მიმართ.

„ეს იყო არა მხოლოდ აგდებული დამოკიდებულება, არამედ ეს ყველაფერი დაკავშირებული იყო გარკვეული გეოპოლიტიკური უპირატესობის მიღწევის აშკარა სურვილთან“, – აღნიშნა პუტინმა.

აშშ-სთან ბირთვულ საკითხებზე მოლაპარაკებებში ჩავერთვებით, თუ იქნება მტკიცე გარანტია, რომ ირანის ბირთვულ ობიექტებზე თავდასხმა აღარ განხორციელდება – ირანის საგარეო მინისტრი

ირანის საგარეო საქმეთა მინისტრის, აბას არაღჩის განცხადებით, მისი ქვეყანა მზად იქნება, ვაშინგტონთან ბირთვულ პროგრამასთან დაკავშირებულ მოლაპარაკებებში ხელახლა ჩაერთოს, თუ მის წინააღმდეგ თავდასხმების შეწყვეტის გარანტიებს მიიღებს.

„პირველ რიგში, უნდა არსებობდეს მტკიცე გარანტია, რომ ასეთი ქმედებები აღარ განმეორდება. ირანის ბირთვულ ობიექტებზე თავდასხმამ მოლაპარაკებებზე დაფუძნებული გადაწყვეტის მიღწევა კიდევ უფრო გაართულა“, – აღნიშნა ირანის საგარეო უწყების ხელმძღვანელმა.

შეგახსენებთ, არაღჩი ზაფხულში ბირთვულ საკითხებზე მიმდინარე მოლაპარაკებებში ირანის წამყვანი მომლაპარაკებელი იყო. მოლაპარაკებები მას შემდეგ ჩაიშალა, რაც ისრაელმა 13 ივნისს ირანის ბირთვულ ობიექტებზე დარტყმები განახორციელა. რამდენიმე დღეში, 22 ივნისს კი ირანის ბირთვულ ობიექტებს შეერთებულმა შტატებმაც დაარტყა.

პოლიციამ თბილისში ნარკოდანაშაულის ბრალდებით 4 პირი დააკავა – შსს

შინაგან საქმეთა სამინისტროს თბილისის პოლიციის დეპარტამენტის გლდანი-ნაძალადევის და ისანი-სამგორის მთავარი სამმართველოების თანამშრომლებმა, სხვადასხვა დროს ჩატარებული ოპერატიული ღონისძიებებისა და საგამოძიებო მოქმედებების შედეგად, ნარკოდანაშაულის ბრალდებით 4 პირი დააკავეს.

ამის შესახებ ინფორმაციას შინაგან საქმეთა სამინისტრო ავრცელებს.

მათივე ცნობით, დანაშაულები 20 წლამდე ვადით თავისუფლების აღკვეთას ითვალისწინებს.

„დიდი და განსაკუთრებით დიდი ოდენობით ნარკოტიკული საშუალებების, ფსიქოტროპული ნივთიერების და მარიხუანის უკანონო შეძენა-შენახვის, რეალიზაციის მცდელობის და რეალიზაციის ხელშეწყობის, ასევე, ნარკოტიკული საშუალების ექიმის დანიშნულების გარეშე უკანონო მოხმარების ფაქტებზე, 2005 წელს დაბადებული ს.გ., 1999 წელს დაბადებული ა.ყ., 1998 წელს დაბადებული გ.ყ. და წარსულში ნასამართლევი 1992 წელს დაბადებული ვ.გ. დააკავეს.

დანაშაულები 20 წლამდე ვადით თავისუფლების აღკვეთას ითვალისწინებს.

სამართალდამცველებმა დაკავებულების პირადი, ავტომობილების და საცხოვრებელი სახლების ჩხრეკისას, ასევე, მათ მიერ მითითებული ლოკაციებიდან ნივთმტკიცებად ამოიღეს, ნარკოტიკული საშუალებები, მათ შორის „მეთადონი“, „პრეგაბალინი“, „კეტამინი“, „მდმა“, და „გამომშრალი მარიხუანა“.

საგამოძიებო მოქმედებების შედეგად, პოლიციის მიერ, ასევე, ამოღებულია ნარკოტიკული საშუალების დაფასოებისთვის საჭირო მასალები, წებოვანი ლენტები, პოლიეთილენის ჩამკეტიანი პარკები და ელექტრო სასწორი.

გამოძიება სისხლის სამართლის კოდექსის 260-ე მუხლით, 260-ე კვარტა, 261-ე, 19-260-ე ტერცია მუხლით და 273 -ე მუხლით მიმდინარეობს“, – ნათქვამია ინფორმაციაში.

18 ევროპელი ჩინოვნიკის წერილი კიდევ ერთხელ შეგვახსენებს, რამდენად ღრმად არის ევროკავშირის ქვეყნების უდიდეს უმრავლესობაში და დიდ ბრიტანეთში ფესვგადგმული „დიპ სტეიტის“ არაფორმალური მმართველობა – „ქართული ოცნება“

18 ევროპელი ჩინოვნიკის წერილი კიდევ ერთხელ შეგვახსენებს, თუ რამდენად ღრმად არის ევროკავშირის ქვეყნების უდიდეს უმრავლესობაში და დიდ ბრიტანეთში ფესვგადგმული „დიპ სტეიტის“ არაფორმალური მმართველობა, რომლის პირობებშიც ევროპულ ბიუროკრატიაში არავითარი მორალური ზღვარი აღარ არსებობს,- ამის შესახებ „ქართული ოცნების“ პოლიტიკური საბჭოს განცხადებაშია ნათქვამი, რითაც ეხმაურებიან 17 ევროპული ქვეყნისა და ევროკავშირის უმაღლესი წარმომადგენლის განცხადებას.

ამასთან, აღნიშნულია, რომ დღეს ევროპა დემოკრატიულ უკუსვლას და უმძიმეს ღირებულებით კრიზისს განიცდის. ევროპული სახელმწიფოების უმრავლესობა „დიპ სტეიტის“ პრინციპული გავლენის ქვეშ მოქმედებს.

“ქართული ოცნების განცხადებით, ბოლო დროს განვითარებული მოვლენები “აღრმავებს საფუძვლიან ეჭვს იმასთან დაკავშირებით, რომ თავის დროზე „დიპ სტეიტმა“ დიდი ბრიტანეთი ევროკავშირს კონკრეტული მიზნით დააშორა”. „ბრექსიტის“ საფუძველზე კი ჩამოყალიბდა მესამე, განცალკევებული ცენტრი, რომელიც „დიპ სტეიტის“ გლობალური დღის წესრიგის რეალიზებას ემსახურება.

პარტია გამოხატავს “სრულ მზაობას”, ითანამშრომლოს ნებისმიერ სახელმწიფოსთან, რომელსაც “საქართველოსთან სამართლიანი თანამშრომლობის სურვილი აქვს”. აღინიშნება, რომ “მნიშვნელოვანია, ყველამ გააცნობიეროს, რომ როგორც საქართველოს სჭირდება ევროპა, ისე, არანაკლებ, ევროკავშირსაც ჭირდება საქართველო”.

„17 ევროპული სახელმწიფოს საგარეო საქმეთა მინისტრებისა და ევროკავშირის უმაღლესი წარმომადგენლის ხელმოწერით გავრცელდა წერილი, რომელიც, სამწუხაროდ, უნდა შეფასდეს როგორც მორიგი უხეში და უსამართლო თავდასხმა ქართველ ხალხზე და ქართულ დემოკრატიაზე. განცხადება გაჯერებულია საბჭოური სტილის დეზინფორმაციით და ცრუ ბრალდებებით. შესაბამისად, მოვუწოდებთ წერილის თითოეულ ხელმომწერს, საკუთარ განცხადებებს მომავალში მეტი პასუხისმგებლობით მოეკიდონ.

ქართველი ხალხის წინააღმდეგ ორკესტრირებულ თავდასხმას, რომელმაც 26 ოქტომბრის შემდეგ ახალი შინაარსი შეიძინა, აქვს ერთადერთი მიზეზი – ქართველმა ხალხმა არ დაუშვა ხელისუფლებაში „დიპ სტეიტის“ აგენტურის, კოლექტიური „ნაცმოძრაობის“ დაბრუნება, რასაც ღიად გულშემატკივრობდნენ ევროკავშირის ელჩი საქართველოში და კონკრეტული ევროპელი და ყოფილი ამერიკელი ჩინოვნიკები.

ყველა ხედავს, რომ საპარლამენტო არჩევნების ლეგიტიმურობას ვერავინ აყენებს ეჭქვეშ. გარდა ობიექტური სინამდვილისა, არჩევნების ლეგიტიმურობას ამყარებს როგორც ეუთო/ოდირის დასკვნა, ისე ეუთოს ხელმძღვანელი თანამდებობის პირების განცხადებები, მათ შორის ეუთოს გენერალური მდივნის რამდენიმე დღის წინანდელი განცხადება იმის შესახებ, რომ 2024 წლის არჩევნები ქართველი ხალხის ნებას სრულად ასახავდა. აშკარაა, რომ ევროპელი ჩინოვნიკები არა არჩევნების შინაარსით, არამედ მისი შედეგით არიან უკმაყოფილო.

18 ევროპელი ჩინოვნიკის განცხადებაში მოცემული ერთ-ერთი დეზინფორმაცია უკავშირდება რადიკალი პოლიტიკოსების დაპატიმრებას, რომელსაც „პოლიტიკურად მოტივირებულს“ უწოდებენ და მის მიზნად ადგილობრივი არჩევნების წინ „პოლიტიკური ოპოზიციის ჩახშობას“ ასახელებენ. პირველ რიგში, ყველას უნდა შევახსენოთ, რომ დაპატიმრებული პოლიტიკოსებიდან, ადგილობრივი თვითმმართველობის არჩევნებში მონაწილეობას მხოლოდ მამუკა ხაზარაძე და ბადრი ჯაფარიძე გეგმავდნენ/გეგმავენ. ხელმომწერ ჩინოვნიკებს ისიც უნდა შევახსენოთ, რომ კანონი, რომლის საფუძველზეც პოლიტიკოსებს პატიმრობა შეეფარდათ, საქართველოში სამი ათეული წლის წინ არის მიღებული და ის ევროპულ პრაქტიკას და სტანდარტებს სრულად შეესატყვისება. შესაბამისი სისხლის სამართლის საქმეები სრულიად მარტივი და გამჭვირვალეა. კონკრეტული პოლიტიკოსები არ გამოცხადდნენ საპარლამენტო საგამოძიებო კომისიაში, რისთვისაც კანონმდებლობა 1 წლამდე თავისუფლების აღკვეთას ითვალისწინებს და ამ დანაშაულისთვის მათ 7-8 თვით თავისუფლების აღკვეთა შეეფარდათ. ვინც გამოცხადდა, მას არც არავითარი სასჯელი შეფარდებია. მეტიც, სწორედ თვითმმართველობის არჩევნების კონტექსტში, საქართველოს პრეზიდენტმა, მიხეილ ყაველაშვილმა განაცხადა, რომ შეიწყალებდა ყველა პოლიტიკოსს, რომელიც არჩევნებში მონაწილეობის სურვილს გამოთქვამდა და შესაბამისი განცხადებით პრეზიდენტს მიმართავდა. თუმცა, ამ შემთხვევაშიც რადიკალმა პოლიტიკოსებმა გამოხატეს სრული უპატივცემულობა სახელმწიფო ინსტიტუტის მიმართ, რასაც ევროპელი ჩინოვნიკები მდუმარე მხარდაჭერით შეხვდნენ.

წერილი შეიცავს კიდევ ერთ დეზინფორმაციას იმის შესახებ, რომ, თითქოს, აქტივისტები „უსამართლოდ არიან დაკავებული“. ეს განცხადება სხვა არაფერია, თუ არა იმ ფაქტის მორიგი ლუსტრაცია, რომ გასული წლის ნოემბერ-დეკემბერში ხელისუფლების დამხობის მცდელობა და მომიტინგეების ბრუტალური ძალადობა სწორედ გარედან იყო მხარდაჭერილი. ყველას კარგად მოეხსენება, რომ ლეგიტიმური ხელისუფლების დამხობის ძალადობრივ მცდელობას გაუმჭვირვალედ აფინანსებდნენ USAID, NED, EED და სხვა მსგავსი ფონდები და ღიად უჭერდნენ მხარს კონკრეტული ევროპელი და ყოფილი ამერიკელი ჩინოვნიკები. მათვე შერაცხეს ბრუტალური ძალადობა „მშვიდობიან პროტესტად“, რასაც საბჭოური პროპაგანდაც კი არ იკადრებდა. როგორც ცნობილია, მოძალადე მომიტინგეების მიმართ წარმართული ყველა პროცესი არის სრულიად გამჭვირვალე. ამასთან, დეზინფორმაციით გაჯერებულ წერილზე ხელმომწერ ჩინოვნიკებს შევახსენებთ, რომ რამდენიმე ასეული მოძალადიდან მხოლოდ 30-მდე მოძალადეა დაკავებული, რაც გამოძიების მაღალ სტანდარტს ადასტურებს. ხელმომწერებს ასევე შევახსენებთ, რომ დიდ ბრიტანეთში, გერმანიაში, საფრანგეთში, შვედეთში, ესპანეთში და სხვა შესაბამის ევროპულ ქვეყნებში პოლიციელზე თავდასხმისთვის მრავალწლიანი (მათ შორის 5-8 წელი) პატიმრობაა გათვალისწინებული.

როდესაც ვინმეს პოლიტიკურ დევნაზეა საუბარი, ყველას გვინდა შევახსენოთ, რომ თუკი სადმე შეიძინა პოლიტიკური ელფერი პოლიტიკოსების სამართლებრივმა დევნამ, ეს სწორედ გერმანია და საფრანგეთია. გერმანიასა და საფრანგეთში მთავარი ოპოზიციური პარტიებისა და მათი ლიდერების დევნის ფონზე, მათი მხრიდან პოლიტიკურ დევნაზე საუბარი, რბილად რომ ვთქვათ, ღიმილისმომგვრელია. ასევე, უნდა გავიხსენოთ რუმინეთში მომხდარი გაუგონარი ამბავი, როდესაც საპრეზიდენტო არჩევნების პირველ ტურში გამარჯვებულ კანდიდატს ჯერ არჩევნები საერთოდ გაუუქმეს, ხოლო მოგვიანებით სისხლის სამართლის საქმე აღუძრეს და არჩევნებში მონაწილეობა აუკრძალეს. ევროპული ბიუროკრატიისგან, რომელმაც დემოკრატიის ფეხქვეშ გათელვის ამ აქტს სრული მხარდაჭერა გამოუცხადა, ქართული დემოკრატიის დაწუნება სრულიად უადგილოა.

შემაშფოთებელია დეზინფორმაციით გაჯერებულ წერილში მოცემული დირექტივაც იმის შესახებ, რომ უნდა „გაუქმდეს ბოლო დროს მიღებული რეპრესიული კანონები“. საუბარია კანონებზე, რომელთა მიზანი გარე დაფინანსებით საქართველოს სუვერენიტეტის დარღვევისა და სახელმწიფო ინსტიტუტების დასუსტების აღკვეთაა. ყველა ეს კანონი სრულ შესაბამისობაშია სამართლებრივ პრინციპებთან და სტანდარტებთან. აქედან გამომდინარე, ყოველგვარი არგუმენტის გარეშე საქართველოს პარლამენტისთვის იმის მითითება, თუ რა კანონი უნდა მიიღოს და რა არა, საპარლამენტო სუვერენიტეტის უხეში ხელყოფა და ქართველი ხალხის შეურაცხყოფაა.

18 ევროპელი ჩინოვნიკის წერილი კიდევ ერთხელ შეგვახსენებს, თუ რამდენად ღრმად არის ევროკავშირის ქვეყნების უდიდეს უმრავლესობაში და დიდ ბრიტანეთში ფესვგადგმული „დიპ სტეიტის“ არაფორმალური მმართველობა, რომლის პირობებშიც ევროპულ ბიუროკრატიაში არავითარი მორალური ზღვარი აღარ არსებობს. არსებობს ერთადერთი პრინციპი – ქვეყანას მართავს „დიპ სტეიტის“ აგენტურა ან ის ხდება გამუდმებული თავდასხმის ობიექტი ევროპელი ჩინოვნიკების მხრიდან. ერთადერთი, რასაც ვერ პატიობენ, საქართველოს, უნგრეთს, სლოვაკეთს და სერბეთს, სწორედ დამოუკიდებლობა და სუვერენიტეტია.

ბოლო დროს განვითარებული მოვლენები აღრმავებს საფუძვლიან ეჭვს იმასთან დაკავშირებით, რომ თავის დროზე „დიპ სტეიტმა“ დიდი ბრიტანეთი ევროკავშირს კონკრეტული მიზნით დააშორა. „ბრექსიტის“ საფუძველზე, ჩამოყალიბდა მესამე, განცალკევებული ცენტრი, რომელიც „დიპ სტეიტის“ გლობალური დღის წესრიგის რეალიზებას ემსახურება. უნდა გავიხსენოთ დიდი ბრიტანეთის ყოფილი პრემიერის, ლიზ ტრასის სიტყვები, რომელმაც ხაზგასმით აღნიშნა, რომ დღეს ბრიტანეთს სწორედ „დიპ სტეიტი“ მართავს. იმედი გვაქვს, დონალდ ტრამპი შეძლებს დაპირების შესრულებას და „დიპ სტეიტის“ დამარცხებას, რაც ევროპულ ქვეყნებსაც დაუბრუნებს სუვერენიტეტს. ვხედავთ, რომ „დიპ სტეიტის“ სიმძიმის ცენტრმა აშშ-დან ევროპაში გადმოინაცვლა. თუ „დიპ სტეიტი“ არ დამარცხდა და მან მხოლოდ რებრენდინგი განიცადა, სამწუხაროდ, გაგრძელდება როგორც ევროპის დასუსტება, ისე თავდასხმები ქართველ ხალხზე და ქართულ დემოკრატიაზე. დონალდ ტრამპს კიდევერთხელ ვუსურვებთ წარმატებას ამ მნიშვნელოვან საქმეში.

დღეს ევროპა დემოკრატიულ უკუსვლას და უმძიმეს ღირებულებით კრიზისს განიცდის. ევროპული სახელმწიფოების უმრავლესობა „დიპ სტეიტის“ პრინციპული გავლენის ქვეშ მოქმედებს. უკონტროლო მიგრაცია, ფსევდოლიბერალური პროპაგანდა, სახელმწიფო და რელიგიური ინსტიტუტების დაკნინება სწრაფი ტემპით აკარგვინებს ევროპას იდენტობას. არასასურველი პარტიებისა და კანდიდატების საარჩევნო გამარჯვების არაღიარება და არჩევნების გაუქმება, ოპონენტების პოლიტიკური დევნა, მედიის თავისუფლების ტოტალური შეზღუდვა ევროპისთვის დღეს ნორმად არის ქცეული. ამ ფონზე, არც ევროპარლამენტის აბსურდული რეზოლუციები, არც 18 ევროპელი ჩინოვნიკის დეზინფორმაციით გაჯერებული წერილი, არც მათი სანქციები და ქართველ ხალხზე სხვა თავდასხმები არავის უკვირს.

ჩვენ ვერავის დავესხმებით თავს, მაგრამ ვერც იმას დავპირდებით ვინმეს, რომ ქვეყანას, მის სუვერენიტეტსა და იდენტობას და ქართველი ხალხის ინტერესებს არ დავიცავთ. ამ ბრძოლაში ვერავითარ კომპრომისს ვერ დავუშვებთ. ამავდროულად, გამოვხატავთ სრულ მზაობას, ვითანამშრომლოთ ნებისმიერ სახელმწიფოსთან, რომელსაც საქართველოსთან სამართლიანი თანამშრომლობის სურვილი აქვს. მნიშვნელოვანია, ყველამ გააცნობიეროს, რომ როგორც საქართველოს სჭირდება ევროპა, ისე, არანაკლებ, ევროკავშირსაც ჭირდება საქართველო“,-აღნიშნულია განცხადებაში.

საქართველოს მართლმადიდებელი ეკლესია დღეს 12 მოციქულის ხსენების დღეს – სვეტიცხოვლობას აღნიშნავს

საქართველოს მართლმადიდებელი ეკლესია დღეს “წმინდა დიდებულთა ათორმეტთა მოციქულთა კრებას” – სვეტიცხოვლობას აღნიშნავს.

სვეტიცხოვლის საკათედრო ტაძარი 12 მოციქულის სახელზეა აგებული, რის გამოც 13 ივლისის დღესასწაული სვეტიცხოვლობადაც იწოდება.

სახარების მიხედვით, იესო ქრისტემ 12 მოციქული გამოარჩია. მათგან ერთმა, იუდა ისკარიოტელმა გასცა. შემდგომ მის ნაცვლად უფალმა მატათა მოციქული გამოარჩია, რომელმაც საქართველოში იქადაგა. ამ დღეს ეკლესია წმინდა მოციქულებს: პეტრეს და მის ძმას, ანდრიას, იაკობსა და მის ძმას, იოანეს, ფილიპეს, ბართლომეს, თომას, მათეს, იაკობ ალფესს, იუდა იაკობისას (თადეოზისა), სიმონ მოშურნეს და მატათას იხსენიებს.

სვეტიცხოვლობა წელიწადში ორჯერ, 14 ოქტომბერს და 13 ივლისს აღინიშნება. 14 ოქტომბერს ეკლესია ქრისტეს კვართს იხსენიებს, 13 ივლისს კი – ქრისტეს ყველა მოციქულს.

13 ივლისის ასტროლოგიური პროგნოზი

ვერძი

დღეს, თქვენი არგუმენტირებული და დასაბუთებული შეხედულებები კარგ შეფასებასა და მოწონებას დაიმსახურებს. შესაძლოა, საკმაოდ მნიშვნელოვანი, საპასუხისმგებლო პროექტი ჩაგაბარონ.

კურო

ყურადღებით იყავით სიტყვებთან, შესაძლოა, უადგილო ფრაზამ კონფლიქტამდე მიგიყვანოთ და ტკივილი მიაყენოთ თქვენთვის მნიშვნელოვან ადამიანებს.

ტყუპები

შესაძლოა, ნაცნობებისგან საკმაოდ ღირებული ინფორმაცია მიიღოთ, რაც ძალიან მნიშვნელოვანი იქნება თქვენი მატერიალური მდგომარეობის გაუმჯობესებისთვის.

კირჩხიბი

ყურადღება გამოიჩინეთ იმ ადამიანების მიმართ, ვინც თქვენს გარშემო ტრიალებენ, მათი მხარდაჭერითა და ხელშეწყობით საშუალება გექნებათ, წინ წაიწიოთ კარიერულ ასპარეზზე.

ლომი

არის მოტყუების ალბათობა, მოუფრთხილდით თქვენს ბიუჯეტს, ნუ მიიღებთ მნიშვნელოვან გადაწყვეტილებებს, ეს დღე გამოიყენეთ ყოველდღიური საქმეების მოგვარებისთვის.

ქალწული

დღეს, ნუ გექნებათ განსაკუთრებული მოლოდინი, სჯობს, იყოთ საკუთარი თავის იმედად, გაუფრთხილდით ჯანმრთელობას და დაიცავით ემოციური ბალანსი.

სასწორი

თუ რთულ სიტუაციაში აღმოჩნდით, შეეცადეთ, საკუთარი შესაძლებლობებით გაუმკლავდეთ. ელოდეთ ახალ ნაცნობობასა და მხიარულ თავგადასავალს, რომელიც მნიშვნელოვან გავლენას მოახდენს თქვენს მომავალზე.

მორიელი

თავი გაარიდეთ სხვათა პრობლემებს და სათქმელს გულში ნუ ჩაიტოვებთ, უფლება გაქვთ, ხმამაღლა გამოთქვათ თქვენი აზრი, თუნდაც, ის ვინმესთვის იყოს საწყენი.

მშვილდოსანი

დღევანდელი შეხვედრები, საქმიან პარტნიორებთან და ხელმძღვანელ პირებთან, კარგი და ნაყოფიერი ახალი პერსპექტივების და კარგი ურთიერთობების საწინდარი იქნება.

თხის რქა

წინასწარ ნუ ისაუბრებთ თქვენს გეგმებზე და ნუ მიიქცევთ ზედმეტ ყურადღებას. მოერიდეთ იმ ადამიანებს, რომლებიც თქვენზე ნეგატიურ ზეგავლენას ახდენენ, ან ადრე თავი ცუდად მოიქცნენ.

მერწყული

გაუგებრობებისა და კონფლიქტების ალბათობა მატულობს, არის ქრონიკული დააადებების გამწვავების და  განწყობის მკვეთრი ცვლილების ალბათობა, ეცადეთ, შეინარჩუნოთ სიმშვიდე. ყველაფერი მალე დალაგდება.

თევზები

დღეს, შესაძლოა, საკუთრებასთან დაკავშირებით, მნიშვნელოვანი ინფორმაცია მიიღოთ, ნუ აჰყვებით ნეგატიურ ემოციებს, მალე, ყველაფერი თქვენს სასიკეთოდ გადაწყდება.

13 ივლისს საქართველოში სვეტიცხოვლობა – 12 მოციქულის ხსენების დღე აღინიშნება

საქართველოს მართლმადიდებელი ეკლესია 13 ივლისს „წმინდა დიდებულთა ათორმეტთა მოციქულთა კრებას” – სვეტიცხოვლობას აღნიშნავს.

ამასთან დაკავშირებით ტაძრებში დღეს წირვა-ლოცვა შესრულდება.

კრება წმიდა დიდებულთა და ყოვლადქებულთა  ათორმეტთა მოციქულთა ეკლესიის ერთიანობას ნიშნავს.

საეკლესიო გადმოცემის თანახმად, თორმეტი მოციქულის ხსენების დღე IV საუკუნიდან აღინიშნება. თითოეულ მოციქულს ცალკე ხსენების დღე აქვს, მაგრამ ეკლესიამ, 12_ვე მათგანის ერთად მოხსენიების დღე დააწესა პეტრე-პავლობის მომდევნო დღე – 13 ივლისი.

 ამავე დღეს იზეიმება სვეტიცხოვლობა. მოგეხსენებათ მცხეთის სვეტიცხოვლის საკათედრო ტაძარი 12 მოციქულის სახელზეა აგებული.

მათეს სახარებაში მოთხრობილია, თუ როგორ გამოარჩია მაცხოვარმა 12 მოციქული.

გამოირჩია თორმეტი მოციქული და მისცა მათ “ჴელმწიფებაჲ სულთა ზედა არაწმიდათა, რაჲთა განასხმიდენ მათ და განჰკურნებდენ ყოველთა სენთა და ყოველთა უძლურებათა” (მთ. 10, 1).

და ამის შემდეგ მახარებელი ჩამოთვლის სახელებს: პირველად, სიმონი რომელსაც ეწოდა პეტრე და ანდრეა, მისი ძმა; იაკობ ზებედესი და იოანე, მისი ძმა; ფილიპე და ბართლომე; თომა და მათე მეზვერე; იაკობ ალფესი და ლებეოსი, რომელსაც თადეოზი ეწოდა მოგვიანებით; სიმონ კანანელი და იუდა ისკარიოტელი, რომელიც გახდა მაცხოვრის გამცემელი.

როგორც ლუკა მახარებელი მოგვითხრობს, გაგზავნა ისინი “ქადაგებად სასუფეველსა ღმრთისასა და განკურნებად უძლურთა” (ლკ. 9, 2).

და როდესაც მაცხოვარი ამაღლდა ზეცად, მოციქულებს მოუწოდა გალილეის ერთ-ერთ მთაზე (ელეონის) და უკანასკნელი კურთხევა მისცა მათ: “მომეცა მე ყოველი ჴელმწიფებაჲ ცათა შინა და ქუეყანასა ზედა. წარვედით და მოიმოწაფენით ყოველნი წარმართნი და ნათელ-სცემდით მათ სახელითა მამისაჲთა და ძისაჲთა და სულისა წმიდისაჲთა, და ასწავებდით მათ დამარხვად ყოველი, რაოდენი გამცენ თქუენ. და აჰა ესერა მე თქუენ თანა ვარ ყოველთა დღეთა და ვიდრე აღსასრულადმდე სოფლისა” (მთ. 28, 18-20).

ეკლესია 12 მოციქულის ხსენებისას ზეიმობს იმ თორმეტ მოციქულს, რომელიც სულთმოფენობის წინ დადგინდა, იგულისხმება იუდა მოციქულის ნაცვლად მატათა მოციქულის გამორჩევა.

სწორედ 12 მოციქულის სახელზე აიგო მცხეთაში უდიდესი ტაძარი – სვეტიცხოველი.

სვეტიცხოვლობის დღესასწაული წელიწადში ორჯერ, 14 ოქტომბერსა და 13 ივლისს აღინიშნება. 14 ოქტომბერს ეკლესია ქრისტეს კვართს იხსენიებს, 13 ივლისს კი – ქრისტეს ყველა მოციქულს.

13 ივლისს ასევე კეთილმორწმუნე დინარა დედოფლის ხსენება აღინიშნება, რომელიც ჰერეთის დედოფალი იყო და მოსახლეობას სპარსთა მონოფიზიტური სარწმუნოებისგან იცავდა. დღესასწაულის გამო მარხვა თევზით ხსნილია.

,,2014 წელს ხელი მოვაწერეთ ასოცირების ხელშეკრულებას, ეს იყო მისწრაფებების მკაფიო ჩვენება, სად გვინდა წასვლა, საქართველომ დასავლური ორიენტაციისკენ არჩევანი გააკეთა”- მაკა ბოჭორიშვილი

საქართველოს აქვს სტრატეგიული მდებარეობა და ამ სტრატეგიულმა მდებარეობამ ჩამოაყალიბა ქვეყნის ისტორია, კულტურა და მნიშვნელოვანი როლი ითამაშა გეოპოლიტიკურ კონტექსტში, – განაცხადა საქართველოს საგარეო საქმეთა მინისტრმა, მაკა ბოჭორიშვილმა დუბროვნიკის ფორუმის ფარგლებში გამართულ პანელურ დისკუსიაზე გამოსვლისას.

მისი თქმით, საქართველოს სტრატეგიული მდებარეობა კიდევ უფრო მნიშვნელოვანი ხდება იმ გეოპოლიტიკური კონტექსტის გათვალისწინებით, რაც გარშემო ხდება, განსაკუთრებით უკრაინის წინააღმდეგ რუსეთის ომის შემდეგ ეს ტრანზიტული გზა კიდევ უფრო მნიშვნელოვანი ხდება.

„საქართველოს აქვს სტრატეგიული მდებარეობა და ამ სტრატეგიულმა მდებარეობამ ჩამოაყალიბა ჩვენი ისტორია, კულტურა და მნიშვნელოვანი როლი ითამაშა გეოპოლიტიკურ კონტექსტში. ჩვენი სტრატეგიული მდებარეობა კიდევ უფრო მნიშვნელოვანი ხდება იმ გეოპოლიტიკური კონტექსტის გათვალისწინებით, რაც ჩვენს გარშემო ხდება, განსაკუთრებით უკრაინის წინააღმდეგ რუსეთის ომის შემდეგ, ეს ტრანზიტული გზა კიდევ უფრო მნიშვნელოვანი ხდება. აქ ვარ ჩემს კოლეგებთან ერთად აზერბაიჯანიდან და თურქეთიდან. ორივე საქართველოს სტრატეგიული პარტნიორები არიან, როდესაც ვსაუბრობთ რეგიონის ტრანზიტულ პოტენციალზე, რა თქმა უნდა, ძალიან მნიშვნელოვანია ამ ქვეყნების ერთად განხილვა. ჩვენ გვაქვს ათწლეულების განმავლობაში შესანიშნავი თანამშრომლობისა და სტრატეგიული პარტნიორობის გამოცდილება, რამაც გამოიწვია ძალიან მნიშვნელოვანი პროექტები – ენერგეტიკული კავშირი, სატრანსპორტო კავშირი და, ზოგადად კავშირი. თუმცა, ეს ყველაფერი არ არის. ჩვენ გვაქვს უზარმაზარი პოტენციალი და ვმუშაობთ, რომ ხელი შევუწყოთ შუა დერეფანს, ცენტრალურ აზიის და აღმოსავლეთის ქვეყნებთან ერთად, რადგან ეს ძალიან მნიშვნელოვანია ევროპისთვის და ძალიან მნიშვნელოვანია თვითონ რეგიონისთვის“, – განაცხადა მაკა ბოჭორიშვილმა.

მისი თქმით, საქართველო ევროპული ქვეყანაა, ძალიან მკაფიო ევროპული იდენტობითა და ძალიან მკაფიო საუკუნოვანი, ევროპული მისწრაფებებით.

„საუკუნეები გავატარეთ ევროპული ღირებულებების დაცვაში, რაზეც ევროპა დღეს დგას. ეს არ არის ახალი. 2014 წელს საქართველომ ხელი მოაწერა ასოცირების ხელშეკრულებას და ეს არ იყო ადვილი პერიოდი, როდესაც ეს მოხდა. ყველამ ვიცით, რა ხდებოდა იმ დროს რეგიონში. საქართველომ, უკრაინასთან და მოლდოვასთან ერთად, უკრაინამ მოგვიანებით, ხელი მოაწერა ასოცირების ხელშეკრულებას, ეს იყო ჩვენი მისწრაფებების მკაფიო ჩვენება, რისი გაკეთება გვინდა და სად გვინდა წასვლა. ეს ნამდვილად ძალიან მკაფიო იყო ჩვენი დამოუკიდებლობის დღიდანვე, 90-იანი წლების დასაწყისიდან, როდესაც საქართველომ ძალიან მკაფიო არჩევანი გააკეთა დასავლური ორიენტაციის“, – განაცხადა საგარეო საქმეთა მინისტრმა.

მისი თქმით, ასოცირების ხელშეკრულებიდან 10 წლის შემდეგ საქართველომ ბევრს მიაღწია რეფორმების თვალსაზრისით, სტრუქტურული რეფორმების განხორციელების თვალსაზრისით, რაზეც რიცხვებიც მეტყველებს.

„საქართველოს თუ შეხედავთ, ის პირველ ადგილზეა ბიუჯეტის, პარტნიორობის რეიტინგში, 2023 წლიდან საქართველო პირველ ადგილზეა ღია ბიუჯეტის ინდექსის რეიტინგში და, „ჰერიტიჯის ეკონომიკური თავისუფლების“ ინდექსს თუ შეხედავთ, საქართველო მსოფლიოში 35-ე ადგილზეა და მსოფლიო ბანკის ეკონომიკურ რეიტინგში – ტოპ სამეულშია 50 ქვეყანას შორის. ეს იმ სტრუქტურული რეფორმების შედეგია, რომლებიც საქართველოს მთავრობამ, რომელიც დღეს საქართველოში არის, განახორციელა და ბევრს მიაღწია ქვეყნის ტრანსფორმაციის თვალსაზრისით. ამ ყველაფრის შემდეგ, შეგვიძლია, ვთქვათ, ჩვენ მივაღწიეთ ორნიშნა ეკონომიკურ ზრდას, რომელიც ასევე ძალიან მნიშვნელოვანია ჩვენი მომავლისთვის, განსაკუთრებით მაშინ, როდესაც ვსაუბრობთ ქვეყნის ევროპულ მომავალზე. ევროკავშირში ინტეგრაციის მისაღწევად, გვჭირდება სტაბილური განვითარება, გვჭირდება სტაბილური ზრდა და რეფორმები, რომლებიც ამის შედეგი იქნება“, – განაცხადა მაკა ბოჭორიშვილმა.

მოლაპარაკებებში ტრამპის მონაწილეობის შემთხვევაში, უკრაინას ტერიტორიების ნაწილის დათმობა მოუწევს – The Telegraph

თეთრმა სახლმა ნათლად განაცხადა, რომ თუ აშშ-ის პრეზიდენტი დონალდ ტრამპი ომის დასრულების მიზნით სამშვიდობო მოლაპარაკებებში მონაწილეობას მიიღებს, უკრაინას, სავარაუდოდ, გარკვეული ტერიტორიების დათმობა მოუწევს, წერს The Telegraph-ის ჟურნალისტი ლიზა ჰესელდაინი.

„რუსეთი ამჟამად სწრაფად მიიწევს წინ ლუგანსკის, დონეცკის, ხერსონისა და ზაპოროჟიეს ოლქებში და თეთრმა სახლმა ნათლად განაცხადა, რომ ტრამპის შუამავლობით მიღწეული ნებისმიერი სამშვიდობო შეთანხმება, სავარაუდოდ, ამ ტერიტორიების კრემლისთვის გადაცემას მოიცავს“, – აღნიშნულია სტატიაში.

ამავდროულად, როგორც ჰესელდაინი წერს, ევროპელი ლიდერები შეშფოთებულები არიან იმით, რომ ტრამპმა შესაძლოა, ასეთი შეთანხმების მიღწევა უკრაინის თანხმობის გარეშე სცადოს.

სტატიაში აღნიშნულია, რომ დასავლელი მოკავშირეების ყველა დაპირების მიუხედავად, რომ ისინი კიევს იქამდე დაუჭერენ მხარს, „სანამ საჭირო იქნება“, მათ ჯერ კიდევ ვერ შეძლეს ალტერნატიული, თუნდაც გარკვეულწილად ღირსეული გეგმის შემუშავება მოლაპარაკებებში პუტინის პოზიციის შესასუსტებლად.

როგორც სტატიაშია ნათქვამი, არსებობს იმედი, რომ სიტუაცია შესაძლოა, კიევის სასარგებლოდ შეიცვალოს. კერძოდ, ტრამპი თეთრ სახლში დაბრუნების შემდეგ პირველად დაჰპირდა უკრაინას ახალი სამხედრო დახმარების გაწევას და ასევე, მიანიშნა რუსეთთან დაკავშირებით „მნიშვნელოვანი განცხადების“ გაკეთებაზე, თუმცა ჯერჯერობით გაურკვეველია, როგორი იქნება ეს განცხადება, კარგი, თუ ცუდი.

„მაგრამ მაშინაც კი, თუ ტრამპი საბოლოოდ დააწესებს ახალ, მკაცრ სანქციებს და ევროპასთან ერთად დაიწყებს იარაღის სრული სპექტრის მიწოდებას, რომელსაც უკრაინა მუდმივად ითხოვს, სამწუხაროდ, უნდა დავსვათ კითხვა: იქნება თუ არა ეს ძალიან ცოტა და ძალიან გვიანი?“, – ხაზგასმით აღნიშნავს The Telegraph-ის მიმომხილველი.

იგი ხაზს უსვამს იმ „ნიშანდობლივ ფაქტს“, რომ ამ კვირაში, „მსურველთა კოალიციის“ შეხვედრის დროს ცეცხლის შეწყვეტის შემთხვევაში უკრაინაში სამშვიდობო ძალების გაგზავნის გეგმებმა უკანა პლანზე გადაიწია, „რაც ნიშნავს იმის მდუმარე აღიარებას, რომ ცეცხლის შეწყვეტა უახლოეს მომავალში ნაკლებად სავარაუდოა“.

ფონ დერ ლაიენი ტრამპის ტარიფებზე: მზად ვართ, პროპორციული საპასუხო ზომებით დავიცვათ ევროკავშირის ინტერესები

ევროკომისიის პრეზიდენტი ურსულა ფონ დერ ლაიენი გამოეხმაურა აშშ-ის პრეზიდენტის დონალდ ტრამპის განცხადებას, რომლის თანახმადაც, აშშ 1-ელი აგვისტოდან ევროკავშირის იმპორტზე 30%-იან ტარიფებს დააწესებს. 

სოციალურ ქსელ X-ზე გამოქვეყნებულ პოსტში ურსულა ფონ დერ ლაიენმა აღნიშნა, რომ ტრამპის მიერ გამოცხადებული ტარიფი „ატლანტის ოკეანის ორივე მხარეს ბიზნესებს, მომხმარებლებსა და პაციენტებს დააზარალებს“.

„ჩვენ 1-ელ აგვისტომდე შეთანხმების მისაღწევად მუშაობას გავაგრძელებთ.

ამავდროულად, ჩვენ მზად ვართ, პროპორციული საპასუხო ზომების საფუძველზე დავიცვათ ევროკავშირის ინტერესები“, – დაწერა ფონ დერ ლაიენმა.