საარჩევნო ადმინისტრაციის დელეგაცია ცესკოს თავმჯდომარის, გიორგი კალანდარიშვილის ხელმძღვანელობით, ოფიციალური ვიზიტით, მექსიკის ეროვნული საარჩევნო ინსტიტუტისა და ქალაქ მეხიკოს საარჩევნო ინსტიტუტის მიწვევით, მექსიკის შეერთებულ შტატებში იმყოფებოდა.

ცესკოს ინფორმაციით, დელეგაციამ მონაწილეობა მიიღო 30-31 მაისს გამართულ საერთაშორისო ფორუმში. პირველ ივნისს კი მექსიკის ადგილობრივი და ფედერალური სასამართლო ხელისუფლების არჩევნებს დააკვირდა.

ვიზიტის ფარგლებში ცესკოს თავმჯდომარე და დელეგაციის წევრები მექსიკის შეერთებულ შტატებში საქართველოს საგანგებო და სრულუფლებიან ელჩს ზაზა გაბუნიას შეხვდნენ და ვიზიტის მიმდინარეობის საკითხები განიხილეს. შეხვედრაზე ასევე ისაუბრეს საელჩოს დაფარვის არეალში არსებულ ქვეყნებში საარჩევნო ადმინისტრაციებთან თანამშრომლობის შესაძლებლობებსა და პერსპექტივებზე, სხვადასხვა საერთაშორისო პროექტში საარჩევნო ადმინისტრაციის ჩართვისა და მონაწილეობის შესაძლებლობებზე.

შეხვედრას გიორგი კალანდარიშვილთან ერთად აჭარის უმაღლესი საარჩევნო კომისიის თავმჯდომარე პარმენ ჯალაღონია, სსიპ საარჩევნო სისტემების განვითარების, რეფორმებისა და სწავლების ცენტრის დირექტორი ნათია ზაალიშვილი და ცესკოს საფინანსო დეპარტამენტის სახელმწიფო შესყიდვების განყოფილების უფროსი გიორგი ლიპარტია დაესწრნენ.

საარჩევნო ადმინისტრაციის დელეგაცია ოფიციალური ვიზიტით მექსიკაში 29 მაისი -2 ივნისის პერიოდში იმყოფებოდა.

ევროპარლამენტი საქართველოსთან დაკავშირებით ყოველწლიური ანგარიშის შესახებ რელიზს ავრცელებს.

ევროპარლამენტის საგარეო ურთიერთობათა კომიტეტმა დაამტკიცა შესწორებებით საქართველოს შესახებ ყოველწლიური ანგარიში 55 ხმით 14-ის წინააღმდეგ, ოთხმა თავი შეიკავა. ანგარიშის მომხსენებელი ლიეტუველი ევროპარლამენტარი რასა იუკნევიჩიენეა.

როგორც ევროპარლამენტის მიერ გამოქვეყნებულ პრესრელიზშია აღნიშნული, ახალ ანგარიშში საგარეო ურთიერთობათა კომიტეტის წევრები აცხადებენ, რომ „საქართველოში 2024 წლის ოქტობრის გაყალბებული საპარლამენტო არჩევნები იყო აშკარა გარდმტეხი მომენტი ევროკავშირის კანდიდატ ქვეყანაში ავტორიტარული მთავრობისკენ“.

მათი თქმით, „ამ ნაკლოვანმა კენჭისყრამ გზა გაუხსნა მმართველ პარტიას, „ ქართულ ოცნებას“, უკანონოდ მიიტაცოს სახელმწიფო ინსტიტუტები და დემოკრატიული გარანტიები, წინ წაწიოს რეპრესიული კანონმდებლობა და ასევე ჩაახშოს პოლიტიკური ოპონენტები, ჟურნალისტები და მშვიდობიანი დემონსტრანტები“.

„იმის გათვალისწინებით, რომ საქართველოს მთავრობის მოქმედების ამჟამინდელი კურსი საფრთხეს უქმნის ქვეყნის ევროკავშირში გაწევრიანების გზას, ევროპარლამენტის წევრებმა გაიმეორეს მოწოდება საქართველოში ახალი საპარლამენტო არჩევნების ჩატარებისკენ საერთაშორისო და დამოუკიდებელი ადგილობრივი დამკვირვებლების მონიტორინგით. ვიდრე ასეთი არჩევნები არ იქნება ორგანიზებული, ევროპარლამენტის წევრები შეინარჩუნებენ საქართველოს ამჟამინდელი ერთპარტიული პარლამენტისა და პრეზიდენტის ლეგიტიმურობის არაღიარების პოლიტიკას და მოუწოდებენ ევროკავშირს და წევრ სახელმწიფოებს, დააწესონ ორმხრივი და კოორდინირებული პერსონალური სანქციები „ქართული ოცნების“ საკვანძო მაღალჩინოსნებისა და რეჟიმის ხელშემწყობებისთვის, რომლებიც პასუხისმგებლები არიან დემოკრატიულ უკუსვლაზე. მზარდი რეპრესიული საკანონმდებლო გარემოს გათვალისწინებით, ევროპარლამენტარები ასევე მოითხოვენ საქართველოს მიმართ ევროკავშირის პოლიტიკის დაუყოვნებლივ გადახედვას და მოუწოდებენ ევროკომისიას, გადახედოს ევროკავშირი-საქართველოს ასოცირების შეთანხმების იმპლემენტაციას“, – ნათქვამია პრესრელიზში.

პრესრელიზის თანახმად, „ქართული ოცნებისთვის“ დემოკრატიული რეფორმებისა და ევროატლანტიკური ინტეგრაციის კურსზე დაბრუნებისკენ მოწოდებასთან ერთად, ევროპარლამენტარები კიდევ ერთხელ ადასტურებენ სოლიდარობას ქართველი ხალხის და მათი ლეგიტიმური პროევროპული მისწრაფებების მიმართ.

„ისინი ასევე აღნიშნავენ, რომ 2025 წლის ადგილობრივი თვითმმართველობის არჩევნები საქართველოს დემოკრატიისა და პოლიტიკური პლურალიზმის მედეგობის მორიგი გამოცდაა. შედეგად, ევროპარლამენტარები მოუწოდებენ ქვეყნის ოპოზიციას, გამოიყენოს ეს შესაძლებლობა, რათა ასახოს ქართველი ხალხის ერთიანობა დემოკრატიისა და კანონის უზენაესობის მხარდაჭერაში, როგორც უკვე ნაჩვენები იყო ოქტომბრის არჩევნების შემდეგ მშვიდობიანი საპროტესტო აქციებით. ევროპარლამენტარები ასევე გამოხატავენ ღრმა შეშფოთებას საქართველოს ამჟამინდელი შემზღუდველი მედიაგარემოსა და პოლიტიკურ ოპოზიციაზე თავდასხმების გამო, მათ შორის, „ქართული ოცნების“ ლიდერების განცხადებების გამო, რომლებიც მიუთითებენ განზრახვაზე, არაკონსტიტუციურად გამოაცხადონ ოპოზიციური პარტიები“, – აღნიშნულია პრესრელიზში.

საგარეო ურთიერთობათა კომიტეტის მიერ დამტკიცებულ ანგარიშს ევროპარლამენტს კენჭისყრაზე მომავალ პლენარულ სესიაზე წარუდგენენ.

საგარეო უწყების რეფორმასთან დაკავშირებით გავრცელებული სპეკულაციები მიზნად ისახავს დესტრუქციას და პროცესის დისკრედიტაციას, რაც კიდევ ერთხელ ცხადყოფს მიმდინარე რეფორმის აუცილებლობას, – ამის შესახებ საინფორმაციო ცენტრი ნატო-სა და ევროკავშირის შესახებ დირექტორი თამარა წულეისკირი სოციალურ ქსელში წერს.

როგორც თამარა წულეისკირი აღნიშნავს, საქართველოს ევროპული და ევროატლანტიკური ინტეგრაციის შესახებ მოსახლეობის ცოდნისა და მართლშეგნების ამაღლება, საგარეო საქმეთა სამინისტროს დებულების თანახმად, მთლიანად გახდა ამ სტრუქტურის საქმიანობისა და მისი მთავარი ამოცანების შემადგენელი და განუყოფელი ნაწილი.

„საზოგადოებისთვის უკვე ცნობილია, რომ საგარეო საქმეთა სამინისტროში ხორციელდება კომპლექსური რეფორმა. სტრუქტურული ცვლილებები ეხება, როგორც საგარეო საქმეთა სამინისტროს, ასევე მის სისტემაში შემავალ საჯარო სამართლის იურიდიულ პირებს.

სამინისტროს ახალი სტრუქტურის შესაბამისად, ნატო-სა და ევროკავშირის შესახებ საინფორმაციო ცენტრის ფუნქციებს სამინისტროს ცენტრალური აპარატის ევროინტეგრაციის დეპარტამენტი განახორციელებს. შესაბამისად, საქართველოს ევროპული და ევროატლანტიკური ინტეგრაციის შესახებ მოსახლეობის ცოდნისა და მართლშეგნების ამაღლება, უკვე სამინისტროს დებულების თანახმად, გახდა მთლიანად სტრუქტურის საქმიანობისა და მისი მთავარი ამოცანების შემადგენელი და განუყოფელი ნაწილი.

ამასთანავე, აღსანიშნავია, რომ რეორგანიზაციის პროცესი ხორციელდება სრულიად გამჭვირვალედ და თითოეულ თანამშრომელს მიეწოდება ინფორმაცია მიმდინარე ცვლილებების შესახებ.

შესაბამისად, საგარეო უწყების რეფორმასთან დაკავშირებით გავრცელებული სპეკულაციები მიზნად ისახავს დესტრუქციას და პროცესის დისკრედიტაციას, რაც კიდევ ერთხელ ცხადყოფს მიმდინარე რეფორმის აუცილებლობას“, – წერს თამარა წულეისკირი.

ამ ტიპის რეზოლუცია ბევრი გვინახავს, ვიცით, როგორ ხდება მათი მიღება, რამდენს იხდიან, – ამის შესახებ თბილისის მერმა, კახა კალაძემ განაცხადა.

კალაძეს კითხვა დაუსვეს ევროპარლამენტის საგარეო ურთიერთობათა კომიტეტის მიერ საქართველოს შესახებ მიღებული ყოველწლიური ანგარიშის შესახებ.

როგორც საპასუხოდ კალაძემ აღნიშნა, მსგავსი ლობიზმით შეფუთული რეზოლუციებისა და აგენტურისადმი ქართველი ხალხის უმრავლესობას შესაბამისი დამოკიდებულება აქვს.

„ამ ტიპის რეზოლუცია ბევრი გვინახავს. ვიცით, როგორ ხდება მათი მიღება, რამდენს იხდიან. ეს ყველაფერი ლობიზმითაა შეფუთული. ამ რეზოლუციებს ჩალის ფასი აქვთ. ამ ადამიანებს, რომლებიც აგენტურას წარმოადგენენ ქვეყანაში, საზოგადოების უმრავლესობას მათ მიმართ და მათი თანაგუნდელების მიმართ აქვთ შესაბამისი დამოკიდებულება, რასაც იმსახურებენ. აგენტებს და უცხო ქვეყნის წარმომადგენლების მსახურებს ყოველთვის შესაბამისი დამოკიდებულება ექნებათ ხალხის მხრიდან. სამწუხაროდ, ასეთი ტიპის ბიუროკრატები, ოდიოზური პირები საკმაოდ მრავლადაა, თუმცა შეიცვლება ყველაფერი და ისეთ ევროპას მივიღებთ, რომლისკენაც ვისწრაფვით ოდითგანვე და არა ისეთს, როგორიც დღესაა, დაფუძნებული ტყუილზე, ცილისწამებაზე. ეს არის ზუსტად განსხვავება ჩვენსა და რადიკალებს შორის. ჩვენ ვართ ადამიანები, რომლებიც ქართველი ხალხის დავალებას ვასრულებთ. ჩვენთვის ჩვენი ქვეყანაა მნიშვნელოვანი. რადიკალების ამოსავალი წერტილია, რას უბრძანებენ გარედან“, – აღნიშნა კახა კალაძემ.

ვიღაცები ცდილობენ, პოლიტიკური სპეკულაციებით შეფუთონ პროცესები და ისე წარმოაჩინონ, როგორც თავიანთი პოლიტიკური შეხედულებებისთვის აწყობთ. სიმართლე არის ერთი – ყველაფერს ვაკეთებდით და ვაკეთებთ საქართველოს ევროინტეგრაციისთვის, – ამის შესახებ თბილისის მერმა, კახა კალაძემ ჟურნალისტებს განუცხადა.

მედიის წარმომადგენლებმა კალაძეს კითხვა დაუსვეს საქართველოში ევროკავშირის ელჩის, პაველ ჰერჩინსკისადმი შალვა პაპუაშვილის წერილზე.

„სამწუხაროდ, უნდა ვთქვათ, რომ ის, რაც ბოლო წლების განმავლობაში ქვეყანაში ხდებოდა – გარედან წახალისებული ექსტრემისტული დაჯგუფებები, რადიკალები, თანხები, რომლებიც გარედან შემოედინებოდა, მიმართული იყო იმაზე, რომ ქვეყანაში სახელმწიფო გადატრიალება მომხდარიყო. თავიანთი განცხადებებით, პოლიტიკური პოზიციებით პირდაპირ ერეოდნენ საპარლამენტო არჩევნებში, რაც, რა თქმა უნდა, არის უდიდესი პრობლემა. ქართველი ხალხი ყველაფერს ხედავს, რა გამოწვევების წინაშეა ქვეყანა და დგას იქ, სადაც ჩვენს სამშობლოს სჭირდება“, – განაცხადა კახა კალაძემ.

კალაძის თქმით, ევროპის ზოგიერთი წარმომადგენლის მხრიდან გაკეთებული პოლიტიკური შეფასებები ძალიან უხერხულია.

„სიმართლე არ იმალება, ადრე თუ გვიან, ყველაფერი ცხადი და ნათელი ხდება. ოფიციალური თანამდებობის პირები როდესაც პირდაპირ გვეუბნებოდნენ, რომ ევროკავშირის გაფართოება 2030 წლამდე წარმოუდგენელია, ამაზე პირდაპირ ვისაუბრეთ. გახსოვთ, რა პროცესები მოჰყვა ამას. ვიღაცები ცდილობენ, პოლიტიკური სპეკულაციებით რაღაცები შეფუთონ და ისე წარმოაჩინონ, როგორც თავიანთი პოლიტიკური შეხედულებებისთვის აწყობთ, მაგრამ სიმართლე არის ერთი – ჩვენ ყველაფერს ვაკეთებდით და ვაკეთებთ, რომ მოხდეს საქართველოს ევროინტეგრაცია. ეს საკმაოდ რთული პროცესია, მაგრამ, პირველ რიგში, გავითვალისწინებთ ჩვენი ქვეყნის ინტერესს“, – აღნიშნა დედაქალაქის მერმა.

როგორც კახა კალაძემ აღნიშნა, ყველა თანხა, რომელიც შემოდის უცხოეთიდან, უნდა იყოს გამჭვირვალე.

„ყველა თანხა, რომელიც შემოდის უცხოეთიდან, უნდა იყოს იდენტიფიცირებული და ყველაფერი უნდა იყოს აბსოლუტურად გამჭვირვალედ – ვისგან ფინანსდებიან და რა კონკრეტულ პროექტებს ხმარდება. როდესაც ხდება მოქალაქეების ერთმანეთთან დაპირისპირება, რადიკალიზმის გაღვივება, საზოგადოების პოლარიზაცია და ამას უცხოეთიდან აფინანსებენ, ეს ძალიან მძიმეა, რასაც ყოველთვის შესაბამისი რეაგირება უნდა მოჰყვეს“, – განაცხადა კალაძემ.

საარჩევნო ადმინისტრაციის დელეგაცია ცესკოს თავმჯდომარის, გიორგი კალანდარიშვილის ხელმძღვანელობით, ოფიციალური ვიზიტით, მექსიკის ეროვნული საარჩევნო ინსტიტუტისა და ქალაქ მეხიკოს საარჩევნო ინსტიტუტის  მიწვევით, მექსიკის შეერთებულ შტატებში იმყოფებოდა.

ვიზიტის ფარგლებში დელეგაციამ, რომლის შემადგენლობაშიც გიორგი კალანდარიშვილთან ერთად შედიოდნენ აჭარის უმაღლესი საარჩევნო კომისიის თავმჯდომარე პარმენ ჯალაღონია, სსიპ საარჩევნო სისტემების განვითარების, რეფორმებისა და სწავლების ცენტრის დირექტორი ნათია ზაალიშვილი და  ცესკოს საფინანსო დეპარტამენტის სახელმწიფო შესყიდვების განყოფილების უფროსი გიორგი ლიპარტია, მონაწილეობა მიიღო 30-31 მაისს გამართულ საერთაშორისო საინფორმაციო ფორუმში.

ფორუმი ორგანიზებული იყო მექსიკის ეროვნული საარჩევნო ინსტიტუტისა და ფედერალური საარჩევნო ტრიბუნალის მიერ და მონაწილეებმა არაერთი მნიშვნელოვანი საარჩევნო საკითხი განიხილეს. მათ შორის, მექსიკის სასამართლო ხელისუფლების არჩევნების მომზადება, გატარებული საარჩევნო და საკონსტიტუციო რეფორმები,  კენჭისყრის დღის პროცედურები, საარჩევნო დავები, ამომრჩეველთა ინფორმირება, დეზინფორმაციასთან ბრძოლა, შედეგების დათვლა, არჩევნების ლოგისტიკა და შესაბამისი ბიზნეს პროცესები და არჩევნების დაფინანსებასთან დაკავშირებული საკითხები.

პირველ ივნისს საქართველოს საარჩევნო ადმინისტრაციის დელეგაცია მექსიკის ადგილობრივი და ფედერალური სასამართლო ხელისუფლების არჩევნებს დააკვირდა. აღსანიშნავია, რომ ეს იყო მექსიკის საარჩევნო ისტორიაში პირველი არჩევნები, როდესაც საარჩევნო უფლების მქონე პირებს შეეძლოთ აერჩიათ სასამართლო ხელისუფლების წარმომადგენლები როგორც ფედერალურ, ისე ადგილობრივ დონეზე. არჩევნებისთვის 84 000-ზე მეტი საარჩევნო უბანი იყო გახსნილი და გამოყენებული იყო 9 სხვადასხვა ტიპის ბიულეტენი.

საერთაშორისო სადამკვირვებლო მისიის ფარგლებში დელეგაციის წევრები, საერთაშორისო დამკვირვებლებთან და სხვა ქვეყნების საარჩევნო ადმინისტრაციების წარმომადგენლებთან ერთად ქალაქ მეხიკოში გახსნილ საარჩევნო უბნებზე იმყოფებოდნენ. ისინი დააკვირდნენ როგორც საარჩევნო უბნების გახსნას, ისე კენჭისყრის პროცესის მიმდინარეობასა და კენჭისყრის დახურვას, ასევე ზემდგომ კომისიებში ხმის დათვლის პროცედურებს.

ოფიციალური ვიზიტის ფარგლებში ცესკოს თავმჯდომარე  მექსიკის ეროვნული საარჩევნო ინსტიტუტისა და ფედერალური საარჩევნო ტრიბუნალის ხელმძღვანელობას და წარმომადგენლებს შეხვდა. დელეგაციამ ასევე გამართა შეხვედრა ქალაქ მეხიკოს საარჩევნო ინსტიტუტის ხელმძღვანელთან და წარმომადგენლებთან.

გიორგი კალანდარიშვილმა შეხვედრები ასევე გამართა სხვადასხვა საერთაშორისო ორგანიზაციებისა და  ლათინური ამერიკის რამდენიმე ქვეყნის საარჩევნო ადმინისტრაციების წარმომადგენლებთან. შეხვედრებზე განიხილეს საქართველოს საარჩევნო ადმინისტრაციის გამოცდილება ელექტრონული ტექნოლოგიების გამოყენების, ასევე დეზინფორმაციასთან ბრძოლის საკითხები და ისაუბრეს სხვადასხვა საერთაშორისო პროექტსა თუ ღონისძიებებში საქართველოს საარჩევნო ადმინისტრაციის ჩართულობასთან დაკავშირებით. პარალელურად სხვადასხვა ქვეყნის საარჩევნო ადმინისტრაციების წარმომადგენლებთან შეხვედრები გამართეს უსკოს თავმჯდომარემ და სსიპ საარჩევნო სისტემების განვითარების, რეფორმებისა და სწავლების ცენტრის დირექტორმა.

საარჩევნო ადმინისტრაციის დელეგაცია ოფიციალური ვიზიტით მექსიკაში 29 მაისი -2 ივნისის პერიოდში იმყოფებოდა.