სტივენ გეტისი – გვაქვს პასუხისმგებლობა საქართველოში ჩვენი მეგობრებისა და ყველა იმ ადამიანის წინაშე, ვინც ისწრაფვის იმ უფლებებისკენ, რომლითაც ჩვენ ვსარგებლობთ, – ამის შესახებ საქართველოს საკითხზე დებატებისას სტივენ გეთინსმა განაცხადა.

მისივე თქმით, ოპონენტების დაპატიმრება და დისიდენტების ჩახშობა საპირისპიროა იმისა, რასაც ევროსაბჭო ემხრობა.

„ეს სერიოზული დებატებია ჩვენთვის, მაგრამ განსაკუთრებით სერიოზული დებატებია ჩვენი მეგობრებისთვის საქართველოში, ჩვენს საყვარელ ქვეყანაში. კონვენცია და უფლებები, რომლითაც ვსარგებლობთ, არ არის მხოლოდ ევროპის კონტინენტზე ჩვენი ცხოვრების შედეგი. ევროპაში სახელმწიფოდ ყოფნა არ გხდის წევრად და არ განიჭებს შენს უფლებებს, რაც კარგად იციან რუსეთსა და ბელარუსში. სწორედ ამიტომ, ჩვენ, პარლამენტარები, შევიკრიბეთ დღეს. კონვენციები გავლენას ახდენს ჩვენი მოქალაქეების ცხოვრებაზე, რომელთა წინაშეც ჩვენ ანგარიშვალდებულნი ვართ ნორმალურ დემოკრატიულ წესრიგში. გუშინ საღამოს ამ დარბაზში გამორჩეული წვლილი შეიტანა პრეზიდენტმა ზელენსკიმ, რომელმაც გვითხრა, რომ არსებობს ერთი პირობა წევრობისთვის, თუმცა ის ძალიან მნიშვნელვანია. რამდენადაც ჩვენ ვემხრობით დემოკრატიას და ადამიანის უფლებებს, ჩვენ უნდა დავიცვათ ეს პირობა მთელი მონდომებით. მართლაც, ჩვენ ყველას, მიუხედავად იმისა, ვეთანხმებით თუ არა ერთმანეთს, ამის პასუხისმგებლობა გვაკისრია.

საქართველოს ლიდერებმა თავიანთ ხალხს უთხრეს, რომ სურთ, გადაუხვიონ ევროპულ გზას და ევროკავშირის წევრობას, ამ ადგილის შემდგომ წევრობას და ვციტირებ, ეს მთავარი პრიორიტეტია. გასაკვირი არ არის, რომ ევროპის საბჭომ, ევროკავშირმა, ევროპაში უპრეცედენტო მშვიდობისა და კეთილდღეობის პერიოდი დაამყარა. მათ უფრო მდიდრები, სამართლიანები და უსაფრთხოები გვაქციეს. ორივე მათგანი დღეს კიდევ უფრო მეტად გვჭირდება და ეს ზოგჯერ რთულია. ზოგჯერ ამას ვივიწყებთ, მაგრამ კლუბში უბრალოდ არ ხვდებიან. პატივი უნდა სცეთ დემოკრატიას და ეს ზოგჯერ რთულია. ეს ყველამ ვიცით. ჩვენ პოლიტიკოსები ვართ, ჩვენ ვიცით, რომ დემოკრატიის პატივისცემა დემოკრატიულ პროცესში შეიძლება რთული იყოს. გზა რთულია, მაგრამ ღირს ამად.

ოპონენტების დაპატიმრება და დისიდენტების ჩახშობა საპირისპიროა იმისა, რასაც ეს ადგილი ემხრობა. ჩვენ უნდა დავუპირისპირდეთ ამას და გავაგზავნოთ მესიჯი, რომ, დიახ, ყველა ევროპულ სახელმწიფო მივესალმებით, მაგრამ მათ წესები უნდა დაიცვან. ამასთან დაკავშირებით, მახსენდება ჩვენი რეზოლუცია 2600, რომელიც მიმდინარე წელს მივიღეთ და მოითხოვდა პოლიტიკური პატიმრების დაუყოვნებლივ გათავისუფლებას, ასევე გამოხატავდა ამ დარბაზის შეშფოთებას დაპატიმრებებისა და სამართლებრივი პროცესების ბოროტად გამოყენების შესახებ საქართველოში და დღეს ამის გახსენება ღირს. ჩვენ უნდა მივცეთ ჩვენს ყველა ქართველ კოლეგას საშუალება, ჩაერთონ დემოკრატიულ პოლიტიკაში და ასევე, ითანამშრომლონ ამ ადგილთან და ევროპის საბჭოსთან, ყოველგვარი შიშისა და ვინმესთვის უპირატესობის მინიჭების გარეშე“, – განაცხადა გეთინსი.

როგორც მომხსენებელმა აღნიშნა, საქართველოში მიმდინარე მოვლენები არის ავტორიტარული ტაქტიკა, რომელიც ეწინააღმდეგება იმას, რასაც ევროკავშირის კანდიდატი ქვეყნისგან ელიან.

„შემიძლია ვთქვა და ოფიციალურად დავაფიქსირო, რომ თუ ვინმე დაისჯება ევროპის საბჭოში დასწრებისა და ევროპის სხვადასხვა კუთხიდან არჩეულ პოლიტიკოსებთან ურთიერთობისთვის, ჩვენ ამას უდიდესი სერიოზულობით უნდა მოვეკიდოთ. თუმცა, არ დაგვავიწყდეს ფასი, რომელსაც ბევრი ქართველი იხდის დემოკრატიულ პოლიტიკაში ჩართულობისთვის და იმ უფლებების განხორციელებისთვის, რომლებსაც ბევრი ჩვენგანი თავისთავად მინიჭებულ მოვლენად მივიჩნევთ. არ უნდა იყოს პოლიტიკურად მოტივირებული დევნა, მათ შორის ზურაბ ჯაფარიძის, ნიკა მელიას, ნიკა გვარამიას, მამუკა ხაზარაძის, გიორგი ვაშაძის, ბადრი ჯაფარიძისა და სხვა პირებს მიმართ, რომლებიც პოლიტიკურად მოტივირებულ დევნას განიცდიან საქართველოში.

მინდა, გავიხსენო გაფართოების საკითხებში ევროკავშირის კომისრის, მარტა კოსის სიტყვები, რომ ოპოზიციური ხმის ჩახშობა თავდასხმაა საქართველოს დემოკრატიულ საფუძვლებზე, რომლებიც ირყევა. დღესდღეობით ეს სერიოზულია და ჩვენ სერიოზულად უნდა მოვეკიდოთ მას. ევროკავშირის საგარეო საქმეთა და უსაფრთხოების პოლიტიკის წარმომადგენელმა, ანიტა ჰიპერმა განაცხადა, რომ ოპოზიციის ლიდერების პოლიტიკურად მოტივირებული დევნა და დაპატიმრებები ეწინააღმდეგება ძირითად დემოკრატიულ ღირებულებებს. ეს არის ავტორიტარული ტაქტიკა, რომელიც ეწინააღმდეგება იმას, რასაც ჩვენ ევროკავშირის კანდიდატი ქვეყნისგან ველით. უნდა იყოს ინკლუზიური დიალოგი და ეს არის ის, რისკენაც დიდი ბრიტანეთი და ეუთო მოუწოდებენ. ინკლუზიური დიალოგისკენ, პოლიტიკური პარტიების, სამოქალაქო საზოგადოების, მშვიდობიანი და დემოკრატიული გადაწყვეტილებებისკენ, რაც ძალიან ძვირფასია ყველასთვის ამ ადგილას.

ჩვენი უფლებები ევროპული უფლებებია და ეს ისტორიის გაკვეთილია. ჩვენი უფლებები, რომლებსაც თავისთავად მიღებულად მივიჩნევთ, ძნელად მოპოვებულია, მაგრამ ისინი დემოკრატიული ევროპის საფუძვლებია. ევროპელები, სარგებლობენ დიდი დემოკრატიით და სხვა უფლებებით ახლა უფრო მეტად, ვიდრე ისტორიის ნებისმიერ სხვა ეტაპზე. ეს მყიფე, მოქნილია და თუ მათზე თვალს დავხუჭავთ, იქ სადამდე მიგვიყვანს ეს? ჩვენ არ შეგვიძლია, დავხუჭოთ თვალი ამ უფლებების ჩახშობაზე ევროპის ნებისმიერ წერტილში. არავინ იცის ეს უკეთ, ვიდრე ჩვენმა უკრაინელმა მეგობრებმა, რომლებიც ამ მომენტში სისხლს ღვრიან საკუთარ ქვეყანაში, რათა დაიცვან თავიანთი უფლებები, დემოკრატიული უფლებები და დემოკრატია. გუშინ საღამოს პრეზიდენტმა ზელენსკიმ ძალიან ბევრი ისაუბრა. მადლობა პირიქით უნდა ყოფილიყო და მადლობას ვუხდი ჩვენს უკრაინელ მეგობრებს, რადგან თქვენ გვაძლევთ ამ მაგალითს და მე მადლიერი ვარ თქვენი. დემოკრატია არის ძალიან მყიფე. ეს უფლებები მყიფეა. ასე რომ, საქართველოსთან დაკავშირებით, ჩვენ გვაქვს პასუხისმგებლობა ჩვენი მეგობრების წინაშე საქართველოში და ყველა იმ ადამიანის წინაშე, ვინც ისწრაფვის იმ უფლებებისკენ, რომლითაც ჩვენ ვსარგებლობთ“, – განაცხადა სტივენ გეთინსი.

საქართველო მხარს არ უჭერს რუსეთის აგრესიის წინააღმდეგ ტრიბუნალის შექმნას. არის შეკითხვა, ვისთვის მუშაობს საქართველოს მთავრობა, ვინ არიან მათი ბატონები? ოპოზიციის ლიდერების დაპატიმრება არ არის საქართველოს მოსახლეობის ხმა, ეს არის კრემლის ჩურჩული, – ამის შესახებ უკრაინელმა დეპუტატმა, ევროსაბჭოს საპარლამენტო ასამბლეის წევრმა, ალექსეი გონჩარენკომ ევროპის საბჭოს საპარლამენტო ასამბლეაზე განაცხადა.

გონჩარენკოს თქმით, მათ „ყველაფერი უნდა გააკეთონ, რომ გადაარჩინონ საქართველო მოსკოვისგან და დაუბრუნონ საქართველო საქართველოს მოსახლეობას“.

„წევრი ქვეყნებიდან ექვსმა ქვეყანამ მხარი არ დაუჭირა ტრიბუნალის შექმნას რუსეთის წინააღმდეგ და ერთ-ერთი ქვეყანა საქართველოა. საქართველო თვითონ არის რუსეთის აგრესიის მსხვერპლი. საქართველოს ტერიტორიის 20 პროცენტი ოკუპირებულია რუსეთის მიერ, თითქმის იმდენივე, რამდენიც უკრაინაში. საქართველო უფრო ადრე იყო მოსკოვის რეჟიმის აგრესიის მსხვერპლი, ვიდრე ჩვენ. ამის შემდეგ საქართველო მხარს არ უჭერს რუსეთის აგრესიის წინააღმდეგ ტრიბუნალს. შეკითხვა არის, ვისთვის მუშაობს საქართველოს მთავრობა, ვინ არიან მათი ბატონები?

როდესაც ისინი აპატიმრებენ ოპოზიციის ლიდერებს, ეს არ არის საქართველოს მოსახლეობის ხმა, ეს არის კრემლის ჩურჩული. საქართველოს მოსახლეობა იმსახურებს ლიდერებს, ვინც დგას მათ მხარდამხარ, არა პუტინთან. სწორედ ეს ხდება ახლა. აქ არის ჩვენი ყველას ბრალეულობაც. 2008 წელს იყო დრო, როდესაც უკრაინა და საქართველო ნატო-ს კართან იდგნენ. ნატო-მ თქვა, დიახ, მიგიღებთ, მაგრამ არ ვიცით, როდის. ბევრმა ვერ გაიგო, რა ხდებოდა, პუტინმა ნათლად გაიგო და 2008 წლიდან მან დაიწყო ომი საქართველოს და შემდეგ უკრაინის წინააღმდეგ. ის ანადგურებს ამ ქვეყნებს, ცდილობს, ყველა დაგვხოცოს, ცდილობს ამ ქვეყნების ოკუპაციას. ახლა ის საქართველოს ჰიბრიდულად იკავებს, რადგან ახლა ძალიან დაკავებულია უკრაინაში. ეს არ არის ტანკები, მაგრამ არიან მარიონეტები, ესენი არიან რუსეთის აგენტები, ვინც ახორციელებენ თავდასხმას საქართველოზე. ეს არ არის ბიძინა ივანიშვილი, ეს არის ლუკაშვილი, რადგან ის საქართველოსგან ბელარუსს აკეთებს. ეს ბელარუსს ჰგავს, რომელმაც დაკარგა დემოკრატია, შემდეგ სახელმწიფოებრიობა და ახლა ოკუპირებული სახელმწიფოა. სწორედ ასე ხდება ახლა საქართველოში. რამდენიმე თვის წინ ჩვენ შევხვდით გიორგი ვაშაძეს, სხვა ლიდერებს, რომლებიც ახლა ციხეში არიან. ჩვენ ყველაფერი უნდა გავაკეთოთ, რომ გადავარჩინოთ საქართველო მოსკოვისგან, რომ დავუბრუნოთ საქართველო საქართველოს მოსახლეობას“, – განაცხადა ალექსეი გონჩარენკომ.

უწყების ცნობით, უცხოელისთვის ან მოქალაქეობის არმქონე პირისთვის საერთაშორისო დაცვის მინიჭებასთან დაკავშირებული რეგულაციების დახვეწის, არალეგალურ მიგრაციასთან ბრძოლისა და თავშესაფრის პროცედურის ბოროტად სარგებლობის პრევენციის მიზნით, საქართველოს შინაგან საქმეთა სამინისტროს მიერ მომზადებულ „საერთაშორისო დაცვის შესახებ“ საკანონმდებლო ცვლილებათა პაკეტს პარლამენტმა მესამე მოსმენით მხარი დაუჭირა. ინფორმაციას ამის შესახებ შსს ავრცელებს.

უწყების ცნობით, საკანონმდებლო ცვლილებათა პაკეტი ევროპის პარლამენტისა და საბჭოს დირექტივების შესაბამისად მომზადდა.

„ცვლილების თანახმად, სისხლის სამართლის კოდექსს ემატება სასჯელის ახალი სახე – უცხოელის საქართველოდან გაძევება და განსაზღვრული ვადით საქართველოში შემოსვლის აკრძალვა;

ადმინისტრაციულ სამართალდარღვევათა კოდექსს ემატება ადმინისტრაციული სახდელის ახალი სახე − უცხოელის საქართველოდან გაძევება და უცხოელის საქართველოში შემოსვლის აკრძალვა;

იზრდება ჯარიმები იმ უცხოელებისათვის, რომლებმაც საქართველოს ტერიტორიაზე ყოფნის წესები დაარღვიეს;

მნიშვნელოვნად მარტივდება ქვეყანაში არალეგალურად მყოფ უცხოელთა გაძევების პროცედურა.

თავშესაფრის პროცედურის ბოროტად სარგებლობის პრევენციის მიზნით:

ინერგება თავშესაფრის განხილვის დაჩქარებული პროცედურა იმ უცხოელებისათვის, რომლებმაც ქვეყანაში შემოსვლიდან 1 თვის ვადაში არ მოითხოვეს თავშესაფარი;

ინერგება ახალი მექანიზმი, რომლის თანახმადაც, საქართველოს სახელმწიფო საზღვარზე, უცხოელის საქართველოს ტერიტორიაზე შემოშვების გარეშე, მოხდება თავშესაფრის განხილვა, თუ უცხოელის ქვეყანაში შემოსვლა სახელმწიფო უსაფრთხოებას უქმნის საფრთხეს;

მნიშვნელოვნად მცირდება თავშესაფრის განხილვისა და გასაჩივრების ვადები;

ინერგება მიღებული გადაწყვეტილებების ჩაბარების გამარტივებული (ელექტრონული) წესი, რაც მნიშვნელოვნად შეუწყობს ხელს გასაჩივრების ვადების კონტროლს;

შეიზღუდება საქართველოში ბინადრობის ნებართვა გაცემა იმ უცხოელზე, რომლის მიმართაც დაწყებულია გაძევების საკითხის შესწავლა ან მიღებულია გადაწყვეტილება მისი საქართველოდან გაძევების შესახებ“, – ნათქვამია შსს მიერ გავრცელებულ ინფორმაციაში.

ფასდაუდებელია სახელმწიფო დაცვის სპეციალური სამსახურის როლი სახელმწიფო სისტემის სტაბილური და უსაფრთხო ფუნქციონირების საქმეში, – ამის შესახებ საქართველოს პრეზიდენტმა მიხეილ ყაველაშვილმა უწყების 31 წლის იუბილესადმი მიძღვნილ ღონისძიებაზე სიტყვით გამოსვლისას განაცხადა.

საქართველოს პრეზიდენტი ღონისძიებას პრემიერ-მინისტრ ირაკლი კობახიძესთან, პარლამენტის თავმჯდომარე შალვა პაპუაშვილთან და მთავრობის წარმომადგენლებთან ერთად დაესწრო.

მიხეილ ყაველაშვილმა უწყების ხელმძღვანელობას, პირად შემადგენლობას, თანამშრომლებსა და ვეტერანებს, ქვეყნის უსაფრთხოების სადარაჯოზე დგომისთვის მადლობა გადაუხადა.  მისივე განცხადებით, სწორედ მათი დამსახურებაა, სახელმწიფო დაცვის სპეციალური სამსახური თანამედროვე სტანდარტების უმაღლესი დონის ინსტიტუტს რომ წარმოადგენს.

„მინდა განსაკუთრებული მადლობა გადაგიხადოთ უწყების ხელმძღვანელობას,  პირად შემადგენლობას, თანამშრომლებსა და ვეტერანებს – ყველას, ვინც ყოველდღიურად ქვეყნის უსაფრთხოების სადარაჯოზე დგახართ.  სწორედ  თქვენი დამსახურებაა, რომ დღეს სახელმწიფო დაცვის სპეციალური სამსახური თანამედროვე სტანდარტების უმაღლესი დონის ინსტიტუტს წარმოადგენს. თითოეული ქართველის სახელით განსაკუთრებული მადლობა ეკუთვნის სამსახურებრივი მოვალეობის შესრულების დროს დაღუპულ გმირებს. მინდა პატივი მივაგო მათ ნათელ ხსოვნას,  ყოველთვის უნდა გვახსოვდეს მათი გაკეთებული საქმეები და [ჩადენილი] გმირობა“,- განაცხადა მიხეილ ყაველაშვილმა.

პრეზიდენტის განცხადებით, ფასდაუდებელია სახელმწიფო დაცვის სპეციალური სამსხურის როლი სახელმწიფო  სისტემის სტაბილური და უსაფრთხო ფუნქციონირების საქმეში .

„ფასდაუდებელია სახელმწიფო დაცვის სპეციალური სამსხურის როლი სახელმწიფო  სისტემის სტაბილური და უსაფრთხო ფუნქციონირების საქმეში . თქვენ გაკისრიათ უმნიშვნელოვანესი, საპატიო და ამავდროულად ურთულესი მისია – დაიცვათ სახელმწიფოს უსაფრთხოება და იყოთ ეროვნული სიმშვიდის გარანტი. სიამაყით შეიძლება ითქვას, რომ თითოეული თქვენგანი ამ მისიას თავს წარმატებით ართმევთ, სიმშვიდე და უსაფრთხოება, რასაც ჩვენი თანამოქალაქეები ყოველდღიურად გრძნობენ,  სწორედ ეს არის თქვენს მიერ პროფესიონალურად შესრულებული საქმის, უდიდესი ერთგულებისა და ფართო საზოგადოებისთვის შეუმჩნევლად  ჩადენილი გმირობის და თავდადების შედეგი. ჩვენი მიზანია, საქართველო იყოს ერთიანი, ძლიერი, უსაფრთხო და  განვითარებული სახელმწიფო.  ამ მიზნის მიღწევა კი თქვენს გარეშე, რა თქმა უნდა,  შეუძლებელია. თქვენ ხართ ადამიანები, ვისი საქმიანობაც ერთგულებას, ღირსებასა და პროფესიონალიზმს მოითხოვს . სწორედ ამ ფასეულობებისადმი თქვენი ერთგულება ქმნის ქვეყნის უსაფრთხო მომავალის მყარ საფუძველს“,- განაცხადა საქართველოს პრეზიდენტმა.

სიტყვის დასასრულს, მიხეილ ყაველაშვილმა სახელმწიფო დაცვის სპეციალური სამსახურის თანამშრომლებს მოუწოდა იყვნენ  მუდამ ერთიანები,  რათა მომავალ თაობებს ძლიერი სახელმწიფო დაუტოვონ. პრეზიდენტმა თითოეულ მათგანს მშვიდობა, სიძლიერე და წარმატებები უსურვა.

ღონისძიების ფარგლებში, საქართველოს პრეზიდენტმა მიხეილ ყაველაშვილმა, პრემიერ-მინისტრ ირაკლი კობახიძისა და პარლამენტის თავმჯდომარის, შალვა პაპუაშვილის ერთობლივი წარდგინების საფუძველზე, სახელმწიფო დაცვის სპეციალური სამსახურის უფროსს ანზორ ჩუბინიძეს და უწყების სხვა თანამშრომლებს საქართველოს სახელმწიფო ჯილდოები გადასცა.

საქართველოს პრეზიდენტმა სახელმწიფო დაცვის სპეციალური სამსახურის ინფრასტრუქტურა დაათვალიერა. ღონისძიების ფარგლებში მოეწყო დასაცავ პირზე შენობაში თავდასხმისა და ევაკუაციის, ასევე კორტეჟზე თავდასხმა-მოგერიების და კინოლოგების საჩვენებელი იმიტაცია.

სახელმწიფო დაცვის სპეციალური სამსახური სამ ათწლეულზე მეტი ხნის განმავლობაში ძლიერ და თანამედროვე ინსტიტუტად ჩამოყალიბდა, სწორედ თქვენი პროფესიონალიზმი, საქმისა და სამშობლოსადმი ერთგულება ქმნის მყარ საფუძველს სახელმწიფო ინსტიტუტების უსაფრთხო ფუნქციონირებისთვის, – ამის შესახებ საქართველოს პრემიერ-მინისტრმა, ირაკლი კობახიძემ სახელმწიფო დაცვის სპეციალური სამსახურის დაარსების დღისადმი მიძღვნილ ღონისძიებაზე სიტყვით გამოსვლისას განაცხადა.

მთავრობის მეთაურმა, პრეზიდენტ მიხეილ ყაველაშვილთან და პარლამენტის თავმჯდომარე შალვა პაპუაშვილთან ერთად, სახელმწიფო დაცვის სპეციალური სამსახურის უფროსს, ანზორ ჩუბინიძეს, სამსახურის პირად შემადგენლობას და თითოეულ თანამშრომელს პროფესიული დღე მიულოცა.

ირაკლი კობახიძემ ისაუბრა მათი საქმიანობის განსაკუთრებულ მნიშვნელობაზე სახელმწიფო ინსტიტუტების უსაფრთხოების უზრუნველყოფაში.

„თქვენი მისიის ჭეშმარიტი არსია, იზრუნოთ არა მხოლოდ მაღალი თანამდებობის პირების უსაფრთხოებაზე, არამედ განსაკუთრებული მნიშვნელობის სახელმწიფო ინსტიტუტებსა და დიპლომატიურ მისიებზე. თქვენ იცავთ ინსტიტუტებს, რომლებზეც ჩვენი სახელმწიფო დგას და იცავთ თავად ქართულ სახელმწიფოებრიობას – ჩვენს სუვერენიტეტს, კონსტიტუციურ წესრიგს და უსაფრთხოებას. სამ ათწლეულზე მეტი ხნის განმავლობაში სახელმწიფო დაცვის სპეციალური სამსახური ძლიერ და თანამედროვე ინსტიტუტად ჩამოყალიბდა. სამსახურის 13 სტრუქტურული ერთეული სრულყოფილად ფარავს უსაფრთხოების ყველა ასპექტს. სახელმწიფო დაცვის სპეციალური სამსახური ჩვენი უსაფრთხოების არქიტექტურაში ასრულებს მუდმივად მზარდ როლს და ამ ყველაფერში მინდა, განსაკუთრებულად გამოვყო ბატონი ანზორ ჩუბინიძის პირადი წვლილი. ჩვენ ყველა ვხედავთ, ყოველდღიურ რეჟიმში როგორ ზრუნავს ის სახელმწიფო დაცვის სამსახურის გაძლიერებაზე, რაც არის აუცილებელი პირობა, რომ ჩვენი ქვეყნის უსაფრთხოება სათანადოდ იყოს დაცული“, – განაცხადა პრემიერ-მინისტრმა და ანზორ ჩუბინიძეს განსაკუთრებული მადლობა გადაუხადა.

საქართველოს მთავრობის ინფორმაციით, სამსახურის დაარსების დღისადმი მიძღვნილ ღონისძიებასთან დაკავშირებით, კანონიერებისა და მართლწესრიგის განმტკიცებაში შეტანილი განსაკუთრებული წვლილისთვის პრეზიდენტმა ღირსების ორდენით დააჯილდოვა სახელმწიფო დაცვის სპეციალური სამსახურის უფროსი ანზორ ჩუბინიძე. სახელმწიფო ჯილდო – მედალი „მხედრული მამაცობისთვის“ გადაეცათ გრიგორი ურიდიას, ჯაბა გამჯაშვილს, თორნიკე ჯანელიძეს, ზურაბ დარბაისელს და ალექსანდრე ქურდაძეს. ღირსების მედლით პრეზიდენტმა დააჯილდოვა ილია შუბითიძე, ლევან ცეცხლაძე, ირაკლი ნათენაძე და გიორგი ნატრაძე.