Home Blog Page 3

ნიკო კვარაცხელიას დედა საქმის გადაკვალიფიცირებას და პროკურორის ჩამოშორებას ითხოვს

2021 წლის 15 სექტემბერს, თბილისში, ვერაზე მოკლული 22 წლის ნიკო კვარაცხელიას დედა, იზა ომაძე , გენერალურ პროკურორს მიმართავს და საქმიდან პროკურორ გია შაიშმელაშვილის ჩამოშორებას, ასევე მუხლის შეკვეთილ მკვლელობად გადაკვალიფიცირებას ითხოვს.

“რადგან ამ ბატონმა პროკურორმა, ნიკო კვარაცხელიას საქმე ფაქტიურად ჩაფარცხა, რის და რა ფასად ალბათ ამას თქვენ უკეთ გაიგებთ ვიდრე მე” – წერს იზა ომაძე.

მისი თქმით, საქმეში იყო არაერთი მტკიცებულება, რომელიც მიუთითებდა რომ იყო შეკვეთილი მკვლელობა, მაგრამ პროკურორმა შაიშმელაშვილმა “საქმე დაშალა, კვალიფიკაცია შეუცვალა და ისე შემოდო თაროზე”.

იზა ომაძე გამთქვამს ეჭვს, რომ ამისთვის პროკურორმა “ძალიან დიდი ფული აიღო”.

“ბატონო პროკურორო, ეს ჩემი შვილია, ჩემი ნიკო, რომელიც ოთხი წლის წინ ქალაქის შუაგულში დაქირავებულმა მკვლელებმა, უსულო ახალგაზრდებმა დაგვიხვრიტეს. საქმის პროკურორი გია შაიშმელაშვილია, ყოველგვარი ვადა ამოიწურა, მოთმინების ფიალაც გადაივსო, მინდა მოგმართოთ თხოვნით, რომ პროკურორი შაიშმელაშვილი საქმიდან ჩამოაშოროთ და ამ საქმეს სწორი კვალიფიკაცია მისცეთ!

რადგან ამ ბატონმა პროკურორმა, ნიკო კვარაცხელიას საქმე ფაქტიურად ჩაფარცხა, რის და რა ფასად ალბათ ამას თქვენ უკეთ გაიგებთ ვიდრე მე.

საქმეში იყო თითქმის ყველა მტკიცებულება, კონკრეტული სახელები, სამუშაო ტელეფონები უამრავი მტკიცებულება რომ ეს იყო შეკვეთილი მკვლელობა, მაგრამ მან ეს საქმე დაშალა, კვალიფიკაცია შეუცვალა და ისე შემოდო თაროზე…

ეჭვი მაქვს, რომ მან და მისმა პატრონებმა ძალიან დიდი ფული აიღეს, სხვანაირად ადამიანი ასეთ ბოროტებაზე არ წავიდოდა, ვხედავ როგორ უბნელებს თვალს და გონებას დიიიიდი ფული მაღალჩინოსნებს!

ჰკითხეთ ვისი მითითებებით მოქმედებდა შაიშმელაშვილი!

მე შემიძლია გითხრათ რომ აუცილებლად დადგება ის დღე როცა ნიკოს მკვლელობის დამკვეთებს თავად მიუჯდება ბატონი შაიშმელაშვილი გვერდით! და არა მარტო შაიშმელაშვილი!

ისე არ გამწირავს უფალი ამ დღეს რომ არ მომასწროს…

ვიმეორებ და ათასჯერ გავიმეორებ, ნიკო კვარაცხელია არ მოუკლავს თავის თაობას, ნიკო კვარაცხელიას მკვლელობა იყო შეკვეთილი, თუ ვის მიერ ეს თქვენ უნდა დაადგინოთ, წინააღმდეგ შემთხვევაში პირდაპირ თქვენ და თქვენი ხელისუფლება გამოდიხართ დამკვეთი, მე მინდა პირადად თქვენ დაინტერესდეთ ამ საქმით. თქვენი წინამორბედებისავით ნუ დაიდებთ და ნუ დაუტოვებთ შვილებს ცოდვას!

ბატონ ღარიბაშვილს მივმართე, ბატონ გომელაურს მივმართე, ბატონ შოთაძეს მივმართე, რეაგირება ნული, მხოლოდ ის აინტერესებდათ, რა სახის პროტესტის მობილიზება შემეძლო!

ჩამოაშორეთ ნიკო კვარაცხელიას საქმეს პროკურორი შაიშმელაშვილი და გადააკვალიფიცირეთ საქმე როგორც შეკვეთილი მკვლელობა!

მთელმა საქართველომ იცის რომ ეს იყო შეკვეთილი მკვლელობა!

არ დავნებდებით, არ გახდება ეს საქმე ხანდაზმული, ყოველი დღე 15 სექტემბერია ჩვენთვის!

ნიკო შვილო ჯერაც წამზომია ჩართული შენს საათზე, სულ დატოვებულ შენს სხეულს რომ მოპარეს ნამუსგარეცხილებმა დედი!

მთელი გულით ვითხოვდი თან უნდა გავატანო იმ ქვეყნად თქო და მიმტკიცებდნენ არ ჰკეთებიაო!

მერე ძალიან გამწარებული რომ მნახეს, ღამის 12 საათზე მოაწერინეს საქმის გამომძიებელს და სისხლიანი დამიბრუნეს იქნებ ადგილზე გული გამხეთქოდა დედი!

ასეთი ბოროტება სუფევს შვილო მას შემდეგ რაც შენ დაგვტოვე, მაგრამ ბოროტება ვერ გაიმარჯვებს დედი ვერა!

ველი ღიაობას თქვენგან ბატონო პროკურორო! გთხოვთ, ნუ გამომიყვანთ დედის ამპლუიდან!” – წერს იზა ომაძე სოციალურ ქსელში

https://www.facebook.com/kate.kvara/posts/pfbid0FvKjkmq1EqsYN9ExKDCiWX7jvWeXNKgKTSghJMhLCPCscyrWdobvLijym6RR57K9l

როგორი ამინდია მოსალოდნელი დღეს საქართველოში

18 ივლისს სინოპტიკოსები მზიან დღეს ვარაუდობენ ქუთაისში – დღისით +36 და ღამით +21 გრადუსია მოსალოდნელი.

ოზურგეთშიც მზიანი ამინდია. დღისით +36 გრადუსი დაფიქსირდება, ღამით კი +18.

ბათუმშიც მზიანი დღე იქნება, დღისით ჰაერი +34 გრადუსამდე გათბება, ხოლო ღამით +20 გრადუსი დაფიქსირდება.

ფოთშიც უნალექო ამინდს ვარაუდობენ. დღისით +34 გრადუსი დაფიქსირდება, ღამით კი +21 გრადუსია მოსალოდნელი.

უნალექო დღეა ზუგდიდში, სადაც დღისით ტემპერატურა +35, ღამით კი +20 გრადუსია ნავარაუდევი.

მზიანი დღეა სოხუმში. +33 გრადუსია მოსალოდნელი დღისით, ღამით +21 გრადუსი დაფიქსირდება.

მესტიაში უნალექო ამინდს ვარაუდობენ, დღისით +28 გრადუსი იქნება, ღამით კი +9 გრადუსი დაფიქსირდება.

ამბროლაურშიც მზიანი დღეა, ჰაერი +34 გრადუსამდე გათბება, ღამით კი +15 გრადუსი დაფიქსირდება.

მზიანი ამინდია ჭიათურაში, დღისით +35 გრადუსი, ღამით კი +16 გრადუსი დაფიქსირდება.

ახალციხეშიც მზიანი დღეა. დღისით ჰაერი +34 გრადუსამდე გათბება, ღამით კი ტემპერატურა +11 გრადუსი იქნება.

ბორჯომში მზიანი ამინდია, +34 იქნება დღისით, ღამით კი +14 გრადუსი დაფიქსირდება.

მზიანი ამინდია მოსალოდნელი ბაკურიანშიც, დღისით +30 გრადუსია მოსალოდნელი, ღამით +8 გრადუსი დაფიქსირდება.

გორშიც მზეა. დღისით +36 გრადუსი, ღამის განმავლობაში კი +16 გრადუსი დაფიქსირდება.

მზიანი დღეა ცხინვალშიც, ჰაერის ტემპერატურა +35 გრადუსი იქნება, ღამით კი +15 გრადუსი დაფიქსირდება.

გუდაურში წვიმიანი ამინდია მოსალოდნელი. დღის განმავლობაში +25 გრადუსი დაფიქსირდება, ღამით კი ჰაერის ტემპერატურა +8 გრადუსი იქნება.

ომალოში დღისით +25, ღამით კი +8 გრადუსი დაფიქსირდება.

ლაგოდეხში ჰაერის ტემპერატურა დღის განმავლობაში +37 გრადუსი იქნება, ღამით კი +32 გრადუსი დაფიქსირდება. დღე უნალექოდ ჩაივლის.

მზიანი დღე იქნება თელავშიც, +35 გრადუსი დაფიქსირდება, ღამით კი +21 გრადუსია ნავარაუდევი.

მზიან ამინდს ვარაუდობენ გურჯაანშიც. დღისით +35 გრადუსი, ღამით კი +22 გრადუსი დაფიქსირდება.

სიღნაღში მზეა მოსალოდნელი, დღისით +34 გრადუსი იქნება, ღამით +21 გრადუსი დაფიქსირდება.

რუსთავშიც უნალექო დღეა. დღისით +37 გრადუსია მოსალოდნელი, ღამით კი +21 გრადუსი დაფიქსირდება.

თბილისშიც მზიან ამინდს პროგნოზირებენ. ჰაერის ტემპერატურა დღისით +36 გრადუსს მიაღწევს, ღამით კი +21 გრადუსი იქნება.

18 ივლისის ასტროლოგიური პროგნოზი

ამ დღეს ვარსკვლავები პირად ცხოვრებაში სასიამოვნო სიურპრიზებს გპირდებიან. სავარაუდოდ, საინტერესო შეხვედრები და ახალი, სასიამოვნო ნაცნობობა გელოდებათ. სამსახურში პრობლემების გადაჭრას ადვილად ახერხებთ –  თქვენი პიროვნული თვისებები ადამიანებს დააახლოებს და თქვენს გარემოზე დადებითად იმოქმედებს. დადებითი ტენდენციების მიუხედავად, საღამოს სტრესული სიტუაციების წარმოშობის ალბათობა არსებობს, ამიტომ ყურადღებით უნდა იყოთ.

კურო

დღეს თუ ვინმე დახმარებას გთხოვთ, უარი არ უთხრათ. შესაძლოა, უახლოეს მომავალში დახმარება თავად დაგჭირდეთ. ნუ ინერვიულებთ თუ მუშაობა ახალ, სრულიად უცნობ სფეროში მოგიწიათ. თქვენი გულისხმიერება და კეთილგანწყობა აუცილებლად უკან დაგიბრუნდებათ და კოლეგებისგან დახმარებას მიიღებთ. პირად ცხოვრებაში სიფრთხილე უნდა გამოიჩინოთ – ვიღაც ცდილობს თქვენს ოჯახში დაბნეულობა და უთანხმოება შემოიტანოს.

ტყუპები

ამ დღეს თქვენი ემოციურობა და ფეთქებადი ხასიათი ყველაფერში ხელს გიშლით. ეცადეთ, უსარგებლო კონფლიქტები თავიდან აიცილოთ. ნუ მოაწერთ ხელს საეჭვო საბუთებზე, თორემ ეს თქვენთვის ცუდად დასრულდება. ყურადღება მიაქციეთ დაუსრულებელ საქმეებს – გახსოვდეთ, რომ საქმის გაჭიანურება წინსვლაში ხელს გიშლით.

კირჩხიბი

ენერგიით სავსე ხართ. ეცადეთ ეს დრო ყველა მნიშვნელოვანი საქმის დასასრულებლად გამოიყენოთ. შრომისმოყვარეობისა და გონიერების წყალობით ნებისმიერ ამოცანას თავს ადვილად გაართმევთ და ძველი პრობლემებიც უმტკივნეულოდ გადაწყდება. ბევრ კირჩხიბს მოუწევს დაასრულოს ურთიერთობა, რომელსაც სიამოვნება აღარ მოაქვს. გამოიყენეთ ეს დღე საკუთარი აზრებისა და გრძნობების მოწესრიგებისთვის.

ლომი

ვარსკვლავების განლაგების მიხედვით, ამ დღეს სერიოზული დაბრკოლებები გელით. განსაკუთრებული სიფრთხილე ახალი, სარისკო იდეების განხორციელების დროს უნდა გამოიჩინოთ. სასურველია, რომ მნიშვნელოვანი პრობლემების გადაჭრა სხვა დღისთვის გადადოთ. შეეცადეთ, გადაწყვეტილების მიღებისას არსებული გარემოებები გაითვალისწინოთ. ვარსკვლავები გირჩევენ არ გაიმეოროთ შეცდომა, რომელმაც რთულ ვითარებაში ჩაგაგდოთ.

ქალწული

ეს დღე ოჯახურ გარემოში მშვიდად ყოფნისთვის ხელსაყრელია. ახალი სიმაღლეების დაპყრობას ნუ ეცდებით — დღეს ისინი თქვენთვის მიუწვდომელია. გირჩევთ ურთიერთობაში მეტი თავშეკავება და ტაქტი გამოიჩინოთ. აუცილებელი არაა, რომ ყველას თქვენი სიმართლე უმტკიცოთ. მშვიდი და გონივრული მიდგომა დაგეხმარებით, რომ ბოლო დროს დაგროვილი პრობლემები მოაგვაროთ.

სასწორი

ეს დღე განათლებასა და თვითგანვითარებას უნდა დაუთმოთ. გონებრივი აქტივობის ზრდა რთული ამოცანის ამოხსნაში დაგეხმარებათ. ვარსკვლავები გირჩევენ, კურსებზე დარეგისტრირდეთ და კვალიფიკაციის ამაღლება ან უცხო ენის შესწავლა დაიწყოთ. ამ დღეს რისკისა და თავგადასავლების მოყვარულებს ბედი გაუღიმებს. არ დაგავიწყდეთ მადლობა გადაუხადოთ ადამიანს, ვინც რთულ დროს არ მიგატოვათ. სანამ სიტუაციაში ბოლომდე არ გაერკვევით, დაპირებები არავის მისცეთ და ეცადეთ, ნებისმიერ სიტუაციაში ობიექტურობა შეინარჩუნოთ.

მორიელი

შეგიძლიათ მოდუნდეთ და ყურადღება ყოველდღიურ საქმეებზე გადაიტანოთ — თქვენი ცხოვრებაში ცვლილებები ჯერ მოსალოდნელი არ არის. იზრუნეთ ჯანმრთელობასა და დღის რეჟიმის მოწესრიგებაზე. თუ შვებულების დაგეგმვას აპირებთ, უპირატესობა სანატორიულ დასვენებას მიანიჭეთ. ეს დღე სავსეა დადებითი ემოციებით, ამიტომ ეცადეთ მოდუნდეთ და  ზედმეტი ფიქრებისგან განთავისუფლდეთ.

მშვილდოსანი

თქვენი პროფესიული და შემოქმედებითი პოტენციალი იზრდება. ეს ყველა საქმეზე დადებითად აისახება, რასაც ხელმძღვანელობაც დააფასებს და თქვენს კარიერულ წინსვლაზეც აისახება. საოჯახო საქმეები გაცილებით მარტივად მოგვარდება, თუ საყვარელი ადამიანის ან გამოცდილი კოლეგის რჩევას მოუსმენთ. ჯანმრთელობის მხრივ ყველაფერი მშვენივრადაა. ასე რომ, სევდის საბაბი ნამდვილად არ გაქვთ.

თხის რქა

ეს პერიოდი მარტივად არ ჩაივლის — მოსალოდნელია სირთულეები და დაბრკოლებები, რომლებიც წინსვლაში ხელს გიშლით. ეცადეთ თავი ხელში აიყვანოთ — სიბრაზე და აგრესია პრობლემებს მოგიტანთ. გირჩევთ, ფინანსურ საკითხებში მხოლოდ თქვენს შესაძლებლობებს დაეყრდნოთ და სესხის აღებისგან თავი შეიკავოთ.

მერწყული

ეს დღე პროფესიულ, სახელმწიფო ან საზოგადოებრივ სფეროში, ასევე ხელმძღვანელობასთან ურთიერთობაში თქვენი პოზიციის გასაძლიერებლად შესაფერისია. კოლეგებთან ურთიერთობაში მცირე გაუგებრობა და კონფლიქტი მოსალოდნელია. ამ ფონზე თქვენი ფსიქოემოციური მდგომარეობა შეიძლება გაუარესდეს, ამიტომ ეცადეთ, კომპრომისული გადაწყვეტილება იპოვოთ და დაპირისპირება დროულად დაასრულოთ.

თევზები

გაემგზავრეთ მოგზაურობაში — ეს გადაწყვეტილება თქვენს ცხოვრებაში სასიამოვნო ცვლილებებს მოიტანს. არსებობს შანსი, რომ სულიერ მასწავლებელს შეხვდეთ, რომელიც სწორ გზას გიჩვენებთ. ხელსაყრელი დღეა პირად ცხოვრებაში პრობლემების მოსაგვარებლად. მზად იყავით იმისთვის, რომ ყველა თქვენი დღევანდელი გეგმა ვერ შესრულდება, თუმცა შედეგები მაინც დამაკმაყოფილებელი იქნება. შორიდან მიღებული სიახლე ფინანსური პრობლემის მოგვარებაში დაგეხმარებათ.

კაცმა ბრიუსელში ოპოზიციის თვითგამოცხადებულ ელჩად დაინიშნა თავი, ციხის შიშით ქვეყნიდან გაიქცა და იქიდან გვმოძღვრავს, გიორგი გახარია ირელევანტურ კლოუნად იქცა -თინა ბოკუჩავა

კაცმა ბრიუსელში ოპოზიციის თვითგამოცხადებულ ელჩად დაინიშნა თავი, ციხის შიშით ქვეყნიდან გაიქცა და იქიდან გვმოძღვრავს, გიორგი გახარია ირელევანტურ კლოუნად იქცა, – ამის შესახებ „ერთიანი ნაციონალური მოძრაობის“ თავმჯდომარემ, თინა ბოკუჩავამ სოციალურ ქსელში დაწერა.

როგორც ბოკუჩავა აღნიშნავს, გიორგი გახარიას ციხის ეშინია.

„კაცმა ბრიუსელში ოპოზიციის თვითგამოცხადებულ ელჩად დაინიშნა თავი, ციხის შიშით ქვეყნიდან გაიქცა და იქიდან გვმოძღვრავს აქ დარჩენილებს, ვინც მართლა ვიბრძვით და მისგან განსხვავებით არც ციხის გვეშინია. „შამპანურის „ბაკალით“ ზღვაზე წამოწოლილები“ ვერ დაამარცხებენ ივანიშვილსო. ეს ფრაზა ხშირად გამოიყენა დღევანდელ ეთერში და ეტყობა, ფროიდის ეფექტია. მართლა ირელევანტურ კლოუნად იქცა გიორგი გახარია“, – წერს ბოკუჩავა.

ბრიუსელის წერილი შეეხება უვიზო მიმოსვლის ანგარიშებს, რომელიც ყოველ წელს დგება დეკემბერში – აგვისტო წერილში არ არის ნახსენები, ზეპირად არის ნათქვამი, მაგრამ ფაქტია, რომ აწყობილია საარჩევნო კალენდარზე -შალვა პაპუაშვილი

ბრიუსელის წერილი შეეხება უვიზო მიმოსვლის ანგარიშებს, რომელიც ყოველ წელს დგება და ეს ხდება წესით დეკემბერში. ეს აგვისტო წერილში არ არის ნახსენები და ზეპირად არის ნათქვამი, მაგრამ ფაქტია, რომ ეს აწყობილია საარჩევნო კალენდარზე, – ამის შესახებ პარლამენტის თავმჯდომარემ, შალვა პაპუაშვილმა გადაცემაში „იმედი LIVE“ განაცხადა.

მისი თქმით, გარე ძალებს უნდათ, რომ აგვისტო-სექტემბერში, არჩევნებამდე რამდენიმე კვირით ადრე მავნებლობა ჩაიდინოს ამა თუ იმ პოლიტიკურმა ჯგუფმა.

„ერთი რამე გავიხსენოთ ჩვენ, რომ ვიზალიბერალიზაციის პოლიტიკურ ინსტრუმენტად გამოყენების მცდელობა ყოველთვის იყო. მაშინ, როდესაც ჩვენ უვიზო მიმოსვლის შეთანხმება დავდეთ 2017 წელს, როდესაც ეს ყველაფერი ძალაში შევიდა, გახსოვთ, რომ მაშინ ეს ისტორია ჭორად დადიოდა და ეთაკილებოდათ ამის აღიარება, რომ „ნაციონალური მოძრაობის” წევრები როგორი დადიოდნენ სხვადასხვა კაბინეტში, რომ არ მოეცათ უვიზო მიმოსვლა. დღეს ამას საჯაროდ აკეთებენ, როგორც რადიკალური ოპოზიცია, ასევე, უცხოეთიდან დაფინანსებული NGO-ები, რომ რამენაირად ამ მხრივ გარკვეული ბარიერები შექმნან.

სხვათა შორის 31 აგვისტო რომ ითქვა ბრიუსელიდან, საგარეო საქმეთა მინისტრისთვის მიწერილ წერილში ასეთი თარიღი ნახსენები არ არის და ანუ, ზეპირად გაცხადდა. არ ვიცი ეს თარიღი რას ეფუძნება და რატომ მაინც და მაინც აგვისტო, როცა ეს არის საპარლამენტო პაუზის და მითუმეტეს, არის წინასაარჩევნო პერიოდი. რატომ უნდათ მაინც და მაინც ცხელ ზაფხულში გვამუშაონ კანონებზე, ვერ ვხვდები, თავად დასვენება უნდათ და ალბათ ჩვენი გაწვალება უნდათ კანონებზე მუშაობით.

წერილი შეეხება უვიზო მიმოსვლის ანგარიშებს, რომელიც ყოველ წელს დგება. ჩვენ ყოველ წელს ვაწვდით ინფორმაციას სხვადასხვა კანონმდებლობასთან დაკავშირებით, რომელიც რელევანტურია უვიზო მიმოსვლისთვის და ეს ხდება წესით დეკემბერში. ეს აგვისტო წერილში არ არის ნახსენები და ზეპირად არის ნათქვამი, მაგრამ ფაქტია, რომ ეს აწყობილია საარჩევნო კალენდარზე. ამასაც ეტყობა რასთან გვაქვს საქმე, რომ აგვისტო-სექტემბერში, არჩევნებამდე რამდენიმე კვირით ადრე მავნებლობა ჩაიდინოს ამა თუ იმ პოლიტიკურმა ჯგუფმა“, – აღნიშნა პაპუაშვილმა.

ქართველების უმრავლესობის მიმართ სოლიდარობის საჩვენებლად დონალდ ტრამპმა ახალი ელჩი უნდა დანიშნოს და სენატმა “MEGOBARI აქტი” მიიღოს-იან კელი და დევიდ კრემერი

ქართველების უმრავლესობის მიმართ სოლიდარობის საჩვენებლად დონალდ ტრამპმა ახალი ელჩი უნდა დანიშნოს და სენატმა “MEGOBARI აქტი” მიიღოს – ნათქვამია ერთობლივ სტატიაში, რომელსაც   საქართველოში აშშ-ის ყოფილი ელჩი, იან კელი და სახელმწიფო დეპარტამენტის ყოფილი მაღალჩინოსანი, დევიდ კრემერი ავრცელებენ.

განცხადებაში აღნიშნულია, რომ საქართველოში მოსახლეობა ერთ-ერთი ყველაზე პროამერიკულია, თუმცა მისი მთავრობა “აშკარად მოსკოვისკენ იხრება” და ქართულ ოპოზიციასა და სამოქალაქო საზოგადოებაზე ზეწოლით სულ უფრო მეტად იქცევა ისე, როგორც რუსული რეჟიმი. ამ ფონზე კრემერი და კელი მიიჩნევენ, რომ მოვლენების მსგავსი დინამიკა “უმნიშვნელოვანესს ხდის ტრამპის ადმინისტრაციისთვის, მალე დანიშნოს” რობინ დანიგანის შემცვლელი – ვინც “მტკიცედ ისაუბრებს საქართველოს მთავრობის ავტორიტარული და პრო-რუსული საქციელის წინააღმდეგ”.

ამასთან, მათი აზრით, აშშ-მა, ევროპელ პარტნიორებთან ერთად, უნდა გააორმაგოს საქართველოს დემოკრატიულ, პრო-დასავლურ გზაზე დაბრუნებისკენ ძალისხმევები, რადგან “შესაძლებლობის ფანჯარა არსებობს, ვინაიდან რუსეთი რეგიონში გავლენას კარგავს”.

“რობინ დანიგანის მიერ თანამდებობის დატოვების ფონზე, შეერთებულ შტატებს მალე საქართველოში ელჩი არ ეყოლება, იმის მიუხედავად, რომ წლების განმავლობაში საქართველო ამერიკის საკვანძო პარტნიორი იყო რთულ რეგიონში და მისი მოსახლეობა რეგიონში ერთ-ერთი ყველაზე პრო-ამერიკული იყო. მოსახლეობას ახლაც იგივე ხედვები აქვს, მაგრამ მთავრობა აშკარად მოსკოვისკენ იხრება და ქართულ ოპოზიციასა და სამოქალაქო საზოგადოებაზე ზეწოლით სულ უფრო მეტად იქცევა, როგორც რუსული რეჟიმი.

მსგავსი დინამიკა უმნიშვნელოვანესს ხდის ტრამპის ადმინისტრაციისთვის, რომ მალე დანიშნოს დანიგანის ჩამნაცვლებელი – ისეთი, რომელიც მტკიცედ ილაპარაკებს საქართველოს მთავრობის ავტორიტარული და პრო-რუსული საქციელის წინააღმდეგ. აშშ-ის სენატმა, თავის მხრივ, კვალიფიცირებული კანდიდატი უნდა დაამტკიცოს, რომელიც მოთხოვნებს შეესაბამება. მან ასევე უნდა მიიღოს წარმომადგენელთა პალატის მიერ 5 მაისს უკვე დამტკიცებული კანონპროექტი, რომელიც პასუხს აგებინებს ქართველ ოფიციალურ პირებს თავისი ანტი-ამერიკული ქმედებებისთვის და აშშ-ის წუხილს აჩვენებს ქვეყნის ავტორიტარული მმართველობისადმი გადახრის თაობაზე.

აშშ-მა, ევროპელ პარტნიორებთან ერთად, უნდა გააორმაგოს საქართველოს დემოკრატიულ, პრო-დასავლურ გზაზე დაბრუნების ძალისხმევები. შესაძლებლობის ფანჯარა არსებობს, ვინაიდან რუსეთი რეგიონში გავლენას კარგავს. როგორც სომხეთმა, ისევე აზერბაიჯანმა შეამცირეს თავიანთი კავშირები მოსკოვთან. და უკრაინა, რა თქმა უნდა, რუსეთის სასტიკ შეჭრას ებრძვის…

ქართველების უმრავლესობის მიმართ სოლიდარობის საჩვენებლად ტრამპის ადმინისტრაციამ ახალი ელჩი უნდა დანიშნოს და სენატმა “MEGOBARI აქტი” მიიღოს. ორივე ნაბიჯი სასწრაფოდ არის საჭირო, სანამ ივანიშვილი და “ქართული ოცნება” უფრო მეტად არ დააზიანებენ თავის ხალხს და სანამ შეერთებული შტატები სამუდამოდ არ დაკარგავს მნიშვნელოვან რეგიონალურ პარტნიორს”, – ნათქვამია განცხადებაში.

“დონალდ ტრამპს ჯერ კიდევ აქვს “ბოროტების ღერძის” დამსხვრევის შესაძლებლობა”- The Daily Telegraph

ბრიტანული გაზეთის „დეილი ტელეგრაფის“ (The Daily Telegraph) 17 ივლისის ნომერში გამოქვეყნებულია სტატია სათაურით: „დონალდ ტრამპს ჯერ კიდევ აქვს „ბოროტების ღერძის“ დამსხვრევის შესაძლებლობა“ (ავტორი – კონ კოფლინი), რომელშიც კომენტირებულია აშშ-ის პრეზიდენტის გადაწყვეტილება რუსეთთან მოვაჭრე ქვეყნების წინააღმდეგ სატარიფო სანქციების დაწესების თაობაზე.

გთავაზობთ ამონარიდს პუბლიკაციიდან:

დონალდ ტრამპის მიერ მიღებულ ზომებს რუსეთ-უკრაინის ომის შეწყვეტის მიზნით, – საბაჟო ტარიფების 100 და მეტი პროცენტით გაზრდას, რომლებიც რუსეთთან ვაჭრობის გამგრძელებელ ქვეყნებს ეხებათ, შეუძლიათ ბოლო მოუღოს დასავლეთის წინააღმდეგ მიმართულ დესპოტური რეჟიმების ტოქსიკურ ალიანსს.
ის მხარდაჭერა, რომელსაც რუსეთი ჩინეთის, ირანისა და ჩრდილოეთ კორეასაგან იღებს, აშკარად აჩვენებს, თუ როგორ ერთიანდებიან ავტოკრატული სახელმწიფოები დასავლეთზე უპირატესობის მოპოვების მიზნით.

ჩინეთი მნიშვნელოვნად არის დამოკიდებული რუსულ ნავთობსა და გაზზე: მართალია, პეკინი ციმბირის ნავთობს და გაზს შედარებით იაფად იღებს, მაგრამ რუსეთს მაინც დიდი შემოსავალი აქვს ჩინეთთან ენერგომატარებლებით ვაჭრობის შედეგად. გარდა ამისა, პეკინი მოსკოვს ტექნიკურ სამხედრო მხარდაჭერას უწევს დრონებისა და სამხედრო პროდუქციისათვის აუცილებელი ნახევარგამტარებისა და ინტეგრალური სქემების მიწოდებით.

ირანი ასევე აწვდის რუსეთს დრონებს და რაკეტებს, ჩრდილოეთ კორეა კი, გარდა იმისა, რომ რუსეთს იარაღით (რაკეტებით, ჭურვებით) ამარაგებს, უშუალოდ მონაწილეობს უკრაინის წინააღმდეგ საომარ მოქმედებებში – კორეული სამხედრო კონტინგენტის ფრონტზე გაგზავნით.

ვლადიმერ პუტინი დარწმუნებულია, რომ რუსეთის ეკონომიკა საკმაოდ ძლიერია და ნებისმიერი სადამსჯელო ზომებს გაუძლებს. იმიტომ არის დარწმუნებული, რომ წინა წლებში გამოცხადებულმა სანქციებმა დასავლეთისათვის სასურველი შედეგები არ გამოიღო.
მართალია, აშშ-სა და ევროკავშირის სანქციებს მთლად უკვალოდ არ ჩაუვლია (რუსულმა ცენტრალურმა ბანკმა საპროცენტო განაკვეთები გაზარდა, მოიმატა ინფლაციამ…), მაგრამ კრემლმა მოახერხა ეკონომიკის მობილიზება, პლუს ორმაგი დანიშნულების პროდუქციის იმპორტის გაფართოებით რიგი ქვეყნებიდან სიტუაციის სტაბილიზებას მიაღწია. დონალდ ტრამპის მეორადი სანქციები სწორედ ამ სავაჭრო სქემის გასანადგურებლად არის მიმართული.
ტარიფების ზრდის საფრთხე აშკარად გამოიწვევს პეკინის, თეირანისა და ფხენიანის შეშფოთებას: როგორც ირანელი აიათოლები, ასევე ჩინელი და ჩრდილო კორეელი კომუნისტები აუცილებლად დაფიქრდებიან – ღირს თუ არა მოსკოვთან ვაჭრობის გაგრძელება საკუთარი თავის საზიანოდ.

მოსკოვისა და პეკინის ურთიერთობა ყოველთვის ცალმხრივი იყო და ახლაც ასეა – ჩინეთი აქტიურად სარგებლობს რუსეთის ეკონომიკური პრობლემებით და მათ თავისი ინტერესების სასარგებლოდ იყენებს. სი ძინპინის გარემოცვაში ბევრი თვლის, რომ რუსეთი ჩინეთისათვის კარგ „ბენზინგასამართ სადგურს” წარმოადგენს.
სავარაუდოდ, ირანიც ნაწყენია რუსეთის ბოლოდროინდელი პოლიტიკით: მოსკოვმა პრაქტიკული მხარდაჭერა არ გაუწია თეირანს ისრაელის შეტევის მოგერიებაში, ანუ, იანვარში ხელმოწერილი სტრატეგიული თანამშრომლობის ხელშეკრულების მიუხედავად, კრემლმა მოკავშირე ირანის რეჟიმი ფაქტიურად მიატოვა.

რაც შეეხება ჩრდილოეთ კორეას, კიმ ჩენ ინი ჯერ-ჯერობით ისევ ერთგულებას ეფიცება რუს ლიდერს, მაგრამ ის გარემოება, რომ ჩრდილო კორეელებმა ცოცხალი ძალის დიდი ზარალი განიცადეს რუსეთ-უკრაინის ომში პირდაპირი ჩარევით, ალბათ ეჭვებს გაუჩენს კორეელ კომუნისტ ლიდერს – რამდენად ბრძნული იქნება კრემლთან თანამშრომლობის გაგრძელება, რომელიც უფრო მეტ ტკივილს იწვევს, ვიდრე სარგებელი მოაქვს.
დონალდ ტრამპის ზომები, რა თქმა უნდა, უპირველეს ყოვლისა მიმართულია იმისკენ, რომ კრემლი სამშვიდობო მოლაპარაკების დაწყებაზე აიძულოს, მაგრამ აშშ-ის პრეზიდენტის გადაწყვეტილებას ასევე შეუძლია ავტოკრატული რეჟიმების ალიანსის დაშლა-განადგურება, რომლის წევრებს მხოლოდ ერთი საერთო მიზანი აქვთ – დასავლეთს პრობლემები შეუქმნან.

მოამზადა სიმონ კილაძემ

წყარო:

ცესკო-ს, თვითმმართველობის არჩევნებში მონაწილეობის შემთხვევაში, რიგითი ნომრის მინიჭებასთან დაკავშირებით, შვიდმა პოლიტიკურმა გაერთიანებამ მიმართა

ცენტრალური საარჩევნო კომისია აქვეყნებს მოქალაქეთა პოლიტიკური გაერთიანებების ჩამონათვალს, რომლებმაც ცესკო-ს მიმართეს რიგითი ნომრის მინიჭებასთან დაკავშირებით, მუნიციპალიტეტის ორგანოთა 2025 წლის 4 ოქტომბრის არჩევნებში მონაწილეობის შემთხვევაში.

ცესკო-ს მიერ გამოქვეყნებული ინფორმაციის თანახმად, საარჩევნო ადმინისტრაციას შვიდმა პოლიტიკურმა გაერთიანებამ მიმართა. ესენია:

„გახარია საქართველოსთვის“ – ნომერი 25.

„ქართული ოცნება-დემოკრატიული საქართველო“ (შემოკლებული დასახელება მპგ „ქართული ოცნება“) – ნომერი 41.

„ძლიერი საქართველო-ლელო, ხალხისთვის, თავისუფლებისთვის!“ – ნომერი 9.

„ახალი პოლიტიკური ცენტრი“ (შემოკლებული დასახელება „გირჩი“) – ნომერი 36.

„ერთიანობა-ნაციონალური მოძრაობა“ (შემოკლებული დასახელება „ერთიანობა-ენმ“) – ნომერი 5.

„საქართველოს პატრიოტთა ალიანსი“ (შემოკლებული დასახელება „საქართველოს პატრიოტები“) – ნომერი 8.

„კოალიცია ცვლილებისთვის გვარამია მელია გირჩი დროა“ – ნომერი 4.

ცესკო-ს, თვითმმართველობის არჩევნებში მონაწილეობის შემთხვევაში, რიგითი ნომრის მინიჭებასთან დაკავშირებით, შვიდმა პოლიტიკურმა გაერთიანებამ მიმართა

ცენტრალური საარჩევნო კომისია აქვეყნებს მოქალაქეთა პოლიტიკური გაერთიანებების ჩამონათვალს, რომლებმაც ცესკო-ს მიმართეს რიგითი ნომრის მინიჭებასთან დაკავშირებით, მუნიციპალიტეტის ორგანოთა 2025 წლის 4 ოქტომბრის არჩევნებში მონაწილეობის შემთხვევაში.

ცესკო-ს მიერ გამოქვეყნებული ინფორმაციის თანახმად, საარჩევნო ადმინისტრაციას შვიდმა პოლიტიკურმა გაერთიანებამ მიმართა. ესენია:

„გახარია საქართველოსთვის“ – ნომერი 25.

„ქართული ოცნება-დემოკრატიული საქართველო“ (შემოკლებული დასახელება მპგ „ქართული ოცნება“) – ნომერი 41.

„ძლიერი საქართველო-ლელო, ხალხისთვის, თავისუფლებისთვის!“ – ნომერი 9.

„ახალი პოლიტიკური ცენტრი“ (შემოკლებული დასახელება „გირჩი“) – ნომერი 36.

„ერთიანობა-ნაციონალური მოძრაობა“ (შემოკლებული დასახელება „ერთიანობა-ენმ“) – ნომერი 5.

„საქართველოს პატრიოტთა ალიანსი“ (შემოკლებული დასახელება „საქართველოს პატრიოტები“) – ნომერი 8.

„კოალიცია ცვლილებისთვის გვარამია მელია გირჩი დროა“ – ნომერი 4.

დიდ ბრიტანეთში არჩევნებში ხმის მიცემის უფლება 16 წლის მოქალაქეებს ექნებათ

დიდ ბრიტანეთში არჩევნებში ხმის მიცემის უფლება 16 წლის მოქალაქეებს ექნებათ.

ქვეყნის მთავრობაში აცხადებენ, რომ ცვლილება უფრო სამართლიან მიდგომას წარმოადგენს 16 და 17 წლის მოქალაქეების მიმართ, რომელთა დიდი ნაწილიც უკვე მუშაობს და აქვს უფლება, იმსახუროს ჯარში.

ცვლილეების დამტკიცების შემდეგ დიდი ბრიტანეთის მთელ ტერიტორიაზე არჩევნებში მონაწილეობა 16 წლიდან იქნება შესაძლებელი. აღსანიშნავია, რომ შოტლანდიასა და უელსში 16 წლის მოქალაქეებს ხმის მიცემის უფლება უკვე ჰქონდათ.

როგორც პრემეირ-მინისტრმა, კირ სტარმერმა განაცხადა, 16 და 17 წლის გადასახადის გადამხდელ მოქალაქეებს უნდა ჰქონდეთ შესაძლებლობა, განაცხადონ, რაში სურთ, რომ ეს ფული დაიხარჯოს.

„ჩემი აზრით, ეს ძალიან მნიშვნელოვანია. 16 და 17 წლის მოქალაქეებს უნდა ჰქონდეთ ხმის მიცემის უფლება, რადგან მუშაობის უფლება აქვთ და გადასახადებსაც იხდიან. ჩემი აზრით, შენ თუ გადასახადებს იხდი, მაშინ უნდა გქონდეს შესაძლებლობა, განაცხადო, რაში გინდა, ეს ფული დაიხარჯოს და საით უნდა წავიდეს მთავრობა“, – განაცხადა დიდი ბრიტანეთის პრემიერ-მინისტრმა.

საკანონმდებლო ცვლილებებით, დიდი ბრიტანეთის 1,5 მილიონ მოქალაქეს საშუალება ექნება, მომდევნო არჩევნებში საკუთარი არჩევანი პირველად გააკეთოს.

ამას გარდა, საკანონმდებლო პაკეტის მიხედვით, დიდი ბრიტანეთის მოქალაქეებს არჩევნებში მონაწილეობის უფლება, პირადობის მოწმობის გარდა, ასევე ექნებათ საბანკო ბარათების წარდგენის შემთხვევაშიც.

ასევე, გამკაცრდება პოლიტიკური პარტიებისთვის გაკეთებული შემოწირულობების კონტროლი.

დიდ ბრიტანეთში მომდევნო საპარალამენტო არჩევნები 2029 წელს არის დაგეგმილი.

ცნობისთვის, დიდ ბრიტანეთში არჩევნებში მონაწილეობის ასაკი უკანასკნელად 1969 წელს 21-დან 18 წლამდე შემცირდა.

ულტიმატუმებისა და მუქარის ენა რუსეთისთვის მიუღებელია -მარია ზახაროვა

რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აცხადებს, რომ ულტიმატუმებისა და მუქარის ენა რუსეთისთვის მიუღებელია.

ამის შესახებ მარია ზახაროვამ რუსეთის საგარეო საქმეთა სამინისტროში გამართულ ბრიფინგზე განაცხადა, სადაც მას კომენტარის გაკეთება სთხოვეს დონალდ ტრამპის განცხადებაზე, რომელშიც აშშ-ის პრეზიდენტმა პირობა დადო, რომ უკრაინას უახლეს ამერიკულ შეიარაღებას მიაწვდის და მოსკოვისა და მისი პარტნიორების წინააღმდეგ ტარიფებს დააწესებს, თუ 50 დღეში უკრაინაში ზავი არ იქნება მიღწეული.

„ულტიმატუმების ენა, შანტაჟი და მუქარა ჩვენთვის მიუღებელია. ჩვენ გადავდგამთ ყველა საჭირო ნაბიჯებს ჩვენი ქვეყნის ინტერესების უსაფრთხოების უზრუვლესაყოფად და მათ დასაცავად. ასეთ პირობებში სპეციალური საომარი ოპერაციის მიზნების მიღწევა, რაც არის უკრაინის დემილიტარიზაცია და დენაციფიკაცია, უფრო აქტუალური ხდება“, – განაცხადა ზახაროვამ.

გომბორის მოხალისეთა მომზადების ცენტრმა დღეს კობა კობალაძეს, კახეთის მხარეში სახელმწიფო რწმუნებულს, გიორგი ალადაშვილს და საგარეჯოს მუნიციპალიტეტის მერს, ავთანდილ გულიკაშვილს უმასპინძლა

გომბორის მოხალისეთა მომზადების ცენტრმა დღეს კობა კობალაძეს, კახეთის მხარეში სახელმწიფო რწმუნებულს, გიორგი ალადაშვილს და საგარეჯოს მუნიციპალიტეტის მერს, ავთანდილ გულიკაშვილს უმასპინძლა

დღეს, 17 ივლისს, ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე, კახეთის მხარეში სახელმწიფო რწმუნებული გიორგი ალადაშვილი, საგარეჯოს მუნიციპალიტეტის მერი, ავთანდილ გულიკაშვილი მოხალისეთა ორგანიზაცია ა(ა)იპ „ახალგაზრდობა და ვეტერანები ეროვნული თავდაცვისა და უსაფრთხოებისთვის” გომბორის მოხალისეთა მომზადების ცენტრს ეწვივნენ.

ვიზიტის ფარგლებში, ა(ა)იპ „ახალგაზრდობა და ვეტერანები ეროვნული თავდაცვისა და უსაფრთხოებისთვის” დირექტორმა, ედუარდ ჯიშკარიანმა, სტუმრებს დაათვალიერებინა ცენტრის ინფრასტრუქტურა, გააცნო ინსტრუქტორები და ის პროგრამები, რომლებსაც მოხალისეები შეკრების დროს გადიან; სტუმრები, ასევე, დაესწრნენ მიმდინარე ნაკადში მონაწილე სკოლებს შორის გამართული შეჯიბრებების გამარჯვებულთა დაჯილდოების ცერემონიალს და თავადაც გადასცეს მათ სპეციალურად დაწესებული ჯილდოები და სიმბოლური საჩუქრები.

გომბორის მოხალისეთა მომზადების ცენტრი, წელს, უკვე, მასპინძლობს მეექვსე ნაკადს, რომელიც აერთიანებს სკოლის მოსწავლეებს თბილისიდან, რუსთავიდან, ლაგოდეხისა და საგარეჯოს მუნიციპალიტეტებიდან, ასევე, ზუგდიდის მუნიციპალიტეტის მერიის თანამშრომლებს და შოთა მესხიას სახელობის ზუგდიდის სახელმწიფო უნივერსიტეტის სტუდენტებს.

კურსის განმავლობაში, რომელიც 5 დღიანია, მოხალისეები, კვალიფიციური ინსტრუქტორების ხელმძღვანელობით, გაივლიან რეალურ სიტუაციებზე ადაპტირებულ პრაქტიკულ მომზადებას; ისწავლიან თვითგადარჩენას, საცეცხლე მომზადებას, დრონების მართვას, პირველად სამედიცინო დახმარებას, საინჟინრო მომზადებას, ტოპოგრაფიას, კიბერუსაფრთხოებას.

ბანაკი უზრუნველყოფილია: კონტეინერის ტიპის კომფორტული საცხოვრებლებით,სამჯერადი კვებით, 24-საათიანი სამედიცინო ბრიგადით,ტერიტორიის ვიდეო მონიტორინგით, უფასო ინტერნეტით, ტრანსპორტირებით.

აღსანიშნავია, რომ გომბორის მოხალისეთა სასწავლო ცენტრი ადაპტირებულია შშმ პირებისთვისაც.
ინფორმაციისთვის, ა(ა)იპ ”ახალგაზრდობა და ვეტერანები ეროვნული თავდაცვისა და უსაფრთხოებისათვის” 2023 წელს შეიქმნა. მოხალისეთა ორგანიზაციის დამფუძნებლები არიან საქართველოს თავდაცვის სამინისტრო, ვეტერანების საქმეთა სახელმწიფო სამსახური და საქართველოს გენერალთა კლუბი და მისი მიზანია, ნებაყოფლობით საწყისებზე, აქტიური და მოტივირებული მოქალაქეების არაპოლიტიკური სტრუქტურირებული ერთობის შექმნა, რაც ხელს შეუწყობს ქვეყნის თავდაცვისუნარიანობის გაზრდასა და ეროვნული უსაფრთხოების დაცვას.

დაარსების დღიდან დღემდე, ცენტრში, 1500-ზე მეტი მოხალისე გადამზადდა.

1234...2,877Page 3 of 2,877
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი