რუსეთმა ბოლო 24 საათში საჰაერო თავდასხმა ხარკოვზე ორჯერ განახორციელა. ადგილობრივი ხელისუფლების ინფორმაციით, შედეგად სულ მცირე ოთხი ადამიანი დაიღუპა, 60-ზე მეტი კი დაშავდა.
როგორც ქალაქის მერმა, იგორ ტერეხოვმა განაცხადა, სრულმასშტაბიანი ომის დაწყების შემდეგ ხარკოვზე ახლა ყველაზე ძლიერი შეტევა მიმდინარეობს.
უკრაინის სამხედრო ძალები იუწყებიან, რომ რუსეთმა ღამით გაუშვა 206 დრონი, ორი ბალისტიკური და შვიდი სხვა ტიპის რაკეტა.
8 ივნისს მართლმადიდებელი ეკლესია დღესასწაულობს სულთმოფენობას – სულიწმიდის გარდამოსვლის დღეს. აღდგომიდან ორმოცდამეათე დღეს ეკლესია აღნიშნავს სულთმოფენობის დღესასწაულს, სულიწმიდის გარდამოსვლის დღეს. ეს დღე ითვლება ქრისტეს ეკლესიის დაარსების დღედაც. ამაღლების შემდეგ მოწაფეები იერუსალიმში დაბრუნდნენ. ისინი ერთად ელოდებოდნენ დაპირებული ნუგეშისმცემლის – სულიწმიდის – მოვლინებას. და აი, ამაღლებიდან მეათე დღეს, დილის ცხრა საათზე, იერუსალიმში ამოვარდა უცნაური ქარი, ციდან გარდამოვიდა ღვთაებრივი ცეცხლი და მოწაფეებს ცეცხლის ენების სახით დაადგა თავზე. მოწაფეებმა საოცარი ძალით დაიწყეს ქადაგება სხვადასხვა ენაზე. სულთმოფენობის დღესასწაულს მეტად ღრმა სიმბოლური მნიშვნელობა აქვს: როდესაც წმინდა წინასწარმეტყველი მოსე ებრაელებს ეგვიპტიდან გამოუძღვა, მან ისინი მეორმოცე დღეს სინას წმინდა მთასთან მიიყვანა, ხოლო ორმოცდამეათე დღეს მისცა ღვთაებრივი სჯული ძველი აღთქმისა. აქედან მოყოლებული, დღე სჯულის მიღებისა ებრაელებისათვის უდიდესი ყოველწლიური დღესასწაული იყო, რომლის დროსაც იერუსალიმში მთელი მაშინდელი მსოფლიოდან თითქმის ყველა ებრაელი იკრიბებოდა. ღმერთმა სწორედ ამ დღეს მოუვლინა მოწაფეებს სულიწმიდის მადლი, რაც ძველი სჯულის ახლით შეცვლის ნიშანი იყო. ეს დღე ქრისტეს ეკლესიის დაარსების დღედ ითვლება. ტრადიციულად, სულთმოფენობის დღესასწაულზე ეკლესიები მწვანით უნდა შეიმოსოს. ტაძარი შიგნიდან ირთვება ყვავილებით, ფოთლებითა და აყვავებული ტოტებით; ძირს ეფინება რაც შეიძლება ბევრი ბალახი. მორწმუნეები წირვაზე მიდიან ყვავილის ლამაზი თაიგულებით; შუაში დამაგრებულია ანთებული სანთლები, რომლებიც წირვის შემდეგ იკურთხება. ეს ყველაფერი საოცარი სანახაობაა. ტაძრის მწვანით შემოსვის ტრადიციაც ძველი აღთქმიდან მოდის: ებრაელები სჯულის მიღების დღესასწაულზე უფალს მადლობის ნიშნად ტაძარში პირველ ნაყოფს სწირავდნენ. იგულისხმება, რომ სულიწმიდის მადლი ამ სიმწვანეზე გადმოდის, რის გამოც მორწმუნეები ტაძარში დაფენილ სიმწვანეს, ბალახებს მთელ წელს ინახავენ – ამ ბალახის ნახარშს კურნების სასწაულთმოქმედი ძალა აქვს. შევთხოვოთ უფალს – სულიწმიდას, რომ მოგვმადლოს ნიჭი სიკეთისა, სიყვარულისა, სიმდაბლისა, სარწმუნოებისა, სიმშვიდისა, ლოცვისა, მარხვისა, მიტევებისა და მოთმინებისა… შევთხოვოთ სულიწმიდას საქართველოს გამთლიანება, გაძლიერება, საქართველოში სიყვარულისა და მშვიდობის დამკვიდრება…
ვერძი
შეეცადეთ, გამოიჩინოთ ობიექტურობა მიმდინარე მოვლენების მიმართ. მშვიდად შეაფასეთ საკითხები, რაც გაშინებთ და გაფორიაქებთ. დაზოგეთ თქვენი ჯანმრთელობა და გაუფრთხილდით ახლობლებს.
კურო
დღეს დაისვენეთ და გააკეთეთ გასულ კვირაზე დასკვნები. დაფიქრდით იმაზე, რა გიშლით ხელს მიზნის მიღწევაში და შეცვალეთ მოქმედების გეგმა.
ტყუპები
ელოდეთ სასიამოვნო სიახლეებს. შესაძლოა ოჯახში მცირე სირთულეებმა და გაუგებრობებმა იჩინოს თავი, თუმცა, ეს დროებითია და მალე ყველაფერი დალაგდება.
კირჩხიბი
იყავით მშვიდად და გამოიჩინეთ მეტი თავდაჯერებულობა, ყველაფერს კარგად გაართმევთ თავს.
ლომი
შესაძლოა, გარკვეულმა პრობლემებმა იჩინოს თავი ახლობლებთან. ამ ეტაპზე, სჯობს, თავი აარიდოთ არაფრისმომცემ კამათსა და გარჩევებს, მალე, ყველაფერი თავისთავად დალაგდება.
ქალწული
ყურადღება გაამახვილეთ ნებისმიერი სახის ინფორმაციაზე – ტელეფონით, სოციალური ქსელებით, ფოსტით. ახლა თქვენთვის ეს ძალიან მნიშვნელოვანია. თქვენთვის აუცილებელია, დაისვენოთ და მშვიდად გააანალიზოთ საკითხები, რომელიც მოსაგვარებელი გაქვთ.
სასწორი
დღეს, შესანიშნავი შესაძლებლობა გექნებათ, მოაგვაროთ ის საქმეები, რომელზეც ხელი არ მიგიწვდებოდათ, დღეს თქვენთვის მარტივია წარმატების მიღწევა, ამიტომ, არ შეგეშინდეთ რამდენიმე საქმის ერთდროულად გაკეთების. ამასთან, არ დაივიწყოთ, რომ აუცილებელია დასვენება.
მორიელი
შესაძლოა, გამოჩნდნენ ადამიანები, რომლებიც ეცდებიან მიღებული გადაწყვეტილებები შეგაცვლევინონ. ნუ იჩქარებთ, იყავით წინდახედული და მშვიდად მიიღეთ გადაწყვეტილებები.
მშვილდოსანი
ძალების მოზღვავება და შემოქმედებითი ენერგია ახალი სივრცეებისკენ, შეუცნობელი სამყაროს იდუმალების ამოსაცნობად გიწვევთ. ახლა ერთფეროვნება ნამდვილად არ გემუქრებათ, არც მოსაწყენად გეცლებათ.
თხის რქა
შესაძლოა, გაგიჩნდეთ რეალობისა და ყოველდღიური რუტინისგან მოწყვეტის მძაფრი სურვილი, ახლა სწორედ ის დროა, როდესაც უნდა დაისვენოთ.
მერწყული
დღეს, უფრო მეტად საოჯახო საქმეების მოგვარებით იქნებით დაკავებული, შესაძლოა, მოგიწიოთ ნათესავებთან შუამავლის როლის მორგება და მათი პრობლემების მოგვარება.
თევზები
მაქსიმალურად განიტვირთეთ და მხოლოდ ამის შემდეგ დაახარისხეთ დაგროვილი საკითხები, ამ ეტაპზე, მხოლოდ პირველხარისხოვანი საქმეების მოგვარებით დაკავდით. დაზოგეთ ძალები და შედეგიც უფრო ნაყოფიერი და სწრაფი იქნება.
უბრალოდ ვფიქრობ, რომ მსოფლიოს უმდიდრესი ადამიანის მხრიდან უდიდესი შეცდომაა ამ ომში მსოფლიოს ყველაზე გავლენიან ადამიანთან ყოფნა, – ამის შესახებ აშშ-ის ვიცე-პრეზიდენტმა, ჯეი დი ვენსმა განაცხადა.
ვენსი არ არის დარწმუნებული, შეძლებს თუ არა ილონ მასკი დონალდ ტრამპის კეთილგანწყობის დაბრუნებას.
აშშ-ის ვიცე-პრეზიდენტის თქმით, მასკის მხრიდან აშშ-ის პრეზიდენტზე თავდასხმა „დიდი შეცდომა“ იყო.
„მე ყოველთვის პრეზიდენტის ერთგული ვიქნები და იმედი მაქვს, რომ საბოლოოდ ილონიც დაუბრუნდება. შესაძლოა, ეს ახლა შეუძლებელია, რადგან ის ძალიან ფეთქებადი გახდა. ის და პრეზიდენტი რაიმე სისხლისმღვრელ დაპირისპირებაში თუ იქნებიან, რაც მთავარია, ეს ქვეყნისთვის ცუდი იქნება, მაგრამ არა მგონია, ეს ილონისთვისაც კარგი იყოს”, – განაცხადა ჯეიმს დევიდ ვენსმა.
გლდანის რაიონში, სანდრო ახმეტელის (ყოფილი აკაკი ვასაძის) ქუჩაზე მიმდინარე სარეაბილიტაციო სამუშაოების გამო, 9 ივნისის 09:00 საათიდან – აგვისტოს ბოლომდე ავტოტრანსპორტის გადაადგილება აიკრძალება ომარ ხიზანიშვილის ქუჩიდან – ქერჩის ქუჩის მიმართულებით ორმხრივად. ინფორმაციას თბილისის მერიის პრესსამსახური ავრცელებს.
მერიის ცნობით, შეზღუდვის პერიოდში, ავტომობილები გადაადგილებას შეძლებენ ალტერნატიული გზებით, შესაბამისი საგზაო ნიშნების გამოყენებით.
„კერძოდ, ომარ ხიზანიშვილის ქუჩიდან ქერჩის ქუჩის მიმართულებით მიმავალი ავტომობილები გადაადგილებას შეძლებენ: ხიზანიშვილის, შეშელიძისა და ბოჭორიშვილის ქუჩების გამოყენებით. ხოლო უკუმიმართულებით მოძრაობისას ფორე მოსულიშვილის ქუჩას გამოიყენებენ.
სამუშაოების წარმოების პერიოდში, შეზღუდულ მონაკვეთში გადაადგილება შესაძლებელი იქნება მხოლოდ სარეაბილიტაციო არეალში მცხოვრები მოსახლეობისთვის.
გარდა ამისა, ცვლილებები შევიდა საზოგადოებრივი ტრანსპორტის მარშრუტებშიც.
კერძოდ, ავტობუსები N304, N308, N323, N335, N351 და მიკროავტობუსები N512, N517 – ქერჩის ქუჩიდან მეტროსადგურ „ახმეტელის თეატრის“ მიმართულებით მოძრაობისას მეტროსადგურის მიმდებარე ტერიტორიაზე აღარ შეუხვევენ და ფორე მოსულიშვილის ქუჩით დაუკავშირდებიან ომარ ხიზანიშვილის ქუჩას, შემდეგ კი სვლას დადგენილი სქემით – გლდანის VIII მიკრორაიონისკენ განაგრძობენ. უკუმიმართულებისას მარშრუტები მეტრო „ახმეტელის თეატრის“ გავლით კვლავ ფორე მოსულიშვილის ქუჩით ქერჩის ქუჩას დაუკავშირდებიან და შემდეგ დადგენილი სქემით იმოძრავებენ.
ქერჩის ქუჩიდან მიმავალი ავტობუსები N292, N348, N355, N365, N373 და მიკროავტობუსები N518, N548, N486, N496 – მეტროსადგურ „ახმეტელის თეატრთან“ ფორე მოსულიშვილის ქუჩის გამოყენებით მოხვდებიან, შემდეგ
დაუკავშირდებიან ომარ ხიზანიშვილის ქუჩას, რის შემდეგაც სვლას ილია ვეკუას ქუჩაზე გააგრძელებენ და შემდეგ კვლავ ომარ ხიზანიშვილის ქუჩის გავლით მეტროსადგურ „ახმეტელის თეატრის“ მიმდებარე ტერიტორიასთან მოხვდებიან. უკუმიმართულებისას ომარ ხიზანიშვილის ქუჩის გავლით ფორე მოსულიშვილის ქუჩას დაუკავშირდებიან და ქერჩის ქუჩიდან დადგენილი სქემით იმოძრავებენ.
შექმნილი სიტუაციიდან გამომდინარე, მეტროსადგურ „ახმეტელის თეატრთან“ მგზავრთნაკადის მომსახურების გაუმჯობესების მიზნით, N339 ავტობუსის ხაზს კიდევ რამდენიმე ერთეული ავტობუსი დაემატება და გადაადგილების ინტერვალი საშუალოდ 4 წუთამდე შემცირდება.
თბილისის მერია ბოდიშს გიხდით შექმნილი დისკომფორტის გამო!“, – ნათქვამია განცხადებაში.
“ხვდებიან იმას, რომ მათი პოლიტიკა იყო აბსოლუტურად წარუმატებელი, აბსურდული და დამაზიანებელი, რადგან რა მოუტანა მათ პარლამენტის ბოიკოტმა? – არაფერი კარგი. აქედან გამომდინარე, ბუნებრივია ხედავენ, რომ ის გზა, რაც მათ გაიარეს, აბსოლუტურად უპერსპექტივოა,” – ეს განცხადება “ქართული ოცნების” წევრმა, ირაკლი ქადაგიშვილმა ოპოზიციასთან დაკავშირებით გააკეთა.
ქადაგიშვილი მიიჩნევს, რომ თვითმმართველობის არჩევნებში მონაწილეობას, საბოლოოდ, თითქმის ყველა ოპოზიციური პარტია მიიღებს.
“დარწმუნებული ვარ, რომ არამარტო ხაზარაძე, არამედ ოპოზიციაში თითქმის ყველა, საბოლოო ჯამში, მიიღებს გადაწყვეტილებას, რომ მიიღოს ადგილობრივ თვითმმართველობის არჩევნებში მონაწილეობა, გარედანაც უთხრეს, რომ რევოლუციების თავი თქვენ არ გაქვთ და საერთოდ რომ არ გაქრეთ პოლიტიკური ველიდან, იქნებ ისევ ადგილობრივი თვითმმართველობის არჩევნებში მიიღოთ მონაწილეობაო. შედეგები იქნება ისეთივე, რა შედეგებიც იყო საპარლამენტო არჩევნების შემდეგ – “ქართული ოცნება” დამაჯერებლად გაიმარჯვებს დედაქალაქშიც და სხვა მუნიციპალიტეტებშიც,” – აცხადებს ირაკლი ქადაგიშვილი
დონალდ ტრამპსა და ილონ მასკს შორის მწვავე დაპირისპირება დაიწყო. ტრამპი მასკს ამერიკაში ყველაზე ჭკვიან ადამიანად მოიხსენიებდა, მაგრამ ბოლო პრესკონფერენციაზე თავის ყოფილ მოკავშირეს შეშლილი უწოდა.
რამ გამოიწვია ტრამპისა და მასკის ერთმანეთთან ღია დაპირისპირება? ერთი შეხედვით, უთანხმოების შემთხვევაშიც კი, ორივესთვის სასარგებლო იქნებოდა თანამშრომლობის მშვიდობიანად დასრულება. ტრამპს საკმარისი შესაძლებლობები აქვს მასკის ბიზნესზე ზეწოლისთვის. თავის მხრივ, მასკის მედია და ფინანსური რესურსები საშუალებას აძლევს მას ტრამპს დიდი პრობლემები შეუქმნას. თუმცა, მასკმა და ტრამპმა ღია კონფლიქტის სცენარი აირჩიეს და ამას რამდენიმე ახსნა აქვს.
ორივე კრიტიკულ სიტუაციაში აღმოჩნდა. ტრამპმა ფაქტობრივად წააგო სავაჭრო ომები. მისი საგარეო პოლიტიკური პროექტებიც ჩავარდა: უკრაინასა და ღაზას სექტორში მშვიდობა ვერ იქნა მიღწეული; ირანი არ ეთანხმება ბირთვული იარაღის შესახებ შეთანხმებას. იმისათვის, რომ ამომრჩევლების ყურადღება გადაიტანოს, ტრამპს ხმამაღალი სკანდალი სჭირდება.
მასკი ასევე დაინტერესებულია აუდიტორიის მანიპულაციითა და ინვესტორების ყურადღების გადატანით. ილონ მასკმა დონალდ ტრამპის საარჩევნო კამპანიაში დიდი თანხები ჩადო. მასკი სამთავრობო ხარჯების ეფექტურობის დეპარტამენტს ხელმძღვანელობდა და სამთავრობო ხარჯების მკვეთრად შემცირება დაიწყო. მასკის საქმიანობამ ამერიკელებში დიდი უკმაყოფილება გამოიწვია. Tesla-ს ავტომობილების გაყიდვები მკვეთრად დაეცა. მასკის ბიზნეს იმპერია კრახს მიუახლოვდა.
მასკი არა მხოლოდ ნიჭიერი ინჟინერია, არამედ PR-ის ოსტატიც. რთულ სიტუაციებში მასკმა იცის, როგორ შექმნას სკანდალი, რომელიც მის ბიზნესს განვითარების ახალ ტრაექტორიაზე შესვლის საშუალებას მისცემს.
ამრიგად, როგორც ტრამპს, ასევე მასკს სკანდალი სჭირდებათ. ამ მხრივ მათი ინტერესები ერთმანეთს ემთხვევა. თუმცა, პრეზიდენტსა და მილიარდერს განსხვავებული მიზნები აქვთ.
მასკი აშშ-ის ტექნოლოგიური კომპანიების ელიტის წარმომადგენელია, რომლებმაც მიზნად დაისახეს ტრადიციული ამერიკული პოლიტიკური სისტემის შეცვლა ახალ ტექნოლოგიებზე დაყრდნობით. მასკს და მის თანამოაზრეებს სჭირდებოდათ მართვადი პრეზიდენტი, რომელიც მათ ტრანსფორმაციის პროგრამას განახორციელებდა. თუმცა, ტრამპი უმართავი აღმოჩნდა. მან გამოიყენა მასკის და სხვა ტექნოლოგიური კომპანიების რესურსები არჩევნებში გამარჯვებისთვის, მაგრამ ტრამპს მიზნათ არ ჰქონდა პრეზიდენტის რანგში მათი წესებით ეთამაშა.
ტრამპმა პრეზიდენტობის პირველი 100 დღის განმავლობაში გადასცა ინიციატივა მასკს. მასკმა ბევრი მტერი შეიძინა სამთავრობო ხარჯების მკვეთრად შემცირების გამო. ამასობაში, ტრამპი უკრაინასა და ახლო აღმოსავლეთში მშვიდობის დამყარებით იყო დაკავებული და მთელ მსოფლიოსთან სატარიფო ომს აწარმოებდა.
მასკსა და ტრამპს შორის პირველი უთანხმოება ტარიფებთან დაკავშირებით დაიწყო. მასკმა გააკრიტიკა ტრამპის მიდგომა სატარიფო პოლიტიკის მიმართ და აშშ-სა და ევროკავშირს შორის უბაჟო ვაჭრობის შემოღებაც კი შესთავაზა. Tesla-ს მანქანების წარმოება ჩინეთშია, ამიტომ ჩინეთთან სატარიფო ომი მასკისთვის არახელსაყრელია.
კონფლიქტის მიზეზი ტრამპის მიერ კონგრესისთვის წარდგენილი სახელმწიფო ბიუჯეტის პროექტი გახდა. ბიუჯეტის პროექტი ითვალისწინებს გადასახადების შემცირებას, თავდაცვისა და სხვა სამთავრობო საჭიროებებისთვის ხარჯების ზრდას. ეს გამოიწვევს აშშ-ის სახელმწიფო ვალის გაზრდას. ტრამპი ჰპირდება, რომ გადასახადების შემცირება და ტარიფები მნიშვნელოვნად გაზრდის ბიუჯეტის შემოსავლებს. მასკი არ არის ოპტიმისტურად განწყობილი და თვლის, რომ ბიუჯეტზე ვალის ტვირთი უფრო დიდი გახდება, ვიდრე იყო. მასკმა თქვა, რომ ჯ.დ. ვენსი უნდა იყოს პრეზიდენტი და ტრამპს იმპიჩმენტი უნდა გამოუცხადონ.
ფაქტიურად, მასკმა ახალი საარჩევნო კამპანია დაიწყო, რომლის მიზანია ხელისუფლებაში მოიყვანოს კანდიდატი, რომელიც ტრამპზე უფრო მართვადი იქნება. სოციალური ქსელ X-ის მეშვეობით მასკს შეუძლია ტრამპის რეიტინგის შემცირება და კონკურენტების პოზიციების გაძლიერება. ტრამპის კრიტიკით, მასკი ასევე აღადგენს თავის შერყეულ რეპუტაციას. მასკის ბიზნესის წარმატება პირდაპირ დამოკიდებულია მის რეპუტაციაზე.
ამ ზაფხულს იწყება კონგრესის შუალედური არჩევნების კამპანია, რომელიც 2026 წლის ნოემბერში გაიმართება. ტრამპს ტექნოლოგიურ კომპანიებთან მკაცრი კონფლიქტი არ აწყობს. ამიტომ, ტრამპი მასკთან გარიგების დადების შესაძლებლობებს ეძებს. კითხვა ისაა, დათანხმდება თუ არა მასკი, თუ გადაწყვეტს ტრამპის დამარცხებას და პოლიტიკურ ფსონს დადებს ვენსზე ან სხვა კანდიდატზე.
ავთანდილ წულაძე, პოლიტოლოგი
ოპოზიციური პარტიების გარე უფროსებიც მიხვდნენ, რომ „ნაციონალური მოძრაობა“ იმდენად სამარცხვინოა, რომ მათზე ფსონის დადება არ შეიძლება, ამიტომ ისინი ფსონს დებენ „ლელოსა“ და პარტიაზე „გახარია საქართველოსთვის“, – ამის შესახებ საპარლამენტო უმრავლესობის წევრმა, ლევან მაჭავარიანმა განაცხადა.
მისი თქმით, წინა არჩევნებზე „ახალი“ შემოაპარეს, მაგრამ მიხვდნენ, რომ საზოგადოებისთვის „ახალი“ და „ნაციონალური მოძრაობა“ ერთი და იგივეა.
„„ლელოს“ შეცვლილი პოზიცია, რომელსაც წინასწარ ვაანონსებდით, კიდევ ერთხელ მეტყველებს მათ არაპრინციპულობაზე. თვეების განმავლობაში თავიანთ ამომრჩეველს ჰპირდებოდნენ, რომ არ მიიღებდნენ არჩევნებში მონაწილეობას, თუ არ ჩაინიშნებოდა რიგგარეშე არჩევნები. როგორც ჩანს, ინსტრუქციები წამოსულია და დაავალეს, მიიღონ არჩევნებში მონაწილეობა და სხვა გზა არ აქვთ, თუმცა „ლელოს“ არაპრინციპულობის ძალიან ბევრი მაგალითია. არ შემიძლია, საზოგადოებას არ შევახსენო, როდესაც პირდაპირ ეთერში ბატონმა ელისაშვილმა ბატონი ხაზარაძე ათას უბედურებაში დაადანაშაულა და რა სიტყვებით ლანძღა, შემდეგ მიიღო დავალება და მოუწია ბატონი ელისაშვილის შემოერთება თავის პარტიაში“, – განაცხადა ლევან მაჭავარიანმა.
რაც შეეხება გიორგი გახარიას, როგორც ლევან მაჭავარიანი აცხადებს, აქაც იგივე სცენარი ვითარდება.
„ხელოვნურად დადგმული სპექტაკლია ამ ოთხ რადიკალურ პარტიას შორის, თითქოს ვიღაც ისევ ბოიკოტის რეჟიმში რჩება, ვიღაც არ რჩება. გარე უფროსების გათვლა სწორია, რადგან ისინი ფსონს დებენ „ლელოსა“ და ბატონი გახარიას პარტიაზე, რადგან „ნაციონალური მოძრაობა“, როგორც ბრენდი, იმდენად სამარცხვინოა, რომ გარე უფროსებიც მიხვდნენ, მათზე ფსონის დადება არ შეიძლება. წინა არჩევნებზე „ახალი“ რომ შემოაპარეს, ამასაც მიხვდნენ, რომ საზოგადოებისთვის „ახალი“ და „ნაციონალური მოძრაობა“ აბსოლუტურად ერთი და იგივეა. გარე უფროსები იმასაც დააკვირდებიან, რამდენად იქნება შესაძლებელი, „ნაციონალური მოძრაობის“ ხმები „ლელოსა“ და გახარიას პარტიაზე განაწილდეს. თუ ისინი ამაში დარწმუნდებიან, შეიძლება, საერთოდ აუკრძალონ „ნაციონალურ მოძრაობას“ ამ არჩევნებში მონაწილეობის მიღება, თუმცა „ნაციონალურ მოძრაობას“ ისეთი ამომრჩეველი ჰყავს, რომლის უმეტესი ნაწილი ტიპური მიშისტები არიან, არ მგონია, მიშა სააკაშვილის პარტიის გარდა, ვინმეს მისცენ ხმა. შესაბამისად, ამაში თუ ვერ დარწმუნდნენ, შეიძლება, კიდევ უფრო დაშალონ და დაანაწევრონ პარტიები, რათა მეტი ბუნდოვანება შემოიტანონ საზოგადოებაში, უფრო მარტივად მოატყუონ საზოგადოების გარკვეული ნაწილი. შეიძლება, პირიქით, დაავალონ, გაერთიანდნენ ერთი ლიდერის გარშემო, როგორც, მაგალითად, წინა არჩევნებზე ქალბატონი სალომე ზურაბიშვილი მოავლინეს. ახლა, შეიძლება, ბატონ პაატა ბურჭულაძეზე დადონ ფსონი, ეს ადამიანი, რუსული ბანი, გამოირჩევა ორიგინალური იდეებით და უფრო გააქტიურებული არის“, – განაცხადა ლევან მაჭავარიანმა.
მისი თქმით, „ქართული ოცნება“ ნებისმიერი სცენარისთვის, კონფიგურაციისთვის 100 პროცენტით არის მზად.
„საშტაბო მუშაობა დაწყებული გვაქვს. ეს პარტიები როგორც არ უნდა დაყონ თუ გააერთიანონ, მათ ძალიან დიდი ანგარიშით დავამარცხებთ. გვირჩევნია კიდეც, მიიღონ მონაწილეობა და მოხდეს მათი რეიტინგის რეალური ლუსტრაცია, ვინაიდან დრამატულად არის შემცირებული წინა საპარლამენტო არჩევნებთან შედარებით“, – განაცხადა ლევან მაჭავარიანმა.
რეჟიმი არსად წავა, თუ მისი თამაშის წესებს მივიღებთ. როდესაც არჩევნებიც მათი წესებით იმართება, მონაწილეობა ნიშნავს მორჩილებას და არა წინააღმდეგობას, – ამის შესახებ სტრატეგია აღმაშენებლის წევრმა, პაატა მანჯგალაძემ განაცხადა.
მისივე თქმით, მტრის თამაშში ჩართვით წინასწარ ეწერება ხელი იმ შედეგს, რომელსაც რეჟიმი წერს.
„არ ვიცი, თვითმმართველობის არჩევნებზე დისკუსიები ახლა რას ემსახურება. ჩვენ ბევრად უფრო მნიშვნელოვანი რამ გვაქვს გასარკვევი, როგორ გამოვიყვანოთ ქვეყანა კრიზისიდან და როგორ შევქმნათ საერთო-ეროვნული დღის წესრიგი. ახლო წარსულის დავიწყება ნიშნავს იმავე შეცდომების ხელმეორედ გამეორებას. როცა მტრის თამაშში ვერთვებით, წინასწარ ვაწერთ ხელს იმ შედეგზე, რომელსაც ეს რეჟიმი წერს. ფასადური არჩევნები და პარტიული თამაშები არ გვიშველის, თუ არ ვიქნებით მზად ბოლომდე ბრძოლისთვის.
ეს რეჟიმი არსად წავა, თუ მისი თამაშის წესებს მივიღებთ. როცა არჩევნებიც მათი წესებით იმართება, ამაში მონაწილეობა ნიშნავს მორჩილებას, არა – წინააღმდეგობას. დღეს საჭირო არ არის ვიწრო პარტიული ინტერესები, საჭიროა ეროვნული ერთობა. პირველ რიგში, ხალხში, მერე პოლიტიკაშიც. ვიმეორებ, უნდა შევქმნათ საერთო-ეროვნული დღის წესრიგი არა შიდა თამაშებისთვის, არამედ რეალური ცვლილებებისთვის. დრო არ იცდის.
რეჟიმი ყოველდღე იპარავს ჩვენს მომავალს და თუ დღეს არ ვიმოქმედეთ, ხვალ უკვე გვიან იქნება. გამარჯვება შესაძლებელია, მაგრამ არა დაყოფით და მტრის წესებით, არამედ ერთობით და ჩვენი წესებით“, – განაცხადა პაატა მანჯგალაძემ.
შინაგან საქმეთა სამინისტროს მიგრაციის დეპარტამენტის და სასაზღვრო პოლიციის თანამშრომლებმა, ერთობლივად ჩატარებული კომპლექსური ღონისძიებების შედეგად, თურქეთის, ირანის, ინდოეთის, ერაყის და ეგვიპტის – ჯამში ექვსი მოქალაქე დააკავეს. ინფორმაციას ამის შესახებ შსს ავრცელებს.
უწყების ცნობით, დადგინდა, რომ დაკავებული პირები „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონის გათვალისწინებით, ქვეყანაში იმყოფებოდნენ სამართლებრივი საფუძვლის გარეშე.
„ისინი ბოროტად სარგებლობდნენ თავშესაფრის პროცედურით გათვალისწინებული ვადებით და ქვეყანაში წლების მანძილზე იმყოფებოდნენ სამართლებრივი საფუძვლის გარეშე.
დაკავებულებმა არ ისარგებლეს გაძევების გადაწყვეტილებით განსაზღვრული ვადებით, რაც ქვეყნის ნებაყოფლობით დატოვებას გულისხმობს, რის შედეგადაც შინაგან საქმეთა სამინისტროს მიგრაციის დეპარტამენტის მიერ მიღებული იქნა გადაწყვეტილება აღნიშნული პირების დაკავების თაობაზე.
გადაწყვეტილების აღსრულების მიზნით, ამ დროისთვის დაკავებული პირები მოთავსებული არიან მიგრაციის დეპარტამენტის დროებითი განთავსების ცენტრში შემდგომში მათი წარმოშობის ქვეყანაში დაბრუნების მიზნით“, – ნათქვამია შსს-ს გავრცელებულ ინფორმაციაში.
საქართველოს განათლების, მეცნიერებისა და ახალგაზრდობის სამინისტროს განცხადებით, გავრცელებული ინფორმაცია, რომ ინკლუზიური განათლების სამმართველო გაუქმდა, არ შეესაბამება სიმართლეს.
უწყების ცნობით, სამინისტროს სტრუქტურის ოპტიმიზაციისა და ეფექტიანობის გაზრდის მიზნით, გაერთიანდა სტრატეგიული დაგეგმვისა და ინკლუზიური განვითარების სამმართველო. შედეგად, აქამდე არსებული ინკლუზიური განვითარების სამმართველოს მეტი სტრატეგიული მნიშვნელობა მიენიჭა.
„მოგახსენებთ, რომ 2024 წლიდან სსიპ საგანმანათლებლო დაწესებულების მანდატურის სამსახურის ფუნქციები გაფართოვდა და მას ინკლუზიური განათლების კომპონენტი დაემატა. მანდატურის სამსახურში ფუნქციონირებს ინკლუზიური და სპეციალური განათლების მხარდამჭერი ცენტრი, რომელიც ინტენსიურად მუშაობს ინკლუზიური განათლების მხარდამჭერ მიმდინარე და ახალ სერვისებზე, რათა კიდევ უფრო გავზარდოთ სპეციალური საგანმანათლებლო საჭიროების მქონე პირთათვის განათლების მიღების ხელმისაწვდომობა და გავაუმჯობესოთ განათლების ხარისხი.
საქართველოს განათლების, მეცნიერებისა და ახალგაზრდობის სამინისტროს ერთ-ერთი მთავარი პრიორიტეტი ინკლუზიური განათლების სისტემის განვითარებაა. ამას მოწმობს 2022-2030 წლების განათლებისა და მეცნიერების ერთიანი ეროვნული სტრატეგია. სამინისტრო აქტიურად აგრძელებს და კიდევ უფრო აძლიერებს ინკლუზიური განათლების განვითარების მიზნით მუშაობას და ამ მიმართულებით მნიშვნელოვანი პროექტების განხორციელებას“, – ნათქვამია განათლების სამინისტროს განცხადებაში.
ვინაიდან, ბოლოს და ბოლოს, მშვიდობა კვლავ ხდება რეგიონული და მსოფლიო პოლიტიკის ყველაზე სასურველი მიზანი, ჩვენმა უცხოელმა პარტნიორებმა კვლავ უნდა აქციონ დიპლომატია ურთიერთგაგების, მშვიდობის დამყარებისა და თანამშრომლობის უმნიშვნელოვანეს საშუალებად, – ამის შესახებ საქართველოს პარლამენტის თავმჯდომარე, შალვა პაპუაშვილი სოციალურ ქსელში წერს.
როგორც პაპუაშვილი აღნიშნავს, ბოლო პერიოდში დიპლომატია გამოიყენება მისი რეალური მიზნის სრულიად საპირისპირო შედეგების მისაღწევად – პრობლემების გადაჭრის ნაცვლად, მათი გაღვივებისთვის.
„სამწუხაროდ, ბოლო რამდენიმე წლის განმავლობაში, ხშირად ვხედავთ, რომ დიპლომატია გამოიყენება არა როგორც საერთაშორისო ურთიერთობების ინსტრუმენტი, არამედ როგორც პროპაგანდის, შიდა საქმეებში ჩარევისა და ხელისუფლების გარედან შეცვლის საშუალებაც კი. სხვა სიტყვებით რომ ვთქვათ, დიპლომატია გამოიყენება მისი რეალური მიზნის სრულიად საპირისპირო შედეგების მისაღწევად – პრობლემების გაღვივებისთვის და არა მათ გადასაჭრელად.
სახელმწიფოებს მრავალი საშუალება აქვთ თავიანთი პოლიტიკური პრეფერენციებისა და უკმაყოფილების გამოსახატავად, მაგრამ როდესაც დიპლომატია არა უთანხმოების გადასაწყვეტად, არამედ მის გასაღრმავებლად გამოიყენება, ჩვენ ვართმევთ შანსს მშვიდობასა და თანამშრომლობას, რამაც მსოფლიო უკეთესობისკენ უნდა შეცვალოს.
როდესაც ვხედავთ, რომ აკრედიტებული დიპლომატები ცდილობენ მასპინძელი ქვეყნის საშინაო საქმეებში ერთი კონკრეტული პოზიციის მხარდაჭერას, პოლიტიკური პოლარიზაციის გაღრმავებას, იდეოლოგიური მიზნებისთვის ექსტრემიზმის წაქეზებას, მთავრობაზე ზეწოლას ომში ჩასათრევად, და “რევოლუციის” გზით ხელისუფლების შეცვლის ხელშეწყობასაც კი, გვახსენდება საბჭოთა კავშირის საგარეო პოლიტიკა, რომელიც ნებისმიერი საშუალებით, მათ შორის დიპლომატიის გამოყენებით, “მსოფლიო რევოლუციის” წახალისებას ისახავდა მიზნად.
როდესაც საქართველოს პარტნიორი ქვეყნების ელჩები თავიანთ უფლებამოსილებებს აჭარბებენ, ჩვენი ერთადერთი გზა, ჩვენი ქვეყნის ეროვნული ინტერესების დაცვაა. ქართველებს, საბჭოთა პერიოდიდან, ჯერ კიდევ კარგად გვახსოვს კომუნისტური პარტიის ე.წ. მეორე მდივნის ინსტიტუტი, რომელიც ექსკლუზიურად მოსკოვიდან ინიშნებოდა და საქართველოს შიდა საქმეებში გადამწყვეტი სიტყვა ჰქონდა. ამ მტკივნეული გამოცდილებიდან გამომდინარე, ჩვენ, „მეორე მდივანს“, დანახვისთანავე ვცნობთ.
გარდა ემოციური განზომილებისა, არსებობს აღნიშნული საკითხის სამართლებრივი ასპექტიც: „ვენის კონვენცია დიპლომატიური ურთიერთობის შესახებ“ ხაზს უსვამს დიპლომატების უფლებებსა და მოვალეობებს, როდესაც განსაზღვრავს, რომ „დიპლომატიური მისიების ყველა წარმომადგენლის მოვალეობაა… პატივი სცეს ადგილსამყოფელი სახელმწიფოს კანონებსა და რეგულაციებს. მათ, ასევე, აქვთ ვალდებულება, არ ჩაერიონ ამ სახელმწიფოს შიდა საქმეებში“, – წერს პაპუაშვილი.
პარლამენტის თავმჯდომარის თქმით, რასაც ბოლო რამდენიმე წელია ვუყურებთ, ღიად ეწინააღმდეგება ვენის კონვენციას, რომელიც წესებზე დაფუძნებული საერთაშორისო წესრიგის ერთ-ერთი მთავარი საყრდენია.
,,კონკრეტული პოლიტიკოსებისადმი პირდაპირი მხარდაჭერის გამოხატვა, პოლიტიკური პარტიების საქმიანობის დაფინანსება, პოლიტიკური არასამთავრობო ორგანიზაციების ფინანსური მხარდაჭერა, მასპინძელი ქვეყნის კანონმდებლობასთან დაკავშირებით მოსაზრებების გამოთქმა და საკანონმდებლო პროცესში მონაწილეობის პრეტენზიის გამოხატვა – ეს არის იმ საქმიანობის არასრული სია, რომლებიც საქართველოში ზოგიერთი უცხოური მისიისა და დიპლომატისთვის ჩვეულებრივ მოვლენად იქცა.
არ არსებობს პრივილეგია პასუხისმგებლობის გარეშე. როდესაც უცხოელი დიპლომატები მოქმედებენ როგორც ადგილობრივი პოლიტიკოსები, ისინი მზად უნდა იყვნენ, აიღონ პასუხისმგებლობა საკუთარ ქმედებებზე, რაც მათ კრიტიკის ლეგიტიმურ სამიზნედ აქცევს. ასეთი კრიტიკა კი ვერ იქნება განხილული „თავდასხმად“. ადგილობრივი პოლიტიკოსების პოლიტიკური დღის წესრიგის კოპირებითა და მათი გზავნილების გამეორებით, დიპლომატებმა თავი არ უნდა გააიგივონ ადგილობრივ პოლიტიკოსებთან. ქართველმა ხალხმა საკმარისი პოლიტიკური გამოცდილება დააგროვა, რათა უცხოური პოლიტიკური მიკერძოებულობა და ჩარევა დანახვისთანავე ამოიცნოს.
ელჩები უნდა იყვნენ საკუთარი ქვეყნის წარმომადგენლები, და არა მასპინძელი ქვეყნის მენტორები. პირადი დამოკიდებულებებისა და პროფესიული მოვალეობების აღრევა დიპლომატიური ურთიერთობების არსს ეწინააღმდეგება. როგორც ვენის კონვენციაშია აღნიშნული, „მიმღებ სახელმწიფოსთან ყოველგვარი ოფიციალური საქმიანობა, რომელიც მისიას წარმგზავნი სახელმწიფოს მხრიდან ევალება, უნდა განხორციელდეს მიმღები სახელმწიფოს საგარეო საქმეთა სამინისტროსთან ან მისი მეშვეობით“. როდესაც დიპლომატები, მათი საეჭვო ქმედებების გამო, ვერ ახერხებენ მასპინძელი ქვეყნის ოფიციალურ ინსტიტუტებთან სათანადო კომუნიკაციას და, სანაცვლოდ, პროპაგანდას ეყრდნობიან, ეს სხვა არაფერია, თუ არა დიპლომატის როლზე უარის თქმა და მასპინძელი საზოგადოების საკუთარ გემოვნებაზე მორგების მცდელობა.
ისტორიის ამ ტურბულენტურ პერიოდში, დიპლომატიის თავის კუთვნილ ადგილას დაბრუნება უდიდეს სარგებელს მოუტანს როგორც საქართველოს, ისე ჩვენს უცხოელ პარტნიორებს,“- წერს პაპუაშვილი.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge