ჩვენ აბსოლუტურად ღია ვართ აშშ-თან სტრატეგიული პარტნიორობის განახლებისთვის, გვინდა, ეს იყოს ხელშესახები სტრატეგიული პარტნიორობა და არა ზოგადი, როგორც მანამდე ვიყავით მიჩვეული და მზად ვართ, კონკრეტული გზამკვლევი დავადგინოთ ორივე ქვეყნისთვის, სადაც იქნება ასახული სარგებელი როგორც საქართველოსთვის, ასევე აშშ-თვის, – ამის შესახებ საქართველოს პრემიერ-მინისტრმა ირაკლი კობახიძემ გადაცემა „იმედი LIVE-ში” განაცხადა.

როგორც მთავრობის მეთაურმა აღნიშნა, საქართველოს ხელისუფლებას ჰქონდა წერილობითი კომუნიკაცია ტრამპის ადმინისტრაციასთან, პრეზიდენტ ტრამპთან და რადგან პასუხი არ მიუღია, ღია წერილის გავრცელება გადაწდა.

„ჩემგან გავრცელდა ეს ღია წერილი და რა თქმა უნდა, ეს გამოხატავს ხელისუფლების პოზიციას და შესაბამისად ჩვენი სახელმწიფოს პოზიციას. ჩვენ ვართ მოლოდინის რეჟიმში. მე გარდა წერილებისა, საჯარო განცხადებებიც გავაკეთე, რომ აბსოლუტურად ღია ვართ სტრატეგიული პარტნიორობის განახლებისთვის, თან გვინდა, ეს იყოს ხელშესახები სტრატეგიული პარტნიორობა და არა ზოგადი, როგორც მანამდე ვიყავით მიჩვეული და მზად ვართ, კონკრეტული გზამკვლევი დავადგინოთ ორივე ქვეყნისთვის, სადაც იქნება ასახული სარგებელი როგორც საქართველოსთვის, ასევე აშშ-თვის. ამისთვის მზად ვართ, მაგრამ ჯერჯერობით პასუხს აყოვნებენ. ამიტომ გადავწყვიტეთ ღი წერილის გავრცელება. ღია წერილში დეტალურად არის გაშლილი ჩვენი არგუმენტები ყველაფერთან დაკავშირებით და გამოხატულია ჩვენი გაკვირვება იმის შესახეb, რომ აქამდე ისმის დუმილი რეალურად იმ ფონზე, როდესაც ჩანს აშკარა ღირებულებითი თანხვედრა, ანუ გაცხადებული რაც არის, გვაქვს სრული ღირებულებითი თანხვედრა, მიდგომებთან დაკავშირებით არის სრული თანხვედრა. გავიხსენეთ კონკრეტული მაგალითებიც, მაგალითად რუმინეთის მაგალითი. ტრამპის ადმინისტრაციამ დაგმო ის, რაც ევროპული ბიუროკრატიის მხარდაჭერით გაკეთდა რუმინეთში. კაცმა მოიგო არჩევნების პირველი ტური და საერთოდ გააუქმეს არჩევნები. არ ვიცი, ასეთი რამ სადმე თუ მომხდარა იმ სივრცეში, რასაც ჰქვია დასავლეთი. ასეთ რაღაცაზეც კი წავიდნენ, უხეშად ანტიდემოკრატიული ნაბიჯი გადაიდგა რუმინეთის საკონსტიტუციო სასამართლოს მიერ ევროპული ბიუროკრატიის მხარდაჭერით და მანამდე აშშ-ის წინა ადმინისტრაციის მხარდაჭერით”, – განაცხადა ირაკლი კობახიძემ.

საქართველო-ამერიკის ურთიერთობების გადატვირთვის მოლოდინის პროცესში შექმნილი პაუზის მიზეზები ახსნა გადაცემა „დღის ქრონიკაში“ საუბრისას „ხალხის ძალის“ აღმასრულებელმა მდივანმა გურამ მაჭარაშვილმა. როგორც მან განაცხადა, პაუზის რამდენიმე მიზეზი არსებობს და მათ შორისაა რამდენიმე მნიშვნელოვანი გამოწვევა, რომელიც ტრამპმა ხელისუფლებაში მოსვლისას წამოჭრა.

გურამ მაჭარაშვილმა Deep State-ის სიძლიერეზეც ისაუბრა, რომელსაც მისი თქმით, როგორც ჩანს შტატების ახალი ადმინისტრაცია ბოლომდე ვერ გაუმკლავდა.

„ამ პაუზას ძალიან ბევრი მიზეზი შეიძლება ჰქონდეს, მათ შორის ძალიან ბევრი ის საკითხი, რაც ტრამპმა დღის წესრიგში დასვა, ასევე თავად Deep State-ის სიძლიერე, რაზეც აშშ-ს პრეზიდენტიც აღნიშნავდა და სხვა. ახლა ვიღაცები იცინიან – Deep State-მა დამირეკა და ა.შ. ეს არასერიოზული განცხადებებია, რადგან ამ შემთხვევაში ტრამპსაც უნდა დასცინონ. ჩვენ ამ ძალას გლობალური ომის პარტია ვუწოდეთ, ტრამპმა კი Deep State უწოდა. რადიკალებს ტრამპის დაცინვის თავი არ აქვთ, საქილიკოდ კი დიდი გული აქვთ. როგორც ჩანს, Deep State ბოლომდე ვერ აღმოფხვრა ტრამპმა…
ბევრი მიზეზი შეიძლება არსებობდეს ამ პაუზის, მაგრამ ჩვენ გვაქვს ვალდებულება (პრემიერმაც სწორედ ამიტომ მისწერა აშშ-ს პრეზიდენტს ღია წერილი და პარლამენტმაც ამიტომ მიიღო კონგრესის მიმართ დადგენილება), რომ ჩვენი პოზიცია იყოს ცნობილი არა მხოლოდ ტრამპის, არამედ, მსოფლიო საზოგადოებისათვის. კიდევ ერთხელ ვიმეორებ, სიმართლე ძლიერია, მას ვერსად გაექცევი. 3 წელი, რასაც ჩვენ ვამბობდით და ვამტკიცებდით (ჯერ „ხალხის ძალა“ და შემდეგ ხელისუფლებასაც მიეცა ამის შესაძლებლობა ესაუბრა ოჯახურ ღირებულებაზე, პარტნიორულ ურთიერთობაზე, ჩაურევლობაზე, უსამართლობაზე), მოდის პრეზიდენტი ტრამპი და იმავეს ამბობს. ამ ნარატივით იგებს არჩევნებს და აგრძელებს მსოფლიო დღის წესრიგის შექმნას. ამ დროს საკანონმდებლო ორგანოში [აშშ-ს კონგრესი] იღებენ აბსოლუტურად საწინააღმდეგო შინაარსის მქონე ე.წ. „მეგობარ აქტს“, სად არის სიმართლე? ეს სიმართლე უნდა მიუვიდეს საბოლოოდ პრეზიდენტ ტრამპს და ამიტომ ჩვენ იმედი გვაქვს, რომ ის არ მოაწერს ხელს ისეთ აქტს, რომელიც პირველ რიგში, მისსავე პოლიტიკას ეწინააღმდეგება. ჩვენი პოლიტიკური ნარატივი – წერილები, განცხადებები, კომენტარები ხომ არის საჯარო? საჯაროა ასევე ე.წ. „მეგობარი აქტის“ შინაარსი და პრეზიდენტ ტრამპის განცხადებები. ჩვენი და ტრამპის განცხადებები ერთი ერთში ემთხვევა ერთმანეთს, ე.წ. „მეგობარი აქტი“ კი, აბსოლუტურად საწინააღმდეგოა. ჩვენ ის არ გვინდა სწორედ, რომ ტრამპმა ხელი მოაწეროს მისივე პოლიტიკის საწინააღმდეგო აქტს, რადგან გვინდა, რომ რაღაცნაირად მოხდეს ურთიერთობების გადატვირთვა“, – განაცხადა გურამ მაჭარაშვილმა.

პოლიტიკური შეფასებების საგანია თავდაცვის საკითხებში ევროკომისარი ანდრიუს კუბილიუსის განცხადება. “ქართული ოცნებისთვის” ეს არის აღიარება, რომ გარკვეული ჯგუფების ინტერესში არ შედის ომის შეჩერება.

“სამწუხაროა, როდესაც ასეთ განცხადებებს ვისმენთ, რადგან ეს პირდაპირ, საჯაროდ არის აღიარება, რომ მათი რეალური ინტერესი არის არა უკრაინაში მშვიდობის, რაც შეიძლება მალე მიღწევა, არამედ კონფლიქტის და დაძაბულობის გაჯანჯლება, რაც შეიძლება დიდი ხანი, რათა რუსეთი დაკავებული იყოს სხვა რაღაცებით და ნაკლები წნეხი შეუქმნას ევროკავშირისა და NATO-ს წევრ ქვეყნებს. ამდენი წლის განმავლობაში, სწორედ ეს იყო მიზანი ზოგიერთების რომ საქართველო მაქსიმალურად ჩაერთოთ ამ დაძაბულობის კერაში,” – განაცხადა პარლამენტის ევროპასთან ინტეგრაციის კომიტეტის თავმჯდომარემ, ლევან მახაშვილმა.

ცნობისთვის, კუბილიუსმა რუსულ საფრთხეებსა და ომზე საუბრის დროს თქვა, რომ თუ უკრაინაში მშვიდობა დამყარდება ან ცეცხლი შეწყდება, რუსები გააგრძელებენ იარაღის წარმოებას და ახალ საფრთხეს შეუქმნიან ევროპას. მისივე თქმით, მშვიდობა უკრაინაში მნიშვნელოვანია, მაგრამ ეს არ ნიშნავს იმას, რომ რუსეთი სამომავლოდ აგრესიას შეწყვეტს.

მათი რეალური ინტერესია არა უკრაინაში მშვიდობის მიღწევა, არამედ კონფლიქტის გაჯანჯლება, რათა რუსეთმა ნაკლები წნეხი შეუქმნას ევროკავშირისა და NATO-ს ქვეყნებს – ლევან მახაშვილი კუბილიუსის განცხადებაზე