ჩემი აზრით, მილერის განცხადებამდე ოლაფ შოლცის განცხადების შემდეგ ცხადი იყო, საით მიდიოდა ეს სიტუაცია, – ამის შესახებ „გირჩის“ დეპუტატმა, იაგო ხვიჩიამ განაცხადა, რითაც აშშ-ის სახელმწიფო დეპარტამენტის სპიკერის, მეთიუ მილერის განცხადებას გამოეხმაურა.

ხვიჩიას თქმით, მთავარი პრობლემა სინამდვილეში არა “რუსული კანონი” არამედ ერთპიროვნული მმართველობაა, რომელიც 83 დეპუტატს აიძულებს, საკუთარი ნების საწინააღმდეგოდ იმოქმედოს.

„ჩემი აზრით, მილერის განცხადებამდე [ოლაფ] შოლცის განცხადების შემდეგ ცხადი იყო, საით მიდიოდა ეს სიტუაცია. როცა მთელი დასავლეთი გეუბნება, რომ ეს არ არის დასავლური საქციელი, ევროპაში ასე ვერ შევალთ, ჩვენ იმავეს ვაგრძელებდით. მაგრამ საბოლოო ჯამში, ჩვენ ერთი კარგი რამ მივიღეთ, რომ მთავარი პრობლემა სინამდვილეში არა „რუსული კანონი”, არამედ ერთპიროვნული მმართველობაა, რომელიც ჩვენს 83 დეპუტატს აიძულებს, საკუთარი ნების საწინააღმდეგოდ იმოქმედოს, რაც სინამდვილეში ქართველი ხალხის ნების მოპარვას ნიშნავს, რადგან ქართველ ხალხს არავისთვის მიუცია უფლება, რომ ერთპიროვნულად გადაეწყვიტა ქვეყნის საგარეო კურსი“, – აღნიშნა ხვიჩიამ.

ამავე თემაზე საუბრისას ხვიჩიამ აღნიშნა, რომ “ქართული ოცნების” მიერ საზოგადოებისთვის შეთავაზებული “შეთქმულების თეორია” თავისი შინაარსით ანტიევროპული და პრორუსულია, რასაც ქართველი ხალხი არ შეეგუება მას შემდეგ რაც ზუსტად შეარჩიეს სამიზნე „თუ ვინ მიათრევს მათ არასწორი თუ არასასიამოვნო მიმართულებით“.

„მე მგონი „ქართული ოცნების“ შეგნებული არჩევანია, რომ დასავლეთს დაშორდეს. მათ მიაჩნიათ, რომ დასავლეთი აგენტების ერთობლიობაა, რომლებმაც ერთი რევოლუცია ჩვენ მოგვიწყვეს, შემდეგ სადღაც ომი დაგვაწყებინეს, შემდეგ უკრაინა აცდუნეს და ა.შ. ეს შეთქმულების თეორია, რომელიც შემოგვთავაზეს, თავისი შინაარსით ანტიევროპული და პრორუსულია, რასაც ქართველი ხალხი არ შეეგუება მას შემდეგ რაც ზუსტად შეარჩიეს სამიზნე თუ ვინ მიათრევს მათ არასწორი თუ არასასიამოვნო მიმართულებით”, – აღნიშნა იაგო ხვიჩიამ.

ინფორმაციისთვის, გუშინ აშშ-ის სახელმწიფო დეპარტამენტის სპიკერმა, მეთიუ მილერმა განაცხადა, რომ

„თუ თქვენ საქართველოში კანონპროექტის ტექსტს შეხედავთ, ან კანონპროექტის ტექსტს, რომელიც სხვა ქვეყნებში კრემლის გავლენით მიიღეს, ისინი ძალიან განსხვავდება იმ კანონისგან, რომელიც ჩვენ აქ აშშ-ში გვაქვს”.

მისი თქმით, “განსხვავება ამ კანონების ბუნებაში მდგომარეობს”.

ამასთან, როგორც მილერმა აღნიშნა, ცრუ შედარებები წარსულშიც უნახავს.

„წარსულში ეს ცრუ შედარებები მინახავს, თუ თქვენ საქართველოში კანონპროექტის ტექსტს შეხედავთ, ან კანონპროექტის ტექსტს, რომელიც სხვა ქვეყნებში კრემლის გავლენით მიიღეს, ისინი ძალიან განსხვავდება იმ კანონისგან, რომელიც ჩვენ აქ აშშ-ში გვაქვს“, – აღნიშნა აშშ-ის სახელმწიფო დეპარტამენტის სპიკერმა.

გერმანიის ეკონომიკისა და კლიმატის დაცვის ფედერალური სამინისტროს სახელმწიფო მდივანი სვენ გიგოლდი 7 მაისს საქართველოს ეწვევა და ეკონომიკური პოლიტიკისა და ევროკავშირის პოლიტიკის საკითხებთან დაკავშირებით შეხვედრებს გამართავს. მასთან ერთად საქართველოში ჩამოდის გერმანული კერძო კომპანიების დელეგაცია.

გერმანიის საელჩოს ინფორმაციით, სახელმწიფო მდივანი დელეგაციასთან ერთად შეხვედრებს გამართავს საქართველოს ეკონომიკისა და მდგრადი განვითარების სამინისტროში და სამოქალაქო საზოგადოებრივ ორგანიზაციებში.

მათივე ცნობით, შეხვედრებზე ისაუბრებენ ევროკავშირთან დაახლოებისთვის საქართველოს ძალისხმევის, გერმანიის მხარდაჭერისა და ამასთან დაკავშირებული რეფორმების შესახებ, ასევე განიხილავენ ისეთ თემებს, როგორებიცაა ტურიზმი, ვაჭრობა და ინვესტიციები (მაგ. საჰაერო მიმოსვლა, გადახდის ოპერაციები, როუმინგი).

დელეგაცია ასევე ესტუმრება ქართულ კერძო კომპანიებსა და ისაუბრებს ორმხრივ პროექტებზე.

აქცია გულწრფელი ადამიანების რესურსით მიმართულია იმისკენ, რომ კონკრეტულ პოლიტიკურ ძალას გაეხსნას გზა ხელისუფლების ხელში ჩასაგდებად, – „გამჭვირვალობის შესახებ კანონპროექტის“ წინააღმდეგ გამართულ საპროტესტო აქციებს პარლამენტის პირველი ვიცე-სპიკერი, გიორგი ვოლსკი გამოეხმაურა.

„არ აქვთ დღეს ეს რესურსი ხელში რომ განავითარონ, აწამონ, დახოცონ და იმ რესურსით სარგებლობენ, რასაც ახალგაზრდული გულწრფელი დამოკიდებულება ჰქვია. თავად გეგმავენ, ამ აქციების უკან, მშვიდობიანი მოქმედებების უკან მიმდინარეობს ეს ბნელი პროცესი, რომელიც ყველასთვის ცნობილი არ არის და ზუსტად შეესაბამება იმ სახელმძღვანელოებში ჩამოყალიბებულ სტრატეგიას, რომლის წასაკითხადაც ამ სტრატეგიის ავტორი ახლახან იყო საქართველოში ჩამოსული“, – აღნიშნაა ვოლსკიმ.

საქართველოს პარლამენტის თავმჯდომარე შალვა პაპუაშვილი სოციალურ ქსელში აშშ-ის სახელმწიფო დეპარტამენტის სპიკერის მეთიუ მილერის განცხადებას ეხმიანება, რომ თითქოს ,,FARA ეხება იმ ადამიანებს, რომლებიც უცხოური მთავრობების სახელით მოქმედებენ და არა მათ, ვინც ლეგიტიმურ არასამთავრობო ორგანიზაციების საქმიანობას ახორციელებენ”.

როგორც შალვა პაპუაშვილი აღნიშნავს, FARA-ში შეყვანილია გიული ალასანია და დავით კეზერაშვილის ტელევიზია “ფორმულა”, რომლებიც უკვე 12 წელია აღარ არიან საქართველოს “მთავრობის სახელით მოქმედი პირები”.

მისი განცხადებით, სწორედ ამგვარი ზედაპირულობა და სიმართლეს აცდენილი ინფორმაცია ახალისებს რადიკალურ ჯგუფებს საქართველოში.

,,FARA-ს რეესტრში შეყვანილია გიული ალასანია და დავით კეზერაშვილის ტელევიზია “ფორმულა”. ალბათ, ეს მაინც არ არის სადავო, რომ არც ერთი და არც მეორე, ღმერთის წყალობით, უკვე 12 წელია აღარ არიან საქართველოს “მთავრობის სახელით მოქმედი პირები”.

სწორედ ამგვარი ზედაპირულობა და სიმართლეს აცდენილი ინფორმაცია ახალისებს რადიკალურ ჯგუფებს საქართველოში.

გვახსოვდეს, რომ გამჭვირვალების ქართული კანონი ამერიკულთან ახლოსაც ვერ მივა რეგულაციების სიმკაცრით – არ ეხება ფიზიკურ პირებს, არ ითვალისწინებს სისხლისსამართლებრივ პასუხისმგებლობას და ა.შ.,” – წერს შალვა პაპუაშვილი.

ლაჩარს და მხდალს ყველა თავისნაირი ჰგონია! დამითმია ჩემი თვალიც, ცხვირიც და რა ვიცი კიდევ, რაც უნდათ. ერთ მუშტად შეკრულ საქართველოს ვერავინ დაამარცხებს. გამარჯვება ერთი ხელის გაწვდენაზეა – გამძლეობა და მხნეობა, ჩემო სადარდელო ქვეყანავ, – ამის შესახებ “ერთიანი ნაციონალური მოძრაობის” თავმჯდომარე ლევან ხაბეიშვილი სოციალურ ქსელში წერს.

“მიზანმიმართული დაშინება, დაორგანიზებული თავდასხმები, რომ შემდეგ მედიაში იტრიალოს, ხალხი შეშინდეს, დაიზაფროს.

არასდროს შეშინებია ქართველს, როცა თავისი სამშობლოს ეროვნულ ინტერესებს იცავდა. არანაირი შფოთვა და შიში! თუ ვინმე დამფრთხალია, ეს არის ევროპაზე, დასავლეთზე უარის განმცხადებელი ივანიშვილი და მისი ხელისუფლება.

ლაჩარს და მხდალს ყველა თავისნაირი ჰგონია! დამითმია ჩემი თვალიც, ცხვირიც და რა ვიცი კიდევ, რაც უნდათ. ერთ მუშტად შეკრულ საქართველოს ვერავინ დაამარცხებს. გამარჯვება ერთი ხელის გაწვდენაზეა – გამძლეობა და მხნეობა, ჩემო სადარდელო ქვეყანავ

არა რუსულ კანონს! კი ევროპას!” , – წერს ლევან ხაბეიშვილი სოციალურ ქსელში.

ჩვენ მიგვაჩნია, რომ კანონი, რომელსაც ისინი განიხილავენ, საქართველოს სახიფათო ტრაექტორიაზე დააყენებს, საქართველოს ევროატლანტიკურ გზას საფრთხეს შეუქმნის და აშშ-საქართველოს ურთიერთობას ძირს გამოუთხრის, – ამის შესახებ აშშ-ის სახელმწიფო დეპარტამენტის სპიკერმა, მეთიუ მილერმა ბრიფინგზე „უცხოური გავლენის გამჭვირვალობის შესახებ“ კანონპროექტთან დაკავშირებით დასმულ კითხვაზე განაცხადა.

მისი თქმით, აშშ აღნიშნილი პოზიციის ახსნას გააგრძელებს, გადაწყვეტილება კი საქართველომ უნდა მიიღოს.

„ჩვენ მიგვაჩნია, რომ კანონი, რომელსაც ისინი განიხილავენ, საქართველოს სახიფათო ტრაექტორიაზე დააყენებს, საქართველოს ევროატლანტიკურ გზას საფრთხეს შეუქმნის და აშშ-საქართველოს ურთიერთობას ძირს გამოუთხრის. ჩვენ ამის ახსნას გავაგრძელებთ და ისინი გადაწყვეტილებას თავად მიიღებენ“, – განაცხადა მეთიუ მილერმა.

მილერმა არ გააკეთა კომენტარი შესაძლო ზომებზ.

„სანქციების თაობაზე რაიმე განცხადების გაკეთებას არ ვაპირებ, იმასთან დაკავშირებით, თუ რა შეიძლება გავაკეთოთ ან რის გაკეთებას განვიხილავთ“, – აღნიშნა აშშ-ის სახელმწიფო დეპარტამენტის სპიკერმა.