ბრალდების და მისი ბრალდებების სრული კოლაფსი, ჩვენ წინ იწერება „სისტემური სიცრუის ქრონიკა” , – ამის შესახებ საქართველოს მეხუთე პრეზიდენტი, სალომე ზურაბიშვილი სოციალურ ქსელში წერს, რითაც „ბათუმელებისა” და „ნეტგაზეთის“ დამფუძნებლის, მზია ამაღლობელის სასამართლო პროცესს ეხმაურება.

სალომე ზურაბიშვილი აცხადებს, რომ ბრალდების მხარის მიერ ვრცელდება „ერთმანეთთან შეუსაბამო სიცრუეები“.

„მზიას სასამართლო: სამი საათია, რაც ძალიან დეტალურად, ნათლად, კვალიფიციურად და დამაჯერებლად ადვოკატი ასაბუთებს, თუ რამდენი ტყუილი, რამდენი ცრუ ჩვენება წარმოადგინეს მოწმე პოლიციელებმა… ერთმანეთთან შეუთავსებელი სიცრუე, რომელიც „არ იფუთება”, ურთიერთსაწინააღმდეგო, წარდგენილ ვიდეო მტკიცებულებებთან შეუსაბამო… დაცვის კითხვებს გაუცემელი პასუხები, გამოუსწორებელი უზუსტობები, ცვალებადი ვერსიები, ბრალდების მხარის და მისი მოწმეების ( ყველა მოწმე პოლიციელია და “დაზარალებული პოლიციელის” თანამშრომელი)”.

ბრალდების და მისი ბრალდებების სრული კოლაფსი…

ჩვენ წინ იწერება „სისტემური სიცრუის ქრონიკა“, – წერს სალომე ზურაბიშვილი, რომელიც ბათუმის საქალაქო სასამართლოში მზია ამაღლობელის პროცესზე დასასწრებად მივიდა.

არც თავის დაზღვევაა და არც არაფერში ჯდება, როდესაც ლაპარაკობ მშვიდობიან დამხობაზე, მშვიდობიან მეკვლელობაზე, ხალხის მშვიდობიან ამოხოცვაზე და ეს სიტყვა ამ კონტექსტს არ აზღვევს, – განაცხადა აპარლამენტო უმრავლესობის ლიდერმა, პარტია „ქართული ოცნების“ აღმასრულებელმა მდივანმა მამუკა მდინარაძემ, რომელმაც უპასუხა შეკითხვას ოპოზიციის სამომავლო გეგმების შესახებ.

მისი განცხადებით, „მშვიდობიანი დამხობა“ ისეთივე ურთიერთგამომრიცხავი სიტყვებია, როგორც “მშვიდობიანი მკვლელობა” ან “ადამიანების მშვიდობიანი დახოცვა”, შესაბამისად, ოპოზიციის მცდელობა, რომ თავი დაიზღვიონ, უშედეგოა.

„რამხელა შიში აქვთ და რა სიმხდალეა ჩადებული იმაში, რომ სიტყვა დამხობასთან ერთად ამბობენ მშვიდობიანს. ან დამხობის მნიშვნელობა არ იციან და ინტელექტი არ ჰყოფნით, ან რაღაც სულელურ დაზღვევასთან გვაქვს საქმე. „მშვიდობიანი მკვლელობა“ – შეიძლება ასე ვილაპარაკოთ? სიტყვა „დამხობა“ თავისი არსით, შეიცავს ისეთ შინაარსს, რომ მშვიდობიანი დამხობა არ არსებობს. თუ დამხობას ამბობს, იმის თავი უნდა ჰქონდეს, რომ მშვიდობიანი არ დააყოლოს და თუ დამხობა უნდა, დაამხოს და გაეცემა შესაბამისი პასუხი. თუ ვერ ამხობს, მშვიდობიანს ნუ ამატებს. „ადამიანების მშვიდობიანი დახოცვა“ – შეძლება ასეთი რაღაც ილაპარაკო? ასეთ სისულელეს ამბობენ, ამიტომ, ვითომ აზღვევენ, იმიტომ რომ, დამხობისკენ მოწოდება სისხლის სამართლის დანაშაულია და ამ სისულელე კონტექსტს თუ შექმნიან, ამით დაიზღვევენ თავს. არც თავის დაზღვევაა და არც არაფერში ჯდება, როდესაც ლაპარაკობ მშვიდობიან დამხობაზე, მშვიდობიან მკვლელობაზე, ხალხის მშვიდობიან ამოხოცვაზე და ეს სიტყვა ამ კონტექსტს არ აზღვევს“, – განაცხადა მამუკა მდინარაძემ.

მშვიდობიანი დამხობა გულისხმობს, რაც მოხდა 2003 წელს საქართველოში და რაც მოხდა ჩვენს სამეზობლოში, სომხეთში და ეს ფაშინიანმა გააკეთა. ჩვენ ამის გაკეთება შეგვიძლია და გავაკეთებთ, – ამის შესახებ „ნაციონალური მოძრაობის“ პოლიტსაბჭოს თავმჯდომარემ, ლევან ხაბეიშვილმა განაცხადა.

მისივე თქმით, ლაშა ცანავას ჰქონდა საკმარისი შემოსავალი, რომ ორჯერ 50 ათასი ლარი პარტიისთვის შეეწირა.

„ოხანაშვილს, მდინარაძეს, კობახიძეს, თავისნაირი ქვეშაფსია და პრ**ები ჰგონია ყველა. ლაშა ცანავა, ჩემი მეგობარი, ადამიანი ჩემს უსაფრთხოებას იცავდა და სადაც იყო ჩემი შუბლი და კისერი, იქ იყო მისი მუშტი. „ტიტუშკების“ თავდასხმა, ქვების სროლა, კვერცხის სროლა, ყოველთვის ჩემ გვერდით იყო ჩემი ძმაკაცი, ჩემი თანამებრძოლი ლაშა ცანავა. გახსოვთ, რომ სანამ ცანავას დააკავებდნენ, შინაგან საქმეთა სამინისტროს გვერდზე დაწერეს, ლევან ხაბეიშვილისთვის ციხის კარი გაიხსნაო, და ზუსტად იმ საღამოს სუს-მა ლაშა ცანავა მოიტაცა. საზოგადოებას უნდა ესმოდეს, რომ ბრალს, რომელსაც ედავებიან, თაღლითობის მცდელობაა, თაღლითობაც არა, სუს-ი ამაზე არ იჭერს, ეს პოლიციის საქმეა. თუმცა, წაიყვანეს სუს-ში და დღეს ლაშა ცანავამ, ვაჟკაცმა კაცმა, რომელიც ვერ შეაშინეს, ვერც ბევრი ფული რომ დაუდეს და უთხრეს, რომ რაღაც კადრები გვაქვს შეკერილი და აირჩიე, ან 9 წელი, ან ხაბეიშვილს უთვალთვალე, ჩაწერე, გვითხარი, სად გადაადგილდება, კამერა დაიბნიე და სდიე შენს მეგობარს, რომ მერე ჩვენ, ფოხანაშვილმა, ჯეკამ, მდინარაძემ ხაბეიშვილი დავიჭიროთ, მოვყვეთ როგორი ბრუტალურია და როგორ აპირებს რევოლუციის მოწყობას და მერე ამ ხმაში ამღერებს გარკვეულ ოპოზიციონერებს. ძალიან შეგეშალათ, ჩემ გვერდით თქვენნაირი მშიშრები, მხდლები და პრ**ები არ არიან. ჩემ გვერდით საქართველოს პატრიოტები არიან. ასე თავაწეულად და ღირსეულად ლაშა ცანავამ თავისი საკნის კარი თავად გააღო. ცხადია, მის ბრძოლას ჩვენ გავაგრძელებთ. მინდა, მივმართო ბიძინა ივანიშვილს, ხომ მაგარი ბიჭი ხარ, ხომ დააყენე ახალი ჯეელი, მოდი, აბა, შევერკინოთ.

ლაშა ცანავა მეოჯახე ადამიანია, რომელიც კეთილსინდისიერად მუშაობდა დაცვაშიც, მძღოლადაც, ჩემთანაც უანგაროდ იყო. ის ოთხი წლის განმავლობაში მუშაობდა საქართველოს პარლამენტში და ჰქონდა ანაზღაურება. თქვენ თუ გგონიათ, რომ ფოხანაშვილივით და კობახიძესავით მერე ეს ფული სახლში მიაქვს, ძალიან ცდებით. ლაშა ცანავა პარლამენტში მუშაობდა, რათა პარლამენტში „ტიტუშკები“ რომ თავს დამესხმებოდნენ, ახლოს ყოფილიყო და ჩემი უსაფრთხოება დაეცვა. მას 4 წლის განმავლობაში იმხელა შემოსავალი ჰქონდა, რომ თუნდაც ორჯერ 50 ათასი შემოეწირა. ჩვენი პარტია სახალხო პარტიაა, ხალხი ლუკმას იღებს და ამ ფულს პარტიას წირავს, რომ რუსული ხელისუფლება გავისტუმროთ“, – განაცხადა ხაბეიშვილმა.

როგორც „ნაციონალური მოძრაობის“ პოლიტსაბჭოს თავმჯდომარემ აღნიშნა, 4 ოქტომბერი ქართველი ხალხის გამარჯვების თარიღია.

„ჩვენ, ქართველი ხალხი და შენ – შენი რუსალკებით. მოდი, თუ ერთი ადგილი გაქვს, დაგველოდე, ბევრ დროს არ გთხოვთ, 4 ოქტომბრამდე დაგველოდეთ. მივმართავ საზოგადოებას, 4 ოქტომბერს, უმნიშვნელოვანესია, არავინ დარჩეს სახლში, რაც უფრო მეტნი ვიქნებით, მით უფრო მარტივად, მშვიდად დავამარცხებთ და გავუშვებთ ამ ხელისუფლებას. 4 ოქტომბერი ქართველი ხალხის გამარჯვების თარიღია და რომ გეშინიათ ამ თარიღის, უკვე კოჭებზე გეტყობათ, ვერც ვერანაირ ბრალს ვერ შეთითხნით, ვერც ციხის კარით დამემუქრებით და მეტსაც გეტყვით, არ ვაპირებ ციხეში წასვლას. იქით ვეპატიჟები ფოხანაშვილს, ჯეკას, მდინარაძეს, სვეტლანას და კობახიძეს ციხეში, რადგან ქართველი ხალხი გაძარცვეს.

მშვიდობიანი დამხობა გულისხმობს, რაც მოხდა 2003 წელს საქართველოშივე და რაც მოხდა ჩვენს სამეზობლოში, სომხეთში და ეს ფაშინიანმა გააკეთა. ჩვენ ამის გაკეთება შეგვიძლია და ამას გავაკეთებთ. მე ძალიან ბევრი დამაკნინებელი მომისმენია ჩემზე. როგორ შეიძლება, ლევანი ვარ, ხაბეიშვილი და თქვენ რომ გითხრათ, გოჩა ხართ-მეთქი, შეურაცხმყოფელია. მოიტანოს ეს დოკუმენტი და აჩვენოს საზოგადოებას, თუ არადა მტყუანის დედა მოვ**ან , ასე გადაეცით კობახიძეს“, – განაცხადა ხაბეიშვილმა

დღევანდელ მსოფლიოში, სადაც მშვიდობა და სტაბილურობა უდიდეს გამოწვევად იქცა, საქართველო წარმატების საუკეთესო მაგალითია, რაშიც სახელმწიფო უსაფრთხოების სამსახურის თითოეულ წარმომადგენელს განსაკუთრებული წვლილი მიგიძღვით, – ამის შესახებ საქართველოს პრემიერ-მინისტრმა ირაკლი კობახიძემ სახელმწიფო უსაფრთხოების სამსახურის დაარსებიდან 10 წლის იუბილესთან დაკავშირებულ ღონისძიებაზე სიტყვით გამოსვლისას განაცხადა.

მთავრობის მეთაურმა, პრეზიდენტ მიხეილ ყაველაშვილთან და პარლამენტის თავმჯდომარე შალვა პაპუაშვილთან ერთად, სახელმწიფო უსაფრთხოების სამსახურის ხელმძღვანელობას და თითოეულ თანამშრომელს საიუბილეო თარიღი მიულოცა და ქვეყნის მშვიდობისა და სტაბილურობის განმტკიცებაში შეტანილი განსაკუთრებული წვლილისთვის მადლობა გადაუხადა.

„დღევანდელ მსოფლიოში, სადაც მშვიდობა და სტაბილურობა უდიდეს გამოწვევად იქცა, საქართველო წარმატების საუკეთესო მაგალითია, რაშიც თქვენ, სახელმწიფო უსაფრთხოების სამსახურის თითოეულ წარმომადგენელს, განსაკუთრებული წვლილი მიგიძღვით. სწორედ თქვენი პროფესიონალიზმისა და დაუღალავი შრომის შედეგია, რომ სახელმწიფომ წარმატებით აღკვეთა შიდა თუ გარე ძალების მიერ დაგეგმილი არაერთი სცენარი, რომლებიც პოლიტიკურ დესტაბილიზაციასა და ხელისუფლების ძალადობრივი გზით შეცვლას ისახავდა მიზნად. თქვენი დამსახურებით ქვეყანამ დაძლია უმწვავესი კრიზისები, რომლებიც საფრთხეს უქმნიდა არამხოლოდ საქართველოს, არამედ მთელი რეგიონის სტაბილურობას. შავი ზღვის რეგიონში არსებული რთული ვითარების ფონზე ჩვენი ქვეყანა კვლავაც მრავალი გამოწვევის წინაშე დგას. საფრთხეების ერთ-ერთ უმთავრეს წყაროდ კვლავ საქართველოს რეგიონების დროებითი ოკუპაცია რჩება. თქვენი ძალისხმევა უზრუნველყოფს საოკუპაციო ხაზის გასწვრივ სტაბილური გარემოს შენარჩუნებას. განსაკუთრებულია თქვენი წვლილი როგორც უკანონოდ დაკავებული პირების გათავისუფლებაში, ისე ოკუპირებულ ტერიტორიებზე მცხოვრები ჩვენი თანამოქალაქეების უფლებების დაცვაში. ბატონო ანრი, მსურს, ხაზგასმით აღვნიშნო პირადად თქვენი და თქვენი უწყების ძალისხმევა კორუფციის წინააღმდეგ ბრძოლაში. კორუფცია უდიდესი საფრთხეა სახელმწიფოსთვის – ის ხელს უშლის საჯარო უწყებების ეფექტიან ფუნქციონირებას, ძირს უთხრის მოქალაქეთა ნდობას სახელმწიფო ინსტიტუტების მიმართ და აფერხებს ქვეყნის განვითარებას, რასაც ჩვენ ვერ შევეგუებით. ჩვენი პრიორიტეტია ეფექტიანი ანტიკორუფციული მექანიზმების გაძლიერება, რაშიც თქვენს სამსახურს საკვანძო როლი აკისრია. მინდა, კიდევ ერთხელ დაგიდასტუროთ მთავრობის სრული მხარდაჭერა ამ მიმართულებით”, – აღნიშნა ირაკლი კობახიძემ.

სახელმწიფო უსაფრთხოების სამსახურის თანამშრომლებს სამსახურის 10 წლის იუბილე მიულოცეს პრეზიდენტმა და პარლამენტის თავმჯდომარემ. სამსახურის მიერ გაწეული საქმიანობა შეაჯამა და სამომავლო გეგმებზე ისაუბრა სახელმწიფო უსაფრთხოების სამსახურის უფროსმა ანრი ოხანაშვილმა და მთავრობას და პარლამენტს უწყების მხარდაჭერისთვის მადლობა გადაუხადა.

სახელმწიფო უსაფრთხოების სამსახურის 10 წლის იუბილესთან დაკავშირებით ანრი ოხანაშვილმა სამსახურის თანამშრომლები სხვადასხვა ხარისხის სახელმწიფო ჯილდოებით დააჯილდოვა.  სახელმწიფო უსაფრთხოების სამსახურის პირველი ხარისხისა და საპატიო მედლები უწყების 328 თანამშრომელს გადაეცა.

4 ოქტომბრის ირგვლივ ატეხილი ამბავი აჩვენებს, რომ გადაწყვეტილებების მიღების წესზე ვიდრე არ შევთანხმდებით, სულ ამ საგიჟეთში ვიქნებით, – ამის შესახებ „სტრატეგია აღმაშენებლის“ ლიდერი გიორგი ვაშაძე აცხადებს.

როგორც ვაშაძე აღნიშნავს, საჭიროა ერთიანი სამოქმედო სისტემა.

„4 ოქტომბრის ირგვლივ ატეხილი ამბავი აჩვენებს, რომ სანამ გადაწყვეტილებების მიღების წესზე არ შევთანხმდებით, მანამდე სულ ამ საგიჟეთში ვიქნებით. 8-პუნქტიან გეგმაში სწორედ ეს დავწერეთ, ერთიანობის ურღვეობისთვის უნდა შევთანხმდეთ გადაწყვეტილებების მიღების წესზე. მხოლოდ ერთიანი მიზანი საკმარისი არ არის, საჭიროა ერთიანი სამოქმედო სისტემა, სწორედ ეს არის 8-პუნქტიანი გამარჯვების გეგმაც.

მთავარ კითხვას უნდა გავცეთ პასუხი, როგორ ვაღწევთ კომპრომისს განსხვავებული პოზიციების დროს? „თუ არ მეთანხმები, მაშინ მტერი ხარ“ – არის მცდარი მიდგომა. რვა პუნქტში არის გადაწყვეტილებების მიღების ორი მექანიზმი – პარიტეტული საბჭო უმრავლესობით და შემდეგ ეტაპზე ზურას ინიცირებული ბაზა, სადაც მოხდება ხალხის პირდაპირი ჩართულობა გადაწყვეტილებების მიღებაში. ვინც ეთანხმებით თუ არ ეთანხმებით ამ მიდგომას, გთხოვთ, დააფიქსიროთ პოზიცია, მზად ვარ მოვისმინო ყველას აზრი. ძალა ერთობაშია და არა დაქსაქსულობაში“, – აღნიშნულია გიორგი ვაშაძის განცხადებაში, რომელსაც „სტრატეგია აღმაშენებლის“ პრესსამსახური ავრცელებს.