პაატა ბურჭულაძე აცხადებს, რომ ტელეფონებით არჩევნები სავარაუდოდ სექტემბერში ჩატარდება. შესაბამისი განცხადება ბურჭულაძემ ამ თემასთან დაკავშირებით გამართული შეხვედრის შემდეგ გააკეთა.

როგორც ბურჭულაძემ აღნიშნა, ესტონეთში არსებობს ტელეფონებით არჩევნების ჩატარების პრაქტიკა.

„უკვე, ასე თუ ისე, ისახება გეგმები, რისი გაკეთებაც გვინდა. გვინდა, შედგეს აუცილებლად ნამდვილი არჩევნები და არა ის ცრუ არჩევნები, რომლებიც ტარდებოდა აქამდე. ჩვენ გვაქვს ბევრი ვარიანტი, რომ ჩვენ თვითონ ჩავატაროთ ეს არჩევნები. არ შეიძლება ასე გაგრძელება, ჩვენს თანამებრძოლებს უკვე ნელ-ნელა ციხეც ემუქრებათ, რადგან ცრუ კომისიაა, ცრუ დადგენილებას იღებს და ცრუ მოსამართლეებმა უნდა ჩასვან ციხეში. ამის დაშვება არ შეიძლება. ამიტომ, ჩვენ ვქმნით ერთ დიდ ალტერნატივას, რასაც ჰქვია საქართველოს ხალხი, საქართველოს დღევანდელი ე.წ. პარლამენტის წინააღმდეგ. ვნახოთ, ვინ გაიმარჯვებს, ე.წ. პარლამენტი თუ საქართველოს ხალხი.

მიდის მსჯელობაც, როგორ უნდა ჩავატაროთ არჩევნები. ასეთი დევიზი იქნება, რომ არ ჩაგატარებინებთ ცრუ არჩევნებს. ჩვენ ვართ ხალხი, ჩვენია ეს ქვეყანა და ჩვენ უნდა ჩავატაროთ ყველაფერი, რაც ამ ქვეყანას დადებითად სჭირდება. სამართლებრივად ძალიან კარგად წარმომიდგენია. ჩვენ გვყავს ნამდვილად არჩეული პრეზიდენტი სალომე ზურაბიშვილის სახით. ჩვენ გვყავს ის მთავრობა, ჯერ კიდევ უზენაესი საბჭო, რომელიც არავის არ გაუუქმებია. ეს არის ზვიად გამსახურდიას მთავრობა, რომელმაც მოიყარა თავი და ისიც გვერდით გვიდგას. რაც შეეხება „ქართულ ოცნებას“, არავინ არ ჰყავს, თვითონ დაინიშნა თავისი თავი“, – განაცხადა ბურჭულაძემ.

რაც შეეხება ჟურნალისტის კითხვას, ტელეფონით ჩატარდება თუ არა არჩევნები, ბურჭულაძემ აღნიშნა, რომ ესტონეთში ამის პრაქტიკა არსებობს და საქართველოშიც გადმოღებას აპირებენ.

„შეიძლება, ვინმეს გაეცინოს, რომ ტელეფონებით, თუმცა ესტონეთში უკვე ამის კარგი პრაქტიკაა და ჩვენ გადმოღებას ვაპირებთ. ტელეფონი არ გაჟონავს, როგორც ჟონავს „ქართული ოცნების“ ქაღალდი და ტელეფონებით ვაპირებთ ამის გაკეთებას. გვაქვს ვარაუდი, რომ არჩევნები ამ სექტემბერში ჩატარდება. რუსთაველის გამზირის ხალხიც არის აქ და ჩვენ აქედან გავდივართ. ისინი მზად არიან, რომ გავიდეთ რეგიონებში და ყველა მოვიყვანოთ ამ აზრებთან ახლოს.

გახარიები არ იყვნენ დღეს, მაგრამ გახარიასთან მე მქონდა პირადი შეხვედრა და ბატონმა გიორგიმ ბრძანა, რომ თქვენ თუ ჩაატარებთ ამ არჩევნებს, აუცილებლად თქვენთან ერთად მივიღებ მონაწილეობასო. ჩვენ აქ მესამედ შევიკრიბეთ. სალომე ზურაბიშვილი ამის წინააღმდეგ რატომ უნდა წავიდეს? მასაც უნდა საქართველოში იყოს სამართალი. ჩვენ თვითონ ჩავატაროთ ის, რასაც ვენდობი და ამ არჩევნებში თუ „ოცნება“ გაიმარჯვებს, კაი ბატონო. მაშინ ჩვენ შევალთ პარლამენტში კი არა, ყველაფერს ვიზამთ, მაგრამ ეჭვი ძალიან მეპარება“, – აღნიშნა ბურჭულაძემ.

ჟურნალისტის კითხვაზე, საარჩევნო ბიულეტენში პარტიების ჩამონათვალი როგორი იქნება, ბურჭულაძემ აღნიშნა, რომ ეს პარტიების გადასაწყვეტია.

„შორს წახვედით, პარტიები როგორ შეიკრიბებიან, როგორი კოალიცია იქნება, ეს მათი გადასაწყვეტია. დღეს ჩვენ არ ვთხოვთ პარტიებს, რომ გაერთიანდნენ ერთ დიდ პარტიად, ჩვენ ვთხოვთ გაერთიანდნენ ჩვენი იდეის გარშემო, რასაც ჰქვია ეს შეხვედრები“, – განაცხადა ბურჭულაძემ.

ცნობისთვის, პაატა ბურჭულაძის მიერ ორგანიზებულ ოპოზიციის შეხვედრას ესწრებოდნენ, მათ შორის თაკო ჩარკვიანი, ლევან ხაბეიშვილი, ზურაბ ჯაფარიძე, გიორგი ვაშაძე, გია ბუღაძე, კობა ხაბაზი, პაატა მანჯგალაძე.

საქართველოს მიმართ დამოკიდებულება სამართლიანი უნდა იყოს და მისი ღირსების შელახვა არავინ უნდა სცადოს. „მეგობარი აქტი“ ტყუილებით არის გაჯერებული, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.

გორდულაძის თქმით, „ქართული ოცნება“ ყოველთვის დგამს ისეთ ნაბიჯებს, რომ პარტნიორული ურთიერთობები მაღალ ხარისხში იყოს.

„„მეგობარი აქტის“ სახელით მიღებულია „დიფ სთეითის“ მიერ მართული პროცესი, მტრული აქტი საქართველოს ინტერესების წინააღმდეგ, რომელიც ტყუილებით არის გაჯერებული. ამ დოკუმენტის ერთადერთი მიზანია, თემა აქტუალური იყოს და მასზე კომენტარები გაკეთდეს, ეს ადამიანები შეეცადონ, ქვეყანაში გაჩნდეს აღქმა, რომ ურთიერთობები გაფუჭებულია, თუმცა ჩვენ პარტნიორული ურთიერთობები გვინდა. ყოველთვის ვდგამთ ნაბიჯებს, რომ პარტნიორული ურთიერთობები მაღალ ხარისხში იყოს. სამწუხაროდ, ისეთ პასუხებს ვიღებთ, რაც საქართველოს ინტერესების საწინააღმდეგოა“, – განაცხადა არჩილ გორდულაძემ.  

კოლექტიურ „ნაცმოძრაობას“ ინსტიტუციების ჩამოქცევა უნდა, ცდილობენ, სახელმწიფო ინსტიტუტებს რეპუტაცია შეულახონ, თან პოლიტიკას შეეფარონ და საკუთარ პასუხისმგებლობას გაექცნენ, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.

მისი თქმით, ყველამ კარგად უნდა დაიმახსოვროს, რომ კანონი მკაცრია და შესასრულებლად სავალდებულო.

„კოლექტიურ „ნაცმოძრაობას“ ინსტიტუციების ჩამოქცევა უნდა, მათი გადაწყვეტილება ინსტიტუციური უპატივცემულობაა. წარმოიდგინეთ შემთხვევა, თუ სხვა ბრალდებული გირაოს არ გადაიხდის, რა შედეგი დადგებოდა და სასამართლო აღმკვეთი ღონისძიების შეცვლის თაობაზე იმსჯელებდა თუ არა? რა თქმა უნდა, იმსჯელებდა, რადგან კანონმდებლობით არის გათვალისწინებული. ზუსტად იგივე მოხდა ოქრუაშვილის შემთხვევაში. ეს ადამიანები ცდილობენ, სახელმწიფო ინსტიტუტებს რეპუტაცია შეულახონ, თან პოლიტიკას შეეფარონ და საკუთარ პასუხისმგებლობას გაექცნენ. ეს ადრეც გაუკეთებიათ და ახლაც იმავეს აგრძელებენ, მაგრამ ყველამ კარგად დაიმახსოვროს, რომ კანონი მკაცრია და შესასრულებლად სავალდებულო, იმის მიუხედავად, ეს ადამიანი რამდენჯერ გამოჩნდება „ნაცმოძრაობის“ არხებზე“, – განაცხადა არჩილ გორუდლაძემ.

„მეგობარი აქტი“ აბსურდია და რეალობას არ შეესაბამება. უსამართლობა იმდენად აშკარაა, რომ დარწმუნებული ვარ, ეს კონგრესისთვისაც საყურადღებო იქნება, – ამის შესახცებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის თქმით, „მეგობარი აქტი“ სიცრუეს შეიცავს, რათა საქართველოს ინტერესები დაზიანდეს.

„„მეგობარი აქტი“ არათუ უსამართლოა, არამედ გეგმაზომიერი სიცრუეა, რათა საქართველოს ინტერესები დაზიანდეს. აბსოლუტური აბსურდია და რეალობას არ შეესაბამება, რომ საქართველომ თავისი პოლიტიკა დაუკავშირა ირანს ან საგარეო კურსი შეცვალა და რუსეთის ორბიტაზე აღმოჩნდა. ასეთი არცერთი ფაქტი არ არსებობს, მით უმეტეს, 2012 წლიდან. არ შეიძლება, საქართველოს პოზიციის ცალკე განხილვა იმ ვითარებიდან, რომელიც მსოფლიოში არსებობს. საკმაოდ რთული მდგომარეობაა. არ შეიძლება, ჩუმად იყო, როცა არჩევითი ორგანო ასეთ განცხადებას/რეზოლუციას უჭერს მხარს. აუცილებელი იყო ამ კომენტარის გაკეთება ელემენტარულად იმისთვის, რომ ამ სიჩუმით რაღაც თავის დაკვრა არ გამოგვსვლოდა იმ უსამართლობაზე, რაც მოვისმინეთ. უსამართლობა იმდენად აშკარაა, რომ დარწმუნებული ვარ, ეს კონგრესისთვისაც საყურადღებო იქნება. განცხადება გამოქვეყნდა, თითქოს საქართველო დონალდ ტრამპის ადმინისტრაციას კორუმპირებულს უწოდებს. ეტყობა, ვიღაცაში ვეშლებით – „მაკკეინის ინსტიტუტში“, რომელმაც სალომე ზურაბიშვილი დაიქირავა, ხელფასს უხდის და ადმინისტრაციას აგინებს. ეს ის ხალხია, ვისაც ჯო უილსონი თანაუგრძნობს და გვერდში უდგას“, – განაცხადა გია ვოლსკიმ.

გვაქვს იმედი, რომ ტრამპის ადმინისტრაცია აღმოჩნდება უფრო ძლიერი, ვიდრე „დიფ სთეითი“, შეასუსტებს „დიფ სთეითს“, ამ შემთხვევაში, ვფიქრობ, რომ გადმოიდგმება შემხვედრი ძალიან კონკრეტული ნაბიჯები ახალი ადმინისტრაციის მხრიდან, ჩვენ ვიქნებით ამისთვის მზად, – განუცხადა საქართველოს პრემიერ-მინისტრმა ირაკლი კობახიძემ ჟურნალისტებს.

როგორც მთავრობის მეთაურმა აღნიშნა, ამერიკული მხარის მიმართ გაკეთებულია ძალიან კონკრეტული შეთავაზებები და არის სრული მზადყოფნა ურთიერთობების გადატვირთვისთვის.

„ჩვენ გვაქვს შეთავაზება ამერიკული მხარის მიმართ, ეს შეთავაზება არაერთგზის გავაჟღერეთ, გვქონდა კომუნიკაცია, მათ შორის საჯარო განცხადებები მქონდა მანამდე გაკეთებული იმასთან დაკავშირებით, რომ ჩვენ ვართ სრულად მზად ურთიერთობების გადატვირთვისთვის და ველოდებით შემხვედრ ნაბიჯებს. რეალურად ძირითადად იგივე გზავნილი იყო გახმოვანებული ჩემს ღია წერილშიც. ჩვენ ველოდებით შემხვედრ ნაბიჯებს, ამას ელოდება ქართული საზოგადოებაც. თუ არ გადაიდგმება შემხვედრი ნაბიჯები, ეს იქნება უტყუარი ნიშანი იმის, რომ „დიფ სთეითი“ ინარჩუნებს უპირატესობას ახალი ადმინისტრაციის მიმართ, რაც იქნება ძალიან სამწუხარო, თუმცა ჩვენ გვაქვს ოპტიმისტური მოლოდინი. გვაქვს იმედი, რომ ტრამპის ადმინისტრაცია აღმოჩნდება უფრო ძლიერი, ვიდრე „დიფ სთეითი“, შეასუსტებს „დიფ სთეითს“, ამ შემთხვევაში, მე ვფიქრობ, რომ გადმოიდგმება უკვე შემხვედრი ძალიან კონკრეტული ნაბიჯები ახალი ადმინისტრაციის მხრიდან, ჩვენ ვიქნებით ამისთვის მზად“, – განაცხადა ირაკლი კობახიძემ.