გრანტის მომცემი ორგანიზაციები ყველა დათანხმდა, რომ გამჭვირვალობას ალტერნატივა არ გააჩნია, მაგრამ საპირისპირო სურათი ვიხილეთ – შავი ფულის შემოდინება და მისი გამოყენება რევოლუციური პროცესების განვითარებისთვის, – განაცხადა გიორგი ვოლსკიმ ამერიკული „ფარას“ ზუსტ ანალოგზე, ახალ კანონზე საუბრისას.

პარლამენტის პირველი ვიცე-სპიკერის თქმით, კანონის გამკაცრებაა საჭირო იმრიგად, რომ იგი არ ცდებოდეს დემოკრატიულ პრინციპებსა და სტანდარტებს.

„ჩვენ ვეცადეთ, რომ საკმაოდ რბილი, ლოიალური კანონით ეს აუცილებლობა დაგვენახებინა პარტნიორებისთვის. შევთანხმდით კიდეც. ძირითადი, გრანტის მომცემი ორგანიზაციები ყველა დათანხმდა, რომ გამჭვირვალობას ალტერნატივა არ გააჩნია, მაგრამ საპირისპირო სურათი ვიხილეთ – შავი ფულის შემოდინება და მისი გამოყენება რევოლუციური პროცესების განვითარებისთვის. აქედან გამომდინარე, კანონის გამკაცრებაა საჭირო იმრიგად, რომ იგი არ ცდებოდეს დემოკრატიულ პრინციპებს, სტანდარტებს, რომელიც დემოკრატიის ციტადელში, აშშ-ში მუშაობს“, – განაცხადა ვოლსკიმ.

მმართველ გუნდში ამბობენ, რომ გამჭვირვალობის შესახებ მოქმედი კანონით, კონკრეტული ორგანიზაციები ფინანსური გაუმჭვირვალობისგან თავის არიდებას ახერხებდნენ, რის გამოც გახდა საჭირო უფრო მკაცრი კანონის მიღება, როგორიცაა ამერიკული „ფარა“. „ქართულ ოცნებაში“ აცხადებენ, რომ ახალი კანონი ამერიკული „ფარას“ ზუსტი ანალოგი იქნება.

ჩვენს ქვეყანას მოუწოდებდნენ, გვთხოვდნენ სანქციებთან შეერთებას, მოხალისეების, იარაღის გაგზავნას, რომ საქართველოს ჩართულიყო ომში, – ამის შესახებ საქართველოს პრეზიდენტმა, მიხეილ ყაველაშვილმა აზერბაიჯანული ტელეკომპანიისთვის მიცემულ ინტერვიუში ისაუბრა.

მისი თქმით, რაზეც ხელისუფლება და „ხალხის ძალა“ საუბრობდა, ახლა ტრამპის ადმინისტრაცია ერთი ერთში იმეორებს.

„რეალობით, რაც დღეს გლობალური თვალსაზრისით არის, მხედველობაში მაქვს დონალდ ტრამპის ადმინისტრაციის ქმედებები, გამოიკვეთა კონკრეტული ძალები, რომლებიც დაინტერესებული არიან ომით. ჩვენ მუდმივად გვაქვს საუბარი „დიფ სთეითზე“, ჩვენ ამას დავარქვით გლობალური ომის პარტია, რომლის ინტერესიც იყო, რაც შეიძლება დიდხანს გაგრძელებულიყო ეს ომი. ჩვენ თავიდანვე ვსაუბრობდით ამ თემაზე და ახლა ამაზე საუბრობს ტრამპის ადმინისტრაცია. ჩვენს ქვეყანას მოუწოდებდნენ, მეტი აქტიურობა გამოეჩინა ომზე, გვთხოვდნენ სანქციებთან შეერთებას, მოხალისეების, პირდაპირ იარაღის გაგზავნას, რაც კავშირში იყო, რომ საქართველოს ჩართულიყო ომში. წინა ადმინისტრაციის წარმომადგენლებიც ამ ზეწოლის გზას იმეორებდნენ. დღეს ტრამპის შეხედულებებზე ვსაუბრობ იმიტომ, რომ მკაფიოდ არის ხაზი გავლებული, რასაც ჩვენ, ხელისუფლება და „ხალხის ძალა“ ვამბობდით, ერთი ერთში იმეორებს ტრამპის ადმინისტრაცია“, – განაცხადა ყაველაშვილმა.

საქართველოში დასავლური განწყობის შერყევა თუ რამეს შეუძლია, ეს ევროკავშირის კონკრეტული ჩინოვნიკების უპასუხისმგებლო და მტრული ქცევებია, – ამის შესახებ საპარლამენტო უმრავლესობის ლიდერმა, დავით მათიკაშვილმა განაცხადა.

მისივე თქმით, ევროკავშირის ჩინოვნიკების ჩართულობა საქართველოს შიდა საქმეებში ორ მხარეს შორის ურთიერთობას აფუჭებს.

„ჯეფრი საქსის შეფასებები, შეგვიძლია, გამორჩეულად ადეკვატურად მივიჩნიოთ ჩვენს ქვეყანასთან მიმართებით. ეს პოლიტიკოსი და ანალიტიკოსი ცდილობს, სწორად შეაფასოს და სწორი პასუხები გასცეს იმ პრობლემებს, რაც ჩვენს ქვეყანაშია. ცხადია, რომ ევროკავშირის კონკრეტული ჩინოვნიკები, ევროპარლამენტარები თუ რომელიმე ევროპული სახელმწიფოს თანამდებობის პირები, როდესაც ჩვენს ქვეყანაში მონაწილეობენ ანტისახელისუფლებო მიტინგებში, იღებენ მონაწილეობას გარკვეულ ტრენინგებზე, სადაც პირდაპირ დესტრუქციაზე და რადიკალიზმზეა საუბარი, ეს ჩართულობა ურთიერთობას აფუჭებს. საქართველოში დასავლური განწყობის გაფუჭება და შერყევა თუ რამეს შეუძლია, ეს ამ ჩინოვნიკების უპასუხისმგებლო და მტრული ქცევებია. ჩვენი ხელისუფლება ამას ყოველთვის ადეკვატურად აფასებდა და, როგორც ხედავთ, ევროპის მაღალი ტრიბუნებიდანაც ისმის შესაბამისი შეფასებები, რომლებიც აბსოლუტურად სწორია“, – აღნიშნა მათიკაშვილმა.

ცნობისთვის, ამერიკელმა პროფესორმა, კოლუმბიის უნივერსიტეტის მდგრადი განვითარების ცენტრის დირექტორმა, ჯეფრი საქსმა ევროპარლამენტში გამართულ ღონისძიებაზე სახელწოდებით – „მშვიდობის გეოპოლიტიკა“ განაცხადა, რომ „ევროპარლამენტარები და ევროპელი პოლიტიკოსები რომ ჩადიან საქართველოში, ეს ანგრევს საქართველოს“.

როდესაც ასეთი მაღალი ტრიბუნიდან, ასეთი კომპეტენციის ადამიანის შეფასება გაისმის, რასაკვირველია, ეს ბევრისთვის საყურადღებო უნდა იყოს, – განაცხადა გიორგი ვოლსკიმ ამერიკელი პროფესორის, ჯეფრი საქსის ევროპარლამენტში გაკეთებული განცხადების შეფასებისას.

პარლამენტის პირველი ვიცე-სპიკერის თქმით, საქართველოში ჩამოდიან ისეთი პოლიტიკოსები, რომლებიც თავის ქვეყანაში არ არიან პოპულარულები და მოწინავე პოლიტიკურ პოზიციებზე მყოფი ადამიანები.

„აქ სურთ, რომ ახალგაზრდებს ტვინი აურიონ და უკარნახებენ იმას, რომ მეიდნის სცენარია ყველაზე მისაღები ქვეყნისთვის, თავისი ინტერესი გააჩნიათ და უნდათ, რომ ჩვენს ქვეყანაში მათი ინტერესის რეალიზაცია ასეთი ბოროტი გზით მოხდეს. ამაზე საუბრობს ჯეფრი საქსი – გამოჩენილი მეცნიერი და პოლიტოლოგი“, – განაცხადა ვოლსკიმ.

ამერიკელმა პროფესორმა, ჯეფრი საქსმა ევროპარლამენტში გამართული დისკუსიების ფარგლებში საქართველოში განვითარებულ ბოლოდროინდელ პოლიტიკურ მოვლენებზეც ისაუბრა.

„თქვენი ევროპარლამენტარები, ევროპელი პოლიტიკოსები, რომლებიც საქართველოში ჩადიან, ეს ანადგურებს საქართველოს, ეს არ იცავს საქართველოს“, – აღნიშნა ამერიკელმა პროფესორმა.