ჩვენ ძალიან ვაფასებთ უნგრეთის მხარდაჭერას საქართველოს ევროპული ინტეგრაციისადმი და რეგიონული მშვიდობისა და სტაბილურობისადმი ჩვენს საერთო ერთგულებას, – ამის შესახებ საქართველოს პრემიერ-მინისტრი ირაკლი კობახიძე სოციალურ ქსელ „იქსში“ წერს.

მთავრობის მეთაური უნგრეთის პრემიერ-მინისტრ ვიქტორ ორბანთან გამართულ შეხვედრას ეხმაურება და აღნიშნავს, რომ მხარეებმა ორი ქვეყნის მზარდი თანამშრომლობა განიხილეს.

„ძალიან კარგი შეხვედრა მქონდა უნგრეთის პრემიერ-მინისტრ ვიქტორ ორბანთან. განვიხილეთ საქართველო-უნგრეთს შორის მზარდი პარტნიორობა. ჩვენ ძალიან ვაფასებთ უნგრეთის მხარდაჭერას საქართველოს ევროპული ინტეგრაციისადმი და რეგიონული მშვიდობისა და სტაბილურობისადმი ჩვენს საერთო ერთგულებას”, – დაწერა ირაკლი კობახიძემ.

პარლამენტმა, პლენარულ სხდომაზე, 86 ხმით, 2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელ პარლამენტის დროებით საგამოძიებო კომისიას უფლებამოსილების ვადა ერთი თვით, მიმდინარე წლის 5 ივლისამდე გაუგრძელა.

დადგენილების მიღებამდე, საგამოძიებო კომისიის თავმჯდომარე თეა წულუკიანმა, პლენარულ სხდომაზე, კომისიის მიერ გაწეული საქმიანობის მეორე შუალედური ანგარიში წარადგინა, რომელიც 2025 წლის 13 თებერვლიდან 2025 წლის 23 მაისამდე პერიოდს მოიცავს.

თეა წულუკიანის განცხადებით, დღეისთვის საგამოძიებო კომისიამ 30-ზე მეტი საჯარო სხდომა გამართა და 100-ზე მეტი პირი გამოჰკითხა. მისივე თქმით, კომისიაში შესული 600-მდე განცხადებიდან 500-ზე მეტი დამუშავებულია და მათი ნახევარზე მეტი წამებასა და არაადამიანურ მოპყრობას, ან და ამ გზით ჩამორთმეულ საკუთრებასა და ბიზნესს ეხება.

როგორც თეა წულუკიანმა აღნიშნა, კომისიისთვის უფლებამოსილების ვადის ერთი თვით გახანგრძლივება, პირველ რიგში, 2013-2025 წლების პერიოდის კვლევისთვისაა საჭირო.

„ჩვენ მიერ განსახილველი ექვსი თემა ძალიან მასშტაბურია. მათგან მეექვსე საკითხი 2013 – 2025 წლების პერიოდს ეხება. ჩვენ გვევალება შევისწავლოთ ის დამაზიანებელი მოქმედებები, რომლებსაც წინა ხელისუფლების დროს პოლიტიკური თანამდებობის მქონე პირები ან კიდევ ის პირები, რომლებიც დღეს პოლიტიკურ პარტიებში არიან გაწევრიანებული, ჩადიან სახელმწიფოსა და ქვეყნის წინააღმდეგ როგორც ქვეყნის შიგნით, ასევე, განსაკუთრებით, საზღვარგარეთ. ეს თემა გამოსაკვლევად მიმდინარე წლის აპრილში გადმოგვეცა და შესაბამისად, ამ კონკრეტული თემის საკვლევად, დამატებითი ვადა გვჭირდება. ვადის გაგრძელების შემთხვევაში კი, საჯარო სხდომის ფარგლებში ჩვენ არაერთი პირი გვეყოლება გამოსაკითხი“, – განაცხადა თეა წულუკიანმა.

მისი თქმით, საკმაოდ წარმატებით მიმდინარეობს პარლამენტის მიერ კომისიისთვის განსაზღვრული ხუთი თემის: მკვლელობები, წამება, არაადამიანური მოპყრობა, ბიზნესის რეკეტი, კორუფცია, მედიის თავისუფლება და 2008 წლის აგვისტოს ომი – კვლევა.

„მომდევნო თვეში ამ საკითხებზე მუშაობის მიმართულებით, ძირითადად დრო დაეთმობა დოკუმენტებზე მუშაობას და დასკვნის პროექტის შედგენის დასრულებას. დაგეგმილია, კომისიას 4-5 ივლისს, დასამტკიცებლად შევთავაზოთ დასკვნა, თუ ჩვენი მუშაობის პერიოდში რაიმე განსაკუთრებული წინაღობა არ გამოიკვეთა და ასეთ შემთხვევაშიც, მხოლოდ ბოლო 1 თვე დაგვრჩება სამუშაოდ.

აქვე უნდა აღინიშნოს, რომ კანონმდებლობა რომ იძლეოდეს შესაძლებლობას, მრავალი თვე არ ეყოფოდა იმ ბოროტების კვლევას, რომლის შესახებაც ვიცოდით და რომელთან დაკავშირებითაც, სხდომების კვალდაკვალ, სულ ახალ-ახალი ინფორმაცია ხდება ცნობილი“, – აღნიშნა კომისიის თავმჯდომარემ.

თეა წულუკიანის განცხადებით, მომდევნო თვეში დროებითი საგამოძიებო კომისია გეგმავს ხონში ჩასვლას, სადაც სასჯელაღსრულების ყოფილი დაწესებულებაა და დღეისათვის საქართველოში ის ერთადერთი ადგილია, სადაც სააკაშვილის დროინდელი კარცერებია შემონახული.

პირველი ივნისიდან ამერიკული კანონი შედის ძალაში. ვნახოთ, ამერიკულ სტანდარტს თუ მაინც დაიცავენ NGO სექტორი და მათი დონორები,- განაცხადა პარლამენტის თავმჯდომარე შალვა პაპუაშვილმა FARA-ს კანონის ძალაში შესვლაზე საუბრისას.

მავნე აღნიშნა, რომ ყველა ის ადამიანი, რომელიც ეუბნება NGO-ებს, რომ არ დაემორჩილონ კანონს, არღვევს ვენის კონვენციის 41-ე მუხლს და დიპლომატიური ქცევის სტანდარტს.

„პირველი ივნისიდან ამერიკული კანონი (FARA) შედის ძალაში. ვნახოთ, ამერიკულ სტანდარტს თუ მაინც დაიცავენ NGO სექტორი და მათი დონორები. აგერ არის ამერიკული სტანდარტი, ამერიკული კანონი. ვნახოთ ერთი ისინი ფარისევლობდნენ, როდესაც რაღაც ნორმები არ მოსწონდათ, თუ რაიმე რეალური შენიშვნა ჰქონდათ. ეს არის პირდაპირ ერთი-ერთში გადმოღებული კანონი, რომელიც მოქმედებს ტრამპის ამერიკაში. ახლა თქვან, რომ არ მოსწონთ ტრამპის ამერიკა, ამერიკული კანონები, სტანდარტები და ამაში ჩვენ რას გვერჩიან, წავიდნენ, იციან სადაც არის საელჩო და იქ გააპროტესტონ ან დაემორჩილონ ამ კანონს.

მეორე განზომილება აქვს ამ კანონს, ეს არის დონორები, რომლებიც აგულიანებენ თავის NGO-ებს, რომ არ დაემორჩილონ კანონს. ესეც არის დარღვევა. ზოგიერთი ელჩი, მათ შორის, რომელიც აგულიანებს NGO-ებს, რომ არ დაემორჩილონ კანონს და ისინი დაეხმარებიან ყველანაირად, რომ შემდეგ რაღაც თუ იყო რეაქციები, ატეხონ მერე სკანდალი და ვაი-ვიში. ამ დონორებს და ელჩებს ვეტყვი, რომ დიპლომატებმა პატივი უნდა სცენ ადგილსამყოფელი ქვეყნის კანონმდებლობას. ყველა ის ადამიანი, რომელიც ეუბნება NGO-ებს, რომ არ დაემორჩილონ კანონს, არღვევს ვენის კონვენციის 41-ე მუხლს და დიპლომატიური ქცევის სტანდარტსაც. ამიტომ მინდა ყველას აქედანვე მოვუწოდო, რომ არ უარყონ ამერიკული სტანდარტი“, – აღნიშნა პაპუაშვილმა.

ამერიკული კანონის ზუსტი ასლის ამოქმედებამდე სამი დღე რჩება. უცხოური აგენტების რეგისტრაციის აქტი და გამჭვირვალობა ოპოზიციას და მის მოკავშირე ენჯეოებს აშფოთებთ.

ბიძინა ივანიშვილი იმ ადამიანებს კარგავს, რომელიც მისთვის ყველაზე ახლო, სანდო და მისი საყრდენი იყვნენ. ის რეალურად შიშველი რჩება და ანაბარა ერთი ირაკლი კობახიძის, – ასე აფასებს საქართველოს მეხუთე პრეზიდენტი, სალომე ზურაბიშვილი ვახტანგ გომელაურის მიერ შს მინისტრის თანამდებობის დატოვებას.

მისივე შეფასებით, სანქციები მოქმედებს.

„ჩვენ კიდევ უფრო ნათლად ჩამოშლის, რყევების პროცესს ვხედავთ. პრაქტიკულად, დღე არ გადის ისე, რომ [არ დავინახოთ] ახალი ნიშანი იმის, რომ ის პირველი წრე იშლება, რომელიც ბიძინა ივანიშვილის ირგვლივ მას აქამდე ამაგრებდა. ეს არის ნიშანი იმის, რომ ერთი მხრივ, სანქციები მოქმედებს და ბევრად მეტად მოქმედებს, ვიდრე ჩვენ წარმოგვიდგენია. სხვათა შორის, ეს დამახასიათებელია სანქციების, რომ ის მოქმედებს ჯერ ნელ-ნელა და მერე აჩქარებული ტემპით.

მეორე ნიშანი ძალიან მნიშვნელოვანია. რეალურად, ამ ბოლო გადაადგილებებით, ბიძინა ივანიშვილი იმ ადამიანებს კარგავს, რომელიც მისთვის ყველაზე ახლო, სანდო და მისი საყრდენი იყვნენ. ის რეალურად შიშველი რჩება და ანაბარა ერთი – ირაკლი კობახიძის, რაც იმის მაჩვენებელი არ არის, რომ ეს რეჟიმი შინაგანი ძლიერებით სარგებლობდეს. ეს არის ის პოლიტიკური რეალობა, რომელსაც მათ თვალი უნდა გაუსწორონ.

ამავე დროს, ჩვენს დემოკრატიულ მეგობრებთან ყველა პარტნიორობა იკარგება, ესეც ნათელია. თუნდაც წერილები, გზავნილები ამერიკის საელჩოსთან, ადმინისტრაციასთან გაცვლა, იმის მაჩვენებელია, რომ დალაგებების იმედები სწრაფად ქრება, თუ არა ჩამქრალია. ეს არის ჩვენი დღევანდელი მდგომარეობა. მგონი, ეს იმას ნიშნავს, რომ კიდევ როგორც არასოდეს, უფრო მძლავრად უნდა ვიყოთ, ჩვენს თავში დარწმუნებული, რომ ეს ბრძოლა არის მართალი ბრძოლა და ეს არის ბრძოლა, რომელიც ბოლოს გამარჯვებას მოიტანს“, – განაცხადა ზურაბიშვილმა.

ზოგიერთებს კატეგორიებად აქვთ დაყოფილი ქვეყნები, არსებობს „ა“ კლასის ქვეყნები, „ბ“, „ც“ და ა.შ. ზოგიერთის თვალში სამყარო ჯერ კიდევ კატეგორიებად არის დაყოფილი, ზოგიერთი პოლიტიკური ჯგუფის ტვინებში მე-20 საუკუნის რაღაც კუდებია შემორჩენილი. გაერო-ს ქარტიისა და ადამიანის უფლებათა ევროპული დეკლარაციის არსებობის შემდეგ, ქვეყნების კატეგორიზაცია ყველას უნდა მიევიწყებინა, – ამის შესახებ პარლამენტის ტავმჯდომარემ, შალვა პაპაუშვილმა განაცხადა.

„ზოგიერთებს კატეგორიებად აქვთ ჩამოყალიბებული ქვეყნები, არსებობს „ა“ კლასის ქვეყნები, არსებობს „ბ“, „ც“ და ა.შ. აქედან გამომდინარე, ის, რაც მიუღებელია ბერლინში, მისაღებია თბილისში.  ამაზე ვიდეო შედარებაც გამოვაქვეყნე, ბერლინში როგორ ააფეთქეს შენობა მაშხალა და ადამიანი სისხლის სამართლებრივად დაიჭირეს და თბილისში როგორ ააფეთქეს პარლამენტის შენობა, რომელიც დაცვის უფრო მაღალი სტანდარტით სარგებლობს, ამაზე გვითხრეს, ეს არის მშვიდობიანი აქცია. ზოგიერთის თვალში სამყარო ჯერ კიდევ კატეგორიებად არის დაყოფილი, ზოგიერთი პოლიტიკური ჯგუფის ტვინებში მე-20 საუკუნის რაღაც კუდებია შემორჩენილი. გაერო-ს ქარტიისა და ადამიანის უფლებათა ევროპული დეკლარაციის არსებობის შემდეგ, ქვეყნების კატეგორიზაცია ყველას უნდა მიევიწყებინა“, – განაცხადა შალვა პაპაუშვილმა.

მისი თქმით, კარგი მაგალითია ისიც, რომ როდესაც ელჩი ესარჩლება ადამიანს, რომელიც ფიზიკურად თავს დაესხა პოლიციელს და ამბობს, მის მიმართ არანაირი დევნა არ უნდა წარმოებდეს და მეორეს მხრივ, „ადამიანზე, რომელმაც ის ვერბალურად შეაწუხა, გვეუბნება, უნდა მოხდეს სისხლის სამართლებრივი დევნაო“.

„ჩვენთან საელჩოები და დონორები არ გმობენ მათ მიერ დაფინანსებული ადამიანების თავდასხმას დეპუტატებზე. საუბარი როდესაც არის ადმინისტრაციულ დარღვევებზე, ამბობენ, რომ გადამეტებულია. მთელი ცინიზმია, რომ ელჩი ბათუმში ჩავიდა, რომ გამოსარჩლებოდა პოლიციელზე თავდამსხმელ ადამიანს და ეთქვა, ის არ უნდა დაისაჯოს. ამ დროს ბათუმში ჩასული ელჩი ვერბალურად რომ შეაწუხეს, ითხოვს სისხლის სამართლებრივ დევნას. აქ ხომ ჩანს ამ პროცესის ფარისევლობა“, – განაცხადა შალვა პაპაუშვილმა.

მისი თქმით, ქართული სახელმწიფო ყველა საკითხზე რეაგირებს.

„ის ადამიანი შინაგან საქმეთა სამინისტრო გამოკითხა, რაც მათი კომპეტენციაა. ცინიზმია, რომ ჩვენ გვიკიჟინებენ, პოლიციელზე ფიზიკურად თავდამსხმელ ადამიანს გმირად აქცევენ, გერმანიის ელჩი იჯდა პლაკატის წინ, სადაც წერია – „თავისუფლება მზიას“, ანუ გმირად გვიცხადებს პოლიციელზე თავდამსხმელს და თავად ამბობს, რომ ის ვინც ვერბალურად შეაწუხა, მოხდეს სისხლის სამართლებრივი დევნა. რეაგირება სამართალდამცავი ორგანოების პასუხისმგებლობაა. მინდა, ამის პოლიტიკური განზომილება გაჩვენოთ, თუ რამდენად უტიფარია ის ფარისევლობა, რომელსაც ხანდახან ვაწყდებით“, – განაცხადა შალვა პაპაუშვილმა.

იმედი მაქვს, ამერიკის საელჩო დადებითად უპასუხებს საქართველოს მთავრობის შეთავაზებას ქართულ-ამერიკული სტრატეგიული პარტნიორობის სუფთა ფურცლიდან და კონკრეტული გზამკვლევით განახლების შესახებ. საქართველოს ხელისუფლების თითოეული ლიდერი გამოთქვამს სრულ მზადყოფნას, ამერიკული მხარის რეალური დაინტერესების შემთხვევაში, აქტიურად ჩაერთოს ქართულ-ამერიკული ურთიერთობების გადატვირთვის პროცესში, – ვკითხულობთ „ქართული ოცნების“ საპატიო თავმჯდომარის, ბიძინა ივანიშვილის გავრცელებულ განცხადებაში, რომელიც აშშ-ს საელჩოს განცხადებას პასუხობს.

„იმდენად ვარ დაინტერესებული ქართულ-ამერიკული ურთიერთობების გადატვირთვით, ამერიკულ მხარეს ისიც კი ვაცნობე, რომ მზად ვიყავი, დაბლოკილი თანხა არა პირადი მიზნებით, არამედ მათ მიერ ნაკარნახევი ნებისმიერი დანიშნულებით დამეხარჯა, რამეთუ ფული არც მანამდე და არც ახლა არ არის ჩემი ინტერესი.

მკაფიოდ განვმარტე, რომ დაბლოკილი თანხა მიქმნის ერთი მხრივ კომპლექსს, მეორე მხრივ კი განცდას, რომ შანტაჟის ქვეშ რაიმე გადაწყვეტილება არ მივიღო. თუმცა, ამაზე არავითარი პასუხი არ მიმიღია. შესაბამისად, ჩემთვის ცხადი გახდა, რომ ბაიდენის ადმინისტრაციას არა ჩემი თანხა, არამედ მხოლოდ ამ თანხით შანტაჟი აინტერესებდა“, – წერია განცხადებაში.

მისი თქმით, ელჩს საქართველოს პრემიერ-მინისტრთან შეხვედრა შესთავაზეს, თუმცა, ელჩმა ამაზე უარი განაცხადა.

მისივე განცხადებით, საქართველოს ხელისუფლების თითოეული ლიდერი გამოთქვამს სრულ მზადყოფნას, ამერიკული მხარის რეალური დაინტერესების შემთხვევაში, აქტიურად ჩაერთოს ქართულ-ამერიკული ურთიერთობების გადატვირთვის პროცესში.

„აქვე მინდა დავაზუსტო, რომ უართან ერთად, ელჩს საქართველოს პრემიერ-მინისტრთან შეხვედრა შევთავაზეთ. პრემიერ-მინისტრი არ არის არც ფორმალური და არც არაფორმალური სანქციების ქვეშ და შესაბამისად, მას პირად შანტაჟთან დაკავშირებული ვერავითარი კომპლექსი ვერ ექნება. თუმცა, ელჩმა ამაზე უარი განაცხადა, რაც გვიმყარებს რწმენას, რომ ისინი სწორედ პერსონალურ შანტაჟს განიხილავენ წამყვან ფაქტორად ქართული მხარის მიერ სახელმწიფო ინტერესებთან დაკავშირებული პოტენციური გადაწყვეტილების მიღებისას.

შეიძლება მათ თქვან, რომ მე, როგორც მმართველი პარტიის დამფუძნებელს და საპატიო თავმჯდომარეს, მაქვს განსაკუთრებული გავლენა გადაწყვეტილებების მიღებაზე. თუმცა, ამასთან დაკავშირებით, მინდა დაგარწმუნოთ, რომ მმართველ პარტიაში არცერთი პრინციპული გადაწყვეტილება არ მიიღება გუნდის და მით უმეტეს, პრემიერ-მინისტრის ჩართულობის გარეშე. აქედან გამომდინარე, მხოლოდ ჩემთან შეხვედრის მოთხოვნას აქვს ერთადერთი ახსნა, რომ ამგვარ შეხვედრას მხოლოდ პირადი შანტაჟის ფონზე აქვს ფასი, – განაცხადა ბიძინა ივანიშვილმა.

პრეზიდენტ ტრამპის გაცხადებული მიზნები სრულად ემთხვევა იმ ხედვას, რაც ჩვენ გვაქვს. მისი გაცხადებული მიზნები იწყება აშშ-ში „დიფ სთეითის“ დამარცხების მიზნიდან, ეს არის მისი პირველი მიზანი, რომელიც მთავარ ამოცანად, მათ შორის თავისი წარმატების საზომადაც დაისახა, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პაპუაშვილის თქმით, რაც უფრო მეტად შესუსტდება „დიფ სთეითი“, მით უფრო გაძლიერდება ამერიკასა და საქართველოს შორის თანამშრომლობა.

„ამ მხრივ, ჩვენ მისი მხოლოდ გულშემატკივარი ვართ და მეტიც, ვინაიდან ვიცით, რომ რაც უფრო მეტად შესუსტდება „დიფ სთეითი“, მით უფრო გაძლიერდება ამერიკასა და საქართველოს შორის თანამშრომლობა, პირდაპირ პროპორციული იქნება „დიფ სთეითის“ შესუსტება საქართველო-ამერიკის ურთიერთობის გაუმჯობესებასთან. პრეზიდენტ ტრამპის მილოცვა დამოუკიდებლობის დღესთან დაკავშირებით პრეზიდენტ ყაველაშვილის მიმართ, ვფიქრობ, რომ არის ამის ერთ-ერთი კარგი სიგნალი“, – აღნიშნა შალვა პაპუაშვილმა.

ამერიკის შეერთებული შტატების პრეზიდენტმა, დონალდ ტრამპმა საქართველოს პრეზიდენტ მიხეილ ყაველაშვილს წერილი გაუგზავნა, რომლითაც დამოუკიდებლობის დღეს ულოცავს. წერილში, რომელიც საქართველოს პრეზიდენტის პრესსამსახურმა გაავრცელა, ტრამპი აღნიშნავს, რომ მისი ადმინისტრაცია ერთგულია, განამტკიცოს საქართველოს მთავრობასთან მშვიდობიანი და ნაყოფიერი ურთიერთობები.