თბილისის მერი კახა კალაძე, პრემიერ-მინისტრ ირაკლი კობახიძესთან, პარლამენტის თავმჯდომარე შალვა პაპუაშვილთან და საქართველოს პრეზიდენტ მიხეილ ყაველაშვილთან ერთად, 1921 წელს დაღუპულ იუნკერთა სულის მოსახსენიებელ პანაშვიდს დაესწრო.

დედაქალაქის მერმა გარდაცვლილთა ხსოვნას პატივი მიაგო და პარლამენტის სასახლეში მდებარე გმირთა მემორიალი გვირგვინით შეამკო.

„პატივს მივაგებთ იმ ახალგაზრდების ხსოვნას, რომლებმაც ყველაზე ძვირფასი – საკუთარი სიცოცხლე შესწირეს სამშობლოს დამოუკიდებლობას და თავისუფლებას. ქართველი იუნკერების გმირობა კიდევ ერთი მაგალითია იმისა, რომ ქართველი ერი არასდროს შეურიგდება ოკუპაციას, არასდროს დათმობს თავისუფლებას. მარადიული ხსოვნა იყოს 1921 წლის თებერვალში, საბჭოთა რუსეთის წითელი არმიის წინააღმდეგ ბრძოლაში დაღუპული იუნკერების“, – განაცხადა კახა კალაძემ.

23 თებერვალს საქართველოში იუნკერთა ხსოვნის დღე აღინიშნება. დაღუპულთა სულის მოსახსენიებელი პანაშვიდი პარლამენტის სასახლეში მდებარე ხარების სახელობის სამლოცველოში აღევლინა.

ვფიქრობ, დღეს ბრიუსელს უფრო მეტი საფიქრალი უნდა ჰქონდეს, ვიდრე იმ ცრუ ნარატივებზე მსჯელობა, – ამის შესახებ პარლამენტის თავმჯდომარე, შალვა პაპუაშვილმა ჟურნალისტებს განუცხადა.

როგორც პაპუაშვილმა აღნიშნა, ეროვნულ ინტერესებზე მაღლა არაფერი უნდა დადგეს,რადგან საქმე საქმეზე რომ მიდგება და დაგჭირდება, აღმოჩნდება, რომ პარტნიორებს სოციალურ ქსელში დაწერილი „პოსტის“ გარდა, სხვა არაფერი აქვთ.

„ვხედავთ, რა ხდება უკრაინაში. ვხედავთ, როგორი უსუსური აღმოჩნდნენ ის მთავრობები, რომელიც აქამდე აქეზებდნენ უკრაინას, ეტყოდნენ: „ბოლომდე თქვენ ერთად ვართო“ და როგორ ბოლომდე არიან, ხომ გამოჩნდა ახლა?! ამიტომ, ერთ რამეს ვისურვებდი, ნაცვლად საქართველოს და ქართველი ხალხის წინააღმდეგ ცრუ ნარატივების გავრცელებისა და ამაზე მსჯელობისა, დემოკრატიის და ხალხის ნების უარყოფისა, იმ საკითხით დაკავდნენ, რომელიც სინამდვილეში, ზუსტად მათი საფიქრალი არის. უკრაინელი ხალხის წინაშე ევროკავშირის ყველა დედაქალაქი არის ვალში. ამ ვალს გადახდა უნდა და არა ისე, რომ ახლა დაიმალონ და რაღაც საკითხებზე იმსჯელონ“, – განაცხადა პაპუაშვილმა.

პარლამენტის თავმჯდომარის განმარტებით, „საუბარია სამშვიდობო მოლაპარაკებებზე და თავისი ადგილი ვერ უპოვია ევროკავშირის დედაქალაქების წარმომადგენლებს“.

„აღმოჩნდა, რომ ერთადერთი, რაშიც ისინი მაგრები ყოფილან, ეს არის სხვისი წაქეზება ქმედებებზე და საქმე საქმეზე რომ მიდგება, აღმოჩნდა, რომ ზურგის გამაგრება არ შეუძლიათ. შეგახსენებთ, იგივე ხალხი ჩვენც გვაქეზებდა, რომ რუსეთთან ესკალაციაზე წავსულიყავით. ეს ხდებოდა დახურულ კარს მიღმა და მოწოდებებით და შემდეგ, ეს ყველაფერი ევროპარლამენტის რეზოლუციაშიც აისახა.საქმე საქმეზე რომ მიდგებოდა, რა გვექნებოდა, „ტვიტზე“ განცხადება, როგორც ეს ევროკავშირის საგარეო საქმეთა სამინისტროს უმაღლესმა წარმომადგენელმა გააკეთა? “,- განაცხადა პაპუაშვილმა.

პარლამენტის თავმჯდომარის თქმით, სწორედ ამას უხსნიდნენ ისინი პარტნიორებს,რომ „მეტი პასუხისმგებლობით მოჰკიდებოდნენ ამ საკითხს“.

„ის ხალხი ან აღარ არის თანამდებობაზე, ან თბილი ოთახიდან აკვირდება ამ მოვლენებს. აღმოჩნდა, რომ ერთადერთი, რაც შეუძლიათ, კვლავ სოციალური ქსელით გაამხნეონ ესა თუ ის საზოგადოება თუ ხელისუფლება. ვფიქრობ, ამან ჩვენი საზოგადოების ყველა წევრი უნდა დააფიქროს, რომ არაფერი არ უნდა დააყენო შენს ეროვნულ ინტერესზე მაღლა. არავის ინტერესი, არავის ტკბილი სიტყვა, არავის თხოვნა-მუდარა არ არის ეროვნულ ინტერესებზე მაღლა არ უნდა დადგეს იმიტომ,რომ საქმე საქმეზე რომ მიდგება და ვიღაცის ანგარიშის გაწევისთვის რაღაცას გააკეთებ, როცა დაგჭირდება, აღმოჩნდება, რომ სოციალურ ქსელში დაწერილი პოსტის გარდა, სხვა არაფერი აქვთ. როგორც აღმოჩნდა, ყველაფერი სესხი იყო. დახმარება, ტაშის კვრა და წითელი ხალიჩები, ამ ყველაფრის დიდ ნაწილი სესხი იყო, რომლის გადახდა ახლა ომგამოვლილს ხალხს მოუწევს“,-განაცხადა პაპუაშვილმა.

თუ ვინმეს უნდა რეიტინგის შემოწმება, ზუსტად 5 თვეში, საქართველოს პრეზიდენტი მიხეილ ყაველაშვილი ჩემთან ერთად დანიშნავს ადგილობრივი თვითმმართველობის არჩევნებს და ყველას შეუძლია გატესტოს საკუთარი რეიტინგი ამ არჩევნებში, – განუცხადა პრემიერ-მინისტრმა ირაკლი კობახიძემ ჟურნალისტებს.

კითხვაზე, თუ რატომ არ ნიშნავს ხელახალ არჩევნებს „ქართული ოცნება“ იმ ფონზე, როდესაც საკუთარ გამარჯვებაში დარწმუნებულია, მთავრობის მეთაურმა აღნიშნა, რომ ეს სულელური აზრია, რომელიც მოსდით პოლიტიკოსებს.

„ასეთი სულელური აზრი მოსდით პოლიტიკოსებს, თუმცა ეს მათი უფლებაა, დემოკრატიაა საქართველოში, ადამიანებს აქვთ უფლება, ჰქონდეთ სულელური აზრებიც. რაც შეეხება რეიტინგებს, თუ ვინმეს უნდა რეიტინგის შემოწმება, ზუსტად 5 თვეში, საქართველოს პრეზიდენტი მიხეილ ყაველაშვილი ჩემთან ერთად დანიშნავს ადგილობრივი თვითმმართველობის არჩევნებს და ყველას შეუძლია გატესტოს საკუთარი რეიტინგი ამ არჩევნებში,“- განაცხადა პრემიერმა.

ჩვენ გვჭირდება ჩვენი ქვეყნის უსაფრთხოების დაცვა, მათ შორის, კანონმდებლობით და ამას ემსახურება თითოეული ის კანონპროექტი, რომელიც დაინიცირდა პარლამენტში, ეს ეხება, მათ შორის, „გამჭვირვალობის შესახებ” კანონს, სადაც კიდევ უფრო მეტი სიმკვეთრეა საჭირო, – ამის შესახებ პრემიერ-მინისტრმა ირაკლი კობახიძემ ჟურნალისტებს განუცხადა.

პრემიერის თქმით, თითოეული დაინიცირებული კანონპროექტი ერთად წარმოადგენს „დიფ სთეითის” საწინააღმდეგო პაკეტს, რათა ბოლომდე იყოს დაცული ქვეყნის ეროვნული უსაფრთხოება.

„ეს არის, სინამდვილეში, „დიფ სთეითის” საწინააღმდეგო პაკეტი, ჩვენ გვჭირდება ჩვენი ქვეყნის უსაფრთხოების დაცვა, მათ შორის, კანონმდებლობით და ამას ემსახურება თითოეული ის კანონპროექტი, რომელიც დაინიცირდა პარლამენტში, ეს ეხება, მათ შორის, „გამჭვირვალობის შესახებ” კანონს, სადაც კიდევ უფრო მეტი სიმკვეთრეა საჭირო იმისათვის, რომ ბოლომდე იყოს დაცული ჩვენი ქვეყნის ეროვნული უსაფრთხოება და იგივე ეხება სხვა ნებისმიერ კანონპროექტს, რომელიც დაინიცირდა საქართველოს პარლამენტში. ჩვენ ყოველგვარი საფრთხისგან უნდა დავიცვათ ჩვენი ქვეყანა, ამისათვის დღეს გვაქვს ყველანაირი რესურსი და ამისათვის იქნება მიღებული ის კანონები, რომელიცაა დაინიცირებული,”- განაცხადა პრემიერმა.

ტრამპის გამარჯვებამ შეცვალა სიტუაცია, თითქოს სხვებისთვისაც შეიძლება მოულოდნელი ყოფილიყო, რომ პირდაპირ აღიარა USAID-ისა და NED-ის, ამ არასამთავრობო ორგანიზაციების, პირდაპირ ვიტყვი, მავნებლური ქმედებები სხვადასხვა ქვეყანაში, – განაცხადა საქართველოს პრეზიდენტმა, მიხეილ ყაველაშვილმა აზერბაიჯანულ ტელეკომპანიასთან ექსკლუზიურ ინტერვიუში.

მისი თქმით, დაინტერესება ჯერჯერობით კიდევ არის ამ ძალების მხრიდან, თუმცა ეს პროცესი მილევადია.

„კრიტიკულად ვიყავით განწყობილი არასამთავრობო ორგანიზაციების, კერძოდ, USAID-სა და NED-ის მიმართ, რომლებიც პირდაპირ აფინანსებდნენ და ვთხოვდით, გამჭვირვალე ყოფილიყო, პოლიტიკური პარტიების და გარკვეული ჯგუფების დაფინანსება. აქაც თანხვედრაა. დიახ, რა თქმა უნდა, ტრამპის გამარჯვებამ და ტრამპის მოსვლამ შეცვალა ეს სიტუაცია. თითქოს სხვებისთვისაც შეიძლება მოულოდნელი ყოფილიყო, რომ პირდაპირ აღიარა USAID-ის და NED-ის, ამ არასამთავრობო ორგანიზაციების, პირდაპირ ვიტყვი, რომ მავნებლური ქმედებები სხვადასხვა ქვეყანაში. ჩვენ ამაზე წინასწარ ვსაუბრობდით. დაინტერესება ჯერჯერობით კიდევ არის ამ ძალების მხრიდან, თუმცა ეს პროცესი მილევადია. უკვე ყველაფერი ზედაპირზეა და რა თქმა უნდა, მათ არ შესწევთ ძალა, რომ რამე მავნე ზეგავლენა მოახდინონ ჩვენს ქვეყანაზე“, – განაცხადა ყაველაშვილმა.