რაც უნდა გვერდიდან შემოგვაპარონ მელია, გვარამია, ხაზარაძე, გახარია, ქართული საზოგადოება არც მოღალატეს დაუშვებს ხელისუფლებაში, არც ვითომ განდგომილ „ნაცს“, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.

მდინარაძის თქმით, მათი მიზანია ხელისუფლების ხელში ჩაგდება და ქვეყნის არევა, უცხოეთიდან მიღებული დავალებების შესრულება.

„მელიაც „ნაცია“ და გვარამიაც, მაგრამ ერთად რომ იქნებიან, შეიძლება, აღარ იყონ „ნაცები“. მათი მიზანია „ნაცი“ ხელისუფლებაში, ქართველი ხალხის მიზანია არცერთი „ნაცი“ ხელისუფლებაში. მათი მიზანია ხელისუფლების ხელში ჩაგდება და ამ ქვეყნის არევა, მეორე ფრონტი, ქაოსი და უცხოელების, სხვა ქვეყნებიდან მიღებული დავალებების შესრულება. აგენტების მიზანი ზოგადად ეს არის. აქედან გამომდინარე, ქართველები ამას არ დავუშვებთ, გამორიცხულია, ქართული საზოგადოება ამას არ დაუშვებს. რაც არ უნდა გვერდიდან შემოგვაპარონ მელია, გვარამია, ხაზარაძე, გახარია, ქართული საზოგადოება არც მოღალატეს დაუშვებს ხელისუფლებაში, არც ვითომ განდგომილ „ნაცს“, რამდენადაც არ უნდა დაიშალონ. ისინი ახლა ცდილობენ იმ 20 პროცენტს გარეთ გამოსვლას, რაც რეალურად, სამწუხაროდ, ამ ქვეყანაში „ნაცმოძრაობის“ მიმართ მხარდაჭერაა და დანარჩენ 20 პროცენტზე მუშაობას, მაგრამ „ნაცი“ „ნაცია“, კაცი კაცია და ქალი ქალია. ესენი ვერ მიხვდნენ, რომ ეს ასეა. ვერ წარმოიდგინეს, რომ „ნაცის“ განნაცება არის ურთულესი ფსიქომოვლენა, ასეთი ფსიქიკის ადამიანები და ასეთი ფსიქოლოგიური ტერორის მსხვერპლი ობიექტები საქართველოში არ ცხოვრობენ, რომ „ნაცი“ არანაცად მიიღონ“, – აღნიშნა მამუკა მდინარაძემ.

საგარეო უწყებაში ევროკავშირისა და გერმანიის ელჩები ბრძანდებოდნენ, სადაც მათ ოფიციალურად გადაეცათ, საქართველოს მთავრობის შეშფოთება, – ამის შესახებ, „ხალხის ძალის“ წევრი ზურაბ ქადაგიძე სოციალურ ქსელში წერს.

მისი თქმით, ზოგიერთი ევროპელი დეპუტატი ღიად, დაუფარავად ცდილობს ქართული სახელმწიფო ინსტიტუტების დისკრედიტაციას და სუვერენიტეტის შეურაცხყოფას, რაც მათ გამოსვლებში გამოიხატება.

„არ არის საკმარისი, დიპლომატთა ზედაპირული განმარტებები და საჭიროა, მკაფიო დამოკიდებულება.

უკრაინის ხელისუფლება რომ „სპეკულაციურ“ კამპანიაშია ჩართული საქართველოს წინააღმდეგ და სწორედ, ამ კამპანიის ნაწილია ადეიშვილის ევროპული ვოიაჟები გასაგებია, თუმცა „ბუნდესტაგმაც” და ევროპელმა ლიდერებმაც უნდა გააცნობიერონ ის საფრთხე, რაც საქართველოში ძებნილი კრიმინალის მიღებასა და მაღალი დონის შეხვედრებში მონაწილეობას შეიძლება მოჰყვეს ანტიევროპული განწყობების ხელშეწყობა.

ისიც გასაგებია, რომ ზოგიერთი ევროპელი დეპუტატი ღიად, დაუფარავად ცდილობს ქართული სახელმწიფო ინსტიტუტების დისკრედიტაციას და სუვერენიტეტის შეურაცხყოფას, რაც მათ გამოსვლებში გამოიხატება ხოლმე, თუმცა ამ დროს საჭიროა, მკაფიოდ გაემიჯნოს ევროკავშირის ელჩი და არ დატოვოს სივრცე ინსინუაციებისთვის!“ – წერს ქადაგიძე.

მე ნებისმიერი რამის დათმობისთვის ვარ თანახმა გამარჯვების სანაცვლოდ, მაგრამ ეს ვერ იქნება მხოლოდ ჩვენი ინიციატივა. ჩვენ არავის მოგიწოდებთ, რომ შემოგვიერთდეთ, ჩვენ გთავაზობთ, გავერთიანდეთ! მე არ ვარ შემოერთებისტი, მე გაერთიანებისტი ვარ და ამას გთავაზობთ, – ამის შესახებ ნიკა გვარამიმ მისი და ნიკა მელაის პოლიტიკური გაერთიანებასთან დაკავშირებით განაცხადა.

როგორც გვარამიამ აღნიშნა, გაერთიანების შესაძლებელია ბიძინა ივანიშვილის რეჟიმის დამარცხებას და საქართველოს წაყვანა წინ, მომავლისკენ.

„ეს არ არის პარტიის პრეზენტაცია, ეს არის ჩვენი გადაწყვეტილება, რომ დავიწყოთ ერთად, დავიწყოთ სიახლით, დავიწყოთ შემდგომი გაერთიანებების სურვილით და მე გულმხურვალე მომხრე ვარ დიდი გაერთიანებების, მე ნებისმიერი რამის დათმობისთვის ვარ თანახმა გამარჯვების სანაცვლოდ, მაგრამ ეს ვერ იქნება მხოლოდ ჩვენი ინიციატივა. ჩვენ არავის მოგიწოდებთ, რომ შემოგვიერთდეთ, ჩვენ გთავაზობთ, გავერთდიანდეთ! მე არ ვარ შემოერთებისტი, მე გაერთიანებისტი ვარ და ამას გთავაზობთ. ჩვენ უნდა დავამარცხოთ, პირველ რიგში, საკუთარი თავი ჩვენს ამბიციებში, საკუთარი თავის მოწონება მთელ ამ პროცესში და ამის შემდეგ, გაერთიანების შემდეგ ჩვენ შევძლებთ ბიძინა ივანიშვილის რეჟიმის დამარცხებას და საქართველოს წაყვანას, როგორც ნიკა[მელია]ამბობს, წინ, მომავლისკენ. არანაირი წარსული, საუბარი მხოლოდ მომავალზე და ჩვენ წარმატებებზე!“-განაცხადა ნიკა გვარამიამ.

მისი თქმით, ლოგო, რომელიც პრეზენტაციაზე წარმოადგინეს კარგად აჩვენებს, მისი და ნიკა მელიას გაერთიანებას, ჰარმონიულ და სინქრონულ მოქმედებას.

„ერთ-ერთი მთავარი,რაც ჩვენ გვაქვს, ეს არის ნომერი 4 რომელიც ხდება ახალი სიმბოლო, ახალი ნომერი გამარჯვების, ახალი ნომერი წარმატების, ახალი ნომერი უკან დახევაზე უარის, ახალი ნომერი კვალიფიციური შეთავაზებების, შინაარსზე ლაპარაკის, ახალი ნომერი, რომელიც მიდის წინ, მომავლისკენ“, – განაცხადა ნიკა გვარამიამ.

ნიკა მელიას და ნიკა გვარამიას პარტიები ერთიანდებიან. შესაბამისად, არჩევნებში მონაწილეობას ერთი საარჩევნო ნომრით მიიღებენ.

მათი საარჩევნო ნომერი “4” იქნება.

როგორც ნიკა გვარამიამ აღნიშნა, იციან, როგორ უნდა დაძლიონ სირთულეები და უპასუხონ გამოწვევებს.

„ჩვენი პარტია არის „ახალი“. ჩვენ ვართ ერთად და ვიბრძვით საქართველოში ახალი გზებით ცვლილებისთვის. ჩვენ შევცვლით, იმიტომ, რომ ჩვენ ვიცით ბრძოლა, ჩვენ ვიცით, რა ფასი აქვს მოუსყიდაობას, ვიცით, რა ფასი აქვს სამშობლოს მსახურებას, ჩვენ ვიცით, როგორ დავძლიოთ სირთულეები და როგორ ვუპასუხოთ გამოწვევებს. ჩვენ ეს ვიცით, ჩვენ შევცვლით, მაგრამ ჩვენ ასევე ვიცით, როგორ ვმართოთ და ჩვენ გავაგრძელებთ ამ ქვეყნის ისტორიას წარმატებული ხელისუფლებით, წარმატებული ნაბიჯებით და ევროინტეგრაციით. ეს არის ჩვენი გადაწყვეტილება, ეს არის ჩვენი ამოცანა, ეს არის ჩვენი მიზანი და ჩვენ ამ მიზანს თქვენთან ერთად აუცილებლად მივაღწევთ“, – განაცხადა ნიკა გვარამიამ.

მაინტერესებს ირაკლი კობახიძისგან და მთლიანად ივანიშვილის პარტიისგან პასუხი, რა შექმენით ისეთი, რა გააკეთეთ ისეთი, რომ საქართველოში ყველაზე ძვირია ფასები? ადამიანების შემოსავლები იკლებს და დანახარჯები იმატებს, – ამის შესახებ პარტია „სტრატეგია აღმაშენებლის“ ლიდერმა, გიორგი ვაშაძემ განაცხადა.

მისი თქმით, ხელისუფლების წარმომადგენლები რეალობას მოწყვეტილები არიან.

„მინდა ირაკლი კობახიძეს მივმართო, როგორ შეგიძლია, რომ კმაყოფილი იყო დღევანდელი ეკონომიკური მდგომარეობით? როგორ არ გრცხვენია და საუბრობ, რომ ყველაფერი კარგად არის თურმე ქვეყანაში, რომ ეკონომიკა ყვავის. ხომ არ ფიქრობ, რომ ბოლომდე მოწყვეტილი ხარ რეალობას? ირაკლი კობახიძე და ივანიშვილის პარტიას მინდა დავუსვა კითხვა. თუ ეკონომიკა კარგად არის, მაშინ ხალხი ქვეყნიდან რატომ გარბის? რატომ წავიდა 800 000-ზე მეტი ჩვენი მოქალაქე ქვეყნიდან? რატომ არის საქართველოში ყველაზე ძვირი ფასები მთელს რეგიონში: სომხეთზე, აზერბაიჯანზე, თურქეთზე? ნებისმიერ ქვეყანაზე ძვირი ფასები რატომ არის? რატომ შიმშილობენ ბავშვები სკოლებში? კითხვას გისვამთ, რატომ უწევს პენსიონერს არჩევანის გაკეთება წამალსა და საკვებს შორის? ამ კითხვებზე რატომ არ სცემთ პასუხს? რატომ ხართ ორიენტირებულები მხოლოდ სიცრუეზე, სიყალბეზე? მოწყვეტილი ხართ აბსოლუტურად რეალობას.

მაინტერესებს ირაკლი კობახიძისგან და მთლიანად ივანიშვილის პარტიისგან პასუხი, რა შექმენით ისეთი? რა გააკეთეთ ისეთი, რომ საქართველოში ყველაზე ძვირია ფასები? რომ ადამიანების შემოსავლები იკლებს და დანახარჯები იმატებს. იმ მაფიოზური „კლანის“ ბრალი ხომ არ არის მონოპოლიების სახით, რომელიც ააგეთ და ეს ფული ჯიბით-ჯიბეში, რომ მიგაქვთ? ამ კითხვებს თქვენ პასუხი გაეცით. როგორ შეგიძლიათ, რომ ხალხს უბრალოდ დასცინოთ. ირაკლი კობახიძეს ვეუბნები, თურმე ბაზარში სიარული ყოფილა სირცხვილი და ფასების გარკვევა ყოფილა თურმე სირცხვილი. როდემდე უნდა იყოთ აცდენილი რეალობას? ერთხელ მაინც ხომ უნდა გაიაზროთ და გაითვალისწინოთ ადამიანების ყოველდღიური ცხოვრება ქვეყანაში. არის კითხვები, რომელიც აქვს ხალხს თქვენთან და ამ კითხვებს პასუხი გაეცით. იმ ივანიშვილსაც მივმართავ დამალული რომ არის ახლა. გეკითხები – შენ რომ მდიდრდები ხალხი რატომ ღარიბდება? ფასები ასეთი ძვირი რატომ არის ქვეყანაში? როდემდე უნდა ძარცვოთ ეს ქვეყანა? როდემდე უნდა იყოთ აცდენილი აბსოლუტურად რეალობას? აი, ამ კითხვებზე გაეცით პასუხი! ეს კმაყოფილება, რომელიც თქვენ სახეზე გაქვთ, ეგ კმაყოფილება ქართულ საზოგადოებაში სამწუხაროდ არ არის, იმიტომ, რომ ადამიანებს უმუშევრობის, ფასების ზრდის, შემოსავლების შემცირების გამო ყოველდღიურად უწევთ ქვეყნის დატოვება“, – განაცხადა ვაშაძემ.

გადაწყვეტილება არის თქვენზე. ჩვენ გვჭირდება ახალი საქართველო, -ამის შესახებ “მთავარი არხის” ყოფილმა ხელმძღვანელმა, ნიკა გვარამიამ მისი და ნიკა მელიას პოლიტიკური გუნდის წარდგენამდე განაცხადა.

ამასთან, როგორც თავის მხრივ, “ნაციონალური მოძრაობის” ყოფილმა თავმჯდომარე ნიკა მელიამ აღნიშნა, მათი ახალი პოლიტიკური გუნდის ჩამოყალიბების საკითხზე მსჯელობა 3 თვე მიმდინარეობდა.

“ვიცი, რომ ათიათასობით ძალიან აქტიური ამომრჩეველი, სხვადასხვა გემოვნების, დღემდე ელოდება საბოლოო გადაწყვეტილებას. შესაძლებელია, ეს ყველაფერი ადვილად პროგნოზირებადია მათთვისაც, თუ რა იქნება გამოცხადებული, მაგრამ სანამ საბოლოო გადაწყვეტილება არ არის ცნობილი, ბუნებრივია, მათ ეს მოლოდინი აქვთ. ეს ის ხალხია, ვინც ჩვენ გვიკარნახა, რომ დღევანდელ დღემდე მოვსულიყავით. ამ დრომდე იყო რთული გზა, რომელიც გამოვიარეთ. 3 თვე მიმდინარეობდა საუბრები, მოლაპარაკებები. ჩვენი თვითმიზანი არ ყოფილა ერთობა, ადამიანური ურთიერთობა, მეგობრული ურთიერთობა ისედაც გვქონდა და გვექნებოდა, უბრალოდ, გამოვდიოდით იმ მდგომარეობიდან, რომელიც ქვეყანაშია შექმნილი. გვინდოდა დავრწმუნებულიყავით, რომ ჩვენი ორი გუნდის გაერთიანებას ექნებოდა ენერგია და ოქროს გასაღები მძიმე ფონის, ნიჰილიზმის გარღვევაში. დღეს თუ რამე არის დასამარცხებელი, ეს არის ნიჰილიზმი და უიმედობა. დღეს თუ რამე გვჭირდება, ეს არის გამარჯვების რწმენა. დავიჯეროთ, რომ გამარჯვება შესაძლებელი არის. არ არის აუცილებელი ფული, რომ მანკიერება დაამარცხო. მჯერა, რომ ჩვენ ამის გვჯერა. მიხარია, რომ დღევანდელი დღე დადგა”, – განაცხადა მელიამ.

საპარლამენტო უმრავლესობის წევრის, ირაკლი ზარქუას შეფასებით, ოპოზიციის წარმომადგენლები აქცენტირებული იქნებიან იმაზე, რომ რამენაირად შეაკოწიწონ 15-20 პროცენტი, რომელიც პატარა პარტიებს აქვთ.

ზარქუას განმარტებით, მმართველ პარტიას 60%-მდე მხარდაჭერა აქვს და ემზადება იმისთვის, რომ დამაჯერებლად და ღირსებით მოიპოვოს საკონსტიტუციო უმრავლესობა.

ირაკლი ზარქუა მიიჩნევს, რომ საკონსტიტუციო უმრავლესობის მოპოვების ყველანაირი შესაძლებლობა არსებობს, მათ შორის რეიტინგებიც ამას ადასტურებენ.

„ჩვენ ზუსტად ვიცით, რომ ვიდრე „ქართული ოცნება“ იქნება ხელისუფლებაში, ჩვენს ქვეყანას არც ომში ჩართვა მოუწევს, არც ეკონომიკური პრობლემები ექნება, პირიქით, აქცენტირებას გავაკეთებთ ეკონომიკის ზრდაზე, რეფორმებიც გაგრძელდება. რაც მთავარია, ლგბტ პროპაგანდასაც ყოველთვის წინ აღვუდგებით. იქნება სახელმწიფო, რომელიც დაიცავს თითოეული ქართველის ინტერესებს და ამ მიმართულებით გავაგრძელებთ განვითარებას“, – აღნიშნა ირაკლი ზარქუამ.