ნებისმიერი სახის იმუნიტეტი, რომელიც ექნება ანტიკორუფციული ბიუროს უფროსს, რა თქმა უნდა, ვერ განაპირობებს მის დამოუკიდებლობას – ცვლილებები, რომელიც საქართველოს ხელისუფლებამ წარმოადგინა, ფასადურია, – ამის შესახებ „ევროოპტიმისტების“ დეპუტატმა, ხატია დეკანოიძემ ჟურნალისტებთან საუბრისას განაცხადა.

მისივე თქმით, ანტიკორუფციული ბიუროს დამოუკიდებლობას განაპირობებს გამჭვირვალე კონკურსით შერჩეული უფროსი და ამასთან, ბიუროსთვის საგამოძიებო ორგანოს დამატება.

მან ასევე NDI-ის ანგარიშთან დაკავშირებით ისაუბრა და აღნიშნა, რომ „ქართულ ოცნებას“ არც ეტყობა პოლიტიკური ნება, რომ „გამოასწოროს ძალიან მწვავე შეფასებებში ჩაწერილი რეკომენდაციები“.

„საერთაშორისო სადამკვირვებლო მისიის პირველი შეფასება არის უარყოფითი. თუ ასე გაგრძელდება უარყოფითად წინასაარჩევნო გარემოს შეფასება, რა თქმა უნდა, ეს ძალიან დიდ გავლენას მოახდენს არჩევნების დღეზე,“ – აღნიშნა დეკანოიძემ.

გარდა ამისა, მან რუსეთის სავარაუდო გავლენებზე ისაუბრა და განაცხადა რომ „ქართული ოცნება“ რუსეთის მიერ ღიად მხარდაჭერილი პარტიაა.

„რუსეთის პირდაპირი ინტერესია, რომ „ქართულმა ოცნებამ“ მოიგოს არჩევნები. მე ვთვლი, რომ სხვა ფარული ჩარევის მცდელობები რუსეთს არ აქვს, ერთადერთი რუსეთს რაც უნდა ის არის, რომ ბიძინა ივანიშვილი დარჩეს მმართველობაში. ამიტომ გასაგებია, უკვე რომ ეს არის ღია პრორუსული ინტერესები საქართველოში. საქართველოს არჩევნებში რუსეთის და პუტინის ინტერესი არ არის პროდასავლური ძალების კოალიციის გამარჯვება. მათი ინტერესია ოლიგარქი ბიძინა ივანიშვილი „ქართულ ოცნებასთან“ ერთად დარჩეს მმართველობაში,“ – განაცხადა ხატია დეკანოიძემ.

სალომე ზურაბიშვილთან ქვეყნის ევროპული მომავლის ფარგლებში პრეზიდენტ სააკაშვილის თავისუფლებაზე ვისაუბრეთ, არ მივცემ თავს უფლებას, პრეზიდენტის ნაცვლად გავაკეთო განმარტებები მის განწყობაზე, – ამის შესახებ „ნაციონალური მოძრაობის“ წევრმა, თინა ბოკუჩავამ პრეზიდენტ სალომე ზურაბიშვილთან შეხვედრის შემდეგ განაცხადა.

„პოლიტიკურ პარტიებთან პრეზიდენტის ინიციატივით გაიმართა შეხვედრები ევროპულ დღის წესრიგზე და იმ ცხრა დათქმაზე, რომელიც საქართველომ უნდა შეასრულოს. ამ თვალსაზრისით „ერთიან ნაციონალურ მოძრაობას“ აქვს კონკრეტული ხედვები და კონკრეტული პროექტები, რომელი ასევე გავუზიარეთ პრეზიდენტს. ამ ცხრა დათქმის მნიშვნელოვანი ნაწილია ასევე პრეზიდენტ სააკაშვილის თავისუფლება. ეს უკავშირდება სასამართლო რეფორმას, საარჩევნო პროცესს, დეპოლარიზაციას და პოლიტიკური პროცესების ნორმალიზაციას. ამიტომ, რა თქმა უნდა, სწორედ ქვეყნის ევროპული მომავლის და დღის წესრიგის ფარგლებში ვისაუბრეთ პრეზიდენტი სააკაშვილის თავისუფლებაზე.

ჩვენი მხრიდან ეს საკითხი ძალიან პრინციპულია. ეს არის ჩვენი ქვეყნის ევროპული მომავლის საკითხი და არა მხოლოდ პიროვნული ან პარტიული საკითხი. მაგრამ არ მივცემ ჩემ თავს უფლებას, პრეზიდენტის ნაცვლად გავაკეთო განმარტებები მის განწყობაზე“,- განაცხადა ბოკუჩავამ.

„ფეისბუქის“ მფლობელი კომპანია „მეტა“ ჩამოაყალიბებს ჯგუფს დეზინფორმაციასა და ხელოვნური ინტელექტის ბოროტად გამოყენების წინააღმდეგ საბრძოლველად ივნისში დაგეგმილი ევროპარლამენტის არჩევნების წინ. ამის შესახებ „როიტერი“ იუწყება.

როგორც მედია წერს, გენერაციული ხელოვნური ინტელექტის სწრაფმა განვითარებამ და მისმა უნარმა, წამებში შექმნას ტექსტი, გამოსახულება ან ვიდეო, გააძლიერა საფრთხე, რომ ახალი ტექნოლოგია შესაძლოა, გამოყენებული იქნას არჩევნებში ხელის შეშლისთვის.

„არჩევნების მოახლოებასთან ერთად, ჩვენ გავააქტიურებთ არჩევნების ოპერაციულ ცენტრს პოტენციური საფრთხეების იდენტიფიცირებისთვის და რეალური დროის რეჟიმში მათ შესამსუბუქებლად ზომების მისაღებად“, – აღნიშნულია „მეტას“ ევროკავშირის საკითხთა განყოფილების ხელმძღვანელის მარკო პანჩინის განცხადებაში.

მისი თქმით, კომპანიის დაზვერვის, მონაცემთა დამუშავების, ინჟინერიის, კვლევების, ოპერაციების, კონტენტის პოლიტიკისა და იურიდიული განყოფილებებიდან ექსპერტები ძალისხმევას მიმართავენ დეზინფორმაციის, გავლენის ოპერაციების და ხელოვნური ინტელექტის ბოროტად გამოყენების რისკების წინააღმდეგ საბრძოლველად.

როგორც მედია წერს, „მეტა“, რომელიც ამჟამად თანამშრომლობს ევროკავშირში ფაქტების გადამოწმებაზე მომუშავე 26 ორგანიზაციასთან, დაამატებს სამ ახალ პარტნიორ ორგანიზაციას ბულგარეთში, საფრანგეთსა და სლოვაკეთში.

ევროპარლამენტის არჩევნები 6-9 ივნისს გაიმართება. „მეტა“, „მაიკროსოფტი“, OpenAI და კიდევ 17 ტექნოლოგიური კომპანია მიმდინარე თვეში შეთანხმდნენ, ერთად იმუშაონ, რათა აღკვეთონ მიმდინარე წელს მსოფლიოში დაგეგმილ არჩევნებში ხელოვნური ინტელექტის მიერ შექმნილი შეცდომაში შემყვანი მასალების ჩარევა.

ჩვენ, ევროკავშირი, არ ვერევით არჩევნებში, არ ვუჭერთ მხარს რომელიმე კონკრეტულ პოლიტიკურ პარტიას საქართველოში, მაგრამ ის, რასაც ჩვენ აშკარად ვუჭერთ მხარს, არის არის თავისუფალი და სამართლიანი არჩევნები, – ამის შესახებ საქართველოში ევროკავშირის ელჩმა, პაველ ჰერჩინსკიმ ჟურნალისტებს განუცხადა.

მისი თქმით, ევროკავშირი მხარს უჭერს თავისუფალ და სამართლიან საარჩევნო პროცესს, რომელშიც ყველა პოლიტიკურ პარტიას ექნება შესაძლებლობა, საკუთარი საარჩევნო პროგრამა წარადგინოს.

„მხარს ვუჭერთ თავისუფალ და სამართლიან საარჩევნო პროცესს, რომელშიც ყველა პოლიტიკურ პარტიას საქართველოში ექნება შესაძლებლობა წარადგინოს საკუთარი საარჩევნო პროგრამა, იბრძოლოს ამომრჩევლებისთვის, რათა მომავალი პარლამენტი ძალიან კარგად წარმოაჩენდეს საქართველოს მოსახლეობის აზრთა სხვადასხვაობას“, – აღნიშნა ელჩმა.

რადიკალურ ოპოზიციას, კოლექტიურ „ნაცებს“ ნინო ლომჯარიას პირით მოუწიათ ძალიან დიდი და შეიძლება ითქვას, ისტორიული აღიარების გაკეთება იმის შესახებ, რომ „ნაცმოძრაობის“ გარდა რადიკალური ოპოზიციის ვერცერთი წარმომადგენელი პარტია საარჩევნო ბარიერს ვერ ლახავს, – განაცხადა საპარლამენტო უმრავლესობის ლიდერმა, მამუკა მდინარაძემ.

„ქართული ოცნების“ აღმასრულებელმა მდივანმა ჟურნალისტის კითხვას უპასუხა, რომელიც ნინო ლომჯარიას ფეისბუქ-სტატუსს ეხებოდა, სადაც ლომჯარია პოლიტიკური პარტიების გაერთიანებაზე წერს და აღნიშნავს, რომ
„თუ 5%-იან ბარიერთან შორიახლოს მყოფი ოპოზიციური პარტიები გადაწყვეტენ, რომ არჩევნებში ცალ-ცალკე იყარონ კენჭი, მაღალია რისკი იმისა, რომ ისინი პარლამენტს გარეთ დარჩნენ, ხოლო მათი ოპოზიციურად განწყობილი ხმებს ჯამი, რომელმაც 20%-მდეც შეიძლება მიაღწიოს, ბარიერ გადალახულ პარტიებზე გადანაწილდება“.

როგორც მდინარაძემ აღნიშნა, „სწორედ ამ შემთხვევაში, შეიძლება ძალიან ბევრი ხმა პროპორციულად გადანაწილდეს, მათ შორის, „ქართულ ოცნებაზე“, რომელიც აუცილებლად პირველ ადგილზე გავა“.

საპარლამენტო უმრავლესობის თქმით, ამით ისინი აღიარებენ, რომ ყველა დანარჩენი პარტია იმდენად ურეიტინგოა, რომ 5%-იან ბარიერს ვერცერთი უახლოვდება.

„რადგან ისინი [ოპოზიცია] აღიარებენ, რომ გადაუნაწილებელი ხმები თუ მანდატები იქნება ძალიან ბევრი, ე.ი აღიარებენ, რომ დანარჩენი ყველა პარტია იმდენად ურეიტინგოა, რომ ვერცერთი მათგანი უახლოვდება ხუთ პროცენტიან ბარიერს. ამ შემთხვევაში სწორია მოცემულობა, რომ გადაუნაწილებელი მანდატი იქნება ბევრი, მხოლოდ ამაში ვეთანხმები ნინო ლომჯარიას. ისინი როგორ იმოქმედებენ, შეცვლიან გეგმას და „ნაცმოძრაობის“ ოცი პროცენტის ზემოთ, ე.წ. შუა ხმებზე, დარჩენილ ოც პროცენტზე, რა გზით იმუშავებენ, გაერთიანებით თუ კიდევ უფრო დაქსაქსვით, ეს მათი საქმეა“, – განაცხადა მდინარაძემ.

ამ მიმართულებით თანამედროვე სამყარო დღეს უდიდესი გამოწვევების წინაშეა. ერთ-ერთი ასეთი გამოწვევაა ლგბტ პროპაგანდა და ამ უდიდესმა პრობლემამ სამწუხაროდ ოფიციალურ უწყებებშიც შეაღწია და ოფიციალურ უწყებებშიც გაჩნდა მითითებები, რომ გენდერული ნიშნით ცოტა სხვანაირად მოიხსენიონ ოჯახის წევრები, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მდინარაძემ ბერლინის კინოფესტივალზე მამუკა ხაზარაძის შვილის საპროდიუსერო კომპანიის ფილმის მიერ ლგბტ ფილმების ჯილდოს მიღების შესახებ ისაუბრა და აღნიშნა, რომ საქართველოში არასდროს ხელისუფლებასთან ახლოს არ უნდა იყოს გაკარებული არცერთი ჯგუფი თუ ადამიანი, რომელიც ლგბტ პროპაგანდის მხარდამჭერია.

„როგორი მეგობრული დამოკიდებულებაც არ უნდა გვქონდეს კონკრეტულ ქვეყნებთან თუ მის ოფიციალურ წარმომადგენლებთან, ჩვენთვის ეს შემაშფოთებელი და უკიდურესად მიუღებელია. ჩემი აზრით, საქართველოში არასდროს ხელისუფლებასთანა ახლოს არ უნდა იყოს გაკარებული არცერთი ჯგუფი, თუ ადამიანი, რომელიც ამ პროპაგანდის ავანგარდში ან მხარდაჭერად შეიძლება იყოს. მოცემულ სიტუაციაშიც ამ შემთხვევასთან გვაქვს საქმე – ოჯახი, რომელიც თავისი ფონდით აფინანსებს ლგბტ პროპაგანდისტულ ფილმებს, რომელიც არა უფლებების დაცვას (რაც გასამიჯნი თემაა, და უნდა გავმიჯნოთ იმგვარად, რომ არავინ უნდა შეეხოს არანაირი უმცირესობის უფლებებს და ყველამ ერთად უნდა დავიცვათ მათი უფლებები ზედმიწევნით) თუმცა, მეორე, უდიდესი პრობლემაა, რომ ლგბტ პროპაგანდა სხვადასხვა მასშტაბებს იძენს და და ოფიციალურ სტრუქტურებში შედის. საქართველომ, მისმა ნებისმიერმა ხელისუფალმა უნდა უზრუნველყოს, რომ ამისგან დაიცვას თავისი საზოგადოება და მომავალი თაობა. თუ აღმოჩნდა ისიც, რომ თურმე ეს ხალხი ლგბტ პროპაგანდისტული ნაწარმოებებს აფინანსებენ, არის მყარი მტკიცებულება იმისა, რომ ამ ფსევდოლიბერალურ კასტას ეს ხალხიც შეუერთდა. შემწყნარებლობა და ფაშისტური ჩანართები ერთმანეთთან თავსებადი ვერ იქნება, შესაბამისად, ეს აგრესიული ლიბერალიზმი არის მხოლოდ და მხოლოდ საფრთხე და ჩვენ თუ გვინდა ნამდვილი ლიბერალიზმი, სხვა გზა არის ამისა, რასაც ისედაც ვაკეთებთ, მაგრამ არა ისე, რომ ვიღაცებს მოვახვიოთ თავს რაღაც პროპაგანდები, რაც აბსოლუტურად მიუღებელია“, – აღნიშნა მდინარაძემ.

განსაკუთრებით მნიშვნელოვანი მესიჯი გაახმოვანა დღეს ირაკლი კობახიძემ იმის შესახებ, რომ ჩვენი მიზანი არის არამხოლოდ განათლების დონის ამაღლება, არამედ უნდა მივიღოთ მომავლი თაობა, რომელიც იქნება განათლებული, ამაყი და პატრიოტი, – ამის შესახებ საპარლამენტო უმრავლესობის ლიდერმა, „ქართული ოცნების” აღმასრულებელმა მდივანმა, მამუკა მდინარაძემ განაცხადა.

„ჩვენ ყველა შვილი პატრიოტული სულისკვეთებით უნდა აღვზარდოთ, რომ თითოეული მათგანი იყოს დარწმუნებული იმაში, რომ მისი ვალდებულებაა, ქართული საოცნებო სახელმწიფოს მშენებლობაში, პატრიოტული სულისკვეთების შენარჩუნებაში და ეროვნული იდენტობის გადარჩენაში მონაწილეობა მიიღოს. ეს ინიციატივა ამ ყველაფრიდან გამომდინარე ერთიორად დასაფასებელია“, – აღნიშნა მან.

მდინარაძე ასევე გამოეხმაურა პრემიერის მიერ ანაზღაურებადი სტაჟირების შესახებ დღეს გაკეთებულ განცხადებას.

„ჩვენ შარშან მივიღეთ კანონი, რომელიც ანაზღაურებად სტაჟირებას გულისხმობდა. „ნაცმოძრაობის“ ზოგიერთი კლასტერის წარმომადგენელი, ჩვენი კანონის შემდეგ საჯარო სივრცეში ჰპირდებოდა ახალგაზრდებს ამ კანონის მიღებას. ან მართლა არ იცოდნენ პარლამენტმა რა კანონი მიიღო, ან ძალიან თავხედობდნენ პიარულად. ამას ჭირდება რეალიზება და დაახლოებით 3000 სტუდენტი, ყველაზე წარჩინებული სტუდენტები მიიღებენ შრომის ანაზღაურებს, თან გაივლიან სტაჟირებას, რაც მიეხმარება მათ პრაქტიკის, გამოცდილების შეძენაში. ეს იქნება განგრძობითი. ეს იქნება საპილოტე ვერსია, პრაქტიკაში გამოჩნდება ხარვეზებიც, პოზიტიური მხარეებიც და კიდევ უფრო დაიხვეწება. ეს იქნება მასობრივი ღონისძიება, რაც შეუწყობს ხელს ჩვენი ახალგაზრდებისთვის მეტი ცოდნის და გამოცდილების მიღებას“, – აღნიშნა მდინარაძემ.

საქართველოს განათლების, მეცნიერებისა და ახალგაზრდობის სამინისტრომ დიდხნიანი მუშაობის შედეგად, მოამზადა ზოგადი განათლების ეროვნული მიზნების დოკუმენტის ახალი პროექტი, რომელიც გულისხმობს ეროვნულ-პატრიოტულ სულისკვეთებაზე, პიროვნულ განვითარებაზე, ოჯახის ინსტიტუციის პატივისცემაზე, საერთაშორისოდ აღიარებულ უნივერსალურ ეთიკურ პრინციპებსა და დემოკრატიულ ღირებულებებზე ორიენტირებული სასკოლო გარემოს შექმნას, რათა სკოლამ აღზარდოს ღირსეული მოქალაქე.

გარდა ამისა, საქართველოს პრემიერ-მინისტრმა ირაკლი კობახიძემ მთავრობის დღევანდელ სხდომაზე განაცხადა, რომ უნივერსიტეტების კურსდამთავრებულების ანაზღაურებადი სტაჟირება საპილოტე რეჟიმში წელსვე დაიწყება.