გუშინ იყო წამოცდენების დღე – ჯანაშიამ თქვა, რომ წინარევოლუციურ პროცესებში უნდა მიიღოს სააკაშვილმა მონაწილეობაო. შემდეგ აღმოჩნდა, რომ ზაფხულში გვპირდება რაღაცას მამუკა ხაზარაძე, – ამის შესახებ ჟურნალისტებს საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ განუცხადა.

„ეს წამოცდენები მხოლოდ და მხოლოდ საზოგადოების სწორ ინფორმირებულობას უწყობს ხელს. ისინი რისთვისაც ემზადებიან, იმას ვერ მიაღწევენ. მათ უნდათ რევოლუცია, რადგან მათი მხრიდან არჩევნებით მოგება წარმოუდგენელია. როგორ შეიძლება ოპოზიციის საერთო 20%-იანი მხარდაჭერით მოიგო არჩევნები, როდესაც მეორე მხარეს, „ქართულ ოცნებას“ აქვს 60%-იანი მხარდაჭერა?! ახლა ისინი ნადირობენ მეორე 20%-ზე, რომელიც თავისუფალია. შუა ძალა, ასე რომ ვთქვათ, და ეს ადამიანები სხვადასხვა დროს სხვადასხვა შეხედულებისამებრ იღებენ გადაწყვეტილებას. სხვათა შორის, ნიკა გვარამიამ პირდაპირ თქვა, რომ ამ გადაუწყვეტელ ამომრჩეველზე მუშაობს. მანაც ვერ დამალა და ვერ მიხვდა, რომ ეს ჩვენ გამოგვადგებოდა ჩვენი სიმართლის გატანაში, რადგან ჩვენ ხომ ვამბობთ, რომ ამ გადაუწყვეტელი ამომრჩევლის გამო ემიჯნებიან „ნაცები“ „ნაცებს“, – აღნიშნა მდინარაძემ.

მახსენდება აკაკი წერეთელი – „გინდა შეიტანეთ და გინდა გამოიტანეთ, თქვენი რუმბივით გაგორებული ფალავანიო”, ზუსტად ამ მდგომარეობაში ხართ, იმიტომ, რომ ბეჭებზე ხართ დადებული და ეს თქვენ თავს დააბრალეთ, – ასე მიმართა „ქართული ოცნების’“ დეპუტატმა, დავით მათიკაშვილმა ოპოზიციას პარლამენტის პლენარულ სხდომაზე, სადაც პარლამენტის თავმჯდომარე წლიური მოხსენებით გამოდის.

მათიკაშვილის შეფასებით, შალვა პაპუაშვილის წლიური ანგარიშით გამოსვლა იყო საქმეზე ორიენტირებული, ქრონოლოგიურად გაწერილი და საზოგადოებისთვის ძალიან გარკვევით წარდგენილი. მისი თქმით, ანგარიში ზუსტად აღწერდა იმას, რა რეალობაშიც ქვეყანამ იცხოვრა, საზოგადოებას მოუწია ცხოვრება და არსებობა, ბევრ გამოწვევის დაძლევა და გადაწყვეტილების სწორად მიღება, რამაც ქვეყანას ძალიან ბევრი მძიმე პრობლემა აარიდა.

„რა თქმა უნდა, ოპოზიციას არ მოსწონს ეს ყველაფერი, ისინი მონაწილეობას არ იღებენ არც საკანონმდებლო საქმიანობაში, სამუშაო ჯგუფების საქმიანობაში, მარტო რადიკალიზმის და ნეგატივის გამომზეურებით არიან დაკავებული და ცხადია, როდესაც ამ ანგარიშში მათი როლი და კვალი არ ჩანს, როგორც პოზიტიური მოთამაშის, ეს მათ არ მოსწონთ. ამ ყველაფრის შემდეგ, როდესაც პარლამენტის თავმჯდომარემ საკუთარი ანგარიშით თქვენი ლუსტრაცია კიდევ ერთხელ მოახდინა, კიდევ ერთხელ დაანახა ლაკმუსის ქაღალდივით საზოგადოებას, თუ რას წარმოადგენთ, მახსენდება აკაკი წერეთელი – “გინდა შეიტანეთ და გინდა გამოიტანეთ, თქვენი რუმბივით გაგორებული ფალავანიო”, ზუსტად ამ მდგომარეობაში ხართ, იმიტომ, რომ ბეჭებზე ხართ დადებული და ეს თქვენ თავს დააბრალეთ, მეტი არავის ბრალი არ არის, ამ ქვეყანაში“, – განაცხადა მათიკაშვილმა.

ყველასთვის ცხადია, რომ დეზინფორმაციამ ბოლო წლების განმავლობაში წალეკა ქართული პოლიტიკა. დეზინფორმაციამ განაპირობა ემოციები, ხოლო ემოციებმა გამოიწვია დიდი უარყოფითი ენერგიის დაგროვება პოლიტიკურ წრეებშიც და საზოგადოებაშიც, – ამის შესახებ საქართველოს პარლამენტის თავმჯდომარემ, შალვა პაპუაშვილმა 2023 წლის ანგარიშის წარდგენის დროს განაცხადა.

როგორც პარლამენტის თავმჯდომარემ აღნიშნა, ხშირად ჩვენი უცხოელი პარტნიორები ამ უარყოფით ენერგიას „პოლიტიკურ პოლარიზაციას“ უწოდებენ.

„მინდა, ხაზგასმით აღვნიშნო, რომ არანაირ პოლარიზაციასთან საქმე არ გვაქვს. პოლარიზაცია გულისხმობს, რომ საზოგადოება არის გახლეჩილი იდეური ან ღირებულებითი ნიშნით, რაც საქართველოში სულაც არაა ასე. საზოგადოება ერთიანია, პოლარიზაცია კი სინამდვილეში პოლიტიკური პარტიების ნაწილის რადიკალიზაციაში ვლინდება. პოლიტიკური რადიკალიზმი არ არის მხოლოდ პოლიტიკური შეხედულებების სიმწვავე. რადიკალიზმი წარმოადგენს პოზიციას, რომელიც მიმართულია კონსტიტუციის, დემოკრატიულად არჩეული ხელისუფლების და ლეგიტიმური ეროვნული ინსტიტუტების წინააღმდეგ. თითქმის ოთხი წელია, ოპოზიციის ნაწილი სწორედ რადიკალიზმის ამგვარი გამოვლინებითაა დაკავებული. შეიძლება ითქვას, რომ რადიკალიზმის ფესვები კიდევ უფრო შორს მიდის. 2012 წლის შემდეგ „ნაციონალური მოძრაობა“ და მისი სატელიტი პარტიები ყოველ ჯერზე, არჩევნების წაგების შემდეგ, უარყოფენ არჩევნების შედეგებს ან ბოიკოტს უცხადებენ მათ. არცერთ შემთხვევაში მათ არ წარმოუდგენიათ ოდნავ მაინც დამაჯერებელი დასაბუთება, რის საფუძველზე უარყოფენ მმართველობის დემოკრატიულად არჩეული სტრუქტურების ლეგიტიმურობას“, – განაცხადა პარლამენტის თავმჯდომარემ.

მისი თქმით, ოპოზიციის რიტორიკა მუდმივად მიმართულია არა დემოკრატიული და კანონიერი, არამედ ძალისმიერი და უკანონო მეთოდებით ხელისუფლების შეცვლისკენ.

„ხდება ნებისმიერი საკითხის პოლიტიზება და შემდეგ მათი პოლიტიკურ იარაღად გამოყენება. ამ გზაზე არაფერი წმინდა მათთვის აღარ არსებობს. რადიკალებმა განხეთქილების საბაბად აქციეს საქართველოს ევროკავშირთან დაახლოების პოლიტიკა, 2008 წლის აგვისტოში ომის დაწყების თარიღი, მეორე მსოფლიო ომში გამარჯვების დღეც კი. ესეც არ იკმარეს და სულ ახლახან პოლიტიკურ იარაღად სცადეს ექციათ შობის აღნიშვნის საუკუნოვანი ტრადიცია. როდესაც პოლიტიკური ძალა და მასთან დაკავშირებული ორგანიზაციები თუ კონკრეტული პირები ცდილობენ, ამგვარად მოახდინონ საზოგადოების გახლეჩა და ნებისმიერი საკამათო თემის პოლიტიკურ იარაღად გამოყენება, ცხადია, ამგვარ ძალებთან თანამშრომლობა, რბილად რომ ვთქვათ, ძალიან რთული იქნება“, – განაცხადა პარლამენტის თავმჯდომარემ.

ეკონომიკის მინისტრი რომ გაიპარა აქედან, ჩემს ერთ-ერთ კითხვაზე პასუხი გაუცემელია 393 დღე, პრემიერ-მინისტრ ღარიბაშვილს 392 დღე ველოდები, ჯანდაცვის მინისტრ ტიკარაძეს, რომელსაც მივწერე ვაქცინებთან დაკავშირებით, 930 დღეა პასუხი არ გაუცია, მოქმედ მინისტრს, 100 დღე გავიდა თურქეთიდან წამლების შესყიდვაზე და ევროპიდან და სხვა სანდო ქვეყნებიდან შემოტანილ მედიკამენტებზე ვკითხე და პასუხს არ მცემს, – ასე მიმართა „ევროოპტიმისტების“ წევრმა, დეპუტატმა, რომან გოცირიძემ პარლამენტის თავმჯდომარე შალვა პაპუაშვილს, რომელიც პლენარულ სხდომაზე წლიურ ანგარიშს წარმოადგენს.

გოცირიძის განცხადებით, ნორმალურ ქვეყნებში საპარლამენტო მუშაობის 70% არის საპარლამენტო კონტროლი, ხოლო, საქართველოს პარლამენტი საპარლამენტო კონტროლს ვერ ეწევა.

„საქართველოს პარლამენტი საპარლამენტო კონტროლს ვერ ეწევა, ვინაიდან პარლამენტი არის გაკონტროლებული და ვიცით, ვინ აკონტროლებს.

სად წავიდნენ ესენი [მინისტრები], რომ ჩამწკრივდნენ და გაიპარნენ, სად არის მთავრობა, მათთან მქონდა კითხვა?

საპარლამენტო კონტროლის ერთ-ერთი მნიშვნელოვანი ნაწილია სადეპუტატო კითხვაზე პასუხის გაცემა. როდესაც მინისტრი პასუხს არ გცემს კითხვაზე, ეს იმას ნიშნავს, რომ ან რაღაცას იპარავს, ანუ კორუფციასთან გვაქვს საქმე, ან რაღაც ცუდად გააკეთა, თორემ რად უნდა ამ ტელევიზიით გვარი ვასახელო და შევარცხვინო? მომწეროს ორიოდე სიტყვით, რომ ასე და ასეა საქმე.

ეკონომიკის მინისტრი რომ გაიპარა აქედან, ჩემს ერთ-ერთ კითხვაზე პასუხი გაუცემელია 393 დღე, რომელიც ეხება გაზის კორპორაციას, რომელშიც უამრავი ფული იფლანგება სახელმწიფო რესურსებიდან და 230 მილიონი ასესხა ბიუჯეტმა გაზის და ნავთობის კორპორაციას, ნაცვლად იმისა, რომ ბიუჯეტში იქით უნდა შეეტანა მას ფული. ვკითხე, რატომ გაიქცა ინდოელი „ნამახვანიდან“, ან კორეელი რატომ წავიდა „ნენსკრადან“, 13 მილიონი რატომ მიაყოლეთ ინდოელს და რა ხდება ამ სისტემაში? – 397 დღე არ გამცა პასუხი, ორიოდ სიტყვა დაეწერა, პასუხი რომ ჩასთვლოდა, თუნდაც ეთქვა, რომ ინდოელი კი არა, ინვესტორი პაკისტანელი იყოო. პრემიერ-მინისტრ ღარიბაშვილს 392 ველოდები- 10 მილიონი რომ გადაუხადეთ როტშილდებს, რომელსაც ფინანსური ჰაბი უნდა შეექმნა და თბილისის ზღვაზე და გონიოში ცათამბჯენებში უნდა დუღდეს საფონდო ვაჭრობა, რაში მიეცით 10 მილიონი თქო ვკითხე. პატარა ქაღალდი წარმოადგინე, რა დაგიწერეს ამ როტშილდებმა რჩევის სახით. ჯანდაცვის მინისტრ ტიკარაძეს, რომელსაც მივწერე ვაქცინებთან დაკავშირებით, 930 დღეა პასუხი არ გაუცია, მოქმედ მინისტრს, 100 დღე გავიდა თურქეთიდან წამლების შესყიდვაზე და ევროპიდან და სხვა სანდო ქვეყნებიდან შემოტანილ მედიკამენტებზე ვკითხე და პასუხს არ მცემს. პატივს არ გცემენ თქვენ პარლამენტს, ფეხებზე გიკიდებენ მინისტრები“,- განაცხადა რომან გოცირიძემ.

ბატონო შალვა, უნდა დავაფასო თქვენი იუმორი. მთელი გამოსვლა ოპოზიციას ლანძღავდით და ბოლოს მოუწოდეთ, ერთად ვიმუშაოთო. ასე მე მგონი, საქმე არ კეთდება, თუ ლანძღავთ ნახევარი საათი ოპოზიციას, მერე ერთად მუშაობა რაღაცნაირად რთულად წარმოსადგენია, – ასე მიმართა „გირჩის“ დეპუტატმა, სანდრო რაქვიაშვილმა პარლამენტის თავმჯდომარეს, შალვა პაპუაშვილს, რომელიც კოლეგების წინაშე 2023 წლის ანგარიშით წარსდგა.

როგორც ოპოზიციონერმა დეპუტატმა განაცხადა, ყველაფერი რაც პაპუაშვილმა ოპოზიციას „დააბრალა“, შინაარსობრივად „ქართული ოცნების“ შეცდომები იყო.

„მინდა აღვნიშნო, რომ ყველაფერი რაც ოპოზიციას დააბრალეთ, საბოლოო ჯამში ასევე თქვენი შეცდომებია. ბოლოს და ბოლოს რაღაცები მარტივად იზომება. კანდიდატის სტატუსის შემთხვევაში 12-დან 3 პუნქტი შესრულდა ასე თუ ისე. საბოლოო ჯამში, შედეგები როგორია გვესმის. მესმის, ზოგჯერ რთულია შეცდომების აღიარება, მაგრამ ყველაფერი რაც ოპოზიციას დააბრალეთ შინაარსობრივად თქვენი შეცდომები იყო ამა თუ იმ ფორმით. შეიძლება ჩვენი შეცდომებიც იყო რაღაცები ამ სიტუაციაში, მაგრამ უფრო თქვენი,“ – განაცხადა რაქვიაშვილმა.

ეროვნული ინტერესების წინააღმდეგ დეზინფორმაციის გამოყენების კიდევ ერთი სამარცხვინო მაგალითი იყო ოპოზიციის მიერ წელიწად-ნახევრის განმავლობაში წარმოებული კამპანია, რომელიც ამტკიცებდა, რომ რუსეთი საქართველოს სანქციების გვერდის ასავლელად იყენებს, – ამის შესახებ საქართველოს პარლამენტის თავმჯდომარემ, შალვა პაპუაშვილმა 2023 წლის ანგარიშის წარდგენისას განაცხადა.

როგორც პარლამენტის თავმჯდომარემ აღნიშნა, სანქციების გვერდის ავლის, ასევე არჩევნების გაყალბების კამპანიის შემთხვევაში, შეიქმნა აღქმა, რომ საქართველო რაღაცას ისე არ აკეთებს, როგორც საჭიროა. მისივე თქმით, ოპოზიციამ დააზიანა საკუთარი ქვეყანა იმ იმედით, რომ რამენაირად, ეს დაეხმარებოდა ხელისუფლების მოპოვებაში.

„არ დავიწყებ მაგალითების მოტანას. ყველამ კარგად ვიცით ამ კამპანიის მონაწილე პირები და მასშტაბი, რომელმაც ძალიან დააზიანა საქართველოს საერთაშორისო ავტორიტეტი. ჩვენმა სტრატეგიულმა პარტნიორებმა, თუმცა დაგვიანებით, მაგრამ მაინც ყოველგვარი ეჭვის გარეშე დაადასტურეს, რომ საქართველოს რუსეთის საწინააღმდეგო სანქციები არც ერთხელ, ვიმეორებ, არც ერთხელ, არ დაურღვევია. მაგრამ აქაც, ისევე როგორც არჩევნების გაყალბების კამპანიის შემთხვევაში, შეიქმნა აღქმა, განცდა, შთაბეჭდილება, რომ საქართველო რაღაცას ისე არ აკეთებს, როგორც საჭიროა. და მოხდა ისევ იგივე, ბევრს უცხოეთში და საქართველოში დარჩა უსიამოვნო განცდა საქართველოს მისამართით. დეზინფორმაციული კამპანიის მთავარი მიზანი მიღწეული იქნა. ოპოზიციამ დააზიანა საკუთარი ქვეყანა იმ იმედით, რომ, რამენაირად, ეს დაეხმარებოდა ხელისუფლების მოპოვებაში“, – განაცხადა პარლამენტის თავმჯდომარემ.

პაპუაშვილის თქმით, სტრატეგიულმა პარტნიორებმა, მოგვიანებით ყოველგვარი ეჭვის გარეშე დაადასტურეს, რომ საქართველოს რუსეთის საწინააღმდეგო სანქციები არც ერთხელ არ დაურღვევია.

„რუსეთის მიმართ დაწესებულ სანქციებთან დაკავშირებით არის ერთი გარემოება, რომელსაც კიდევ ერთხელ უნდა გაესვას ხაზი. ჩვენ ორი წელია ვაკვირდებით თუ როგორ წესდება სხვადასხვა სახის სანქციები რუსეთის მიმართ. ვხედავთ, რომ სანქციების შინაარსი და განსაკუთრებით კი მისგან გამონაკლისების საკითხი ევროკავშირის წევრი ქვეყნების ხანგრძლივი განსჯის საგანი ხდება ხოლმე. რაც ბუნებრივია. რუსეთისთვის მისი აგრესიული ომის გამო საზღაურის დაწესების კვალდაკვალ, ყველა წევრი ქვეყანა ცდილობს, რომ ისეთი სანქცია არ დაწესდეს, რომელიც მის უსაფრთხოებას თუ ეკონომიკურ ინტერესებს უფრო მეტად დააზიანებს, ვიდრე რუსეთს. საქართველო, როგორც ევროკავშირის არაწევრი ქვეყანა ამ დისკუსიაში არ მონაწილეობს. ამიტომ განსხვავებით ევროკავშირის წევრი ქვეყნებისგან, სანქციების დაწესების დროს, საქართველოს უსაფრთხოება და ეკონომიკურ ინტერესები განხილვის საგანს არ წარმოადგენს. თუმცა, მიუხედავად იმისა, რომ არ ვმონაწილეობთ გადაწყვეტილებების მიღებაში, სწორედ უკრაინელი ხალხის მიმართ ჩვენი განსაკუთრებული სოლიდარობის გამო ჩვენ ავიღეთ ვალდებულება უზრუნველვყოთ, რომ საქართველოს ტერიტორია არ იქნას გამოყენებული საერთაშორისო სანქციების გვერდის ასავლელად და როგორც ყოველთვის, ჩვენ პირნათლად ვასრულებთ ჩვენს ვალდებულებებს“, – განაცხადა პარლამენტის თავმჯდომარემ.

მივმართავთ საქართველოს პრეზიდენტ სალომე ზურაბიშვილს და მოვითხოვთ მისგან, რომ სასწრაფოდ გაათავისუფლოს მიხეილ სააკაშვილი. გაითვალისწინოს მიხეილ სააკაშვილის ამომრჩევლის ნება, – ამის შესახებ „ერთიანი ნაციონალური მოძრაობის“ თბილისის ორგანიზაციის თავმჯდომარემ, ზაზა გოგავამ განაცხადა.

„მოგეხსენებათ, „ერთიანმა ნაციონალურმა მოძრაობამ“ და მხარდამჭერებმა დავიწყეთ ხელმოწერების შეგროვება საქართველოს მესამე პრეზიდენტის, მიხეილ სააკაშვილის გათავისუფლებასთან დაკავშირებით. აქ მინდა, ხაზი გავუსვა გათავისუფლებას და არა შეწყალებას! მივმართავთ საქართველოს პრეზიდენტს, სალომე ზურაბიშვილს და მოვითხოვთ მისგან, სასწრაფოდ გაათავისუფლოს მიხეილ სააკაშვილი. გაითვალისწინოს მიხეილ სააკაშვილის ამომრჩევლის ნება და ეს ღონისძიება, რომელიც ტარდება დღეს, იქნება პერმანენტული, რათა მიხეილ სააკაშვილს მისცეს უფლება, თავის ამომრჩეველთან ერთად გააგრძელოს ბრძოლა საქართველოს თავისუფლებისა და უკეთესი მომავლისთვის“, – განაცხადა „ერთიანი ნაციონალური მოძრაობის“ თბილისის ორგანიზაციის თავმჯდომარემ, ზაზა გოგავამ.

ქვეყნის უმაღლესი თანამდებობის პირი, რომელიც ქვეყნის გამაერთიანებელი უნდა იყოს, ქვეყნის გამთიშველი აღმოჩნდა, რომელმაც რადიკალიზაციის ხელშეწყობით პრაქტიკულად რადიკალური ოპოზიციის თამაში გაიზიარა და ამით მნიშვნელოვნად დააზარალა არა „ქართული ოცნება“, არამედ საქართველოს საერთაშორისო იმიჯი და ინტერესები, – ამის შესახებ პარლამენტის თავმჯდომარე შალვა პაპუაშვილმა პარლამენტში ანგარიშით წარდგენისას განაცხადა.

მისი თქმით, პრეზიდენტის ინსტიტუტი „რადიკალიზაციის სამარცხვინო ფერხულშია“ ჩაბმული.

„რაოდენ სამწუხაროა, რომ რადიკალიზაციის სამარცხვინო ფერხულში ჩაბმული აღმოჩნდა ინსტიტუტი, რომელიც ყველაზე მეტადაა პასუხისმგებელი კონსტიტუციის ეროვნული ინტერესებისა და ინსტიტუტების დაცვაზე, ეროვნული თანხმობის მიღწევასა და ქვეყნის გაერთიანებაზე. ორი კვირის წინ ამ ტრიბუნიდან ქალბატონ სალომე ზურაბიშვილს მოვუსმინეთ, რომლის სიტყვებმაც კიდევ ერთხელ დაგვიტოვა გაწბილებისა და გულის დაწყვეტის ემოცია. ეროვნულ ინტერესებზე ორიენტირებული გამოსვლის ნაცვლად, მოვისმინეთ პოლიტიკური ანგარიშსწორების კიდევ ერთი მცდელობა, რომელმაც კიდევ უფრო დააკნინა პრეზიდენტის ინსტიტუტის სახელი და მნიშვნელობა. საქართველოს პრეზიდენტმა კონსტიტუცია დაარღვია, როდესაც საქართველოს მთავრობის მკაფიო ნებართვის გარეშე დაიწყო საგარეო პოლიტიკური აქტივობების განხორციელება. ჩვენი შეფასება პირდაპირ დაადასტურა საქართველოს საკონსტიტუციო სასამართლომ. პრეზიდენტის მოქმედება იყო საქართველოს სახელმწიფოებრიობისთვის ძირის გამოთხრის მცდელობა. ეს არა მხოლოდ პოლიტიკური, არამედ პრინციპული, ეროვნული მნიშვნელობის საკითხია. სალომე ზურაბიშვილს კონსტიტუციის დარღვევაზე ღიად მიუთითა საქართველოს პარლამენტმა და საკონსტიტუციო სასამართლომ და მაინც, მან გადაწყვიტა, რომ მისი პირადი გადაწყვეტილება უფრო მაღლა დგას, ვიდრე პარლამენტი, კონსტიტუცია, საკონსტიტუციო სასამართლო და ეროვნული ინტერესები. ერთი წამით წარმოვიდგინოთ, რომ სალომე ზურაბიშვილის მსგავსად, საკონსტიტუციო სასამართლოს გადაწყვეტილების აღსრულებაზე უარი თქვან ხელისუფლების სხვა შტოებმა. ეს არის ის მაგალითი, რასაც პრეზიდენტი უნდა აძლევდეს ქვეყანას, საზოგადოებას, მომავალ თაობას? ეს არის ის, რაც მას ევროპად მიაჩნია? ქვეყნის უმაღლესი თანამდებობის პირი, რომელიც ქვეყნის გამაერთიანებელი უნდა იყოს, ქვეყნის გამთიშველი აღმოჩნდა, რომელმაც რადიკალიზაციის ხელშეწყობით პრაქტიკულად რადიკალური ოპოზიციის თამაში გაიზიარა და ამით მნიშვნელოვნად დააზარალა არა „ქართული ოცნება“, არამედ საქართველოს საერთაშორისო იმიჯი და ინტერესები“,- განაცხადა შალვა პაპუაშვილმა.

არასამთავრობო სექტორის ნაწილი, რომელიც საზოგადოების ინტერესებს უნდა გამოხატავდეს, პრაქტიკულად, რადიკალი პოლიტიკოსების მოკავშირედ იქცა – არასამთავრობო ორგანიზაციები კარგ შემთხვევაში დუმდნენ, ცალკეულ შემთხვევაში კი დეზინფორმაციის შექმნასა და გავრცელებაში თავად მონაწილეობდნენ, – ამის შესახებ საქართველოს პარლამენტის თავმჯდომარემ, შალვა პაპუაშვილმა პარლამენტის პლენარულ სხდომაზე განაცხადა, სადაც 2023 წლის საქმიანობის ანგარიშს წარადგენს.

მისივე თქმით, ხალხი არ უსმენს რადიკალებს და რადიკალი პოლიტიკოსების და მათი მოკავშირე ორგანიზაციების ქმედებები ვერ იწვევს იმ ეფექტს, რაც მათ აქვთ ხოლმე ჩაფიქრებული.

როგორც პაპუაშვილი აღნიშნავს, რადიკალი პარტიებისა და ორგანიზაციების დეზინფორმაცია მხოლოდ მაშინ ხდება ეფექტიანი, “როდესაც ზოგიერთი ჩვენი სტრატეგიული პარტნიორი დეზინფორმაციის კამპანიის უნებლიე მონაწილე ხდება”.

„სამწუხარო რეალობაა, რომ დეზინფორმაციასთან ბრძოლა ხელისუფლებას და ჩვენს საზოგადოებას მარტო გვიწევდა. კარგ შემთხვევაში დუმდნენ, ცალკეულ შემთხვევაში კი დეზინფორმაციის შექმნასა და გავრცელებაში თავად მონაწილეობდნენ არასამთავრობო ორგანიზაციები, რომლებიც წესით, ნეიტრალური პოზიციიდან უნდა აფასებდნენ მოვლენებს. სამწუხაროა, რომ ქართულ რეალობაში რამდენიმე ასეთი ორგანიზაცია ხშირად ეჯიბრება და ჯობნის კიდეც ოპოზიციას დეზინფორმაციის შეთანხმებულ გავრცელებაში. არასამთავრობო სექტორის ნაწილი, რომელიც საზოგადოების ინტერესებს უნდა გამოხატავდეს, პრაქტიკულად, რადიკალი პოლიტიკოსების მოკავშირედ იქცა. ვინაიდან რადიკალიზმი ქართული კულტურისთვის უცხო და მიუღებელია, ამიტომ რადიკალი პოლიტიკოსების და მათი მოკავშირე ორგანიზაციების ქმედებები ვერ იწვევს იმ ეფექტს, რაც მათ აქვთ ხოლმე ჩაფიქრებული. ხალხი არ უსმენს რადიკალებს. რადიკალი პარტიებისა და ორგანიზაციების დეზინფორმაცია მხოლოდ მაშინ ხდება ეფექტიანი, როდესაც ზოგიერთი ჩვენი სტრატეგიული პარტნიორი დეზინფორმაციის კამპანიის უნებლიე მონაწილე ხდება. ამის ყველაზე კარგი მაგალითი იყო გასული წლის მარტის აქციები და კამპანია, რომელიც მიმართული იყო ჩვენი განზრახვის წინააღმდეგ, რომ გამჭვირვალე გაგვეხადა უცხოეთიდან შემოსული ფინანსები საქართველოში,“ -განაცხადა პაპუაშვილმა.