ეს არის უმარტივესი „ქეისი“, სადაც პოლიციელს სახეში ურტყამს ხელს ქალბატონი, – განუცხადა ჟურნალისტებს „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა და ფრაქცია „ქართული ოცნების“ თავმჯდომარემ მამუკა მდინარაძემ „ბათუმელების“ დამფუძნებლისა და დირექტორის მზია ამაღლობელის დაპატიმრების ფაქტზე საუბრისას, რომელიც სამართალდამცველისთვის ფიზიკური შეურაცხყოფის მიყენების გამო დააკავეს.

„ეს არის უმარტივესი „ქეისი“, სადაც პოლიციელს სახეში ურტყამს ხელს ქალბატონი. ახლა ჩვენ უნდა შევჯერდეთ, ეს მარტივია. როდესაც ადამიანი პირდაპირ ეთერში ცემს პოლიციელს, უნდა დაისაჯოს თუ არა? – თუ კითხვაა – კი. მაშინ ის ადამიანი დაკავებულია კანონიერად – დამთავრდა!“, – განაცხადა მდინარაძემ.

„ბათუმელების“ დამფუძნებლისა და დირექტორის მზია ამაღლობელის წინააღმდეგ გამოძიება სისხლის სამართლის კოდექსის 353-ე პრიმა მუხლით დაიწყო, რაც პოლიციელზე თავდასხმას გულისხმობს და 4-დან 7 წლამდე ვადით თავისუფლების აღკვეთას ითვალისწინებს.

ბევრი მიზეზია და სხვებთან ერთად, ერთ-ერთი მთავარი ის არის, რომ ყველამ უნდა იცოდეს, ვის გვერდით დგას. მაგალითად, ახალგაზრდები, რომლებიც ამბობენ, რომ გულწრფელები არიან და დღეს დგანან აქციებზე, ამბობენ, რომ „ნაცები“ არ არიან და „ნაცებს“ არ უჭერენ მხარს. უნდა თქვან, ვის უჭერენ მხარს. კითხვა რომ დავუსვათ, ვის გვერდით დგანან, შეიძლება გითხრან, თვითორგანიზებით მოვედიო, მაგრამ, რეალურად ყველამ ვიცით, რომ ამას აორგანიზებენ „ნაცების“ სხვადასხვა კლასტერის წარმომადგენლები, – ასე უპასუხა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ საგამოძიებო კომისიის შექმნის მიზეზებთან დაკავშირებით დასმულ კითხვას.

მისი განცხადებით, პარადოქსია, როდესაც „ნაცის“ გვერდით დგახარ და თან ძალადობას აპროტესტებ.

მდინარაძის თქმით, რთული გასაგებია, როდესაც ებრძვი იმ პოლიტიკურ ძალას, რომელმაც ყველა ნაბიჯი გადადგა ევროპასთან ინტეგრაციის მიმართულებით და იმ ძალასთან ერთად უპირისპირდები მმართველ გუნდს, რომელმაც რუსული საქმეები რეალურად გააკეთა.

„როდესაც „ნაცის“ გვერდზე დგახარ და აპროტესტებ ძალადობას, ასეთი პარადოქსი ბუნებაში არ არსებობს. როგორ შეიძლება, იდგე „ნაცის“ ორგანიზებულ აქციაზე და აპროტესტებდე ძალადობას? შეიძლება, შენი აზრი გაგაჩნდეს და გააპროტესტო ყველაფერი. ბუნებრივია, ჩვენ რაც არ უნდა დავუძახოთ, მსხვერპლი ბინძური პროპაგანდის, რომელსაც საქართველოს გარუსებას ახმარენ ხოლმე ჩვენი ოპონენტები და მათი გარედან დავალების მიმცემები, რაც არ უნდა გავუგოთ ამ ადამიანებს, მას შემდეგ, რაც ის გააცნობიერებს, რომ ის დგას „ნაცის“ ორგანიზებულ, დაფინანსებულ აქციაზე და აპროტესტებს ძალადობას, „რუსული საქმის“ კეთებას, ვერ გავუგებ, ძნელი გასაგებია. მე, როგორც ერთი მოქალაქე, მხოლოდ პოლიტიკოსი კი არა, ვერ გავუგებ ადამიანს, რომელსაც რაღაც რუსულის გაპროტესტება უნდა, რუსთაველზე ებრძვის იმ პოლიტიკურ ძალას, რომელმაც ევროკავშირში ინტეგრაციისთვის ყველა ნაბიჯი გადადგა პრაგმატულად, ქართული ეროვნული ინტერესების ხარჯზე რაღაცის გადავლის გარდა, სხვა ყველაფრის ფასად, სანქცირების ფასად და ა.შ., ევროინტეგრაციის პროცესი არ შეაჩერა, ყველაფერი გააკეთა და იმ ძალას უდგახარ გვერდით და იქითა მხრიდან რაღაც რუსულს ებრძვი აბსტრაქტულს, რომელი ძალაც დეტალურად ჩამოგითვლით, რას აკეთებდა რუსულს. ამდენი დღის განმავლობაში, რაც კითხვა დავსვი, რა იყო სარგებელი რუსეთისთვის 2012 წლის შემდეგ, ერთი პასუხი მოისმინეთ? ხომ არ მოგისმენიათ? – ეს არის კითხვაც და პასუხიც, თუ რამდენად მავნებლურ პროპაგანდას ახმოვანებენ ისინი“, – განაცხადა მამუკა მდინარაძემ.

რასა იუკნევიჩიენეს, სიკორსკის და მიხეილ სააკაშვილის სხვა დანარჩენ მოტრფიალე და მფარველებს მოვუწოდებ, პირდაპირ ეთერში უყურონ, მოისმინონ, რა დანაშაულებრივ რეჟიმს უჭერდნენ თავის დროზე მხარს და რა დანაშაულებრივი რეჟიმის დაბრუნება სურთ მათ საქართველოში, – ამის შესახებ საქართველოს პარლამენტის თავმჯდომარე შალვა პაპუაშვილმა პარლამენტში დროებითი საგამოძიებო კომისიის შექმნის საკითხზე განაცხადა.

პაპუაშვილის განმარტებით, „ქართული ოცნების“ პოლიტიკური ინიციატივა შეეხება 2003 წლიდან, „ნაციონალური მოძრაობის“ საქმიანობის გამოკვლევას.

„ჩვენი პოლიტიკური ინიციატივა, რაც არის საპარლამენტო საგამოძიებო კომისიის სახით, შეეხება 2003 წლიდან, „ნაციონალური მოძრაობის“ რეჟიმის დამყარების მომენტიდან საპარლამენტო გამოკვლევას იმისა, რას წარმოადგენდა დანაშაულებრივი რეჟიმი, ყველა მისი გამოვლინებით, იქნებოდა ეს მედიის მიტაცება, ბიზნესის მიტაცება, ადამიანების წამება და სხვა სისტემური დანაშაულები, რათა კიდევ ერთხელ, მათ შორის ზოგიერთმა უცხოელმა აქტორმა, რომელიც დღემდე სააკაშვილს მოდერნიზატორად და დემოკრატიის შუქურად მოიხსენიებს, როგორც მაგალითად, პოლონეთის საგარეო საქმეთა მინისტრი სიკორსკი რამდენიმე თვის წინ ამას აცხადებდა, დაინახონ, რას წარმოადგენდა ის რეჟიმი, რომელსაც ისინი 2003-12 წლებში ტაშს უკრავდნენ და დღემდე ეტრფიან.

ეს ყველაფერი იქნება პირდაპირ ეთერში გადაცემული. ამიტომ ყველას, ქალბატონ რასა იუკნევიჩიენეს, ბატონ სიკორსკის და მიხეილ სააკაშვილის სხვა დანარჩენ მოტრფიალე და მფარველებს მოვუწოდებ, პირდაპირ ეთერში უყურონ, მოისმინონ, რა დანაშაულებრივ რეჟიმს უჭერდნენ თავის დროზე მხარს და რა დანაშაულებრივი რეჟიმის დაბრუნება სურთ მათ საქართველოში. მიხვდნენ, რატომ ეუბნება ქართველი ხალხი ასე დაჟინებით უარს როგორც ამ რეჟიმს, ისე მათ უცხოელ მფარველებს. რაც შეეხება გამოძიებას უკვე სისხლის სამართლებრივ ნაწილში, ეს პროკურატურის საკითხია. ჩვენ პოლიტიკურად ვაფასებთ და ერთმანეთისგან უნდა გავმიჯნოთ პოლიტიკური და სისხლის სამართლებრივი შეფასებები. პარლამენტი პოლიტიკურად შეაფასებს ამ საკითხს, მაგრამ ეს არ გამორიცხავს, რომ შიგნით მოიაზრება სისხლის სამართლებრივი დანაშაულები. ამიტომ ალბათ მნიშვნელოვანია, პროკურატურამაც შეხედოს ამას გულისყურით და იქ, სადაც შეიძლება, დადგინდეს სისხლის სამართლებრივი დანაშაული, შესაბამისი გამოძიება და კვლევა ჩაატაროს“, – აღნიშნა შალვა პაპუაშვილმა.

ყველას მოვუწოდებ, ჩახედონ, რატომ არის ეს მისთვის გამოსამშვიდობებელი ვიზიტი, რატომ არ იყრის ის კენჭს თებერვალში ბუნდესტაგის არჩევნებზე? რადგან ის „სოციალ-დემოკრატიული“ პარტიის პოლიტსაბჭოში აღარ აირჩიეს, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პაპუაშვილის თქმით, გერმანიაშიც მიხვდნენ, რომ მიხაელ როთი არის ადამიანი, რომელიც სრულად დისკრედიტაციას უწევდა მის პარტიას და სწორედ ამიტომაც უწევს პოლიტიკიდან წასვლა.

„გერმანული პოლიტიკიდან გარიყული და გაგდებული ადამიანი ქართულ პოლიტიკაში რომ გვეტენება და ერთი რამით არის დაკავებული, როგორმე ქართველები დააპირისპიროს ერთმანეთს, ლანძღოს ჩვენი ეკლესია, ვინც მას ჩაეხუტება, ერთადერთ რამეს აჩვენებს, იზიარებს იმ მორალს, შეხედულებებს თუ პრინციპებს, რომელიც მას აქვს, დააპირისპიროს ხალხი და ჩამოაგდოს შუღლი ადამიანებს შორის“, – განაცხადა პაპუაშვილმა.

თბილისის მერი კახა კალაძე ქართველი პოლიციელების მიმართ განხორციელებული თავდასხმებისა და ბულინგის შესახებ სოციალურ ქსელში პოსტს აქვეყნებს.

თბილისის მერი მხარდაჭერას უცხადებს ირაკლი დგებუაძეს და აქვე მადლობას უხდის ყველა პოლიციელს, ვინც ღირსეულად ემსახურება საკუთარ ქვეყანას და ხალხს.

„ჩემი მხარდაჭერა ძალიან მაგარ ადამიანს, ღირსეულ ქართველსა და ღირსეულ პოლიციელს, ირაკლი დგებუაძეს.

ეს ახალგაზრდა კაცი 24 საათი დგას ბათუმელების სიმშვიდისა და უსაფრთხოების სადარაჯოზე. სწორედ ამიტომ, ბოლო პერიოდში ირაკლი ფაშისტური ბულინგისა და ფიზიკური შეტევის განსაკუთრებული ობიექტი გახდა, მაგრამ მის გუნდთან ერთად, ის ყველა გამოწვევას ღირსეულად პასუხობს.

მადლობა ყველა პოლიციელს, ვინც ღირსეულად ემსახურება საკუთარ ქვეყანასა და ხალხს!”, – წერს კახა კალაძე.

საპარლამენტო უმრავლესობის წევრები – ირაკლი ზარქუა და ვიქტორ სანიკიძე აბუ დაბიდან მიმართვას ავრცელებენ.

“მეგობრებო, მოგესალმებით. მინდა, დამდეგი ახალი წელი მოგილოცოთ ჩემს საქართველოს, ჩემს მაგარ ხალხს – განსაკუთრებით, სამარგალოს, დიდი სიყვარულით. ჰო, რაღაც ინციდენტი მოხდა. არ არის ეს საამაყო… უბრალოდ, ერთი უნდა ვიცოდეთ ყველამ: ქართველები ვართ – თავმოყვარეები. როდესაც ჩემს ოჯახს, ჩემს ახლობლებს ეხებიან, ყოველთვის პასუხი გვექნება და ასე გავცემთ ყოველთვის პასუხს”, – აცხადებს ირაკლი ზარქუა.

საზოგადოებას მიმართავს ვიქტორ სანიკიძეც.

“მოგესალმებით მეგობრებო. გილოცავთ დამდეგ, ძველით ახალ წელს. მრავალს დაესწარით. მადლობა გვერდში დგომისთვის. ყველაფერი კარგადაა. როგორც ირაკლიმ თქვა, ყოველთვის გაეცემა პასუხი ამ უსამშობლოებს, სადაც არ უნდა ვიყოთ. კიდევ ერთხელ, მადლობა. ყველაფერი ძალიან კარგად იქნება. მრავალ ძველით ახალ წელს დაესწარით, ბედნიერად, ჯანმრთელად!”, – აცხადებს ვიქტორ სანიკიძე.

ირაკლი ზარქუას, ვიქტორ სანიკიძესა და მოქალაქე ლაშა გაბიტაშვილს შორის ფიზიკური დაპირისპირება მოხდა. გაბიტაშვილმა, აბუ დაბიში, ერთ-ერთ სასტუმროში მეგობრებთან ერთად მყოფ “ქართული ოცნების” დეპუტატებს, გუშინ, სიტყვიერი შეურაცხყოფა მიაყენა, დღეს კი ინციდენტი ფიზიკურ დაპირისპირებაში გადაიზარდა. ჩხუბის ამსახველი ვიდეოკადრები სოციალურ ქსელში გავრცელდა.

ჩვენ ყველას ახალი არჩევნები, თავისუფალი და სამართლიანი არჩევნები გვჭირდება, რათა ნდობა აღვადგინოთ, – ამის შესახებ გერმანიის პარლამენტის (ბუნდესტაგის) საგარეო ურთიერთობათა კომიტეტის თავმჯდომარემ, მიხაილ როთმა თბილისში ჟურნალისტებს განუცხადა.

მან საქართველოში არსებულ ვითარებასთან დაკავშირებით ისაუბრა და აღნიშნა, რომ ეს არის „სერიოზული კონფლიქტი ავტოკრატიასა და ლიბერალურ დემოკრატიას“ შორის.

„ვითარება უკიდურესად მძიმე რჩება, მაგრამ ნება მომეცით ძალიან მკაფიოდ განვაცხადო, რომ ეს არ არის შიდა დავა მმართველ პარტიას, სამოქალაქო საზოგადოებასა და ოპოზიციას შორის, არამედ ეს არის სერიოზული კონფლიქტი ავტოკრატიასა და ლიბერალურ დემოკრატიას შორის. სწორედ ამიტომ, ჩვენ ერთგული ევროპელები საფრანგეთიდან, უკრაინიდან, გერმანიიდან, ვალდებულები ვართ ხმა ავიმაღლოთ, როცა დემოკრატია და თავისუფლება ზეწოლის ქვეშ არის. ასე რომ, მმართველი პარტიისთვის ჩემი გზავნილი მკაფიოა, ამ სიტუაციის დაძლევის ერთადერთი შანსი, გაყალბებული არჩევნებისა და კონსტიტუციის დარღვევის შემდეგ, ახალი არჩევნებია. ჩვენ ყველას ახალი არჩევნები, თავისუფალი და სამართლიანი არჩევნები გვჭირდება, რათა ნდობა აღვადგინოთ“, – განაცხადა მიხაილ როთმა.

მისი თქმით, საქართველოში მშვიდობიანი დემონსტრანტების წინააღმდეგ ჩადენილ დარღვევებზე პასუხისმგებელი პირების წინააღმდეგ დაწესებულ სანქციებს მიესალმება.

„ინდივიდუალურ სანქციებს იმ ადამიანების წინააღმდეგ, რომლებიც პასუხისმგებლები არიან მშვიდობიანი დემონსტრანტების წინააღმდეგ ჩადენილ დარღვევებზე, რომლებიც პასუხისმგებლები არიან არჩევნების გაყალბებასა და კონსტიტუციის დარღვევაზე, ნამდვილად ვაფასებ. ევროკავშირში ჩემს მეგობრებსა და კოლეგებს მოვუწოდებ, რომ ქართველი ხალხის გვერდით დგომა გააგრძელონ. ოპოზიციასთან საუბრის შემდეგ მადლობელი ვარ, რომ ყველა ოპოზიციური პარტია გაერთიანებულია ახალი არჩევნების, თავისუფალი არჩევნების, სამართლიანი არჩევნების მოთხოვნის გამოხატვისას, რათა ევროპის გულში ამ შესანიშნავი ქვეყნის მომავლის შესახებ ხალხს სიტყვის თქმის უფლება ჰქონდეს“, – აღნიშნა ბუნდესტაგის საგარეო ურთიერთობათა კომიტეტის თავმჯდომარემ.

მიხაილ როთმა გვთხოვა, რომ მასთან შევინარჩუნოთ კომუნიკაცია და თუ რამე იდეები გვექნება, თუ რაში შეიძლება ის იყო ჩართული და გამოგვადგეს, ყველანაირად დაგვეხმარება, ეს იყო მთავარი გზავნილი, რომელიც მან ჩამოიტანა , – ამის შესახებ „კოალიცია ცვლილებისთვის“ ლიდერმა ზურა ჯაფარიძემ გერმანიის ბუნდესტაგის საგარეო საქმეთა კომიტეტის თავმჯდომარე მიხაილ როთისა და ოპოზიციის შეხვედრის დასრულების შემდეგ განაცხადა.

ზურა ჯაფარიძის თქმით, მიხაილ როთი აპირებს, რომ ისევ ინტერესით დააკვირდეს იმას, თუ რა ხდება საქართველოში.

„მთავარი გზავნილი, რომელიც როთმა ჩამოიტანა იყო ის, რომ ის იყო 27 წელი გერმანიის პოლიტიკაში, მათ შორის იყო ძალიან მაღალ თანამდებობებზე, ბუნდესტაგის საგარეო კომიტეტის თავმჯდომარე იყო, ის აღარ აპირებს გერმანიის პოლიტიკაში აქტიურად დარჩენას და იყო იმის სათქმელად ჩამოსული, რომ მიუხედავად იმისა, რომ ის აღარ იქნება გერმანიის აქტიურ პოლიტიკაში ჩართული, მას ჰყავს ძალიან ფართო სანაცნობო და სამეგობრო გერმანიის პოლიტიკურ წრეებში და ის აპირებს, რომ ისევ ინტერესით დააკვირდეს იმას, თუ რა ხდება საქართველოში. გვითხრა, რომ შევინარჩუნოთ მასთან კომუნიკაცია იმიტომ, რომ ისევ აქტიურად იქნება ჩართული ამ ამბებში და თუ შეიძლება, რომ დაგვეხმაროს და ჩართოს თავისი სამეგობრო, სანაცნობო წრე და დააბრუნოს საქართველო ევროინტეგრაციის გზაზე, ის ამას გააკეთებს, ყველაფერს გააკეთებს ამისთვის“, – განაცხად ზურა ჯაფარიძემ.

ფიზიკური დაპირისპირება მოხდა დეპუტატ ირაკლი ზარქუას, ვიქტორ სანიკიძესა და მოქალაქე ლაშა გაბიტაშვილს შორის. გაბიტაშვილმა, აბუ-დაბიში, ერთ-ერთ სასტუმროში მეგობრებთან ერთად მყოფ „ქართული ოცნების” დეპუტატებს, გუშინ, სიტყვიერი შეურაცხყოფა მიაყენა, დღეს კი ინციდენტი ფიზიკურ დაპირისპირებაში გადაიზარდა. ჩხუბის ამსახველი ვიდეოკადრები სოციალურ ქსელში გავრცელდა.

მმართველ გუნდში იმედოვნებენ, რომ ინციდენტთან დაკავშირებით სამართლიანი გადაწყვეტილება იქნება მიღებული.

„ვინაიდან ეს ინციდენტი მოხდა საზღვარგარეთ, უნდა ვიგულისხმოთ, რომ ადამიანები არა მარტო რაღაც გარკვეული გეგმით მოქმედებენ, არამედ ფსიქიკურად დაზიანებულები არიან და სამწუხარო არის, რომ ასეთი არაერთია.

ეს „აღშფოთებული“ გარკვეული საზოგადოება არის შეტევაზე გადმოსული. ასეთი ფაშისტური გამოვლინება და არა მარტო ეს ერთი გამოვლინებაა, არის მახასიათებელი იმ პროპაგანდით მოწამლული ადამიანებისა, რომლებიც, სამწუხაროდ, გამოჩნდნენ თბილისის ქუჩებში.

ორგანიზებულია ეს შეტევა თუ არა, ეს არის ფაშიზმის გამოვლინება, რომელიც სახელს უტეხს ქვეყანას, ყველაფერს რომ თავი დავანებოთ.

რასაკვირველია, ჩვენ იმედი გვაქვს, რომ ყველაფერი გაირკვევა, სამართლიანი გადაწყვეტილება იქნება მიღებული ამასთან დაკავშირებით“, – აცხადებს საქართველოს პარლამენტის თავმჯდომარის პირველი მოადგილე გიორგი ვოლსკი.

საქართველოს იუსტიციის მინისტრმა, ანრი ოხანაშვილმა მოადგილის თანამდებობაზე ირაკლი ბერაია დანიშნა. ინფორმაციას იუსტიციის სამინისტრო ავრცელებს.

„ირაკლი ბერაია პროფესიით ეკონომისტია. მან წარჩინებით დაამთავრა ივანე ჯავახიშვილის სახელობის თბილისის სახელმწიფო უნივერსიტეტის ეკონომიკის ფაკულტეტი. ირაკლი ბერაიას აქვს საკანონმდებლო საქმიანობის მრავალწლიანი გამოცდილება; ის იყო საქართველოს მე-9, მე-10 და მე-11 მოწვევის პარლამენტის წევრი. ირაკლი ბერაიას პოლიტიკურ საქმიანობამდე წარმატებული კარიერა ჰქონდა საბანკო სექტორში“, – აღნიშნულია სამინისტროს ინფორმაციაში.