არ მგონია, სააკაშვილის შეწყალებამ სალომე ზურაბიშვილს კარგი დღე დამართოს, მით უმეტეს, ბოლო თვეების ფონზე, როდესაც ის აპირებს პოლიტიკაში დარჩენას, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილის თქმით, არსებობს, როგორც ქართული მართლმსაჯულების, ისე საერთაშორისო სასამართლოს გადაწყვეტილებები სააკაშვილის დანაშაულებრივ რეჟიმზე.

„ზურაბიშვილი ფიქრობს იმასაც, რომ სააკაშვილის შეწყალების შემთხვევაში, შემდეგ თავად ზურაბიშვილს ვინღა შეიწყალებს, პოლიტიკოსები ან ქართველი ხალხი თუ შეიწყალებს. გვარამიას შეწყალების დროს კიდევ კარგად გადარჩა ქართველი ხალხის რისხვისგან. არ მგონია, სააკაშვილის შეწყალებამ მას კარგი დღე დამართოს, მით უმეტეს, ბოლო თვეების ფონზე, როდესაც ის აპირებს პოლიტიკაში დარჩენას.

ყველასთვის, საერთაშორისო საზოგადოებისთვის ცნობილია, რომ არსებობს საერთაშორისო სასამართლოს, სტრასბურგის სასამართლოს გადაწყვეტილებები, სადაც მიჩნეულია, რომ მან (სააკაშვილმა) შექმნა დანაშაულებრივი რეჟიმი. არსებობს ქართული მართლმსაჯულების უამრავი გადაწყვეტილება, და რაც მთავარია, სამწუხაროდ, არსებობს ფაქტები, რომ ოჯახები პრაქტიკულად განადგურდა“, – განაცხადა გურამ მაჭარაშვილმა.

გურამ მაჭარაშვილის შეფასებით, სააკაშვილის შეწყალებით სალომე ზურაბიშვილი თავის თავს პოლიტიკურ ვერდიქტს გამოუტანს.

„ფორმალურად ზურაბიშვილს ეს შეუძლია, მაგრამ ეს იქნება ვერდიქტი, რომელსაც ის უკვე ვეღარ შეცვლის, ისედაც პრაქტიკულად პოლიტიკურად განადგურებულ თავის პიროვნებას განაჩენს გამოუტანს. მოულოდნელი არაფერი არ არის, მაგრამ სააკაშვილის შეწყალების შემთხვევაში, ის შესაწყალებელი გახდება, ამაზე უნდა დაფიქრდეს“, – აღნიშნა გურამ მაჭარაშვილმა.

რაც შეეხება კითხვას, რომელიც ეხებოდა სააკაშვილის გათავისუფლების კამპანიას, გურამ მაჭარაშვილის თქმით, ეს კინო საზოგადოებას უკვე ნანახი აქვს და დეზინფორმაციაზე აღარ წამოეგება.

„ჩვენ ეს კინო უკვე ნანახი გვაქვს. საერთაშორისო სასამართლომ არაერთხელ პირდაპირ თქვა, რომ ამ ადამიანს არავინ არ აწამებს, არაფერი სჭირს, უნდა ჭამოს საჭმელი და განიკურნება. ვნახეთ, რომ ახლა მშვენივრად წამოჩიტებულა და განცხადებებს აკეთებს. სამარცხვინო საქციელი იკადრეს პოლონელმა ექიმებმა, რომ ნაწილ-ნაწილ უნდოდათ სააკაშვილის გამოტანა და ესეც არ გამოვიდა. ვნახეთ, ვითომ დაფორთხავდა „ვივამედში“ ე.წ. კამერაში, ოროთახიან კარცერ-ლუქსში. ისიც ვნახეთ, რომ ახლა უკვე საკმაოდ კარგად გამოიყურება და არათუ ქართულ, არამედ უნდა, მსოფლიო პოლიტიკას ჩაუდგეს სათავეში. ეს კინო ნანახი აქვს უკვე ქართულ საზოგადოებას და ამ დეზინფორმაციაზე აღარ წამოეგება.

ევროპარლამენტარი იქნება, თუ ნებისმიერი თანამდებობის პირი, რომელიც უტიფარ განცხადებას აკეთებს და ანტიკონსტიტუციურად მოუწოდებს საქართველოს ხელისუფლებას, საერთაშორისო სასამართლოს და ქართული მართლმსაჯულების გადაწყვეტილება თავზე გადაახიონ ქართულ საზოგადოებას და პატიმარი უკანონოდ გამოუშვან, ეს ქართული სახელმწიფოს შეურაცხყოფაა“, – განაცხადა გურამ მაჭარაშვილმა.

პარლამენტის ვიცე-სპიკერის, გია ვოლსკის განცხადებით, საარჩევნო კოდექსში შეტანილ ცვლილებებზე პრეზიდენტის მხრიდან ვეტოს დადება უსამართლოა.

მისივე თქმით, „ეს არის სტრატეგიული მავნებლური პოლიტიკა, რასაც ატარებს სალომე ზურაბიშვილი, ვისაც ძალიან ძნელად თუ დავუძახებთ პრეზიდენტს”.

როგორც ვოლსკი აღნიშნავს, ზურაბიშვილი საბოტაჟს ეწევა.

„დღეს ჩვენ გვაქვს აბსოლუტურად მაღალი დონის პროფესიონალური ცესკო, რომლის თავმჯდომარე არის წარმოდგენილი სალომე ზურაბიშვილის მიერ. გამოუცხადეს საბოტაჟი, მოახდინეს მისი ბულინგი და დღეს ასეთი არასწორი პოლიტიკური მიდგომის ტირაჟირება ხდება, რაც არის კიდევ საბოტაჟის ნაწილი.

არ არის მხოლოდ ის საკითხი, რომ აჭიანურებს პროცესს, ვეტოს ადებს. ეს არის ზედაპირზე რაც ჩანს. ამის იქით გავიხედოთ, ეს არის სტრატეგიული მავნებლური პოლიტიკა, რასაც ატარებს სალომე ზურაბიშვილი, ვისაც ძალიან ძნელად თუ დავუძახებთ პრეზიდენტს“, – განაცხადა ვოლსკიმ.

შეგახსენებთ, საარჩევნო კოდექსში ცვლილებები პარლამენტმა მესამე მოსმენით გუშინ მიიღო. პრეზიდენტმა განაცხადა, რომ აღნიშნულ საკანონმდებლო ცვლილებებს ვეტოს დაადებს.

ახლა ჩვენთვის მთავარი სამიზნეა „ქართული ოცნება“ და არა გახარია. კარებს არავის არც ვუკეტავთ და არც ვაღებთ. რა შედეგებიც ექნებათ პარტიებს, იმის მიხედვით გავუწევთ ანგარიშს, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მისი თქმით, კონკრეტულ პარტიებს მათ მიმართ საქართველოს მოქალაქეთა მხარდაჭერის შესაბამისად დაელაპარაკებიან.

„ოპოზიციის შიგნით კითხვების დასმას მირჩევნია კითხვები დავუსვა „ქართულ ოცნებას,“ რომელმაც გააღარიბა და გააღატაკა ეს ქვეყანა. ყველასთან გვაქვს კითხვები, მაგრამ ყველაზე მეტი კითხვები გვაქვს „ქართულ ოცნებასთან.“ ჯერ არის არჩევნების წინა პერიოდი, არის კონკურენცია და ამ ყველაფერზე არჩევნების შემდეგ უნდა ვილაპარაკოთ. ახლა ჩვენთვის მთავარი სამიზნეა „ქართული ოცნება“ და არა გახარია. კარებს არავის არც ვუკეტავთ და არც ვაღებთ. რა შედეგებიც ექნებათ პარტიებს, იმის მიხედვით გავუწევთ ანგარიშს. წითელ ხაზებს აწესებს საქართველოს მოქალაქე. ვინ როგორ დაუჭერს მხარს კონკრეტულ პარტიას, ყველას იმის შესაბამისად დაველაპარაკებით“, – განაცხადა მანჯგალაძემ.

ნიკა გვარამიამ განაცხადა: „გახარიას პარტიას სამომავლო კოალიციაში ვხედავ, გახარიასთან დაკავშირებით, წარსულთან მიმართებით კითხვების დასმას ამ ეტაპზე არ ვაპირებ“.

ივანიშვილი ვერ იტანს ქურდობას, ღარიბაშვილი იმიტომ „მოაძრო“, რომ თავისი „კასირი“ გაუჩნდა – ივანიშვილი თვლის, რომ მას პარავენ, რადგან ბიუჯეტის ფული მისია და ის ანაწილებს კონვერტებით და თუ გვერდზე შემოსავალი გაიჩინე, ამის გამო შეიძლება გაგაგდოს, მთავარია რომ ეს მანკიერი სისტემა დარჩეს და ყველამ იცოდეს, რომ ივანიშვილის ხელი აჭმევს და ამ ხელს არ უნდა უკბინოს,- ამის შესახებ საქართველოს მესამე პრეზიდენტმა მიხეილ სააკაშვილმა დიდი ოდენობით საბიუჯეტო თანხების ჯგუფურად გაფლანგვის ბრალის თაობაზე მის სასამართლო პროცესზე დისტანციურად ჩართვისას განაცხადა.

როგორც სააკაშვილმა აღნიშნა, ყველაფერი გამოსწორდება და 26 ოქტომბერს, საპარლამენტო არჩევნებზე ხმა უნდა მისცენ იმედს.

„დღეს როგორ ხდება ფულის განაწილება – ძირითადი ფული იკრიბება მთავარ ქურდთან, შემდეგ ის კონვერტებში ანაწილებს. ამას ჰქვია თეთრი კონვერტების დღე, როდესაც ნაწილდება სხვადასხვა ორგანოებს შორის, მათ შორის არიან მინისტრები, პარლამენტარები. ივანიშვილი ვერ იტანს ქურდობას. ღარიბაშვილი „მოაძრო“ იმიტომ, რომ აღმოჩნდა, რომ ღარიბაშვილს თავისი „კასირი“ გაუჩნდა. ივანიშვილი თვლის, რომ მას პარავენ, რადგან ბიუჯეტის ფული მისია და ის ანაწილებს კონვერტებით და თუ გვერდზე შემოსავალი გაიჩინე, ამის გამო შეიძლება გაგაგდოს. მთავარია რომ ეს მანკიერი სისტემა დარჩეს და ყველამ იცოდეს, რომ ეს ხელი, ივანიშვილის ხელი აჭმევს და ამ ხელს არ უნდა უკბინოს. მე ასე არ ვაკეთებდი, პირიქით – ყველაფერს ვაკეთებდი, რომ ამათ ფული არ ეკეთებინათ. მე ყველაფერს ვაკეთებდი, რომ პირადი მაგალითი მიმეცა იმისა, რომ მე არ ვაკეთებ ფულს და თქვენც არ გაგაკეთებინებთ. ყოველთვის არ გამოვიდა, მაგრამ უმეტეს შემთხვევაში გამოვიდა. ამიტომ ჩვენი თითქმის არცერთი ყოფილი თანამდებობის პირი არ არის არათუ მილიონერი, არამედ არაა მდიდარი, ძალიან უჭირს ბევრს. ბევრი ამერიკაში მუშაობდა სატვირთო მანქანის მძღოლად, მტვირთავად. ეს ხალხი მინახავს. უბედურება და ტრაგედია დატრიალდა ჩვენს თავს. ყველაფერი გამოსწორდება. 26 ოქტომბერს ჩვენ ვაძლევთ ხმას ჩვენს იმედს, ხმას ვაძლევთ იმას, რომ საქართველოს და თითოეულ ქართულ ოჯახს იმედი დაუბრუნდება და იმას, რომ ყველა ერთად რაღაც ახალს, დიდს და განსაკუთრებულს ვქმნით. მე არ მქონდა არცერთი წუთი სხვა რაღაცაზე ფიქრის, ყველაფერი დანარჩენი იყო მეასე პლანზე. დიდი საქართველოს, განსაკუთრებული, მბრწყინავი საქართველოს პროექტი, რომელსაც მთელი მსოფლიო შენატრის – ასეთი იყო საქართველო, მსოფლიოს ნომერ პირველი რეფორმატორი და ეს დაბრუნდება“,- განაცხადა მიხეილ სააკაშვილმა.