კანონის გვერდის ავლით ხდება პარტიული აქტივიზმის დაფინანსება, რაც რა თქმა უნდა კანონის დარღვევაა, – ამის შესახებ ფრაქცია „ქართული ოცნების“ თავმჯდომარის პირველმა მოადგილემ გია ცაგარეიშვილმა განაცხადა.

„ამან იმდენად საგანგაშო ფორმები შეიძინა, იმდენად ყოველდღიურად ხდება, რომ ამას ადრე თუ გვიან, წერტილი უნდა დაესვას“, – აღნიშნა ცაგარეიშვილმა.

საფრანგეთის რესპუბლიკის პრემიერ-მინისტრი გაბრიელ ატალი ირაკლი კობახიძეს თანამდებობაზე დანიშვნას ულოცავს. როგორც მისალოც წერილშია აღნიშნული, საფრანგეთსა და საქართველოს ევროპული მომავალი აკავშირებთ.

„ბატონო პრემიერ-მინისტრო, მსურს, გულწრფელად მოგილოცოთ საქართველოს მთავრობის მეთაურად დანიშვნა და ამასთან ერთად, გულითადად გისურვოთ დიდი წარმატებები ამ საპატიო მისიის შესრულებაში ქართველი ხალხის საკეთილდღეოდ. გიდასტურებთ საფრანგეთის რესპუბლიკის მთავრობის მტკიცე ნებას, ერთად ვიმუშაოთ ჩვენს ქვეყნებსა და ხალხებს შორის არსებული მეგობრული ურთიერთობებისა და ნდობის კიდევ უფრო გასაღრმავებლად. საქართველომ გააკეთა თავისი არჩევანი და მტკიცედ ადგას ევროკავშირისკენ მიმავალ გზას. ევროპულმა საბჭომ გასული წლის ბოლოს, დეკემბრის თვეში, მიიღო გადაწყვეტილება, თქვენი ქვეყნისთვის მიენიჭებინა ევროკავშირის წევრობის კანდიდატის სტატუსი და გამოხატა რწმენა, რომ ქვეყანა შეუქცევადად და ინკლუზიურად შეასრულებს იმ რეკომენდაციებს, რომლებიც კომისიამ 2023 წლის 8 ნოემბერს განსაზღვრა, კერძოდ, დემოკრატიული ინსტიტუტებისა და საარჩევნო გარემოს გაძლიერების კუთხით. საფრანგეთსა და საქართველოს, ისე როგორც არასდროს, ევროპული მომავალი აკავშირებთ. ამ მხრივ ეჭვი არ მეპარება თქვენს მიზანდასახულობაში და კიდევ ერთხელ გიდასტურებთ ამ გზაზე ჩვენს სრულ მხარდაჭერას. საქართველოს საფრანგეთთან განსაკუთრებული პარტნიორობა აკავშირებს. დარწმუნებული ბრძანდებოდეთ, რომ ჩემი მთავრობა გააგრძელებს საქართველოს სუვერენიტეტისა და ტერიტორიული მთლიანობის სრულ და უპირობო მხარდაჭერას მის საერთაშორისოდ აღიარებულ საზღვრებში.

იმ ფონზე, როდესაც ევროპა ინფორმაციით მანიპულირების კამპანიამ მოიცვა, ჩვენი მოვალეობაა, გავაგრძელოთ და კიდევ უფრო განვამტკიცოთ ჩვენი თანამშრომლობა და ერთობლივად დავიცვათ საერთო ღირებულებები. კიდევ ერთხელ გილოცავთ, ბატონო პრემიერ-მინისტრო და წარმატებებს გისურვებთ თქვენს საქმიანობაში”, – აღნიშნულია წერილში.

პარტია „გირჩის“ მიერ ინიცირებული ამნისტიის კანონპროექტი ექსპრეზიდენტ მიხეილ სააკაშვილსაც შეეხება – ამის შესახებ პარტიის ერთ-ერთმა ლიდერმა, ალექსანდრე რაქვიაშვილმა განაცხადა.

თუმცა, რაქვიაშვილის თქმით, ვინაიდან ექსპრეზიდენტის წინააღმდეგ სასამართლოში რამდენიმე საქმეა აღძრული, რთულია პროგნოზირება, კანონპროექტით დატოვებს, თუ არა ის ციხეს.

„ცხადია, ამნისტიის პროექტი მიხეილ სააკაშვილსაც შეეხება. დატოვებს თუ არა ციხეს უშუალოდ ამნისტიით, ეს ტექნიკური ამბავია. მის წინააღმდეგ საქმეებია აღძრული და იქ რა მოხდება, ამის პროგნოზირებას ჩემს თავზე არ ავიღებ. მაგრამ, გასაგებია, ამნისტია შეეხება მიხეილ სააკაშვილს.

სინამდვილეში, ყველა პატიმარს ეხება ეს ამნისტია. მცირე გამონაკლისის გარდა, კერძოდ, არასრულწლოვნების წინააღმდეგ ძალადობრივი დანაშაულებების გარდა.

ფაქტობრივად, 10 000 ადამიანს შეეხება, ასე თუ ისე. არ მგონია, რომ ძალიან ბევრმა პირდაპირ დატოვის ციხე ამის გამო, მაგრამ ძალიან ბევრს შეუმცირდება სასჯელი“, – განაცხადა ალექსანდრე რაქვიაშვილმა.

„გირჩის“ მომზადებული ამნისტიის პროექტის განხილვას პარლამენტი მალე დაიწყებს, ამნისტია მძიმე ნარკოტიკის რეალიზატორებს არ შეეხებათ. ინიციატივა ეხებათ უვადო პატიმრებსა და სამოხელეო დანაშაულისთვის დაკავებულებსაც.

კანონპროექტის თანაავტორები იზიარებენ მოსაზრებას, რომ ამ კანონპროექტის მიღება „ოცნების“ გარეშე ვერ მოხდება.

„გირჩის“ ახალ ინიციატივას „ამნისტია მარიხუანას რეალიზატორებს“ „ლელოსა“ და გახარიას პარტიის გარდა თითქმის ყველა საპარლამენტო ოპოზიციური პარტია და პოლიტიკური ჯგუფი უჭერს მხარს, მათ შორის, „ერთიანი ნაციონალური მოძრაობა“, „სტრატეგია აღმაშენებელი“, “ევროპტიმისტები” . პროექტს, სავარაუდოდ, მხარს დაუჭერენ ევროპელი სოციალისტებიც.

მიხეილ სააკაშვილი ისეთი მუხლით არის გასამართლებული, რომელ მუხლზეც ამნისტიის გავრცელება სტრასბურგის სასამართლოს მიერ კონვენციის დარღვევად აღიქმება – ასეთი კატეგორიის მუხლებთან დაკავშირებით ამნისტია გამოყენება არ შეიძლება! მიხეილ სააკაშვილთან მიმართებაში ამნისტიის გავრცელების შანსი არის ნული! – ეს განცხადება პარლამენტის იურიდიულ საკითხთა კომიტეტის ხელმძღვანელმა ანრი ოხანაშვილმა ოპოზიციის ნაწილის მიერ ინიცირებულ ამნისტიის პროექტთან დაკავშირებით გააკეთა.

ამასთან, ოხანაშვილის თქმით, ამ ეტაპზე ხელისუფლების დღის წესრიგში საყოველთაო ამნისტიის აქტის მიღება არ დგას.

“პირველ რიგში, ჩვენ აღნიშნული პროექტი უნდა შევისწავლოთ და დავამუშაოთ. რაც შეეხება ამნისტიას, ყოველ ჯერზე როცა დღის წესრიგში ამის აუცილებლობა დგება, ჰუმანიზმის პრინციპებიდან გამომდინარე, “ქართული ოცნების“ ხელისუფლება ასეთ გადაწყვეტილებას იღებს – ჩვენ ამნისტიის არაერთი აქტი გამოგვიცია. საჭიროების შემთხვევაში ჩვენ შეიძლება ასეთი გადაწყვეტილება მივიღოთ, რასაც ყველა უწყების ფართო ჩართულობა სჭირდება. ამ ეტაპზე ჩვენი მხრიდან ასეთი გადაწყვეტილება დღის წესრიგში არ დგას!

ამნისტია კონკრეტულ პირებს არ ეხება. ამნისტია არის აქტი კონკრეტულ მუხლებთან დაკავშირებით და საკითხის კონკრეტულ პირებთან მიმართებით დასმა არასწორია. ადამიანის უფლებათა ევროპულმა სასამართლომ მათ შორის გირგვლიანის საქმესთან დაკავშირებულ შეწყალებაზე იმსჯელა – პრობლემაა ისეთი მუხლით გასამართლებული თანამდებობის პირის ამნისტია, რომელი მუხლით გასამართლებულ პირსაც ობიექტურად ამნისტიის შეხება არ ეკუთვნის. მიხეილ სააკაშვილის შემთხვევა სწორედ ასეთია.

წინა ხელისუფლების დროს ციხეში 24 000 პატიმარი იყო, ახლა დაახლოებით 10 000 პატიმარია, რაც რადიკალური სხვაობაა. ამნისტიის გამოცემა ერთბაშად ვერ მოხდება – ყველაფერს შეფასება, სამართლებრივი პრინციპის გათვალისწინება, საზოგადოებრივ უსაფრთხოებაზე ზრუნვა და დაბალანსებული გადაწყვეტილების მიღება სჭირდება.

ყველამ უნდა იცოდეს, რომ როცა პირს დანაშაული აქვს ჩადენილი, ამის ლოგიკური შედეგი არის სასჯელი – სამართლიანი და დაბალანსებული“, – განაცხადა ანრი ოხანაშვილმა.

გვსურს გამოვეხმაუროთ რიგი მედიასაშუალებების მიერ მცდარი ინტერპრეტაციით მიზანმიმართულად გავრცელებულ ინფორმაციას, რომელიც საზოგადოებრივი აზრის მანიპულაციასა და მოსახლეობის შეცდომაში შეყვანას ემსახურება, – ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრის აპარატის განცხადებაშია ნათქვამი.

„კერძოდ, ზოგიერთი მედიასაშუალების მიერ გავრცელდა ინფორმაცია არასამთავრობო ორგანიზაცია ISFED-ის კვლევაზე – „პოლიტიკური რეკლამები „მეტას“ პლატფორმებზე საქართველოში (2023 წლის ოქტომბერი-დეკემბერი)” დაყრდნობით, თითქოს შერიგებისა და სამოქალაქო თანასწორობის საკითხებში სახელმწიფო მინისტრმა, სოციალური მედიის „მეტას“ პლატფორმებზე პოლიტიკური რეკლამის მიზნით 28,864 დოლარი დახარჯა.

შერიგებისა და სამოქალაქო თანასწორობის სახელმწიფო მინისტრის აპარატის, მათ შორის სახელმწიფო მინისტრის მიერ, 2023 წლის 1-ელი ოქტომბრიდან 29 დეკემბრის პერიოდში გაწეული საქმიანობის თაობაზე „მეტას“ პლატფორმაზე ინფორმაციის გავრცელებისა და საზოგადოების ფართოდ ინფორმირების მიზნით დაიხარჯა 736 დოლარი.

რაც შეეხება ISFED-ის კვლევაში ასახული თანხიდან დანარჩენ თანხას, კერძოდ, 28,128 დოლარს, აღნიშნული წარმოადგენს ქართული ენის პოპულარიზაციისა და შესწავლის შესაძლებლობების შესახებ, ფართომასშტაბიანი და მრავალკომპონენტიანი კამპანიის „ქართული ენა გვაერთიანებს“ დანახარჯს, რომელიც სამ ენაზე (ქართული, სომხური, აზერბაიჯანული) წარიმართა. ამ ინფორმაციას ადასტურებს და ხაზგასმით ასახავს თავად არასამთავრობო ორგანიზაცია ISFED-ის კვლევაც, სადაც ვკითხულობთ: „უწყების საქმიანობის ამსახველ პოსტებთან ერთად, გვერდზე მნიშვნელოვანი ადგილი დაეთმო კამპანიას „ქართული ენა გვაერთიანებს“. მოცემული კამპანია მიზნად ისახავდა არაქართულენოვან მოსახლეობაში სახელმწიფო ენის შესწავლის პოპულარიზაციასა და ამ მხრივ არსებულ შესაძლებლობებზე ცნობიერების ამაღლებას. რეკლამების ნაწილი გამოქვეყნებული იყო ეთნიკური უმცირესობების ენებზე და სამიზნე აუდიტორიას წარმოადგენდნენ „მეტას“ ახალგაზრდა მომხმარებლები შესაბამისი ეთნიკური ჯგუფით კომპაქტურად დასახლებული რეგიონებიდან“.

აღსანიშნავია, რომ სამოქალაქო თანასწორობისა და ინტეგრაციის სახელმწიფო პოლიტიკის განხორციელება სახელმწიფო მინისტრის აპარატის ხელმძღვანელობითა და კოორდინაციით, ყველა შესაბამისი სახელმწიფო უწყების ჩართულობით მიმდინარეობს. პოლიტიკის უმთავრეს ინსტრუმენტს წარმოადგენს სამოქალაქო თანასწორობისა და ინტეგრაციის 2021-2030 წლების სახელმწიფო სტრატეგია, რომლის პირველი რიგის და ყველაზე მნიშვნელოვანი პრიორიტეტია „სახელმწიფო ენა ინტეგრაციის მხარდასაჭერად“.

სწორედ ამ უმთავრესი მიზნის მისაღწევად განხორციელდა კამპანია „ქართული ენა გვაერთიანებს“, რომლის ფარგლებშიც სახელმწიფო ენის შესწავლის მნიშვნელობის ხაზგასმისა და პოპულარიზაციის, ისევე როგორც ქართული ენის შესწავლის არსებულ შესაძლებლობებზე არაქართულენოვანი მოსახლეობის ცნობიერების ამაღლების მიზნით, „მეტას“ პლატფორმაზე განთავსებულ იქნა ზემოაღნიშნული ღირებულების შესაბამისი ვიდეო-რგოლები“, – აღნიშნულია განცხადებაში.