მოდი გულწრფელები ვიყოთ, ნიკა გვარამია ამ პარტიის, [ნაციონალური მოძრაობის], რაც ოპოზიციაშია 2012 წლიდან, მიუხედავად იმისა, რომ პარტიული არ ყოფილა, მთავარი მოტორი იყო, მათ შორის იმ პირობებში როცა სააკაშვილი არ იყო აქ – განაცხადა გიგი უგულავამ ტვ პირველის ტოქშოუში „რეაქცია“.

კითხვაზე, რამდენად წაართმევენ ნიკა მელია და ნიკა გვარამია „ნაციონალურ მოძრაობას“ ამომრჩეველს, უგულავამ უპასუხა, რომ ის ამომრჩეველი, რომელიც ან ერთს, ან მეორეს მისცემს ხმას, მათი დიდი უმრავლესობა წინა არჩევნებზე „ნაციონალური მოძრაობის“ ამომრჩეველი იყო.

„ვფიქრობ, რომ „ნაციონალური მოძრაობისთვის“ ეს პრობლემაა. მოდი გულწრფელები ვიყოთ, ნიკა გვარამია ამ პარტიის [ნაციონალური მოძრაობის], რაც ოპოზიციაშია 2012 წლიდან, მიუხედავად იმისა, რომ პარტიული არ ყოფილა, მთავარი მოტორი იყო, მათ შორის იმ პირობებში როცა სააკაშვილი არ იყო აქ. ნიკა მელია ბოლო 5 წელი თავმჯდომარე იყო და თან პოლიტიკური პროცესის შედეგად არჩეული. ბოლო არჩევნებიდან რომ ავიღოთ, ქალაქის მერობის კანდიდატები, ძირითადი უმრავლესობა, სამი-ოთხი, ვინც წარმატებული იყო, მათ პარტია დატოვეს. წინა არჩევნებზე წარმატებული კანდიდატი რომ წავა შენგან ეს პარტიის პრობლემაა. გამოწვევები სხვადასხვაა, „ნაციონალური მოძრაობისთვის“ ეს პრობლემაა, მაგრამ 2 კვირის დიაპაზონში ორი ახალი პარტია რომ გაიხსნება, ორი ნიკასი, ორი ანზორის ძე და ორივე მეგრული გვარით, მარინე გიორგის ასული ფერაძესავით გამოვა. ისინიც ძალიან მძიმე მდგომარეობაში აღმოჩნდებიან. მათ ექნებათ უფრო მეტად პრობლემა, რადგან „ნაცმოძრაობა“ არის დიდი პარტია და მას აქვს რეგენერირების უნარი“, – განაცხადა გიგი უგულავამ.

ჩვენ თუ გადავხედავთ ისტორიას, დავინახავთ, რომ ჩვენ მიერ გადადგმული ნაბიჯები ამერიკასთან სტრატეგიულ ურთიერთობებში არის პირნათელი (მათივე შეფასებებით), მათ შორის ჩვენი შრომით და ჩვენი ჯარისკაცების სისხლის ფასად (ათეულობით ჯარისკაცი დაიღუპა, ასევე ათეულობით ჯარისკაცს ჯანმრთელობა დაუზიანდა), – ამის შესახებ, „ხალხის ძალის“ ერთ-ერთმა ლიდერმა გურამ მაჭარაშვილმა მედიასთან განაცხადა.

მისი თქმით, ქვეყნები იბრძვიან იმისთვის, რომ საკუთარი ქვეყნის სუვერენიტეტი გაზარდონ, საქართველოს ოპოზიცია და არასამთავრობო სექტორის ნაწილი კი იბრძვის იმისთვის, რომ სუვერენიტეტი შეილახოს.

„პრობლემა იცით რა არის? მათ სურდათ ქართული საზოგადოება შეეგუებინათ იმისთვის, რომ მთავარია სტრატეგიული პარტნიორი რას იტყვის და იმის იქეთ, არ უნდა განსაჯო ის თუ რა მოქმედებას აწარმოებს.

ჩვენ თუ გადავხედავთ ისტორიას, დავინახავთ, რომ ჩვენს მიერ გადადგმული ნაბიჯები ამერიკასთან სტრატეგიულ ურთიერთობებში არის პირნათელი (მათივე შეფასებებით), მათ შორის ჩვენი შრომით და ჩვენი ჯარისკაცების სისხლის ფასად (ათეულობით ჯარისკაცი დაიღუპა, ასევე ათეულობით ჯარისკაცს ჯანმრთელობა დაუზიანდა).

30 წელია ამერიკასთან უვიზო მიმოსვლა არ არსებობს; სამწუხაროდ, ვერ შევძელით პირდაპირი ფრენები. ეს ყველაფერი ხომ ურთიერთობაა. თუ ორმხრივ სტრატეგიულ ურთიერთობაში მე ყველაფერს ვაკეთებ და მეორე მხრიდან არ გადაიდგმება ძირითადი ნაბიჯები მათ შორის, არც ინვესტიციების გაზრდის თვალსაზრისით და ა.შ. ეს როგორი დამოკიდებულებაა? სტრატეგიული ურთიერთობაა, თუ უფრო ვასალურ დამოკიდებულებას წააგავს.

ჩვენ, ზედმეტად თავს არავის ვესხმით და არც პიროვნული პრობლემები არ გაგვაჩნია. მაგრამ, როდესაც საქართველოს წინააღმდეგ პირდაპირ არის გადმოდგმული ნაბიჯები და აღიქვამენ საქართველოს, როგორც კოლონიას – ეს რა თქმა უნდა, მიუღებელია.

რატომღაც, გარკვეულ წრეებში გაჩნდა აზრი, ეს ხომ არ არის ურთიერთობის გადახედვა. იმის საშიშროებას და რისკს რატომ ვერ ხედავენ, რომ ამით საქართველოს სუვერენიტეტი ილახება?

ქვეყნები იბრძვიან იმისთვის, რომ საკუთარი ქვეყნის სუვერენიტეტი გაზარდონ, ჩვენი ოპოზიცია და არასამთავრობო სექტორის ძირითადი ნაწილი კი იბრძვის იმისთვის, რომ ჩვენი სუვერენიტეტი შეილახოს. წარმოიდგინეთ, ჩვენ დამოუკიდებლობისთვის ვიბრძოლეთ იმიტომ, რომ სხვა ქვეყნის საელჩოებმა დაგვინიშნონ მოსამართლეები, სხვა ქვეყნიდან დაფინანსებულმა „ენჯეოებმა“ დაგვინიშნონ მთავრობის წევრები და პარლამენტში კანონების წერა გვიკარნახონ? ეს უნდათ ზუსტად. ჩვენი სუვერენიტეტი ხომ ამით ილახება და რა თქმა უნდა, ჩვენ ამას არ დავუშვებთ. ნებისმიერ ისეთ ურთიერთობას გადავხედავთ, რომელიც იქნება ჩვენი ქვეყნის სუვერენიტეტის საწინააღმდეგო“, – განაცხადა მაჭარაშვილმა.

ეს არ იყო შეცდომა, არამედ იყო მიზანმიმართული ქმედება, რასაც რადიკალური ოპოზიციის 6-თვიანი ბოიკოტი მოჰყვა, – ამის შესახებ „ხალხის ძალის“ ერთ-ერთმა ლიდერმა მიხეილ ყაველაშვილმა განაცხადა არასამთავრობო ორგანიზაცია „სამართლიანი არჩევნებისა და დემოკრატიის საერთაშორისო საზოგადოებაზე“ საუბრისას.

„ეს იყო დანაშაული და პასუხი, რომ შეცდომა მოუვიდათ და ამით გაიმართლონ თავი, ეს შეუძლებელია. რადიკალურ ოპოზიციაზე რადიკალურები გახდნენ, თუ გახსოვთ 2022 წლის ზაფხულის მოვლენები, სადაც პოლიტიკურ სცენაზე ავიდნენ ეს ადამიანები და ხელისუფლების შეცვლას აპირებდნენ. სერგი კაპანაძე წლების განმავლობაში იყო რადიკალური ოპოზიციის წარმომადგენელი. როგორ შეიძლება ის იყოს ნეიტრალურად აღქმული?“, – აღნიშნა ყაველაშვილმა.

2020 წელს, „სამართლიანი არჩევნების“ მიერ გამოქვეყნებულ საპარლამენტო არჩევნების ხმების პარალელური დათვლის (PVT) შედეგებში შეცდომა აღმოჩნდა. ISFED-ის მაშინდელმა აღმასრულებელმა დირექტორმა, ელენე ნიჟარაძემ თანამდებობა მას შემდეგ დატოვა, რაც ორგანიზაციის გამგეობამ აღნიშნულ საკითხზე პასუხისმგებლობა მას დააკისრა.

მმართველი გუნდი მესამე სექტორის ნაწილს აკრიტიკებს, რომელიც ევროკავშირის განსაზღვრული ცხრა ნაბიჯის შესრულებაზე ალტერნატიულად მუშაობს – ამ შემთხვევაში საუბარია დეზინფორმაციასთან ბრძოლაზე, რომლის შესრულებაც „გრასმა“ და ISFED-მა საკუთარ თავზე აიღეს. „ქართულ ოცნებას“ ამ ორგანიზაციების ობიექტურ მუშაობაში ეჭვი ეპარება, ამის არგუმენტად კი მათი წარსული საქმიანობიდან კონკრეტული ფაქტები მოჰყავს. მმართველი გუნდისთვის მიუღებელია დეზინფორმაციასთან ბრძოლა მიანდონ ISFED-ს, რომელმაც მათი თქმით, 2020 წლის საპარლამენტო არჩევნებზე პარალელური დათვლის შედეგები გააყალბა.

რაც შეეხება „გრასს“, ამ ორგანიზაციის ერთ-ერთი დამფუძნებელი ელენე ხოშტარიაა. „ქართულ ოცნებაში“ აცხადებენ, რომ სწორედ ხოშტარია ავრცელებდა სანქციების გვერდის ავლასთან დაკავშირებით არაერთ დეზინფორმაციას.

მმართველი გუნდისგან განსხვავებით, „გრასს“ და ISFED-ს სრულად ენდობა ოპოზიციის ნაწილი.

არ ვიცი რას გულისხმობთ, მაგრამ ეს იმ პროპაგანდის ნაწილია, რომელსაც სამწუხაროდ დიდი ხანია საქართველოს ხელისუფლება და მასთან დაახლოებული მედია საშუალებები ეწევიან – ასე უპასუხა „საქართველოს რეფორმების ასოციაციის“ დამფუძნებელმა, სერგი კაპანაძემ ჟურნალისტის დასმულ კითხვას იმის შესახებ, რომ ოპოზიციური პარტიები არასამთავრობო ორგანიზაციების გავლით ფინანსდებიან.

მისივე თქმით, პროპაგანდის მიზანია არასამთავრობო ორგანიზაციების დისკრედიტაცია. კითხვაზე, თუ რამდენად არის სწორი პოლიტიკაში ამ კუთხით თანხების შედინება, სერგი კაპანაძე აღნიშნავს, რომ არასამთავრობო ორგანიზაციას აქვს არა მხოლოდ უფლება, არამედ ვალდებულებაც რომ თავიანთი აქტიური პოზიცია გამოხატონ ბევრ თემაზე.

„ამ პროპაგანდის ამოცანა და მიზანია, რომ მოახდინონ არასამთავრობო ორგანიზაციების და საერთაშორისო პარტნიორების დისკრედიტაცია და ბრალი დასდონ იმაში, რომ თითქოს ისინი პოლიტიკურ პროცესებში ერევიან. ამ დროს, ძალიან მარტივი ანაბანა არის დემოკრატიის, რომ იქნება ეს არასამთავრობო ორგანიზაცია თუ ნებისმიერი სამოქალაქო ორგანიზაცია, მათ აქვთ არათუ უფლება, არამედ ვალდებულებაც რომ თავიანთი აქტიური პოზიცია გამოხატონ ბევრ თემაზე. რაც შეეხება დონორებს, დონორებს ასევე აქვთ ვალდებულება და პასუხისმგებლობა იმისა, რომ არასამთავრობო ორგანიზაციების, მათ შორის, კრიტიკულად განწყობილი არასამთავრობო ორგანიზაციების საქმიანობას შეუწყონ ხელი. სამწუხაროდ, დიდი ხანია საქართველოს ხელისუფლება და სხვადასხვა ჯგუფები ცდილობენ, რომ ეს თავიანთი პოლიტიკური მიზნებისთვის გამოიყენონ და მოახდინონ როგორც საქართველოს პროდასავლური არჩევანის და ჩვენი პარტნიორების დისკრედიტაცია, ისე არასამთავრობო სექტორის დისკრედიტაცია. შესაბამისად, არაფერი პრობლემატური იმაში, რასაც თქვენ ცდილობთ რომ გამოიყვანოთ არ არის. ყველაფერი არის ლეგალური, ლეგიტიმური და უფრო მეტიც, საერთაშორისო პრაქტიკით მიღებული. გარდა იმ ქვეყნებისა, სადაც ეგ ითვლება პრობლემად და ასეთები არიან რუსეთი და სხვა ავტოკრატიული ქვეყნები, რომლებიც ყოველთვის იქ ეძებენ ძაღლის თავს, სადაც თქვენ ახსენეთ“-განაცხადა სერგი კაპანაძემ.