საგარეო ჩარევაზე წუწუნთან ერთად, ზოგიერთი გერმანელი მოხარულია, თავად ჩაერიოს სხვა ქვეყნების შიდა საქმეებში და დეზინფორმაციაც გაავრცელოს, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელ X-ში წერს.

პაპუაშვილი გამოეხმაურა საქართველოში მიმდინარე მოვლენებთან დაკავშირებით ბუნდესტაგის წარმომადგენლების განცხადებას, რომელშიც ისინი აღნიშნავენ, თითქოს არჩევნებზე ეუთო-ს გრძელვადიანი დამკვირვებლები არ იყვნენ დაშვებული.

„ევროპაში საგარეო ინტერვენციისა და დეზინფორმაციის თაობაზე ცხარე განხილვების პარალელურად, გერმანიის წამყვანი პარტიების ზოგიერთი წარმომადგენელი ვერ აცნობიერებს, რომ თავად ერევა სხვის საქმეში და დეზინფორმაციასაც თვითონ ავრცელებს. საქართველოს საპარლამენტო არჩევნების შესახებ მათ მიერ გამოქვეყნებული განცხადება აშკარა ტყუილებს შეიცავს. ჯერ ერთი, ამ განცხადებაში მოყვანილი ფაქტის საპირისპიროდ, ეუთო/ოდირის დელეგაცია საქართველოში საპარლამენტო არჩევნებამდე ერთი თვით ადრე ჩამოვიდა და ყველანაირი პირობაც შეექმნა საქმიანობისათვის; მეორეც, საქართველოს პრემიერ-მინისტრს, ირაკლი კობახიძეს არასოდეს უთქვამს, რომ „გამორიცხავდა ევროკავშირთან წევრობის მოლაპარაკებებს 2028 წლამდე“. მან განაცხადა, რომ საქართველოს ხელისუფლება თავად არ წამოწევდა ამ საკითხს და, იმავდროულად, მოუწოდა ევროკავშირს, დროულად გაეხსნა ეს მოლაპარაკებები. „გამორიცხვა“ მხოლოდ და მხოლოდ განცხადების ავტორების ფანტაზიის ნაყოფია. ეს აშკარა ტყუილები, გერმანიის ბუნდესტაგის საგარეო საქმეთა კომიტეტის თავმჯდომარის, როთის მიერ არათუ საქართველოს საქმეებში ჩარევასთან, არამედ რადიკალური ოპოზიციის წინასაარჩევნო კამპანიაში პირდაპირ მონაწილეობასთან ერთად, შეცდომას გამორიცხავს: საგარეო ჩარევაზე წუწუნთან ერთად, ზოგიერთი გერმანელი მოხარულია, თავად ჩაერიოს სხვა ქვეყნების შიდა საქმეებში და დეზინფორმაციაც გაავრცელოს“, – განაცხადა შალვა პაპუაშვილმა.

მე მგონი, ჩვენ ძალიან ვცოდავთ, რომ ჯო უილსონზე არ ვყვებით, ვინ არის ეს ადამიანი. ჩვენ ფული არ გადავუხადეთ ლობირებაში, ახლა სტილი შეცვალა, – ამის შესახებ პარტია „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ განაცხადა.

მისი თქმით, ეს ადამიანი იმიტომ დაიქირავეს „ნაცებმა“, რომ პოზიციონირებს, როგორც კონსერვატორი და ტრამპისტს ეძახის თავის თავს.

„ჯო უილსონი არის ძალიან კომუნიკაბელური ადამიანი წარსულიდან, რომელიც ხან მაკა ბოჭორიშვილთან ერთად გადაიღებდა ფოტოს, მერე დაბეჭდავდა, გამოუგზავნიდა ათობით ფოტოს, ხან ნიკა სამხარაძესთან ერთად გადაიღებდა ფოტოს, ხან ლობირებას შესთავაზებდა. ახლა შეცვალა სტილი. ჩვენ ფული არ გადავუხადეთ. ჩვენ არასდროს გვითქვამს, მოდით, ბატონო ჯო, გადაგიხდით ახლა ფულს ლობირებაში. ასეთი პირადი ძალიან უშუალო და მოსიყვარულე კომუნიკაციები ხშირი ყოფილა ჩვენს სხვადასხვა მეგობარს, ლიდერსა და ბატონ ჯოს შორის. ეს ადამიანი მხოლოდ და მხოლოდ იმიტომ დაიქირავეს „ნაცებმა“, რომ პოზიციონირებს როგორც კონსერვატორი და ტრამპისტს ეძახის თავის თავს, თუმცა ვხედავთ, რომ მისი დამოკიდებულება და ბოლოდროინდელი არც განცხადებები და არც გადაწყვეტილებები ტრამპის პოლიტიკას დიდად არ ემთხვევა. აქედან გამომდინარე, მანიპულირება საქართველოში შიდა აუდიტორიისთვის, რომ ეს ადამიანი არის კონსერვატორი, თითქოს ტრამპის მომხრე და ა.შ., არის იმდენად გაცვეთილი და გაყიდული თამაში, რომ მეტი არ შეიძლება. უბრალოდ, არის ლობისტი. ამერიკაში არ არის აკრძალული ლობისტური საქმიანობა. ბევრ ფულს უხდიან და ამის საშუალებაც აქვთ, რადგან პენსიონერებს რუსეთიდან და სხვა ქვეყნებიდან ძალიან ბევრი ფული გამოსძალეს, თავის დროზეც ბევრი ფული უშოვიათ, ბრილიანტებიც კი აქვთ „ნაცმოძრაობის“ ლიდერებს. ეს გახმოვანდა, ფაქტების დონეზე დაიდო, უძვირესი ბრილიანტებიც უყიდიათ ომიდან ერთ-ორ დღეში, ამიტომ ამის საშუალება აქვთ და ჯო უილსონის დაქირავებასაც ამ საქმისათვის, რასაც ის აკეთებს, არაფერი უნდა“, – განაცხადა მდინარაძემ.

თემურ ჭყონიას ერთ მეგობრულ რჩევას მივცემდი – თავს ზედმეტად ნუ დაიიმედებს და პოლიტიკაში ზედმეტად ნუ ჩაერევა, თავის სანქციებს მიხედოს, რომელიც შეიძლება თავისივე სათავო ოფისიდან დაუწესონ იმის გამო, რომ პოლიტიკაში ზედმეტად ერევა,- ამის შესახებ საპარლამენტო უმრავლესობის ლიდერმა მამუკა მდინარაძემ ჟურნალისტებს განუცხადა, რითაც უპასუხა კითხვას თემურ ჭყონიას განცხადებაზე.

მდინარაძის თქმით, როდესაც ქვეყანას ფიზიკური გადარჩენის საფრთხე აქვს, საქართველოს მოქალაქე კი სხვის ინტერესებს ატარებს, „ეს არის უკანასკნელი ფსკერი, რომლის იქით საკუთარი სამშობლოს წინაშე მავნებლობა აღარ არსებობს“.

„არ ვიცი მე მისი [თემურ ჭყონიას] ლიცენზიის პირობები, მაგრამ ლიცენზიის პირობებში ჩახედოს კარგად. ბევრი მსგავსი კომპანია გამიგია, რომელიც თავის ფილიალებს ასანქცირებს იმის გამო, რომ პოლიტიკაში ერევიან. აქედან გამომდინარე, სულ ყველამ თავს მიხედოს, ვინც დაიმედებულია ქართველი ხალხის არჩევანის დასანქცირებით. ყველა დაფიქრდეს, როგორ ვითარდება მსოფლიოში მოვლენები გეოპოლიტიკური მიმართულებით. მსოფლიოში რა ხდება და ესენი აქ დარბიან – ბებიას Бабушка ვერ ერქმევა, მაიმუნს – Обезьяна, ძაღლს – Собака და რაღაც სისულელეებს ლაპარაკობენ. ჭადრაკის დაფის და „მაიდნის“ მოდელებს გადმოიტანენ ხოლმე. მსოფლიოში ცოტა სხვანაირად ვითარდება მოვლენები და ცოტა სხვა მასშტაბურ, გლობალურ გადალაგებებთან და ტურბულენტობასთან გვაქვს საქმე. ამ გლობალურ ტურბულენტობაში და იმ გლობალურ პროცესებში, რომელიც ადრე წლები ვითარდებოდა, ახლა დღეებშიც იცვლება ხოლმე. ვხედავთ, როგორ დაჩქარდა პროცესები. კიდევ კარგი, უმრავლესობა ითავისებს ამას და იქნებ გავითავისოთ, რომ ამ დიდი საკითხების გადაჭრის დროს საქართველომ, რაც მთავარია, თავისი თავი შეინარჩუნოს და გადაირჩინოს. ამაზე ვართ ორიენტირებული და შენ, ეთნიკური ქართველი აქ რომ მებრძვი, იქნება ცოტა დაფიქრდე და ცოტა ხანი გვერდზე გაიწიო, რომ ფიზიკურად გადარჩე. როცა იცი, ქვეყანას ფიზიკური გადარჩენის საფრთხე აქვს და მაინც ვიღაცის ინტერესებს ატარებ და მერე ცდილობ სხვას მოღალატე დაარქვა, ეს ღალატი კი აღარ არის, ეს არის უკანასკნელი ფსკერი, რომლის იქით საკუთარი სამშობლოს წინაშე მავნებლობა აღარ არსებობს, ეს ყველამ უნდა გავითავისოთ – იქნება ეს ახალგაზრდა, ხანში შესული თუ შუახნის ადამიანი – ყველამ უნდა გავითავისოთ, რომ ახლა არის დრო, როცა ამ გლობალური დიდი ძვრების პროცესში ამ პატარა, მაგრამ საბედნიეროდ, ამაყმა ქვეყანამ, ბრძენი ხალხით საკუთარი თავი უნდა გადაირჩინოს და გავიდეს სამშვიდობოს და ფონს საღ სალამათი, ფიზიკურად ცოცხალი და ელემენტარული ეკონომიკით“,- განაცხადა მდინარაძემ.

ზელენსკის ინტერვიუ იმ საკითხების დიდი ლუსტრაცია, რაც ბოლო სამ-ოთხ წელიწადში სამყარომ, ჩვენმა ქვეყანამ, უკრაინამ გამოიარეს. ამ ინტერვიუთი ბევრი რაღაც გაშიშვლდა, – ამის შესახებ პარტია „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ ბრიფინგზე ჟურნალისტებს განუცხადა.

მდინარაძეს კითხვა დაუსვეს უკრაინის პრეზიდენტის, ვოლოდიმირ ზელენსკის ინტერვიუს იმ ნაწილთან დაკავშირებით, სადაც ზელენსკი საუბრობს უსაფრთხოების გარანტიებზე, ბუდაპეშტის მემორანდუმზე.

„თავის დროზე, უკრაინა იყო ატომური იარაღის მფლობელი ქვეყანა და უსაფრთხოების სანაცვლოდ, მას დაათმობინეს ქვეყნის ერთ-ერთი მყარი გარანტი უსაფრთხოებისა და რეალურად უკრაინის უსაფრთხოება გაქრა. ბოლო წლების განმავლობაში, ისმის კითხვები, რატომ არ უჯერებთ დასავლეთს, რატომ არ ემორჩილებით, რატომ არ უწვდით ხელს. სხვათა შორის, ხელის გაწვდენას და ხელის ჩამორთმევას ჩვენ გვამუნათებდნენ მოქნეულ ხელზე. მერე ჩინეთის გამოწვდილ ხელს რატომ ართმევთო და მოქნეულ ხელს რატომ არ ართმევთო. ასეთი პარადოქსალური ნარატივები იყო ხოლმე, მაგრამ რატომ არ უჯერებთ, როგორც კი ვინმე იკითხავს – ვინც დაუჯერა და ვინც ენდო ამ ბოლო წლებში ჩვენი მეგობარი ქვეყნების ბიუროკრატებს და ლიდერებს, მან რა მოიგო. ნახეთ, ხომ უკრაინაში? ზელენსკიმ დაუჯერა, იმოქმედა მათთან ერთად და ქვეყანა პრაქტიკულად განადგურებულია. ჩვენ არავის დავექვემდებარეთ, არავის დავუჯერეთ, დავუჯერეთ ქართველ ხალხს, მის დაკვეთას, რომ ეს ქვეყანა მეტად დამოუკიდებელი ყოფილიყო, საკუთარ ეკონომიკაზე გვეზრუნა, დამოუკიდებელი მოქმედებები განგვეხორციელებინა, რეალურ დემოკრატიაზე გვეზრუნა და რეალურ, ჭეშმარიტ, ქრისტიანულ, ტრადიციულ, ევროპულ ღირებულებებზე. ფიზიკურადაც გადავრჩით, ომიც არ გაჩაღდა ქვეყანაში და მეორე ფრონტად არ იქცა, ეკონომიკაც განვავითარეთ, ორნიშნა ეკონომიკური ზრდით წავიწიეთ. ევროპაში ეკონომიკური ზრდის მაჩვენებლით გავედით პირველ ადგილზე. ამ უდიდესი, რბილად რომ ვთქვათ, ტურბულენტობის პირობებში. ანუ ვისი მოქმედებაა უფრო სწორი, დაჯერება უფრო სწორი აღმოჩნდა, თუ არდაჯერება. ჩვენი ქვეყნისთვის სასიკეთოდ რასაც გვირჩევენ, აუცილებლად დავუჯერებთ. არავის დავალებებს არ შევასრულებთ. განსაკუთრებით იმ შემთხვევაში ვიქნებით ხისტები, როდესაც ეს იქნება ანტიქართული მითითება, დავალება, რეკომენდაცია თუ ა.შ“, – განაცხადა მამუკა მდინარაძემ.

ჩვენი კოლეგა გერმანელი დეპუტატები მთელ მსოფლიოს ეუბნებიან, რომ ეუთო/ოდირის მისია საერთოდ არ ჩაუშვეს საქართველოში. წარმოიდგინეთ, რამხელა თავხედობასთან გვაქვს საქმე, – ამის შესახებ პარტია „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, მამუკა მდინარაძემ განაცხადა.

მდინარაძე გამოეხმაურა საქართველოში მიმდინარე მოვლენებთან დაკავშირებით ბუნდესტაგის წარმომადგენლების განცხადებას, რომელშიც ისინი აღნიშნავენ, თითქოს არჩევნებზე ეუთო-ს გრძელვადიანი დამკვირვებლები არ იყვნენ დაშვებული.

„რა იკადრეს ჩვენმა კოლეგა გერმანელმა დეპუტატებმა, დღევანდელი ამბავი იცით? ბუნდესტაგის ზოგიერთმა წარმომადგენელმა უბრალოდ გადაწყვიტეს, ეუთო/ოდირის დასკვნის არაღიარებაზე კი არ მოეწერათ ხელი, ეთქვათ, რომ ეუთო/ოდირი საერთოდ არ ყოფილა საქართველოში. წარმოიდგინეთ, რამხელა თავხედობასთან გვაქვს საქმე. აბა, ვინმეს კითხვა დაუსვით, ამას გმობენ, გამოასწორებენ? მათ იფიქრეს, რომ გერმანიის დეპუტატს ინფორმაციის გავრცელების უფრო ფართო დიაპაზონი აქვს თანამედროვე სამყაროში, ვიდრე რომელიმე ქართველ დეპუტატს, მაგალითად, მდინარაძეს თუ სხვას. უბრალოდ, ასე ძალით გვჯობნიან, რომ მეტი რესურსი აქვთ ინფორმაციის გავრცელების და მთელ მსოფლიოს ეუბნებიან, რომ ეუთო/ოდირის მისია საერთოდ არ ჩაუშვეს საქართველოში. უბრალოდ მოიტყუეს. წარმოიდგინეთ, ამას რამდენიმე წლის წინაც არავინ იკადრებდა. თავისი აგენტურის – თუ ისინიც ვიღაცების წარმომადგენლები არიან, ახლა ამაში აღარ შევალ, ეს უკვე ყველამ კარგად ვიცით – ქართული აგენტურის, ქართველი ჯაშუშების მხარდასაჭერად თქვეს, რომ ეუთო/ოდირის მისია თურმე საერთოდ არ ჩამოგვიშვია საქართველოში. ასეთი თავხედური და ხელის გადაგრეხის ძალიან ბინძური მეთოდების შემსწრე ვართ, რომლითაც დღეს ებრძვიან საქართველოს. ეს არ არის ბრძოლა „ქართული ოცნების“ წინააღმდეგ“, – განაცხადა მამუკა მდინარაძემ.

ცნობილია, რომ საპარლამენტო არჩევნებზე ეუთო-ს მისიაში გრძელვადიანი დამკვირვებლები შედიოდნენ. ამის შესახებ ეუთო-ს მიერ 12 სექტემბერს გამოქვეყნებულ პრესრელიზშიც არის აღნიშნული.

ევროსაბჭოს საპარლამენტო ასამბლეის მხრიდან მიმდინარე მონიტორინგის პროცედურის ფარგლებში, საქართველოში 14-16 იანვარს ფაქტების დასადგენი მისიით ჩამოვლენ თანამომხსენებლები კლოდ კერნი (საფრანგეთი, „ლიბერალ დემოკრატების ალიანსი“) და ედიტ ესტრელა (პორტუგალია, „სოციალ-დემოკრატიული პარტია“). ამის შესახებ ნათქვამია ევროსაბჭოს საპარლამენტო ასამბლეის ვებგვერდზე გამოქვეყნებულ პრესრელიზში.

პრესრელიზის თანახმად, ვიზიტი არ უნდა განიხილებოდეს მხარდაჭერად ლეგიტიმურობისადმი ან იმ თანამოსაუბრეთა შეხედულებებისადმი, რომლებსაც თანამომხსენებლები შეხვდებიან.

„ვიზიტის მიზანია, შეაფასოს საქართველოს, როგორც ევროპის საბჭოს წევრი სახელმწიფოს მიერ ნაკისრი ვალდებულებების შესრულება. კერძოდ, ოქტომბრის არჩევნების შემდეგ შექმნილი პოლიტიკური კრიზისისა და ევროკავშირში გაწევრიანების მოლაპარაკებების შეჩერების ფონზე. ვიზიტის დროს თანამომხსენებლები შეხვდებიან ყველა ძირითადი პოლიტიკური პარტიის ხელმძღვანელობას, შესაბამის სამთავრობო ოფიციალურ პირებს და ინსტიტუტებს, ასევე სამოქალაქო საზოგადოებას და საერთაშორისო თანამეგობრობას. ეს არის რეგულარული მონიტორინგის ვიზიტი და ის არ უნდა განიხილებოდეს, როგორც პოლიტიკური მხარდაჭერა ლეგიტიმურობისადმი ან იმ თანამოსაუბრეების შეხედულებებისადმი, რომლებსაც თანამომხსენებლები ხვდებიან“, – ნათქვამია პრესრელიზში.

პრესრელიზის თანახმად, თანამომხსენებლები გეგმავენ ზოგიერთი დაკავებული დემონსტრანტის მონახულებას, რომელთა დაკავება და მათთვის წარდგენილი ბრალდებები შეშფოთებას იწვევს. ამ კონტექსტში, ასამბლეის პრეზიდენტმა, თანამომხსენებლებთან კონსულტაციით, 2024 წლის 23 დეკემბერს ვენეციის კომისიის სასწრაფო შეფასება ითხოვა ადმინისტრაციულ სამართალდარღვევათა კოდექსთან დაკავშირებით, კერძოდ, შეკრების თავისუფლების კუთხით.

ბუნდესტაგის ოთხი საპარლამენტო ჯგუფის წარმომადგენლები საქართველოში მიმდინარე მოვლენებთან დაკავშირებით ერთობლივ განცხადებას ავრცელებენ.

განცხადების ავტორები არიან „თავისუფალი დემოკრატების“ ჯგუფის ოფიციალური წარმომადგენელი ულრხი ლეხტე, „ქრისტიან-დემოკრატიული კავშირისა“ და „ქრისტიან-სოციალურ კავშირის“ ჯგუფის ოფიციალური წარმომადგენელი იურგენ ჰარდტი, „სოციალ-დემოკრატიული პარტიის“ ჯგუფის ოფიციალური წარმომადგენელი ნილს შმიდი და „მწვანეების“ წარმომადგენელი დებორა დიურინგი.

როგორც განცხადებაშია აღნიშნული, 26 ოქტომბრის საპარლამენტო არჩევნებზე დამოუკიდებელი დამკვირვებლების მხრიდან იყო არაერთი მინიშნება არჩევნებზე სერიოზული გავლენისა და მანიპულაციების შესახებ.

„ირაკლი კობახიძის 2024 წლის 28 ნოემბრის განცხადებამ, რომ ის გამორიცხავს ევროკავშირთან გაწევრიანების მოლაპარაკებებს 2028 წლამდე და არ მიიღებს ევროკავშირისგან საბიუჯეტო მხარდაჭერას, გამოიწვია მასობრივი საპროტესტო გამოსვლები საქართველოში, მთელი ქვეყნის მასშტაბით. ჩვენ ვგმობთ პარტია „ქართული ოცნების“ გადაწყვეტილებას, შეწყვიტოს ძალისხმევა ევროკავშირთან გაწევრიანების მოლაპარაკებების დასაწყებად, წინასაარჩევნო კამპანიის დროს მიცემული საკუთარი დაპირებების საწინააღმდეგოდ. ეს წარმოადგენს გადახვევას საქართველოს ყველა წინა მთავრობის პოლიტიკისგან და ევროკავშირში ინტეგრაციისკენ ქართველი ხალხის აბსოლუტური უმრავლესობის ევროპული მისწრაფებებისგან.

2022 წლის მარტში ევროკავშირში გაწევრიანების განაცხადის წარდგენა საქართველოს სუვერენული გადაწყვეტილება იყო. ერთი წლის წინ, 2023 წლის დეკემბერში, ქვეყანას მიენიჭა კანდიდატის სტატუსი, რომელიც ქართველებს დიდი ხანია, სურდათ. სამწუხაროდ, იმის ნაცვლად, რომ გამოიყენოს ეს ისტორიული შესაძლებლობა და გაწევრიანების პროცესი წინ წაწიოს რეფორმების ვალდებულებების შესრულებით, „ქართულმა ოცნებამ“ სულ უფრო ავტორიტარული და ანტიევროპული კურსი აიღო. 2024 წლის 26 ოქტომბრის საპარლამენტო არჩევნებზე დამოუკიდებელი დამკვირვებლების მხრიდან იყო არაერთი მინიშნება არჩევნებზე სერიოზული გავლენისა და მანიპულაციების შესახებ. მაგალითად, არ იყო დაშვებული ეუთო-ს გრძელვადიანი დაკვირვება“, – აღნიშნულია განცხადებაში.

განცხადებაში ნათქვამია, რომ საქართველოში საპროტესტო აქციები უკვე კრიტიკულ ნიშნულზეა. განცხადების მიხედვითვე, სწორია, რომ ფედერალური მთავრობა აწარმოებს კამპანიას ევროკავშირის დონეზე მიზანმიმართული სანქციების დაწესების მოთხოვნით მათ წინააღმდეგ, ვინც პასუხისმგებელია მშვიდობიანი დემონსტრანტების უფლებების სერიოზულ დარღვევაზე.

„პოლიციამ დემონსტრანტების დასაშლელად ცრემლსადენი გაზი, წყლის ჭავლი და რეზინის ტყვიები გამოიყენა. რამდენიმე ასეული ადამიანი დააკავეს, მათი უმეტესობა უსაფრთხოების ძალების მხრიდან ძალადობისა და არაადამიანური მოპყრობის შესახებ საუბრობს. არსებობს ძალაუფლების მქონე პირების მხრიდან რეპრესიების გაზრდის რისკი. ჩვენ ღრმად შეშფოთებულნი ვართ იმ ქართველების უფლებების შელახვით, რომლებიც გაბედულად გამოდიან ქუჩაში ევროპული და დემოკრატიული მომავლისთვის, რათა გააპროტესტონ „ქართული ოცნების“ განზრახვა, ძირი გამოუთხაროს ევროკავშირში ინტეგრაციის პროცესს. ჩვენ მკაცრად ვგმობთ დემონსტრანტების მიმართ ძალადობას. მოვუწოდებთ შესაბამის ორგანოებს, შეწყვიტონ ძალის გამოყენება მშვიდობიანი დემონსტრანტების მიმართ და დაუყოვნებლივ შეწყვიტონ აქციის მონაწილეების დაპატიმრება. ჩვენ ვიმეორებთ, რომ მშვიდობიანი შეკრების უფლება არის ფუნდამენტური უფლება, რომელიც მკაცრად უნდა იქნეს დაცული. ყველა ძალადობრივი აქტი უნდა იყოს გამოძიებული და დამნაშავე პირები პასუხისგებაში უნდა მიეცნენ.

სწორია, რომ ფედერალური მთავრობა აწარმოებს კამპანიას ევროკავშირის დონეზე მიზანმიმართული სანქციების დაწესების მოთხოვნით მათ წინააღმდეგ, ვინც პასუხისმგებელია მშვიდობიანი დემონსტრანტების უფლებების სერიოზულ დარღვევაზე. ქვეყანაში შესვლის ეროვნული აკრძალვა უკვე დაუწესდა ცხრა ძირითად პასუხისმგებელ პირს. ჩვენ მივესალმებით იმ ფაქტს, რომ ორმხრივი თანამშრომლობის გადახედვა ხდება და რომ მხარდაჭერის მრავალი ზომა უკვე შეჩერებულია ან აღარ დამტკიცდა.

ჩვენ ვადასტურებთ ჩვენს მტკიცე მხარდაჭერას ქართველი ხალხის ლეგიტიმური ევროპული მისწრაფებებისა და კეთილდღეობისა და დემოკრატიისკენ სწრაფვის მიმართ. ჩვენ მტკიცედ ვდგავართ საქართველოში დემოკრატების გვერდით და გავაგრძელებთ საქართველოს სამოქალაქო საზოგადოების დახმარებას, რათა ქვეყანა დემოკრატიულ და ევროპულ გზაზე დაბრუნდეს. ახლა საჭიროა დემოკრატიული პრინციპების აღდგენისა და კონსოლიდაციის პლურალისტური პროცესი, რომლის შედეგადაც შესაძლებელი იქნება თავისუფალი და სამართლიანი საპარლამენტო არჩევნების ჩატარება“, – ნათქვამია განცხადებაში.

რაც შეეხება განცხადებაში იმ ნაწილს, სადაც აღნიშნულია, თითქოს საქართველოს საპარლამენტო არჩევნებზე არ დაუშვეს ეუთო-ს გრძელვადიანი სადამკვირვებლო მისია, ცნობილია, რომ საპარლამენტო არჩევნებზე ეუთო-ს მისიაში გრძელვადიანი დამკვირვებლები შედიოდნენ. ამის შესახებ ეუთო-ს მიერ 2024 წლის 12 სექტემბერს გამოქვეყნებულ პრესრელიზშიც არის აღნიშნული.

„მისია არჩევნებზე დასაკვირვებლად ოფიციალურად მოწვეული იქნა საქართველოს მთავრობის მიერ. სადამკვირვებლო მისიას ხელმძღვანელობს ოუენ მერფი. მისიის შემადგენლობაშია 12 საერთაშორისო ექსპერტი და 30 გრძელვადიანი დამკვირვებელი, რომლებიც 19 სექტემბრიდან გადანაწილდებიან მთელი საქართველოს მასშტაბით. ამასთანავე, არჩევნებამდე რამდენიმე დღით ადრე მათ დაემატებათ ODIHR-ის მიერ მოწვეული 350 მოკლევადიანი დამკვირვებელი“, – ნათქვამია პრესრელიზში.