ჟენევის დისკუსიისთვის ლამის რუსეთი შემოგვთავაზონ. ეს არის საქართველოს დამცირება. ხელისუფლების პოზიცია უნდა იყოს ძალიან მკაცრი და არა რბილი, წყალწყალა განცხადება, – ამის შესახებ „ევროოპტიმისტების“ დეპუტატმა, რომან გოცირიძემ განაცხადა, რითაც გამოეხმაურა ინფორმაციას, რომ მოსკოვი ჟენევის დისკუსიების სხვა ლოკაციაზე გადატანას მოითხოვს.

მისივე თქმით, „ქართული ოცნების“ ფაქტობრივად, დანაშაულებრივი პოლიტიკის შედეგად, რუსეთი საქართველოს თავის მეგობარ სახელმწიფოდ აღიქვამს.

„ქართული ოცნების” ფაქტობრივად, დანაშაულებრივმა პოლიტიკამ, რომელსაც ის ბოლო ორი წლის განმავლობაში ეწევა, რუსეთს უკვე, ფაქტობრივად, ისეთი შეგრძნება მისცა, რომ საქართველო არის მისი მეგობარი სახელმწიფო და რეალურად, ერთმანეთის მიყოლებით, ერთი დღის განმავლობაში, გაკეთდა ქვეყნისათვის უკიდურესად საშიში განცხადებები – ლუკაშენკოს, ლავროვის , ბჟანიას. ეს ყველაფერი ერთად თავმოყრილი ნიშნავს, რომ რუსეთი საქართველოს განიხილავს უკვე მისი გავლენის სფეროდ, რომლის საბაბი და საშუალებაც ივანიშვილის ოლიგარქიულმა და არაფორმალურმა მმართველობამ მისცა. საქართველოს ხელისუფლებამ აქამდე მოიყვანა საქმე, რომ რუსეთი მეგობრად აღგვიქვამს. ეს არის პირდაპირ დანაშაული და რუსეთის საქართველოზე ზემოქმედების ახალ-ახალი მცდელობებისა და ბერკეტების მოპოვებას ნიშნავს.

საქართველოს პოზიცია უნდა იყოს ძალიან მკაცრი და არა ასეთი რბილი, წყალწყალა განცხადება. თუ სად იქნება მოლაპარაკება, ეს არაა მთავარი, სად გვთავაზობენ ესაა მთავარი – ლამის რუსეთი შემოგვთავაზონ. ეს არის დამცირება საქართველოსი და საქართველოს ხელისუფლების, ამიტომ პასუხი უნდა იყოს მაცრი და ადეკვატური ტონით,“ – განაცხადა გოცირიძემ.

ცნობისთვის, მოსკოვი ჟენევის დისკუსიების სხვა ლოკაციაზე გადატანას მოითხოვს. აღნიშნულის შესახებ ოკუპირებული აფხაზეთის ე.წ. პრეზიდენტმა, ასლან ბჟანიამ და ე.წ. საგარეო საქმეთა მინისტრმა, ინალ არძინბამ განაცხადეს. მათი თქმით, განიხილება მინსკი და ბაქო.

საპარლამენტო უმრავლესობის წევრის, დავით მათიკაშვილის განცხადებით, გიგი უგულავას, ნიკა მელიასა და ნიკა გვარამიასგან მესამე ძალაზე საუბარი საზოგადოების მოტყუების მცდელობაა.

მისივე თქმით, აღნიშნული პირები „ნაციონალური მოძრაობის“ აღიარებული სახეები არიან.

„როგორც უგულავას, ისე ნიკა მელიასა და ნიკა გვარამიასგან რაიმე სახით საუბარი მესამე ძალაზე, იმ ძალაზე, რომელიც „ნაციონალურ მოძრაობასთან“ არ არის დაკავშირებული, საზოგადოების მოტყუების მცდელობა და თვალის ახვევაა. რეალურად, არანაირი შუაშისტური ძალა არ არის და არც შეიძლება არსებობდეს საქართველოში. ეს პირები, ჩემ მიერ ჩამოთვლილი ადამიანები არიან „ნაციონალური მოძრაობის“ აღიარებული სახეები. ნიკა გვარამია – ყოფილი პროკურორი, პროპაგანდისტი, „ნაციონალური მოძრაობის“ ჯალათი; ნიკა მელია პირდაპირ წინააღმდეგობაში მოვიდა ქვეყნის რეალურ გადაწყვეტილებებთან და სასამართლო გადაწყვეტილებებს წინ აღუდგა; უგულავა – უამრავი მილიონის ქურდი. ეს ძალა ვერაფრით მოატყუებს საზოგადოებას და ვერ წარადგენს საკუთარ თავს, როგორც რაიმე კუთხით მესამე, შუაშისტურ ძალას. პერსპექტივა აქვთ ნულოვანი, რადგან სწორედ ასეთი ნდობა და რეიტინგი გააჩნიათ მათ საზოგადოებაში“, – განაცხადა დავით მათიკაშვილმა.

გაკვირვებული ვარ იმ ყურადღებით, რომელიც აქ აშშ-ის სახელმწიფო დეპარტამენტის შიდა მემორანდუმს დაეთმო, – ამის შესახებ საქართველოში აშშ-ის ელჩმა ჟურნალისტებს განაცხადა.

რობინ დანიგანმა ენტონი ბლინკენის მიერ აშშ-ის სახელმწიფო დეპარტამენტის თანამშრომლებისთვის გამოქვეყნებული შიდა მემორანდუმის შესახებ დასმულ შეკითხვაზე საპასუხოდ აღნიშნა, რომ ამას საქართველოსთან კავშირი არ აქვს.

„უნდა ვთქვა, რომ გაკვირვებული ვარ იმ ყურადღებით, რომელიც აქ აშშ-ის სახელმწიფო დეპარტამენტის შიდა მემორანდუმს დაეთმო, რადგან ეს არის შიდა მემორანდუმი აშშ-ის სახელმწიფო დეპარტამენტისთვის, რომელიც სახელმწიფო დეპარტამენტში მყოფ ადამიანებს ეხმარება სამუშაო ადგილზე უფრო ინკლუზიურები იყვნენ და ამ თემაზე სასაუბრო გზები იპოვონ. მე ვიტყოდი, რომ ამას საქართველოსთან კავშირი არ აქვს. იქ საქართველოსთვის არაფერია, მაგრამ რეალურად, ეს იმისთვის არის, რომ სახელმწიფო დეპარტამენტში მომუშავე ადამიანებს დაეხმაროს, უფრო ინკლუზიურები იყვნენ.

რაც შეეხება ენას, ქართულ ენასაც არ აქვს გენდერის აღმნიშვნელი ნაცვალსახელები, ვფიქრობ, ეს საინტერესოა. მე ამაყი დედა, ამაყი და, ამაყი ცოლი ვარ და ვფიქრობ, ყველამ ის ენა უნდა გამოვიყენოთ, რომელიც სხვების პატივისცემას გამოხატავს“, – განაცხადა საქართველოში აშშ-ის ელჩმა, რობინ დანიგანმა.

საარჩევნო გარემო იქნება მაქსიმალურად გამჭვირვალე, ტრანსფარენტული. საარჩევნო პროცესი ჩატარდება მაღალი სტანდარტით, შესაბამისად, გამოხატვის თავისუფლება იქნება გარანტირებული, – ამის შესახებ საქართველოს ეკონომიკისა და მდგრადი განვითარების მინისტრმა, პირველმა ვიცე-პრემიერმა, ლევან დავითაშვილმა განაცხადა.

მისივე თქმით, ამავდროულად, გათვალისწინებული და აღკვეთილი იქნება ყველა ის რისკი, რომელიც, შესაძლოა, არსებობდეს.

ლევან დავითაშვილს ჟურნალისტმა არჩევნებში რუსეთის შესაძლო ჩარევაზე დაუსვა კითხვა.

„რაც შეეხება ამ რისკს, კონკრეტული შემთხვევები თუ იქნა, კონკრეტულ კომენტარს გავაკეთებ. ზოგადი მსჯელობა უსაფუძვლოა. ეს არის ოპოზიციის მხრიდან საარჩევნო პროცესის დესტაბილიზაციის მცდელობა, რომელსაც საფუძველი არ აქვს. ჩვენ მოგვისმენია ბევრი უსაფუძვლო განცხადება, მათ შორის, ბევრი უსაფუძვლო ბრალდებაც ხელისუფლების მიმართ. როგორი უსაფუძვლო და ცრუც იყო ყველა ის ბრალდება, ესეც არის ცრუ და უსაფუძვლო“, – განაცხადა ლევან დავითაშვილმა.