საპარლამენტო უმრავლესობის ლიდერი მამუკა მდინარაძე ბიძინა ივანიშვილის პრეზიდენტად დასახელებას გამორიცხავს.

მდინარაძემ უპასუხა ჟურნალისტის კითხვას: „რატომ ჩაეწერა ბიძინა ივანიშვილი სიის პირველ ნომრად? ხომ არ გამორიცხავთ, რომ შესაძლოა, ის იყოს დასახელებული პრეზიდენტად?“

„შემიძლია, აბსოლუტურად გამოვრიცხო, რომ პრეზიდენტი იყოს და ა.შ. კაცს, რომელიც შემოვიდა პოლიტიკაში, თქვა გარკვეული თარიღი, დრო, გავიდა პოლიტიკიდან თავის დროზე და შემდეგ მობრუნება მოუწია, რა თანამდებობა და რა ბიძინა ივანიშვილი, რაში აინტერესებს საერთოდ?! აბსოლუტურად არ აინტერესებს არანაირი თანამდებობა, თავის დროზე დაამტკიცა თავისი მოქმედებით, ამ კაცს აინტერესებს თავისი სამშობლო და სიის პირველი ნომერია ერთი ყველაზე მთავარი მიზეზით – ეს არის ამ არჩევნების მნიშვნელობა“, – განაცხადა მამუკა მდინარაძემ.

მდინარაძემ კიდევ ერთხელ აღნიშნა, რომ 26 ოქტომბრის არჩევნების მნიშვნელობა არის მთავარი მიზეზი, რის გამოც ბიძინა ივანიშვილმა და გუნდმა გადაწყვიტეს, ის იყოს სიის პირველი ნომერი.

„ამაში არის რეალობაც, ამაში არის პრაქტიკულობაც, საარჩევნო მიზნებიც, ამაში არის გარკვეული სიმბოლიზმიც, ხაზგასმაც, ყველაფერი ამაშია. ეს გამომდინარეობს მნიშვნელობის მინიჭებიდან – ეს არჩევნები იმდენად მნიშვნელოვანია, ჩვენ ყველამ ერთად გადავწყვიტეთ, და უპირველესად მისი თანხმობით, რომ სიის პირველი ნომერი იყოს. მათ შორის, ეს იყო ჩვენი თხოვნაც, რომ ხაზი გაესვას ამ ყველაფერს, ამ არჩევნების მნიშვნელობას. ქუდი რომ დავიხუროთ, ახლა სახლში დავსხდეთ, საკონსტიტუციო უმრავლესობას ვერ მოვიპოვებთ, პირდაპირ გეუბნებით, შეიძლება ვერ მოვიპოვოთ. ჩვეულებრივი უმრავლესობის მოპოვება პრობლემა არ არის, მაგრამ ქვეყნის გადარჩენის ინტერესი ემთხვევა საკონსტიტუციო უმრავლესობის მოპოვების ინტერესს, აქ უფრო მეტი და მყარი გარანტიაა. ჩვენ ამათ, პატარა პარტიებს კი არ ვეჭიდავებით პოლიტიკურ ველზე, არამედ მათ პატრონებთან გვაქვს საქმე, ესენი არავინ არიან აქ, მართლა არავინ არიან, განულებულები არიან პოლიტიკურ ასპარეზზე. უბრალოდ, მათ ჰყავთ პატრონები, რომლებიც ყოველდღიურად რაღაც-რაღაცებს გარედან უზრუნველყოფენ და ეს რაღაც-რაღაცები, მათი განცხადებები და მოქმედებები იქცა ხავსად წყალწაღებულებისთვის. მათ შანსი არ აქვთ, მაგრამ ბიძინა ივანიშვილის ფაქტორმა როგორც ბევრი რამ პოზიტიურად და დადებითად გადაწყვიტა, ასევე გვინდა, რომ გადაწყვიტოს. ეს ჩვენი საარჩევნო სურვილია. დიახ, მათ შორის ამიტომ არის სიის პირველი ნომერი, რომ გადაწყვიტოს საკონსტიტუციო უმრავლესობის ბედი, რათა ავიღოთ მყარი გარანტია ამ ქვეყანაში მშვიდობის, ღირსების, კეთილდღეობის და მხოლოდ ამ გზით ევროკავშირის წევრობის“, – აღნიშნა მამუკა მდინარაძემ.

საპარლამენტო უმრავლესობის ლიდერის, მამუკა მდინარაძის განცხადებით, „ქართული ოცნების“ საარჩევნო სიის შედგენისას მთავარი კრიტერიუმებია სამშობლოს სიყვარული, პატრიოტიზმი, პროფესიონალიზმი და ღირსება.

როგორც მდინარაძემ აღნიშნა, „ქართული ოცნებისგან“ განსხვავებით, ოპოზიციას განახლების რესურსი არ აქვს.

„ხედავთ ისევ იმ ძველ, გაცვეთილ სახეებსა და ადამიანებს, რომლებსაც ლიდერებად არჩეული ჰყავთ სხვადასხვა ცუდ საქმეზე ნასამართლევი ხალხი. ერთ მხარეს გვყავს სააკაშვილის, 5 ნომრის ლიდერი, რეალურად, საქართველოს მოქალაქეც რომ არ არის, სხვადასხვა დანაშაულზე ნასამართლევი ხალხი სხვადასხვა პარტიის ლიდერებად გვევლინებიან, ხოლო აქეთ არიან ადამიანები, რომლებსაც გამოარჩევს პატრიოტიზმი, სამშობლოს სიყვარული, ღირსება. ერთგულად მსახურობდნენ და პოლიტიკაშიც გააგრძელებენ თავისი ქვეყნის მსახურებას. ადამიანები, რომლებთანაც ასოცირდება საკუთარი ქვეყნით, საკუთარი სამშობლოთი სიამაყე“, – განაცხადა მამუკა მდინარაძემ.

მამუკა მდინარაძის განმარტებით, საარჩევნო სიის ოცეულში მყოფი პირების მიმართ განხორციელდა ფაშისტური ბულინგი, თუმცა ამ ადამიანებმა ზუსტად იციან, სად დგანან და ბულინგს არ დაექვემდებარებიან.

„ჩვენ ვნახეთ ორი მხარე. ერთ მხარეს იყვნენ გახარებული ადამიანები, რომ მათი მხარდაჭერილი პარტია, პარტია, რომელიც ნდობას იმსახურებს, განახლდა იმ ადამიანებით, რომლებითაც ისედაც ამაყობდნენ. ვნახეთ დიდი ენთუზიაზმით გამოხატული ემოციები, მათ შორის სოციალურ ქსელებში. „ქართული ოცნების“ მხარდამჭერს, ამომრჩეველს, ობიექტურად მოფიქრალ ადამიანს, რა თქმა უნდა, ძალიან გაუხარდება ლაშა ტალახაძე, გენო პეტრიაშვილი, ჟიული შარტავას შვილიშვილი და ა.შ. ახალი წარმატებული სახეები „ქართული ოცნების“ რიგებში. ეს ბუნებრივი ამბავია, მაგრამ რამდენადაც ჩვენს მხარდამჭერებს, ობიექტურ ადამიანებს გაუხარდათ, სამწუხაროდ, იმდენად გამწარდნენ აგენტურული ოპოზიციის მხარდამჭერებიც, ძირითადად, მათი ლიდერები. იკადრეს უკადრებელი, მაგრამ ხომ უნდა დაუშვა, რომ ლაშა ტალახაძის, გენო პეტრიაშვილის და ასეთი ხალხის დაბულინგება არ შეიძლება. ისინი მარტო ფიზიკურად კი არ არიან ძლიერი, ფსიქოლოგიურადაც ძალიან ძლიერები არიან. არ არსებობს ჩვენს გუნდში ადამიანი, არ არსებობს იმ ოცეულში ადამიანი, რომელიც არ არის მყარი ფსიქიკის და ასეთ სისულელეებს, მდაბიო, გოიმურ, მარაზმამდე დასულ ბულინგს დაექვემდებარება. ჩვეულებრივი აგენტურული, ფაშისტური ბულინგი იყო მათ მიმართ, მაგრამ ესენი არიან ადამიანები, რომლებმაც ზუსტად იციან, სად არიან, რას ემსახურებიან, რომ ეს არის საკუთარი სამშობლო. ამას ემსახურებოდნენ და მის მსახურებას გააგრძელებენ. ამიტომ ეს სულელური, გოიმური, ფაშისტური ბულინგები არის ისეთივე წარმავალი, როგორიც მათი არგუმენტები. ისევეა ჰაერში, როგორც მათი არგუმენტები.

რომ ამბობენ, პოლიტიკა სპორტსმენების საქმე არ არისო, თუ შეიძლება მითხრათ, რომელი პროფესიის საქმეა პოლიტიკა. მე ადვოკატი, იურისტი ვიყავი და იურისტის საქმე არის პოლიტიკა, ცალკე აღებული? მაშინ უნდა დავრჩენილიყავი მეც ადვოკატად. შემთხვევით კი არ მითქვამს გოიმური, ეს არის მათი ვორდინგის მთელი მარაზმი და რაღაცებს იგონებენ. პოლიტიკა არის ყველას საქმე – სპორტსმენის, იურისტის, ექიმის, ყველას საქმეა, ვინც გადაწყვეტს და ვისთანაც შედგება კონსულტაცია, რომ მან პოლიტიკაში გააგრძელოს თავისი ძალიან წარმატებული კარიერა. პოლიტიკა ეხება ყველას, ყველა ადამიანს.  სპორტსმენის საქმე არ არის, იურისტის საქმე არ არის, ექიმის საქმე არ არის – აბა, ვისი საქმეა? ხვალ რომ გადაწყვიტოთ რომელიმე პარტიის მხარდაჭერა, ამისთვის ვიღაცებმა ფაშისტური ბულინგი უნდა მოგიწყონ? ხომ წარმოუდგენელი ამბავია. ეს არის გოიმობა, მარაზმი და წარმოუდგენელი ლოგიკა, რომელიც გამწარებულმა, გადაფსიხებულმა აგენტურამ გუშინ ამოანთხია სოციალურ ქსელში“, – აღნიშნა მამუკა მდინარაძემ.

„ქართულმა ოცნება – დემოკრატიულმა საქართველომ“ გუშინ, 10 სეტქემბერს საარჩევნო სიის პირველი ოცეული წარადგინა.

სამწუხაროდ, სალომე ზურაბიშვილი დეზინფორმაციის წყაროდ იქცა, – ამის შესახებ  საქართველოს პირველ არხს „ქართული ოცნების“ წევრმა, რატი იონათამიშვილმა განუცხადა.

მისი თქმით, ზურაბიშვილი ახმოვანებს არა ხალხის განწყობებსა და სურვილებს, არამედ დავალების მიმცემების ოცნებებსა და ფანტაზიებს.

„სწორედ ეს არის, რაც მას უხერხულ და ისტორიულად მძიმე მდგომარეობაში აყენებს. თუ ის დასკვნების სწორად გამოტანას ვერ შეძლებს, ის ჩვენს ისტორიაში დეზინფორმაციის ერთ-ერთ მთავარ წყაროდ შევა“, – განაცხადა იონათამიშვილმა.

საქართველოს პრეზიდენტმა, სალომე ზურაბიშვილმა „ლე ფიგაროსთან“ ინტერვიუში განაცხადა, რომ „მმართველი პარტია დასუსტებულია გაზაფხულის საპროტესტო აქციების შემდეგ და, გამოკითხვების მიხედვით, 25 პროცენტზე მეტს ვერ იღებენ“.

მსგავსი განცხადებები იმისთვის კეთდება, რომ თავად განწყობა შეიქმნან, თითქოს მათ რაიმე მცირე რესურსი მაინც აქვთ რაღაც წარმატების, – ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა პრეზიდენტ სალომე ზურაბიშვილის განცხადების კომენტირებისას აღნიშნა.

ოხანაშვილის თქმით, კოლექტიური „ნაცმოძრაობა“ ისტორიული მარცხის წინაშე დგას.

„ამ ადამიანებმა უნდა მოიფიქრონ, ეს ყველაფერი როგორ გადაფარონ. ამიტომ მათ გზავნილები, მესიჯბოქსი შეიმუშავეს, რომ თურმე 25 პროცენტი გვაქვს და ისინი იმარჯვებენ. რაში სჭირდებათ ასეთი აჟიოტაჟი, თუ „ქართული ოცნება“ გამარჯვებას ვერ შეძლებს? ეს ყველაფერი არის დავალებების შესრულება და სხვა არაფერი. ისინი მარცხისთვის განწირული არიან და ამიტომაც სჭირდებათ გზავნილები, რითიც მხარდამჭერებს რაღაც იმედის ნაპერწკალი გაუჩინონ, რომ მცირე ამომრჩეველში მუხტი აწიონ. ეს არის პრიმიტიული გზავნილი, ამომრჩეველი კი არ ტყუვდება. სჯობს, ისტორიული მარცხისთვის მოემზადონ“, – განაცხადა ოხანაშვილმა.

საქართველოს პრეზიდენტმა, სალომე ზურაბიშვილმა „ლე ფიგაროსთან“ ინტერვიუში განაცხადა, რომ „მმართველი პარტია დასუსტებულია გაზაფხულის საპროტესტო აქციების შემდეგ და, გამოკითხვების მიხედვით, 25 პროცენტზე მეტს ვერ იღებენ“.