ადეიშვილი ახლა აქ უნდა იხდიდეს სასჯელს – „ოცნების“ უსუსურობის დადასტურებაა, რომ ის გერმანიაში ოფიციალურ შეხვედრაზე ვიხილეთ, – ამის შესახებ პარტია “საქართველოსთვის” დეპუტატმა, ანა ბუჩუკურმა ზურაბ ადეიშვილის ბუნდესტაგში ვიზიტთან დაკავშირებით განაცხადა.

მისივე თქმით, ადეიშვილი აქამდეც უნდა იყოს პასუხისგებაში მიცემული საქართველოში, ეს ყველაფერი კი ადასტურებს, რომ საერთაშორისო პარტნიორებთან “ოცნების” სიტყვას ფასი აღარ აქვს.

“მე პირადად ვერავინ მასწავლის ადეიშვილი სად უნდა იყოს ახლა, წესით. ის რომ დღეს ადეიშვილი ყველამ ერთად ვიხილეთ გერმანიაში ოფიციალურ შეხვედრაზე, ეს არის “ოცნების” უსუსურობის დადასტურება. ამდენი წელი გავიდა. უფრო მეტსაც გეტყვით, როდესაც “ოცნების” ლიდერები გამოდიან და ამაყობენ ორბანთან მეგობრობით, მე ასევე გავახსენებ საზოგადოებას, ორბანმა მოახდინა ზურა ადეიშვილის რეაბილიტაცია. ეს ხომ არ დაავიწყდა ვინმეს?! ამიტომ დღეს ვითომ რომ თამაშობს “ოცნება”, სინამდვილეში აბსოლუტური ფარისევლობაა ეს ყველაფერი, თითქოს წუხან, რომ ადეიშვილი იმყოფება ოფიციალურ შეხვედრებზე საზღვარგარეთ, ჩვენს მეგობრებთან და პარტნიორებთან. ეს არის “ოცნების” ხელისუფლების უსუსურობა. ეს არის დადასტურება იმის, რომ სამწუხაროდ, საერთაშორისო პარტნიორებთან “ოცნების” სიტყვას ფასი აღარ აქვს. მე ეს არ მახარებს, იმიტომ, რომ მომწონს თუ არ მომწონს “ოცნების” ხელისუფლება, ის ჩვენს ქვეყანას წარმოადგენს, მათ შორის, საერთაშორისო ასპარეზზე,” – განაცხადა ბუჩუკურმა.

დაფინანსების ძალიან დიდი ნაწილი არასამთავრობო ორგანიზაციებზე მიემართება – არასამთავრობო ორგანიზაციებმა იმედები გაუცრუეს ამერიკის სახელმწიფოს შარშან, შარშანწინ, შეიძლება ეს გახდა დაფინანსების შემცირების მიზეზი, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა, როდესაც უპასუხა კითხვას, აშშ-ს მიერ საქართველოსთვის საგარეო დახმარების მოცულობის 8 მილიონი დოლარით შემცირებაზე.

„მე ვერ გეტყვით, ამ საკითხებზე გადაწყვეტილებას ამერიკის შეერთებული შტატები იღებს. თქვენ იცით, რომ ამ დაფინანსების ძალიან დიდი ნაწილი არასამთავრობო ორგანიზაციებზე მიემართება. არასამთავრობო ორგანიზაციებმა იმედები გაუცრუეს ამერიკის სახელმწიფოს შარშან, შარშანწინ, შეიძლება ეს გახდა დაფინანსების შემცირების მიზეზი“, – განაცხადა პრემიერ-მინისტრმა.

პირადად ჩემთვის, როგორც იურისტისთვის, ვეტინგი კატეგორიულად მიუღებელია. ვეტინგის მსგავსი რამ 2004 წელს განხორციელდა. ამ ყველაფერმა რაც მოიტანა, საზოგადოებისთვის ნათელია, – ამის შესახებ პრემიერ-მინისტრმა ირაკლი კობახიძემ განაცხადა.

როგორც ის განმარტავს, ვეტინგი მისთვის არამხოლოდ ფორმალური სამართლებრივი მოსაზრებიდან გამომდინარეა მიუღებელი, არამედ, პრაქტიკული მოსაზრებიდანაც.

„როგორც იურისტმა შემიძლია დავადასტურო, რომ ვეტინგი ნამდვილად ეწინააღმდეგება არამხოლოდ ფორმალურად ქვეყნის კონსტიტუციას, არამედ, ის ეწინააღმდეგება პირველ რიგში, ზოგად კონსტიტუციურ-სამართლებრივ პრინციპებს. აქედან გამომდინარე, პირადად ჩემთვის, როგორც იურისტისთვის, ვეტინგი კატეგორიულად მიუღებელია. ვეტინგის მსგავსი რამ 2004 წელს განხორციელდა, რაც მოიტანა ამ ყველაფერმა, საზოგადოებისთვის ნათელია. ეს იყო სასამართლოს სრული დამორჩილება აღმასრულებელი ხელისუფლების, სააკაშვილი-ადეიშვილის რეჟიმის მიერ. აქედან გამომდინარე, ვეტინგი მიუღებელია არამხოლოდ ფორმალური სამართლებრივი მოსაზრებიდან გამომდინარე, არამედ, პირველ რიგში, პრაქტიკული მოსაზრებიდან გამომდინარე. დღეს, ადეიშვილის ყოფილი მოადგილე, წოწორია ვეტინგს ატარებს მოლდოვაში. ყველას შეგიძლიათ ივარაუდოთ, როგორ დასრულდება ეს ვეტინგი. ჩვენთვის ასეთი პროცესები მიუღებელია“, – განაცხადა კობახიძემ.

დავით არახამიას განცხადებამ რეალურად დაადასტურა ის, რასაც ვამბობდით ჩვენს განცხადებაში, ეს არის დამოკიდებულება, რომელსაც აჩვენებს უკრაინის ხელისუფლების კონკრეტულად ეს წარმომადგენელი, ეს ძალიან დასანანი და სამწუხაროა, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.

როგორც ირაკლი კობახიძემ აღნიშნა, საქართველო ძალიან მყარად უჭერს მხარს უკრაინელ ხალხს.

„ჩვენ სოლიდარობას ვუცხადებთ უკრაინის სახელმწიფოს, რაც არის გამოხატული არა მხოლოდ სიტყვებით, არამედ კონკრეტული საქმით, ეს არის 600-ზე მეტი მხარდაჭერილი აქტი, რეზოლუციები და დოკუმენტები, სხვა გადაწყვეტილებები, ეს არის ფართო ჰუმანიტარული დახმარება. როდესაც ასეთ ფონზე კეთდება გაუგებარი განცხადებები, ეს ამყარებს ჩვენს რწმენას, რომ რაღაცები არ ხდება ისე, როგორც უნდა ხდებოდეს. თუმცა, უკრაინა დღეს არის მძიმე ვითარებაში, უკრაინელი ხალხი არის ომის მდგომარეობაში, ძალიან მძიმე მდგომარეობაა უკრაინაში, აქედან გამომდინარე, ჩვენ პირველ რიგში, პატივს ვცემთ უკრაინელ ხალხს და შესაბამისად, არ ვაპირებთ არახამიასთან თუ სხვა პოლიტიკოსებთან პოლემიკაში შესვლას. არ მინდა, პოლემიკაში შევიდე, ფაქტია რასთანაც გვქონდა საქმე მთელი ამ ორი წლის განმავლობაში – ჯერ როდესაც ხდებოდა საქართველოდან უკრაინის ელჩის გაწვევა, აბსოლუტურად გაუგებარი იყო ეს გადაწყვეტილება, როდესაც პრაქტიკულად გააძევეს ჩვენი ელჩი უკრაინიდან საბაბი იყო თითქოს მომაკვდავ მდგომარეობაში სააკაშვილის ყოფნა, დღეს ღიმილის მომგვრელიც კი აღარ არის უკვე ეს საბაბი.

შეგახსენებთ მეორე ფრონტთან დაკავშირებით პოდოლიაკის, დანილოვის და სხვების განცხადებებს, შეგახსენებთ იმას, რომ ძებნილები, დამნაშავეები დღეს უკრაინაში კვლავაც იკავებენ მაღალ თანამდებობებს, ეს არ შეესაბამება იმ ისტორიულ, მეგობრულ ურთიერთობებს, რომლებიც არსებობს უკრაინელ და ქართველ ხალხებს, უკრაინისა და საქართველოს სახელმწიფოებს შორის. ეს არის სრული აცდენა ამ ისტორიულ-მეგობრული სულისკვეთებიდან. შესაბამისად, კიდევ ერთხელ მოვუწოდებ უკრაინის ხელისუფლებას, მიიღოს ისეთ გადაწყვეტილებები, რომლებიც ხელს შეუწყობს ისტორიული მეგობრობის კიდევ უფრო გაღრმავებას და ხელს არ შეუწყობს ხალხების, ქვეყნების ხელოვნურად დაშორებას“, – განაცხადა კობახიძემ.

უკრაინის რადას ფრაქცია „ხალხის მსახურის“ თავმჯდომარე დავით არახამია საქართველოს მთავრობის განცხადებას გამოეხმაურა. როგორც არახამია აღნიშნავს: „დაგვიბრუნდეს მიხეილ სააკაშვილი, შეწყდეს ფრენები რუსეთთან, აგრესორის დახმარება სანქციების გვერდის ავლაში, მაშინ ურთიერთობების ნორმალიზებაც მარტივად მოხდება“.