ვენეციის კომისიამ საქართველოს პარლამენტის მიერ „ადმინისტრაციულ სამართალდარღვევათა კოდექსსა“ და „შეკრებებისა და მანიფესტაციების შესახებ“ კანონში ცვლილებებთან დაკავშირებით დასკვნა გამოაქვეყნა.

ანგარიშში ვკითხულობთ, რომ საკანონმდებლო ცვლილებები ნაჩქარევადაა მიღებული. ამასთან, წერია, რომ პროცესში არ მონაწილეობდნენ შესაბამისი დაინტერესებული მხარეები.

კომისიის დოკუმენტს საპარლამენტო უმრავლესობის ლიდერი გამოეხმაურა. მამუკა მდინარაძე ამბობს, რომ საკანონმდებლო ცვლილებების დაჩქარებული წესით მიღება სწორედ იმდროინდელმა ვითარებამ გახადა საჭირო, დაინტერესებული მხარეები კი, ამ ცვლილებების განხილვის პერიოდშიც პარლამენტის მიმდებარედ დესტრუქციული ქმედებებით იყვნენ დაკავებული. მდინარაძის თქმით, აღნიშნულ ცვლილებებთან დაკავშირებით კრიტიკა უსაფუძვლოა.

ტერმინი გენდერი ამოდის ყველა საკანონმდებლო ხასიათის ნორმატიული აქტიდან, კანონიდან თუ სხვა ნებისმიერი ჩანაწერიდან – ასეთი ტერმინი საკანონმდებლო აქტებიდან საერთოდ გაქრება, – განაცხადა მამუკა მდინარაძემ „ქართული ოცნების“ გორგასლის ოფისში, საპარლამენტო უმრავლესობის სხდომის დასრულების შემდეგ გამართულ ბრიფინგზე.

საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა აღნიშნა, რომ ამ საკითხში ისინი ჰბაძავენ თავიანთ ამერიკელ კოლეგებს.

„ტერმინი გენდერი ამოდის ყველა საკანონმდებლო ხასიათის ნორმატიული აქტიდან, კანონიდან თუ სხვა ნებისმიერი ჩანაწერიდან – ასეთი ტერმინი საკანონმდებლო აქტებიდან საერთოდ გაქრება.

დღეს ძალიან კარგი, მოსაწონი ინიციატივა იყო, როდესაც ქალისა და მამაკაცის თანასწორობაზეა საუბარი. სქესთა შორის თანასწორობა და სხვა მსგავსი ტერმინები, რომელიც უფრო მოკლე, ლაკონიური, პრაქტიკაში ადვილად გამოყენებადი იქნება, შესაძლოა, ამაზეც ვიმსჯელოთ“, – განაცხადა მდინარაძემ.

საჯარო სამსახურში უცხოური წყაროდან სარგებლის მიღება იკრძალება, – განაცხადა მამუკა მდინარაძემ „ქართული ოცნების“ გორგასლის ოფისში, საპარლამენტო უმრავლესობის სხდომის დასრულების შემდეგ გამართულ ბრიფინგზე.

საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა სხდომის დასრულების შემდეგ „ქართული ოცნების“ მიერ პარლამენტში ინიციირებულ კანონპროექტებთან დაკავშირებით განცხადება გააკეთა.

„იკრძალება უცხოური წყაროდან სარგებლის მიღება საჯარო სამსახურში. იცით, რომ ხშირ შემთხვევაში ეს ერთგვარი მექანიზმი იყო თავის დროზე, ფსევდოლიბერალური მიდგომების რეალიზების და ამას იყენებდნენ სხვა დატვირთვით. ჩვენ ხომ გვაჩვევდნენ, რომ მეგობრული, პატიოსანი ფულები, სახსრები იყო რაღაცებისთვის გამოყოფილი. რისთვის იყო გამოყოფილი, ყველამ კარგად ვნახეთ. მაგალითად, ათეულობით მილიონი დაიხარჯა ამ ქვეყანაში იმისთვის, რომ ვიღაცებს ეძახათ, არა რუსულ კანონს.

ახლა ჩვენ თავად ვეუბნებით, რომ გაცილებით მკაცრი კანონი დავაინიციირეთ. აგერ, ხვალ პირველი მოსმენით მივიღეთ. კაციშვილი ხმას არ იღებს, რადგან ეს იყო დაფინანსებული კამპანია, რომელიც იყო დიდი ფეიკი. ამ მიმართულებაზე ჩვენ ვმუშაობთ და მათ შორის, თუკი სარგებელი საჯარო სამსახურში უნდა ყოფილიყო ამ გზით, ეს იკრძალება. თუ შრომის ანაზღაურებაზეა საუბარი, ამას თავის თავზე სახელმწიფო აიღებს და არა რაღაც გვერდითი შემოსავლის წყაროებზე უნდა იყოს საუბარი, რადგან ხშირ შემთხვევაში ეს მავნე პრაქტიკის ჩამოყალიბებას უწყობდა ხელს“, – განაცხადა მდინარაძემ.

იურიდიულ საკითხთა კომიტეტმა “სისხლის სამართლის კოდექსში” ცვლილება, რომელიც სამშობლოს ღალატისთვის სისხლისსამართლებრივი პასუხისმგებლობის საკითხს უკავშირდება, პირველი მოსმენით განიხილა და მხარი დაუჭირა.

კანონპროექტის თანახმად, საქართველოს “სისხლის სამართლის კოდექსს” ემატება 3071 მუხლი, რომელიც დაარეგულირებს სამშობლოს ღალატისთვის სისხლისსამართლებრივი პასუხისმგებლობის საკითხს.

აღნიშნული ნორმის თანახმად, სამშობლოს ღალატად მიჩნეული იქნება საქართველოს მოქალაქის მიერ ან საქართველოში სტატუსის მქონე მოქალაქეობის არმქონე პირის მიერ ჩადენილი ისეთი ქმედებები, როგორიცაა: საქართველოს ტერიტორიული ხელშეუხებლობის დარღვევა, ანტიკონსტიტუციური ხელშეკრულების დადება ან მოლაპარაკების წარმოება, საქართველოს საგარეო უშიშროების ხელყოფა, უცხოეთის სადაზვერვო სამსახურში შესვლა, საქართველოს თავდაცვისუნარიანობის ხელყოფა, სახელმწიფო საიდუმლოების გაცემა, ჯაშუშობა, შეთქმულება ან ამბოხება საქართველოს კონსტიტუციური წყობილების ძალადობით შესაცვლელად, საბოტაჟი ან/და უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარება.

მომხსენებლის, კანონპროექტის ერთ-ერთი ინიციატორის, რატი იონათამიშვილის განმარტებით, აღნიშნული საკითხი ცდება სამართლებრივ ცვლილებას და ეს არ არის “სისხლის სამართლის კოდექსში” მხოლოდ მუხლის დამატება.

“ეს არის სახელმწიფოს ფუნდამენტური დაცვის საკითხი – გადაწყვეტილება, რომელიც განსაზღვრავს როგორი საქართველო უნდა დავუტოვოთ მომავალ თაობებს. სამშობლოს ღალატი ყველაზე მძიმე დანაშაულია არა მხოლოდ სამართლებრივ ჭრილში, არამედ მორალის, ისტორიის თვალსაზრისითაც. ღალატი სპობს ნდობას სახელმწიფოსა და მოქალაქეებს შორის, ანგრევს იმ საფუძვლებს, რომელზეც ვაშენებთ ქვეყნის აწმყოსა და მომავალს. სამშობლოს ღალატი არ არის მხოლოდ ერთი ადამიანის დანაშაული – ეს არის ზიანი, რომელიც მთელ საზოგადოებას ადგება, მათ შორის, ჩვენი წარსულის გმირებს, ჩვენს აწმყოსა და მომავალ თაობებს. ამიტომ, ჩვენი ვალია, მივიღოთ ისეთი გადაწყვეტილებები, რომელიც არა მხოლოდ დღევანდელ პოლიტიკურ მოცემულობას შეესაბამება, არამედ შექმნის ქვეყნის სუვერენიტეტის დაცვის ყველაზე მყარ და მტკიცე გარანტიებს და ხანგრძლივი სახელმწიფო ინტერესების სამსახურში იქნება. ჩვენ ამ საკითხზე საუბარი გვიწევს იმიტომ, რომ წარსულში ადგილი ჰქონდა სერიოზულ შეცდომას და უფრო მეტად ეს იყო დანაშაული, რომელიც ჩაიდინეს კონკრეტულმა პირებმა და რომლის შედეგები ჩვენმა სახელმწიფომ საკუთარ თავზე იწვნია”, – განაცხადა რატი იონათამიშვილმა.

მისი თქმით, 2007 წელს, მიხეილ სააკაშვილის ხელისუფლებამ “სისხლის სამართლის კოდექსიდან” სახელმწიფო ღალატის მუხლი ამოიღო.

როგორც რატი იონათამიშვილმა აღნიშნა, კანონპროექტში მოცემული “სამშობლოს ღალატის” ფორმულირება ზუსტად შესაბამისობაშია იმ ფორმულირებასთან, რაც ჯერ კიდევ 1991 წელს, საქართველოს პირველმა პრეზიდენტმა ზვიად გამსახურდიამ კანონმდებლობაში შეიტანა.

პროექტის ავტორი და ინიციატორები ფრაქცია “ქართული ოცნებისა” და პოლიტიკური ჯგუფის “ხალხის ძალის” დეპუტატები არიან.

ტრამპის ადმინისტრაციისთვის მთავარი მტერი ახლა არც რუსეთია და არც ზელენსკი, ეს არის გლობალისტური, ლიბერალური ელიტა, რომელიც უკვე ევროპაშია მოკალათებული და იქიდან გამოუცხადეს ომი – არ მგონია, რომ მათ რამე შანსი ჰქონდეთ,- განაცხადა გადაცემა „დღის ქრონიკაში“ პოლიტოლოგმა ირაკლი გოგავამ.

მისივე თქმით, ტრამპის ადმინისტრაცია 500 მილიარდზე იმიტომ ლაპარაკობს, რომ აალაპარაკოს უკრაინის ლიდერები იმაზე, თუ სად წავიდა და როგორ იხარჯებოდა ფული.

„არსებობს იშვიათი მეტალები და არსებობს იშვიათი ქიმიური ელემენტები. 17 იშვიათი მეტალია, მაგრამ არსებობს კიდევ ქიმიური ელემენტები, მათ შორის ინერტული აირები, 60-ზე მეტია და უკრაინაში, რა თქმა უნდა, არის რაღაცები, მაგრამ რაც არის დაზვერილი მათი ინდუსტრიული წესით მოპოვება არ არის რენტაბელური. რისი დამუშავებაც რენტაბელურია, იმის დამუშავება უკვე ხდება და უცხოური კომპანიები უკვე არიან ამაში ჩართულები. მაგალითად, ეს არის „კრივოი-როგის“ რკინის საბადო, მარგანეცი, არის ქვანახშირის მრეწველობა, რომელიც მომგებიანი საერთოდ არ არის და სუბსიდირება ხდება. გარკვეულწილად ეს იშვიათი მეტალების რაღაცა განზომილი მარაგი უკრაინაში, ცოტა გაზვიადება და ამას აქვს თავისი მიზეზი. მიზეზი არის ის, რომ ტრამპს სჭირდება ალაპარაკოს უკრაინის ლიდერები იმაზე, თუ სად წავიდა და როგორ იხარჯებოდა ფული. ამიტომ ამბობს ტრამპი 500 მილიარდს, მერე 350 მილიარდს. დათვლილია, რომ კილის ინსტიტუტმა გერმანიის ერთ-ერთი think thank-ია, დათვალა, რომ რეალურად შეერთებულ შტატებს უკრაინისთვის მიცემული აქვს 19.7 მილიარდი. სამხედრო ტექნიკის, აღჭურვილობისა და ფულის სახით. ამ 500 მილიარდზე, ზელენსკიმ თქვა კიდეც, რომ ამდენი არ მიმიღია. ამ დროს საბუთებით იქ რამდენია გაფორმებული. შესაბამისად, ეს პირველ რიგში ტრამპს სჭირდება უკრაინელებისგან ინფორმაცია და დადასტურება იმისა, რომ გამცემები ვინც იყვნენ, ანუ დემოკრატიული პარტია, ეს ფული სადღაც წავიდა ხომ? ახლა დაიწყო უკვე გამოძიება და მიჰყვებიან. მიჰყევი ფულს – ეს ამერიკული გამოთქმა და ამას ისინი გააკეთებენ, რა თქმა უნდა. მთავარი მტერი ახლა არც რუსეთია ტრამპის ადმინისტრაციისთვის, არც ზელენსკი ეს არის გლობალისტური, ლიბერალური ელიტა, რომელიც უკვე ევროპაშია მოკალათებული და იქიდან გამოუცხადეს ომი, არ მგონია, რომ მათ რამე შანსი ჰქონდეთ“,- აღნიშნა გოგავამ.

“პოლიტიკა არ იცნობს მეგობრებს, იცნობს ინტერესებს და ამ ინტერესებს”- სუბარი

პოლიტიკა ზოგადად არ იცნობს მეგობრებს, იცნობს ინტერესებს და ამ ინტერესებს ყველა ქვეყანა თავისებურად ახორციელებს, – განაცხადა იურიდიულ საკითხთა კომიტეტის სხდომაზე სოზარ სუბარმა.

მისივე თქმით, საქართველოს ხელისუფლებამაც უნდა მიიღოს კანონები, რომელიც ქვეყანას დაიცავს.

“რატომ იყო პროტესტი, ძალიან კარგად ვიცოდით მაშინაც და კიდევ უფრო გამოჩნდა დღეს, როდესაც ამერიკელებმა დაიწყეს ამ დაფინანსებების გამოძიება, განსაკუთრებით USAID-ი, NED-ი. პრაქტიკულად ღიად ამბობს ამერიკის ადმინისტრაცია, რომ ეს არის ფული, რომელიც გამოიყენებოდა სხვადასხვა ქვეყანაში სახელმწიფო გადატრიალებების მოსაწყობად, მთავრობების შესაცვლელად, ბუნებრივია, ამის გამჟღავნება ძალიან ბევრ დონორს არ უნდოდა და მითუმეტეს არ უნდოდათ მიმღებ ორგანიზაციებს.

პოლიტიკა ზოგადად არ იცნობს მეგობრებს, იცნობს ინტერესებს და ამ ინტერესებს ყველა ქვეყანა თავისებურად ახორციელებს და ჩვენც, ბუნებრივია, უნდა მივიღოთ კანონები, რომლებიც დაიცავს ჩვენს ქვეყანას,” – აღნიშნა სოზარ სუბარმა.

იურიდიულ საკითხთა კომიტეტმა ფრაქცია “ქართული ოცნების” მიერ საკანონმდებლო ინიციატივის წესით წარდგენილ კანონპროექტს – “უცხოური აგენტების რეგისტრაციის აქტი” პირველი მოსმენით მხარი დაუჭირა.