Home Blog Page 271

მოემზადე, თიბისის განათლების ყველაზე მოთხოვნად პროგრამებზე რეგისტრაცია მარტიდან განახლდება

ტექნოლოგიებითა და ბიზნეს მიმართულებებით დაინტერესებულ უფროსკლასელებსა და სტუდენტებს, თიბისი, საგანმანათლებლო უფასო პროგრამებს სთავაზობს. მარტიდან, მთელი საქართველოს მასშტაბით, თიბისის ტექსკოლასა და კამპუსში, ონლაინ კურსებზე მიღება კვლავ განახლდება.

თიბისის ტექსკოლა ეს არის საგანმანათლებლო პლატფორმა, რომელიც მე-9 კლასიდან მე-12 კლასის ჩათვლით, ტექნოლოგიებით დაინტერესებულ მოსწავლეებს, ცოდნის გაღრმავების საშუალებას აძლევს. აქ სფეროს წამყვანი სპეციალისტები, სკოლის მოსწავლეებს, შეასწავლიან – ვებგვერდების აწყობას (Front End: HTML, CSS) და მათ პროგრამირებას (Back End – Python), მობილური აპლიკაციების შექმნას, UI/UX დიზაინს, გრაფიკულ დიზაინს და ციფრულ მარკეტინგსა.

„თიბისი კამპუსი“ კი 18-24 წლის ახალგაზრდებს აძლევს შესაძლებლობას, როგორც ტექნოლოგიური, ისე ბიზნეს მიმართულებების შესახებ მიიღონ ან გაიღრმაონ ცოდნა. ამასთან, თიბისის მიზანია შექმნას უნივერსიტეტისგან განსხვავებული სივრცე, სადაც სტუდენტები, არა მხოლოდ თეორიულ, არამედ პრაქტიკულ გამოცდილებას მიიღებენ და კამპუსის გავლის შემდეგ შეძლებენ არჩეული მიმართულებით კონკურენტულ ბაზარზე დასაქმებას. ეს დისციპლინებია: ტექნოლოგიური პროექტების მართვის საფუძვლები, მონაცემთა ანალიზი, გრაფიკული დიზაინი, UI/UX დიზაინი, მეწარმეობა და ბიზნესის დაგეგმარება, სარეკლამო კონტენტის შექმნა, საძიებო სისტემების ოპტიმიზაცია – SEO და ციფრული მარკეტინგი.

მაღალი ხარისხის განათლების ხელმისაწვდომობის მიზნით თიბისის ტექსკოლაში  და კამპუსში მონაწილეობის მიღება საქართველოს ნებისმიერი რეგიონიდანაა შესაძლებელი და სწავლის პროცესი სრულიად უფასოა. მთავარია მონაწილეებს ჰქონდეთ ახლის შემეცნების, განვითარების და ტექნოლოგიური სამყაროს მწვერვალებს მიღწევის სურვილი.

თვალი ადევნეთ პროგრამების რეგისტრაციის თარიღებს და სიახლეებს ვებგვერდზე: tbceducation.ge

R

ერთიანი ეროვნული გამოცდებისათვის რეგისტრაცია იწყება

გამოცდების ეროვნული ცენტრის ინფორმაციით, ერთიანი ეროვნული გამოცდებისათვის, საერთო სამაგისტრო გამოცდისათვის, ასევე სტუდენტთა საგრანტო კონკურსისათვის რეგისტრაცია 5 მარტს, 10:00 საათზე დაიწყება და 2 აპრილის 18:00 საათზე დასრულდება.

2025 წლის ერთიანი ეროვნული გამოცდებისათვის რეგისტრაციის დაწყების თარიღი ცნობილია.

ლაიონსების თვალის დიაბეტურმა კლინიკამ ვეტერანებისა და მათი ოჯახის წევრთათვის 29-ე საქველმოქმედო სამედიცინო აქცია ზუგდიდში ჩაატარა

მიმდინარე წლის 1- 2 მარტს, ვეტერანების საქმეთა სახელმწიფო სამსახურის ორგანიზებით, ურთიერთთანამშრომლობის მემორანდუმის ფარგლებში, ლაიონსების თვალის დიაბეტურმა კლინიკა-საქართველომ, თბილისის სახელმწიფო სამედიცინო უნივერსიტეტის თვალის სნეულებათა დეპარტამენტთან ერთად, ზუგდიდის მუნიციპალიტეტში მცხოვრები ომისა და თავდაცვის ძალების ვეტერანებისა და მათი ოჯახის წევრთათვის, მორიგი, 29-ე უფასო ოფთალმოლოგიური გამოკვლევები ჩაატარა.

საქველმოქმედო სამედიცინო აქციაში მონაწილეობა მიიღო კვალიფიციურ მედიკოსთა 12 კაციანმა ჯგუფმა (ოფთალმოლოგები, ენდოკრინოლოგი) მაღალტექნოლოგიური აპარატურით.

საქველმოქმედო აქციით ისარგებლა სამსახურის 160-მა ბენეფიციარმა და მათ ოჯახის წევრმა. ვეტერანებსა და მათი ოჯახის წევრებს, უსასყიდლოდ გადაეცათ 320 ოპტიკური სათვალე და 30 გლუკომეტრი.

აქციის მიმდინარეობას ადგილზე გაეცნენ, ვეტერანების საქმეთა სახელმწიფო სამსახურის, სოციალურ საკითხთა და სააღრიცხვო-ანალიტიკური დეპარტამენტის უფროსი, ვალერიან ძებისაშვილი, ამავე დეპარტამენტის უფროსი სპეციალისტი, ვაჟა დალაქიშვილი, სამსახურის რეგიონული მართვის დეპარტამენტის სამეგრელო-ზემო სვანეთის სამმართველოს უფროსი, რევაზ გაბუნია და სამედიცინო ცენტრის “დიომედ აფხაზეთი” ზუგდიდის ფილიალის მენეჯერი, ირინა ჩარგაზია.

ურთიერთთანამშრომლობის მემორანდუმი, ვეტერანების საქმეთა სახელმწიფო სამსახურსა და ლაიონსების თვალის დიაბეტურ კლინიკა-საქართველოს შორის, პირველად, 2016 წელს გაფორმდა და ყოველწლიურად განახლდება.

მემორანდუმის ფარგლებში, ლაიონსების თვალის დიაბეტურმა კლინიკა-საქართველომ, მთელი ქვეყნის მასშტაბით, დღეის ჩათვლით, 29 საქველმოქმედო სამედიცინო აქცია ჩაატარა, რომლის ფარგლებშიც, სამსახურის 3354 ბენეფიციარს, უსასყიდლოდ ჩაუტარდათ კვალიფიციური, ოფთალმოლოგიური გამოკვლევები; ამასთან, უსასყიდლოდ ჩატარდა სხვადასხვა სახის მიკროქირურგიული ოპერაციებიც და ვეტერანებსა და მათი ოჯახის წევრებს, უფასოდ გადაეცათ 4767 სათვალე;

ვეტერანებისა და მათი ოჯახის წევრებისათვის, საქველმოქმედო სამედიცინო აქციები, მთელი საქართველოს მასშტაბით, კვლავ ჩატარდება, რომელთა შესახებ, ინფორმაცია, ვეტერანებს, წინასწარ მიეწოდებათ.

ჩაფიძის კლინიკამ ვეტერანებისთვის მორიგი საქველმოქმედო აქცია ჩაატარა

მიმდინარე წლის 1 მარტს, ვეტერანების საქმეთა სახელმწიფო სამსახურის ორგანიზებით, აკადემიკოს გ.ჩაფიძის სახელობის გადაუდებელი კარდიოლოგიის ცენტრის ექიმებმა, თბილისში მცხოვრები ომისა და თავდაცვის ძალების ვეტერანებისა და მათი ოჯახის წევრებისთვის ურთიერთთანამშრომლობის მემორანდუმის ფარგლებში, რიგით 177-ე საქველმოქმედო-სამედიცინო აქცია ჩაატარეს.

აქცია მოიცავდა კარდიოლოგიური პროფილის უფასო გამოკვლევებს ( ექიმი-კარდიოლოგის კონსულტაცია, ელექტროკარდიოგრამა, გულის ექოსკოპია, ლაბორატორიული კვლევები ).
საქველმოქმედო სამედიცინო აქციით უსასყიდლოდ ისარგებლა სამსახურის 38-მა ბენეფიციარმა.

მემორანდუმის გაფორმებიდან დღეის ჩათვლით, ვეტერანების საქმეთა სახელმწიფო სამსახურის ორგანიზებით, აკადემიკოს გ.ჩაფიძის სახელობის გადაუდებელი კარდიოლოგიის ცენტრის ექიმებმა, მთელი ქვეყნის მასშტაბით, 177 საქველმოქმედო სამედიცინო აქცია ჩაატარეს;

სამედიცინო მომსახურება უსასყიდლოდ გაეწია სამსახურის -14 569 ბენეფიციარს. სხვადასხვა სამედიცინო დაწესებულებებთან არსებული მემორანდუმების ფარგლებში, ვეტერანებისა და მათი ოჯახის წევრთათვის, საქველმოქმედო სამედიცინო აქციები, მთელი საქართველოს მასშტაბით, კვლავ ჩატარდება, რომელთა შესახებ, ინფორმაცია, ვეტერანებს, წინასწარ მიეწოდებათ.

“ვიყოთ რეალისტები: ევროპელები არ აღიარებენ, მაგრამ უკრაინაში ომი უკვე მთავრდება” – ABC

ესპანურ ABC-ში, რომელიც პოპულარობით და ტირაჟით ქვეყნის გაზეთების სამეულში შედის – El País-სა და El Mundo-სთან ერთად, გამოქვეყნებულია სტატია სათაურით „ვიყოთ რეალისტები“: ევროპელები არ აღიარებენ, მაგრამ უკრაინაში ომი უკვე მთავრდება“, რომლის ავტორია ხუან მანუელ დე პრადა, ესპანელი მწერალი და ლიტერატურული კრიტიკოსი.

გთავაზობთ პუბლიკაციას შემოკლებით:

თითქმის 30 წლის წინათ, როცა გულწრფელი და ოპტიმიზმით აღსავსე ახალგაზრდა ვიყავი, კამილო ხოსე სელამ (ესპანელი კლასიკოსი მწერალი, 1989 წლის ნობელის პრემიის ლაურეატი) ერთ-ერთი მეგობრული საუბრის დროს ასეთი რამ მითხრა: „მასობრივი ინფორმაციის საშუალებები ყოველთვის გვთავაზობენ რეალობას იმ ვერსიით, რომელიც მათ იდეოლოგიას შეესაბამება.  მათი ერთმანეთთან შედარება და გაანალიზება აუცილებელია, რათა ტყუილი სინამდვილისაგან გავარჩიოთ“.

კამილო ხოსე სელას სიტყვები იმ დროს გამახსენდა, როცა მასმედიის ერთსულოვნება დავინახე ოვალურ კაბინეტში მომხდარი უცნაური შეხლა-შემოხლის შემდეგ – დონალდ ტრამპმა  ვოლოდიმირ ზელენსკის შეახსენა, რომ მან ომი უკვე წააგო და თუ იგი საომარ მოქმედებებს გააგრძელებს, ფრონტზე ათასობით ადამიანს ისევ გაგზავნის, ამით მესამე მსოფლიო ომის პროვოცირება შეიძლება მოხდესო.

კაცმა რომ თქვას, უკრაინაში მიმდინარე ომმა უკვე გამოავლინა, თუ ვინაა მოგებული და ვინაა წაგებული – მიუხედავად იმისა, რომ გონებადაბინდულ ევროპელ პოლიტიკოსებს ამის აღიარება არ სურთ. ომი, შეიძლება ითქვას, დასრულებულია – დონალდ ტრამპს აღარ სურს, რომ კონფლიქტის მთელი სიმძიმე ამერიკამ თავისი მხრებით ატაროს. მან იცის, რომ ომი წაგებულია: როგორც კი აშშ-ის დახმარება შეწყდება, მთელი ეს აბსურდის თეატრი დასრულდება.

ვრცელდება ინფორმაციები პატრიოტული მოწოდებებით, „ომი სისხლის უკანასკნელ წვეთამდე“, „იბრძოლე, უკრაინა, ჩვენ შენთან ვართ“, ამასობაში კი ისინი, ვისაც ევროპა მხარდაჭერას უცხადებს, ყოველდღიურად ათასობით იხოცებიან. პოლიტიკოსებს იმედი აქვთ, რომ ახალგაზრდები ამ პატრიოტული მოწოდებების ფონზე ჯარში წასვლას გადაწყვეტენ მარიუპოლის, ბახმუტის, ავდეევკას და შეიძლება ყირიმის დასაბრუნებლადაც კი… თუმცა ვეჭვობ, რომ უკრაინელებს უკვე ვერავინ ვერ მოატყუებს, განსაკუთრებით კი ისინი, ვინც მათ მომავალი წაართვა.

ესპანური მასობრივი ინფორმაციის საშუალებებისათვის, რომელიც მოვლენებს „ვარდისფერი სათვალით“ უყურებს, უმჯობესი იქნებოდა მოვლენებისათვის რეალურად შეეხედა და ჩვენი მმართველი ზედაფენისათვის რჩევა მიეცა, რომ მთავრობამ მკაცრი ნეიტრალიტეტის პოლიტიკა გაატაროს. ესპანეთისათვის ნეიტრალიტეტის დაცვა ომის პერიოდში ყოველთვის ისტორიულად მომგებიანი იყო. უმჯობესი იქნებოდა, რომ ესპანურმა მედიამ გროტესკულად არ წარმოაჩინოს და დამცინავად აღწეროს უკრაინის კონფლიქტი მეორე მსოფლიო ომის მოძველებული მიდგომებით – თითქოსდა ის სამშვიდობო მოლაპარაკება, რომლის დაწყებაც დონალდ ტრამპს სურს, „მიუნჰენის 1938 წლის გარიგებას მოგვაგონებსო“.

თუ ჩვენ რუსეთ-უკრაინის ომს ობიექტური თვალსაზრისით მივუდგებით, მაშინ ისიც ვთქვათ, რომ მეორე მსოფლიო ომში აშშ და რუსეთი საერთო მტრის წინააღმდეგ იყვნენ გაერთიანებულები. ვშიშობ, რომ თუ ისტორია განმეორდება, იმ როლს, რომლის შესრულებაც მესამე რაიხს მოუწია, დღეს ევროპა გაიმეორებს. ალბათ, არ არის საჭირო ომის გაგრძელებაზე ლაპარაკი იმ სახლში, სადაც ომის შედეგად ჩამოხრჩობილი უკვე გყავს.

წყარო

თიბისი კონცეპტის საგაზაფხულო შეთავაზებები კვლავ გრძელდება

თიბისი კონცეპტის საგაზაფხულო კვირეული მრავალფეროვანი შეთავაზებებით უწყვეტად გრძელდება. განსხვავებული კატეგორიების პარტნიორ ობიექტში ქეშბექ აქციები 8 მარტის ჩათვლით იქნება.

თიბისი კონცეპტ Mastercard ბარათის შეთავაზებები:

8 მარტის ჩათვლით, ნებისმიერ დღეს, 12- მდე ესთეტიკურ ცენტრში თიბისი კონცეპტ Mastercard ბარათით გადახდისას, გადახდილი თანხის 30% მომენტალურად დაგიბრუნდებათ.

მხოლოდ 8 მარტს, ბარათის მფლობელები ქეშბექ შეთავაზებით  ნიშ პარფიუმერიის გამორჩეული ბრენდების- Jo Malone-სა და არომატეკაშიც ისარგებლებთ და სასურველი ნივთების შეძენისას, გადახდილი თანხის 25%-ს, ჯამში მაქსიმუმ 300 ლარს, დაიბრუნებთ.

საგაზაფხულო შეთავაზებები ვრცელდება, როგორც ძველ, ისე ახალ თიბისი კონცეპტ Mastercard ბარათებზე.

 ახალი თიბისი კონცეპტ ბარათის შეთავაზებები:

7-8 მარტს ტანსაცმლის, ფეხსაცმლისა და აქსესუარების კატეგორიაში, პარტნიორ სავაჭრო ობიექტებში ახალი თიბისი კონცეპტ ბარათით შოპინგისას, დაიბრუნე გადახდილი თანხის 30%, ჯამში მაქსიმუმ 300 ლარი მომენტალურად.

არ გამოტოვოთ საგაზაფხულო კვირეული, იხილეთ, თითოეული ბარათის შეთავაზების პარტნიორი ობიექტების ჩამონათვალი და იშოპინგეთ  განსაკუთრებული პირობებით.

გაითვალისწინეთ, ქეშბექები დაგიბრუნდებათ მხოლოდ თიბისი ტერმინალზე გადახდის შემთხვევაში.

r

მას არავინ არ უნდა ენდოს“: როგორ არღვევდა ვლადიმერ პუტინი დაპირებებს – Frankfurter Rundschau

გერმანულ გაზეთ „ფრანკფურტერ რუნდშაუში“ (Frankfurter Rundschau) დაბეჭდილია სტატია სათაურით „მას არავინ არ უნდა ენდოს“: როგორ არღვევდა ვლადიმერ პუტინი დაპირებებს“ (ავტორი – ქროსტოფ გშოსმანი). პუბლიკაციაში განხილულია საკითხი – რამდენად სანდოა ვლადიმერ პუტინის სიტყვა და უნდა დაუჯერონ თუ არა კრემლის დაპირებებს დასავლელმა პოლიტიკოსებმა.

გთავაზობთ სტატიას შემოკლებით:

მოსკოვი და ვაშინგტონი, ხანგრძლივი ცივი ურთიერთობებისა და ე.წ. „რადიოსიჩუმის“  შემდეგ, ერთმანეთს უახლოვდებიან – უშუალოდ პრეზიდენტები ტელეფონით საუბრობენ, მათი წარმომადგენლები კი ერ-რიადში უკვე მრგვალ მაგიდასთან  სხედან და მსოფლიოს ბედზე ლაპარაკობენ. უახლოეს ხანში ერთმანეთს თვითონ პრეზიდენტებიც უნდა შეხვდნენ – დონალდ ტრამპი და ვლადიმერ პუტინი. მაგრამ ომის ვეტერანი ჯარისკაცები ბელარუსიდან, ჩეჩნეთიდან და საქართველოდან გვაფრთხილებენ, რომ რუსეთის თვითმპყრობელ მმართველს არავინ არ უნდა ენდოს – ვლადიმერ პუტინი ყოველთვის არღვევს მიცემულ დაპირებებს.

ჩეჩნები ბენორი და ბერხი, ქართველი ვახო და ბელარუსი სტარე უკრაინის არმიის რიგებში იბრძვიან. ბენორი უკვე ნაბრძოლია პუტინის ჯარისკაცებთან ჩეჩნეთის მეორე ომის დროს, ვახო კი 1993 წელს რუსეთის მხარდაჭერილ აფხაზ სეპარატისტებს ეომებოდა. იგი ამბობს, რომ რუსეთი არასოდეს არ ასრულებს თავის ვალდებულებას – არ ჩეჩნეთის, არც საქართველოს და არც უკრაინის მიმართ, სადაც კრემლმა ყირიმის ანექსია მოახდინა. და თუ ეს ყველაფერი ვიცით, რატომ უნდა ვიყოთ დარწმუნებულები, რომ იგი თავის დაპირებას ახლა შეასრულებს?“.

პუტინის ომი ჩეჩნეთში

ბენორის თქმით, როცა 1999 წელს რუსეთის იმდროინდელმა პრემიერ-მინისტრმა ვლადიმერ პუტინმა ჩეჩნეთის მეორე ომი დაიწყო (ანტიტერორისტული ოპერაციის სახელით), მან ამით 1996 წელს ხასარვიურტში დადებული შეთანხმების პირობები დაარღვია. სამწუხაროდ, იმდროინდელი ჩეჩნეთის არმია კარგად არ იყო შეიარაღებული, არ წარმოადგენდა ერთიან სამხედრო ორგანიზმს და ამიტომ 2009 წლისათვის ჩეჩნებმა წინააღმდეგობა ძირითადად შეწყვიტეს. „ჩვენთან იმ დროს თითქმის ყოველდღიურდ ხდება ის საშინელებმა, რაც უკრაინის ბუჩაში რუსებმა ჩაიდინეს“, – იხსენებს ბენორი, – რუსები მუდმივად იჭრებოდნენ ჩვენს სოფლებში ყველას ხოცავდნენ გამურჩევლად – მამაკაცებს, მოხუცებს, ქალებს და ბავშვებს… მათ ჩეჩნეთში თითქმის 100 ათასი ადამიანი მოკლეს და უამრავი ქალაქი დაანგრიეს.

ვლადიმერ პუტინის ორმაგი პოლიტიკა

ბოლო დროს კრემლის მეთაური ოპტიმისტურად ლაპარაკობს აშშ-რუსეთის ურთიერთობაზე, უკვე განხორციელდა პირველი კონტაქტები ვლადიმერ პუტინსა და დონალდ ტრამპს შორის. „ორივე მხრიდან – ჩვენგანაც და ამერიკელებიდანაც არის სურვილი ნორმალური სახელმწიფოთაშორისო ურთიერთობის აღდგენის მიზნით, რათა უამრავი დაგროვილი პრობლემა მოგვარდეს, მსოფლიოს მასშტაბით“, – განაცხადა ვლადიმერ პუტინმა უშიშროების ფედერალური სამსახურის კოლეგიის სხდომის დროს.

მაგრამ ბენორი პუტინის არცერთ სიტყვას არ ენდობა. იგი მოსკოვის მოქმედებას ასეთი სახით პროგნოზირებს: „რუსეთის პრეზიდენტი შეეცდება უკრაინულ საზოგადოებაში განხეთქილება შეიტანოს – ისე როგორც ჩეჩნეთში გააკეთა. იგი უკრაინას სრულად დაიმორჩილებს, ხელისუფლებში პრორუსულ მთავრობას მოიყვანს, უკრაინას ეყოლება ისეთი არმია, რომელიც ხელისუფლების მომხრე იქნება. ჩეჩნეთში ზუსტად იგივე განხორციელდა. ამაში 100%-ით ვარ დარწმუნებული“.

როგორც ბენორის თანამებრძოლი ბერხი აცხადებს, მას რუსების მიმართ ნდობის გამოხატვა არ შეუძლია. „ჩემი ქვეყანა სწორედ სამშვიდობო ხელშეკრულების შედეგად დავკარგე. ისტორია მეორდება. ჩვენ ჩეჩნეთის პირველი ომის მოვიგეთ, მაგრამ საბოლოოდ მაინც რუსები დარჩნენ მოგებულები, რადგან ხასარვიურტში მოცემული პირობა დაარღვიეს. ვლადიმერ პუტინი მკვლელი და მატყუარაა. რუსების მიერ ხელმოწერილი შეთანხმება ყოველთვის ფარატინა ქაღალს წარმოადგენს“.

„პუტინს უკრაინაში მეორე ბელარუსის შექმნა სურს“

ბელარუსი სტარე უკრაინის არმიაში იმ დროს შევიდა, როცა დაინახა, თუ რა საშინელებებს სჩადიოდნენ რუსი ჯარისკაცები.

„უკრაინის არმიაში ჩემი სამსახურის დაწყების შემდეგ ბელარუსის „კაგებემ“ ოჯახისა და ნათესავების დაშინება და დამუქრება დაიწყო. მათ რამდენჯერმე დააკავეს ჩემი ახლობლები და მათგან  ჩემს შესახებ ინფორმაციების გადაცემას მოითხოვდნენ. ბელარუსი კორუმპირებული ქვეყანაა, რომელსაც რუსეთი მთლიანად აკონტროლებს. კრემლს უნდა, რომ უკრაინაშიც ისეთივე დიქტატურა დამყარდეს, როგორიც ბელარუსშია, ალექსანდრე ლუკაშენკოს მიერ.

სანამ რუსები თავიანთ მიზანს არ მიაღწევენ, ისინი ომს არ შეწყვეტენ. უკრაინელები არ უნდა მოტყუვდნენ და პუტინთან სამშვიდობო ხელშეკრულება არ უნდა გააფორმონ. კიევმა ბრძოლა უნდა გააგრძელოს“, – ამბობს სტარე.

„საქართველოს პრორუსი პრეზიდენტი ჰყავს“

ერთი შეხედვით ვლადიმერ პუტინი, დონალდ ტრამპთან საუბრისას, მშვიდობის დასამყარებლად ისწრაფვის: „რუსეთი ყოველთვის მზად არის უკრაინის კონფლიქტი მოლაპარაკების გზით გადაიჭრასო“, – აცხადებს კრემლის მეთაური, მაგრამ გავიხსენოთ: ვლადიმერ პუტინმა თვითონ დაიწყო ომი მეზობელი ქვეყნების – საქართველოსა და უკრაინის – წინააღმდეგ 2008 და 2022 წლებში.

თუ რად ღირს ვლადიმერ პუტინის სიტყვა, ქართველმა ვახომაც კარგად იცის. „1993 წელს აფხაზმა სეპარატისტებმა ომი რუსების დახმარებით მოგვიგეს. კრემლმა ომი საქართველოს წინააღმეგ ისევ დაიწყო 2008 წელს. საქართველოს დღეს პრორუსი პრეზიდენტი ჰყავს“, – იმედგაცრუებით ამბობს ვახო და ხაზს უსვამს, რომ ის, რასაც დონალდ ტრამპი სთავაზობს რუსეთს, სხვა არაფერია, თუ არა უკრაინის კაპიტულაცია. რუსეთს არანაირი ხელშეკრულება არ შეაჩერებს.

წყარო

პრეზიდენტ ბუშის დროს რუსებმა მიიღეს საქართველო, პრეზიდენტ ობამას დროს – ყირიმი, პრეზიდენტ ტრამპის დროს – ვერაფერი – ტრამპი

პრეზიდენტ ბუშის დროს მათ მიიღეს საქართველო, პრეზიდენტ ობამას დროს, მათ მიიღეს ლამაზი, დიდი წყალქვეშა ბაზა, დიდი მიწის ნაკვეთი – ყირიმი. პრეზიდენტ ტრამპის დროს ვერაფერი მიიღეს, – ამის შესახებ აშშ-ის პრეზიდენტმა, დონალდ ტრამპმა განაცხადა.

„თუ დაფიქრდებით, პრეზიდენტ ბუშის დროს მათ მიიღეს საქართველო, არა? რუსეთმა მიიღო საქართველო. პრეზიდენტ ობამას დროს მათ მიიღეს ლამაზი დიდი წყალქვეშა ბაზა, დიდი მიწის ნაკვეთი, სადაც მათ ჰყავთ წყალქვეშა ნავები. თქვენ ეს იცით, არა? ყირიმი. პრეზიდენტ ბაიდენის დროს ისინი ცდილობდნენ მიეღოთ ყველაფერი. ისინი ცდილობდნენ მიეღოთ მთელი დიდი უკრაინა, მთელი რამ. მე რომ არ შემოვსულიყავი აქ, ისინი ყველაფერს მიიღებდნენ“, – განაცხადა ტრამპმა თეთრ სახლში გამართულ პრესკონფერენციაზე.

მისი თქმით, ერთადერთი, რაც რუსებს მისცა, სანქციები იყო, უკრაინას კი – “ჯაველინები”.

იცით, რა მივეცი? მივეცი მათ ტანკსაწინააღმდეგო რაკეტები. ეს არის ის, რაც მე მათ მივეცი. მე მათ სანქციები დავუწესე რუსეთზე – რუსეთზე. მე მათ ჯაველინები მივეცი. იცით ჯაველინები? თქვენ იცით, კიევისკენ ასობით ტანკი მიემართებოდა, ისინი შეუჩერებელი იყვნენ და მე მათ ჯაველინები მივეცი.პუტინი არის ის, ვინც გეტყვით, რომ ეს არც ისე კარგი იყო მათთვის. რუსეთისთვის მწუხარების გარდა არაფერი მიმიცია. მე მათ სანქციები და ჯაველინები მივაწოდე. ეს არის ის, რაც მე მათ მივეცი“, – აღნიშნა ტრამპმა.

ვენეციის კომისიამ საქართველოს პარლამენტის მიერ „ადმინისტრაციულ სამართალდარღვევათა კოდექსსა“ და „შეკრებებისა და მანიფესტაციების შესახებ“ კანონში ცვლილებებთან დაკავშირებით დასკვნა გამოაქვეყნა

ვენეციის კომისიამ საქართველოს პარლამენტის მიერ „ადმინისტრაციულ სამართალდარღვევათა კოდექსსა“ და „შეკრებებისა და მანიფესტაციების შესახებ“ კანონში ცვლილებებთან დაკავშირებით დასკვნა გამოაქვეყნა.

ანგარიშში ვკითხულობთ, რომ საკანონმდებლო ცვლილებები ნაჩქარევადაა მიღებული. ამასთან, წერია, რომ პროცესში არ მონაწილეობდნენ შესაბამისი დაინტერესებული მხარეები.

კომისიის დოკუმენტს საპარლამენტო უმრავლესობის ლიდერი გამოეხმაურა. მამუკა მდინარაძე ამბობს, რომ საკანონმდებლო ცვლილებების დაჩქარებული წესით მიღება სწორედ იმდროინდელმა ვითარებამ გახადა საჭირო, დაინტერესებული მხარეები კი, ამ ცვლილებების განხილვის პერიოდშიც პარლამენტის მიმდებარედ დესტრუქციული ქმედებებით იყვნენ დაკავებული. მდინარაძის თქმით, აღნიშნულ ცვლილებებთან დაკავშირებით კრიტიკა უსაფუძვლოა.

4 მარტის ასტროლოგიური პროგნოზი

ვერძი

აქტიური და მოვლენებით მდიდარი დღეა. იქნება. კარგი რეაქცია და პრინციპული მოქმედება წარმატების მიღწევაში დაგეხმარებათ, თუმცა მნიშვნელოვანია, რომ ზომიერება შეინარჩუნოთ. მოულოდნელი სიტუაციები თქვენგან მოქნილობასა და ადაპტაციის უნარს მოითხოვს. თუ სიმშვიდეს შეინარჩუნებთ, სიტუაციის თქვენს სასარგებლოდ შეცვლას შეძლებთ. კარგი იქნება თუ გაზაფხულის პირველ დღეებს ახალი სამოსით ან ვარცხნილობით შეხდებით.

რჩევა: ეცადეთ, სიტუაცია აკონტროლოთ და ემოციური გადაწყვეტილებები არ მიიღოთ.

კურო

ეს დღე მშვიდად და სტაბილურად, განსაკუთრებული ცვლილებების გარეშე ჩაივლის. ხელსაყრელი დღეა მიმდინარე საკითხების მოგვარებისა და მომავლის დაგეგმვისთვის. თუ მოთმინებას გამოიჩენთ ფინანსური საკითხები თქვენს სასარგებლოდ გადაწყდება. დროა საყვარელ ადამიანთან ურთიერთობაში გაჩენილი სირთულეები გულწრფელი საუბრით მოაგვაროთ.

რჩევა: ეცადეთ, ეს დღე საოჯახო თუ სამსახურებრივ საქმეებში წესრიგის დასამყარებლად გამოიყენოთ.

ტყუპები

ეს დღე შესაფერისია ახალი ურთიერთობების, მოლაპარაკებებისა და ახალი ნაცნობობისთვის. თუ სწორად წარადგენთ თქვენი იდეები მოულოდნელ შედეგებს მოიტანს. გახსოვდეთ, რომ ორი კურდღლის მადევარი ვერც ერთს დაიჭერს, ამიტომ ერთდროულად რამდენიმე საქმის კეთებაზე უარი თქვით.

რჩევა: ამ დღეს მნიშვნელოვანია, რომ ყურადღება მნიშვნელოვან საკითხებზე გაამახვილოთ და საკუთარ თავზე იმაზე მეტი არ აიღოთ, ვიდრე შეგიძლიათ გაუმკლავდეთ.

კირჩხიბი

ემოციურად დატვირთული დღეა, რომელიც ურთიერთობებში სიფრთხილეს მოითხოვს. შესაძლოა, გარკვეულ სიტუაციებში კომფორტის ზონის დატოვება მოგიწიოთ, თუმცა საბოლოოდ ეს თქვენთვის სასარგებლო იქნება. მთავარია, პანიკას არ მიეცეთ და ნაჩქარევი დასკვნები არ გამოიტანოთ. არახელსაყრელი დღეა მგზავრობისთვის. უმჯობესია საღამო მყუდრო გარემოში, ოჯახის წევრებთან ან ერთგულ მეგობრებთან ერთად გაატაროთ.

რჩევა: სიმშვიდე შეინარჩუნეთ და ყოველი სიტყვა კარგად აწონეთ, რომ უნებურად, ახლობელი ადამიანი არ შეურაცხყოთ.

ლომი

ეს დღე ხელსაყრელია თქვენი უნარების და ინიციატივების წარმოსაჩენად. შესაძლოა, ყურადღების ცენტრში აღმოჩნდეთ და ეცადეთ ამით ისარგებლოთ, თუმცა, საკუთარი შესაძლებლობები ზედმეტად არ გადააფასოთ. თუ სამსახურში შეცდომა დაუშვით, ეცადეთ ისე გამოასწოროთ, რომ არავინ შენიშნოს.

რჩევა: ეცადეთ, ეს დღე ახალი კავშირების დასამყარებლად გამოიყენოთ — ახალი ნაცნობობა შეიძლება სასარგებლო აღმოჩნდეს.

ქალწული

ეს დღე შესაფერისია ანალიზისა და მეთოდური მუშაობისთვის. შესაძლოა, საქმეში მცირე შეფერხება შეგექმნათ, მაგრამ თუ თანმიმდევრულად იმოქმედებთ, ნებისმიერ პრობლემას გაუმკლავდებით. სწორად განსაზღვრეთ რისკები და ნუ გაჯიუტდებით. ეცადეთ მეტი ტაქტი და დიპლომატია გამოიჩინოთ.

რჩევა: მშვიდად და ორგანიზებულად იმოქმედეთ — ეს ზედმეტ სტრესს აგარიდებთ.

სასწორი

წარმატებული დღეა, განსაკუთრებით ურთიერთობის დამყარების კუთხით. გარშემომყოფებთან საერთო ენას იოლად გამონახავთ და რთული საკითხების მოგვარებაში თქვენი მომხიბვლელობა დაგეხმარებათ. მთავარია, ზედმეტ პასუხისმგებლობებს მოერიდოთ. შესაძლოა, საყვარელ ადამიანთან გაუგებრობამ იჩინოს თავი. სიტუაციას ნუ გაართულებთ. ეცადეთ, ნაკლებად კრიტიკული იყოთ და თქვენი ენერგია საქმისკენ მიმართოთ.

რჩევა: ენდეთ ინტუიციას, თუმცა საღ აზრს ნუ უგულებელყოფთ.

მორიელი

ეცადეთ, მოულოდნელი ცვლილებებისთვის მოემზადოთ. მნიშვნელოვანია, რომ სიმშვიდე შეინარჩუნოთ და ემოციებს არ აჰყვეთ. თქვენი ინტუიცია განსაკუთრებით გამძაფრებული იქნება, ამიტომ საკუთარ გრძნობებს უსმინეთ. ნუ ეცდებით, რომ გარშემო მყოფებს საკუთარი სიმართლე ყვირილით და აგრესიით დაუმტკიცოთ. გირჩევთ, ემოციების ნაცვლად, ფაქტებით იხელმძღვანელოთ

რჩევა: აკონტროლეთ თქვენი რეაქციები — ცივი გონება არასასურველ პრობლემებს თავიდან აგარიდებთ.

მშვილდოსანი

აქტიური დღეა. მოსალოდნელია საინტერესო ნაცნობობა ან მოულოდნელი შემოთავაზება, რაც ახალ შესაძლებლობებს გაგიხსნით. მთავარია, ენერგია ფუჭად არ დახარჯოთ. ნუ ეცდებით, რომ ამ დღეს საკუთარი მოვალეობები ვინმეს გადააბაროთ. საეჭვოა, რომ მათი მუშაობის შედეგი მოგეწონოთ.

რჩევა: სიახლეებისთვის გახსნილი უნდა იყოთ, მაგრამ საღი აზრის გათვალისწინება არ დაგავიწყდეთ.

თხის რქა

შესაფერისი დროა სერიოზული გადაწყვეტილებების მიღების და გრძელვადიანი გეგმების შესადგენად. თუ მეთოდურად იმოქმედებთ, თქვენი ძალისხმევა შედეგს აუცილებლად მოიტანს. მოსალოდნელია ფინანსური შემოსავალი. ამ დღეს აღმოაჩენთ კავშირს ფაქტებსა და მოვლენებს შორის, რომლებიც ადრე შემთხვევითი გეგონათ. ეს საშუალებას მოგცემთ, სამომავლო გეგმებში მცირე კორექტივები შეიტანოთ.

რჩევა: აუჩქარებლად იმოქმედეთ — დაგეგმვა საუკეთესო შედეგამდე მიგიყვანთ.

მერწყული

არასტანდარტული ხედვა და კრეატიული მიდგომა წარმატებას მოგიტანთ. მოულოდნელი აღმოჩენები გელით, რომლებიც ძალიან სასარგებლო გამოდგება, მთავარია, კომფორტის ზონიდან გასვლის არ შეგეშინდეთ.

რჩევა: ეცადეთ, საყვარელ ადამიანებთან ურთიერთობაში უფრო ფრთხილად და მოზომილად იმოქმედოთ, რათა უხეში სიტყვით ან შენიშვნით ვინმე არ გაანაწყენოთ.

თევზები

მოულოდნელი მოვლენები თქვენგან სწრაფ რეაქციასა და მოქნილობას მოითხოვს. მთავარია, ყველაფერი ზედმეტად გულთან ახლოს არ მიიტანოთ. დღის ბოლოს შეიძლება, საინტერესო და მოგებიანი შემოთავაზება მიიღოთ. ასაკით უფროსი ადამიანების რჩევები და ცხოვრებისეული გამოცდილება ძალიან დაგეხმარებათ.

რჩევა: უსმინეთ საკუთარ ინტუიციას და გადაწყვეტილებები ემოციურ ფონზე არ მიიღოთ.

მამუკა მდინარაძე: ტერმინი გენდერი ამოდის ყველა საკანონმდებლო ხასიათის ნორმატიული აქტიდან

ტერმინი გენდერი ამოდის ყველა საკანონმდებლო ხასიათის ნორმატიული აქტიდან, კანონიდან თუ სხვა ნებისმიერი ჩანაწერიდან – ასეთი ტერმინი საკანონმდებლო აქტებიდან საერთოდ გაქრება, – განაცხადა მამუკა მდინარაძემ „ქართული ოცნების“ გორგასლის ოფისში, საპარლამენტო უმრავლესობის სხდომის დასრულების შემდეგ გამართულ ბრიფინგზე.

საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა აღნიშნა, რომ ამ საკითხში ისინი ჰბაძავენ თავიანთ ამერიკელ კოლეგებს.

„ტერმინი გენდერი ამოდის ყველა საკანონმდებლო ხასიათის ნორმატიული აქტიდან, კანონიდან თუ სხვა ნებისმიერი ჩანაწერიდან – ასეთი ტერმინი საკანონმდებლო აქტებიდან საერთოდ გაქრება.

დღეს ძალიან კარგი, მოსაწონი ინიციატივა იყო, როდესაც ქალისა და მამაკაცის თანასწორობაზეა საუბარი. სქესთა შორის თანასწორობა და სხვა მსგავსი ტერმინები, რომელიც უფრო მოკლე, ლაკონიური, პრაქტიკაში ადვილად გამოყენებადი იქნება, შესაძლოა, ამაზეც ვიმსჯელოთ“, – განაცხადა მდინარაძემ.

,,საჯარო სამსახურში უცხოური წყაროდან სარგებლის მიღება იკრძალება”- მამუკა მდინარაძე

საჯარო სამსახურში უცხოური წყაროდან სარგებლის მიღება იკრძალება, – განაცხადა მამუკა მდინარაძემ „ქართული ოცნების“ გორგასლის ოფისში, საპარლამენტო უმრავლესობის სხდომის დასრულების შემდეგ გამართულ ბრიფინგზე.

საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ და პარტიის აღმასრულებელმა მდივანმა სხდომის დასრულების შემდეგ „ქართული ოცნების“ მიერ პარლამენტში ინიციირებულ კანონპროექტებთან დაკავშირებით განცხადება გააკეთა.

„იკრძალება უცხოური წყაროდან სარგებლის მიღება საჯარო სამსახურში. იცით, რომ ხშირ შემთხვევაში ეს ერთგვარი მექანიზმი იყო თავის დროზე, ფსევდოლიბერალური მიდგომების რეალიზების და ამას იყენებდნენ სხვა დატვირთვით. ჩვენ ხომ გვაჩვევდნენ, რომ მეგობრული, პატიოსანი ფულები, სახსრები იყო რაღაცებისთვის გამოყოფილი. რისთვის იყო გამოყოფილი, ყველამ კარგად ვნახეთ. მაგალითად, ათეულობით მილიონი დაიხარჯა ამ ქვეყანაში იმისთვის, რომ ვიღაცებს ეძახათ, არა რუსულ კანონს.

ახლა ჩვენ თავად ვეუბნებით, რომ გაცილებით მკაცრი კანონი დავაინიციირეთ. აგერ, ხვალ პირველი მოსმენით მივიღეთ. კაციშვილი ხმას არ იღებს, რადგან ეს იყო დაფინანსებული კამპანია, რომელიც იყო დიდი ფეიკი. ამ მიმართულებაზე ჩვენ ვმუშაობთ და მათ შორის, თუკი სარგებელი საჯარო სამსახურში უნდა ყოფილიყო ამ გზით, ეს იკრძალება. თუ შრომის ანაზღაურებაზეა საუბარი, ამას თავის თავზე სახელმწიფო აიღებს და არა რაღაც გვერდითი შემოსავლის წყაროებზე უნდა იყოს საუბარი, რადგან ხშირ შემთხვევაში ეს მავნე პრაქტიკის ჩამოყალიბებას უწყობდა ხელს“, – განაცხადა მდინარაძემ.

1...270271272...2,860Page 271 of 2,860
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი