მტკიცედ უარვყოფთ უსაფუძვლო და ზიანის მომტან ბრალდებებს საქართველოში ზოგიერთი დიპლომატიური მისიის როლისა და საქმიანობის შესახებ, – ამის შესახებ განცხადებას საქართველოში ევროკავშირის წარმომადგენლობა ავსტრიის, ბელგიის, ბულგარეთის, ხორვატიის, ჩეხეთის, კვიპროსის, დანიის, ესტონეთის, ევროკავშირის, ფინეთის, საფრანგეთის, გერმანიის, საბერძნეთის, ირლანდიის, იტალიის, ლატვიის, ლიეტუვის, ლუქსემბურგის, ნიდერლანდების, ნორვეგიის, პოლონეთის, პორტუგალიის, რუმინეთის, სლოვენიის, ესპანეთის, შვედეთის და დიდი ბრიტანეთის საელჩოების სახელით ავრცელებს.

განცხადებაში ნათქვამია, რომ დეზინფორმაციას შეცდომაში შეჰყავს საზოგადოება და ძირს უთხრის დიპლომატიური მისიების მოვალეობების შესრულების შესაძლებლობას.

„მტკიცედ უარვყოფთ უსაფუძვლო და ზიანის მომტან ბრალდებებს საქართველოში ზოგიერთი დიპლომატიური მისიის როლისა და საქმიანობის შესახებ. ასეთ დეზინფორმაციას შეცდომაში შეჰყავს საზოგადოება და ძირს უთხრის ჩვენი დიპლომატიური მისიების მიერ მათი მოვალეობების შესრულების შესაძლებლობას.

დიპლომატებისთვის, ფართო სპექტრის წარმომადგენლებთან – მთავრობასთან, ოპოზიციასთან, სამოქალაქო საზოგადოებასთან და ზოგადად მოქალაქეებთან – შეხვედრა დიპლომატიური მუშაობის ნორმალური ნაწილია და ვენის კონვენციას სრულად შეესაბამება. ჩვენ არცერთ კონკრეტულ პოლიტიკურ პარტიას არ ვუჭერთ მხარს და განცხადებები ჩვენს მიერ ძალადობისა და ექსტრემიზმის მხარდაჭერის შესახებ უბრალოდ სიმართლე არ არის. სინამდვილეში, ჩვენ ყველა აქტორს მოვუწოდებთ, რომ უარი თქვან ძალადობის ნებისმიერი ფორმაზე და დაგმონ იგი.

მოვუწოდებთ ყველა პოლიტიკურ ლიდერს, თავი შეიკავონ დაპირისპირების გამომწვევი რიტორიკისგან და ძალისხმევა დაძაბულობის განმუხტვისკენ მიმართონ“, – ნათქვამია განცხადებაში.

იმ განცხადებით, რომ თუ რამე ძალაუფლებას მიიღებენ, ქალაქის კოლაფსს მოაწყობენ, პირდაპირ დაადასტურეს, რომ ეს არის საქართველოს წინააღმდეგ გარედან დაწერილი ერთიანი გეგმა, – განაცხადა საქართველოს პარლამენტის თავმჯდომარემ შალვა პაპუაშვილმა ირაკლი კუპრაძისა და ალეკო ელისაშვილი განცხადების შესახებ, რომ არჩევნებში გამარჯვების შემთხვევაში თბილისის პარალიზებას გეგმავენ.

მან ამგვარად უპასუხა ჟურნალისტის კითხვას, აქვთ თუ არა ერთიანი მიზნები „ნაციონალურ მოძრაობას“, „ლელოს“ და „გახარიას საქართველოსთვის“.

„ჩვენ ვნახეთ, რომ მათ ვერაფერი შეძლეს. უცხოელებმა ვერაფერი შეძლეს პროპაგანდით. შარშან რეფერენდუმად გამოგვიცხადეს, თითქოს არჩევანი არის რაღაც ვექტორებს შორის. გამოვიდა ქართველი ხალხი და საკადრისი პასუხი გასცა ყველა უცხოელს – პროპაგანდით და ზეწოლით ვერაფერს მიაღწიეს. ახლა მათი ერთადერთი გზა არის ადამიანების სოციალური გაწვალება, რომ ადამიანები დატანჯონ და იქნებ, ამით მაინც რაღაცაზე წამოიკიდონ. ეს არის ზუსტად ამ გეგმის ნაწილი და თავადაც აცხადებენ, რომ არიან მათ მიერ გამოცხადებული ძალადობრივი დამხობის პროექტის ნაწილი”, – განაცხადა პარლამენტის თავმჯდომარემ.

გერმანია იყო პირველი ქვეყანა, რომელმაც საელჩო გახსნა საქართველოში და ბევრი ქართველი, მათ შორის მეც, ვიყავით ჩართული იმაში, რომ გერმანიის სახელი ქართულ საზოგადოებაში ყოველთვის იყოს პატივსაცემი. სამწუხაროა, რომ ბატონი პეტერი თავისი დამოკიდებულებით ამ ხიდებს წვავს, – განაცხადა პარლამენტის თავმჯდომარემ შალვა პაპუაშვილმა გერმანიის ელჩის პეტერ ფიშერის მისამართით.

ჟურნალისტმა მას ჰკითხა, რა მოლოდინი აქვს გერმანიის ელჩთან ურთიერთობაში, რომელსაც მუდმივად აკრიტიკებს.

„არანაირი მოლოდინი პეტერის მიმართ არ მაქვს. ვიცი, რომ მომავალი წლის ივნისამდეა საქართველოში. სხვათა შორის ვადა გასდიოდა ახლა ზაფხულში და გაიხანგრძლივა ერთი წლით. არანაირი მოლოდინი დადებითის მიმართულებით არ მაქვს. საჯარო განცხადებებითაც, მეორეს მხრივ, საქართველო პატარაა და ყველა ყველას იცნობს, გერმანულენოვანი საზოგადოებაც არ არის დიდი და ვიცით მისი პირადი დამოკიდებულებაც. მას აქვს პირადი დამოკიდებულება „ქართული ოცნების“ და მისი ამომრჩევლის მიმართ. ამას ჩვენ ვერ შევცვლით. გერმანიის მთავრობას თუ უნდა, რომ წარმოადგენდეს [ფიშერი], ეს მათი ნებაა და მათი ელჩია, თუმცა ვთქვი კიდეც, რომ რთულად წარმომიდგენია ამ ელჩის პირობებში შეძლოს რამენაირად საერთო ენის მონახვა [მასთან ხელისუფლებამ].

ყველას ესხმის თავს, მთავრობა იქნება, პარლამენტი, ჟურნალისტი, „ქართული ოცნების“ ამომრჩეველი, თუ რაც იქნება. ელჩის ამოცანა არის რომ იყოს ხიდი ხელისუფლებებს შორის. ნაცვლად იმისა, რომ ბატონ პეტერს 30 წლის განმავლობაში ბევრი გერმანიის და ბევრი ქართველის, მეც ვიყავი ამის მონაწილე, აშენებული ხიდი გაემყარებინა, დაწვა ყველა ხიდი საქართველოს ხელისუფლებასთან. ყველაზე მეტად მე ვწუხვარ ამაზე, რადგან ვიცი რა ურთიერთობებია საქართველოსა და გერმანიას შორის ჯერ კიდევ 90-იანი წლებიდან მოყოლებული. გერმანია იყო პირველი ქვეყანა, რომელმაც საელჩო გახსნა საქართველოში და ბევრი ქართველი, მათ შორის მეც, ვიყავით ჩართული იმაში, რომ გერმანიის სახელი ქართულ საზოგადოებაში ყოველთვის იყოს პატივსაცემი. სამწუხაროა, რომ ბატონი პეტერი თავისი დამოკიდებულებით ამ ხიდებს წვავს“, – აღნიშნა პაპუაშვილმა.

დღეს ჩვენი თბილისისთვის ისტორიული დღეა – დედაქალაქს ამაყად უბრუნდება საქართველოს ბოლო დიდი მეფის, ერეკლე მეორის დიდი ხნით დაგვიანებული ძეგლი, რომელიც სათანადო ადგილს დაიკავებს ჩვენი ქალაქის მიერ პატივდადებული ისტორიული გმირების პანთეონში, – განაცხადა საქართველოს პარლამენტის თავმჯდომარე შალვა პაპუაშვილმა ერეკლე მეორის ძეგლის გახსნის ცერემონიაზე სიტყვით გამოსვლისას.

როგორც პარლამენტის თავმჯდომარემ აღნიშნა, ერეკლე მეფის დაბადებიდან სამი საუკუნის განმავლობაში ყველა ნამდვილი ქართველი ეთაყვანებოდა და პატივს მიაგებდა მეფეს, რომელიც საქართველოს ისტორიაში სამუდამოდ დარჩა, როგორც სიმბოლო ბრძოლისა, გმირობისა, თავდაუზოგავი ღვაწლისა და შენებისა.

,,დღეს პატივს მივაგებთ ჩვენს სახელოვან მეფეს, რომლის საბრძოლო ნათლობა 14 წლის ასაკში, ქიზიყში, ნეიშინის ველზე შედგა, სადაც მან ქიზიყელების რაზმთან ერთად პირველი სამხედრო გამარჯვება მოიპოვა. სწორედ იქ შეარქვა ხალხმა ჯერ კიდევ უწვერულვაშო, მაგრამ მტრისთვის თავზარის დამცემ უფლისწულს პატარა კახი. ჩვენ დღეს ძეგლს ვუდგამთ ჩვენს სასიქადულო მეფეს, რომელიც, მშობლიური თელავის შემდეგ, ზუსტად ნახევარი საუკუნის განმავლობაში ელოდა ამ დღეს. ერეკლე მეფის დაბადებიდან სამი საუკუნის განმავლობაში ყველა ნამდვილი ქართველი ეთაყვანებოდა და პატივს მიაგებდა მეფეს, რომელიც საქართველოს ისტორიაში სამუდამოდ დარჩა, როგორც სიმბოლო ბრძოლისა, გმირობისა, თავდაუზოგავი ღვაწლისა და შენებისა,” – განაცხადა პაპუაშვილმა.

როგორც მან აღნიშნა, მეფე ერეკლემ ჩვენი ქვეყანა ურთულეს ეპოქაში გამოატარა და ბოლომდე დაიხარჯა მის სამსახურში.

,,მეფე ერეკლემ გადაიხადა ერთი დიდი, უწყვეტი, სამოცწლიანი ომი საქართველოს გადარჩენისა და გამთლიანებისთვის. ომი ხმლით, ომი შრომით, ომი გონიერებით.

დღევანდელი ძეგლის საზეიმო გახსნა სიმბოლურია იმდენად, რამდენადაც დღეს, ისევე როგორც სამასი წლის წინ, ქართველი ხალხის მთავარი ეროვნული ამოცანა, მიზანი და სულისკვეთება ქვეყნის თავისუფლება და გაერთიანებაა. ქართველი ერის ამ ისტორიულ მისიაში ერეკლე მეფე უნდა იყოს მაგალითიც და შთაგონებაც, რომ ბოლომდე მივიყვანოთ მის მიერ დაწყებული საერთო-ეროვნული საქმე. მეფე ერეკლე არის სიმბოლო ნამდვილი საქართველოსი. იმ საქართველოსი, რომლის მმართველსაც ერთადერთი ინტერესი უნდა ამოძრავებდეს – საკუთარი ერი, საკუთარი სახელმწიფო, საკუთარი რწმენა. საქართველო უპირველეს ყოვლისა – ამ ეროვნული ინტერესის ერთგულების გარეშე ვერ იმმართველებს ხელისუფალი, ვერ შეიყვარებს ხალხი, ანგარიშს არ გაუწევს მტერი და არ დააფასებს ისტორია. ისტორიის მანძილზე საქართველომ უმძიმესი წლები გამოიარა. ჩვენი წინაპრების ხსოვნის პატივისცემა, მათი გმირული შემართების ერთგულება და მათი ეროვნული საქმის გაგრძელება თითოეული ქართველის ვალია. დღეს ერეკლე მეფის სული ხარობს, როდესაც ხედავს დამოუკიდებელი საქართველოს ამაყად მოფრიალე დროშას, როცა ესმის ქართული ლოცვა და გრძნობს შთამომავლების ეროვნულ გულის ძგერას.

მეფე ერეკლეს ძეგლის თბილისში აღმართვა ყოფილიყოს ის დასაწყისი, რომელიც ჩვენი ქვეყნის გამთლიანებას, ერის გამთლიანებას, წინსვლას და გამარჯვებას მოასწავებს. მეფე ერეკლემ დალოცოს სრულიად საქართველო!” – განაცხადა შალვა პაპუაშვილმა.