დავდექით ფეხზე და შეგვიძლია ვთქვათ, რომ საქართველო დღეს ბოლო ათწლეულების განმავლობაში ისეთი დამოუკიდებელია, როგორი ხარისხიც აქამდე არც გვქონია, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.

მისი თქმით, მმართველი პარტია საკუთარ მოქმედებებში ეროვნული ინტერესებიდან გამოდის და დასავლეთისგან შეფასებების დროს ობიექტურობას ელოდება.

„დამოუკიდებლობის დღევანდელი ხარისხი გვაძლევ საშუალებას, თამამად და, პირველ პირში, ყველას ბოლომდე სიმართლე ველაპარაკოთ. ვუთხრათ, რომ არარელევანტურია, მაგალითად, „გამჭვირვალობის კანონის“ ხსენება, იმიტომ, რომ უფრო მკაცრი კანონი მივიღეთ, ამერიკული კანონი „ფარა“, რომელიც პირდაპირ გადავწერეთ, პირდაპირი თარგმანი გავაკეთეთ და ამაზე ვერავინ ამოიღო ხმა. წარმოიდგინეთ, რამხელა სიცრუის ქვეშ ამყოფეს თავიანთი მომხრეებიც, ქართული საზოგადოება, საბედნიეროდ, მთლიანად ვერა, როდესაც „გამჭვირვალობის კანონი“ გააპროტესტებინეს და ორი წელი რუსული კანონი აძახებინეს, ხოლო გაცილებით მკაცრი კანონი, ამერიკულიდან პირდაპირ ნათარგმნი საერთოდ აღარავინ გააპროტესტა. იცით, რატომ? იმიტომ, რომ გამოაშკარავდებოდა მათი სიცრუის ფსკერამდე დასული ხარისხი. შესაბამისად, სიმართლეს ყოველთვის ვიტყვით. ყველაფერი, მათ შორის ამერიკული „ფარაც“, „გამჭვირვალობის კანონიც“, სხვა კანონებიც და გადაწყვეტილებებიც, რომლებიც ბოლო პერიოდში მივიღეთ, ერთადერთს ემსახურება – საქართველოს დამოუკიდებლობის ხარისხის გაძლიერებას, რაც, თავის მხრივ, არის უმყარესი საფუძველი შემდგომი განვითარების, რეალური, ქრისტიანული, ჭეშმარიტი ევროპული ღირებულებების დაცვის, ჩვენი, ქართული სახელმწიფოს რეალური წარმომადგენლობის ევროპაში და ევროპული ოჯახის სრულფასოვანი წევრობის. ეს არის მყარი რეალური გარანტიები. საპირისპირო მიმართულებით სიარულს როდესაც გვაიძულებდნენ, მათ შორის სანქციებს, ომში ჩართვას და ა.შ., ეს იქნებოდა იმის მყარი გარანტია, რომ პირიქით მომხდარიყო ყველაფერი, ამიტომ არ წავყევით ამ ყველაფერს“, – განაცხადა მამუაკა მდინარაძემ.

მისი თქმით, „ქართული ოცნება“ მის მიერ გადადგმული ყველა ნაბიჯის ობიექტურ შეფასებას მოითხოვს.

„სადიალოგო არავისთან არაფერი გვაქვს, ობიექტურ შეფასებას მოვთხოვთ ყველას ჩვენ მიერ გადადგმული რეალური ნაბიჯების, რომელიც არის ეროვნული ინტერესებიდან გამომდინარე. დღეს, საბედნიეროდ, ამის თქმის საფუძველი გვაქვს და ვბედავთ ამის თქმას. პირდაპირ ვაღიარებ, 5 და 6 წლის წინათაც კი, ასე თამამად ვერ ვლაპარაკობდით, მათ შორის, ეროვნულ საკითხებზეც კი, რადგან აქ გვჭირდებოდა ბევრი პოლიტიკური სვლა, რომ, ერთი მხრივ, გავფრთხილებოდით სახელმწიფოს, სუვერენიტეტს და, მეორე მხრივ, გარკვეული ლავირებები მოგვეხდინა. დიალოგის რეჟიმში დღეს ერთადერთზე ვართ თანახმა, რომ წინა პლანზე დაყენებული იყოს საქართველოს ეროვნული ინტერესები და პატივი სცეს ყველამ მის ეროვნულ ინტერესებს“, – განაცხადა მამუკა მდინარაძემ.

ევროსაბჭოს გენერალურმა მდივანმა, ალენ ბერსემ ევროსაბჭოს ასამბლეაში შვედი პარლამენტარის მიერ საქართველოსთან დაკავშირებით დასმული კითხვის საპასუხოდ განაცხადა, რომ „საქართველოში სიტუაცია არ არის ისეთი კარგი, როგორც გვინდა, ეს ნამდვილად მიდიოდა არასწორი მიმართულებით მრავალი თვის განმავლობაში, მაგრამ შეიძლებოდა, ბევრად უარესი ყოფილიყო, ეს არის მთავარი“. მისივე თქმით, ახლა საჭიროა მეტი კონტაქტი და მუშაობის გასაგრძელებლად შანსი უნდა მიეცეს დიალოგს. როგორც ალენ ბერსემ აღნიშნა, აპირებს, დაუკავშირდეს საქართველოს მმართველ პარტიას და პრემიერ-მინისტრს.

საქართველოს საგარეო საქმეთა მინისტრი მაკა ბოჭორიშვილი საბერძნეთის პარლამენტის მიერ ქართული მართვის მოწმობების აღიარების შესახებ გადაწყვეტილებას გამოეხმაურა და დადებითად შეაფასა როგორც ორი ქვეყნის ურთიერთობის კონტექსტში, ასევე იმ პრაგმატული თვალსაზრისით, რაც ამ გადაწყვეტილებას საბერძნეთში მცხოვრები საქართველოს მოქალაქეებისთვის აქვს.

როგორც მაკა ბოჭორიშვილმა აღნიშნა, ორ ქვეყანას შორის თანამშრომლობაში მნიშვნელოვანია პოზიტიური დღის წესრიგი და საბერძნეთის პარლამენტის ეს გადაწყვეტილება კიდევ ერთხელ აჩვენებს საქართველოსა და საბერძნეთს შორის ურთიერთობებში არსებულ აქტუალურ საკითხებს.

„საბერძნეთის პარლამენტის მიერ მართვის მოწმობების აღიარების შესახებ გადაწყვეტილების მიღება, რა თქმა უნდა, არის ძალიან მნიშვნელოვანი, პირველ რიგში, საქართველოს მოქალაქეებისთვის, რომლებიც საბერძნეთში იმყოფებიან და ამ ქვეყანაში საქმიანობენ. ყოველგვარი გამოცდის გარეშე, მათ შესაძლებლობა ექნებათ, გაცვალონ მართვის მოწმობები და გარკვეულწილად ეს ხელს შეუწყობს მათ დასაქმებას, თუკი ასეთი ინტერესი აქვთ მათ საბერძნეთში. რა თქმა უნდა, ორი ქვეყნის ურთიერთობებისთვის მნიშვნელოვანია პოზიტიური გადაწყვეტილებების მიღება სხვადასხვა საკითხთან დაკავშირებით“, – აღნიშნა მაკა ბოჭორიშვილმა.

2025 წლის 8 აპრილს საბერძნეთის პარლამენტში ხმათა უმრავლესობით დამტკიცდა შეთანხმება „საქართველოსა და საბერძნეთის რესპუბლიკას შორის ეროვნული მართვის მოწმობების ურთიერთაღიარებისა და გადაცვლის შესახებ“.

ოპოზიცია განადგურდა გარე ძალების ხელით, საბოლოო ჯამში, გარედან იწერება სცენარები, გარეთ ვინც წერს კონკრეტულ სცენარებს, მათ არ აქვთ საზოგადოების პულსის სწორი აღქმა ,- ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

პრემიერის შეფასებით, გარე ძალებმა პრაქტიკულად თვითონ გაანადგურეს ოპოზიცია, მიუხედავად იმისა, რომ ჰქონდათ სრულიად სხვა მიზანი – ოპოზიცია მოეყვანათ ხელისუფლებაში.

„არის სრული ქაოსი და რა თქმა უნდა, ეს ასე წარიმართება მომავალშიც და ეს ძალიან კარგია. იმ შემთხვევაში, თუ მიიღებენ მონაწილეობას არჩევნებში, სრული ფიასკოსთვის არიან განწირული. ჩვენ 64-ვე მუნიციპალიტეტში ძალიან დიდი უპირატესობით მოვიგებთ როგორც მერის, ასევე საკრებულოს არჩევნებს. საბოლოო ჯამში, ეს პროცესი უნდა გაგრძელდეს. მიუხედავად იმისა, რომ ისინი თავისითაც სუსტდებიან, ძალიან მნიშვნელოვანია, ჩვენ აქტიურად განვაგრძოთ ზრუნვა ამ პოლიტიკური პარტიების არაკონსტიტუციურად გამოცხადებაზე, უნდა მომზადდეს შესაბამისი სარჩელი, რომელიც შევა საკონსტიტუციო სასამართლოში. ვიდრე კოლექტიური „ნაცმოძრაობა” რჩება ოფიციალურ პოლიტიკაში, მანამდე ეს ქვეყანა ვერ დაისვენებს, აგენტურა არ უნდა იყოს პოლიტიკურ სპექტრში წარმოდგენილი. შესაბამისად, ყველაფერი უნდა გავაკეთოთ, რათა ბოლომდე გავაჯანსაღოთ ჩვენი პოლიტიკური სპექტრი, პოლიტიკური სისტემა, ეს არის სასიცოცხლოდ მნიშვნელოვანი იმისათვის, რომ შეუქცევადად განვითარდეს დემოკრატიული თვალსაზრისით ჩვენი ქვეყანა მომავალში”,- განაცხადა ირაკლი კობახიძემ.

ევროსაბჭოს რეზოლუციას, სადაც პირდაპირ ჩაიწერა, რომ ფართომასშტაბიანი სამხედრო მოქმედებები დაიწყო სწორედ სააკაშვილის რეჟიმმა და ასევე ჩაიწერა ის, რომ ამას მოჰყვა რუსეთის საპასუხო რეაქცია, ხელი მოაწერა მთელმა ევროპამ, პრაქტიკულად, ევროსაბჭოს წევრმა ყველა ქვეყანამ და რაც ყველაზე გასაოცარია, ამას ხელი მოაწერა სააკაშვილის რეჟიმმა, ასევე ე.წ. ოპოზიციამ, დღევანდელი ე.წ. ჟურნალისტის, გიორგი თარგამაძის სახით, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

მიხეილ სააკაშვილის მიერ ცეცხლის გახსნის ბრძანების გაცემაზე Factcheck-ის განცხადებასთან დაკავშირებით დასმული კითხვის საპასუხოდ კობახიძემ აღნიშნა, რომ „Factcheck-ი არის „კოლექტიურ ნაცმოძრაობასთან“ დაკავშირებული მთავარი გამყალბებელი ორგანიზაცია, ამიტომ, საინტერესო არ არის, რას ამბობენ ისინი“.

„რაც შეეხება 2008 წლის ომს, რეალურად, ყველამ ყველაფერი იცის ამ ომთან დაკავშირებით. ჩვენ ვაკვირდებოდით მოვლენებს, ძალიან კარგად მახსოვს 7 აგვისტოს ღამეც, 8 აგვისტო – როდესაც გამოცხადდა კონსტიტუციური წყობილების აღდგენა და როდესაც ზარ-ზეიმით გვიცხადებდა მაშინდელი რეჟიმი, როგორ იღებდნენ სოფელს სოფელზე, როგორ იყვნენ შესული ცხინვალში და როგორ მიიწევდნენ წინ როკის გვირაბისკენ. არავითარი თავდაცვის რეჟიმი, მთლიანად საუბარი იყო შეტევაზე, რომელსაც ახორციელებდა რეჟიმი და შემდეგ მათ ხელი მოაწერეს ევროსაბჭოს რეზოლუციას, სადაც პირდაპირ ჩაიწერა, რომ ფართომასშტაბიანი სამხედრო მოქმედებები დაიწყო სწორედ სააკაშვილის რეჟიმმა. ასევე ჩაიწერა ის, რომ ამას მოჰყვა რუსეთის საპასუხო რეაქცია, მართალია, გადაჭარბებული, მაგრამ საპასუხო რეაქცია. ამას ხელი მოაწერა მთელმა ევროპამ, პრაქტიკულად, ევროსაბჭოს წევრმა ყველა ქვეყანამ და რაც ყველაზე გასაოცარია, ამას ხელი მოაწერა სააკაშვილის რეჟიმმა, ასევე ე.წ. ოპოზიციამ, დღევანდელი ე.წ. ჟურნალისტის, გიორგი თარგამაძის სახით. თქვენ ხედავთ, რასთან გვაქვს საქმე. რაც გააკეთეს, იმაზე, საბოლოო ჯამში, ხელი მოაწერეს. ეს არის უდიდესი დანაშაული. მიუხედავად იმისა, რომ უამრავი დანაშაული აქვს ჩადენილი სააკაშვილის რეჟიმს, ეს არის მაინც ყველაზე დიდი დანაშაული, რაც სააკაშვილის რეჟიმმა ჩაიდინა საკუთარი ქვეყნისა და ხალხის წინააღმდეგ და, რა თქმა უნდა, ეს არ უნდა დარჩეს შეფასების გარეშე. როგორც კი ასეთ დანაშაულს დატოვებ შეფასების გარეშე, მაშინვე გრჩება რისკი სამომავლოდ და თქვენ ხედავდით, რომ გასული სამი წლის განმავლობაში, სწორედ იმავე ძალების მეშვეობით სურდათ კონკრეტულ ძალებს საქართველოში მეორე ფრონტის გაღვივება. აქაც, რა თქმა უნდა, რომ ჰქონოდათ ამის საშუალება, ისევე გააღვივებდნენ ომს, როგორც ეს გააკეთეს 2008 წელს და ქვეყანას ჩააგდებდნენ კიდევ უფრო მძიმე მდგომარეობაში, ვიდრე 2008 წელს ჩააგდეს. მადლობა ღმერთს, საზოგადოებამ მათ არ მისცა ხელისუფლებაში დაბრუნების საშუალება და შესაბამისად, ჩვენს ქვეყანაში ახალი ფრონტის გაჩაღების საშუალება“, – განაცხადა პრემიერმა.

9 აპრილი ერთის მხრივ, ეს არის უდიდესი ტრაგედიის დღე, თუმცა, ამასთან, ეს არის დღე, რომელმაც ქვეყანას, ქართველ ხალხს მოუტანა გაერთიანება და დამოუკიდებლობა, – განუცხადა საქართველოს პრემიერ-მინისტრმა ირაკლი კობახიძემ ჟურნალისტებს.

პრემიერის თქმით, 9 აპრილი შეგვახსენებს, რომ უნდა გავუფრთხილდეთ ერთმანეთის მიმართ ურთიერთობას და სიყვარულს.

„დღეს ჩვენ პატივს მივაგებთ 9 აპრილის გმირების ხსოვნას, პატივს მივაგებთ მათ გმირობას. 9 აპრილი ერთის მხრივ, ეს არის უდიდესი ტრაგედიის დღე, თუმცა, ამასთან, ეს არის დღე, რომელმაც ქვეყანას, ქართველ ხალხს მოუტანა გაერთიანება და დამოუკიდებლობა. 9 აპრილის ტრაგედიიდან ზუსტად ორ წელიწადში საქართველომ ოფიციალურად გამოაცხადა სახელმწიფოებრივი დამოუკიდებლობის აღდგენა. მე მახსოვს ის დღეები, კვირები, თვეები, ის რამდენიმე წელი, როდესაც შეიცვალა დამოკიდებულება საზოგადოებაში და სიძულვილს სძლია სიყვარულმა.

შესაბამისად, ეს ყველაფერი ჩვენ შეგვახსენებს იმას, თუ რამდენად უნდა გავუფრთხილდეთ ჩვენი ქვეყნის დამოუკიდებლობას, თავისუფლებას, რომელიც ჩვენ მოვიპოვეთ, სწორედ ჩვენი გმირების ბრძოლის საფუძველზე. ეს ყველაფერი შეგვახსენებს ასევე იმას, რომ ჩვენ უნდა გავუფრთხილდეთ ერთმანეთს. ერთმანეთის მიმართ ურთიერთობას და სიყვარულს“, – განაცხადა პრემიერმა.

საბერძნეთის პარლამენტში, 8 აპრილს ხმათა უმრავლესობით დამტკიცდა შეთანხმება „საქართველოსა და საბერძნეთის რესპუბლიკას შორის ეროვნული მართვის მოწმობების ურთიერთაღიარებისა და გადაცვლის შესახებ”. საქართველოს საგარეო საქმეთა სამინისტროს ცნობით, საბერძნეთი ევროკავშირის რიგით მესამე ქვეყანაა, რომელმაც საქართველოსთან მსგავსი შეთანხმება გააფორმა.

„საბერძნეთის პარლამენტის მიერ აღნიშნული ხელშეკრულების რატიფიცირებით კიდევ ერთხელ დადასტურდა საქართველოსა
და საბერძნეთს შორის აქტიური ურთიერთთანამშრომლობის და მჭიდრო კავშირების მაღალი დონე. აღნიშნული ხელშეკრულების შესაბამისად ურთიერთაღიარების საფუძველზე, მხარეთა მიერ გაცემული მოქმედი მართვის მოწმობების მფლობელებს შესაძლებლობა მიეცათ თეორიული ან პრაქტიკული გამოცდის ჩაბარების გარეშე გადაცვალონ თანაბარი ძალის მქონე მართვის მოწმობაში იმ სახელმწიფოში, რომელიც მათ კანონიერ საცხოვრებელს წარმოადგენს. აღნიშნული კი ხელს შეუწყობს მათ უკეთ ინტეგრაციას ადგილობრივ საზოგადოებაში”, – განაცხადა საბერძნეთში საქართველოს საგანგებო და სრულუფლებიანმა ელჩმა, ლევან ბერიძემ.

აღსანიშნავია, რომ ხელშეკრულება გაფორმდა 2024 წლის 26 სექტემბერს, ქ. ათენში, საქართველოსა და საბერძნეთის მთავრობებს შორის. შიდა სახელმწიფოებრივი პროცედურების დასრულების შემდეგ, დღეს საბერძნეთის უმაღლესმა საკანონმდებლო ორგანომ ამ შეთანხმების რატიფიცირება მოახდინა. მისი ამოქმედება მოხდება, მას შემდეგ რაც რატიფიცირების შესახებ ინფორმაცია ოფიციალური არხებით ეცნობება ქართულ მხარეს.

9 აპრილს ქართველ ხალხს ბატონის შესაცვლელად არ უბრძოლია, – ამ სათაურით აქვეყნებს წერილს საზოგადოება „ქართული” და დღევანდელი დღის მნიშვნელობას, მსოფლიოში შექმნილი ახალი რეალობიდან, აფასებს.

„არ იქნება სუვერენიტეტი, არ იქნება სამშვიდობოს გასვლა, ესაა დღევანდელი დღის მკაცრი დილემა.” – მიიჩნევენ წერილის ავტორები.

„ეროვნული სუვერენიტეტი და არა ბატონის შეცვლა იყო, არის და იქნება მომავალშიც ქართველი ხალხის ურყევი ნება, სრულად და შუზღუდავად განახორციელოს საკუთარი ინტერესები და მართოს საკუთარი ქვეყანა.

ურიგო არ იქნება ეს კიდევ ერთხელ შევახსენოთ საზოგადოების იმ ნაწილს, რომელიც დღეს გარედან იმართება და ქართველი ერის ინტრესებს საერთაშორისო გლობალური ომის პარტიის ერთგულებაზე ცვლის.” – აღნიშნულია საზოგადოება ქართული • Society Georgian მიერ დღეს გავრცელებულ განცხადებაში.

წერილის ავტორები აღნიშნავენ, რომ ,,დღეს, რუსული იმპერიალიზმის ვითომ შეკავების დოქტრინით, დასავლური „დიფ სთეითი“ოსტატურად ფუთავს თავის მიზანს, მუდმივი ცეცხლის რკალში გახვიოს რუსეთი და ამაში ჩვენისთანა პატარა ქვეყანა მხოლოდ ამ ცეცხლში შესაკეთებელ შეშად გამოიყენოს.”

წერილში ჩვენი ერთ-ერთი სტრატეგიული მოკავშირე ქვეყნის ელჩის განცხადებაცაა აღნიშნული, რომელიც პარტიზანულ მოძრაობაში ჩაბმასაც კი ურჩევდა ქართველებს:

„თქვენ სამი მილიონი ხართ და 3-4 დღეში ყველას კი ვერ ამოგხოცავენ. შემდეგ შეგიძლიათ პარტიზანული მოძრაობით ტყეში გახვიდეთ და ჩვენ დაგეხმარებით და იქიდან იომეთო“, ასეთი იყო ერთ- ერთი სტრატეგიული მოკავშირე ქვეყნის ელჩის „სტრატეგიული“ რჩევა სახელმწიფოსთვის, რომელსაც არც ნატოს ქოლგა იცავს, ქვეყნის 20 % ოკუპირებულია და რუსული ჯარები დედაქალაქიდან 30 კილომეტრში დგანან.

ბალტიისპირეთისა და სკანდინავიის ქვეყნების პრაგმატული სახელმწიფოებრივი ინტერესები კი, ამორალურობის მიუხედავად, გასაგებია, რადგან მეორე ფრონტის კავკასიაში გაჩაღება მათ ქვეყნებს შესაძლო რუსული აგრესიისგან დაიცავს. ეს არის მათი ზღვარგადასული აქტიურობის მიზეზი და არა საქართველოში დემოკრატიული პროცესებისადმი გულშემატკივრობა. ურიგო არ იქნებოდა ჩვენი რადიკალური ოპოზიციისა და არასამთავრობოების წარმომადგენლებმა მათგან ისწავლონ საკუთარი ქვეყნის ინტერესების დაცვა.”

საზოგადოება „ქართული“ მიიჩნევს, რომ დღეს არსებული გამოწვევების ფონზე, ჩვენი ქვეყანა გარედან თავსმოხვეული ანტიეროვნული იდეოლოგიის მიმართ ლოიალური ვერ იქნება.

„დღეს ჩვენ, უდავოდ, დიდი გამოწვევების წინაშე ვდგავართ, რადგან ომია რეგიონში: უკრაინა-რუსეთს, ახლო აღმოსავლეთში – ისრაელსა და არაბულ სამყაროს შორის; დაძაბულობაა თურქეთში, სირიასა და ერაყში. ომის საშიშროება დღითიდღე იზრდება სამეზობლოში, ირანსა და დასავლეთს შორის. ასეთ პირობებში, ქვეყანას არ აქვს ფუფუნების უფლება, ლოიალური იყოს გარედან თავმოხვეული ათასი ჯურის ანტიეროვნული იდეოლოგიებისა და ჩარევების მიმართ. ეს საუკუნის წინ ქვეყნის დამოუკიდებლობის დაკარგვად დაგვიჯდა.

ამიტომ, დღეს 9 აპრილს დაღუპულთა ხსოვნა გვავალდებულებს მტკიცედ შევინარჩუნოთ დამოუკიდებლობა და დავიცვათ ქვეყნის სუვეტენიტეტი. მით უფრო პირობებში, როცა გლობალურადაც ეროვნული ინტერესების დაცვა მსოფლიო პოლიტიკის წამყვანი ტენდენცია გახდა. საომრად გამზადებულ რომელიმე ბანაკს მიკედლება და სხვების ინტერესებით ხელმძღვანელობა გარდუვალად გამოიწვევს ქართული სახელმწიფოებრიობის მორიგ განადგურებას.

არ იქნება სუვერენიტეტი არ იქნება სამშვიდობოს გასვლა, ესაა დღევანდელი დღის მკაცრი დილემა. ეროვნული ინტერესებისა და დამოუკიდებლობის დასაცავად ბრძოლაში კი გადამწყვეტი ქართველი ხალხის, საზოგადოების და ხელისუფლების ერთიანობაა. მხოლოდ ერთიანი ეროვნული პოზიცია შეიძლება გახდეს გლობალური ომების ეპოქაში ქვეყნის გადარჩენის საფუძველი. ” – აღნიშნულია წერილში.