ბალტიის ქვეყნების სანქციები ჩვენთვის არაფერს ნიშნავს, ვერაფერს დაგვაკლებენ, ჩვენი ქვეყნისთვის ბრძოლას და ქვეყნის წინსვლას გავაგრძელებთ, – ამის შესახებ პარლამენტის წევრმა, ლაშა ტალახაძემ განაცხადა.

მისი თქმით, გაბოროტდნენ და სხვა გზა არ დარჩენიათ.

„ვხედავთ, თუ როგორი უსუსურები არიან. ჩვენთვის ეს არაფერს არ ნიშნავს. ის საქმე, რასაც მე და ჩემი გუნდი ვაკეთებთ, გაცილებით მეტია, ვიდრე პატარა კაცის პატარა სანქცია. ხმამაღლა ვიტყვი, რომ ამით ნამდვილად ვერაფერს დაგვაკლებენ. ჩვენი ქვეყნისთვის ბრძოლას და ჩვენი ქვეყნის წინსვლას გავაგრძელებთ“, – განაცხადა ლაშა ტალახაძე.

მისი თქმით, პირადად მისი დასანქცირება უკავშირდება ყველა იმ ღირსეულ ნაბიჯს, რომელიც გუნდთან ერთად გადაუდგამს.

„ყველა იმ გადადგმულ ღირსეულ ნაბიჯს, რასაც ჩემს გუნდთან ერთად ვაკეთებ, ალბათ ეს არის მთავარი მიზეზი. გაბოროტდნენ და სხვა გზა არ დარჩენიათ. დარწმუნებული ვარ, კიდევ გააქტიურდებიან, კიდევ უფრო მეტ უღირს საქციელს ჩაიდენენ, მაგრამ ამით ვერ დაგვაზიანებენ, პირიქით, გავაგრძელებთ ჩვენი ქვეყნისთვის ბევრი ღირსეული ნაბიჯის გადადგმას“, – განაცხადა ლაშა ტალახაძემ.

ლიეტუვამ, ლატვიამ და ესტონეთმა ქართველ თანამდებობის პირებს, მათ შორის დეპუტატებს, სასამართლო ხელისუფლების წარმომადგენლებს და ასევე „ალტ-ინფოს“ წარმომადგენლებს ქვეყანაში შესვლა აუკრძალა.

ამერიკელი ხალხი როგორც იცავს საკუთარ სუვერენიტეტს, ზუსტად ისე დავიცავთ ჩვენც. „გამჭვირვალობის შესახებ“ კანონის ამოქმედების შემდეგ ოდიოზურმა არასამთავრობო ორგანიზაციებმა კანონის დამორჩილებაზე უარი თქვეს და ჯარიმებს გადავიხდითო. შესაბამისად, კანონი იმდენად ეფექტიანი არ არის, რომ აღსრულების ის საშუალებები ჰქონდეს, რა მიზანსაც წარმოადგენს, – ამის შესახებ პარლამენტის იურიდიულ საკითხთა კომიტეტის თავმჯდომარე არჩილ გორდულაძემ საქართველოს პირველ არხს განუცხადა.

გორდულაძის თქმით, ამიტომ უნდა მიიღონ „ფარას“ კანონი, რომელიც, „ამერიკაში ეფექტურად მოქმედებს“.

„სად არის ის დაინტერესებული პირები და „აღშფოთებული მოქალაქეები“, რომლებიც ამბობდნენ, რომ „რუსული კანონის“ მიღებას არ დაუშვებდნენ? – ტყუილი ნარატივი ჩამოეშალათ. გაცილებით რბილ კანონზე ამბობდნენ, რუსულიაო და ახლა მკაცრ კანონზე ხმას არ იღებენ, რომელიც კანონდარღვევაზე სისხლის სამართლის პასუხისმგებლობას ითვალისწინებს. ტრამპის ადმინისტრაცია საუბრობს, რომ კონკრეტული ორგანიზაციები სხვადასხვა ქვეყანაში  ხელს უწყობდა ძალადობას. მათი დაფინანსება უკვე შეჩერებულია და ახლა ამ ადამიანებსაც დავალება არ აქვთ, მაგრამ ეს მოდუნების საშუალებას არ გვაძლევს, სიფრთხილე უნდა შევინარჩუნოთ“, – განაცხადა არჩილ გორდულაძემ.

მინდა, საზოგადოების ყურადღება შევაჩერო გერმანიის საგარეო საქმეთა მინისტრის მოთხოვნაზე, საქართველოში გათავისუფლდეს პატიმარი, რომელმაც ფიზიკური შეურაცხყოფა მიაყენა პოლიციელს. აქ შეიძლება, გასაკვირი არც არაფერი ყოფილიყო, გერმანიის საგარეო საქმეთა მინისტრი ანალენა ბერბოკი თავად რომ არ იყოს რეკორდსმენი გერმანიის მოქალაქეების სისხლის სამართლებრივი წესით დევნაში, – ამის შესახებ „ხალხის ძალის“ დეპუტატმა, გურამ მაჭარაშვილმა პარლამენტში სიტყვით გამოსვლისას განაცხადა.

როგორც მაჭარაშვილი აღნიშნავს, ბოლო ოთხი წლის განმავლობაში, ბერბოკის მიმართვის საფუძველზე, პროკურატურამ 513 ადამიანზე დაიწყო გამოძიება „შეურაცხყოფის“ მუხლით, რაც ხუთ წლამდე პატიმრობას ითვალისწინებს.

„სტატისტიკაში მას მხოლოდ მისი კოლეგა, ეკონომიკის მინისტრი რობერტ ჰაბეკი უსწრებს, რომლის მიმართვის საფუძველზე 805 ადამიანი არის გამოძიების ქვეშ. გამოდის, რომ ეს მინისტრები დღე-ნახევარში ერთხელ წერენ საჩივარს თავიანთი მოქალაქეების წინააღმდეგ და ესეც საკითხავია, სამინისტროს როდის ხელმძღვანელობენ. სხვათა შორის, ამ ორი მინისტრის მიმართვის გამო ადამიანების დევნის, მათი ბინების ჩხრეკის მაგალითები მოიყვანა აშშ-ის ვიცე-პრეზიდენტმა ჯეი დი ვენსმა მიუნხენის კონფერენციაზე, როდესაც გერმანიის დემოკრატიულ უკუსვლაზე საუბრობდა“, – განაცხადა გურამ მაჭარაშვილმა.

მაჭარაშვილის თქმით, ვინმემ შეიძლება იფიქროს, რომ სახეში დარტყმაზე უარესია ის 513 საქმე, მაგრამ საქმე სულ სხვაგვარადაა.

„შესაძლოა, ვინმემ იფიქროს, რომ სახეში დარტყმაზე უარესი იქნებოდა ის 513 თუ 815 შემთხვევა. ნურას უკაცრავად. ეს არის  შემთხვევები, როდესაც, მაგალითად, ბერბოკს ერთ-ერთმა მოქალაქემ სოციალურ ქსელში „ტერორისტი“ უწოდა ან 58 წლის მამაკაცმა მას  „მსოფლიოში ყველაზე სულელი საგარეო საქმეთა მინისტრი“ უწოდა. ამ ბოლო ეპითეტის ავტორს ქართველებისთვის კარგად ნაცნობმა მიხაელ როთმაც უჩივლა, რომელიც აქ ჭკუას გვასწავლიდა და რომელსაც სოციალურ ქსელში „მშიშარა ქვეშაფსია“ უწოდეს. ამასთან დაკავშირებითაც აღძრეს სისხლის სამართლის საქმე. სხვათა შორის, სასამართლომ ეს ადამიანები 9 600 ევროთი, დაახლოებით 30 000 ლარით დააჯარიმა. ასეთივეა დანარჩენი ასეულობით სისხლის სამართლის საქმეც. ერთი წუთით წარმოიდგინეთ, რა მოხდებოდა, ამ მოქალაქეს ბერბოკისთვის და როთისთვის სახეში რომ შემოერტყა? არა სოციალურ ქსელში დაეწერა, რომ სულელი საგარეო საქმეთა მინისტრიაო, არამედ სახეში რომ გაერტყა, როგორც ამაღლობელმა გაარტყა პოლიციელს, მაშინ რას უზამდნენ ამ მოქალაქეებს გერმანიაში? ეს ადვილი წარმოსადგენია, განსაკუთრებით ფარისეველი საგარეო საქმეთა მინისტრის ფონზე. ახლა ისიც წარმოვიდგინოთ, რა შეფასება ექნებოდა იმავე სამინისტროს, ჩვენს რომელიმე ერთ მინისტრს რომ მიემართა პროკურატურისთვის 513 მოქალაქის საწინააღმდეგოდ და მეორე მინისტრს – 815 მოქალაქის საწინააღმდეგოდ? ხომ ატყდებოდა ერთი ამბავი ე.წ. კრიტიკულ მედიებში – ჩვენი მინისტრები რითი არიან დაკავებულებიო“, – აღნიშნა გურამ მაჭარაშვილმა.

ცნობისთვის, გერმანიის საგარეო საქმეთა სამინისტრომ მზია ამაღლობელთან დაკავშირებით გაავრცელა განცხადება, სადაც ნათქვამია: „ ქართველი ჟურნალისტი მზია ამაღლობელი ერთ თვეზე მეტხნიანი პატიმრობის შემდეგ სასამართლოს წინაშე წარდგება, ის დაუყოვნებლივ უნდა იქნას გათავისუფლებული“.