პარტიაში ჯერ არ გვიმსჯელია არ თემაზე და გადაწყვეტილება მიღებული არ გვაქვს, – ასე პასუხობს „გახარია საქართველოსთვის“ ერთ-ერთი ლიდერი, ზვიად ძიძიგური კითხვას, მიღებს თუ არა ადგილობრივი თვითმმართველობის არჩევნებში მონაწილეობას პარტია „გახარია საქართველოსთვის“.

ზვიად ძიძიგურმა ტელეკომპანია „პალიტრანიუსის“ გადაცემა „რეზიუმეში“ განაცხადა, რომ მნიშვნელოვანი ბერკეტი იქნება, თუ ადგილობრივ თვითმმართველობის არჩევნებზე „პროტესტის მონაწილეები თბილისის ან ბათუმის მერს წაართმევენ ხელისუფლებას“.

„ჩემს მოსაზრებას გეტყვი ყოველგვარი მიკიბ-მოკიბვის გარეშე. ადგილობრივი თვითმმართველობის არჩევნებში თბილისის ან ბათუმის მერი რომ წაართვას პროტესტანტებმა ხელისუფლებას, ეს მნიშვნელოვანი ბერკეტია თუ არა? გადაწყვეტილება ადგილობრივი თვითმმართველობის არჩევნებში მონაწილეობაზე ან არ მონაწილეობაზე არ მიგვიღია იმიტომ, რომ ჯერ არ ყოფილა ამ თემებზე ლაპარაკი.

არ არის ეს თემა აქტუალური, მაგრამ ის, რომ წინასწარ ყველამ გადაწყვიტოს, რომ მოდი, არ მივიღოთ მონაწილეობა და ტელევიზიით ელაპარაკონ ოპოზიციური პარტიები ამაზე ერთმანეთს, ეს არ არის სწორი, და ღალატი იქნება. მონაწილეობის არმიღებაზე ადვილი არაფერია, არც ფულს დახარჯავ, არც ხალხში ივლი, არც რამეს დააორგანიზებ და თან იტყვი, არ მინდა, ამ ცესკოს პირობებში არ მივიღებ მონაწილეობას. მართალი და გამართული პოზიცია გექნება და იჯექი სახლში, მაგრამ დაიძინებს ბიძინა ივანიშვილის ხელისუფლება ამაღამ და არ გაიღვიძებს ხვალ? ძალიან მნიშვნელოვანი პოლიტიკური თემაა და ამაზე ასე ჰაიჰარად საუბარი არ შეიძლება“, – განაცხადა ზვიად ძიძიგურმა.

„თუ ვინმეს არ აქვს უფლება, ხმა ამოიღოს ანაკლიის პორტზე, ეს არის ბატონი ხაზარაძე“, – ასე გამოეხმაურა  საპარლამენტო უმრავლესობის წევრი რატი იონათამიშვილი, ანაკლიის პორტის შესახებ კოალიცია „ძლიერი საქართველოს“ ლიდერის მამუკა ხაზარაძის განცხადებას.

მისი თქმით, ხაზარაძეს სინდისის ნატამალი რომ ჰქონდეს, ქართულ პოლიტიკაში ყოფნაზე უარს იტყოდა. 

„თუ ვინმეს არ აქვს უფლება, ხმა ამოიღოს ანაკლიის პორტზე, ეს არის ბატონი ხაზარაძე, ვინაიდან მან ჯერ ყველაფერი გააკეთა იმისთვის, რომ ანაკლიის პორტის პროექტი არ შემდგარიყო, ხოლო შემდეგ საერთაშორისო საარბიტრაჟო სასამართლოში უჩივლა საქართველოს, მოითხოვა მილიარდ ნახევარი დოლარის გადახდა საქართველოს მხრიდან, საბოლოოდ, წააგო ეს საქმე და თვითონ მოუწია 650 000 დოლარის გადახდა.

ჩვენ ვიცით ამ ადამიანის სტანდარტი რა არის ზოგადად და, შესაბამისად, არც მის სიტყვას, არც პოზიციას არანაირი ფასი არ აქვს. მას რომ რაიმე ნატამალი გააჩნდეს სინდისის, ვფიქრობ, ქართულ პოლიტიკაში ყოფნაზეც უარს იტყოდა“, – აღნიშნავს იონათამიშვილი.

ეს „მეგობარი აქტია“, თუ თვალთმაქცობის აქტი? სხვა, ნებისმიერი აქტი შეგვიძლია ვუწოდოთ. სახელი „მეგობარი აქტი“ ამ დოკუმენტს ნამდვილად არ ესადაგება, – განაცხადა „დღის ქრონიკასთან“ საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა სენატში, მომავალ კვირას დაგეგმილ „მეგობარი აქტის“ განხილვის საკითხზე საუბრისას.

მათიკაშვილი დარწმუნებულია, რომ ამერიკელ ჯარისკაცებს, რომლებიც ქართველ მებრძოლებთან ერთად იბრძოდნენ ნატოს ეგიდით წარმოებულ საერთაშორისო მისიებში, ნამდვილად არ ესმით მეგობრობა ისე, როგორც ეს ესმის ჯო უილსონს, რომელმაც მისი კარიერის მანძილზე 200-ზე მეტი საკანონმდებლო ინიციატივა დაარეგისტრირა და ერთადერთი იქცა საკანონმდებლო აქტად – მათიკაშვილის თქმით, შედეგად, ერთ-ერთ შტატში საფოსტო განყოფილებებს სახელწოდებები შეეცვალათ.

„200 ინიციატივიდან სხვა მისი არც ერთი არ ქცეულა აქტად. გამოვთქვამ იმედს, რომ აშშ-ის საკანონმდებლო ორგანო ბევრად უფრო შორს მჭვრეტელი იქნება, განსაკუთრებით, „რესპუბლიკური“ ფრთა და იმ აქტს, რომელსაც მეგობრობის გარდა ყველაფერი შეიძლება დავარქვათ და საფუძველს ანტი მეგობრობას უყრის, ბუნებრივია, ამ აქტთან დაკავშირებით ფრთხილად იქნებიან და მის მისაღებად სრულიად გაუგებარ, არამეგობრულ ნაბიჯს არ გადადგამენ“, – აღნიშნა მათიკაშვილმა.

საქართველოს პრემიერ-მინისტრ ირაკლი კობახიძის ოფიციალური ვიზიტი  თურქმენეთში დასრულდა. საქართველოს მთავრობის მეთაური აშხაბადის საერთაშორისო აეროპორტში  თურქმენეთის მინისტრთა კაბინეტის თავმჯდომარის მოადგილე ნოკერგული ატაგულიევმა გააცილა. ოფიციალური ვიზიტი პრემიერმა მედიასთან შეაჯამა.

როგორც ირაკლი კობახიძემ აღნიშნა, საქართველოს ერთ-ერთი მთავარი ამოცანაა, განავითაროს საკუთარი როლი შუა დერეფნის ფარგლებში და ამ კუთხით თურქმენეთთან თანამშრომლობას განსაკუთრებული მნიშვნელობა ენიჭება.

„თურქმენეთი ჩვენთვის არის ძალიან მნიშვნელოვანი ქვეყანა, რომელთანაც გვაკავშირებს მჭიდრო და პოზიტიური პოლიტიკური თანამშრომლობა. საუბარი გვქონდა ეკონომიკურ თანამშრომლობაზე, ამ კუთხით არის ძალიან დიდი სივრცე იმისთვის, რომ განვავითაროთ ურთიერთობები. საქართველოს ერთ-ერთი მთავარი ამოცანაა, განავითაროს საკუთარი როლი შუა დერეფნის ფარგლებში და ამ კუთხით თურქმენეთთან თანამშრომლობას განსაკუთრებული მნიშვნელობა ენიჭება. ჩვენ გვქონდა საუბარი ძალიან კონკრეტულ საკითხებზე, რომელთანაც არის დაკავშირებული ეკონომიკური თანამშრომლობის განვითარება. ასევე მინისტრებს ჰქონდათ საუბარი კონკრეტულ საკითხებზე, ხელი მოეწერა რამდენიმე მნიშვნელოვან შეთანხმებას. ვფიქრობთ, ეს ვიზიტი ხელს შეუწყობს თანამშრომლობის განვითარებას, როგორც პოლიტიკური თვალსაზრისით, ასევე ეკონომიკური კუთხით. ეკონომიკური თანამშრომლობის განვითარების პოტენციალი არის ძალიან დიდი და ამას განსაკუთრებულ ყურადღებას დავუთმობთ”, –  განაცხადა პრემიერ-მინისტრმა.

ცალკეული ქვეყნის ელჩებს, მე მგონი საერთოდ არა აქვთ ვენის კონვენცია წაკითხული. ასეც რომ არ იყოს, აშკარად იკვეთება მათ საქციელში რაღაცა შეხმატკბილებული მცდელობა ქართველ რადიკალ ოპოზიციონერებთან ერთად და იმ ძალებთან ერთად, ვინც გარედან ახდენს ამ შიდა რადიკალების მართვას, რომ ლეგიტიმურ ხელისუფლებას, მის ლეგიტიმაციას, ხალხის და საზოგადოების გადაწყვეტილებას შეუქმნას საფრთხეები. ანუ მოახდინონ საზოგადოების აზრის ნიველირება, ჩვენი ელექტორატის უდიდესი უმრავლესობის გადაწყვეტილებების, – განაცხადა საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილმა უცხო ქვეყნის ელჩების ქართულ სასამართლო პროცესებზე დასწრებაზე საუბრისას გადაცემაში „დღის ქრონიკა“.

„ამ ყველაფერში არიან სამწუხაროდ ჩართულები ცალკეული ქვეყნის ელჩები, რომელთა საქციელიც არაფრის დიდებით არ ჯდება დიპლომატიურობის ფარგლებში. ისინი პირდაპირ ესწრებიან სასამართლო სხდომებს და ცდილობენ მოახდინონ მოსამართლეებზე რაღაც გარკვეული ზეწოლა. რაღაც სამარცხვინო საქციელებს ჩადიან მათი წარმომდგენი ქვეყნები, როდესაც აქ საქართველოს მოსამართლეებს ასანქცირებენ. საერთოდ გაუგებარ და არა თუ მეგობრულ, არამედ არანაირ პარტნიორულ ურთიერთობაში რომ არ ჯდება ისეთ ნაბიჯებზე მიდიან, როგორც ის ქვეყნები, ასევე მათი წარმომდგენი ელჩები. საბოლოო ჯამში ეს კიდევ ერთხელ ჩვენი საზოგადოების თვალში მკაფიოდ უსვამს ხაზს როგორი სწორი, პრინციპული და ეროვნული პოზიცია უკავია ჩვენს ქვეყანას. და თუ არა ეს პოზიცია რა დიდ უბედურებაში შეიძლება გახვეულიყო საქართველო, ისეთში, სადაც არის სამწუხაროდ დღეს ჩვენი მეგობარი უკრაინა“, – აღნიშნა დავით მათიკაშვილმა.

ოპოზიცია ღიად თანამშრომლობს უცხოურ სტრუქტურებთან, რათა დააზიანონ საკუთარი სახელმწიფოს ინტერესები, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს თურქმენეთში განუცხადა.

პრემიერის თქმით, ეს სხვა არაფერია, თუ არა საკუთარი ქვეყნის ღალატი.

„ეს არის სერგო ორჯონიკიძის ხაზი. ასეთი ქმედებები ალბათ ექცევა სისხლის სამართლის კოდექსის ნორმების ქვეშ, თუმცა ეს არის არა ჩემი, არამედ შესაბამისი უწყებების გადასაწყვეტი, მაგრამ დღესავით ნათელია, თუ რას აკეთებენ ეს ადამიანები. ისინი ღიად თანამშრომლობენ უცხოურ სტრუქტურებთან, რათა დააზიანონ საკუთარი სახელმწიფოს ინტერესები. ეს სხვა არაფერია, თუ არა საკუთარი ქვეყნის ღალატი, თუმცა ეს არის ჩემი პოლიტიკური შეფასება. სამართლებრივი შეფასებები უნდა გაკეთდეს შესაბამისი უწყებების მხრიდან“, – განაცხადა პრემიერმა.