23 სექტემბერს პარტიამ „გახარია საქართველოსთვის“ მიმართა ცენტრალურ საარჩევნო კომისიას და მოითხოვა არჩევნების შემდეგ, დაუყოვნებლივ, გახდეს შესაძლებელი ვერიფიკაცია გავლილმა ამომრჩეველმა გადაამოწმოს საკუთარი მონაცემები. კერძოდ, ფიქსირდება თუ არა მისი მონაწილეობა არჩევნებში და რომელ უბანზე ფიქსირდება მის მიერ მიცემული ხმა,- ამის შესახებ ინფორმაციას „გახარია საქართველოსთვის“ ავრცელებს.

პარტიის ცნობით, ეს მოთხოვნა სრულ თანხვედრაშია საქართველოს კანონმდებლობასთან, მათ შორის, პერსონალური მონაცემების მარეგულირებელ კანონმდებლობასთან.

„მოთხოვნილია არა პერსონალური მონაცემების გასაჯაროება, არამედ მოქალაქის წვდომა საკუთარი თავის შესახებ ინფორმაციაზე. ზუსტად ისე, როგორც ამომრჩეველს აქვს შესაძლებლობა, გადაამოწმოს საკუთარი თავი და იპოვოს თავისი საარჩევნო უბანი.

საკუთარი ხმის გადამოწმების შესაძლებლობა ამომრჩეველს უნდა მიეცეს არჩევნების შემდეგ, შესაბამისად, ცესკოს მხრიდან არგუმენტად ვერ მიიღება არჩევნებამდე დარჩენილი დღეების რაოდენობა.

ანალოგიური მოთხოვნა პარტიამ „გახარია საქართველოსთვის“ 2024 წლის არჩევნების შემდეგაც დააყენა. თუმცა, მაშინ სისტემამ, ფაქტობრივად, ეს მონაცემები დამალა და სიმართლის დადგენის შესაძლებლობა მძევლად აიყვანა.

2024 წლის არჩევნების შემდეგ, „ოცნებამ“ საარჩევნო გარემო კიდევ უფრო დაამძიმა, შეცვალა კანონმდებლობა და სრულად მოარგო საკუთარ პარტიულ ინტერესებს.

ასევე, პარტიამ „გახარია საქართველოსთვის“ საზოგადოებას არაერთხელ მიაწოდა ინფორმაცია იმ ზეწოლებისა და დაშინებების შესახებ, რასაც „ოცნება“ აქტიურად იყენებს კანდიდატების წინააღმდეგ, რის შედეგადაც რამდენიმე პირმა რეგისტრაციის შემდეგ საკუთარი კანდიდატურა ჩახსნა.

საზოგადოებისთვის ცნობილია, რომ მომავალ არჩევნებს ფაქტობრივად არცერთი სანდო საერთაშორისო ორგანიზაცია არ დააკვირდება“,- აღნიშნულია ინფორმაციაში.

ყველას ვაფრთხილებ, 4 ოქტომბერს ერთი ფაქტიც თუ იქნება ძალადობისა, ამაზე პასუხისმგებლობა გაზიარებული ექნება ევროკავშირის იმ ინსტიტუტების წარმომადგენლებს, რომლებიც ასე იხუტებენ გულში ამ მოძალადეებს, – ამის შესახებ პარლამენტის თავმჯდომარემ, შალვა პაპუაშვილმა ჟურნალისტებთან 4 ოქტომბერს დაგეგმილ საპროტესტო აქციაზე საუბრისას განაცხადა.

მისი თქმით, „ბრიუსელში შეხვედრები და სოლიდარობის გამოცხადება 4 ოქტომბრის დაანონსებული ძალადობრივი ღონისძიების მიმართ ევროკომისიისა და ევროპული სტრუქტურების მიერ პასუხისმგებლობის გაზიარებაა.“

„არჩევნების დღეს, კრიმინალური წარსულისა და აწმყოს მქონე „ნაციონალური მოძრაობა“ – მოძალადე ჯგუფი, აორგანიზებს ძალადობრივ აქციას და ამას სოლიდარობას უცხადებს ევროკომისიის პრესმდივანი. დღეს, როგორც ვნახეთ, „ნაცმოძრაობის“ წარმომადგენლები იმყოფებიან ბრიუსელში და საკუთარივე განცხადებებით, შეხვდნენ ევროკომისიის წარმომადგენლებს ევროპარლამენტში.

ჩვენ არ გვსმენია მეორე მხრიდან განცხადება, რომ მათ „ნაცმოძრაობას“ მოუწოდეს 4 ოქტომბერს ძალადობაზე თქვან უარი. შესაბამისად, ასეთი შეხვედრები და სოლიდარობის გამოცხადება 4 ოქტომბრის დაანონსებული ძალადობრივი ღონისძიების მიმართ მათ მიერ არის პასუხისმგებლობის გაზიარება.

შესაბამისად, ერთი ქვაც თუ გავარდა 4 ოქტომბერს პოლიციელის მიმართულებით ან სხვა მიმართულებით, ძალადობის ერთი ფაქტი თუ დავინახეთ „ნაცმოძრაობის“ მიტინგიდან, აღარ ვსაუბრობ იმაზე, მაშხალებსა და „მოლოტოვის კოქტეილებს“ თუ მოიტანენ, ამაზე პასუხისმგებლობა უკვე გაზიარებული აქვს ევროკომისიას და ევროპულ სტრუქტურებს მათი განცხადებებითა და ხელის ჩამორთმევებით.

გუშინ საელჩოების განცხადება იყო, რომ მათ ყველასთან შეხვედრის შესაძლებლობა აქვთ – უნდათ კრიმინალური წარსულის მქონე „ნაციონალური მოძრაობის“ წარმომადგენლებთან შეხვედრა? უნდათ შეხვდნენ ადამიანებს, რომლებსაც 4 ოქტომბერს ძალადობა აქვთ დაანონსებული? შეხვდნენ. მაგრამ მაშინ თავადაც საჯაროდ განაცხადონ, რომ ისინი მოუწოდებენ, რომ არ იყოს არანაირი ძალადობა 4 ოქტომბერს, იმიტომ, რომ მათი სიჩუმე არის მხოლოდ წახალისება მოძალადეებისა. ყველას ვაფრთხილებ, 4 ოქტომბერს ერთი ფაქტიც თუ იქნება ძალადობისა, ამაზე პასუხისმგებლობა გაზიარებული ექნება ევროკავშირის იმ ინსტიტუტების წარმომადგენლებს, რომლებიც ასე იხუტებენ გულში ამ მოძალადეებს“, – განაცხადა პაპუაშვილმა.

ამავე თემაზე საუბრისას პაპუაშვილმა აღნიშნა, რომ „ნაცმოძრაობის“, პოლიტიკური ბედი გადაწყვეტილია, თუმცა „ამ ნაღვერდალს, ერთადერთი, სულს უბერავენ გარედან.“

„ძალადობა აქვთ დაანონსებული, ლაპარაკს რომ არ უნდა დავუჯეროთ, სისულელეებს რომ ლაპარაკობენ, მშვიდობიანად დაგხოცავთ ყველასო, ასე ხომ არ არის?

ეს არის კრიმინალური დაჯგუფება – „ნაცმოძრაობა“, რომლის პოლიტიკური ბედი გადაწყვეტილია. ამ ნაღვერდალს, ერთადერთი, სულს უბერავენ გარედან. ამიტომ აქ მნიშვნელოვანი არ არის, რას გეგმავს „ნაცმოძრაობა“, რა იდეები და ჩანაფიქრები აქვს. აქ მნიშვნელოვანი არიან ის დიპლომატები თუ უცხოელი პოლიტიკოსები, რომლებიც ასეთ ადამიანებთან ურთიერთობენ და შემდეგ იმასაც არ კადრულობენ, თქვან, რომ ემიჯნებიან.

მათ შორის, პრესმდივნის განცხადება ყველაფერთან ერთად იყო ჩარევა საქართველოს არჩევნებში, ვინაიდან მან თქვა, რომ არჩევნების დღეს უნდა ჩატარდეს მიტინგიო. ევროპასთან პრესმდივნის იმ განცხადებას რაიმე კავშირის აქვს საერთოდ? სოლიდარობის გამოცხადება ნიშნავს, რომ მათ შორის, მოუწოდებს მოქალაქეებს, რომ „მიდით აქციაზე“, – განაცხადა შალვა პაპუაშვილმა.

დონალდ ტრამპმა კიდევ ერთხელ დაადასტურა თავისი არაპროგნოზირებადი პოლიტიკოსის რეპუტაცია. უკრაინის პრეზიდენტ ვოლოდიმირ ზელენსკისთან შეხვედრის დროს მისი განცხადებები და TruthSocial-ზე გამოქვეყნებული პოსტი ქმნის შთაბეჭდილებას, რომ ამერიკის პრეზიდენტის საგარეო პოლიტიკა რუსეთის მიმართ სრულიად შეიცვალა. ტრამპმა დადებითად უპასუხა ჟურნალისტის კითხვას, უნდა ჩამოაგდოს თუ არა ნატომ რუსული თვითმფრინავები, რომლებიც ალიანსის წევრი ქვეყნების საჰაერო სივრცეს არღვევენ.

ტრამპის პოსტი TruthSocial-ზე სავსეა სენსაციური განცხადებებით. „უკრაინა, ევროკავშირის მხარდაჭერით, მზადაა იბრძოლოს და დაიბრუნოს მთელი თავისი ტერიტორია თავდაპირველი საზღვრების ფარგლებში. დროთა განმავლობაში, ევროპის და განსაკუთრებით ნატოს მოთმინებითა და ფინანსური მხარდაჭერით, იმ თავდაპირველი საზღვრების დაბრუნება, სადაც ეს დაპირისპირება დაიწყო, სრულიად შესაძლებელია. რატომაც არა? რუსეთი სამწელიწად-ნახევარია იბრძვის უაზრო კონფლიქტში, რომელიც ნამდვილ სამხედრო ძალას ერთ კვირაზე ნაკლებ დროში უნდა მოეგო. ეს რუსეთს არ გამოარჩევს. პირიქით, ეს მას სულ უფრო მეტად „ქაღალდის ვეფხვს“ ამგავსებს“, – წერს ტრამპი.

ეს ფრაზა მტკივნეული დარტყმაა რუსეთის პრეზიდენტის, პუტინის ეგოსთვის, რომელიც ყველა ხერხს ხმარობს, რომ ძლიერი და დაუმარცხებელი ლიდერი ჩანდეს. ტრამპი საგარეო პოლიტიკას უცხოელ ლიდერებთან პირადი ურთიერთობების პრიზმიდან უყურებს. ის დიდი ხანია ხაზს უსვამდა პუტინთან კარგ ურთიერთობას და საარჩევნო კამპანიის დროს ამტკიცებდა, რომ ამ ურთიერთობის წყალობით, მას შეეძლო ომის დასრულება 24 საათში. თუმცა, პუტინმა ომი არ გააჩერა, არამედ გამოიყენა ტრამპთან ურთიერთობა მოლაპარაკებების გაჭიანურებისა და ფრონტის ხაზზე შეტევის გასაგრძელებლად.

როგორც ჩანს, ტრამპის მოთმინება ამოიწურა. შესაძლებელია, რომ ამერიკის პრეზიდენტის მიერ ნობელის მშვიდობის პრემიის მოგების დაკარგულმა იმედმაც ითამაშა როლი და, მისი აზრით, ამაში პუტინია დამნაშავე.

ტრამპის პირად წყენას აძლიერებს ჩინეთთან მისი სატარიფო ომის წარუმატებლობა, ინდოეთთან ურთიერთობების გაუარესება და შეერთებულ შტატებში ეპშტეინის ფაილების გარშემო ატეხილი სკანდალები. ტრამპისთვის უკრაინაში ომი მძიმე ტვირთად იქცა, რაც მის ისედაც რთულ მდგომარეობას აუარესებს.

ტრამპის პოსტის ბოლო ნაწილში ნათქვამია: „პუტინი და რუსეთი სერიოზულ ეკონომიკურ პრობლემებს განიცდიან და ახლა უკრაინის მოქმედების დროა. ნებისმიერ შემთხვევაში, ორივე ქვეყანას საუკეთესოს ვუსურვებ. ჩვენ გავაგრძელებთ ნატოს იარაღის მიწოდებას, რათა ალიანსმა გამოიყენოს ისე, როგორც საჭიროდ ჩათვლის. წარმატებებს გისურვებთ ყველას!“

ტრამპი პროგნოზირებს, რომ ევროპისა და ნატოს მხარდაჭერით, უკრაინა გაიმარჯვებს. შეერთებული შტატები გააგრძელებს ნატოს იარაღის მიწოდებას. თუმცა, შეერთებული შტატები პირდაპირ არ მიიღებს მონაწილეობას ამ კონფლიქტში და არც სამშვიდობო მოლაპარაკებებში. პონტიუს პილატეს მსგავსად, ტრამპი ხელებს იბანს. ის იშორებს პოლიტიკურ ბარგს, რომელმაც მხოლოდ დანაკარგები მოუტანა და საზოგადოების ყურადღებას შეერთებულ შტატებსა და  მსოფლიოში არსებულ სხვა პრობლემებზე გადაიტანს.

ომი უკრაინაში გაგრძელდება მანამ, სანამ ერთი მხარე არ ამოწურავს თავის რესურსებს. გაჭიანურებულ სამხედრო კონფლიქტებში იმარჯვებს ის მხარე, რომელსაც ყველაზე მეტი რესურსი აქვს. სწორედ ეს იგულისხმა ტრამპმა უკრაინაში ომის შედეგის პროგნოზირებისას.

ალექსანდრე წულაძე- პოლიტოლოგი